ခ့ၣ်အဲးစံၣ် – KIC News

လါအီးကထိဘၢၣ် ၇သီ, ၂၀၂၄နံၣ်, ခ့ၣ်အဲးစံၣ် ခ့ၣ်အဲၣ်ယူၣ်,ကညီဒီကလုၥ်စၢဖှိၣ်ကရၢ,သုးက့(၆)ဒူပျၥ်ယၥ်ကီၢ်ရ့ၣ်ရၤမတံအ့ရှၢကျဲမုၢ်ဖးဒိၣ်လၢတၢ်ကးတံၥ်ဃၥ်ဝဲယံၥ်လၢ(၂)နံၣ်ဃၣ်ဃၣ်အံၤတၢ်အိၣ်သးအဖီခိၣ်,တကီၢ်ခါခဲအံၤလ့ၤတက့ၤအိးထီၣ်တသ့ဘၣ်အဂ့ၢ်,(KNU)ပှၤဘၣ်မူဘၣ်ဒါတဖၣ်စံးဝဲန့ၣ်လီၤ. ရၤမတံအ့ရှၢကျဲမုၢ်အံၤအရ့ဒိၣ်ဝဲလၢတၢ်စိၥ်တီဆှၢပနံၣ်ဖီကၤ,ကမျၢၢ်တၢ်ဟးထီၣ်က့ၤလီၤဒီးတၢ်ဖံးအီၣ်မၤအီၣ်အဂီၢ်ဘၣ်ဆၣ်တကီၢ်ခါခဲအံၤထံရုၢ်ကီၢ်သဲးတၢ်အိၣ်သးအဖီခိၣ်,လၢတၢ်ကမၤဟးဂီၤကွံၥ်သုးကီၣ်ကးအဂီၢ်ကျဲအံၤအရ့ဒိၣ်စ့ၢ်ကီးဝဲလၢသုးဂ့ၢ်ဂီတကပၤအဃိလ့ၤတက့ၤအိးထီၣ်တသ့ဒံးဘၣ်အဂ့ၢ်,(KNU)ပှၤကတိၤတၢ်ပၢပဒိၣ်စီၤကျၢၤစ့စံးဝဲဒ်အံၤန့ၣ်လီၤ. အဝဲစံးဝဲလၢ“တကီၢ်ခါခဲအံၤထံကီၢ်ဒီတဘ့ၣ်အပူၤဒုးယၤတၢ်သဘံၣ်သဘုၣ်အရ့ဒိၣ်ဝဲအဆၢကတီၢ်,လၢတၢ်အိၣ်သးအံၤအဖီခိၣ်,ရၤမတံကီးတရံးအ့ရှၢကျဲမုၢ်အံၤအရ့မ့ဒိၣ်လၢတၢ်ကိးကပၤဒဲးအပူၤဘၣ်ဆၣ်,လၢသုးဂ့ၢ်ဝီတကပၤပပၥ်သးပ့ၤနီၣ်ပသးတသ့ဘၣ်န့ၣ်လီၤ.ဒီးကၠီၣ်တဲၣ်ပဒိၣ်တဖၣ်စ့ၢ်ကီးပသ့ၣ်ညါဘၣ်လၢအဝဲသ့ၣ်အဲၣ်ဒိးဝဲလၢတၢ်ကအိးထီၣ်ကျဲအံၤလီၤ.ဘၣ်ဆၣ်မ့မ့ၢ်လၢပဝဲတကပၤတခီပဘၣ်ဆိကမိၣ်က့ၤတၢ်လၢသုးကီၣ်ကးတဖၣ်အတၢ်မူထီၣ်ဂဲၤထီၣ်,မၤနးမၤဖှီၣ်တၢ်အဂီၢ်အဃိန့ၣ်မ့မ့တကီၢ်ခါခဲအံၤကျဲအံၤလ့ၤတက့ၤတဘၣ်လီၢ်ဘၣ်စးလၢတၢ်ကအိးထီၣ်ဝဲဘၣ်”အဂ့ၢ်စံးဝဲဒၣ်န့ၣ်လီၤ. လၢန့ၣ်အမဲၥ်ညါ,ထံရူၢ်ကီၢ်သဲးတၢ်အိၣ်သးအဖီခိၣ်ဘၣ်ဃးဒီးရၤမတံအ့ရှၢကျဲမုၢ်နံၤကအိးထီၣ်အဂီၢ်အံၤလ့ၤတက့ၤမုၢ်လၢ်တသ့ဒံးဝဲဘၣ်အဂ့ၢ်,သုးက့(၆)တၢ်မဲၥ်ညါပှၤဘၣ်မူဘၣ်ဒါတဂၤစံးဝဲဒ်အံၤန့ၣ်လီၤ. အဝဲစံးဝဲလၢ“ကျဲအံၤကအိးထီၣ်က့ၤန့ၣ်တဘၣ်မုၢ်လၢ်တဂ့ၤ,လ့ၤတက့ၤမုၢ်လၢ်တသ့ဘၣ်,တမ့ၢ်ပတဲလၢတစိၤသးတအိးထီၣ်လၢၤဘၣ်တမ့ၢ်ဘၣ်.တၢ်ခဲလၢၥ်န့ၣ်ဒိးသန့ၤထီၣ်အသးလၢထံရူၢ်ကီၢ်သဲးအဖီခိၣ်လီၤ.ခဲအံၤပအိၣ်လၢတၢ်မဲၥ်ညါန့ၣ်,ပပှၤဘၣ်သံဘၣ်ဒိထဲလဲၣ်ပသ့ၣ်ညါလီၤ.တၢ်ဟ့ၣ်ကူၣ်ပှၤလၢပဘၣ်မၤဒံအံၤဒံန့ၣ်သ့ၣ်တဖၣ်န့ၣ်,တၢ်သ့ၣ်တဖၣ်န့ၣ်ကဘၣ်အိၣ်ဒီးတၢ်မၤနီၢ်နီၢ်,တၢ်မၤနီၢ်နီၢ်မ့အိၣ်မးပကတုၤဆူတၢ်မၤနၢၤအဖီတၢၣ်လီၤ.အဃိန့ၣ်ပတဲလၢတၢ်မ့ၢ်တၢ်တီလီၤလ့ၤတက့ၤအိးထီၣ်တန့ၢ်ဘၣ်.”အဂ့ၢ်စံးဝဲဒၣ်န့ၣ်လီၤ. လၢတၢ်ကအိးထီၣ်က့ၤဝဲရၤမတံအ့ရှၢကျဲမုၢ်အံၤအဂီၢ်,အပူၤကွံၥ်လါစဲးပထ့ဘၢၣ်(၂၄)သီအနံၤအပူၤကညီဖီၣ်စုကဝဲၤကရူၢ်ဒ်အမ့ၢ်(ခ့ၣ်အဲၣ်ယူၣ်ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA )သုးက့(၆),သုးက့(၇)ခိၣ်နၢ်,ဒံၣ်မိၣ်ကရ့ၣ်စံၣ်တၢ်ဘၣ်ဘျူးကညီသုးမုၢ်ဒိၣ်(DKBA),သုးခိးကီၢ်ဆၢ(BGF)ဃုၥ်ဒီးကညီတၢ်မုၥ်တၢ်ခုၣ်ကီၣ်ကးကရၢ(PC)သ့ၣ်တဖၣ်မၤတ့ၢ်ဝဲတၢ်ထံၣ်လိၥ်တၢၣ်ပီၣ်တဲသကိးအိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ. တကးဒံးဘၣ်,အပူၤကွံၥ်လါစဲးပထ့ဘၢၣ်(၉)သီအနံၤအပူၤ,ကီၢ်ပယီၤဘၣ်ထွဲကီၢ်ကၠီၣ်တဲၣ်မီၢ်သီ(H.E.Mr.Mongkol Visitstump)ဒီးသုးကီၣ်ကးအစုတီၤဖီလၥ်ကညီကီၢ်စဲၣ်ကိတိၥ်ခိၣ်ကျၢၢ်(အူစီမၠ့ၣ်အူ)မၤဝဲတၢ်ထံၣ်လိၥ်တဲသကိးဘၣ်ဃးထံကီၢ်ခံဘ့ၣ်ကီၢ်ဆၢတၢ်ဝံစိၥ်ခီဆှၢပနံၥ်တၢ်ဖိတၢ်လံၤ,ကျဲတၢ်ဟးထီၣ်က့ၤလီၤအိၣ်ဝဲဒၣ်အဂ့ၢ်,သ့ၣ်ညါဘၣ်န့ၣ်လီၤ. ရၤမတံအ့ရှၢကျဲမုၢ်အံၤအပူၤကွံၥ်(၂၀၁၂)နံၣ်ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,အကရၢခိၣ်လီၢ်လံၤသုးခိၣ်ကျၢၢ်ဒိၣ်စိစီၤမူၤတူၤစ့ဖိဆဲးလီၤဝဲတၢ်ပတုၥ်တၢ်ခး(NCA)အစုမုၢ်ကျၢၢ်အဆၢကတီၢ်လၢတၢ်မုၥ်တၢ်ခုၣ်အတၢ်ပနီၣ်အဂီၢ်,ဒုးအိၣ်ထီၣ်ဝဲအ့ရှၢကျဲမုၢ်ဖးဒိၣ်အံၤအဂ့ၢ်,သ့ၣ်ညါဘၣ်န့ၣ်လီၤ.

