ခ့ၣ်အဲးစံၣ် – KIC News

လါယူၤလံ ၁၁ သီ, ၂၀၂၅ နံၣ်, ခ့ၣ်အဲးစံၣ် ကီၢ်ပယီၤပူၤလၢကီၢ်ခီ,ကီၢ်စဲၣ်ဟီၣ်က၀ီၤတၢ်လီၢ်(၁၂)တီၤအပူၤ ခီဖျိလၢသုးကီၣ်ကးအကျိဖးဒိၣ်အံၤအဃိ လါယူၤတလါအတီၢ်ပူၤ ကမျၢၢ်သံ၀ဲ (၃၈၆)ဂၤဒီး ကၠိ,တၢ်ဘူၣ်တၢ်ဘါတၢ်သူၣ်ထီၣ်ဟးဂီၤ၀ဲခဲလၢၥ်(၃၃)ဖျၢၣ်အဂ့ၢ်န့ၣ် (NUG)ပှၤဂ့ၢ်၀ီခွဲးယၥ်ဘၣ်ထွဲ ကိတိၥ် ၀ဲၤကျိၤ(Ministry of Human Rights) ထုးထီၣ်ပၥ်ဖါ၀ဲဖဲလါယူၤလံ ၉ သီအနံၤန့ၣ်လီၤ. စးထီၣ်ဖဲလါယူၤ ၁ သီတုၤ ၃၀ သီလၢတလါအတီၢ်ပူၤ ရၢၣ်ခၢၣ်,အ့ၣ်ယၣ်၀တံၣ်,ယိၤဒိၣ်,တနီသရံၣ်ကီၢ်ခီ, ကညီကီၢ်စဲၣ်, ခၠီ,ကခၠ့ၣ်,စကဲကီၢ်ခီ,မါတလ့,ကရ့ၣ်နံၣ်ကီၢ်စဲၣ်ဒီး ပကိကီၢ်ခီဒိၣ်ဟီၣ်က၀ီၤတဖၣ်အပူၤ ခီဖျိလၢကျိဖးဒိၣ်အံၤအဃိ ကမျၢၢ်သံ (၉၀)ဂၤ, ဘၣ်ဒိ(၂၉၆)ဂၤအဂ့ၢ်န့ၣ် လံၥ်တၢ်ပၥ်ဖျါအပူၤ ပၥ်ဖျါ၀ဲန့ၣ်လီၤ. လီၢ်က၀ီၤကမျၢၢ်လၢအသံ(၉၀)အကျါ (၁၈)နံၣ်ဆူဖီခိၣ်န့ၣ်(၃၆)ဂၤ, ဖိၣ်သၣ်(၁၈)နံၣ်ဆူဖီလၥ်(၇)ဂၤဘၣ်ဆၣ် ပှၤလၢအဂၤ (၃၆)ဂၤအံၤန့ၣ်တၢ်ပဲၥ်ဖးနီၤဖး၀ဲတဘၣ်ဘၣ်အသိး...

လါယူၤလံ ၁၁ သီ, ၂၀၂၅ နံၣ်, ခ့ၣ်အဲးစံၣ် ကညီဖိသၣ်တဃံးဒီပုၢ်၀ဲၢ်မုၣ်(၂)ဂၤလၢအိၣ်ဖျဲၣ်လီၤအသးနါပှၢ်စဲဘူးလိၥ်သး ဖဲတလၢၤကီၢ်စဲၣ် ဘံလ့ကီၢ်ဆၣ်ကမျၢၢ်တၢ်ဆါ ဟံၣ် အံၤ ကီၢ်စဲၣ်ပဒိၣ်လဲၤဟ့ၣ်လီၤဆီၣ်ထွဲမၤစၢၤ၀ဲစ့ပယီၤအကလီၢ်(၁၀၀)ကၠး အဂ့ၢ်န့ၣ် ကီၢ်ဆၣ်ဆူၣ်ချ့တၢ်ဆါဟံၣ် ထုးထီၣ် ပၥ်ဖျါ၀ဲ လၢအ(facebook)ပူၤဖဲတနံၤအံၤန့ၣ်လီၤ. ပဲၢ်တ၀ဲၢ်သ၀ီဖိ နီၢ်ခၠီဂ့ၤ လၢအိၣ်ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်အပူၤအံၤ ဖဲအပူၤကွံၥ်လါယူၤလံ ၉ သီ ၀ၤဆိၤလါပှဲၤ မုၢ်နၤခီ ၉း၄၅ မံးနံးအဆၢကတီၢ်န့ၣ် ဘံလ့တၢ်ဆါဟံၣ် ဒီကထၢၣ်မၠိမ့ဒီးကသံၣ်သရၣ် တဖၣ်ဖွဲးဒုးအိၣ်ဖျဲၣ်ထီၣ် အဖိတဃံး(၂)ဂၤအံၤ လဲၤသးဘျ့ဘျ့ဆှီဆှီအဂ့ၢ်န့ၣ် သ့ၣ်ညါဘၣ်န့ၣ်လီၤ. ကီၢ်ပယီၤအပူၤ ဖိသၣ်ဒီပုၢ်၀ဲၢ်တဃံးခံဂၤအိၣ်၀ဲအါမးဘၣ်ဆၣ် မ့မ့ၢ်ဖိသၣ်တဃံးလၢအသးနါပှၢ်စဲးဘူးလိၥ်သး(၂)ဂၤ ဒ်အံၤ...

