လါစဲးပထ့ဘၢၣ် ၁၈သီ, ၂၀၂၅နံၣ်, ခ့ၣ်အဲးစံၣ်,
ကညီကီၢ်စဲၣ်ရၤမတံဝ့ၢ်ပူၤပယီၤသုးကရူၢ်နုၥ်လီၤဝံၤအလီၢ်ခံ,ဖီၣ်ဝဲကမျၢၢ်ဟးထီၣ်ဟးလီၤလၢမုၢ်နၤခီတဖၣ်အိၣ်ထီၣ်ဝဲအဃိ,ကမျၢၢ်လီၢ်ကဝီၤဖိတဖၣ်တၢ်ဘၣ်ယိၣ်ဘၣ်ဘှီအိၣ်ထီၣ်ဝဲအဂ့ၢ်,ဝ့ၢ်လီၢ်ကဝီၤဖိတဖၣ်စံးဝဲဒၣ်န့ၣ်လီၤ.
ရၤမတံဝ့ၢ်အံၤအပူၤကွံၥ်ကမျၢၢ်တၢ်ဟးထီၣ်က့ၤလီၤလၢမုၢ်နၤခီအိၣ်ဝဲဒၣ်ဘၣ်ဆၣ်,ပယီၤသုးကရူၢ်နုၥ်လီၤအါထီၣ်အလီၢ်ခံလါစဲးပထ့ဘၢၣ်အဆိကတၢၢ်တနွံအပူၤအနၣ်ရံၣ်(၁၀)အလီၢ်ခံဝ့ၢ်ပူၤကမျၢၢ်တၢ်ဟးထီၣ်က့ၤလီၤတအိၣ်လၢၤဝဲဘၣ်ဒီးတကီၢ်ခါခဲအံၤ(၉)နၣ်ရံၣ်အဆၢကတီၢ်ဒၣ်လဲၣ်တၢ်ဟးထီၣ်က့ၤလီၤတအိၣ်ဝဲလၢၤဘၣ်အဂ့ၢ်,ဝ့ၢ်လီၢ်ကဝီၤကမျၢၢ်တဖၣ်စံးဝဲဒၣ်န့ၣ်လီၤ.
ခီဖျိပယီၤသုးကရူၢ်အံၤဖီၣ်ဝဲကမျၢၢ်ဒ်အံၤအဃိဝ့ၢ်ပူၤတၢ်ဘိးဘၣ်ရၤလီၤဝဲလၢပှၤလီၢ်မၢ်အိၣ်ထီၣ်ဝဲခဲအံၤခဲအံၤအဖီခိၣ်,တၢ်ဘၣ်ယိၣ်ဘၣ်ဘှီအိၣ်ဝဲတပယူၥ်ဃီအဂ့ၢ်,ဝ့ၢ်လီၢ်ကဝီၤကမျၢၢ်တဂၤစံးဝဲဒ်အံၤန့ၣ်လီၤ.
“ပအိၣ်လၢရၤမတံဝ့ၢ်ပူၤပဘၣ်အိၣ်ဝဲဒီးတၢ်ပလီၢ်ထီဘိန့ၣ်လီၤ.ပဖိပလံၤအသးနံၣ်(၁၈)နံၣ်သ့ၣ်တဖၣ်အိၣ်အဃိပဘၣ်ပျံၤဝဲလၢမ့ၢ်တၢ်ကဟဲကိးပတၢ်ဆံးယံၥ်လဲၣ်,ကလီၤမၢ်ဆံးယံၥ်လဲၣ်,တၢ်ကဖီၣ်အီၤဧါသ့ၣ်တဖၣ်န့ၣ်လီၤ.မုၢ်နၤခီပဟးတဘူၣ်ဘၣ်.အပူၤကွံၥ်(၁၀)နၣ်ရံၣ်ပှၤတဟးလၢၤဘၣ်န့ၣ်ခဲအံၤဒု(၉)နၣ်ရံၣ်ဒၣ်လဲၣ်ပှၤဟးတအိၣ်လၢၤဘၣ်.မုၢ်နၤခီပယီၤသုးမ့ထံၣ်ဝဲပှၤဟးမ့ၢ်ဂ့ၤ,ပှၤလိၣ်ကွဲ(Game)မ့ၢ်ဂ့ၤ,ပှၤဟးကသုၣ်ကသီတဖၣ်န့ၣ်မ့ၢ်ဂ့ၤန့ၣ်အသုသမံသမိးဝဲကဒံကဒါဖီၣ်ဝဲတဘျီဃီလီၤ”အဂ့ၢ်စံးဝဲဒၣ်န့ၣ်လီၤ.
ပယီၤသုးကရူၢ်အံၤဖီၣ်ဝဲကမျၢၢ်တဖၣ်ဝံၤအလီၢ်ခံပၥ်ဖှိၣ်ထီၣ်ဝဲလၢ(၂၇၅)သုးကလၢၤအပူၤဒီးဆှၢလီၤက့ၤဝဲဆူမီၣ်လမၠဲၣ်ဝ့ၢ်တကပၤတဘျီအဂၤ(၃၀)စုၥ်စုၥ်အိၣ်ဝဲအဂ့ၢ်,ဝ့ၢ်လီၢ်ကဝီၤကမျၢၢ်လၢသ့ၣ်ညါထွဲဝဲတၢ်ကဲထီၣ်သးတဖၣ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါ,ရၤမတံဝ့ၢ်ပူၤတကီၢ်ခါခဲအံၤပယီၤသုးတၢ်ဟးထီၣ်က့ၤလီၤအဂီၢ်သုးခိးကီၢ်ဆၢ(BGF)ဘၣ်ဟံးန့ၢ်ဝဲတၢ်ဘံၣ်တၢ်ဘၢဒီး,တကတီၢ်ဃီဘၣ်ဃးဒီးပယီၤသုးအတၢ်ဟးထီၣ်က့ၤလီၤလၢဝ့ၢ်ပူၤအိၣ်ဝဲဒ်လဲၣ်အဂ့ၢ်န့ၣ်,ကမျၢၢ်လီၢ်ကဝီၤဖိတဂၤစံးဝဲဒ်အံၤစ့ၢ်ကီးန့ၣ်လီၤ.
“ပယီၤသုးန့ၣ်မ့မ့ၢ်ဒ်သိးဂီၤခီဒီးမုၢ်ဆါခီန့ၣ်ညီနုၢ်ပထံၣ်လၢဆှၢထီၣ်ဆှၢလီၤလိၥ်သးတပယူၥ်ဃီလီၤ.ဟးထီၣ်ဟးလီၤအဆၢကတီၢ်တၢ်မဲၥ်ညါသိလ့ၣ်ခီန့ၣ်ပၥ်ဝဲ(BGF)ကါ,အခၢၣ်သးခီပၥ်ဝဲထဲပယီၤသုးသိလ့ၣ်လဲလဲဒီးလၢအလီၢ်ခံခီန့ၣ်က့ၤပၥ်လီၤက့ၤဝဲ(BGF)သိလ့ၣ်မၤဝဲဒံးန့ၢ်မီၤ.ဟးထီၣ်ဟးလီၤဝဲဒၣ်တပူၤဃီ(BGF)လီၤ.မ့ဝံၤလဲၤထီၣ်ဝဲဆူ(ကၠီးလိကၠံ)ကျဲတပၤန့ၣ်အိၣ်,ကျဲဝဲန့ၣ်ခီန့ၣ်တၢ်လဲၤထီၣ်ဆူလဲၣ်ခးတီၤ,လ့က့ၣ်ကိၥ်တကပၤဖျိဝဲန့ၣ်လီၤ.,မ့ဝံၤဒီးန့ၣ်က့ၤလီၤကဒါက့ၤဝဲလၢညံၤနီၤ,ဝ့ၣ်ရှါဝံၤပသ့ၣ်ညါဘၣ်လၢတလဲၤလၢဖၣ်အၣ်တကပၤဘၣ်,မ့မ့ၢ်တခီက့ၤလီၤက့ၤလၢထိၣ်ကီးကိတကပၤအိၣ်ဝဲလီၤ”အဂ့ၢ်စံးဝဲဒၣ်န့ၣ်လီၤ.