လါစဲးပထ့ဘၢၣ် ၄သီ, ၂၀၂၄နံၣ်, ခ့ၣ်အဲးစံၣ်, ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,တၢ်ပၢဟီၣ်ကဝီၤကီၢ်ကၠီၣ်တဲၣ်ကီၢ်ပယီၤကီၢ်ဆၢဃိၣ်သၢဖျၢၣ်ဝ့ၢ်ပူၤ,ပှၤတရူးဖိလၢဟဲဆီလီၤသးနုၥ်လီၤအိၣ်ဆိးဝဲတဖၣ်မၤမုၢ်ကျိၥ်ဝဲၤကွၥ်ဒီးတၢ်တၤကျိၣ်တၤစ့အါထီၣ်ဝဲအဂ့ၢ်,ဝ့ၢ်လီၢ်ကဝီၤဘံၣ်ဘၢပှၤဘၣ်မူဘၣ်ဒါတဖၣ်စံးဝဲန့ၣ်လီၤ. ဃိၣ်သၢဖျၢၣ်ဝ့ၢ်ပူၤပှၤတရူးဖိလၢအနုၥ်လီၤအိၣ်ဆိးဝဲတဖၣ်အံၤ,တနီၤအိၣ်ဝဲလၢဖိးမံသဲးစးဘၣ်ဆၣ်,တနီၤအိၣ်ဆိးဝဲလၢတဖိးမံသဲစးဘၣ်ဒီးအဝဲသ့ၣ်တဖၣ်အံၤတကီၢ်ခါခဲအံၤဆီလီၤဝဲအမုၢ်ကျိၤဝဲၤကွၥ်တၢ်ဖံးတၢ်မၤဒီးတၢ်တၤကျိၣ်တၢ်စ့တၢ်မၤတဖၣ်အါထီၣ်ဝဲဒၣ်ကွ့ၢ်ကွ့ၢ်အဂ့ၢ်,ဝ့ၢ်လီၢ်ကဝီၤဘံၣ်ဘၢပှၤဘၣ်မူဘၣ်ဒါလၢတအဲၣ်ဒိးပၥ်ဖျါအမံၤတဂၤစံးဝဲဒ်အံၤန့ၣ်လီၤ. အဝဲစံးဝဲလၢ“ဃိၣ်သၢဖျၢၣ်ဝ့ၢ်အပူၤပှၤတရူးဖိလၢနုၥ်လီၤအိၣ်ဆိးဝဲတဖၣ်န့ၣ်,အိၣ်ဝဲဒၣ်ခံမံၤန့ၣ်လီၤ.တၢတမံၤန့ၣ်ပှၤလၢအိၣ်ဝဲဖိးမံသဲးစးတဖၣ်ဒီး,မ့မ့ၢ်ခံမံၤတမံၤန့ၣ်မ့ၢ်ပှၤအိၣ်ဝဲခူသူၣ်ခူလံၤလၢတဖိးသဲစးဘၣ်တဖၣ်န့ၣ်လီၤ.ဒီးပှၤလၢအအိၣ်ဖိးမံသဲစးတဖၣ်အံၤအိၣ်ဆိးဝဲလၢပှၤဂၤအကျါသူၣ်ထီၣ်ဝဲအတၢ်လီၢ်တၢ်ကျဲဆီလီၤဝဲအမုၢ်ကျိၤဝဲၤကွၥ်ဒ်အမ့ၢ်တၢ်အီၣ်ကျး,တၢ်ကူတၢ်သိးကျး,ပိၥ်မုၣ်အတၢ်မၤဃံမၤလၤကျးဃုၥ်ဒီးကျးလၢအဂၤသ့ၣ်တဖၣ်အိၣ်ဝဲအမၠိမၠိန့ၣ်လီၤ.မ့မ့ၢ်ပှၤလၢတဖိးမံသဲးစးအိၣ်ခူသူၣ်ခူလံၤတဖၣ်အံၤတခီ,အိၣ်ဝဲလၢအနီၢ်ကစၢ်ကရၢၢ်ပူၤဒီးမ့ၢ်ပှၤလၢအမၤတၢ်တၤကျိၣ်တၤစ့,တၢ်လံၣ်တၢ်လီသ့ၣ်တဖၣ်န့ၣ်လီၤ.ဒီးပှၤလၢအိၣ်အနီၢ်ကစၢ်ကရၢၢ်ပူၤတဖၣ်အံၤဝ့ၢ်ဟီၣ်ကဝီၤပှၤဘၣ်မူဘၣ်ဒါတဖၣ်ကနုၥ်လီၤဝဲအကရၢၢ်ပူၤအဂီၢ်ကီခဲဝဲ”အဂ့ၢ်စံးဘၣ်ခ့ၣ်အဲးစံၣ်ကညီတၢ်ကစီၣ်န့ၣ်လီၤ. လၢန့ၣ်အမဲၥ်ညါ,တရူးထံဖိကီၢ်ဖိလၢအအိၣ်ဆိးဝဲဖဲဃိၣ်သၢဖျၢၣ်ဝ့ၢ်အပူၤလၢအဖိးမံသဲစးတဖၣ်အံၤအိၣ်ဝဲဒီးကီၢ်ပယီၤထံဖိကီၢ်ဖိအခိၣ်ဂီၤ(မှတ်ပုံတင်)သ့ၣ်တဖၣ်အသိးအဝဲသ့ၣ်တဖၣ်အံၤဖီၣ်ဝဲ(၁၃/)ယိၤဒိၣ်ကီၢ်စဲၣ်ဒီး(၁/)(ကခၠ့ၣ်)ခၠီကီၢ်စဲၣ်(မှတ်ပုံတင်)အဂ့ၢ်သ့ၣ်တဖၣ်အဂ့ၢ်,အဝဲစံးအါထီၣ်ဝဲဒၣ်န့ၣ်လီၤ. တကးဒံးဘၣ်,တရူးထံဖိလၢနုၥ်လီၤအိၣ်ဖိးမံသဲစး,အိၣ်ဝဲဒီးကီၢ်ပယီၤခိၣ်ဂီၤဒီးဆီလီၤမုၢ်ကျိၤဝဲကွၥ်သ့ၣ်တဖၣ်အံၤခီဖျိကပှ့ၤဝဲဟီၣ်ခိၣ်ကပံၥ်ဒီးတၢ်လီၢ်တၢ်ကျဲတဖၣ်လၢအနီၢ်ကစၢ်အမံၤတန့ၢ်ဝဲဘၣ်အဖီခိၣ်,ဒိးလဲအိၣ်ဝဲဟံၣ်ဒီးကဲထီၣ်ဝဲတၢ်ဘၣ်ဒိးဘၣ်ထံးလၢကမျၢၢ်လီၢ်ကဝီၤဖိလၢအိၣ်ဆိးဒိးလဲညီနုၢ်တ့ၢ်ဟံၣ်သ့ၣ်တဖၣ်အဂီၢ်အဂ့ၢ်,ဃိၣ်သၢဖျၢၣ်လီၢ်ကဝီၤဖိတဂၤစံးဝဲဒ်အံၤန့ၣ်လီၤ. အဝဲစံးဝဲလၢ“ပှၤလၢဟဲအိးထီၣ်ဝဲကျးတဖၣ်အံၤပှ့ၤဟီၣ်ခိၣ်ကပံၥ်တၢ်လီၢ်တၢ်ကျဲလၢအနီၢ်ကစၢ်မံၤတန့ၢ်ဘၣ်အဃိန့ၣ်,ငါအိၣ်ဝဲပှၤဟံၣ်,ဟ့ၣ်ဝဲဟံၣ်ကစၢ်တဖၣ်ဟံၣ်လဲအပှ့ၤဂ့ၤဂ့ၤန့ၢ်ဒီးဟံၣ်ကစၢ်တဖၣ်မၤအါထီၣ်ဟံၣ်လဲအဃိ,ပှၤလၢဆဲးငါအိၣ်ဝဲတန့ၢ်လၢၤဘၣ်တဖၣ်တၢ်နီစံၣ်လီၤကွံၥ်ဝဲအဖီခိၣ်,ကဲထီၣ်တၢ်မူးဒီးဘၣ်လဲၤထံၣ်လိၥ်ဝဲသးလီၢ်ကဝီၤပှၤဘၣ်မူဘၣ်ဒါတဖၣ်အိၣ်ဝဲအဃိန့ၣ်,ကဲထီၣ်တၢ်သဘံၣ်ဘုၣ်ဒီးဘၣ်ဒိဘၣ်ထံးက့ၤဝဲကမျၢၢ်လီၢ်ကဝီၤဖိမုၢ်ဆ့ၣ်မုၢ်ဂီၤပှၤမၤအီၣ်တနံၤဂီၢ်တနံၤဂီၢ်ဖိလၢညီနုၢ်ငါအိၣ်ဟံၣ်တဖၣ်အဂီၢ်”အဂ့ၢ်စံးဝဲန့ၣ်လီၤ. တကတီၢ်ဃီ,တရူးထံဖိကီၢ်ဖိတဖၣ်အံၤ(၂၀၂၄)နံၣ်လါအ့ဖြ့ၣ်တါလိၣ်ဝံၤအလီၢ်ခံစးထီၣ်နုၥ်လီၤဝဲလၢဃိၣ်သၢဖျၢၣ်ဝ့ၢ်ပူၤဒီးတကီၢ်ခါခဲအံၤနုၥ်လီၤအိၣ်ဆိးဝဲအနီၢ်ဂံၢ်နီၢ်ဒွးအိၣ်ဝဲထဲလဲၣ်အဂ့ၢ်တၢ်မၤလီၢ်တံၢ်အီၤတန့ၢ်ဒံးဘၣ်အဖီခိၣ်,ဒ်သိးကသ့ၣ်ညါဘၣ်တရူးထံဖိကီၢ်ဖိတဖၣ်အံၤအနီၢ်ဂံၢ်နီၢ်ဒွးလီၤတံၢ်လီၤဆဲးအဂီၢ်,ခ့ၣ်အဲးစံၣ်ပှၤထၢတၢ်ကစီၣ်ဖိတဖၣ်ဃုသ့ၣ်ညါမၤလီၤတံၢ်ဝဲအဖၢမုၢ်လီၤအဂ့ၢ်,ဒုးသ့ၣ်ညါဘၣ်ပှၤဒိကနၣ်တၢ်ဖိတဖၣ်န့ၣ်လီၤ. ဃိၣ်သၢဖျၢၣ်ဝ့ၢ်အံၤခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢအကရူၢ်ကရၢတဖၣ်အမဲၥ်ညါ,ဖီၣ်စုကဝဲၤကရူၢ်ကရၢဒ်အမ့ၢ် (DKBA၊KNU/KNLA-PC BGF)ဒီးမိၢ်ကီၢ်သီပၣ်တံၢ်ကရူၢ်ကရၢတဖၣ်နုၥ်လီၤဟူးဂဲၤအိၣ်ဆိးဝဲအိၣ်ဝဲအသိး,သုးကီၣ်ကးတဖၣ်စ့ၢ်ကီးဆီလီၤအသးအိၣ်ဆိးဝဲလၢဝ့ၢ်ဃၢၤ(အသုးကလၢၤ)ကရၢၢ်အပူၤအိၣ်ဝဲအဂ့ၢ်,သ့ၣ်ညါဘၣ်ဒ်လီၢ်ကဝီၤကမျၢၢ်တဖၣ်စံးဝဲအသိးန့ၣ်လီၤ. ဒ်န့ၣ်အသိး,ဃိၣ်သၢဖျၢၣ်ဝ့ၢ်အံၤမ့ၢ်ဝဲကီၢ်ကၠီၣ်တဲၣ်ကီၢ်ပယီၤကီၢ်ဆၢဒီးလၢဝ့ၢ်ပူၤတၢ်ပၢတၢ်ြပးတကပၤခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢပှၤဘၣ်မူဘၣ်ဒါတဖၣ်တီခိၣ်ရိၢ်မဲဝဲဒီးမ့မ့ၢ်ဝ့ၢ်ဟီၣ်ကဝီၤတၢ်ဘံၣ်တၢ်ဘၢတခီဒံၣ်မိၣ်ကရ့ၣ်စံၣ်တၢ်ဘၣ်ဘျူးကညီသုးမုၢ်ဒိၣ်(DKBA)တီခိၣ်ရိၢ်မဲဝဲအဂ့ၢ်,သ့ၣ်ညါဘၣ်န့ၣ်လီၤ.

လါအီးကထိဘၢၣ် ၄သီ, ၂၀၂၄ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ, သုးက့(၅),မုၢ်ြတီၢ်ကီၢ်ရ့ၣ်,လူၤသီကီၢ်ဆၣ်,စီၤမုၢ်ပျီဟီၣ်ကဝီၤ တၢ်ဒုးကဲထီၣ်ဝဲလၢ သုးက့(၅)ဂၢၤကီၢ်သုးဒ့(၁)ဒီးပယီၤသုးကီၣ်ကးအဘၢၣ်စၢၤ (၃)နၣ်ရံၣ်ဘျဲၣ်ဒီးပယီၤသုးသံအဂၤ(၃၀)အကျါပၣ်ဃုၥ် သုးရ့ၣ်ခိၣ်တဂၤဒီးသုးဒ့ခိၣ်(၂)ဂၤအဂ့ၢ် သ့ၣ်ညါဘၣ်လၢ ကီၢ်ရ့ၣ်အပှၤဘၣ်မူဘၣ်ဒါအိၣ်န့ၣ်လီၤ. ဖဲအပူၤကွံၥ်လါစဲးပထ့ဘၢၣ် အသီ(၃၀)အနံၤန့ၣ် ပယီၤသုးကီၣ်ကးအပှၤလၢအိၣ် ဖါဂီၤလိ သ့ၣ်တဖၣ်ဆီတလဲအလီၢ်ဝံၤဒ်သိးကက့ၤလီၤဆူ ဖိဃ့ခိၣ်အဂီၢ် ဖဲတၢ်ဘၢၣ်စၢၤတုၤဖဲဒါဝါထၣ်တၢ်လီၢ်န့ၣ် သုးက့(၅)ဂၢၤကီၢ်သုးဒ့(၁)ခိးထုးအဝဲသ့ၣ်ဒီးမ့ၣ်ပိၢ်ဒီးခးအဝဲသ့ၣ်အဃိ ပယီၤသုးတကပၤသံဝဲဂၤ(၃၀)အဂ့ၢ် မုၢ်တြီၢ်ကီၢ်ရ့ၣ်အပှၤကတိၤတၢ်ပၢသုးခိၣ်ဒိၣ်ဂီၢ်ဂ့ၢ်စီၤကျၢၤဒိၣ်စံးဘၣ်ဝဲခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤ. အဝဲစံးဝဲလၢ“ဖဲလါစဲးပထ့ဘၢၣ် အသီ(၃၀)ဂီၤခီ (၆)နၣ်ရံၣ်တခီ တုၤ...

