ခ့ၣ်အဲးစံၣ် – KIC News

လါနိၣ်၀့ဘၢၣ် ၂၃ သီႇ ၂၀၂၂ နံၣ်ႇ ခ့ၣ်အဲးစံၣ် လၢကီးတရံးကီၢ်ဆၣ် ကလံၤထံးဒူသ၀ီတကပၤန့ၣ် စးထီၣ်ဖဲအပူၤကွံာ်လါအီးကထိဘၢၣ်တုၤလၢခဲအံၤတစု လီတဲစိအကျိၤလီၤမၢ်ကွံာ်၀ဲလၢသ၀ီအဖျၢၣ်(၃၀)ဘျဲၣ်အပူၤအဂ့ၢ်န့ၣ် လီၢ်က၀ီၤကမျၢၢ်တဖၣ်စံး၀ဲန့ၣ်လီၤႉ လၢကီးတရံးကီၢ်ဆၣ် ကလံၤထံး ကျ့းသ၀ီလီၢ်က၀ီၤတကပၤန့ၣ် လီတဲစိအကျိၤလီၤမၢ်၀ဲဒီး စးထီၣ်ဖဲအပူၤကွံာ်လါအီးကထိဘၢၣ် ၂၉ သီအနံၤန့ၣ် လီတဲစိအကျိၤလီၤမၢ်ကွံာ်၀ဲလၢကီးတရံးကီၢ်ဆၣ် ကလံၤထံး သ၀ီခဲလၢာ်ဃၣ်ဃၣ်အပူၤအဂ့ၢ်န့ၣ် ကီးတရံးကီၢ်ဆၣ်ကလံၤထံး လါဖါသ၀ီဖိတဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“လီတဲစိအကျိၤလီၤမၢ်ဆိလၢကၠဲးဒိတကပၤန့ၣ်မီၤနီၤႉစးထီၣ်ဖဲအပူၤကွံာ်လါအီးကထိဘၢၣ် ၂၉ သီန့ၣ် လီတဲစိအကျိၤလီၤမၢ်ကွံာ်လၢသ၀ီခဲလၢာ်အပူၤလီၤႉန့ၢ်က့ၤထဲသ၀ီလၢအိၣ်ဘူးဒီး၀့ၢ်ပူၤတဖၣ်လီၤႉ သ၀ီလၢလီတဲစိအကျိၤလီၤမၢ်န့ၣ်ကအိၣ်အဖျၢၣ် ၃၀ ဘျဲၣ်ညါ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လီၢ်က၀ီၤဖဲန့ၣ််အပူၤခီဖျိတၢ်ဒုးကဲထီၣ်၀ဲတလီၢ်လီၢ်အဃိလီၢ်က၀ီၤကမျၢၢ်တဖၣ်ကဟးထီၣ်က့ၤလီၤအဂီၢ်န့ၣ်အါဒၣ်တက့ၢ်သံဒိးသံကွၢ်၀ဲကျဲတၢ်အိၣ်သးအံၤလၢလီတဲစိတဆီဒီးခီဖျိလီတဲစိအကျိၤလီၤမၢ်အသီယံၤထီၣ်အဃိ ဘၣ်ဟးထီၣ်က့ၤလီၤလၢတၢ်ပလီၢ်ပဒီတၢ်ဘၣ်ယိၣ်ဘၣ်ဘှီအပူၤလီၤအဂ့ၢ်န့ၣ်လီၢ်က၀ီၤဖိတဖၣ်စံး၀ဲန့ၣ်လီၤႉ ကီးတရံးကလံၤထံးလီၢ်က၀ီၤဖိလၢအလဲၤၦ့ၤတၢ်လၢကီးတရံး၀့ၢ်ပူၤတဂၤစ့ၢ်ကီးစံး၀ဲလၢ“တနံၤညါအံၤနါက့ပနၢ်ဟူကျိဖးဒိၣ်သီၣ်ဒံးမီၤနီၤႉလီတဲစိအကျိၤမ့န့ၢ်န့ၣ်ပသံကွၢ်သံဒိးကျဲတၢ်အိၣ်သးသ့ဒံးမီၤနီၤႉခဲအံၤကလဲၤလၢကီးတရံး၀့ၢ်န့ၣ်ဘၣ်သံကွၢ်တခီခီႇဘၣ်ကနၣ်ဘၣ်လဲၤလၢတၢ်ပျံၤတၢ်ဖုးတၢ်ဘၣ်ယိၣ်ဘၣ်ဘှီအပူၤလီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ် ဖဲမဟါလါနိၣ်၀့ဘၢၣ် ၂၂ သီအနံၤန့ၣ်လီၤႉ လၢကီးတရံးကီၢ်ဆၣ်ကလံၤထံးတကပၤန့ၣ်တၢ်ဒုးကဲထီၣ်၀ဲလၢပယီၤသုးဒီးဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်အဘၢၣ်စၢၤခဲအံၤခဲအံၤအသိးလီတဲစိအတၢၣ်လၢအိၣ်ဟီၣ်က၀ီၤဖဲန့ၣ်အပူၤတဖၣ်စ့ၢ်ကီးတၢ်ကီတၢ်ခဲအိၣ်လၢတၢ်ကလဲၤထၢနုာ်မၤၦဲၤလီတဲစိအတၢၣ်စဲးဖီကဟၣ်အသိအံၤအဃိလီတဲစိအကျိၤဘၣ်လီၤမၢ်၀ဲဒ်အံၤလီၤအဂ့ၢ်န့ၣ်လီၢ်က၀ီၤကမျၢၢ်စံး၀ဲန့ၣ်လီၤႉ

လါနိၣ်၀့ဘၢၣ် ၂၃ သီႇ ၂၀၂၂ နံၣ်ႇ ခ့ၣ်အဲးစံၣ် စးထီၣ်ဖဲအပူၤကွံာ်လါဒံၣ်စ့ဘၢၣ်ခီဖျိတၢ်ဒုးကဲထီၣ်အဃိလ့က့ၣ်ကိာ်လီၢ်က၀ီၤကမျၢၢ်တဖၣ်ဘၣ််ဃ့ၢ်ထီၣ်၀ဲဒီး ဖဲတလါအံၤလါနိၣ်၀့ဘၢၣ်သၢနွံတနွံအခါန့ၣ်ပယီၤသုး(၄၄)သုးတြိၤခိၣ်ဟးကရၢကရိလ့ၣ်က့ၣ်ကိာ်ၦၤဃ့ၢ်မှံဟးဖျိးတဖၣ်လၢကဟဲက့ၤအိၣ်လၢနီၢ်ကစၢ်လီၢ်ကျဲအဂ့ၢ်န့ၣ်သ့ၣ်ညါဘၣ်လၢလီၢ်က၀ီၤၦၤဃ့ၢ်မှံဟးဖျိးတဖၣ်အအိၣ်န့ၣ်လီၤႉ လ့က့ၣ်ကိာ်လီၢ်က၀ီၤ(က၀ီၤဒ့ ၅)ဘ့ၣ်ဃုာ်ဒီးပဟံၣ်ကျီးႇထံမဲး၀ါခံႇယသ့ၣ်ကူၤသ၀ီ လီၢ်က၀ီၤကမျၢၢ် လၢအလဲၤစံၣ်အိၣ်ဖဲသူမှဲကျိကၢၢ်နံၤဒီတကျိၤအံၤသ့ၣ်တဖၣ် လ့က့ၣ်ကိာ်(စွဲၤတီၤ)ကျိဖးဒိၣ်လူၢ် ပယီၤသုး(၄၄)သုးတြိၤခိၣ်အံၤ ဟဲကရၢကရိၦၤဃ့ၢ်မှံဟးဖျိးသ့ၣ်တဖၣ်အံၤလၢကက့ၤအိၣ်လၢနီၢ်ကစၢ်တၢ်လီၢ် တၢ်ကျဲအဂ့ၢ်န့ၣ် ထံမဲး၀ါခံလီၢ်က၀ီၤကမျၢၢ်ပိာ်မုၣ်တဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ပယီၤသုး(၄၄)သုးတြိၤခိၣ်ဟဲတဲသ၀ီဖိတဖၣ်မီၤနီၤႉတဲ၀ဲလၢမၢက့ၤအိၣ်လၢကစၢ်တၢ်လီၢ်တၢ်ကျဲမီၤနီၤႉအ၀ဲသ့ၣ်ကမၤဆှဲန့ၢ်၀ဲမ့ၣ်ပိၢ်ဒီးကမၤပျီစၢၤ၀ဲတၦီာ်တဖၣ်မီၤနီၤႉတၢ်ကဲထီၣ်သးခဲအံၤတမ့ၢ်အကဲထီၣ်သးဒီးကညီကရူၢ်ဘၣ်တဲ၀ဲဒ်န့ၣ်ႉမၢခ့ၣ်အဲၣ်ယူၣ်ကညီဟံၣ်ဖိဃီဖိဟဲက့ၤအိၣ်မီၤနီၤႉတဲ၀ဲလၢအ၀ဲသ့ၣ်ဒုးတၢ်ခဲအံၤန့ၣ်ဒုး၀ဲဒၣ်(ၦၤလၢအယူာ်ထီၣ်စုသၢဘိ)ၦၤလၢအထီဒါသုးမီၤစိရိၤတဖၣ်လီၤႉတဲ၀ဲလၢတဘၣ်တူူၢ်လိာ်(စုသၢဘိ)အၦၤတဖၣ်ဘၣ်မီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဘၣ်ဆၣ်လီၢ်က၀ီၤကမျၢၢ်တဖၣ်ခီဖျိဘၣ်ပျံၤဘၣ်၀ဲပယီၤသုးလၢညါခါလံၤလံၤလံအဃိတၢ်ဟဲကရၢကရိအ၀ဲသ့ၣ်အံၤအဖီခိၣ်န့ၣ်တၢ်နာ်အီၣ်ပယီၤသုးတအိၣ်၀ဲဘၣ်ဒီးအ၀ဲသ့ၣ်အဟံၣ်အဃိတဖၣ်စ့ၢ်ကီးပယီၤသုးနုာ်လီၤမၤဟးဂီၤက့ၤစိာ်တၢ်ဖိိတၢ်လံၤလၢအလုၢ်ဒိၣ်ၦ့ၤဒိၣ်တဖၣ်အဃိဘၣ်စးထီၣ်ကဒါက့ၤတၢ်အိၣ်မူလၢအခီၣ်ထံးအဂ့ၢ်န့ၣ် ၦၤဃ့ၢ်မှံဟးဖျိးပိာ်မုၣ်တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ မၠၣ်၀တံၣ်၀့ၢ်ကလံၤထံး ဖလူ–ဆိၣ်စံမၠဲၣ်–ဂီၤလ့ၤ ကျဲဒီတကျိၤန့ၣ် ဒူသ၀ီအဖျၢၣ်(၂၀)ဘျဲၣ် လီၢ်က၀ီၤကမျၢၢ် ဘၣ်ဃ့ၢ်မှံဟးဖျိး၀ဲတကလးဃၣ်ဃၣ်ညါဒီးၦၤသ့ၣ်တဖၣ်အံၤဘၣ်ဃ့ၢ်မှံဟးဖျိးန့ၢ်၀ဲ(၁၁)လါလံန့ၣ်လီၤႉကတီၢ်ခဲအံၤလၢလ့က့ၣ်ကိာ်လီၢ်က၀ီၤအပူၤခီဖျိခံခီခံကပၤတၢ်ခးလိာ်သးလီၤစှၤထီၣ်လံအဃိဖလူႇမ့လဲၣ်ပၤႇပဟံၣ်ကျီးႇထံမဲး၀ါခံသ၀ီလီၢ်က၀ီၤကမျၢၢ်စးထီၣ်ဟဲက့ၤအိၣ်လၢသ၀ီပူၤကအိၣ်အဂၤ(၁၀၀၀)ဃၣ်ဃၣ်လံအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဂံၢ်ခီၣ်ထံးၦၤဟ့ၣ်တၢ်ကစီၣ်ဖိတဖၣ်အအိၣ်န့ၣ်လီၤႉ ဘၣ်ဆၣ်ကျဲလၢအဆဲဘူးလိာ်သးဒီးမၠၣ်၀တံၣ်၀့ၢ်အံၤတဖၣ်ခီဖျိပယီၤသုးအိၣ်ခိးသမံသမိးတၢ်ဒီးဃ့ဆူၣ်ဃ့စိးစ့လၢတၢ်ဘၢၣ်စၢၤအိၣ်အဃိဒ်သိးလီၢ်က၀ီၤသ၀ီဖိတဖၣ်ဟးထီၣ်က့ၤလီၤလၢ၀့ၢ်ပူၤကညီအဂီၢ်န့ၣ်ဒူသ၀ီခိၣ်နၢ်တဖၣ်မၤန့ၢ်၀ဲကမျၢၢ်တဖၣ်လၢတၢ်အုၣ်သးကးအဂ့ၢ်န့ၣ်လ့က့ၣ်ကိာ်ၦၤဃ့ၢ်တၢ်ဒုးဖိလၢအဂၤတဂၤစ့ၢ်ကီးစံး၀ဲဒ်အံၤန့ၣ်လီၤႉ “လါဒံၣ်စ့ဘၢၣ်ခဲကၢာ်န့ၣ်တၢ်ရဲၣ်တၢ်ကျဲၤအိၣ်လၢကက့ၤအိၣ်လၢလ့က့ၣ်ကိာ်မီၤနီၤႉခဲအံၤထံမဲး၀ါခံသ၀ီဖိက့ၤအိၣ်တနီၤလံႉၦၤလၢအစးထီၣ်အိၣ်လၢလ့က့ၣ်ကိာ်ကဲထီၣ်သီအခါတဖၣ်န့ၣ်အ၀ဲသ့ၣ်ဘၣ်ကွဲးလီၤ(form)ႇဒိတၢ်ဂီၤမ့၀ံၤန့ၣ်ၦၤထုးထီၣ်န့ၢ်၀ဲဟံၣ်ဖိဃီဖိအကးမီၤနီၤႉပနၢ်ဟူလၢ(က၀ီၤဒ့ ၁)ကစးထီၣ်က့ၤအိၣ်၀ဲမီၤနီၤ” အဂ့ၢ်န့ၣ် လီၢ်က၀ီၤကမျၢၢ်လၢဘူးဒီးၦၤဃ့ၢ်မှံဟးဖျိးသ၀ီသးၦၢ်တဂၤစံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ကတီၢ်ခဲအံၤတၢ်ဒုးကဲထီၣ်ဒံး၀ဲတပယူာ်ဃီတကးဒံးဘၣ်အမဲာ်ညါပယီၤသုးဒိးလီၤဃာ်မ့ၣ်ပိၢ်လၢလ့က့ၣ်ကိာ်လီၢ်က၀ီၤအိၣ်ဒံး၀ဲအဃိအလီၢ်အိၣ်လၢတၢ်ကမၤဆှဲလဲကွံာ်မ့ၣ်ပိၢ်အဂ့ၢ်န့ၣ်ကမျၢၢ်တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ လၢမၠၣ်၀တံၣ်၀့ၢ် ကလံၤထံး လ့က့ၣ်ကိာ်–သ့ၣ်ဘီဘိ–ဂီၤလ့ၤကျဲဒီတကျိၤန့ၣ် ပယီၤသုးနုာ်လီၤမၤတၢ်ထီၣ်ဒုးအိၣ်လၢ(၁၁)လါဃၣ်ဃၣ်လံဘၣ်ဆၣ်ခီဖျိဘၣ်တၢ်က့ၤထီၣ်ဒုးခီၣ်ဆၢကဒါအ၀ဲသ့ၣ်လၢကညီီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်တဖၣ်အဃိတုၤလၢခဲအံၤပယီၤသုးလုၢ်ဘၢဒိၣ်စိ၀ဲကီၢ်ကၠီၣ်တဲၣ်–ကီၢ်ပယီၤကီၢ်တၢ်လီၢ်သ့ၣ်တဖၣ်တန့ၢ်ဒံး၀ဲဘၣ်အဂ့ၢ်န့ၣ်(KNLA)သုးပာ်ဖှိၣ် ဂံၢ်ခီၣ်ထံးၦၤဟ့ၣ်တၢ်ကစီၣ်ဖိ ပဲာ်ထံနီၤဖးစံး၀ဲန့ၣ်လီၤႉ

လါနိၣ်၀့ဘၢၣ် ၂၂ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ်(သုးက့ ၆)ဟီၣ်က၀ီၤ ကြုၢ်တုကီၢ်ဆၣ်အပူၤန့ၣ် ဖဲလါမဟါလါနိၣ်၀့ဘၢၣ် ၂၁ သီ ဂီၤခီ ၇ နၣ်ရံၣ်ဃၣ်ဃၣ်အဆၢကတီၢ် ပယီၤသုးဂံၢ်ဘါအဂၤ(၁၀၀)ဘျဲၣ်နုာ်လီၤလၢ (လီကဲၤ)သ၀ီပူၤဒီးခးတပျုာ်တပျီာ်ကျိဖးဒိၣ်တပယူာ်ဃီအဃိလီၢ်က၀ီၤကမျၢၢ်ဘၣ်ဃ့ၢ်ထီၣ်၀ဲသ၀ီဒီတဖျၢၣ်ညါ အဂ့ၢ်န့ၣ်သ့ၣ်ညါဘၣ်န့ၣ်လီၤႉ ဖဲလါနိၣ်၀့ဘၢၣ် ၂၀ သီအနံၤန့ၣ် ပယီၤသုးတဖၣ်အံၤနုာ်လီၤဆူ(နီၤတလၤ)သ၀ီပူၤ၀ံၤအလီၢ်ခံမုၢ်ဆ့ၣ်ထီၣ် ၂၁ သီ ဂီၤခီအဆၢကတီၢ်န့ၣ်ဟဲတုၤ၀ဲဒၣ်လၢ(လီကဲၤ)သ၀ီသီခါဖၠၣ်အခိၣ်အဃၢၤဒီးခးတပျုာ်တပျီာ်၀ဲကျိဖးဒိၣ်ကျိဖိ တပယူာ်ဃီအဂ့ၢ်န့ၣ်လီၢ်က၀ီၤကမျၢၢ်တဂၤစံး၀ဲဒ်အံၤန့ၣ်လီၤႉ “အ၀ဲသ့ၣ်ဟဲတုၤလၢ(နီၤတလၤ)သ၀ီပူၤလၢမဟါန့ၣ်လံႉတဂီၤညါအံၤအ၀ဲသ့ၣ်လဲၤဆှၣ်တၢ်လၢတီၤကၠၤအ့တၢ်ဆါဟံၣ်အလီၢ်ခံကစၢၢ်ခီၣ်ထံးကျဲန့ၣ်၀ံၤမးဟဲတုၤ၀ဲလၢ(လီကဲၤ)သ၀ီပူၤလီၤႉဟဲထီၣ်တခီခီခးတၢ်တခီခီီလီၤႉအ၀ဲသ့ၣ်ခးကျိဖးဒိၣ်ဒီဒူၣ်ညါႉစးထီၣ်ခး၀ဲလၢဂီၤခီတုၤလၢဟါခီန့ၣ်ခး၀ဲတပယူာ်ဃီလီၤ” အဂ့ၢ်န့ၣ်လီၢ်က၀ီၤကမျၢၢ်တဂၤဃီ၀ဲန့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲမဟါလါနိၣ်၀့ဘၢၣ် ၂၁ သီအနံၤန့ၣ်လီၤ ႉ ပယီၤသုးလၢအနုာ်လီၤလၢသ၀ီပူၤသ့ၣ်တဖၣ်အံၤခီဖျိခးတပျုာ်တပျီာ်ကျိဖးဒိၣ်ကျိဖိတဖၣ်အဃိ တီၤကၠၤအ့သ၀ီႇနီၤတလၤႇလီကဲၤႇဖါကၠၣ်သ၀ီလီၢ်က၀ီၤကမျၢၢ်ဘၣ်ဃ့ၢ်ထီၣ်၀ဲသ၀ီဒီတဖျၢၣ်ညါအသိး ပယီၤသုးတဖၣ်အံၤနုာ်လီၤမၤဟးဂီၤစ့ၢ်ကီးကမျၢၢ်လၢအဃ့ၢ်ထီၣ်တဖၣ်အဟံၣ်အဃီဒီးဃုခွံခွး၀ဲတၢ်ဖိတၢ်လံၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ တကးဒံးဘၣ်လၢန့ၣ်အမဲာ်ညါဖဲမဟါလါနိၣ်၀့ဘၢၣ် ၂၁ သီ မုၢ်ထူၣ်အဆၢကီၢ်စ့ၢ်ကီးန့ၣ် ပယီၤသုးဟဲတုၤကဒီးလၢတီၤကၠၤအ့သ၀ီပူၤ အါအါဂီၢ်ဂီၢ်အဂ့ၢ်န့ၣ် လီၢ်က၀ီၤကမျၢၢ်စံး၀ဲအသိးသ့ၣ်ညါဘၣ်န့ၣ်လီၤႉ တချုးပယီၤသုးနုာ်လီၤလၢ(လီကဲၤ)သ၀ီပူၤဒံးဘၣ်အခါန့ၣ်အ၀ဲသ့ၣ်ခးလီၤစ့ၢ်ကီး ကျိဖးဒိၣ်ဆူလီကဲၤသ၀ီႇဖါကၠၣ်ဒီးသမ့ၤဒိၣ်သ၀ီခိၣ်သ၀ီဃၢၤဒံးန့ၣ်လီၤႉ ကတီၢ်ခဲအံၤတၢ်လီၢ်လၢပယီၤသုးကျိၤနုာ်လီၤ၀ဲတဖၣ်န့ၣ်မ့ၢ်၀ဲဒၣ်မၠၣ်၀တံၣ်–ကၠၤအ့စ့ၣ်ကၠံ–မူၣ်ဒိၤကျဲမုၢ်ဖီခိၣ်တဖၣ် ဒီးကတီၢ်ခဲအံၤၦၤဟးထီၣ်က့ၤလီၤတအိၣ်အါအါလၢၤဘၣ်အဂ့ၢ်န့ၣ်သ့ၣ်ညါဘၣ်န့ၣ်လီၤႉ

လါနိၣ်၀့ဘၢၣ် ၂၂ သီႇ ၂၀၂၂ နံၣ်ႇ ခ့ၣ်အဲးစံၣ် လၢကညီကီၢ်စဲၣ် သၣ်တီၣ်ကၠံကီၢ်ဆၣ် ကလံၤစိးဒူသ၀ီ ကမျၢၢ်ၦၤဃ့ၢ်မှံဟးဖျိးအဂၤ(၈၀၀)ဃၣ်ဃၣ်အံၤ ကတီၢ်ခဲအံၤတၢ်ကီတၢ်ခဲအိၣ်ထီၣ်လၢတၢ်လုၢ်အီၣ်နီၢ်ခိသးသမူဒီးခီဖျိတၢ်ချံၣ်ထီၣ်လံအဃိလိၣ်ဘၣ်၀ဲဆ့ကၤကလၢၤသ့ၣ်တဖၣ်အဂ့ၢ်န့ၣ် သ့ၣ်ညါဘၣ်လၢ(Tun Myanmar Donation)ကရူၢ်လၢအမၤစၢၤၦၤဃ့ၢ်မှံဟးဖျိးတဖၣ်အအိၣ် န့ၣ်လီၤႉ ခီဖျိတၢ်ဒုးကဲထီၣ်လၢကယါ(ကရ့ၣ်နံၣ်)တကပၤအဃိ သၣ်တီၣ်ကၠံကီၢ်ဆၣ် ကလံၤထံး ယၤဒိၤသ၀ီႇ၀ၣ်သီခိၣ်ႇ သီၣ်ယ့ၤခၣ်ဒီးခ့ခၠံသ၀ီလီၢ်က၀ီၤကမျၢၢ်တဖၣ်ဘၣ်ဃ့ၢ်မှံဟးဖျိး၀ဲဒီး တနီၤန့ၣ်ဟဲတုၤအိၣ်၀ဲဖဲအံၤန့ၢ်တနံၣ်ဘျဲၣ် ဃၣ်ဃၣ်လံန့ၣ်လီၤႉၦၤဃ့ၢ်မှံဟးဖျိးတဖၣ်အကျါပၣ်အါ၀ဲဒၣ်လၢပိာ်မုၣ်ပိာ်မၢၤႇဖိဒံဖိသၣ်ဒီးသူၣ်က့သးၦၢ်တဖၣ်လီၤအဂ့ၢ်န့ၣ် ကရူၢ်အၦၤဘၣ်မူဘၣ်ဒါတဂၤစံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ “တနီၤန့ၣ်အတဒိးန့ၢ်ဘၣ်ဟုသးကအိၣ်သၢလါလွံၢ်လါလံႉခဲအံၤန့ၣ်အ၀ဲသ့ၣ်ဟးတူၢ်ငါလၢသ၀ီပူၤဒီးလၢကအီၣ်ကအီအဂီၢ်န့ၣ်ဘၣ်ဘှါဆှဲ၀ဲဒ်န့ၣ်လီၤမီၤနီၤႉလိၣ်ဘၣ်၀ဲဒၣ်ဟုသးႇသိအီၣ်ႇအံသၣ်ဒီးအလိၣ်ဒိၣ်ကတၢၢ်ခီန့ၣ်ဆ့ကၤကလၢၤမီၤနီၤႉတၢ်ချံၣ်ဒိၣ်တလၢအဃိဆ့ကၤကလၢၤတကူတလၢဘၣ်ႉတၢ်ဘၣ်သမုၣ်ႇတၢ်ကူးအီၣ်အဃိကသံၣ်နါက့လိၣ်စ့ၢ်ကီးလီၤ” အဂ့ၢ်န့ၣ်စံး၀ဲန့ၣ်လီၤႉ ကမျၢၢ်ၦၤဃ့ၢ်မှံဟးဖျိးတဖၣ်အံၤတအိၣ်၀ဲဒၣ်လၢလီၢ်အိၣ်ကဒုအလီၢ်ဘၣ်ဒီး မ့မ့ၢ်တခီအိၣ်ဒိးသန့ၤထီၣ်သးလၢ သ၀ီပူၤၦၤဟံၣ်ၦၤဃီအဂ့ၢ်န့ၣ်ခရံာ်ဖိၦၤဂ့ၢ်၀ီတၢ်ဖံးတၢ်မၤဒီးတၢ်ဂုာ်ထီၣ်ပသီထီၣ်၀ဲၤကျိၤလၢအမၤစၢၤၦၤဃ့ၢ်မှံဟးဖျိးအသရၣ်တဂၤစ့ၢ်ကီးစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“တၢ်လၢဟံၣ်ကစၢ်ဟ့ၣ်မၤစၢၤ၀ဲတဖၣ်န့ၣ်ယံၤထီၣ်ယံၤထီၣ်ဒုတဘၣ်ဂီၢ်ဘၣ်မီၤနီၤႉၦၤမ့ဟဲတုၤလၢပအိၣ်ဆိးလီၢ်က၀ီၤပူၤန့ၣ်ဒ်တၢ်အိၣ်ဒီးၦၤအသိးတသ့ဖဲမသ့ပမၤစၢၤလီၤႉခဲအံၤဒုလၢကအီၣ်ကအီအဂီၢ်န့ၣ်ပဘှါဆှဲသ့ဒံးမီၤနီၤႉပမၤစၢၤအါအါဂီၢ်ဂီၢ်ဒိၣ်ဒိၣ်မုၢ်မုၢ်ဒုတအိၣ်ဒံးဘၣ်ႉၦၤအဲၣ်ဒိးလဲၤမၤစၢၤမ့အိၣ်န့ၣ်ပမၤစၢၤအ၀ဲသ့ၣ်လၢကျဲတၢ်လဲၤတၢ်က့ၤတကပၤအဂီၢ်ဒုသ့လီၤမီၤနီၤ”အဂ့ၢ်န့ၣ်စံး၀ဲန့ၣ်လီၤႉ လၢကညီကီၢ်စဲၣ် ကလံၤစိးတကပၤ စးထီၣ်ဖဲ(၂၀၂၂)လါမ့ၤထီၣ်တုၤလၢခဲအံၤန့ၣ် သၣ်တီၣ်ကၠံတၢ်ဒီသဒၢဟီၣ်က၀ီၤလီၤဆီ(NTDF)စုတီၤအဖီလာ်ကရူၢ်ဒီးပယီၤသုးတဖၣ်အဘၢၣ်စၢၤတၢ်ဒုးကဲထီၣ်၀ဲတလီၢ်လီၢ်အဃိလီၢ်က၀ီၤကမျၢၢ်လၢအိၣ်ဟီၣ်က၀ီၤဖဲန့ၣ်အပူၤတဖၣ်ဘၣ်ဃ့ၢ်မှံဟးဖျိး၀ဲအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤၦၤဟ့ၣ်တၢ်ကစီၣ်ဖိအအိၣ်န့ၣ်လီၤႉ

လါနိၣ်၀့ဘၢၣ် ၂၁ သီႇ ၂၀၂၂ နံၣ်ႇ ခ့ၣ်အဲးစံၣ် လၢတလၢၤကီၢ်စဲၣ် ကၠဲၣ်မယီကီၢ်ဆၣ်အပူၤ ဖဲတနံၤအံၤလါနိၣ်၀့ဘၢၣ် ၂၁ သီ ဂီၤခီအဆၢကတီၢ်န့ၣ် ခီဖျိသုးမီၤစိရိၤအဒုးသုးကဘီယူၤဟဲတ့ၢ်လီၤမ့ၣ်ပိၢ်လၢ(တီၤကလ့)သ၀ီပူၤအဃိလီၢ်က၀ီၤကမျၢၢ်ဘၣ်ဃ့ၢ်ထီၣ်၀ဲအဂၤ(၂၀၀၀)ဃၣ်ဃၣ်အဂ့ၢ်န့ၣ်သ့ၣ်ညါဘၣ်န့ၣ်လီၤႉ ဖဲတနံၤအံၤဂီၤခီ ၅ နၣ်ရံၣ်အဆၢကတီၢ်န့ၣ် လၢတီၤကလ့သ၀ီအပူၤ ပယီၤသုးလၢအိၣ်ပၢၤကီၢ်၀ဲၤလီၢ်ကရၢၢ်ပူၤအံၤတဖၣ်ဒီးတၢ်ပၢၢ်ဆၢသုးပာ်ဖှိၣ်အဘၢၣ်စၢၤခံခီခံကပၤတၢ်ဒုးကဲထီၣ်၀ဲဒီး အဘ့ၣ်သ၀ီကျိဖးဒိၣ်သုးရ့ၣ်အံၤခးလီၤ၀ဲ(၁၂၀ မမ)ကျိဖးဒိၣ်ဆူသ၀ီပူၤအသိး ခီဖျိမုၢ်ထီၣ်ကီၢ်ခီသုး၀ဲၤလီၢ်ခိၣ်သ့ၣ်(ရတခ)ဒုးသုးကဘီယူၤ ၂ ဘ့ၣ်ဟဲတ့ၢ်လီၤစ့ၢ်ကီးမ့ၣ်ပိၢ်အဃိ တီၤကလ့သ၀ီအခိၣ်အဃၢၤလီၢ်က၀ီၤကမျၢၢ်ဘၣ်ဃ့ၢ်ထီၣ်၀ဲအဂ့ၢ်န့ၣ်ကမျၢၢ်လၢအဃ့ၢ်ထီၣ်တဖၣ်စံး၀ဲန့ၣ်လီၤႉ “တၢ်ခးလိာ်သးစးထီၣ်ကဲထီၣ်ဖဲဂီၤခီ ၅ နၣ်ရံၣ်ဒီးဖဲ ၆ နၣ်ရံၣ်ဘျဲၣ်န့ၣ် ကဘီယူၤဟဲတ့ၢ်လီၤမ့ၣ်ပိၢ်လၢသ၀ီပူၤ ခံဘ့ၣ်ႉတၢ်လီၢ်လၢအဂၤတဖၣ်နါက့ပယီၤသုးခးလီၤဆိကျိဖးဒိၣ်၀း၀းတရံးအဃိသ၀ီဖိတဖၣ်ဘၣ်စံၣ်ထီၣ်ခဲလၢာ်လီၤႉခဲအံၤကဘီယူၤဟဲကဒီးခံဘျီတဘျီလံခးလီၤတၢ်တပယူာ်ဃီလီၤ” အဂ့ၢ်န့ၣ်တီၤကလ့သ၀ီဖိလၢတအဲၣ်ဒိးပာ်ဖျါအမံၤတဂၤစံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ခီဖျိသုးမီၤစိရိၤအဒုးသုးကဘီယူၤ(၂)ဘ့ၣ်ဟဲတ့ၢ်လီၤမ့ၣ်ပိၢ်လၢသ၀ီပူၤကအိၣ်အဘျီ(၂၀)ဃၣ်ဃၣ်ညါအဃိ ဟံၣ်ဃီတၢ်သူၣ်ထီၣ်ဟးဂူာ်ဟးဂီၤအိၣ်၀ဲအသိးထံၣ်ဆိသ၀ီဖိအစိၣ်လၢသ၀ီကျဲမုၢ်ခၢၣ်သးတဂၤစ့ၢ်ကီးအဂ့ၢ်န့ၣ် လီၢ်က၀ီၤသ၀ီဖိတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ ဖဲတနံၤအံၤဂီၤခီ ၆ နၣ်ရံၣ်ဒီး ၉ နၣ်ရံၣ်အဆၢကတီၢ်န့ၣ် သုးမီၤစိရိၤအဒုးသုးကဘီယူၤ(၂)ဘ့ၣ်ဟဲတ့ၢ်လီၤမ့ၣ်ပိၢ် ၀ံၤအလီၢ်ခံ ကဘီယူၤကၠဲးဟဲဆှၣ်ကဒီးတၢ်လၢသ၀ီပူၤတုၤလၢဂီၤခီ ၁၀...