ပယီၤသုးကရူၢ်အံၤတလါအံၤလါစဲးပထ့ဘၢၣ်အဆိကတၢၢ်တနွံအပူၤတိဖျိထီၣ်ဝဲအ့ရှၢၣ်မုၢ်ဖးဒိၣ်ကျဲဝံၤအလီၢ်ခံ,နုၥ်လီၤဝဲလၢရၤမတံဝ့ၢ်ပူၤဒီးဆီတလဲပၥ်လီၤက့ၤဝဲအပှၤလၢရၤမတံမဲၢ်ဆီးတိၤနီၢ်ဂံၢ်(၁)အပူၤဒီးသုးကွံၥ်ဝဲသုးခိးကီၢ်ဆၢ(BGF)ပှၤအိၣ်ခိးတၢ်တဖၣ်အိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.
ဒ်န့ၣ်အသိး,ပယီၤသုးကရူၢ်နုၥ်လီၤဝဲလၢဝ့ၢ်ပူၤဝံၤအလီၢ်ခံရၤမတံဝ့ၢ်ဟီၣ်ကဝီၤအပူၤကညီဖီၣ်စုကဝဲၤကရူၢ်ကရၢတနီၤအတၢ်ဟးထီၣ်က့ၤလီၤစှၤလီၤဝဲဒၣ်အိၣ်ဝဲအဂ့ၢ်,သ့ၣ်ညါဘၣ်ဒ်ဝ့ၢ်လီၢ်ကဝီၤကမျၢၢ်တဖၣ်စံးဝဲအသိးန့ၣ်လီၤ.
လါစဲးပထ့ဘၢၣ် ၁၇သီ, ၂၀၂၅နံၣ်, ခ့ၣ်အဲးစံၣ်.
ဖဲတလါအံၤလါစဲးပထ့ဘၢၣ်ထီၣ်သီတၢတနွံအတီၢ်ပူၤန့ၣ် တၢ်ဂ့ၢ်အကလုၥ်ကလုၥ်အဃိ KNLA တီခိၣ်ရိၣ်မဲတၢ်ပၢၢ်ဆၢသုးပၥ်ဖှိၣ်သ့ၣ်တဖၣ်ဘၣ်ထုးကွံၥ်သးဖဲအ့ရှၢၣ်ကျဲမုၢ်ဒီး တကီၢ်ခါခဲအံၤန့ၣ် ကီးတရံး-သ့ၣ်ဃးလီၤတီၢ်-ရၤမတံ ဟီၣ်ကဝီၤသ့ၣ်တဖၣ်န့ၣ် ပယီၤသုးကရူၢ်ဒိၣ်စိကဒါက့ၤဝဲန့ၢ်ဝဲဒၣ်လံန့ၣ်လီၤ.
ဒီးခီဖျိလၢ ပယီၤသုးကရူၢ်အံၤဒိၣ်စိကဒါက့ၤဝဲဒၣ် ကျဲမုၢ်လၢအရ့ဒိၣ်လၢ ကီၢ်ပယီၤ-ကီၢ်ကၠီၣ်တဲၣ် ကီၢ်ဆၢတၢ်ကူၣ်လဲၤမၤကၤအဂီၢ် လၢအမ့ၢ်အ့ရှၢၣ်ကျဲမုၢ်အံၤန့ၢ်လံအဖီခိၣ် ဖဲလါစဲးပထ့ဘၢၣ်(၇)သီအနံၤန့ၣ် ပယီၤသုးကရူၢ်အံၤဘိးဘၣ်ရၤလီၤဝဲလၢ KNUအကီၢ်သူလ့ၤတၢ်မံမီၢ်န့ၣ် မၤလီၤပှီၢ်ဝဲန့ၢ်လံအဂ့ၢ် ဘိးဘၣ်ရၤလီၤဝဲဒၣ်န့ၣ်လီၤ.
လၢတၢ်ဂ့ၢ်ဝဲအံၤအဖီခိၣ်န့ၣ် ကညီဖိကသူၣ်ထီၣ်ကီၢ်သူလ့ၤသးသဟီၣ်န့ၣ်မတဂၤမးမၤလီၤပှီၢ်အီၤတန့ၢ်ဘၣ်ဒီး ပယီၤသုးကရူၢ်အတၢ်ကတိၤဝဲန့ၣ်န့ၣ် မ့ၢ်ဒၣ်တၢ်မၤဆူၣ်ထီၣ်အသုးမုၢ်သံၣ်ဘိသးသဟီၣ်ဒီးတၢ်မၤကမၣ်ထံဂုၤကီၢ်ဂၤပဒိၣ်အမဲၥ်လီၤအဂ့ၢ် KNU-ကညီဒီကလုၥ်စၢဖှိၣ်ကရၢအပှၤကတိၤတၢ်ပၢ ပဒိၣ်စီၤကျၢၤစ့ စံးဘၣ်ဝဲ ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ.
အဝဲစံးဝဲလၢ“ပကညီဖိကသူၣ်ထီၣ်ကီၢ်သူလ့ၤန့ၣ် မတဂၤမး ဟဲမၤလီၤပှီၢ်တန့ၢ်ဘၣ်န့ၣ်ပသ့ၣ်ညါပဝဲကိးဂၤဒဲးလီၤ.တၢ်ဂ့ၢ်ဝဲန့ၣ် ဘၣ်ထွဲဝဲဒီး ဒီတကလုၥ်သးသဟီၣ်န့ၣ်လီၤ.အဃိန့ၣ်အဝဲသ့ၣ်(သုးကရူၢ်)တၢ်ကတိၤဝဲန့ၣ် န့ၣ်မ့ၢ်ဝဲဒၣ်တၢ်ကတိၤလၢတဲဆူၣ်ထီၣ်အသုးမုၢ်သံၣ်ဘိသးသဟီၣ်ဒီးဒုးထံၣ်ကမၣ်ဝဲဒၣ်ထံဂုၤကီၢ်ဂၤပဒိၣ်အမဲၥ်န့ၣ်လီၤ.ဒီးပသူၣ်ထီၣ်ပကီၢ်သူလ့ၤန့ၣ်အိၣ်ဝဲဒီးအကျိၤအကျဲတၢ်ရဲၣ်တၢ်ကျဲၤလီၤတံၢ်လီၤဆဲးန့ၣ်လီၤ.ဒ်တၢ်ရဲၣ်တၢ်ကျဲၤအိၣ်အသိးဒီးတၢ်ပၥ်ပနီၣ်တၢ်ဆၢကတီၢ်တပတီၢ်ဘၣ်တပတီၢ် တခါဝံၤတခါ ပကရဲၣ်ကျဲၤအီၤန့ၣ်တၢ်ရဲၣ်တၢ်ကျဲၤအိၣ်လီၤတံၢ်လီၤဆဲးလံန့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါ ဒ်သိးကညီဖိသ့ၣ်တဖၣ်သုတအိၣ်ဒီးတၢ်ဃူတၢ်ဖိးလၢတၢ်သူၣ်ထီၣ်ကီၢ်သူလ့ၤတဂ့ၤအဂီၢ် ပယီၤသုးကရူၢ်န့ၣ်အိၣ်ဝဲဒီးတၢ်ရဲၣ်တၢ်ကျဲၤလီၤတံၢ်လီၤဆဲးအဃိကညီဖိသ့ၣ်တဖၣ်ကတီၤသူၣ်ပၥ်သးဘၣ်လၢတၢ်ဂ့ၢ်ဝဲန့ၣ်အဂီၢ်အဂ့ၢ် ပဒိၣ်စီၤကျၢၤစ့တဲအါထီၣ်ဝဲဒၣ်စ့ၢ်ကီးန့ၣ်လီၤ.
လၢတၢ်ကသူၣ်ထီၣ်ဝဲဒၣ် ကီၢ်သူလ့ၤအဂီၢ်...
လါစဲးပထ့ဘၢၣ် ၁၆သီ,
ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,သုးက့(၅)မုၢ်တြီၢ်ကီၢ်ရ့ၣ်,လူၤသီကီၢ်ဆၣ်,ပ့က့သဝီကရူၢ်ဟီၣ်ကဝီၤအပူၤ,အပူၤကွံၥ်လါစဲးပထ့ဘၢၣ်(၈)သီတုၤလၢ(၁၅)သီအနံၤလၢ(၆)သီအတီၢ်ပူၤတၢ်မၤဝဲတၢ်ကူၣ်လိၥ်တၢၣ်ပီၣ်ဘၣ်ဃးဃိၣ်လိၥ်တၢ်မုၥ်တၢ်ခုၣ်ကရၢၢ်အဂ့ၢ်,မုၢ်တြီၢ်ကီၢ်ရ့ၣ်ဘိးဘၣ်ရၤလီၤဝဲဒၣ်ဖဲမဟါလါစဲးပထ့ဘၢၣ်(၁၅)သီအနံၤန့ၣ်လီၤ.