လါယူၤလံ ၁၁သီ, ၂၀၂၅နံၣ်, ခ့ၣ်အဲးစံၣ်, တၢ်ကမၤစှၤလီၤတၢ်ကသုၣ်ကသံးတၢ်ဆီတလဲလၢကီၢ်သူလ့ၤတၢ်ပၢဟီၣ်ကဝီၤအပူၤအဂီၢ်,အနံၣ်(၁၀)အတီၢ်ပူၤခ့ၣ်အဲၣ်ယူၣ်တီခိၣ်ရိၢ်မဲတိၤလီၤဝဲလၢ,ကသူၣ်ဝဲသ့ၣ်ထူၣ်ဝၣ်ဘိအ့ကၢၣ်(၅၀၀၀၀၀)ယဲၢ်ကလီၢ်ဃၣ်ဃၣ်အဂ့ၢ်,ဘိးဘၣ်ရၤတ့ၢ်ဝဲဖဲတလါအံၤလါယူၤလံ(၁)သီအနံၤန့ၣ်လီၤ. ကသူၣ်လီၤဝဲသ့ၣ်ထူၣ်ဝၣ်ဘိအတၢ်တိၤကျဲၤအံၤစးထီၣ်ပၥ်ပနီၣ်ဝဲဖဲ(၂၀၂၅)နံၣ်တုၤလၢ(၂၀၃၅)နံၣ်လၢၥ်လၢအနံၣ်(၁၀)အတီၢ်ပူၤဒီးသ့ၣ်ထူၣ်ဝၣ်ဘိလၢကသူၣ်လီၤဝဲသ့ၣ်တဖၣ်အံၤကသူၣ်ဝဲတၢ်လီၢ်(၂၀၀,၀၀၀)ဟဲးထၢၣ်(၄၉၄,၂၁၀)အ့ကၢၣ်လၢကီၢ်သူလ့ၤတၢ်ပၢဟီၣ်ကဝီၤ,သ့ၣ်တမဲထီၣ်အလီၢ်ဒီးတၢ်လီၢ်လၢသ့ၣ်ပှၢ်လီၤဟိလီၤပျီတဖၣ်အတၢ်လီၢ်အပူၤအဂ့ၢ်,လံၥ်ဘိးဘၣ်ရၤလီၤအပူၤ,ပၥ်ဖျါတ့ၢ်ဝဲဒၣ်န့ၣ်လီၤ. အနံၣ်(၁၀)အတီၢ်ပူၤပၥ်လီၤဝဲတၢ်တိၤကျဲၤအံၤအဖီခိၣ်,ကီၢ်သူလ့ၤတၢ်ရဲၣ်သဲကတီၤန့ဆၢၣ်ခိၣ်ဃၢၤ,န့ဆၢၣ်တၢ်အိၣ်ယၢၤကမံးတံၥ်(KNRECC)ပှၤကတိၤတၢ်ပၢစီၤပီလ်စ့ၤထွါစံးဝဲဒ်အံၤန့ၣ်လီၤ. “ပပၥ်လီၤတၢ်ဆၢကတီၢ်အနံၣ်(၁၀)န့ၣ်,မ့ၢ်ဒၣ်ခီဖျိပခ့ၣ်အဲၣ်ယူၣ်အိၣ်ဝဲဒီးတၢ်ပညိၣ်လၢကမၤစှၤလီၤဝဲခိၣ်ဃၢၤန့ဆၢၣ်တၢ်ဘၣ်ဒိဘၣ်ထံးလၢပပှၤတဝၢအဖီခိၣ်,လၢအဟဲခီဖျိသးလၢတၢ်ကသုၣ်ကသံၣ်တၢ်ဆီတလဲတဖၣ်န့ၣ်အဃိန့ၣ်လီၤ.တၢ်မၤဟးဂီၤသ့ၣ်ပှၢ်လ့ၤမုၢ်လ့ၤဘိသ့ၣ်တဖၣ်အဃိ,တၢ်စူၤတဘၣ်တၢ်ယီၤတသ့သ့ၣ်တဖၣ်ဟဲကဲထီၣ်သး,ပလိၣ်ဘၣ်သူသ့ၣ်,ပကူၥ်သ့ၣ်သနၥ်က့,ပမ့က့ၤသူၣ်လီၤက့ၤအီၤန့ၣ်,တၢ်ထုးကွံၥ်ဒီးတၢ်ပၥ်ဖှိၣ်ကဖိးမံလိၥ်သးဝဲအသးလီၤအဃိ,ဆူမဲၥ်ညါအနံၣ်တဆံအတီၢ်ပူၤ,တၢ်မၤဟးဂီၤသ့ၣ်ကလီၤစှၤကွံၥ်ဝဲ(၅၀)မျးကယၤအဂီၢ်မ့ၢ်ပတၢ်တိၥ်ပၥ်လၢပကမၤကဲထီၣ်အီၤလီၤ”အဂ့ၢ်စံးဝဲဒၣ်န့ၣ်လီၤ. သ့ၣ်ထူၣ်ဝၣ်ဘိကအါထီၣ်အဂီၢ်ကီၢ်သူလ့ၤတၢ်ပၢဟီၣ်ကဝီၤအပူၤတၢ်မၤဝဲတၢ်သူၣ်သ့ၣ်အတၢ်ရဲၣ်တၢ်ကျဲၤအံၤတနံၣ်အံၤ(၂၀၂၅)နံၣ်အပူၤပှဲၤထီၣ်ဝဲ(၈)ဝီတဝီလံဒီးတၢ်သူၣ်သ့ၣ်မုၢ်နံၤတဖၣ်အပူၤသ့ၣ်ထူၣ်ဝၣ်ဘိသ့ၣ်တဖၣ်အံၤတၢ်သူၣ်လီၤတ့ၢ်ဝဲလၢ,ကၠိကရၢၢ်,သီခါဖၠၣ်ကရၢၢ်,တၢ်သွၣ်ခိၣ်,ဒူသဝီတဖျၢၣ်ဒီးတဖျၢၣ်အဘၢၣ်စၢၤကျဲတဖၣ်အပူၤဒီးသ့ၣ်ပှၢ်ပူၤတၢ်လီၢ်လီၤဟိလီၤဖျဲၣ်တဖၣ်အပူၤအဂ့ၢ်,သ့ၣ်ပှၢ်ဝဲၤကျိၤပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ. ဘၣ်ဃးဒီးသ့ၣ်ပှၢ်အံၤတၢ်ကဲဘျူးအိၣ်ဝဲလၢပှၤကညီအဖီခိၣ်ဒ်လဲၣ်အဂ့ၢ်န့ၣ်,ခ့ၣ်အဲၣ်ယူၣ်လီၢ်ခၢၣ်သးသ့ၣ်ပှၢ်ဝဲၤကျိၤခိၣ်(ပဒိၣ်မါဘၣ်ထိ)စံးဝဲဒ်အံၤန့ၣ်လီၤ. “တၢ်လၢသ့ၣ်န့ၣ်,ဒီသဒၢဝဲထံကျိထံကွၥ်တၢ်ဟးဂုၤဟးဂီၤဒီးမၤဂ့ၤထီၣ်ဝဲမူခိၣ်ကလံၤသီၣ်ဂီၤတကးဘၣ်ဟ့ၣ်ပှၤတၢ်ကဒုအမဲၥ်ညါ,မၤဂ့ၤထီၣ်ဝဲပတၢ်သူၣ်အီၣ်ဖျးအီၣ်သ့ၣ်တဖၣ်န့ၣ်လီၤ.သ့ၣ်ပှၢ်မ့လီၤဟိလီၤပျီန့ၣ်,ပတၢ်သူၣ်အီၣ်ဖျးအီၣ်တဖၣ်ကဟးဂုၤဟးဂီၤဝဲပဘုပဟုပတၢ်သူတၢ်သၣ်တဖၣ်တဂ့ၤဝဲဘၣ်.သ့ၣ်ပှၢ်မ့ဂ့ၤန့ၣ်ကဲဘျူးဝဲလၢပှၤကညီအတၢ်အိၣ်ဆိးဖံးအီၣ်မၤအီၣ်မၤအီသ့ၣ်တဖၣ်ကအိၣ်ဝဲအကလုၥ်ကလုၥ်အမၠိမၠိတုၤဒၣ်ပတဲက့ၤမးတလၢၥ်လၢၤဘၣ်”အဂ့ၢ်စံးဝဲဒၣ်န့ၣ်လီၤ. တကီၢ်ခါခဲအံၤခီဖျိမူခိၣ်ကလံၤသီၣ်ဂီၤတၢ်ကသုၣ်ကသံးတၢ်ဆီတလဲဒိၣ်ဒိၣ်မုၢ်မုၢ်ဒီးထံလီၢ်ကီၢ်ပူၤတၢ်ဒုးတၢ်ယၤဆူၣ်ဆူၣ်ကိၤကိၤအဃိ,မၤဘၣ်ဒိဝဲသ့ၣ်ပှၢ်,ထံကျိထံကွၥ်,ဟီၣ်ခိၣ်ကပံၥ်ဒီးကမျၢၢ်တၢ်အိၣ်ဆိးလီၢ်ကျဲတဖၣ်အဂ့ၢ်,လံၥ်ထုးထီၣ်ပၥ်ဖျါအပူၤပၥ်ဖျါဝဲဒၣ်န့ၣ်လီၤ. ဒ်န့ၣ်အသိး,မ့ၣ်အူအီၣ်လဲးတၢ်,တၢ်မၤဟးဂီၤသ့ၣ်ပှၢ်,ကဘီယူၤတၢ်ခးလီၤတၢ်ဃုၥ်ဒီးတၢ်တ့ၢ်လီၤမ့ၣ်ပိၢ်တဖၣ်အဃိ,မၤဟးဂီၤဝဲဟီၣ်ခိၣ်ကပံၥ်အမဲၥ်ဖံးခိၣ်န့ဆၢၣ်တၢ်အိၣ်ယၢၤတဖၣ်နးနးကလဲၥ်အဃိ,ဒ်သိးကဘှီဘၣ်မၤပှဲၤထီၣ်က့ၤတၢ်လၢအဟးဂုၤဟးဂီၤဒီးလီၤဟိလီၤပျီကွံၥ်သ့ၣ်တဖၣ်အံၤအဂီၢ်,ကပၣ်ဃုၥ်မၤသကိးတၢ်လၢတၢ်သူၣ်လီၤအါထီၣ်သ့ၣ်တၢ်တိၤကျဲၤပူၤအဂ့ၢ်,ဆီၣ်တခူပၥ်ဖျါဝဲလၢလံၥ်ဘိးဘၣ်ရၤလီၤအပူၤစ့ၢ်ကီးန့ၣ်လီၤ.

လါယူၤလံ ၁၁သီ, ၂၀၂၅နံၣ်, ခ့ၣ်အဲးစံၣ် ခ့ၣ်အဲၣ်ယူၣ်, ဘျံးဒဝဲၢ်ကီၢ်ရ့ၣ်,သုးက့(၄) တနီသရံၣ်ဒီးပလီ ဟီၣ်ကဝီၤပူၤ တကီၢ်ခါခဲအံၤန့ၣ် သုးကီၣ်ကးရၤလီၤကမၣ်တၢ်စီၣ်ဟဲအါထီၣ်ဝဲဒၣ်အသိးအဆၢဟဲဘူးထီၣ်ဝဲဒၣ်အဂ့ၢ် သ့ၣ်ညါဘၣ်ဒ်လီၢ်ကဝီၤပှၤဘၣ်မူဘၣ်ဒါစံးဝဲဒၣ်အသိးန့ၣ်လီၤ. တကီၢ်ခါခဲအံၤန့ၣ် တနီသရံၣ်ဒီးပလီဟီၣ်ကဝီၤပူၤဒ်သိးတၢ်ပၢၢ်ဆၢအသွံၣ်ကလီၤဖးဒီး တၢ်ပၢၢ်ဆၢအသူးသ့ၣ်လၤကပီၤကလီၤအဂီၢ် သုးကီၣ်ကးအပှၤသ့ၣ်တဖၣ် ရၤလီၤကမၣ်ဝဲတၢ်စီၣ်အါထီၣ်အသိးအဆၢဟဲဘူးဒိၣ်ထီၣ်အဂ့ၢ် သုးက့(၄) ကညီဒီကလုၥ်ဂၢၤသးကရၢ KNDO သုးရ့ၣ်(၇),သုးဒ့(၅)အသုးဒ့ခိၣ် သုးခိၣ်စိ ဘးဟူၣ် စံးဘၣ်ဝဲ ခ့ၣ်အဲးစံၣ်ကညီတၢ်ကစီၣ် ဒ်အံၤန့ၣ်လီၤ. အဝဲစံးဝဲလၢ“facebook account သ့ၣ်တဖၣ်န့ၣ်မ့ၢ် Account လၢအယီၤအဘျၣ်ဒီးမ့ၢ်ဝဲ သုးကီၣ်ကးရၤလီၤကမၣ်တၢ်ကစီၣ်(ဝါဒဖြန့်) န့ၣ်လီၤ.ဟီၣ်ခိၣ်မဲၥ်ဖံးခိၣ်တၢ်အိၣ်သးဒီးအဝဲသ့ၣ်တဲဝဲန့ၣ်တဘၣ်ဃးလိၥ်သးဘၣ်.ပှၤသ့ၣ်တဖၣ်န့ၣ် ရၤလီၤကမၣ်ဝဲတၢ်ကစီၣ်ဒ်သိးကမၤလီၤဖးဝဲတၢ်ပၢၢ်ဆၢအသွံၣ်ဒီး မၤဝဲဒ်သိးတၢ်ပၢၢ်ဆၢအသူးအသ့ၣ်လၤကပီၤကလီၤအဂီၢ်န့ၣ်လီၤ.ဒ်ပတၢ်ဃုသ့ၣ်ညါအသိးန့ၣ်ပှၤသ့ၣ်တဖၣ်န့ၣ်မ့ၢ်ဝဲသုးကီၣ်ကးအတၢ်မဲၥ်ချံန့ၣ်လီၤ.အခဲအံၤအဝဲသ့ၣ်တၢ်ဖံးတၢ်မၤဒ်အံၤန့ၣ်အဆၢဘူးထီၣ်ဒီးအါထီၣ်န့ၣ်ပထံၣ်ဘၣ်ဝဲဒၣ်န့ၣ်လီၤ.ဟီၣ်ခိၣ်မဲၥ်ဖံးခိၣ်တၢ်အိၣ်သးန့ၣ်တမ့ၢ်ဒ်သိးအဝဲသ့ၣ်တဲဝဲဘၣ်.”အဂ့ၢ်စံးဝဲဒၣ်န့ၣ်လီၤ. သုးကီၣ်ကးရၤလီၤကမၣ်တၢ်ကစီၣ်(ဝါဒဖြန့်) Facebook account သ့ၣ်တဖၣ်အံၤန့ၣ်အါတက့ၢ်ယုၢ်လီၤအမံၤပၣ်ဃုၥ်ဝဲဒီး“ပလီ”,“တနီသရံၣ်”ဒီးအိၣ်တစှၤန့ၢ်အဖျၢၣ်(၁၀)ဘၣ်ဒီး စးထီၣ်ဖဲလါအ့ဖြ့ၣ်အတီၢ်ပူၤန့ၣ်အဝဲသ့ၣ်တၢ်ဖံးတၢ်မၤဒ်အံၤအဆၢဟဲဘူးဒိၣ်ထီၣ်ဝဲဒၣ်အဂ့ၢ် သုးခိၣ်စိ ဘးဟူၣ်တဲအါထီၣ်ဝဲဒၣ်စ့ၢ်ကီးန့ၣ်လီၤ. သုးကီၣ်ကးအတၢ်ရၤလီၤကမၣ်တၢ်ကစီၣ်သ့ၣ်တဖၣ်အံၤန့ၣ် အါတက့ၢ်စံးဝဲဒၣ်လၢ KNU...

