ကၠဲးထိၣ်ကီၢ်ဆၣ်ပူၤတၢ်ဒုးကဲထီၣ်တအိၣ်ကဘီယူၤလဲၤတ့ၢ်လီၤမ့ၣ်ပိၢ် ကမျၢၢ်ပိၥ်ခွါသံ(၁)ဂၤဒီးအမါဘၣ်ဒိနးနးကလဲၥ်
လါယူၤ ၁၈ သီ, ၂၀၂၆ နံၣ်, ခ့ၣ်အဲးစံၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်အပူၤ ဖဲတနံၤအံၤမုၢ်ထူၣ်အဆၢကတီၢ်န့ၣ် တၢ်ဒုးကဲထီၣ် တအိၣ် ကဘီယူၤလဲၤတ့ၢ်လီၤမ့ၣ်ပိၢ်လၢဆီသုးခံကရူၢ်ပူၤအဃိ ကမျၢၢ်ပိၥ်ခွါသံဝဲ(၁)ဂၤဒီးအမါစ့ၢ်ကီးဘၣ်ဒိဘၣ်ထံးထံးနးနး ကျံၤကျံၤ အဂ့ၢ်န့ၣ် သ့ၣ်ညါဘၣ်န့ၣ်လီၤ. ဖဲတနံၤအံၤလါယူၤ ၁၈ သီ မုၢ်ထူၣ် ၁၂း၃၀ မံးနံးအဆၢကတီၢ်န့ၣ် သုးမီၤစိရိၤ(jet fighter)ကဘီယူၤ လဲၤတ့ၢ်လီၤဝဲပီၣ် (၅၀၀)မ့ၣ်ပိၢ် ၁ ဖျၢၣ် လီၤတဲၥ်ပိၢ်ဖးထီၣ်ဝဲလိၤလိၤလၢဆီသုးခံ(ကျောက်ဖျာ)ကရူၢ် သဝီသီခိၣ်ထိး ကျးဆါတၢ်တဖျၢၣ် အဖီခိၣ်န့ၣ်လီၤ. ခီဖျိလၢကဘီယူၤအံၤအဃိ ကျးဆါတၢ်တၢ်သူၣ်ထီၣ်အူအီၣ်ဝဲလီၤကရဲဒီတဖျၢၣ်တၢ်ဖိတၢ်လံၤတအိၣ်တ့ၢ်နီတမံၤလၢၤဘၣ်ဒီး လၢန့ၣ်အမဲၥ်ညါ ကျးကစၢ်လၢအမ့ၢ် စီၤကၠီၤတ့ၣ်(၃၈)နံၣ် အံၤ အခိၣ်သၣ်ဃံလီၤမၢ်ကွံၥ်ဝဲတခီ သံဝဲဖဲတၢ်ကဲထီၣ်သးတဘျီဃီ ဖဲန့ၣ် တကးဒံးဘၣ် အမါနီၢ်လူၣ်လူၣ်ဖီအံၤစ့ၢ်ကီး ဘၣ်ဒိဘၣ်ထံးတၢ်ဘၣ်ယိၣ်အိၣ်ဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ. ပယီၤသုးကဘီယူၤအတၢ်ဟဲခးလီၤတၢ်လၢသဝီသီပူၤဘျီဝဲအံၤ မ့ဘၣ်ကွၢ်က့ၤလၢဟီၣ်ခိၣ်မဲၥ်ဖံးခိၣ်အခိၣ်အဃၢၤဖဲန့ၣ် တၢ်ဒုးကဲထီၣ် တအိၣ်ဝဲဘၣ်အဃိ တၢ်ဟဲတ့ၢ်လီၤမ့ၣ်ပိၢ်အံၤအိၣ်ဝဲဒီးတၢ်ပညိၣ်လိၤလိၤအဂ့ၢ်န့ၣ် လီၢ်ကဝီၤပှၤဘၣ်မူ ဘၣ်ဒါ စံးဝဲန့ၣ်လီၤ. ဒ်န့ၣ်အသိးလၢကဘီယူၤအတၢ်ဟဲခးလီၤတၢ်ကမျၢၢ်သံဘၣ်ဒိဘၣ်ထံး,တၢ်အူအီၣ်ဟးဂီၤကဲထီၣ်ဒိၣ်ဒိၣ်မုၢ်မုၢ်ဒ်အံၤအဖီခိၣ် သဝီသီဃုၥ်ဒီးသဝီဖိကမျၢၢ်လၢအအိၣ်ဘူးဖဲန့ၣ်တဖၣ်ပျံၤတၢ်ဖုးတၢ်ဒီးတနီၤန့ၣ်ဟးစံၣ်မံဝဲလၢတၢ်ဘံၣ်တၢ်ဘၢအလီၢ်အိၣ်ဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ. ကၠဲးထိၣ်ကီၢ်ဆၣ်ဟီၣ်ကဝီၤအပူၤ တမ့ၢ်ထဲတၢ်တဘျီအံၤဘၣ် အပူၤကွံၥ်ဘၣ်ဃးကဘီယူၤဟဲခးလီၤတၢ် ကမျၢၢ်သံဘၣ်ဒိ ဘၣ်ထံးဒိၣ်ဒိၣ်မုၢ်ဒ်အံၤ ကဲထီၣ်အိၣ်ဝဲတလီၢ်လီၢ်ဒီး အဘူးကတၢၢ်ဖဲတလါအံၤလါယူၤထီၣ် ၅...