လါနိၣ်၀့ဘၢၣ် ၂၁ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ၀ီၢ်ရ့ၣ်ကီၢ်ဆၣ်(ကၠၤအ့စ့ၣ်ကၠံကီၢ်ဆၣ်)အပူၤ ပယီၤသုးတဲပျံၤလိၣ်ဆှါသ၀ီဖိတဖၣ်လၢ(KNLA)မ့ဟဲခးအ၀ဲသ့ၣ်သုးကလၢၤတဘျီကဒီးန့ၣ်ကဒွဲၣ်အူအီၣ်ကွံာ်သ၀ီဒီတဖျၢၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲလါနိၣ်၀့ဘၢၣ် ၁၇ သီအနံၤန့ၣ် ပယီၤသုး၀ဲန့ၣ်အသုးကျိၤခိၣ်တီခိၣ်ရိၣ်မဲအၦၤအဂၤ(၄၀)ဃၣ်ဃၣ်အံၤ ကိးထံၣ်၀ဲသ၀ီၦၤဘၣ်မူဘၣ်ဒါဒီးလီၢ်က၀ီၤၦၤဃ့ၢ်တၢ်ဒုးဖိတနီၤလၢလိၣ်ဆှါသီခါဖၠၣ်အဆၢကတီၢ်တဲပျံၤ၀ဲဒ်အံၤလီၤအဂ့ၢ်န့ၣ်လီၢ်က၀ီၤကမျၢၢ်တဂၤစံး၀ဲန့ၣ်လီၤႉ “အ၀ဲသ့ၣ်ကိးထံၣ်သ၀ီကိးဖျၢၣ်ဒဲးၦၤဘၣ်မူဘၣ်ဒါဒီးသ၀ီဖိတဖၣ်လၢသီခါဖၠၣ်မီၤနီၤႉတဲ၀ဲလၢသုအဲၣ်ဒိးမၤမနုၤလဲၣ်ႇသုအဲၣ်ဒိးဒ်လဲၣ်ဟဲတၢၣ်ပီၣ်တဲသကိးန့ၢ်မီၤနီၤႉတဲ၀ဲလၢ(ခ့ၣ်အဲၣ်ယူၣ်)မ့ဟဲခးကဒီးသုးကလၢၤလၢခံတဘျီကဒီးန့ၣ်ကဒွဲၣ်အူအီၣ်သ၀ီဒီတဖျၢၣ်လီၤႉၦၤစံၣ်တၢ်ဒုးခဲလၢာ်အဃိပပျံၤတၢ်စ့ၢ်မီၤနီၤ” အဂ့ၢ်န့ၣ်လီၢ်က၀ီၤကမျၢၢ်လၢတအဲၣ်ဒိးပာ်ဖျါအမံၤတဂၤစံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ပယီၤသုးကိးထံၣ်တၢ်ဘျီ၀ဲန့ၣ်အပူၤထံထီၣ်ကၢၢ်သ၀ီႇမဲၣ်ကလိ(ယဲၣ်ဖီ)‚ဖၤယၤႇလိၣ်ဆှါသ၀ီပၢပြးကရူၢ်ဒီးကမျၢၢ်ၦၤဃ့ၢ်တၢ်ဒုးအဂၤ(၅၀)ဃၣ်ဃၣ်ဟဲထီၣ်၀ဲဒီးလီၢ်က၀ီၤကမျၢၢ်လၢအဟဲထီၣ်တၢ်အိၣ်ဖှိၣ်တဖၣ်ပယီၤသုးဒိနီၣ်ဃာ်တၢ်ဂီၤတၢ်ဖှီၣ်အိၣ်၀ဲအဂ့ၢ်န့ၣ် လီၢ်က၀ီၤကမျၢၢ်တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ ဖဲအပူၤကွံာ်လါနိၣ်၀့ဘၢၣ် ၁၅ သီ ဂီၤခီအဆၢကတီၢ်န့ၣ် လၢလိၣ်ဆှါသ၀ီအပူၤ တၢ်ဒုးကဲထီၣ်၀ဲလၢပယီၤသုးခီၣ်သုးရ့ၣ်(ခလရ–၆၂)(ခလရ–၃၂)‚သုးခိးကီၢ်ဆၢ-BGF(၁၀၂၁)သုးရ့ၣ်သုးပာ်ဖှိၣ်ဒီး ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်အဘၢၣ်စၢၤန့ၣ်လီၤႉ တၢ်ဒုးကဲထီၣ်ဘျီ၀ဲန့ၣ်ခီဖျိ(သရိာ်၀ါ)ပယီၤသုးခးလီၤ(၁၂၀ မမ)ကျိဖးဒိၣ်ဆူသ၀ီပူၤတၢ်ဒုးကဲထီၣ်လီၢ်ဒီး ကဘီယူၤစ့ၢ်ကီးဟဲတ့ၢ်လီၤမ့ၣ်ပိၢ်အဃိဟံၣ်ဃီတၢ်သူၣ်ထီၣ်ဒီးတၢ်မၤအီၣ်ကျီးကရၢၢ်ဟးဂူၤဟးဂီၤ၀ဲအသိး လီၢ်က၀ီၤကမျၢၢ်အဂၤ(၂၀၀၀)ဃၣ်ဃၣ်ဘၣ်ဃ့ၢ်ထီၣ်၀ဲအဂ့ၢ်န့ၣ်သ၀ီဖိလၢအဃ့ၢ်ထီၣ်တဖၣ်စံး၀ဲန့ၣ်လီၤႉ တၢ်ဒုးကဲထီၣ်၀ံၤအလီၢ်ခံပယီၤသုးတပျဲလိၣ်ဆှါသ၀ီဖိတဖၣ်အံၤလၢကလဲၤဟံကဒါက့ၤဘုလၢသ၀ီဖိကူးဃာ်၀ဲတဖၣ်ဘၣ်အဃိဘၣ်ပာ်တ့ၢ်ဘုလၢအကယၤညါဒီးခီဖျိတၢ်ဒုးအဃိဟံၣ်ဃီတၢ်သူၣ်ထီၣ်‚သဲးကျီးႇရီဘၢၣ်ကျီးဒီးကျီးကရၢၢ် ဟးဂီၤ၀ဲအါအါဂီၢ်ဂီၢ်အဂ့ၢ်န့ၣ်လီၢ်က၀ီၤကမျၢၢ်စံး၀ဲန့ၣ်လီၤႉ ကတီၢ်ခဲအံၤခီဖျိပယီၤသုးအံၤနုာ်လီၤအိၣ်လၢသ၀ီပူၤကမျၢၢ်အဟံၣ်အဃီအဃိ သ၀ီဖိလၢအဃ့ၢ်တၢ်ဒုးတဖၣ်တုၤလၢခဲအံၤက့ၤအိၣ်လၢအဟံၣ်တဘူၣ်ဒံး၀ဲဘၣ်ဒီးဘၣ်အိၣ်ဘၣ်အီၣ်၀ဲလၢတၢ်ကီတၢ်ခဲတၢ်နးတၢ်ဖှီၣ်အပူၤအဂ့ၢ်န့ၣ်သ့ၣ်ညါဘၣ်လၢသ၀ီဖိလၢအဃ့ၢ်ထီၣ်တဖၣ်အအိၣ်န့ၣ်လီၤႉ လိၣ်ဆှါသ၀ီအံၤအိၣ်၀ဲဒၣ်လၢ(ခ့ၣ်အဲၣ်ယူၣ်)၀ီၢ်ရ့ၣ်ကီၢ်ဆၣ်တၢ်ပၢဟီၣ်က၀ီၤအပူၤဒီး သုးကလၢၤလၢပယီၤသုးဒီး(BGF)သုးပာ်ဖှိၣ်အိၣ်၀ဲခဲအံၤန့ၣ်အပူၤကွံာ်လၢညါမ့ၢ်၀ဲဒၣ်(KNLA)သုးရ့ၣ် ၁၆ သ၀ီတၢ်ဘံၣ်တၢ်ဘၢသုးကလၢၤတၢ်လီၢ်တခါန့ၣ်လီၤႉဖဲအပူၤကွံာ်(၂၀၂၁) လါအီးကထိဘၢၣ်အခါန့ၣ် ပယီၤသုးစးထီၣ်နုာ်လီၤအိၣ်၀ဲလၢသုးကလၢၤတၢ်လီၢ်အံၤအပူၤအဂ့ၢ်န့ၣ်(KNLA)ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ

လါနိၣ်၀့ဘၢၣ် ၁၈ သီႇ ၂၀၂၂ နံၣ်ႇ ခ့ၣ်အဲးစံၣ် လၢဖၣ်အၣ်ကီၢ်ဆၣ် ဃိၣ်လိာ်ကျိမုၢ်နုာ်တကပၤန့ၣ် ဖဲလါနိၣ်၀့ဘၢၣ် ၁၇ သီ ဟါခီ ၅ နၣ်ရံၣ်ဃၣ်ဃၣ် အဆၢကတီၢ်ခီဖျိသုးခိးကီၢ်ဆၢ(BGF)ခးလီၤတပျုုာ်တပျီာ်ကျိဖးဒိၣ်ကျိဖိဆူ(မံၣ်ကယ့ၤ)သ၀ီပူၤအဃိ ကမျၢၢ်သံ(၃)ဂၤအကျါပၣ်ဃုာ်ဖိသၣ်(၇)နံၣ်တဂၤဒီးဘၣ်ဒိစ့ၢ်ကီးပိာ်မုာ်နးနးကလဲာ်တဂၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ (BGF) ခးလီၤကျိဖးဒိၣ်အဃိဖိၣ်သၣ် (၇) နံၣ်အံၤဒီးအ၀ဲၢ်ခွါသံ၀ဲတဘျီအသိးအမိၢ်စ့ၢ်ကီးဘၣ်ဒိ၀ဲနးနးကလဲာ်ဒီးကမျၢၢ်ပိာ်ခွါလၢအဂၤတဂၤစ့ၢ်ကီးသံ၀ဲတဘျီဃီအဂ့ၢ်န့ၣ်လီၢ်က၀ီၤကမျၢၢ်စံး၀ဲအသိးသ့ၣ်ညါဘၣ်န့ၣ်လီၤႉ လၢန့ၣ်အမဲာ်ညါခံခီခံကပၤတၢ်ခးလိာ်သးကဲထီၣ်တအိၣ်၀ဲဘၣ်ဒီးမ့ၢ်ဒၣ်(BGF)ခးလီၤနါစိၤကျိဖးဒိၣ်ကျိဖိတဖၣ်လီၤအသိးခးဃုာ်စ့ၢ်ကီးသိလ့ၣ်လၢအိၣ်(မံၣ်စၤ)သ၀ီထံ၀ၢ်ခီလၢအခီဃီၤလၢအံၤတကပၤအဂ့ၢ်န့ၣ် လီၢ်က၀ီၤကမျၢၢ်တဖၣ်စံး၀ဲန့ၣ်လီၤႉ လီၢ်က၀ီၤကမျၢၢ်တဂၤစံး၀ဲ“ဖဲန့ၣ်န့ၣ်ကျဲလၢၦၤစိာ်ဆါခူသူၣ်သိလ့ၣ်ကျဲအိၣ်မီၤနီၤႉ(BGF)နါက့မၤအီၣ်၀ဲအိၣ်စ့ၢ်ႉအ၀ဲသ့ၣ်န့ၣ်နီၤလီၤအီၣ်သးခံခီခံကပၤမ့ၢ်အတကဲးလီၤသးဘၣ်ဧါတသ့ၣ်ညါဘၣ်ႉအါဒၣ်တက့ၢ်န့ၣ်ၦၤဆိမိၣ်ဒ်န့ၣ်လီၤႉခးတၢ်ကမျၢၢ်အိၣ်အလီၢ်အဃိဘၣ်၀ဲကမျၢၢ်လီၤမီၤနီၤ”အဂ့ၢ်န့ၣ်လီၢ်က၀ီၤကမျၢၢ်တဂၤစံးဘၣ်ခ့ၣ်အဲးစံၣ်န့ၣ်လီၤႉ ဒ်ၦၤလၢအဘူးဒီး(BGF)သုးတဖၣ်စံး၀ဲအသိးန့ၣ်တၢ်လီၢ်လၢတၢ်ခးလိာ်သးကဲထီၣ်အလီၢ်ခဲအံၤန့ၣ် မ့ၢ်တၢ်လီၢ်ကျဲတဘိလၢတၢ်ဆှၢ၀ဲသိလ့ၣ်လၢအတဖိးသဲစးလၢအအိၣ်ဟဲကီၢ်ဆၢတဖၣ်ဒီးလၢ(မံၣ်စၤ)သ၀ီထံနံၤတဆီသိလ့ၣ်တဖၣ်အံၤဘၣ်တၢ်ဆှၢဃီၤ၀ဲဆူ(မံၣ်ကယ့ၤ)ထံနံၤအံၤလၢချံဖးဒိၣ်အဂ့ၢ်န့ၣ် လီၢ်က၀ီၤကမျၢၢ်လၢအဂၤတဂၤ စံး၀ဲဒ်အံၤန့ၣ်လီၤႉ “ခဲအံၤလၢဃိၣ်လိာ်တိၤန့ၣ်ပယီၤသုးသမံသမိးတၢ်အါထီၣ်အဃိသိလ့ၣ်လၢအတဖိးသဲစးဘၣ်တဖၣ်န့ၣ်တလဲၤလၢဃိၣ်လိာ်တိၤလၢၤဘၣ်ဒီး (BGF)ကဒဲကဒဲမၤအီၣ်ဆၣ်ဒီးသူက့ၤ၀ဲကျဲလၢန့ၣ်တကပၤမီၤနီၤႉပယီၤသုးနါက့သ့ၣ်ညါ၀ဲႉၦၤသ့ၣ်ညါခဲလၢာ်လီၤႇကျဲ၀ဲန့ၣ်မ့ၢ်ကျဲတဘိလၢၦၤမၤအီၣ်ဆၣ်လီၤန့ၣ်ပတဲသ့လီၤႉဖဲန့ၣ်န့ၣ် (BGF)သုးခိၣ်အိၣ်အါအဃိဖဲမဟါၦၤခးတၢ်န့ၣ်မ့ၢ်သုးခိၣ်ဖဲလဲၣ်တဂၤအၦၤခး၀ဲလဲၣ်ဒုတသ့ၣ်ညါဘၣ်” အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဃိၣ်လိာ်ကျိမုၢ်နုၤ(မံၣ်ကယ့ၤ)သ၀ီအံၤအိၣ်၀ဲဒၣ်လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဖၣ်အၣ်ကီၢ်ဆၣ်အပူၤဒီးတၢ်လီၢ်လၢတၢ်ကဲထီၣ်ဖဲမဟါန့ၣ် မ့ၢ်တၢ်လီၢ်လၢ(BGF)သုးဟူးဂဲၤ၀ဲအလီၢ်လီၤအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

လါနိၣ်၀့ဘၢၣ် ၁၈ သီႇ၂၀၂၂ နံၣ်ႇ ခ့ၣ်အဲးစံၣ် သုးမီၤစိရိၤအတၢ်ရဲၣ်တၢ်ကျဲၤအိၣ်လၢကထီၣ်ဟံးန့ၢ်က့ၤမၠၣ်၀တံၣ်ကလံၤထံး(သ့ၣ်ဘီဘိ)သုးကလၢၤဒီး ခီဖျိအ၀ဲသ့ၣ်ခးလီၤကျိဖးဒိၣ်ဆူဒူသ၀ီပူၤဒီးကဘီယူၤစ့ၢ်ကီးဟဲတ့ၢ်လီၤမ့ၣ်ပိၢ်အဃိ သ့ၣ်ဘီဘိလီၢ်က၀ီၤကမျၢၢ်(၁၄၀၀)ဘျဲၣ်ဘၣ်သုးလီၢ်လၢသူမှဲကျိကၢၢ်နံၤအဂ့ၢ်န့ၣ်သ့ၣ်ညါဘၣ်န့ၣ်လီၤႉ ဖဲအပူၤကွံာ်လါမ့ၤ ၁၈ သီအနံၤန့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ် ထီၣ်မၤန့ၢ် ပယီၤသုးကလၢၤကဲထီၣ်သး၀ံၤအလီၢ်ခံဒ်သိးပယီၤသုးအံၤကထီၣ်ဟံးန့ၢ်က့ၤသုးကလၢၤအံၤအဂီၢ် စှၤသီအတီၢ်ပူၤခီဖျိအ၀ဲသ့ၣ်နုာ်လီၤမၤတၢ်ထီၣ်ဒုးဟဲအါထီၣ်အဃိလီၢ်အိၣ်ကဒုလီၢ်ၦၤဃ့ၢ်မှံဟးဖျိးတဖၣ်ဘၣ်သုးလီၢ်သုးကျဲအဂ့ၢ်န့ၣ်သ့ၣ်ဘီဘိသ၀ီဖိတဂၤစံး၀ဲဒ်အံၤန့ၣ်လီၤႉ “ခဲအံၤတၢ်ခးလိာ်သးကဲထီၣ်ကိးမုၢ်နံၤဒဲးလီၤႉခီဖျိပယီၤသုးအံၤကက့ၤထီၣ်ဟံးန့ၢ်ကဒါသ့ၣ်ဘီဘိသ၀ီခိၣ်ထိးသုးကလၢၤလၢအ၀ဲသ့ၣ်အိၣ်တ့ၢ်ဃာ်၀ဲအံၤအဃိတၢ်ဒုးကဲထီၣ်၀ဲဒီးကညီကရူၢ်မီၤနီၤႉလၢသ့ၣ်ဘီဘိသ၀ီသူမှဲကျိအဖီခိၣ်န့ၣ်ၦၤဃ့ၢ်မှံဟးဖျိးအိၣ်တဘူၣ်လၢၤဘၣ်ႉသ့ၣ်ဘီဘိ(တီနီၢ်)တီၤထီကၠိၦၤကၠိဖိတဖၣ်နါက့ဘၣ်အိၣ်ဖးလီၤအသးမီၤနီၤႉၦၤကိးဂၤဒဲးန့ၣ်ဘၣ်ယိၣ်၀ဲလၢကဘီယူၤကဟဲတ့ၢ်လီၤမ့ၣ်ပိၢ်လီၤ” အဂ့ၢ်န့ၣ်စံး၀ဲန့ၣ်လီၤႉ ကတီၢ်ခဲအံံၤလၢဆိၣ်စံမၠဲၣ်သ၀ီတကပၤမ့ၢ်ဂ့ၤႇဂီၤလ့ၤကျဲ(မွ့ၤနကီၤ)ဖယါကိႇဘျၢၣ်ဒိၣ်လီၢ်က၀ီၤ(တီၤကိ)ႇ ဖလူ(ဖယါကိ)တကပၤန့ၣ် ပယီၤသုးခးလီၤရီးကဲးမျိာ်သၣ်ကိးမုၢ်နံၤမုၢ်နၤဒဲးအဂ့ၢ်န့ၣ် လီၢ်က၀ီၤၦၤဟ့ၣ်တၢ်ကစီၣ်ဖိတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ လၢန့ၣ်အမဲာ်ညါတချုးလါနိၣ်၀့ဘၢၣ်လၢာ်န့ၣ်ပယီၤသုးအတၢ်ရဲၣ်တၢ်ကျဲၤအိၣ်လၢကထီၣ်ဟံးန့ၢ်က့ၤ(သ့ၣ်ဘီဘိ)သုးကလၢၤအံၤတုၤအန့ၢ်ဒီးခီဖျိ(KNLA)သုးပာ်ဖှိၣ်က့ၤခီၣ်ဆၢဒုးကဒါ၀ဲအဃိပယီၤသုးသံဘၣ်ဒိဘၣ်ထံးအါမးအဂ့ၢ်န့ၣ် ဂံၢ်ခီၣ်ထံးဒုးယၤၦၤဟ့ၣ်တၢ်ကစီၣ်ဖိစံး၀ဲန့ၣ်လီၤႉ “ပယီၤသုးသံဘၣ်ဒိဘၣ်ထံးအါမးမီၤနီၤႉအ၀ဲသ့ၣ်က့ၤဂုၤကဒါလီၢ်ခံႇမ့၀ံၤဟဲက့ၤထီၣ်ကဒါႉအ၀ဲသ့ၣ်ခးလီၤတၢ်ဒီးရီးကဲးမျိာ်သၣ်ဒီတတွဲႉပယီၤသုးလၢအဘၣ်ဒိတဖၣ်န့ၣ်ကက့ၤလီၤစိာ်၀ဲလၢမၠၣ်၀တံၣ်ခီဒၢးက့ၤတသ့ႉလၢဂီၤလ့ၤ(ဗျူဟာ)နါက့ကသံၣ်သရၣ်တအိၣ်ဘၣ်အဃိအ၀ဲသ့ၣ်ခီဃီၤ၀ဲဂီၤလ့ၤထံကျိဒီးလဲၤကူစါယါဘျါ၀ဲလၢယိၤကီၢ်တကပၤအိၣ်မီၤနီၤႉတချုးလါတဘ့ၣ်အံၤလၢာ်ဘၣ်န့ၣ်တိာ်ဃာ်၀ဲလၢကထီၣ်ဟံးန့ၢ်က့ၤသ့ၣ်ဘီဘိသုးကလၢၤအဃိတၢ်ဒုးကဲထီၣ်ကိးမုၢ်နံၤဒဲးလီၤ” အဂ့ၢ်န့ၣ် (KNLA)ဒုးယၤဟီၣ်က၀ီၤၦၤဟ့ၣ်တၢ်ကစီၣ်ဖိစံး၀ဲန့ၣ်လီၤႉ ပယီၤသုးအံၤဒ်သိးကလုၢ်ဘၢဒိၣ်စိ၀ဲမၠၣ်၀တံၣ်–ဂီၤလ့ၤကျဲဒီတဘိအဂီၢ်န့ၣ် နုာ်လီၤမၤ၀ဲဒုးယၤတၢ်ဟူးတၢ်ဂဲၤထီၣ်ဘးထီၣ်လၢတနံၣ်ဃၣ်ဃၣ်လံဒီးအလါတဆံဘျဲၣ်အတီၢ်ပူၤအံၤ လုၢ်ဘၢဒိၣ်စိ၀ဲကျဲအံၤတန့ၢ်ဒံးဘၣ်ဒီးခံခီခံကပၤတၢ်ဒုးဆဲးကဲထီၣ်ဒံး၀ဲတပယူာ်ဃီန့ၣ်လီၤႉ ခီဖျိတၢ်ခးလိာ်သးကဲထီၣ်ဒံးတပယူာ်ဃီအဃိလ့က့ၣ်ကိာ်လီၢ်က၀ီၤႇဆိၣ်စံမၠဲၣ်လီၢ်က၀ီၤႇသ့ၣ်ဘီဘိလီၢ်က၀ီၤဒီးဂီၤလ့ၤလီၢ်က၀ီၤအပူၤကမျၢၢ်အဂၤ(၁၀၀၀၀)ဃၣ်ဃၣ်ဘၣ်ဃ့ၢ်မှံဟးဖျိး၀ဲအဖၢမုၢ်ဒံးန့ၣ်လီၤႉ

လါနိၣ်၀့ဘၢၣ် ၁၈ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၃) ချၢၣ်လွံၢ်ထူၣ်ကီၢ်ရ့ၣ် လၢၢ်ဒိၣ်ကီၢ်အပူၤန့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ထီၣ်မၤန့ၢ်ပယီၤသုးကလၢၤ(၃)ဖျၢၣ်၀ံၤအလီၢ်ခံ ခီဖျိပယီၤသုးနုာ်လီၤမၤတၢ်ထီၣ်ဒုးအဃိလီၢ်က၀ီၤကမျၢၢ်လၢအဘၣ်ဃ့ၢ်ထီၣ်အဂၤ(၂၀၀၀)ဘျဲၣ်အံၤလိၣ်ဘၣ်၀ဲဂ့ၢ်ဂီၢ်အူတၢ်အီၣ်တၢ်အီတဖၣ်အဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ ဖဲအပူၤကွံာ်လါနိၣ်၀့ဘၢၣ် ၁၂ သီအနံၤန့ၣ် (KNLA)သုးပာ်ဖှိၣ်ထီၣ်မၤန့ၢ်ပယီၤသုးကလၢၤ(၃)ဖျၢၣ်လၢအမ့ၢ် သၣ်ဆ့းသုးကလၢၤႇဘီကထၣ်ႇတိၤသ့ၣ်ဖူသုးကလၢၤလၢတနံၤဃီအတီၢ်ပူၤဒီးခီဖျိပယီၤသုးခးလီၤကဒါကျိဖးဒိၣ်ဒီးကဘီယူၤစ့ၢ်ကီးဟဲတ့ၢ်လီၤမ့ၣ်ပိၢ်အဃိ လီၢ်က၀ီၤကမျၢၢ်အဂၤ(၂၀၀၀)ဘျဲၣ်ဘၣ်ဃ့ၢ်ထီၣ်၀ဲဒီးကတီၢ်ခဲအံၤ လိၣ်ဘၣ်၀ဲဂ့ၢ်ဂီၢ်အူတၢ်အီၣ်တၢ်အီအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ခဲအံၤပဘှါရှဲဒ်လဲၣ်န့ၣ်ကမျၢၢ်တဖၣ်ဘၣ်နီၤလီၤအီၣ်သကိးသးဒ်န့ၣ်လီၤမီၤနီၤႉစးထီၣ်ဖဲတၢ်ထီၣ်န့ၢ်ပယီၤသုးကလၢၤ၀ံၤအလီၢ်ခံန့ၣ်တၢ်ဒုးကဲထီၣ်တပယူာ်ဃီလီၤႉခဲအံၤလၢလၢၢ်ဒိၣ်အံၤၦၤဃ့ၢ်မှံဟးဖျိးအိၣ်(၈၀၀၀)ဘျဲၣ်ညါႉတနီၤန့ၣ်လဲၤစံၣ်အိၣ်၀ဲလၢတၢ်လီၢ်ပူၤဖျဲးအလီၢ်မီၤနီၤႉတနီၤခီဒုလဲၤစံၣ်အိၣ်လၢ၀့ၢ်ပူၤႉခဲအံၤလၢလီၢ်အိၣ်ကဒုအလီၢ်န့ၣ်ၦၤဃ့ၢ်မှံဟးဖျိးအိၣ်၀ဲအဂၤ(၂၀၀၀)ဘျဲၣ်ညါဒီးတၢ်အီၣ်တၢ်အီစ့ၢ်ကီးတအိၣ်လၢၤဘၣ်”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တၢ်ထီၣ်မၤန့ၢ်ပယီၤသုးကလၢၤ၀ံၤအလီၢ်ခံလၢလၢၢ်ဒိၣ်ကီၢ်ဆၣ် ပဒဲကီသ၀ီႇဘီကထၣ်ႇကိမၠ့ၣ်သၤယၤႇ ကီးကၠးသဲကျဲမုၢ်ဒီတဘိဒီးသ၀ီတဖၣ်အပူၤတၢ်ဒုးကဲထီၣ်၀ဲတပယူာ်ဃီဒီးခီဖျိပယီၤသုးခးလီၤကျိဖးဒိၣ်ႇ သုးမီၤစိရိၤအ(drone)စ့ၢ်ကီးဟဲတ့ၢ်လီၤမ့ၣ်ပိၢ်အဃိသ၀ီပူၤဟံၣ်ဃီဟးဂူာ်ဟးဂီၤအိၣ်၀ဲတနီၤအဂ့ၢ်န့ၣ် လီၢ်က၀ီၤကမျၢၢ်တဖၣ်စံး၀ဲန့ၣ်လီၤႉ “ဖဲ ၁၄ သီ ၁၅ သီအခါန့ၣ် တၢ်အီၣ်တၢ်အီစးထီၣ်လီၤတူာ်ႉဖဲတၢ်တနံၤန့ၣ်အိၣ်တ့ၢ်က့ၤထဲတသီဂီၢ်ခံသီဂီၢ်လီၤႉ ခဲအံၤနါက့ပက့ၤလၢသ၀ီတဘူၣ်ဘၣ်ႉတၢ်ဒုးနါက့ကဲထီၣ်ဒံးအဃိၦၤကဟဲဆှၢတၢ်အီၣ်တၢ်အီအဂီၢ်စ့ၢ်ကီးတညီဘၣ်အဃိတၢ်ကီတၢ်ခဲအိၣ်လၢကအီၣ်ကအီမီၤနီၤႉတၢ်ဒုးကဲထီၣ်လၢခံအံၤနါက့ကျိဖးဒိၣ်ဘၣ်ၦၤဟံၣ်ၦၤဃီဟးဂီၤအိၣ်မီၤနီၤႉဘၣ်ဒိၦၤသ၀ီဖိဒုတအိၣ်ဒံးဘၣ်” အဂ့ၢ်န့ၣ်လီၢ်က၀ီၤဖိလၢအဃ့ၢ်တၢ်ဒုးတဂၤစံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ပယီၤသုးအံၤပညိၣ်ကမျၢၢ်ထံဖိကီၢ်ဖိမၤ၀ဲတၢ်ထီၣ်ဒုးလၢ(drone)ႇကျိဖးဒိၣ်တဖၣ်ဒီး ဒ်န့ၣ်အသိးလၢမိကီၢ်ဆၣ်အပူၤ စ့ၢ်ကီးဖဲအပူၤကွံာ်လါနိၣ်၀့ဘၢၣ် ၁၄ သီအနံၤန့ၣ် ပယီၤသုးဟဲတ့ၢ်လီၤမ့ၣ်ပိၢ်လၢ(drone)တကးဒံးဘၣ်အမဲာ်ညါ ခးလီၤစ့ၢ်ကီးကျိဖးဒိၣ်ကအိၣ်(၁၂)ဖျၢၣ်ဃၣ်ဃၣ်ညါအဃိ လီၤတဲာ်ပိၢ်ဖးထီၣ်၀ဲလၢသ၀ီပူၤအဂ့ၢ်န့ၣ် လီၢ်က၀ီၤၦၤဟ့ၣ်တၢ်ကစီၣ်ဖိတဖၣ်စံး၀ဲန့ၣ်လီၤႉ

လါနိၣ်၀့ဘၢၣ် ၁၇ သီႇ ၂၀၂၂ နံၣ်ႇ ခ့ၣ်အဲးစံၣ် (၁၀၂)၀ီတ၀ီ ဒီကလုာ်မုၢ်နံၤအဂီၢ် သုးမီၤစိရိၤပျၢ်လီၤ၀ဲၦၤဃိာ်ဖိ (၅၇၇၄) ဂၤအကျါပၣ်ဃုာ်၀ဲကညီကီၢ်စဲၣ် ဖၣ်အၣ်၀့ၢ်(တီၤကလ့) ဃိာ်ပူၤထံရူၢ်ကီၢ်သဲးၦၤဃိာ်ဖိ (၅၄) ဂၤလၢအဘၣ်တၢ်လိာ်ဘၢလိာ်ကွီၢ်၀ဲလၢ ၅၀၅(က)တၢ်ဘျၢသဲစးအံၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ “ပသ့ၣ်ညါလၢ(တီၤကလ့)န့ၣ်ၦၤကပျၢ်လီၤ၀ဲ (၅၄) ဂၤမီၤနီၤႉအကျါဖဲန့ၣ်ပၣ်ဃုာ်၀ဲၦၤဖၣ်အၣ်ဖိ (၃) ဂၤႉဖၣ်အၣ်ၦၤသးစၢ်အိၣ်တ့ၢ်ဒံးဒီဒူၣ်ညါႉဖၣ်အၣ်ကၠိဖိလၢတၢ်ဆှၢအီၤဆူဃိာ်တၢ်လီၢ်လၢအဂၤတဖၣ်န့ၣ် ၦၤကပျၢ်လီၤအကျါမ့ၢ်အ၀ဲသ့ၣ် ပၣ်ဧါတပၣ်ဧါတသ့ၣ်ညါဘၣ်ႉခဲအံၤၦၤကပျၢ်လီၤန့ၣ်ကီးတရံးႇမၠၣ်၀တံၣ်ႇကၠၤအ့စ့ၣ်ကၠံဒီးသူၣ်ဘီၣ်သးစၢ်ႇသရၣ်/မုၣ်လၢအိၣ်တၢ်လီၢ်အဂၤတဖၣ်ၦၤကပျၢ်လီၤခဲအံၤအကျါန့ၣ်အါလၢအပၣ်လီၤ” အဂ့ၢ်န့ၣ် ၦၤလီၤဘၣ်ဃိာ်လၢထံရူၢ်ကီၢ်သဲးတၢ်မူးတၢ်ရၢ်အဟံၣ်ဖိဃီဖိတဂၤစံး၀ဲန့ၣ်လီၤႉ တနံၤအံၤလါနိၣ်၀့ဘၢၣ် ၁၇ သီအနံၤ ကီၢ်ပယီၤထံကီၢ်ဒီတဘ့ၣ်အပူၤ သုးမီၤစိရိၤပျၢ်လီၤၦၤဃိာ်ဖိ(၅၇၇၄)အကျါ ပၣ်ဃုာ်၀ဲ(NLD)မုၢ်ကျိၤ၀ဲၤကွာ်ၦၤဟ့ၣ်ကူၣ်တၢ်ဖိ (မံစ်ထၢၣ်)ဆှီၤတာနဲၤႇ ဘရံၣ်တ့ၣ် မီၢ်သီလီၢ်လံၤ ဘ့ၣ်ကံၤဘိမ့ ဃုာ်ဒီးၦၤထံဂုၤကီၢ်ဂၤဖိ(၄)ဂၤအသိး ပၣ်ဃုာ်၀ဲကီၢ်ပူၤၦၤမၤတၢ်ဃံတၢ်လၤကစၢ်လၢ အမံၤဟူသၣ်ဖျါတစှၤန့ၢ် အဂၤ(၁၀)ဘၣ် အဂ့ၢ်န့ၣ်သုးမီၤစိရိၤအတၢ်ကစီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤအလီၢ်ခံ လၢကညီကီၢ်စဲၣ်...