လါယူၤလံ ၁၀ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဘံလ့ကီၢ်ဆၣ် ဃီဖိပျဲၢ်ကရူၢ် ဃီဖိပျဲၢ်သ၀ီအပူၤ ဖဲတနံၤအံၤ လါယူၤလံ ၁၀ သီ ဂီၤခီ ၁၁း၀၀ နၣ်ရံၣ်အဆၢကတီၢ်န့ၣ် သုးမီၤအကဘီယူၤတဘ့ၣ်လဲၤတ့ၢ်လီၤ၀ဲမ့ၣ်ပိၢ်(၂)ဖျၢၣ်လီၤတဲၥ် ပိၢ်ဖးထီၣ်၀ဲလၢကၠိကရၢၢ်ပူၤတဖျၢၣ်ဒီးကၠိကရၢၢ်ဃၢၤတဖျၢၣ် အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲန့ၣ်လီၤ. သုးမီၤစိရိၤ(Jet Fighter)ကဘီယူၤဟဲခးလီၤမ့ၣ်ပိၢ်ဘျီ၀ဲအံၤခီဖျိပှၤဒိးန့ၢ်ဃၥ်တၢ်ကစီၣ်အိၣ်အဃိ သ၀ီဖိစံၣ်ပလဲၥ်ဆိသး ခဲလၢၥ်အဖီခိၣ်တၢ်သံတၢ်ဘၣ်ဒိဘၣ်ထံးတအိၣ်ဘၣ် အဂ့ၢ်န့ၣ် သ၀ီဖိတဂၤ စံး၀ဲဒ်အံၤန့ၣ်လီၤ. “သုးက့ပှၤဘၣ်မူဘၣ်ဒါတဲဃၥ်ပှၤလၢမဟါလံတၢ်အိၣ်သးတဂ့ၤဘၣ်ကဘီယူၤကဟဲခးလီၤတၢ်အဃိပှၤဟးပလဲၥ်သးလၢမဟါန့ၣ်လံ.ကဘီယူၤန့ၣ်ဟဲခးလီၤတၢ်တဘ့ၣ်လီၤ.ခးလီၤ၀ဲတဘျီ၀ံၤဟးတရံးတၢ်၀ံၤဘျီဟဲက့ၤခးလီၤကဒီး၀ဲတဘျီခဲလၢၥ်(၂)ဘျီမီၤ. အခး လီၤတၢ်န့ၣ်ကဘၣ်မ့ၢ်(၅၀၀)ပီၣ်မ့ၣ်ပိၢ်လီၤ.ပကွၢ်စိန့ၣ်အပိၢ်ထီၣ်၀ံၤဘျီအခုၣ်ထီၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ် ကစီၣ် န့ၣ်လီၤ. ကဘီယူၤဟဲခးလီၤတၢ်ဘျီ၀ဲအံၤခီဖျိလီၤတဲၥ်ပိၢ်ဖးထီၣ်၀ဲလၢကၠိကရၢၢ်ပူၤဒီးကၠိကရၢၢ်ချၢအဃိ ကၠိတၢ်သူၣ်ထီၣ် (၂)ဖျၢၣ်လၢတၢ်တ့ ထီၣ်၀ဲသီသီတၢ်တအိၣ်ဘၣ်ဒံးလၢအပူၤဘၣ်အံၤလီၤပှီၢ်ဟးဂီၤ၀ဲဒီး ကၠိမဲၥ်ညါကမျၢၢ်ကျးဆါတၢ်တဖျၢၣ်စ့ၢ်ကီး ဘၣ်ဒိဘၣ်ထံး,တၢ်ဖိတၢ်လံၤလၢအိၣ်ကျးပူၤတဖၣ်ဟးဂီၤ၀ဲခဲလၢၥ်ဃၣ်ဃၣ်အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲန့ၣ်လီၤ. ဃီဖိပျဲၢ်သ၀ီအံၤ...

