လါစဲးပထ့ဘၢၣ် ၁၂ သီ, ၂၀၂၅ နံၣ်, ခ့ၣ်အဲးစံၣ်
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ မၠၣ်ဝတံၣ်ဝ့ၢ် လၢအရ့ဒိၣ်ဝဲလၢသုးမီၤစိရိၤအဂီၢ်အံၤတၢ်ထီၣ်ဖျိန့ၢ်ဝဲဝံၤ ဘူးဒးကညီသုးမုၢ်ဒိၣ် (DKBA)သုးခိၣ်ဘိၤဘံၣ်ကရူၢ် လၢအပၣ်ဃုၥ်လၢကျဲပူၤတၢ်ဒုးတၢ်ယၤပူၤအံၤတဖၣ် ခဲအံၤက့ၤသုးဘူးထီၣ်အသးလၢ (သုးက့ ၅) ဒီး(သုးက့ ၁)ဟီၣ်ကဝီၤအဆၢတကပၤအဂ့ၢ်န့ၣ် ဂံၢ်ခီၣ်ထံးပှၤဟ့ၣ်တၢ်ကစီၣ်ဖိဒီးလီၢ်ကဝီၤပှၤဘၣ်မူဘၣ်ဒါတဖၣ်စံးဝဲန့ၣ်လီၤ.
တချုးပယီၤသုးဟဲထီၣ်ဒိၣ်စိက့ၤဝဲကီးတရံး-မၠၣ်ဝတံၣ်အ့ရှါကျဲလၢဟီၣ်ကဝီၤ(KNLA)သုးပၥ်ဖှိၣ်ဒိၣ်စိထီၣ်န့ၢ်ဝဲအံၤဒံးဘၣ်အခါန့ၣ် စးထီၣ်လၢကြုၢ်တု-ကီးတရံး ဒုးယၤတၢ်ဟူး တၢ်ဂဲၤဒီတကတီၢ်အပူၤန့ၣ် (DKBA)ကရူၢ်လၢအဘၣ်တၢ်တီခိၣ်ရိၣ်မဲအီၤလၢ သုးခိၣ်ဘိၤဘံၣ်အံၤ ဆီၣ်ထွဲမၤစၢၤဒုးစၢၤသကိးဝဲပယီၤသုးလၢလၢပှဲၤပှဲၤန့ၣ်လီၤ.
ဘၣ်ဆၣ်တကီၢ်ခါခဲအံၤလၢ(သုးက့ ၅) ကမၤမိၢ်တကပၤန့ၣ် ပယီၤသုးမၤအါထီၣ်အသုးဂံၢ်ဘါအသိး (DKBA)သုးခိၣ်ဘိၤဘံၣ်အပှၤ ကအိၣ်လၢ(၁၅၀)ဃၣ်ဃၣ်အံၤစ့ၢ်ကီး လဲၤသုးဘူးထီၣ်သးလၢ (သုးက့၅)ဒီးသုးက့(၁)အဆၢ ဖၣ်အၣ်ကီၢ်ဆၣ် မဲၥ်ကၠံၢ်ထၣ်သဝီ တကပၤဘၣ်ဟဲအိၣ်ထီၣ်ဝဲဒ်အံၤအဂ့ၢ်န့ၣ် သုးက့ပှၤဘၣ်မူဘၣ်ဒါစံးဝဲန့ၣ်လီၤ.
ဘၣ်ဃးဘူးဒးကညီသုးမုၢ်ဒိၣ်(DKBA)ကရူၢ်လဲၤသုးဘူးထီၣ်အသးလၢ(သုးက့ ၅)တကပၤ အတၢ်ပညိၣ်အခိၣ်သ့ၣ်ကမ့ၢ်မနုၤလဲၣ် န့ၣ် သုးက့ ၅ ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် ပဲၥ်ထံနီၤဖးစံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ.
“ပဆိမိၣ်န့ၣ်ဘၣ်သ့ၣ်သ့ၣ်အထီၣ်လၢမၠၣ်ဝဝံၣ်တကပၤန့ၢ်ဝံၤန့ၣ် ပယီၤသုးဟဲမၤအါထီၣ်အသုးဂံၢ်ဘါလၢကမၤမိၢ်မ့ၢ်ဂ့ၤ, ဘိၤဘံၣ်တကပၤ ဟဲသုးဘူးထီၣ်သးလၢ(သုးက့ ၅)ဒီး(သုးက့ ၁)အဆၢဖဲန့ၣ်အဖီခိၣ်န့ၣ် ဘၣ်သ့ၣ်သ့ၣ်မူခိၣ်စူၤမ့လီၤစှၤန့ၣ် မ့ၢ်အကဟူးဂဲၤထီၣ်ဧါဒုတဲလီၤတံၢ်တဘၣ်ဘၣ်.နါက့အတၢ်ပညိၣ်ဒုယဆိမိၣ်ကအိၣ်လီၤ.ဆိမိၣ်ဃုၥ်ဝဲလၢကဟဲဟံန့ၢ်တၢ်ဘံၣ်တၢ်ဘၢလၢသုးမီၤစိရိၤကမၤတၢ်ဃုထၢအဂီၢ်သ့စ့ၢ်,မ့ဝံၤအဝဲသ့ၣ်ကမၤအါထီၣ်သုးဂံၢ်ဘါလၢကတၢၢ်တံၥ်ဝံၤကသုးထီၣ်သးဆူဖၣ်ပူၣ်တကပၤဧါဒုတဲလီၤတံၢ်တဘၣ်ဒံးဘၣ်.”အဂ့ၢ်န့ၣ် စံးဝဲန့ၣ်လီၤ.
တကးဒံးဘၣ်တကီၢ်ခါခဲအံၤလၢသုးခိးကီၢ်ဆၢ(BGF) ၁၀၁၄ သုးရ့ၣ်အသုးကလၢၤအပူၤန့ၣ်စ့ၢ်ကီး ပယီၤသုးမၤအါထီၣ်အသုးဂံၢ်ဘါ အိၣ်ဝဲဖဲန့ၣ်ဘၣ်ဆၣ်အနီၣ်ဂံၢ်နီၣ်ဒွးန့ၣ်တၢ်မၤလီၤတံၢ်ဝဲတန့ၢ်ဒံးဘၣ်အဂ့ၢ်န့ၣ် သုးက့(၅)ပှၤကတိၤ တၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးအါထီၣ်ဝဲန့ၣ်လီၤ.
“သုးခိးကီၢ်ဆၢ(BGF) ၁၀၁၃ န့ၣ်အိၣ်ဘူးကးတံၢ်ဒီးပယီၤသုးန့ၣ်အိၣ်စှၤတစဲး.ဘၣ်ဆၣ်မ့မ့ၢ်လၢ(၁၀၁၄)သုးရ့ၣ်အံၤခီန့ၣ် စဲဘူးလိၥ် သးဒီး ပယီၤသုးအါမီၤနီၤ.ခဲအံၤမ့ဘၣ်တဲန့ၣ်ပယီၤသုးလဲၤအိၣ်လၢအသုးကလၢၤပူၤလီၤ.နါက့ကညီဖိကဒဲကဒဲန့ၣ် ပတအဲၣ် လိၥ်မၤလိၥ်သးဘၣ်ဘၣ်ဆၣ်ပမ့ဘၣ်တဲခီဖျိပတၢ်ဘံဘူစၢၤသၢအဖီခိၣ်ဒုယဆိမိၣ်ပှၤကဘၣ်ဟးဆှဲးအီၤန့ၣ်မ့ၢ်တၢ်ကီတၢ်ခဲ တခါမီၤ နီၤ ” အဂ့ၢ်န့ၣ် စံးဝဲန့ၣ်လီၤ.
လၢန့ၣ်အမဲၥ်ညါ(DKBA)သုးနီၣ်ဂံၢ်လၢအအိၣ်ဖဲမဲၥ်ကၠံၣ်ထၣ်သဝီပူၤအံၤတဖၣ်အကျါပၣ်ဃုၥ်ဝဲပယီၤသုးအိၣ်ဝဲအသိး လၢအတၢ် လဲၤဟူးဂဲၤဖဲ(သုးက့)ခံဘ့ၣ်အဆၢအံၤ ပှၤတနီၤပဲၥ်ထံနီၤဖးဝဲလၢအဝဲသ့ၣ်အံၤဘၣ်သ့ၣ်သ့ၣ် ကလဲၤထီၣ်ဟူးဂဲၤလၢ(သုးက့ ၅) ဟီၣ်ကဝီၤ တကပၤသ့ဝဲဒီးဘၣ်ဆၣ် ဘၣ်ဃးတၢ်ဂ့ၢ်အံၤပခ့ၣ်အဲးစံၣ်-ကညီတၢ်ကစီၣ် ပၥ်ဂၢၢ်ပၥ်ကျၢၤဝဲတန့ၢ်ဒံးဘၣ်န့ၣ်လီၤ.
(DKBA)ကရူၢ်လၢအပၥ်ဖှိၣ်မၤသကိးတၢ်ဒီးသုးမီၤစိရိၤအံၤ အသုးထံးတၢ်လီၢ်အံၤအိၣ်ဆီလီၤအသးလၢ(သုးက့ ၁)ဖၣ်အၣ်ကီၢ်ဆၣ် မဲၢ်ကရီကရူၢ် ဃိၣ်ဖိသီခါဖၠၣ် တၢ်လူၢ်ခိၣ်န့ၣ် ဒီး တၢ်တယးကွၢ်ဝဲလၢအသုးဂံၢ်ဘါကအိၣ်ဒၣ်ထဲလၢအကယၤခိၣ်ဃၢၤလီၤအဂ့ၢ်န့ၣ် လီၢ်ကဝီၤခ့ၣ်အၣ်ယူၣ်ပှၤဘၣ်မူဘၣ်ဒါစံး ဝဲန့ၣ်လီၤ.