လါအီးကထိဘၢၣ် ၄ သီ, ၂၀၂၄ နံၣ်, ခ့ၣ်အဲးစံၣ် ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ် မိၣ်ပလ့ၤသ၀ီပူၤ ပယီၤသုးလၢအကဟဲထီၣ်ဘှီ၀ဲသုးလီပျံၤအကျိၤလၢ အဟးဂီၤတဖၣ်အံၤ ခီဖျိတၢ်ပၢၢ်ဆၢသုးပၥ်ဖှိၣ်ကရူၢ်ခိးထုး၀ဲဒီးမ့ၣ်ပိၢ်အဃိ သံဘၣ်ဒိဘၣ်ထံး၀ဲဒၣ်(၆)ဂၤအဂ့ၢ်န့ၣ် သ့ၣ်ညါဘၣ်လၢဂံၢ်ခီၣ်ထံး ပှၤဟ့ၣ်တၢ်ကစီၣ်ဖိအအိၣ်န့ၣ်လီၤ. လၢကၠဲးထိၣ်ကီၢ်ဆၣ် မိၣ်ပလ့ၤသ၀ီ တီယၣ်သီခါဖၠၣ်မဲၥ်ညါန့ၣ် ပယီၤသုးအံၤခီဖျိလီၤပျံၤကျိၤလၢအ၀ဲသ့ၣ်သူ၀ဲလၢသုးအဂီၢ်အံၤ ဟးဂီၤအဃိ ဖဲမဟါလါအီးကထိဘၢၣ် ၃ သီ ဂီၤခီ ၁၀ နၣ်ရံၣ်ဃၣ်ဃၣ်အဆၢကတီၢ်န့ၣ်...

လါစဲးပထ့ဘၢၣ် ၃ သီ, ၂၀၂၄ နံၣ်, ခ့ၣ်အဲးစံၣ် ကညီကီၢ်စဲၣ်-ကီးတရံးတီနီၢ်ကျဲမုၢ်လီၢ်လံၤတကပၤန့ၣ်ဖဲတနံၤအံၤဂီၤခီအဆၢကတီၢ်ခီဖျိသိလ့ၣ်ဖးဒိၣ်(ဆယ်ဘီးကား)တခိၣ်လီၤတ ကျၢၢ်အဃိပှၤနီၣ်သိလ့ၣ်ဖိတဂၤဘၣ်သံကွံၥ်ဝဲအဂ့ၢ်န့ၣ်(အလ့သ့ၣ်)ဂ့ၢ်ဂီအူတၢ်တိစၢၤမၤစၢၤကရူၢ်စံးဝဲအသိးသ့ၣ်ညါဘၣ်န့ၣ်လီၤ. ဖဲတီနီၢ်ကျဲလီၢ်လံၤ(ကၠီၣ်ကပါ)ဒီး(အလဲၤဘိၣ်ဒဲ)အဘၢၣ်စၢၤတကပၤန့ၣ်တနံၤအံၤလါအီးကထိဘၢၣ်(၃)သီအနံၤဂီၤခီဆၢကတီၢ်သိလ့ၣ်တၢ်ကဲထီၣ်အသးတလ့ၤတပျးဒီးလီၤတကျၢၢ်လီၤတဲၥ်ဝဲဒၣ်ဆူတၢ်ြတီၥ်လၥ်အပ့ၣ်(၁၀၀)ဃၣ်ဃၣ်အဂ့ၢ်သ့ၣ်ညါဘၣ်လၢ(အလ့သ့ၣ်)ဂ့ၢ်ဂီအူတၢ်တိစၢၤမၤစၢၤကရူၢ်အိၣ်န့ၣ်လီၤ. "အခဲအံၤန့ၣ်ပှၤနီသိလ့ၣ်ဖိသံလံန့ၣ်လီၤ. အဘၣ်တံၢ်ဝဲဒီးသိလ့ၣ်(ဆယ်ဘီးကား)မီၤနီၤ. လၢတၢ်ကထုးထီၣ်သကိးဝဲသိလ့ၣ်အံၤအ ဂီၢ်န့ၣ်တၢ်မ့ၢ်ထုးအီၤလၢ(ကရိမ်း)သိလ့ၣ်မးအကန့ၢ်လီၤ. အဃိန့ၣ်ပအိၣ်ခိးဝဲ(ကရိမ်း)သိလ့ၣ်ဟဲထီၣ်န့ၣ်လီၤ." အဂ့ၢ်စံးဘၣ်ခ့ၣ်အဲး စံၣ်-ကညီတၢ်ကစီၣ်န့ၣ်လီၤ. (အလ့သ့ၣ်)ဂ့ၢ်ဂီအူတၢ်တိၤစၢၤမၤစၢၤကရူၢ်အံၤဒ်သိးတၢ်ကထုးထီၣ်ဝဲသိလ့ၣ်ဖးဒိၣ်(ဆယ်ဘီးကား)လၢတၢ်ဖီခိၣ်ကန့ၢ်အဂီၢ်ဒီးတၢ်ထုးထီၣ်ဝဲပှၤနီသိလ့ၣ်ဖိအစိၣ်လၢအဘၣ်တံၢ်ဒီးသိလ့ၣ်အံၤကန့ၢ်အဂီၢ်(အလ့သ့ၣ်)ကရူၢ်ရဲၣ်ကျဲၤမၤစၢၤဝဲဒၣ်အဂ့ၢ်န့ၣ်သ့ၣ်ညါဘၣ်န့ၣ်လီၤ. တကီၢ်ခါတၢ်အိၣ်သးအခဲအံၤန့ၣ်မ့ၢ်လၢတၢ်ပံးဃၥ်ဝဲရၤမတံ-ကီးတရံး(အ့ရှၢၣ်)ကျဲမုၢ်သီအံၤအဃိပှၤနီသိလ့ၣ်ဖိသ့ၣ်တဖၣ် ဒီးပှၤလဲၤတၢ်က့ၤဖိသ့ၣ်တဖၣ်အဂီၢ်ဘၣ်လ့ၢ်လိၤလ့ၢ်ထီၣ်သူဝဲဒၣ်ကျဲမုၢ်လီၢ်လံၤဝဲအံၤအဂ့ၢ်သ့ၣ်ညါဘၣ်န့ၣ်လီၤ. ဆၢကတီၢ်ခဲအံၤန့ၣ်ရၤမတံ-ကီးတရံးကျဲမုၢ်အံၤန့ၣ်ဘၣ်တၢ်ပၢဆှၢအီၤလၢခ့ၣ်အဲၣ်ယူၣ်-ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်KNLA သိၣ်မှံၤသုးပၥ်ဖှိၣ်သ့ၣ်တဖၣ်ဒီးဖဲတၢ်ကစီၣ်ဟူထီၣ်သါလီၤဝဲလၢဖီၣ်စုကဝဲၤကရူၢ်ကရၢတနီၤအဲၣ်ဒိးလၢတၢ်ကဟ့ၣ်တၢ်ပျဲအိးထီၣ်က့ၤကျဲအံၤဝံၤလီၢ်ခံကညီဖီၣ်စုကဝဲၤကရူၢ်ကရၢသ့ၣ်တဖၣ်မၤဝဲတၢ်ထံၣ်လိၥ်တၢၣ်ပီၣ်တဲသကိးတၢ်အိၣ်ထီၣ်ဝဲန့ၣ်လီၤ. လၢန့ၣ်အမဲၥ်ညါပနံၥ်တၢ်ဝံစိၥ်တီဆှၢကျဲမုၢ်တဘိလၢအကါဒိၣ်ဝဲလၢကီၢ်ကၠီၣ်တဲၣ်-ကီၢ်ပယီၤထံကီၢ်ခံဘ့ၣ်အဘၢၣ်စၢၤရၤမတံ-ကီး တရံး(အ့ရှၢၣ်)ကျဲမုၢ်အံၤန့ၣ်တၢ်ဒုးတၢ်ယၤကဲထီၣ်ဝဲဒၣ်လၢသုးကီၣ်ကးသ့ၣ်တဖၣ်ဒီးကညီဒီကလုၥ်တၢ်ထူၣ်ဖျဲးသုးမုၢ်ဒိၣ်-KNLA, ကမျၢၢ်တၢ်ဒီသဒၢသုး-PDF သ့ၣ်တဖၣ်အဘၢၣ်စၢၤအဃိတၢ်ပံးကွံၥ်ဝဲဒၣ်ကျဲတၢ်လဲၤတၢ်က့ၤအံၤထီၣ်ဘးလၢခံနံၣ်ဃၣ်ဃၣ်လံန့ၣ်လီၤ.