လါယူၤလံ ၁၀ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-တီအူကီၢ်ရ့ၣ်(သုးက့-၂)ဟီၣ်ကဝီၤအပူၤဖဲအပူၤကွံၥ်လါယူၤလံ(၈)သီအနံၤန့ၣ်ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်ဃု ၥ်ဒီးသုးပၥ်ဖှိၣ်သ့ၣ်တဖၣ်လဲၤခးဝဲပယီၤသုးကလၢၤတဖျၢၣ်လၢအအိၣ်ဖဲတီအူဝ့ၢ်(၄)မံးလၥ်တၢ်လီၢ်ပူၤအဃိပယီၤသုးသံဝဲ(၅)ဂၤဒီးအကျါပၣ်ဃုၥ်သုးခိၣ်(၂)ဂၤအဂ့ၢ်(Brave Warriors For Myanmar)ထုးထီၣ်ပၥ်ဖျါဖဲလါယူၤလံ(၉)သီအနံၤန့ၣ်လီၤ. ပယီၤသုးလၢဘၣ်တၢ်လဲၤခးဝဲဒီးမျိၥ်သၣ်ယူၤအံၤမ့ၢ်ဝဲပယီၤသုးခီၣ်သုးရ့ၣ်(ခလရ-၃၉)လၢမ့ၢ်သုးရ့ၣ်တရ့ၣ်လၢအိၣ်သုးကီၣ်ကးက လံၤထံးကီၢ်ခီသုးဝဲၤလီၢ်ခိၣ်သ့ၣ်အစုတီၤဖီလၥ်ဒီးခီဖျိသုးရ့ၣ်ဝဲအံၤန့ၣ်လၢလီၢ်ကဝီၤတၢ်ပၢၢ်ဆၢသုးဖိကမၤဒုးယၤတၢ်ဟူးဂဲၤအဂီၢ်ကဲထီၣ်ဝဲတၢ်နိးတၢ်ဘျးအဃိဘၣ်တၢ်လဲၤခးဝဲဒၣ်ဒီးမျိၥ်သၣ်ယူၤ(၁၀၇)မမကျိဖးဒိၣ်ချံ(၃)ဖျၢၣ်ဒ်အံၤလီၤအဂ့ၢ်(BWM)လံၥ်တၢ်ပၥ်ဖျါပူၤအသိးစံးဝဲဒၣ်န့ၣ်လီၤ. အဃိလၢတၢ်လဲၤခးဝဲပယီၤသုးခီၣ်သုးရ့ၣ်(ခလရ-၃၉)တဘျီအံၤအပူၤန့ၣ်မ့ၢ်ဝဲ(KNLAသုးက့နီၣ်ဂံၢ်-၂)သုးရ့ၣ်(၅)သ့ၣ်တဖၣ်ဒီးသုးပၥ် ဖှိၣ်ကရူၢ်သ့ၣ်တဖၣ်န့ၣ်လီၤ. ပယီၤသုးတကပၤသံဝဲ(၅)ဂၤအကျါပၣ်ဃုၥ်သုးခိၣ်လီၢ်လၤပတီၢ်အိၣ် (၂)ဂၤ,ဘၣ်ဒိစ့ၢ်ကီးဝဲ(၆)ဂၤဒီးစဲး ဖီကဟၣ်တၢ်ပၥ်ကီၤလီၢ်,တၢ်အီၣ်တၢ်ပၥ်ကီၤလီၢ်တၢ်သူၣ်ထီၣ်တဖၣ်ဟးဂီၤအူအီၣ်ကွံၥ်ဝဲအဂ့ၢ်သ့ၣ်ညါဘၣ်လၢလံၥ်တၢ်ပၥ်ဖျါပူၤန့ၣ်လီၤ. လၢန့ၣ်အမဲၥ်ညါဖဲတနံၤဃီဃီအတီၢ်ပူၤန့ၣ်(KNLAသုးက့-၂)သုးရ့ၣ်(၅)ဃုၥ်ဒီးသုးပၥ်ဖှိၣ်ဒ်အမ့ၢ်(BWM, MKCDF, ACPLF, ကလံၤစိးဒီၣ်ဖးခိၣ်ဟီၣ်ကဝီၤလီၤဆီကရူၢ်သ့ၣ်တဖၣ်အံၤလဲၤခးဝဲဒၣ်တီအူပယီၤသုးကဘီယူၤသန့တၢ်လီၢ်စ့ၢ်ကီးဒီးမျိၥ်သၣ်ယူၤ ကျိဖးဒိၣ်ချံ(၁၀၇)မမခဲလၢၥ်(၁၁)ဖျၢၣ်ဒီးတၢ်သံတၢ်ဘၣ်ဒိတခီတၢ်မၤလီၤတံၢ်အီၤတန့ၢ်ဒံးဘၣ်အဂ့ၢ်ပၥ်ဖျါဝဲစ့ၢ်ကီးန့ၣ်လီၤ. ဒ်န့ၣ်သိးတီအူကီၢ်ရ့ၣ်(သုးက့-၂)ဟီၣ်ကဝီၤအပူၤအံၤဘၣ်ထွဲဒီးတၢ်လဲၤခးဝဲပယီၤသုးကီၣ်ကးသုးတၢ်လီၢ်, ကဘီယူၤသန့တၢ်လီၢ် သ့ၣ်တဖၣ်လၢမျိၥ်သၣ်ယူၤကျိဖးဒိၣ်ချံအံၤအိၣ်ဝဲခဲအံၤခဲအံၤဒီးဖဲလါမ့ၤ(၁၉)သီအနံၤစ့ၢ်ကီးန့ၣ်လဲၤခးဝဲဒၣ်တီအူပယီၤသုးတၢ်သိၣ်လိကၠိအဃိသံ(၇)ဂၤအကျါပၣ်ဃုၥ်စကီၤပြံ(၂)ဂၤအဂ့ၢ်(BWM)ထုးထီၣ်တ့ၢ်ဃၥ်ဝဲန့ၣ်လီၤ.