(၆)သီတၢ်ကူၣ်လိၥ်တၢၣ်ပီၣ်အတၢ်ရဲၣ်တၢ်ကျဲၤအံၤတၢ်မၤဝဲတၢ်တၢၣ်ပီၣ်အပတီၢ်သၢပတီၢ်ဒီး(၁)မ့ၢ်ဝဲခ့ၣ်အဲၣ်ယူၣ်ခိၣ်နၢ်ဒီးပှၤထူလံၤဖိအတၢ်ကူၣ်လိၥ်တၢၣ်ပီၣ်ဘၣ်ဃးန့ဆၢၣ်ဂ့ၢ်ဝီလၢဃိၣ်လိၥ်တၢ်မုၥ်တၢ်ခုၣ်ကရၢၢ်အပူၤအဂ့ၢ်,(၂)တၢ်ကူၣ်လိၥ်တၢၣ်ပီၣ်တၢၣ်ပီလၢတၢ်ပၥ်လီၤခါဆူညါဃိၣ်လိၥ်တၢ်မုၣ်တၢ်ခုၣ်ကရၢၢ်အတၢ်ဟူးတၢ်ဂဲၤဒီးတၢ်ဒိးန့ၢ်ခ့ၣ်အဲၣ်ယူၣ်ဒီးပှၤထူလံၤဖိအတၢ်ဘၣ်သးအဂ့ၢ်,(၃)တၢ်ကူၣ်လိၥ်တၢၣ်ပီၣ်တၢၣ်ပီလၢတၢ်ဒုးအိၣ်ထီၣ်ဃိၣ်လိၥ်တၢ်မုၥ်တၢ်ခုၣ်ကရၢၢ်တၢ်ကသုၣ်ကသံးတၢ်ဆီတလဲတၢ်မၤရဲၣ်ကျဲၤသ့ၣ်တဖၣ်အဂ့ၢ်,မုၢ်တြီၢ်ကီၢ်ရ့ၣ်အတၢ်ပၥ်ဖျါအပူၤပၥ်ဖျါဝဲဒၣ်န့ၣ်လီၤ.
ဘၣ်ဃးဒီးတၢ်မၤတၢ်ကူၣ်လိၥ်တၢၣ်ပီၣ်ဒီးဃိၣ်လိၥ်တၢ်မုၥ်တၢ်ခုၣ်ကရၢၢ်ကအိၣ်ဂၢၢ်ဆိးကျၢၤဝဲအဂီၢ်ခါဆူညါတၢ်တိၥ်ပၥ်ဒီးတၢ်ရဲၣ်တၢ်ကျဲၤအိၣ်ဝဲဒ်လဲၣ်အဖီခိၣ်, ကညီဖိခိၣ်ဃၢၤဒီးပှၤဂ့ၢ်ဝီတၢ်မၤပှၥ်ဘျးစဲကရၢ(KESAN)ပှၤနဲၣ်တၢ်(စီၤပီလ်စ့ၤထွါ)စံးဝဲဒ်အံၤန့ၣ်လီၤ.
“တၢ်လၢအလီၤတံၢ်လၢပပၥ်လီၤတၢ်ရဲၣ်တၢ်ကျဲၤခီန့ၣ်,ပကမၤဆူၣ်ထီၣ်ဝဲပှၤထူလံၤဖိအတၢ်ပၢတၢ်ြပးလၢကကွၢ်ထွဲက့ၤမိၢ်ပၢ်ဖံဖုဟီၣ်ခိၣ်ကပံၥ်,ပကမၤဃံးထီၣ်က့ၤဝဲလုၢ်လၢ်ထူသနူတၢ်သိၣ်တၢ်သီတၢ်ဘျၢဒီးတၢ်မၤလီၤတံၢ်က့ၤဟီၣ်ကဝီၤမ့ၢ်ဂ့ၤ,တၢ်မၤလီၤတံၢ်က့ၤဟီၣ်ခိၣ်ဂီၤမ့ၢ်ဂ့ၤတၢ်ဒီသဒၢမ့ၢ်ဂ့ၤတၢ်သ့ၣ်တဖၣ်န့ၣ်ကအိၣ်ဝဲမီၤနီၤ”အဂ့ၢ်စံးဝဲဒၣ်န့ၣ်လီၤ.
တကးဒံးဘၣ်,ဒ်သိးတၢ်ကပၥ်ပနီၣ်ဝဲပှၤထူလံၤဖိခွဲးယၥ်ဒီးတၢ်ဘျးစဲလိၥ်သးဒီးထံဂုၤကီၢ်ဂၤကအိၣ်ထီၣ်ဝဲအဂီၢ်ပၥ်လီၤစ့ၢ်ကီးဝဲတၢ်ရဲၣ်တၢ်ကျဲၤအိၣ်ဝဲလၢကတၢၣ်ပီၣ်တဲသကိးဂဲၤလိၥ်မၤဝဲအိၣ်ဝဲဒၣ်အဂ့ၢ်,အဝဲစံးစ့ၢ်ကီးဝဲဒၣ်န့ၣ်လီၤ.
တၢ်ကူၣ်လိၥ်တၢၣ်ပီၣ်အတၢ်ရဲၣ်တၢ်ကျဲၤအပူၤ,မုၢ်တြီၢ်ကီၢ်ရ့ၣ်ခိၣ်နၢ်,သုးက့(၅)သုးက့ခိၣ်နၢ်ခၢၣ်စး,ကီၢ်ဆၣ်ပတီၢ်ခိၣ်နၢ်,သုးရ့ၣ်ခိၣ်နၢ်ခၢၣ်စး,ကရူၢ်ခိၣ်နၢ်ခၢၣ်စးဃုၥ်ဒီးသီသံၣ်တီအူခိၣ်နၢ်ခၢၣ်စးသ့ၣ်တဖၣ်ပၥ်ဖှိၣ်သးပၣ်ဃုၥ်ပၣ်ဂီၢ်ဝဲဒၣ်အသိးတၢ်ရဲၣ်တၢ်ကျဲၤဒီတကတီၢ်အပူၤခဲလၢၥ်ပၥ်ဖှိၣ်သးအဂၤ(၁၀၁)အဂ့ၢ်,မုၢ်တြီၢ်တၢ်ဘိးဘၣ်ရၤလီၤအပူၤပၥ်ဖျါစ့ၢ်ကီးဝဲဒၣ်န့ၣ်လီၤ.
ဃိၣ်လိၥ်တၢ်မုၥ်တၢ်ခုၣ်ကရၢၢ်အံၤဒ်သိးန့ဆၢၣ်တၢ်အိၣ်ယၢၤကအိၣ်ဂၢၢ်ဆိးကျၢၤ,တၢ်ကကွၢ်ထွဲကတီၤလုၢ်လၢ်ထူသနူတၢ်အိၣ်ယၢၤဒီးတၢ်မုၥ်တၢ်ခုၣ်,နီၢ်ကစၢ်တၢ်ပၢတၢ်ြပးခွဲးယၥ်ကအိၣ်အဂီၢ်,တၢ်မၤလိၣ်ထီၣ်ဖးထီၣ်ဝဲဖဲ(၂၀၁၂)နံၣ်ဝံၤအလီၢ်ခံ(၂၀၁၈)နံၣ်လါဒံၣ်စဲဘၢၣ်အပူၤတၢ်ဒုးအိၣ်ထီၣ်ဘိးဘၣ်ရၤလီၤဝဲလၢအဖိးသဲစးအဂ့ၢ်သ့ၣ်ညါဘၣ်န့ၣ်လီၤ.
ဒ်န့ၣ်အသိး,ဖိးသဲးစးတၢ်ဘိးဘၣ်သ့ၣ်ညါအပူၤဃိၣ်လိၥ်တၢ်မုၥ်တၢ်ခုၣ်ကရၢၢ်အံၤအလဲၢ်အထီအိၣ်ဝဲ(၁၃၅၅,၅၈ဝ)အ့ကၢၣ်အဂ့ၢ်,သ့ၣ်ညါဘၣ်စ့ၢ်ကီးန့ၣ်လီၤ.