လါစဲးပထ့ဘၢၣ် ၃သီ, ၂၀၂၄နံၣ်, ခ့ၣ်အဲးစံၣ် ကညီကီၢ်စဲၣ်,လူၢ်ပျဲၢ်ကီၢ်ဆၣ်အပူၤ,လါအီးကထိဘၢၣ်(၁)တုၤလၢ(၁၅)သီအနံၤအပူၤသုးကီၣ်ကးအတၢ်ထၢဝဲကမျၢၢ်ဖးဖီမုၢ်စရီ,ပှၤထၢတၢ်ဖိတဖၣ်ကဟးထီၣ်က့ၤလီၤအဂီၢ်တၢ်ဘံၣ်တၢ်ဘၢအံၤ,ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,သုးက့(၇)ဖၣ်အၣ်ကီၢ်ရ့ၣ်ပှၤဘၣ်မူဘၣ်ဒါဒီးသုးဖိတဖၣ်ဟံမူဒါမၤစၢၤဝဲအဂ့ၢ်,သုးကီၣ်ကးအပှၤ(propaganda)လၢအပညိၣ်မၤကမၣ်တၢ်ဂ့ၢ်တၢ်ကျိၤတဖၣ်ဟးရၤလီၤဝဲတၢ်ကစီၣ်အကမၣ်သ့ၣ်တဖၣ်လၢ(Telegram)အပူၤန့ၣ်လီၤ. သုးကီၣ်ကးအတၢ်ရၤလီၤဝဲတၢ်ကစီၣ်အကမၣ်အံၤ,ရၤလီၤဝဲဖဲတလါအံၤလါအီးကထိဘၢၣ်(၁)သီအနံၤ,လၢကီၢ်ပယီၤကွဲၤဟူဖျါ(MRTV)ဒီးတၢ်ဘိးဘၣ်ရၤလီၤ(ကိ)တိၥ်ဝဲကျိၤ(MOI)တၢ်ကစီၣ်သန့တဖၣ်လၢတၢ်(Subscribe)ပၥ်အိၣ်လၢအကလးဂၤအပူၤအိၣ်ဝဲဒီး,တၢ်ကစီၣ်ကမၣ်အံၤပှၤကွၢ်တၢ်ကစီၣ်ဖိတဖၣ်က့ၤရၤလီၤကဒီးဝဲတဆီဘၣ်တဆီအိၣ်ဝဲအဂၤလၢကယၤန့ၣ်လီၤ. တကးဒံးဘၣ်,သုးကီၣ်ကးအတၢ်ရၤလီၤတၢ်ကစီၣ်အကမၣ်အံၤပှၤကွၢ်တၢ်ဖိအိၣ်ဝဲ(၃၉၁)ဂၤဒီးပှၤဟ့ၣ်(Reaction)အိၣ်ဝဲ(၆)ဂၤအမဲၥ်ညါ,ပှၤသူ(Social Media) အမံၤမ့ၢ်ဝဲ(Saw Ba Maung)လၢအ(Subscriber)အိၣ်ဝဲ(၁၅,၀၀၀)ခိၣ်ဃၢၤတဂၤအံၤက့ၤ(Copy)ဟံန့ၢ်ကဒီးဝဲအမဲၥ်ညါ,ပၥ်ဖျါထီၣ်ကဒီးဝဲလၢအ(Social Media Telegram)အပူၤအိၣ်စ့ၢ်ကီးဝဲဒၣ်န့ၣ်လီၤ. ဘၣ်ဃးဒီးသုးကီၣ်ကးအပှၤရၤလီၤဝဲတၢ်ကစီၣ်ကမၣ်အံၤအဖီခိၣ်,တၢ်ထၢဝဲဖးဖီမုၢ်စရီတၢ်ဘံၣ်တၢ်ဘၢအဂီၢ်အံၤ(KNU)သုးက့(၇)တကပၤအတၢ်ပၣ်ဃုၥ်ပၣ်ဂီၢ်တအိၣ်ဝဲဘၣ်ဒီးမ့ၢ်ဝဲသုးကီၣ်ကးအတၢ်ကစီၣ်လၢပညိၣ်မၤကမၣ်ဝဲတၢ်ဂ့ၢ်တၢ်ကျိၤတဖၣ်အတၢ်ရၤလီၤဝဲလီၤအဂ့ၢ်,သုးက့(၇)ဖၣ်အၣ်ကီၢ်ရ့ၣ်ခိၣ်,ပဒိၣ်စီၤအီၣ်မီၣ်အ့စံးဝဲဒ်အံၤန့ၣ်လီၤ. အဝဲစံးဝဲလၢ“မ့မ့ၢ်လၢအဝဲသ့ၣ်တၢ်ဘံၣ်တၢ်ဘၢအဂီၢ်န့ၣ်(BGF)သ့ၣ်တဖၣ်ဃုထၢထီၣ်ဝဲပှၤလၢကဟံန့ၢ်မူဒါအိၣ်အဂ့ၢ်ဒုပသ့ၣ်ညါဘၣ်လီၤ.မ့မ့ၢ်ပဝဲဒုဘၣ်ဃးတၢ်ရဲၣ်တၢ်ကျဲၤလၢအသုတၢ်ဘံတၢ်ဘၢအဂီၢ်ပတၢ်ပၣ်ဃုၥ်ပၣ်ဂီၢ်တအိၣ်ဘၣ်ဒီးပတဟံန့ၢ်မူဒါစ့ၢ်ကီးဘၣ်သနါက့အိၣ်ဒၣ်တခါလၢပတဲအဝဲသ့ၣ်လၢ,လၢပဟီၣ်ကဝီၤအပူၤမ့လိၣ်ဘၣ်စရီခီဒုပကစၢ်ကထၢန့ၢ်သုလီၤ”အဂ့ၢ်စံးဝဲန့ၣ်လီၤ. လၢန့ၣ်အမဲၥ်ညါ,သုးကီၣ်ကးအတၢ်ရၤလီၤဝဲတၢ်ကစီၣ်ကမၣ်တၢ်ထၢဖးဖီမုၢ်စရီလၢလူၢ်ပျဲၢ်ကီၢ်ဆၣ်ပူၤအံၤ,ပၥ်ဖျါဝဲလၢဖီဖးမုၢ်စရီပှၤထၢတၢ်ဖိတဖၣ်အတၢ်ဘံၣ်တၢ်ဘၢအဂီၢ်,ခ့ၣ်အဲၣ်ယူၣ်သုးက့(၇)ပှၤဘၣ်မူဘၣ်ဒါတဖၣ်ဟံမူဒါပၣ်ဃုၥ်ပၣ်ဂီၢ်ဝဲအိၣ်ဝဲဘၣ်ဆၣ်,လၢတၢ်ဂီၤတၢ်(ဖီၣ်)အတၢ်ပၥ်ဖျါအပူၤ(KNU)သုးက့(၇)တဖၣ်တပၣ်ဃုၥ်ဝဲဘၣ်ဒီးအတၢ်ပၥ်ဖျါတၢ်ဂီၤအပူၤအိၣ်ဝဲထဲသုးကီၣ်ကးအစုတီၤဖီလၥ်အပှၤသုးဖိ,သဝီသးပှၢ်ဒီးသုးခိးကီၢ်ဆၢ(BGF)သ့ၣ်တဖၣ်လီၤအဂ့ၢ်,တၢ်ဃုထံၣ်သ့ၣ်ညါဘၣ်ဝဲဒၣ်န့ၣ်လီၤ. သုးက့(၇)ဖၣ်အၣ်ကီၢ်ရ့ၣ်,လူၢ်ပျဲၢ်ကီၢ်ဆၣ်အပူၤအံၤမ့ၢ်ဝဲ(KNU)ဒီး(BGF)ဟူးဂဲၤလီၢ်ကဝီၤအဃိ,ဘၣ်ဃးဒီးတၢ်ဂ့ၢ်လၢသုးကီၣ်ကးပၥ်ဖျါထီၣ်ဝဲလၢအ(Social Media Telegram)သ့ၣ်တဖၣ်အံၤမ့ၢ်ဝဲတၢ်ကစီၣ်လၢအကမၣ်အဂ့ၢ်(KIC)ပှၤထၢတၢ်ကစီၣ်ဖိတဖၣ်ဃုထံၣ်သ့ၣ်ညါဝဲန့ၣ်လီၤ.

လါအီးကထိဘၢၣ် ၃ သီ, ၂၀၂၄ နံၣ်, ခ့ၣ်အဲးစံၣ် သုးကီၣ်ကးအံၤလၢကမၤတၢ်ဃုထၢအဂီၢ် ကမၤ၀ဲတၢ်ထၢကမျၢၢ်ဟံၣ်ခိၣ်စရီတၢ်ရဲၣ်တၢ်ကျဲၤအဖီခိၣ်အံၤ ကမျၢၢ်ထံဖိကီၢ်ဖိတဖၣ် တဘၣ်မၤပၣ်ဃုၥ်ပၣ်ဂီၢ်သးလၢသုးကီၣ်ကးအတၢ်ရဲၣ်တၢ်ကျဲၤပူၤအံၤဘၣ်အဂ့ၢ်န့ၣ် ကၠဲးထိၣ်တၢ်ပၢၢ်ဆၢကရူၢ် (KRF)ထုးထီၣ် ဟ့ၣ်ပလီၢ်၀ဲဖဲလါအီးကထိဘၢၣ် ၁ သီအနံၤန့ၣ်လီၤ. သုးကီၣ်ကးအတၢ်မၤတၢ်ထၢဟံၣ်ခိၣ်စရီအံၤအတၢ်ပညိၣ်အိၣ်လၢကမၤ၀ဲတၢ်ဃုထၢအဂီၢ်လီၤဒီးတၢ်ဃုထၢလၢသုးမီၤစရိၤကမၤ ၀ဲအံၤန့ၣ်လ့ၤတက့ၤကၠဲးထိၣ်တၢ်ပၢၢ်ဆၢကရူၢ်(KRF)တတူၢ်လိၥ်၀ဲဘၣ်အဃိတၢ်တဘၣ်ဟ့ၣ်ဂံၢ်ဟ့ၣ်ဘါဆီၣ်ထွဲမၤစၢၤနုၥ်လီၤ ပၣ်ဃုၥ်ပၣ်ဂီၢ်လၢသုးကီၣ်ကးအတၢ်ထၢဟံၣ်ခိၣ်စရီတၢ်ရဲၣ်တၢ်ကျဲၤအပူၤဘၣ်အဂ့ၢ်န့ၣ် (Kyaikhto Revolution Force-KRF) အလံၥ်တၢ်ပၥ်ဖျါအပူၤစံး၀ဲန့ၣ်လီၤ. ဒ်(KRF)လံၥ်တၢ်ပၥ်ဖျါပူၤပၥ်ဖျါ၀ဲအသိးန့ၣ် သုးကီၣ်ကးလၢအမၤသံမၤ၀ီ,မၤတရီတပါကမျၢၢ်ထံဖိကီၢ်ဖိ, တကးဒံးဘၣ် သူ၀ဲကဘီယူၤ,ကျိဖးဒိၣ်ခးလီၤ၀ဲတၢ်လၢကၠိ,တၢ်ဘူၣ်တၢ်ဘါတၢ်သူၣ်ထီၣ်,ဟံးန့ၢ်ဆူၣ်၀ဲကမျၢၢ်တၢ်ဖိတၢ်လံၤ...

လါအီးကထိဘၢၣ် ၂သီ, ၂၀၂၄နံၣ်, ခ့ၣ်အဲးစံၣ်, ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,သုးက့(၆)ဒူပျၥ်ယၥ်ကီၢ်ရ့ၣ်,ဝီၢ်ရ့ၣ်ကီၢ်ဆၣ်အပူၤ,သုးကီၣ်ကးအသုးကျိၤလၢဟဲထီၣ်မၤစၢၤနိၣ်ခၠိနဲၣ်ဒုးယၤသုးကလၢၤ(၁၀)ဂၤ,ဃ့ၢ်ဖျိးထီၣ်ကွံၥ်ဝဲဆူ(KNLA)ကညီတၢ်ထူၣ်ဖျဲးသုးမုၢ်ဒိၣ်အစုပူၤအိၣ်ဝဲအဂ့ၢ်,ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်စံးဝဲန့ၣ်လီၤ. အပူၤကွံၥ်လါစဲးပထ့ဘၢၣ်လီၢ်ခံကတၢၢ်တနွံအပူၤ,မီၣ်လမၠဲၣ်ခီၣ်ချ့သုးရ့ၣ်ခမရ(၉၀၄)ပယီၤအပှၤသုးဖိလၢဟဲထီၣ်မၤစၢၤနိၣ်ခၠိနဲၣ်ဒုးယၤသုးကလၢၤတဖၣ်အံၤ,စံၣ်ဖျိးထီၣ်ကွံၥ်ဝဲလၢအသုးကျိၤပူၤဒီးလဲၤဃ့ၢ်နုၥ်ဝဲဆူ(KNLA)သုးရ့ၣ်(၁၆)အစုပူၤအဂ့ၢ်,ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဂၤစံးဝဲဒ်အံၤန့ၣ်လီၤ. အဝဲစံးဝဲလၢ“ပယီၤသုးလၢအဟဲထီၣ်လူၤက့ၤအပှၤ(စစ်ကူ)တဒူၣ်န့ၣ်ဟဲစံၣ်ဖျိးဝဲခဲအံၤခဲလၢၥ်အဂၤ(၁၀)န့ၣ်လီၤ.အဝဲသ့ၣ်စံၣ်ထီၣ်ဝဲလၢအသုးကျိၤပူၤဝံၤလဲၤစံၣ်ဝဲဆူ(ပယီၤဟဲ)သဝီခိၣ်ဃၢၤတၢ်လီၢ်တဖၣ်အပူၤဝံၤတုၤဆိဝဲလၢသုးရ့ၣ်(၁၆)အပူၤအဃိ,ခဲအံၤအိၣ်ဝဲလၢသုးရ့ၣ်(၁၆)အစုပူၤဒီးတၢ်ပၥ်အီၤလၢတၢ်ဘံၣ်တၢ်ဘၢအိၣ်အလီၢ်အမဲၥ်ညါ,ကွၢ်ထွဲအီၤလၢတၢ်အီၣ်တၢ်အီတၢ်အိၣ်တၢ်ဆိးကိးကပၤဒဲးအဂ့ၢ်”စံးဝဲဒၣ်န့ၣ်လီၤ. လၢန့ၣ်အမဲၥ်ညါ,ပယီၤသုးလၢဟဲထီၣ်မၤစၢၤအပှၤ(စစ်ကူ)တဖၣ်အံၤဒ်တၢ်သမံသမိးဝဲအဝဲသ့ၣ်တဖၣ်အိၣ်ဝဲအဖီခိၣ်ဒီးတနီၤအဲၣ်ဒိးပၥ်ဖှိၣ်မၤသကိးတၢ်ဒီးတၢ်ပၢၢ်ဆၢသုးပၥ်ဖှိၣ်လၢတၢ်ထီဒါက့ၤသုးကီၣ်ကးအိၣ်ဝဲအသိး,တနီၤအဲၣ်ဒိးအိၣ်ဆိးက့ၤဒ်ကမျၢၢ်အိၣ်ဝဲဒၣ်အဂ့ၢ်,ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်စံးဝဲန့ၣ်လီၤ. တကးဒံးဘၣ်,အပူၤကွံၥ်လါစဲးပထ့ဘၢၣ်အဆိကတၢၢ်တနွံအပူၤ,ပယီၤသုးလၢအိၣ်နိၣ်ခၠိနဲၣ်ဒုးယၤသုးကလၢၤအပူၤတဖၣ်စံၣ်ဖျိးထီၣ်ဝဲအိၣ်တနီၤအဃိ,တကီၢ်ခါခဲအံၤတၢ်ပၥ်အဝဲသ့ၣ်တပူၤဃီအိၣ်ဝဲအဂ့ၢ်,သ့ၣ်ညါဘၣ်လၢဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်အအိၣ်န့ၣ်လီၤ. တကတီၢ်ဃီ,သုးကီၣ်ကးအပှၤတဖၣ်အံၤ,အါတက့ၢ်မ့ၢ်ဝဲပှၤလၢအဘၣ်တၢ်ဖီၣ်မၢဆူၣ်အီၤလၢ“သုးကီၣ်ကးကမျၢၢ်တၢ်ဘၣ်ကဲသုးသဲစး”အဃိအဝဲသ့ၣ်တဖၣ်,ဒ်သိးကပူၤဖျဲးထီၣ်လၢသုးကီၣ်ကးအစုပူၤအဂီၢ်,ဂုၥ်ကျဲးစၢးဃုတ့ၢ်ဝဲကျဲအဘိဘိအိၣ်ဝဲအဂ့ၢ်,(၉၀၄)သုးရ့ၣ်ပယီၤသုးအပှၤလၢဃ့ၢ်နုၥ်ဆူ(KNLA)ကညီတၢ်ထူၣ်ဖျဲးသုးမုၢ်ဒိၣ်အစုပူၤတဂၤစံးဝဲဒၣ်န့ၣ်လီၤ. ဒီးတကီၢ်ခါခဲအံၤခီဖျိအနီၢ်ကစၢ်ပူၤဖျဲးထီၣ်ကွံၥ်ဝဲလၢသုးကီၣ်ကးအစုပူၤလံအဃိသးခုဝဲဒီး,ဆီၣ်တခူထီၣ်ဝဲအသကိးတဖၣ်လၢကဂုၥ်ကျဲးစၢးဃ့ၢ်ပူၤဖျဲးထီၣ်အသးအဂ့ၢ်,အဝဲစံးဝဲဒ်အံၤန့ၣ်လီၤ. အဝဲစံးဝဲလၢ“သုးကီၣ်ကးကမျၢၢ်တၢ်ဘၣ်ကဲသုးသဲစးန့ၣ်,ပတနုၥ်လီၤဘၣ်လ့ၤတက့ၤတန့ၢ်တသ့ဘၣ်အဃိ,ပဘၣ်နုၥ်လီၤတ့ၢ်လီၤ.ပနီၢ်ကစၢ်သးပတအဲၣ်ဒိးနုၥ်လီၤဘၣ်.ပှၤဒုးထီၣ်ပှၤတၢ်မၤလိဝံၤဆှၢဃီၤပှၤဆူမီၣ်လမၠဲၣ်အလီၢ်ခံ,ပှၤဆှၢကဒီးပှၤလၢတၢ်မဲၥ်ညါ,ပဘၣ်အိၣ်ဘၣ်အီၣ်ဖှီၣ်ဖှီၣ်နးနးသဂၢၢ်ဘၣ်တၢ်ကီတၢ်ခဲအါမးလီၤ.အခဲအံၤယဃ့ၢ်ပူၤဖျဲးထီၣ်ကွံၥ်ယသးလၢသုးကီၣ်ကးအစုပူၤန့ၣ်လံအဃိယသးခုဒိၣ်မးလီၤ.ပအိၣ်လၢန့ၣ်အဆၢကတီၢ်ပှၤတဲပျံၤတဲဖုးပှၤအမံၤမံၤဘၣ်ဆၣ်ပဟဲတုၤဖဲအံၤတကပၤပှၤတူၢ်လိၥ်ပှၤမုၥ်မုၥ်န့ၣ်လီၤ.အဃိန့ၣ်ယအဲၣ်ဒိးဆီၣ်တခူထီၣ်သကိးလၢအိၣ်လၢတ့ၢ်လၢ(၉၀၄)သုးရ့ၣ်,တဖၣ်လၢကဃ့ၢ်ပူၤဖျဲးအသးန့ၣ်လီၤ.”အဂ့ၢ်စံးဝဲဒၣ်န့ၣ်လီၤ. အပူၤကွံၥ်လါစဲးပထ့ဘၢၣ်(၁၁)သီအနံၤအပူၤ,ပယီၤသုးလၢအိၣ်လိးရှါသုးကလၢၤအပူၤတဖၣ်ဟးထီၣ်ကွံၥ်ဝဲခဲလၢၥ်ဒီးက့ၤလီၤပၥ်ဖှိၣ်က့ၤဝဲအသးဆူ(တလၢၤကီၢ်စဲၣ်)စခါကၠံသုးကလၢၤဝံၤအလီၢ်ခံ,ဟဲထီၣ်ကဒီးဝဲလၢကလဲၤမၤစၢၤဝဲနိၣ်ခၠိနဲၣ်ဒုးယၤသုးကလၢၤအဂ့ၢ်,သ့ၣ်ညါဘၣ်န့ၣ်လီၤ. ဒ်န့ၣ်အသိး,တကီၢ်ခါခဲအံၤပယီၤသုးလၢဟဲထီၣ်(စစ်ကူ)တဖၣ်အံၤအဂံၢ်ဘါအိၣ်ဝဲ(၂၀၀)ဘျဲၣ်ဒီးအိၣ်ဝဲဒၣ်ဖဲသရိၥ်ဝါကျဲခိၣ်ဃၢၤတၢ်လီၢ်တဖၣ်အပူၤအဂ့ၢ်,သ့ၣ်ညါဘၣ်ဒ်ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်စံးဝဲအသိးန့ၣ်လီၤ.