လါယူၤလံ ၉ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဘံလ့,ဖၣ်အၣ်ဒီးသထူၣ်ကီၢ်ဆၣ်ဟီၣ်က၀ီၤအပူၤ စှၤသီအတီၢ်ပူၤတၢ်စူၤတပယူၥ်ဃီဒီးဘီနီၤကျိထံဒိၣ်ထီၣ်အဃိ ဒူသ၀ီလၢအိၣ်ထံကျိကၢၢ်နံၤလၢတၢ်လီၢ်လီၤဖုၣ်အံၤတဖၣ် ထံနုၥ်လီၤ၀ဲလၢသ၀ီပူၤအဂ့ၢ်န့ၣ် လီၢ်က၀ီၤကမျၢၢ်တဖၣ်စံး၀ဲန့ၣ်လီၤ. စးထီၣ်ဖဲအပူၤကွံၥ်စှၤသီအခါန့ၣ် ခီဖျိတၢ်စူၤကိးမုၢ်နံၤမုၢ်နၤအဃိဘီနီၤကျိဒိၣ်ထီၣ်၀ဲဒီးဒူသ၀ီလၢအလီၤဖုၣ်လၢအိၣ်ဘူး၀ဲ ထံကျိတဖၣ် လၢအမ့ၢ်ကၠိ၀ဲသ၀ီ,ထံဖးဒိၣ်ထၣ်,ထံဖးဒိၣ်ခံဃုၥ်ဒီးသ၀ီလၢအဂၤတဖၣ်အံၤ ဖဲမဟါမုၢ်နၤခီန့ၣ်ထံနုၥ်လီၤလၢသ၀ီပူၤ ဘၣ်ဟဲကဲထီၣ်၀ဲဒ်အံၤလီၤအဂ့ၢ်န့ၣ် ကမျၢၢ်လၢအိၣ်ဖဲန့ၣ်တဖၣ်စံး၀ဲန့ၣ်လီၤ. ထံဖးဒိၣ်ထၣ်သ၀ီဖိပိၥ်မုၣ်တဂၤ စံး၀ဲလၢ“ထံဒိၣ်ထီၣ်န့ၣ်ဖဲတနံၤအံၤလီၤ.ကဘၣ်ဖဲမနၤ ၃း၀၀ နၣ်ရံၣ်န့ၣ်လီၤ. ဘီနီၤကျိဒိၣ်ထီၣ်ပှဲၤ လီၤလၥ်ဘျီယွၤလီၤ၀ဲလၢသ၀ီပူၤန့ၣ်. ခဲအံၤထံဒိၣ်ဘံလ့ကီၢ်ဆၣ်ဒီတဘ့ၣ်လီၤ. ကၠိနါက့ထံထီၣ်ခဲလၢၥ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်- ကညီတၢ်ကစီၣ်ဖဲတဂီၤအံၤန့ၣ်လီၤ. လၢန့ၣ်အမဲၥ်ညါခီဖျိထံဒိၣ်ထီၣ်အံၤအဃိစံၥ်လၢအိၣ်သ၀ီခိၣ်သဃၢၤတဖၣ်အံၤစ့ၢ်ကီးထံနုၥ်လီၤ၀ဲခဲလၢၥ်ဃၣ်ဃၣ်အဂ့ၢ်န့ၣ် ထံဖးဒိၣ်ထၣ်သ၀ီဖိတဂၤဃီ၀ဲန့ၣ် စံးအါထီၣ်၀ဲန့ၣ်လီၤ. ကိးမုၢ်နံၣ်ဒဲးမ့တုၤဃီၤဖဲတၢ်စူၤအခါအတီၢ်လံန့ၣ် ဒူသ၀ီလၢအိၣ်ဘူးဘီနီၤကျိကၢၢ်နံၤအံၤတဖၣ်အါဒၣ်တက့ၢ်သဂၢၢ်ဘၣ်၀ဲ ထံဒိၣ် ဃိၣ်ယွၤလီၤလၢသ၀ီပူၤဒီးလီၤဆီဒၣ်တၢ်မ့မ့ၢ်လၢကၠိ၀ဲသ၀ီအံၤန့ၣ်နးဒိၣ်တစဲးခီဖျိအိၣ်ဘူး၀ဲထံနံၤထံးတီတီလီၤအဂ့ၢ်န့ၣ် သုးက့ခိၣ် သုးခိၣ်ကျၢၢ်ဖိ စီၤစိမၠ့ၣ်ထွ့ စ့ၢ်ကီး စံး၀ဲဒ်အံၤန့ၣ်လီၤ. “မ့မ့ၢ်ဒူသ၀ီလၢအိၣ်ဘီနီၤကျိထံနံၤတဖၣ်န့ၣ်ထံနုၥ်လီၤလၢသ၀ီပူၤကိးသ၀ီဃၣ်ဃၣ်လီၤ.ဒ်သိး ပယၢ်ရီ,ဃီဖိပျဲၢ်,ထံဆံၣ်ဘီသ၀ီ န့ၣ်...

လါယူၤလံ ၉ သီ, ၂၀၂၅ နံၣ်, ခ့ၣ်အဲးစံၣ် ကညီထံရူၢ်ကီၢ်သဲးပၣ်တံၣ် တၢ်လီၤကရၢကရိရိၣ်ဖှိၣ်အခိၣ်လီၢ်လံၤလၢအိၣ်ကီၢ်ကၠီၣ်တဲၣ်-ကီၢ်ပယီၤကီၢ်ဆၢ မၠၣ်၀တံၣ်တဖၣ်အံၤ ပၣ်တံၣ်ခိၣ်နၢ်လၢအိၣ်ဖၣ်အၣ်တဖၣ်ဟဲဆဲးကျိးအ၀ဲသ့ၣ်လၢကနုၥ်လီၤကဒါလၢပၣ်တံၣ်ပူၤအိၣ်ဘၣ်ဆၣ် သးတအိၣ်လၢ ကနုၥ်လီၤ၀ဲလၢၤဘၣ်အဂ့ၢ်န့ၣ် တၢ်လီၤကရၢကရိရိၣ်ဖှိၣ်အခိၣ်လီၢ်လံၤတဖၣ် စံး၀ဲန့ၣ်လီၤ. တၢ်ဃုထၢလၢသုးကီၣ်ကးကမၤ၀ဲဖဲတနံၣ်အံၤလၢၥ်န့ၣ် ကညီထံရူၢ်ကီၢ်သဲးပၣ်တံၣ်လီၢ်ခၢၣ်သးခိၣ်နၢ်ဒိၣ်ထီလၢအိၣ်ဖၣ်အၣ်၀့ၢ်ပူၤ တဖၣ် ဟဲဆဲးကျိး၀ဲမၠၣ်၀တံၣ် က၀ီၤဒ့,ဒူသ၀ီ,ကီၢ်ဆၣ်,ကီၢ်ရ့ၣ်ပတီၢ် တၢ်ကရၢကရိရိၣ်ဖှိၣ်အခိၣ်လီၢ်လံၤတဖၣ်လၢကနုၥ်လီၤ ကဒါ လၢပၣ်တံၣ်ပူၤအိၣ်ဒီးဘၣ်ဆၣ်တနီၤန့ၣ်သးတအိၣ်နုၤလီၤကဒါ၀ဲလၢၤဘၣ်အဂ့ၢ်န့ၣ် ကညီပၣ်တံၣ်တၢ်ရိၣ်ဖှိၣ်အခိၣ်လီၢ်လံၤ တဂၤ စံး၀ဲဒ်အံၤန့ၣ်လီၤ. “ဖဲမၠၣ်၀တံၣ်အံၤလၢကက့ၤနုၥ်ကဒါဆူကညီပၣ်တံၣ်အဂီၢ်ပၣ်တံၣ်ခိၣ်နၢ်လၢအိၣ်ဖၣ်အၣ်တဖၣ်ဟဲဆဲးကျိးတၢ်အိၣ်မီၤ.