လါစဲးပထ့ဘၢၣ် ၁၅သီ, ၂၀၂၅နံၣ်, ခ့ၣ်အဲးစံၣ်,
ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,သုးက့(၇)ဖၣ်အၣ်ကီၢ်ရ့ၣ်,လူၢ်ပျဲၢ်ကီၢ်ဆၣ်,ခီတီၢ်ဟီၣ်ကဝီၤလီၤဆီအပူၤ,အပူၤကွံၥ်လါစဲးပထ့ဘၢၣ်(၁၃)သီအနံၤအပူၤ,ကညီဖီၣ်စုကဝဲၤကရူၢ်(၃)ဖုဒ်အမ့ၢ်သုးခိးကီၢ်ဆၢ(BGF),ဒံၣ်မိၣ်ကရ့ၣ်စံၣ်တၢ်ဘၣ်ဘျူးကညီသုးမုၢ်ဒိၣ်(DKBA)ဒီးကညီတၢ်မုၥ်တၢ်ခုၣ်ကီၣ်ကးကရၢ(KNLA/PC)တဖၣ်ပၥ်ဖှိၣ်သးမၤဝဲ(၂)ဘျီတဘျီ“တၢ်မုၥ်တၢ်ခုၣ်တၢ်ထုကဖၣ်”အတၢ်ရဲၣ်တၢ်ကျဲၤလၢမဲးသမံးသဝီပူၤအဂ့ၢ်,ဖၣ်အၣ်ကီၢ်ရ့ၣ်ပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
တၢ်မုၥ်တၢ်ခုၣ်တၢ်ထုကဖၣ်တၢ်ရဲၣ်တၢ်ကျဲၤအံၤအဆိကတၢၢ်တၢ်မၤတ့ၢ်ဝဲဖဲအပူၤကွံၥ်လါယူၤလံပူၤတဘျီအိၣ်ဝဲဝံၤအလီၢ်ခံ,တၢ်ဆဲးမၤဝဲခံဘျီတဘျီဒ်အံၤအဖီခိၣ်ခ့ၣ်အဲၣ်ယူသုးက့(၇)ဖၣ်အၣ်ကီၢ်ရ့ၣ်ခိၣ်,ပဒိၣ်စီၤအီၣ်မီၤအ့စံးဝဲဒ်အံၤန့ၣ်လီၤ.
အဝဲစံးဝဲလၢ“တၢ်ရဲၣ်တၢ်ကျဲၤခီန့ၣ်သီခါဖးဒိၣ်တဖၣ်ကွဲမုၥ်ဝဲဖီၣ်စုကဝဲၤခိၣ်နၢ်ကရူၢ်ကရၢတဖၣ်ဒီးခိၣ်ဃၢၤဒူသဝီကမျၢၢ်တဖၣ်အဃိန့ၣ်ပှၤဟဲထီၣ်ဝဲဒၣ်န့ၣ်လီၤ.အဝဲသ့ၣ်ခီဒ်သိးအတၢ်စူၢ်တၢ်နၥ်တၢ်မုၢ်လၢအိၣ်ဝဲအသိးဒီးဃ့ဘါထုကဖၣ်မၤဝဲဒၣ်န့ၣ်လီၤ.မုၢ်မဆါတနံၤအံၤခီတၢ်ဒုးတၢ်ယၤအိၣ်ထီၣ်ဝဲအဖီခိၣ်မၤဝဲတၢ်ဃ့သကွံးကညးဝဲဒၣ်တၢ်ဒ်စူၢ်နၥ်ဝဲအသိးန့ၣ်လီၤ”အဂ့ၢ်စံးဝဲဒၣ်န့ၣ်လီၤ.
“တၢ်မုၥ်တၢ်ခုၣ်တၢ်ထုကဖၣ်”အတၢ်ရဲၣ်တၢ်ကျဲၤအံၤဟီၣ်ကဝီၤတၢ်ဘူၣ်တၢ်ဘါခိၣ်နၢ်ဒိၣ်ထီတဖၣ်တီခိၣ်ရိၢ်မဲမၤဝဲဒၣ်ဝဲဒီးအတၢ်ပညိၣ်မ့ၢ်ဝဲဒ်သိးကညီကီၢ်စဲၣ်ဒီတဘ့ၣ်ကအိၣ်ဒီးတၢ်မုၥ်တၢ်ခုၣ်အဂီၢ်အဂ့ၢ်,ဖၣ်အၣ်ကီၢ်ရ့ၣ်ခိၣ်ပဒိၣ်စီၤအီၣ်မီၣ်အ့စံးဝဲဒၣ်န့ၣ်လီၤ.
လၢန့ၣ်အမဲၥ်ညါ,(၂)ဘျီတဘျီတၢ်ရဲၣ်တၢ်ကျဲၤအပူၤတၢ်ဘူၣ်တၢ်ဘါခိၣ်နၢ်,ဖီၣ်စုကဝဲၤခိၣ်နၢ်ဒ်အမ့ၢ်သုးခိးကီၢ်ဆၢ(BGF),ဒံၣ်မိၣ်ကရ့ၣ်စံၣ်တၢ်ဘၣ်ဘျူးကညီသုးမုၢ်ဒိၣ်(DKBA)ကညီတၢ်မုၥ်တၢ်ခုၣ်ကီၣ်ကးကရၢ(KNLA/PC),သုးက့(၆)ဒူပျၥ်ယၥ်ကီၢ်ရ့ၣ်ခိၣ်ပဒိၣ်စီၤရွ့ၣ်မီဃုၥ်ဒီးကမျၢၢ်လီၢ်ကဝီၤဖိတဖၣ်ပၥ်ဖှိၣ်သးခဲလၢၥ်အိၣ်ဝဲအဂၤ၂၀၀၀)ဃၣ်ဃၣ်အဂ့ၢ်,အဝဲစံးအါထီၣ်ဝဲဒၣ်န့ၣ်လီၤ.
အဆိကတၢၢ်တၢ်ရဲၣ်တၢ်ကျဲၤအပူၤကညီဖီၣ်စုကဝဲၤကရူၢ်ကရၢခိၣ်နၢ်ဒိၣ်ထီဒ်အမ့ၢ်
သုးခိးကီၢ်ဆၢ(BGF),ဒံၣ်မိၣ်ကရ့ၣ်စံၣ်တၢ်ဘၣ်ဘျူးကညီသုးမုၢ်ဒိၣ်(DKBA)ကညီတၢ်မုၥ်တၢ်ခုၣ်ကီၣ်ကးကရၢ(KNLA/PC),အမဲၥ်ညါ(KNLA)သုးရိၢ်မဲခိၣ်ကျၢၢ်(သုးခိၣ်ကျၢၢ်စိ)စီၤကၠီၣ်နံၣ်ဃုၥ်ဒီးခ့ၣ်အဲၣ်ယူၣ်ဖၣ်အၣ်ကီၢ်ရ့ၣ်ခိၣ်နၢ်တဖၣ်ပၣ်ဃုၥ်ပၣ်ဂီၢ်တ့ၢ်ဝဲဒၣ်အိၣ်ဝဲဒၣ်န့ၣ်လီၤ.
ဒ်န့ၣ်အသိးခီတီၢ်ဟီၣ်ကဝီၤလီၤဆီအပူၤဘၣ်ဃးဒီးတၢ်ဘူၣ်တၢ်ဘါခိၣ်နၢ်ဒိၣ်ထီတဖၣ်တီခိၣ်ရိၢ်မဲမၤဝဲ“တၢ်မုၥ်တၢ်ခုၣ်တၢ်ထုကဖၣ်”အတၢ်ရဲၣ်တၢ်ကျဲၤအံၤခါဆူညါတၢ်ကဆဲးမၤဝဲတပယူၥ်ဃီအိၣ်ဒံးဝဲဒၣ်ကွ့ၢ်ကွ့ၢ်လီၤအဂ့ၢ်,ဖၣ်အၣ်ကီၢ်ရ့ၣ်ပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
လါစဲးပထ့ဘၢၣ် ၁၅ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ဒူပျၥ်ယၥ်ကီၢ်ရ့ၣ်, ကီးတရံးကီၢ်ဆၣ်, ဖဲကီၢ်ကၠီၣ်တဲၣ်-ကီၢ်ပယီၤကီၢ်ဆၢဟီၣ်ကဝီၤသူမှဲကျိကၢၢ်ခိၣ်ဒီတ ကျိၤန့ၣ်ပှၤလီၢ်အိၣ်ကမှံဖိသ့ၣ်တဖၣ်လၢအသီကဒီးတဘျီအနီၣ်ဂံၢ်ဟဲက့ၤအါထီၣ်ဝဲဒီးကတီၢ်အံၤလိၣ်ဘၣ်ဝဲတၢ်အခိၣ်ဒုး,ကသံၣ်ကသီဒီးတၢ်အီၣ်တၢ်အီတၢ်ဆီၣ်ထွဲအါမးအဂ့ၢ်ပှၤလီၢ်အိၣ်ကမှံဖိဒီးပှၤဘၣ်မူဘၣ်ဒါလၢကွၢ်ထွဲတၢ်သ့ၣ်တဖၣ်စံးဝဲန့ၣ်လီၤ.