လါအီးကထိဘၢၣ် ၂ သီ, ၂၀၂၄ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကီၢ်သူလ့ၤတၢ်ပၢဘျံးဒဝဲၢ်ကီၢ်ရ့ၣ်,တနီသရံၣ်ကီၢ်ဆၣ်ဟီၣ်ကဝီၤအပူၤဖဲလါစဲးပထ့ဘၢၣ်အကတၢၢ်တနွံအတီၢ်ပူၤန့ၣ်ခီဖျိ လၢကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ဒီးတၢ်ပၢၢ်ဆၢသုးပၥ်ဖှိၣ်ကရူၢ်တဖၣ်မၤဝဲတၢ်ဒီၣ်တဲၥ်ကွံၥ်ဝဲသုးကီၣ်ကးသ့ၣ်တဖၣ်တၢ်အီၣ်တၢ်အီဒီးတၢ်လဲၤတၢ်က့ၤကျဲအဃိလၢတနွံအတီၢ်ပူၤပယီၤသုးပၥ်တ့ၢ်ကွံၥ်ဝဲသုးကလၢၤ(၃)ဖျၢၣ်အဂ့ၢ်ကီၢ်ဆၣ်အပှၤဘၣ်မူဘၣ်ဒါစံးဝဲန့ၣ်လီၤ. ပယီၤသုးကလၢၤသ့ၣ်တဖၣ်အံၤန့ၣ်မ့ၢ်လၢလီၢ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ဒီးတၢ်ပၢၢ်ဆၢသုးပၥ်ဖှိၣ်ကရူၢ်သ့ၣ်တဖၣ်ထီၣ်ဒုးဝဲခဲအံၤခဲအံၤအသိးပယီၤသုးအံၤလၢတၢ်ကဟဲထီၣ်ဆှၢန့ၢ်ဝဲအပှၤသ့ၣ်တဖၣ်တၢ်အီၣ်တၢ်အီအဂီၢ်ဆှၢဝဲတဖျိခီဖျိတၢ်ဒီၣ်တဲၥ်ကွံၥ်ဝဲတၢ်တၢ်လဲၤတၢ်က့ၤဒ်အံၤဖီခိၣ်ဘၣ်ပၥ်တ့ၢ်ကွံၥ်ဝဲသုးကလၢၤအံၤလီၢ်အဂ့ၢ်န့ၣ်တနီသရံၣ်ပှၤဘၣ်မူဘၣ်ဒါပဒိၣ်စီၤထံဝါစံးဝဲဒၣ်ဒ်အံၤန့ၣ်လီၤ. "သုးကလၢၤလၢအမ့ၢ်(သၣ်ဖိမ့ၤ,လၢၢ်ကၢၢ်)ခံဖျၢၣ်အံၤန့ၣ်ခီဖျိလၢဘၣ်ဆှၢတၢ်အီၣ်တၢ်ဒ့ၣ်စၢၤယံၥ်ဝဲဒီးတၢ်လဲၤတၢ်က့ၤကီခဲဝဲခီဖျိလၢတၢ်ပၢၢ်ဆၢသုးပၥ်ဖှိၣ်ကရူၢ်ဒီး(KNLA)သ့ၣ်တဖၣ်အိၣ်ခိးခးဝဲလၢကျဲခီၣ်ထံးလီၤ. အဝဲသ့ၣ်ကဆှၢထီၣ်ဆှၢလီၤတၢ်အီၣ်တၢ်အီၣ်ကီ ခဲမီၤနီၤ. မ့မ့ၢ်လၢ(သ့ၣ်ဒီ)သုးကလၢၤန့ၣ်မ့ၢ်လၢတၢ်လဲၤထီၣ်ခးဝဲခဲအံၤခဲအံၤဒီးကဲထီၣ်ဝဲတၢ်ကီတၢ်ခဲလၢတၢ်ဆှၢတၢ်အီၣ်မ့ၢ်ဂ့ၤ,တၢ် ဆီတလဲသုးမ့ၢ်ဂ့ၤဒီးတၢ်အကပၤကပၤအဂီၢ်န့ၣ်လီၤ. အဃိအခဲအံၤအသုးတဖၣ်မၤဟးဂီၤကွံၥ်ဝဲဒၣ်,စိၥ်ကတီၢ်ကွံၥ်ဝဲဒၣ်သုးက လၢၤအံၤဒီးသုးလီၤက့ၤအသးဆူအသုးထံးလံန့ၣ်လီၤ." အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ပယီၤသုးကီၣ်ကးသုးကလၢၤ(၃)လၢအဘၣ်တၢ်ပၥ်တ့ၢ်ကွံၥ်ဝဲန့ၣ်မ့ၢ်(လၢၢ်ကၢၢ်သုးကလၢၤ,သၣ်ဖိမ့ၣ်သုးကလၢၤ,သ့ၣ်ဒီသုးကလၢၤ)သ့ၣ်တဖၣ်ဒီးပယီၤသုးအပှၤသ့ၣ်တဖၣ်အံၤဖဲအဝဲသ့ၣ်ဂုၥ်က့ၤဝဲအသးဝံၤအလီၢ်ခံဟဲက့ၤလီၤက့ၤဝဲဒၣ်ဆူတနီသရံၣ်ဝ့ၢ်တကပၤအဂ့ၢ်ပဒိၣ်စီၤထံဝါစံးအါထီၣ်ဝဲစ့ၢ်ကီးန့ၣ်လီၤ. လၢန့ၣ်အမဲၥ်ညါ(လၢၢ်ကၢၢ်သုးကလၢၤဒီးသၣ်ဖိမ့ၤသုးကလၢၤ)ခံဖျၢၣ်အံၤန့ၣ်မ့ၢ်ဝဲဒၣ်ကီၢ်ဆၢသုးကလၢၤသ့ၣ်တဖၣ်လၢအဂုၥ်လီၤဆိက့ၤဝဲအသးဆူ(သ့ၣ်ဒီသုးကလၢၤ)အပူၤဒီးဖဲလါစဲးပထ့ဘၢၣ်(၂၅)သီအနံၤအပှၤနီၣ်ဂံၢ်ပၥ်ဖှိၣ်ခဲလၢၥ်အဂၤ(၁၅၀)ဃၣ်ဃၣ်ဟးထီၣ်ကွံၥ်ဝဲတပူၤဃီလၢအသုးကလၢၤပူၤဒ်အံၤလီၤအဂ့ၢ်န့ၣ်သ့ၣ်ညါဘၣ်လၢလီၢ်ကဝီၤအပှၤဘၣ်မူဘၣ်ဒါသ့ၣ်တဖၣ်အအိၣ်န့ၣ်လီၤ. ဒ်န့ၣ်အသိးဘျံးဒဝဲၢ်ကီၢ်ရ့ၣ်လၢၢ်မုၢ်လါကီၢ်ဆၣ်ဟီၣ်ကဝီၤဖဲပူၤကွံၥ်လါယူၤ(၁၄)သီအနံၤန့ၣ်(KNLA)ထီၣ်မၤန့ၢ်ဝဲ(ဝ့ၢ်တိရ့ၣ်)ပယီၤသုးကလၢၤအိၣ်ဝဲဒီးလၢတၢ်န့ၣ်အဃိပယီၤသုးကလၢၤလၢအမ့ၢ်(လၢၢ်ဖးဒိၣ်)သုးကလၢၤနါက့စ့ၢ်ကီးအပှၤတဖၣ်အိၣ်က့ၤတဘူၣ်လၢၤဘၣ်ဒီးဖဲလါယူၤ(၁၅)သီအနံၤန့ၣ်ထုးလီၤကွံၥ်အသးဘၣ်ဆၣ်လၢစှၤသီအတီၢ်ပူၤပယီၤသုးသ့ၣ်တဖၣ်ဟဲက့ၤအိၣ်ဆီလီၤကဒါက့ၤသးအဂ့ၢ်သ့ၣ်ညါဘၣ်လၢကီၢ်ရ့ၣ်အပှၤဘၣ်မူဘၣ်ဒါအိၣ်န့ၣ်လီၤ.

လါအီးကထိဘၢၣ် ၂ သီ, ၂၀၂၄ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁) ကၠဲးထိၣ်ကီၢ်ဆၣ်အပူၤ KNLA သုးရ့ၣ်(၃)သုးပၥ်ဖှိၣ် လဲၤခး၀ဲပယီၤသုးအသုးရ့ၣ်(၂)ရ့ၣ်တၢ်လီၢ်ခံတီၤဒီးဒြိအဃိ ပယီၤသုးတကပၤဘၣ်ဒိဘၣ်ထံးတစှၤန့ၢ်(၈)ဂၤအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါ စံး၀ဲန့ၣ်လီၤ. သ့ၣ်စ့ၣ်ယး သုးကီၣ်ကးအမျိၥ်သုး(၃၁၀)သုးရ့ၣ်ဒီး ၀ါဒၣ်ကွ့ ခီၣ်ချ့သုးရ့ၣ်(ခမရ-၂၀၇)သ့ၣ်တဖၣ်အံၤ ဖဲလါစဲးပထ့ဘၢၣ် ၃၀ သီ ဂီၤခီ ၁၁ နၣ်ရံၣ်ဃၣ်ဃၣ်အဆၢကတီၢ်...