ပနၢ်ဟူလၢဖဲအံၤ ပှၤတက့ၤမၤကဒါနီတဂၤဘၣ်.ပှၤလၢအမၤတၢ်လၢကညီလံၥ်လဲၢ်ဒီးတၢ်ဆဲးတၢ်လၤတဖၣ်န့ၣ်ဟးထီၣ်ကွံၥ်ခဲလၢၥ်လီၤ”အဂ့ၢ်န့ၣ် ကညီပၣ်တံၣ်တၢ်ကရၢကရိရိၣ်ဖှိၣ်အခိၣ်လီၢ်လံၤတဂၤ စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. တကီၢ်ခါခဲအံၤမၠၣ်၀တံၣ်၀့ၢ်ပူၤန့ၣ် ကညီထံရူၢ်ကီၢ်သဲးပၣ်တံၣ်တဖၣ် မၤ၀ဲတၢ်ဟးလီၤကရၢကရိရိၣ်ဖှိၣ်တၢ်ဟူးတၢ်ဂဲၤတအိၣ်၀ဲ ဘၣ် ဒီးဘၣ်ဆၣ် တၢ်ဟဲဆဲးကျိးဆိဃၥ်၀ဲပၣ်တံၣ်ဖိလီၢ်လံၤအိၣ်၀ဲန့ၣ်လီၤ. လၢန့ၣ်အမဲၥ်ညါမၠၣ်၀တံၣ်၀့ၢ်အံၤအိၣ်ဆီလီၤသးလၢကီၢ်ဆၢဒီး ခီဖျိ၀့ၢ်အံၤတၢ်ဖံးအီၣ်မၤအီၣ်မုၢ်ကျိၤ၀ဲၤကွၥ်တၢ်ခွဲးတၢ်ယၥ်အိၣ်အဃိ ပှၤအိၣ်လၢပကိကီၢ်ခီဒိၣ်ဃုၥ်ဒီးကီၢ်ပယီၤတၢ်လီၢ်လၢအဂၤတဖၣ်ဟဲဆီလီၤသးအိၣ်ဆိး၀ဲအါမးန့ၣ်လီၤ.ဒ်န့ၣ်အသိးလၢကဟဲတၢ်ဃုထၢအံၤ မၠၣ်၀တံၣ်၀့ၢ်ပူၤ တၢ်ကစီၣ်ဟးထီၣ်ကလုၥ်ဒူၣ်လၢအဂၤတဖၣ်ကနုၥ်လီၤလၢကညီပၣ်တံၣ်ပူၤ၀ံၤကဒိးဃုထၢသးလၢ ဘျီၣ်ဒိၣ်ခၢၣ်စးအိၣ်၀ဲ အဂ့ၢ် ကညီပၣ်တံၣ်ကရၢဖိလီၢ်လံၤတဂၤ...

လါယူၤလံ ၉သီ, ၂၀၂၅နံၣ်, ခ့ၣ်အဲးစံၣ် ဖဲတၢ်ထီၣ်မၤန့ၣ် သူၣ်ခၣ်ပယီၤသုးကလၢၤအခါ ကရူၢ်လၢအပၣ်ဃုၥ်လၢတၢ်ဒုးပူၤတဖၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ,ဘျံးဒဝဲၢ်ကီၢ်ရ့ၣ် ပၥ်ပနီၣ်ဒီးဟ့ၣ်လၤဟ့ၣ်ကပီၤအဝဲသ့ၣ်အဂ့ၢ် ခ့ၣ်အဲၣ်ယူၣ်-ဘျံးဒဝဲၢ်ကီၢ်ရ့ၣ်ထုးထီၣ်ပၥ်ဖျါဝဲဖဲလါယူၤလံ(၈)သီအနံၤန့ၣ်လီၤ. ခ့ၣ်အဲၣ်ယူၣ်,ဘျံးဒဝဲၢ်ကီၢ်ရ့ၣ်, ကီၢ်သူလ့ၤ-ကီၢ်ကၠီၣ်တဲၣ်ကီၢ်ဆၢ, လၢၢ်ဒိၣ်စိကီၢ်ဆၣ် သူၣ်ခၣ်ပယီၤသုးကလၢၤအံၤ မ့ၢ်ဝဲ ခီၣ်သုးရ့ၣ်(ခလရ-၂၈၂)ဒီး ဖဲလါယူၤလံ(၇)သီအနံၤမုၢ်ထူၣ်ထီၣ်အဆၢကတီၢ်န့ၣ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် သုးက့(၆) သုးရ့ၣ်(၂၇), သုးက့(၄) သုးရ့ၣ်(၁၀)(၁၂) တီခိၣ်ရိၣ်မဲဒီးထီၣ်မၤန့ၢ်ကွံၥ်ဝဲဒၣ်အဂ့ၢ် သုးက့(၄)ပၥ်ဖျါဝဲဒၣ်န့ၣ်လီၤ. လၢတၢ်ဒုးဘျီဝဲန့ၣ်အပူၤန့ၣ် KNLAသုးရ့ၣ်တဖၣ်တီခိၣ်ရိၣ်မဲ, ဒဝဲၢ်ကမျၢၢ်တၢ်ထူၣ်ဖျဲးသုးမုၢ်ဒိၣ်-TPLF, ကၠိဖိတၢ်ပၢၢ်ဆၢသုးကရူၢ်,သၤကရၣ်သုးကျိၤ,ဒီးဒြိကရူၢ်, ဘၣ်ထူသုးမုၣ်ဒိၣ်ဒြိကရူၢ်,ဝ့ၤဟ့ၤဒြိကရူၢ် သ့ၣ်တဖၣ်ပၣ်ဃုၥ်ဝဲဒၣ်အဂ့ၢ် ပၥ်ဖျါဝဲလၢဘျံးဒဝဲၢ်ကီၢ်ရ့ၣ်အလံၥ်ဟ့ၣ်လၤကပီၤအပူၤန့ၣ်လီၤ. လၢန့ၣ်အမဲၥ်ညါ ဒ်သိးကန့ၢ်တၢ်မၤနၢၤဒ်အံၤအဂီၢ် ပှၤလၢမၤစၢၤတၢ်လၢ တၢ်သ့တၢ်ဘၣ်မ့ၢ်ဂ့ၤ,ကျိၣ်စ့မ့ၢ်ဂ့ၤ, သိၣ်ဒူလၢတၢ်ဒုးပူၤတဖၣ်ကပူၤဖျဲးဒီးတၢ်ဘၣ်ယိၣ်ဘၣ်ဘှီအဂီၢ်ပှၤလၢဘါထုကဖၣ်တဖၣ်ခဲလၢၥ်စံးဘျုးဘၣ်ဝဲဒၣ်အဂ့ၢ် ခ့ၣ်အဲၣ်ယူၣ်ဘျံးဒဝဲၢ်ကီၢ်ရ့ၣ် စံးဝဲဒၣ်န့ၣ်လီၤ. သူၣ်ခၣ်ပယီၤသုးကလၢၤအပူၤပယီၤသုးကအိၣ်အဂၤ(၃၀)ဃၣ်ဃၣ်ဒီး ခီဖျိထံကီၢ်ခံဘ့ၣ်တၢ်နၢ်ပၢၢ်အဃိ ပယီၤသုးသ့ၣ်တဖၣ်ဃ့ၢ်နုၤဝဲဆူကီၢ်ကၠီၣ်တဲၣ်ပူၤအဂ့ၢ် သုးက့(၄)အသုးက့ခိၣ် သုးခိၣ်ကျၢၢ်ဖိစီၤဖိလ့ စံးဘၣ်တ့ၢ်ဝဲဒၣ်...