ခီဖျိလၢပယီၤသုးမီၤစိရိၤဟဲက့ၤထီၣ်ဒိၣ်စိကီးတရံး-ရၤမတံအ့ၡၢၣ်ကျဲမုၢ်ဟီၣ်ကဝီၤဝံၤအလီၢ်ခံပယီၤသုးအံၤတၢ်ရဲၣ် တၢ်ကျဲၤအိၣ်လၢကမၤဝဲဒုးယၤတၢ်ထီၣ်ဒုးလၢရၤမတံၤကလံၤထံးဟီၣ်ကဝီၤစ့ၢ်ကီးအဃိလ့က့ၣ်ကီၣ်သဝီဃုၥ်ဒီးဒူသဝီလၢအိၣ်တၢ်ခိၣ်တၢ်ဃၢၤတဖၣ်ပှၤကမျၢၢ်လၢအကထိဘျဲၣ်ဘၣ်ဟဲက့ၤဃ့ၢ်အိၣ်ကဒုကဒီးအသးလၢသူမှဲကျိကၢၢ်ခိၣ်တၢ်အိၣ်ကဒုလီၢ်အဂ့ၢ် လ့က့ၣ်ကိၥ်ပှၤလီၢ်အိၣ်ကမှံဖိ နီၢ်ထံမူဆှံ နီၢ်ပိလ့ စံးဝဲဒၣ်န့ၣ်လီၤ.
“ပှၤတဲပဝဲလၢတၢ်ဒုးကကဲထီၣ်မီၤနီၤ. အဃိပှၤမၢပဟးထီၣ်ဝဲဒၣ်မီၤနီၤ. ပဘၣ်ဟဲဃ့ၢ်ထီၣ်ဝဲဒၣ်န့ၣ်လီၤ. တၢ်ကဲထီၣ်သး န့ၣ်ကျိသၣ်လီၤတဲလၢတၢ်ဆါဟံၣ်အဃိပှၤပျံၤတၢ်ဒီးပှၤဃ့ၢ်ကွံၥ်ဝဲခဲလၢၥ်လီၤ. တၢ်ဘၣ်ဂ့ၢ်ဘၣ်ဝီတအိၣ်ဘၣ်,တၢ်ကီတၢ် ခဲန့ၣ်အိၣ်ဝဲအါမးလီၤ, ကအိၣ်ကဆိးအဂီၢ်တၢ်လီၢ်တအိၣ်ဘၣ်. ဘၣ်အိၣ်နါစိးဝဲဒ်န့ၣ်န့ၣ်လီၤ.” အဂ့ၢ်စံးဝဲန့ၣ်လီၤ.
ဒူသဝီပှၤကမျၢၢ်လၢဟဲဃ့ၢ်ထီၣ်သ့ၣ်တဖၣ်အကျါပၣ်ဃုၥ်ဝဲ လ့က့ၣ်ကိၥ်, မဲးထီးသလ့, အ့ကၠ့မၠဲၣ်, ဖလူ, ထံမဲးဝါခံ, ပ ဟံၣ်ကျီး, ယသ့ၣ်ဂူၤဒီးမ့လဲၣ်ပၣ်သဝီ ပှၤလီၢ်ကဝီၤဖိသ့ၣ်တဖၣ်န့ၣ်လီၤ.
မ့ၢ်လၢပှၤလီၢ်အိၣ်ကမှံဖိသ့ၣ်တဖၣ်အံၤဘၣ်ဟဲထီၣ်ဃ့ၢ်သတူၢ်ကလၥ်ဒ်အံၤအဖီခိၣ်အဃိလၢအဝဲသ့ၣ်အဂီၢ်တၢ်လီၢ်တၢ်ကျဲတၢ်ဂ့ၢ်ကီအိၣ်ဝဲအသိးတၢ်အီၣ်တၢ်အီ, တၢ်အိၣ်ဆူၣ်အိၣ်ချ့တၢ်ကွၢ်ထွဲသ့ၣ်တဖၣ်စ့ၢ်ကီးတၢ်ကီတၢ်ခဲအိၣ်ဝဲအဂ့ၢ်ပှၤ လၢကွၢ်ထွဲမၤစၢၤပှၤလီၢ်အိၣ်ကမှံဖိနီၢ်ဖီလွဲစံးဝဲဒ်အံၤန့ၣ်လီၤ.
“ဖဲအံၤန့ၣ်တၢ်ကီတၢ်ခဲနီၣ်ဂံၢ်တၢန့ၣ်မ့ၢ်ဝဲ...
လါစဲးပထ့ဘၢၣ် ၁၂ သီ, ၂၀၂၅ နံၣ်, ခ့ၣ်အဲးစံၣ်
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ မၠၣ်ဝတံၣ်ဝ့ၢ် လၢအရ့ဒိၣ်ဝဲလၢသုးမီၤစိရိၤအဂီၢ်အံၤတၢ်ထီၣ်ဖျိန့ၢ်ဝဲဝံၤ ဘူးဒးကညီသုးမုၢ်ဒိၣ် (DKBA)သုးခိၣ်ဘိၤဘံၣ်ကရူၢ် လၢအပၣ်ဃုၥ်လၢကျဲပူၤတၢ်ဒုးတၢ်ယၤပူၤအံၤတဖၣ် ခဲအံၤက့ၤသုးဘူးထီၣ်အသးလၢ (သုးက့ ၅) ဒီး(သုးက့ ၁)ဟီၣ်ကဝီၤအဆၢတကပၤအဂ့ၢ်န့ၣ် ဂံၢ်ခီၣ်ထံးပှၤဟ့ၣ်တၢ်ကစီၣ်ဖိဒီးလီၢ်ကဝီၤပှၤဘၣ်မူဘၣ်ဒါတဖၣ်စံးဝဲန့ၣ်လီၤ.
တချုးပယီၤသုးဟဲထီၣ်ဒိၣ်စိက့ၤဝဲကီးတရံး-မၠၣ်ဝတံၣ်အ့ရှါကျဲလၢဟီၣ်ကဝီၤ(KNLA)သုးပၥ်ဖှိၣ်ဒိၣ်စိထီၣ်န့ၢ်ဝဲအံၤဒံးဘၣ်အခါန့ၣ် စးထီၣ်လၢကြုၢ်တု-ကီးတရံး ဒုးယၤတၢ်ဟူး တၢ်ဂဲၤဒီတကတီၢ်အပူၤန့ၣ် (DKBA)ကရူၢ်လၢအဘၣ်တၢ်တီခိၣ်ရိၣ်မဲအီၤလၢ သုးခိၣ်ဘိၤဘံၣ်အံၤ ဆီၣ်ထွဲမၤစၢၤဒုးစၢၤသကိးဝဲပယီၤသုးလၢလၢပှဲၤပှဲၤန့ၣ်လီၤ.
ဘၣ်ဆၣ်တကီၢ်ခါခဲအံၤလၢ(သုးက့ ၅) ကမၤမိၢ်တကပၤန့ၣ် ပယီၤသုးမၤအါထီၣ်အသုးဂံၢ်ဘါအသိး (DKBA)သုးခိၣ်ဘိၤဘံၣ်အပှၤ ကအိၣ်လၢ(၁၅၀)ဃၣ်ဃၣ်အံၤစ့ၢ်ကီး လဲၤသုးဘူးထီၣ်သးလၢ (သုးက့၅)ဒီးသုးက့(၁)အဆၢ ဖၣ်အၣ်ကီၢ်ဆၣ် မဲၥ်ကၠံၢ်ထၣ်သဝီ တကပၤဘၣ်ဟဲအိၣ်ထီၣ်ဝဲဒ်အံၤအဂ့ၢ်န့ၣ် သုးက့ပှၤဘၣ်မူဘၣ်ဒါစံးဝဲန့ၣ်လီၤ.