လါယူၤလံ ၉ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ,ဘျံးဒဝဲၢ်ကီၢ်ရ့ၣ်(သုးက့-၄)ဟီၣ်ကဝီၤအပူၤဖဲမဟါလါယူၤလံ(၈)သီအနံၤန့ၣ်ပ ယီၤသုးခးလီၤဝဲ(၁၂၀)မမကျိဖးဒိၣ်အဃိဘၣ်သံဝဲကမျၢၢ်ဟံၣ်ဖိဃီဖိတဒူၣ်လၢပၣ်ဃုၥ်ဖိသၣ်သးနံၣ်(၁၁)ဆူၣ်အဖီလၥ်(၃)ဂၤဒီးပှၤသးပှၢ်သးနံၣ်(၅၀)တဂၤပၣ်ဃုၥ်စ့ၢ်ကီးအဂ့ၢ်ခ့ၣ်အဲၣ်ယူၣ်-ဘျံးဒဝဲၢ်ကီၢ်ရ့ၣ်ပၥ်ဖျါဝဲဖဲမဟါအနံၤန့ၣ်လီၤ. ဒ်လံၥ်တၢ်ပၥ်ဖျါပူၤအသိးန့ၣ်ပယီၤသုးကီၣ်ကးလၢခးလီၤဝဲကျိဖးဒိၣ်အံၤမ့ၢ်ဝဲ(ခလရ-၂၈၂)ပယီၤသုးရ့ၣ်လၢအိၣ်ဆီ လီၤအသးဖဲလၢၢ်ဒိၣ်စိကီၢ်ဆၣ်,ဖဲပစီၤလီၤဒီးကီၣ်လဲသဝီအဘၢၣ်စၢၤဖဲနီၢ်ဂံၢ်(၈)ကျဲမုၢ်ကပၤန့ၣ်လီၤ. ပယီၤသုးအံၤန့ၣ်ခးလီၤဝဲကျိဖးဒိၣ်ဖဲ(ကီၣ်လဲသဝီဒီးစဃီၤလိၥ်)သဝီအဘၢၣ်စၢၤဖဲ(၅၅)မံးလၥ်ရီဘၢၣ်ကျီးအပူၤဒီးကျိဖးဒိၣ်အံၤလီၤတဲၥ်ဘၣ်သံဝဲဒၣ်ကမျၢၢ်ဟံၣ်ဖိဃီဖိ(၄)ဂၤတဒူၣ်လၢအမ့ၢ်ပှၤသ့ၣ်တဖၣ်အိၣ်ဟဲန့ၢ်ဝဲလၢထံတစွ့တကပၤအဂ့ၢ်သ့ၣ်ညါဘၣ်န့ၣ်လီၤ. ကမျၢၢ်ဟံၣ်ဖိဃီဖိလၢဘၣ်သံဝဲသ့ၣ်တဖၣ်အံၤမ့ၢ်ဝဲ ကိအ့ခဲၣ်သးနံၣ်(၅၀)နံၣ်, မမၠဲၣ်ဖူခဲၣ်(၁၁)နံၣ်, ဒီးပှၤဖိသၣ်လၢတၢ် တသ့ၣ်ညါအမံၤ(၂)နံၣ်ဘျဲၣ်တဂၤဒီးတနံၣ်တဂၤအသိးတကးဒံးဘၣ်ဘၣ်ဒိစ့ၢ်ကီးဝဲမၣ်ပၣ်ပၣ်ဝ့သးနံၣ်(၃၈)နံၣ်တဂၤအဂ့ၢ်ဒ်လံၥ်တၢ်ပၥ်ဖျါပူၤပၥ်ဖျါဝဲဒၣ်န့ၣ်လီၤ. လၢန့ၣ်အမဲၥ်ညါဘၣ်ထွဲဒီးပယီၤသုးကီၣ်ကးခးလီၤကျိဖးဒိၣ်အံၤကဲထီၣ်အသးအိၣ်ဝဲဒၣ်ခဲအံၤခဲအံၤဒီးဘၣ်သံကမျၢၢ်ပှၤလိၢ်ကဝီၤဖိတကးဒံးဘၣ်ပၣ်ဃုၥ်ဖိဒံဖိသၣ်သ့ၣ်တဖၣ်ဒ်အံၤအဖီခိၣ်တၢ်အံၤမ့ၢ်တၢ်လၢအမၤထီဒါပှၤဟီခိၣ်ဖိခွဲးယၥ်ဒီးဖိသၣ်ခွဲးယၥ်အဃိခ့ၣ်အဲၣ်ယူၣ်တကပၤထီဒါဝဲပယီၤသုးကီၣ်ကးတၢ်မၤအံၤအဂ့ၢ်ပၥ်ဖျါစ့ၢ်ကီးဝဲန့ၣ်လီၤ. ဒ်န့ၣ်အသိးဖဲအပူၤကွံၥ်တလါလါယူၤ(၇)သီအနံၤလၢကစၢၢ်ဒိၣ်ကီၢ်ဆၣ်ဟီၣ်ကဝီၤဖဲကွံလ့သဝီအပူၤန့ၣ်ခီဖျိပယီၤသုးကဘီယူၤဟဲတ့ၢ်လီၤမ့ၣ်ပိၢ်အဃိဘၣ်သံဝဲပှၤသဝီဖိ(၂)ဂၤအကျါပၣ်ဃုၥ်ဖိသၣ်အနံၣ်(၁၀)တဂၤဒီးဘၣ်ဒိစ့ၢ်ကီးဝဲ(၆)ဂၤအဂ့ၢ်ခ့ၣ်အဲၣ်ယူၣ်-ဘျံးဒဝဲၢ်ကီၢ်ရ့ၣ်ပၥ်ဖျါတ့ၢ်ဃၥ်ဝဲန့ၣ်လီၤ.