ဘၣ်ဃးဘူးဒးကညီသုးမုၢ်ဒိၣ်(DKBA)ကရူၢ်လဲၤသုးဘူးထီၣ်အသးလၢ(သုးက့ ၅)တကပၤ အတၢ်ပညိၣ်အခိၣ်သ့ၣ်ကမ့ၢ်မနုၤလဲၣ် န့ၣ် သုးက့ ၅...
လါစဲးပထ့ဘၢၣ် ၁၂ သီ, ၂၀၂၅ နံၣ်, ခ့ၣ်အဲးစံၣ်
ကီၢ်ပယီၤအပူၤ အပူၤကွံၥ်လါအီကူးတလါအတီၢ်ပူၤန့ၣ် သုးမီၤစိရိၤလုၢ်သ့ၣ်ခါပတၥ်မၤကမၣ်ဝဲပှၤဂ့ၢ်ဝီခွဲးယၥ်ခဲလၢၥ်ကဲထီၣ်အိၣ်ဝဲ (၆၀၅)ဘျီအဂ့ၢ်န့ၣ် ဒီကလုၥ်ဃူဖိး(NUG)ပဒိၣ် ပှၤဂ့ၢ်ဝီခွဲးယၥ်ကိတိၥ်ဝဲၤကျိၤ ထုးထီၣ်ပၥ်ဖျါဝဲဖဲလါစဲးပထ့ဘၢၣ် ၁၀ သီအနံၤန့ၣ်လီၤ
ဒ်(NUG)လံၥ်တၢ်ပၥ်ဖျါပူၤပၥ်ဖျါဝဲအသိးန့ၣ် တၢ်မၤကမၣ်ပှၤဂ့ၢ်ဝီခွဲးယၥ်(၆၀၅)ဘျီလၢသုးမီၤစိရိၤလုၢ်သ့ၣ်ခါပတၥ်ဝဲအံၤတဖၣ်အကျါ မ့မ့ၢ်စကဲကီၢ်ခီဒိၣ်အပူၤန့ၣ် မၤကမၣ်ဝဲပှၤဂ့ၢ်ဝီခွဲးယၥ်ကဲထီၣ်ဝဲ(၁၃၀)ဘျီအဂ့ၢ်န့ၣ် စံးဝဲန့ၣ်လီၤ.
ဒ်န့ၣ်အသိးသုးမီၤစိရိၤ မၤဟးဂီၤဝဲကမျၢၢ်အတၢ်ဖိတၢ်လံၤကဲထီၣ်ဝဲ(၁၃၀)ဘျီဒီး တကးဒံးဘၣ်အကဘီယူၤဟးတ့ၢ်လီၤမ့ၣ်ပိၢ်အိၣ်ဝဲ (၂၁၁)ဘျီအသိး ဖီၣ်မၤသံကမျၢၢ်ကဲထီၣ်ဝဲ(၂၂)ဘျီအဂ့ၢ်န့ၣ် လံၥ်တၢ်ပၥ်ဖျါအပူၤပၥ်ဖျါဝဲန့ၣ်လီၤ.
ခီဖျိလၢကဘီယူၤအံၤအဃိ ကခၠ့ၣ်ကီၢ်စဲၣ်,ကရ့ၣ်နံၣ်ကီၢ်စဲၣ်,ယိၤဒိၣ်ကီၢ်စဲၣ်,တလၢၤကီၢ်စဲၣ်,ရခၢၣ်ကီၢ်စဲၣ်,မကွ့ကီၢ်ခီဒိၣ်, မါတလ့ကီၢ်ခီဒိၣ် ဒီး ပကိကီၢ်ခီဒိၣ်,စကဲကီၢ်ခီဒိၣ် ဟီၣ်ကဝီၤအပူၤ ကမျၢၢ်ထံဖိကီၢ်ဖိသံဝဲ(၂၈၄)ဂၤအဂ့ၢ်န့ၣ် (NUG)စံးဝဲန့ၣ်လီၤ.
လၢတၢ်န့ၣ်အဃိကမျၢၢ်ထံဖိကီၢ်ဖိသံတဖၣ်အကျါန့ၣ် ဖိသၣ်(၁၈)နံၣ်ဆူဖီလၥ်သံဝဲ(၄၅)ဂၤ, (၁၈)နံၣ်ဆူဖီခိၣ်(၁၄၉)ဂၤဒီး ပှၤလၢတၢ်ပဲၥ် ဖးနီၤဖးအီၤ တဘၣ်ဘၣ်န့ၣ်အိၣ်(၉၀)ဂၤအသိး ပှၤဘၣ်ဒိဘၣ်ထံးအိၣ်ဝဲ(၄၀၉)ဂၤအကျါ ဖိသၣ်(၁၈)နံၣ်ဆူဖီလၥ်န့ၣ်(၃၄)ဂၤ, (၁၈)နံၣ်ဆူဖီခိၣ်န့ၣ်...
လါစဲးပထ့ဘၢၣ် ၁၂သီ, ၂၀၂၅နံၣ်,ခ့ၣ်အဲးစံၣ်.
စးထီၣ်ဖဲတလါအံၤလါစဲးပထ့ဘၢၣ်ထီၣ်(၁)တနွံအတီၢ်ပူၤန့ၣ် ပယီၤသုးကရူၢ်မၤဃံးထီၣ်ဝဲဒၣ် ရမၤတံဆူဖၣ်အၣ်, ဖၣ်အၣ်ဆူရၤမတံ တၢ်ဝံစိၥ်တီဆှၢပနံၥ်တၢ်ဖိတၣ်လံၤဒီးပနံၥ်တၢ်ဖိတၢ်လံၤလၢအဟးထီၣ်ဖဲလီၢ်ကဝီၤပူၤဒၣ်လဲၣ်ကဘၣ်မၤဝဲဒၣ်ကီၢ်စဲၣ်ပဒိၣ်အလံၥ်တၢ်အုၣ်ကီၤအဂ့ၢ် သ့ၣ်ညါဘၣ်လၢ ပှၤတီၣ်ပနံၥ်တၢ်ကၤသိလ့ၣ်ကစၢ်အအိၣ်န့ၣ်လီၤ
အပူၤကွံၥ်န့ၣ်တၢ်မၤဃံးဝဲထဲ တၢ်မ့ၢ်ဝံစိၥ်တီဆှၢဟုသးတခါလီၤဘၣ်ဆၣ်အခဲအံၤန့ၣ် တၢ်အီၣ်တၢ်အီ,တၢ်ဖိတၢ်လံၤလၢပှၤကညီသူဝဲဒီးဆဲးဖီကဟၣ်တၢ်ပီးတၢ်လီခဲလၢၥ် အကစၢ်မ့ၢ်တပၣ်ဘၣ်န့ၣ် တီဆှၢဝဲတဘူၣ်လၢၤဘၣ်အဂ့ၢ် ရၤမတံ သိလ့ၣ်ကစၢ်တဂၤစံးဘၣ်ဝဲဒၣ် ခ့ၣ်အဲးစံၣ် ကညီတၢ်ကစီၣ်ဒ်အံၤန့ၣ်လီၤ.
အဝဲစံးဝဲလၢ“တၢ်ဖိတၢ်လံၤ လံၥ်အုၣ်ကီၤမ့ၢ်တအိၣ်ဘၣ်န့ၣ် က့ၤစိၥ်တဘူၣ်လၢၤဘၣ်.လံၥ်အုၣ်သးန့ၣ်တၢ်ဘၣ်လဲၤမၤန့ၢ်အီၤလၢမုၢ်ကျိၤဝဲၤကွၥ်ဝဲၤကျိၤအအိၣ်န့ၣ်လီၤ.အဝဲမၤဝဲဒ်သိးပှၤကညီမ့ၢ်ဟးန့ၣ်ဘၣ်မၤလံၥ်ပိၥ်ကျဲအသိးန့ၣ်လီၤ.ဃံးထီၣ်သပှၢ်န့ၣ်လီၤ.ကီၢ်ကၠီၣ်တဲၣ်တၢ်ဖိတၢ်လံၤ,ပှၤကညီသူတၢ်ဖိတၢ်လံၤ,တၢ်အီၣ်တၢ်အီဒီးစဲးဖီကဟၣ်ပီးလီသ့ၣ်တဖၣ်န့ၣ်မၤဃံးထီၣ်ဝဲဒၣ်န့ၣ်လီၤ.ပက့ၤစိၥ်တၢ်ဖိတၢ်လံၤတဘူၣ်လၢၤဘၣ်.ပဘၣ်ယိၣ်လၢပှၤကဟံးန့ၢ်ကွံၥ်ပတၢ်န့ၣ်လီၤ.အကစၢ်မ့ၢ်တပၣ်ဘၣ်န့ၣ် တဘၣ်လိၣ်စိၥ်ဘၣ်.”အဂ့ၢ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါ ဒ်လီၢ်ကဝီၤပှၤဟ့ၣ်တၢ်ကစီၣ်တနီၤစံးဝဲဒၣ်အသိး ပနံၥ်တၢ်ကၤခဲလၢၥ်လၢတၢ်ဝံစိၥ်တီဆှၢအီၤ ဆူရၤမတံဒီးဖၣ်အၣ်သ့ၣ်တဖၣ်န့ၣ် ကဘၣ်ဟံးန့ၢ်ဝဲဒၣ် ကီၢ်စဲၣ်ပဒိၣ်အလံၥ်အုၣ်ကီၤဒီး ကဘၣ်ပၥ်ဖျါဃုၥ်တၢ်ဂ့ၢ်တၢ်ကျိၤလၢ ပနံၥ်တၢ်ကၤသ့ၣ်တဖၣ်အံၤအိၣ်ဟဲန့ၢ်ကျးဖဲလဲၣ်ဒီးတၢ်ကလဲၤပၥ်လီၤအီၤလၢကျးဖဲလဲၣ်,ပနံၥ်တၢ်ဖိတၢ်လံၤမနုၤသ့ၣ်တဖၣ်ပၣ်လဲၣ်ဒီးကျးကစၢ်ကဘၣ်အုၣ်ကီၤသး,တၢ်ဂ့ၢ်တၢ်ကျိၤသ့ၣ်တဖၣ်န့ၣ်ကဘၣ်ပၥ်ဖျါဝဲဒၣ်အဂ့ၢ်စံးဝဲဒၣ်န့ၣ်လီၤ.
တကီၢ်ခါခဲအံၤန့ၣ် ရၤမတံဆူဖၣ်အၣ် တၢ်လဲၤတၢ်က့ၤအဂီၢ်မ့ၢ်ဂ့ၤ,တၢ်ဝံစိၥ်တီဆှၢပနံၥ်တၢ်ဖိတၢ်လံၤအဂီၢ်မ့ၢ်အဂ့ၤန့ၣ် တၢ်သူက့ၤဝဲလၢထိၣ်ကီးကိကျဲတကပၤဒီးသိလ့ၣ်တီၣ်ပနံၥ်တၢ်ကၤလၢအဒိၣ်သ့ၣ်တဖၣ်န့ၣ်တၢ်ပျဲလ့ၢ်လိၤအီၤထီၣ်တနံၤလီၤတနံၤအဂ့ၢ် သ့ၣ်ညါဘၣ်လၢပှၤနီပနံၥ်တၢ်ဖိတၢ်လံၤသိလ့ၣ်ကစၢ်အအိၣ်န့ၣ်လီၤ.
ဒ်န့ၣ်အသိး စးထီၣ်ဖဲလါစဲးပထ့ဘၢၣ်ထီၣ်(၁)တနွံအတီၢ်ပူၤန့ၣ် ရၤမတံ အ့ရှၢၣ်ကျဲမုၢ်သီဒီတဘိ,ပယီၤသုးကရူၢ်ဒိၣ်စိက့ၤဝဲနၢ်ဝံၤအလီၢ်ခံ လၢကက့ၤအိးထီၣ်က့ၤဝဲတၢ်ကလ့ၢ်လိၤလ့ၢ်ထီၣ်အီၤအဂီၢ် ဂုၥ်ကျဲးစၢးဝဲသပှၢ်ပှၢ်ဘၣ်ဆၣ်အ့ရှၢၣ်ကျဲမုၢ်ဟီၣ်ကဝီၤန့ၣ်တၢ်ဒုးဆဲးပြဲးအိၣ်ဒံးဝဲအသိးပယီၤသုးခးပျုၤပျီၤဝဲဒၣ်ကျိဖးဒိၣ်အိၣ်ဝဲတပယူၤဃီအဂ့ၢ်သ့ၣ်ညါဘၣ်လၢဂံၢ်ခီၣ်ထံးပှၤဟ့ၣ်တၢ်ကစီၣ်အအိၣ်န့ၣ်လီၤ.
လါစဲးပထ့ဘၢၣ် ၁၂ သီ, ၂၀၂၅ နံၣ်, ခ့ၣ်အဲးစံၣ်
တကီၢ်ခါကီၢ်ပယီၤထံရူၢ်ကီၢ်သဲးတၢ်ဂ့ၢ်ကီလၢအဟဲကဲထီၣ်ခဲအံၤ ကမ့ၢ်လၢတၢ်ဘှါဆှဲအီၤလၢသုးဂံၢ်ဘါန့ၢ်ဝဲတညီဘၣ်အဃိ ကျဲအဂ့ၤကတၢၢ်တဘိလၢတၢ်ကဘၣ်ဃဲၣ်လီၤဘှါဆှဲအီၤလၢတၢ်ထံၣ်လိၥ်အိၣ်သကိးလၢစီၤနီၢ်ခိၣ်အဂ့ၢ်န့ၣ် ဒံၣ်မိၣ်ခြ့ၣ်စံၣ်ကညီမၤ ဘျုးသုးမုၢ်ဒိၣ်(DKBA) လီၢ်ခၢၣ်သးထုးထီၣ်ပၥ်ဖျါဝဲဖဲတဟါအံၤန့ၣ်လီၤ.
ထံကီၢ်တၢ်ဂ့ၢ်ကီလၢအဟဲကဲထီၣ်အံၤတဖၣ် တၢ်မ့ဘှါဆှဲအီၤလၢတၢ်ဒုးတၢ်ယၤအဖီခိၣ်န့ၣ် တမ့ၢ်လၢကဘၣ်ဂီၢ်ဖိးဒ့ဝဲဘၣ်အသိး ဘၣ်ဒိဘၣ်ထံးက့ၤဝဲလၢကမျၢၢ်ထံဖိကီၢ်ဖိလီၤအဃိ တၢ်စုဆူၣ်ခီၣ်တကးအမဲၥ်ညါတၢ်မ့ဃဲၣ်လီၤဘှါဆှဲအီၤလၢတၢ်ထံၣ်လိၥ် အိၣ်သကိးန့ၣ် မ့ၢ်ကျဲလၢအဂ့ၤဒိၣ်ကတၢၢ်အဂ့ၢ်န့ၣ် DKBA သုးဂ့ၢ်ဝီခိၣ် သုးခိၣ်ကျၢၢ်ဖိ စီၤစ့ၤဝ့ စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤ.
အဝဲစံးဝဲလၢ“ပထံပကီၢ်တၢ်အိၣ်သးခဲအံၤပမ့ဘှါဆှဲလၢတၢ်ဒုးတၢ်ယၤအဖီခိၣ်ဒုတဘၣ်ဂီၢ်ဖိးဒ့ဘၣ်.နၤနၢၤတထံၣ်,ယၤနၢၤတထံၣ်.မ့ဝံၤဘၣ်ဒိအါလၢကမျၢၢ်မီၤ. ပမ့ဘှါဆှဲအီၤလၢတၢ်စုဆူၣ်ခီၣ်တကးအမဲၥ်ညါမ့ထံၣ်တဲသကိးလိၥ်သးန့ၣ်မ့ၢ်တၢ်လၢအဂ့ၤ ဒိၣ်ကတၢၢ် လီၤ.”အဂ့ၢ်န့ၣ် စံးဝဲန့ၣ်လီၤ.
လၢန့ၣ်အမဲၥ်ညါတၢ်ဃုထၢလၢသုးမီၤစိရိၤကမၤဝဲဘျီဝဲအံၤစ့ၢ်ကီးန့ၣ် ဒ်သိးကီၢ်ပယီၤဒီတဘ့ၣ်ခါဆူညါတၢ်ဆီတလဲလၢအဂ့ၤဒီး ခိၣ်နၢ်လၢ ကမျၢၢ်ဃုထၢထီၣ်ဝဲတဖၣ်ကအိၣ်ထီၣ်ဝဲအဂီၢ် ကကျဲးစၢးမၤစၢၤဝဲတသ့ဖဲအသ့အဂ့ၢ်န့ၣ် (DKBA)လံၥ်တၢ်ပၥ်ဖျါအပူၤ ပၥ်ဖျါဝဲန့ၣ်လီၤ.
လၢတၢ်န့ၣ်အဃိ ကမျၢၢ်ထံဖိကီၢ်ဖိလၢအအဲၣ်ဒိးဟ့ၣ်တၢ်ဖးတဖၣ်အံၤကကဟုကယၥ်ဝဲအသိး ကမျၢၢ်လၢအတအဲၣ်ဒိးဟ့ၣ် တၢ်ဖးဘၣ်တဖၣ်စ့ၢ်ကီးတမ့ၢ်လၢတၢ်ကတြီမၤတံၥ်တၥ်အဝဲသ့ၣ်ဘၣ်အဂ့ၢ်န့ၣ် DKBA သုးခိၣ်ကျၢၢ်ဖိ စီၤစ့ၤဝ့...
လါစဲးပထ့ဘၢၣ် ၁၂သီ, ၂၀၂၅နံၣ်, ခ့ၣ်အဲးစံၣ်.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ သုးက့(၄)ဘျံးဒဝဲၢ်ကီၢ်ရ့ၣ်အပူၤ ခီဖျိပယီၤသုးမီၤစိရိၤခးတပျုၤပျီၤကျိဖးဒိၣ်ဒီးကဘီယူၤဟဲခးလီၤတၢ်အဃိ(၈)လါအတီၢ်ပူၤဘၣ်သံဝဲကမျၢၢ်(၃၁)ဂၤအဂ့ၢ် ခ့ၣ်အဲၣ်ယူၣ်-ဘျံးဒဝဲၢ်ကီၢ်ရ့ၣ်တၢ်ကစီၣ်ထုးထီၣ်ပၥ်ဖျါဝဲဖဲမဟါလါစဲးပထ့ဘၢၣ်(၁၁)သီအနံၤန့လီၤ.
ကမျၢၢ်လၢသံ(၃၁)တဂၤအကျါ(၉)ဂၤန့ၣ်ဘၣ်သံဝဲဒၣ်ဒီးပယီၤသုးမီၤစိရိၤအကျိဖးဒိၣ်ဒီး(၂၂)ဂၤန့ၣ်ဘၣ်သံဝဲခီဖျိကဘီယူၤအဂ့ၢ်န့ၣ် ခ့ၣ်အဲၣ်ယူၣ်-ဘျံးဒဝဲၢ်ကီၢ်ရ့ၣ်ပၥ်ဖျါဝဲဒၣ်အသိး ကမျၢၢ်ဘၣ်ဒိဒီးကျိဖးဒိၣ်(၅)ဂၤဒီး ကဘီယူၤ(၁၈)ဂၤအဂ့ၢ် ခ့ၣ်အဲၣ်ယူၣ်-ဘျံးဒဝဲၢ်ကီၢ်ရ့ၣ်ပၥ်ဖျါဝဲဒၣ်စ့ၢ်ကီၢ်ကီးန့ၣ်လီၤ.
ဒ်န့ၣ်အသိး(၂၀၂၅)နံၣ်(၈)လါအတီၢ်ပူၤ ပယီၤသုးကဘီယူၤအတၢ်လီၤဘၣ်ယိၣ်ဒီးအတၢ်ထီၣ်ဒုးအဃိ ဘျံးဒဝဲၢ်ကီၢ်ရ့ၣ် လၢၢ်မုၢ်လါ,လၢၢ်ဒိၣ်စိ,ကစၢၢ်ဒိၣ်,တနီသရံၣ်,လၢၢ်ကဆီကီၢ်ဆၣ် ကီၢ်ဆၣ်(၅)ဘ့ၣ်ဒီးထံမိၢ်ပှၢ်ဟီၣ်ကဝီၤလီၤဆီ(၁)ဘ့ၣ်အပူၤ သဝီ(၂၂၃)ဖျၢၣ်,ဟံၣ်ခိၣ်(၂၇၀၆၄)ဒူၣ်,ပှၤကညီနီၣ်ဂံၢ်(၁၃၆၂၃၀)ဘၣ်ဃ့ၢ်အိၣ်ကဒုဝဲဒၣ်အဂ့ၢ် ဘျံးဒဝဲၢ်ကီၢ်ရ့ၣ်စံးဝဲဒၣ်န့ၣ်လီၤ.
ခီဖျိတၢ်ဒုးတၢ်ယၤဒိးပယီၤသုးကဘီယူၤတၢ်မၤပျံၤမၤဖုးအဃိဘျံးဒဝဲၢ်ကီၢ်ရ့ၣ်ပူၤ ကမျၢၢ်တကလီၢ်ဘျဲၣ်ဘၣ်ဃ့ၢ်အိၣ်ကမှံတုၤအခဲအံၤဒီး ကမျၢၢ်သ့ၣ်တဖၣ်အံၤလိၣ်ဘၣ်ဝဲဒၣ်တၢ်အီၣ်တၢ်အီ, ကသံၣ်ကသီဘၣ်ဆၣ် တၢ်ဆီၣ်ထွဲမၤစၢၤ တုၤလီၤစှၤဝဲဒၣ်အဂ့ၢ် ဘျံးဒဝဲၢ်ကီၢ်ရ့ၣ်စံးဝဲဒၣ်စ့ၢ်ကီးန့ၣ်လီၤ.
တကီၢ်ခါခဲအံၤ ပယီၤသုးကီၣ်ကးအတၢ်ဟူးတၢ်ဂဲၤန့ၣ် ခ့ၣ်အဲၣ်ယူၣ်-ဘျံးဒဝဲၢ်ကီၢ်ရ့ၣ် အနဲၣ်ရွဲၣ် ပဒိၣ်စီၤအဲၣ်နၤ စံးဝဲဒၣ်ဒ်အံၤန့ၣ်လီၤ.
အဝဲစံးဝဲလၢ“ပယီၤသုးတၢ်ဟူးတၢ်ဂဲၤန့ၣ် လၢမိၢ်တီၣ်တပၤန့ၣ်မၤဝဲတၢ်ထီၣ်ဒုးစးထီၣ်လၢ(၂၀၂၄)လါဒံၣ်စဲဘၢၣ်တုၤအခဲအံၤလီၤ.မ့မ့ၢ်ဝ့ၢ်တၢ်အဲၣ်ဆူဒဝဲၢ်တကပၤန့ၣ်မၤဝဲတၢ်ထီၣ်ဒုးဒီးဖဲ(၂၀၂၅)နံၣ်အတီၢ်ပူၤအံၤဆီတလဲဝဲတၢ်ထီၣ်ဒုးအက့ၢ်အဂီၤချုး(၃)ဘျီဒီးတၢ်တဘျီအံၤန့ၣ်လီၤ.တဘျီအံၤန့ၣ်မၤအါထီၣ်ဝဲအပှၤနီၣ်ဂံၢ်န့ၣ်လီၤ.မ့မ့ၢ်လၢပလီၣ်ဟီၣ်ကဝီၤ လီၤဆီဒၣ်တၢ် တၢ်လီၢ်လၢဝ့ၢ်ကပိၤကပၤ ပပှၤမၤန့ၢ်သ့ၣ်တဖၣ်န့ၣ် အဝဲသ့ၣ်ဟူးဂဲၤဟဲထီၣ်ဝဲထီဘိလၢကမၤန့ၢ်က့ၤဝဲအဂီၢ်န့ၣ်လီၤ.လၢသယဲၢ်ခၠီတကပၤစ့ၢ်ကီးဟဲထီၣ်တုၤဖဲဒူသဝီဒီးဟးဒွဲၣ်အူဟံၣ်ဃီအိၣ်န့ၣ်လီၤ.လၢနၣ်အ့ၣ်တီၣ်တပၤန့ၣ်ဟဲမၤပှဲၤထီၣ်ဂံၢ်ဘါအိၣ်,ဘၣ်ဆၣ်တၢ်ပၢၢ်သုးပၥ်ဖှိၣ်ခိးခးလၢကျဲဒီးက့ၤဂုၤကဒါက့ၤအခံဒ်န့ၣ်အိၣ်န့ၣ်လီၤ.ဒီးမလွဲတီၣ် ဆူ ဒဝဲၢ် ဒီးဆူ ရ့ၣ် တဆီန့ၣ်ခီဖျိတၢ်ပၢၢ်ဆၢသုးပၥ်ဖှိၣ်နုၤလီၤဟံးန့ၢ်တၢ်လီၢ်အဃိအဝဲသ့ၣ်ဟဲထီၣ်ဒီးတၢ်ဘၣ်သဂၢၢ်ခးလိၥ်သးအိၣ်ဝဲထီဘိန့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါ ၂၀၂၅နံၣ်...