ပယီၤသုးအတၢ်ဟူးတၢ်ဂဲၤ မုၢ်တြီၢ်ကီၢ်ရ့ၣ် ကၠိ(၁၅)ဖျၢၣ်တၢ်အိးထီၣ်တဘူၣ်ဒီး သဝီ(၁၃)ဖျၢၣ်ကမျၢၢ်ဘၣ်ဃ့ၢ်ထီၣ်ဝဲ
လါယူၤ ၁၈ သီ, ၂၀၂၆ နံၣ်, ခ့ၣ်အဲးစံၣ် စးထီၣ်ဖဲအပူၤကွံၥ်လါမ့ၤထီၣ်အဆိကတၢၢ်တနွံအခါန့ၣ် ပယီၤသုးကျိၤဟဲထီၣ်ဝဲလၢခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅) ဘုသိၣ်ကီၢ်ဆၣ်ဒီးဒွဲၣ်လိကီၢ်ဆၣ်ပူၤအဃိ တကီၢ်ခါခဲအံၤတၢ်ဆၢကတီၢ်တုၤဃီၤဝဲလၢကၠိက့ၤအိးထီၣ်ကဒါလံဘၣ်ဆၣ် ဟီၣ်ကဝီၤဖဲ န့ၣ်အပူၤ ကၠိ(၁၅)ဖျၢၣ်တၢ်အိးထီၣ်တဘူၣ်ဒံးဘၣ်အဂ့ၢ်န့ၣ် သ့ၣ်ညါဘၣ်လၢပှၤဘၣ်မူဘၣ်ဒါအအိၣ်န့ၣ်လီၤ. အဃိကၠိလၢတၢ်အိးထီၣ်ဝဲတဘူၣ်ဒံးဘၣ်သ့ၣ်တဖၣ်န့ၣ်မ့ၢ်ဝဲ လ့ဖိထၣ်ကရူၢ်ဒီးမဲၤပ့းကရူၢ်ပူၤ မဲးကၠံၣ်ခံကၠိ, မီလိၥ်ကျိ, နဲၤကး, ဝၣ်သိထၣ်,တရီပူၤ,ဝၣ်သိခိၣ်,မိၣ်လိၣ်ပၢ်,နိၤဃဲထၣ်,ဘီကၠိၣ်ထၣ်,လၢၢ်ကွဲဖိ,လၢၢ်ကွဲဒိၣ်,ပိၤကၠံၤ,မဲကလါ,သ့ၣ်ခိၣ်ကျါဒီးတဃီၤခိၣ်ကၠိသ့ၣ်တဖၣ်အံၤန့ၣ်လီၤ. ကၠိဘၣ်ထီၣ်အဆၢကတီၢ်ခီဖျိလၢကၠိအိးထီၣ်တသ့ဘၣ်အဖီခိၣ် ဘၣ်ဒိဘၣ်ထံးဝဲဖိဒံဖိသၣ်,ပှၤကၠိဖိအတၢ်ကူၣ်ဘၣ်ကူၣ်သ့ အမဲၥ်ညါ ခဲအံၤဆၢကတီၢ်ဘၣ်ဝဲလၢပှၤကဘၣ်စးထီၣ်ကဒါက့ၤတၢ်ဖံးတၢ်မၤဘၣ်ဆၣ် ကမျၢၢ်တဖၣ်က့ၤလီၤကဒါတၢ်ဖံး တၢ်မၤတသ့ဘၣ် အဂ့ၢ်န့ၣ် (သုးက့ ၅)ပှၤကတိၤတၢ်ပၢ ပဒိၣ်စီၤထိၣ်ရီဘ့ၤ စံးဝဲန့ၣ်လီၤ. “ခီဖျိလၢပယီၤသုးကျိၤဟဲထီၣ်ဟူးဂဲၤခးဝ့ၢ်ဝီၤကျိဒိၣ်,တ့ၢ်လိၤဒြိ,ဒွၣ်အူသဝီအဖီခိၣ်န့ၣ် ကမျၢၢ်ဘၣ်စံၣ်ဘၣ်ဃ့ၢ်မ့ဝံၤ ခဲအံၤ တၢ်ဆၢကတီၢ်ဘၣ်လံ ကၠိလၢထီၣ်တသ့ဘၣ်န့ၣ်အိၣ်(၁၅)ဖျၢၣ်ညါ. အဃိန့ၣ်ဘၣ်ဒိဘၣ်ထံးဝဲဘၣ်ဖိသၣ်အတၢ်ကူၣ်ဘၣ် ကူၣ်သ့ ဖးဒိၣ်လီၤ. အဂၤတခါန့ၣ်ခဲအံၤဒူသဖိသဝီဖိတဖၣ်န့ၣ်ဆၢကတီၢ်ခဲအံၤအကဘၣ်သူၣ်တၢ်ဖျးဘၣ်ဖံး တၢ်မၤတၢ်မီၤ. သနါက့အဝဲသ့ၣ်ဘၣ်ပၥ်တ့ၢ်အဟံၣ်အဃီဘၣ်ကဲထီၣ်က့ၤပှၤဃ့ၢ်မှံဟးဖျိး ဒ်သိးပသ့ၣ်ညါဘၣ်န့ၣ်သဝီလၢအဘၣ်ဃ့ၢ်ထီၣ် အိၣ်ဝဲ(၁၃)ဖျၢၣ်”အဂ့ၢ်န့ၣ် စံးဝဲန့ၣ် လီၤ. ဒ်ကီၢ်ရ့ၣ်တၢ်မၤနီၣ်စရီပူၤအိၣ်ဝဲအသိးန့ၣ် ပယီၤသုးအတၢ်ဟဲထီၣ်ဘျီဝဲအံၤအပူၤန့ၣ် ဒွဲၣ်လိဒီးဘုသိၣ်ကီၢ်ဆၣ်အပူၤ ဒူသဝီ (၁၃)ဖျၢၣ် လၢအဘၣ်ဃ့ၢ်ထီၣ်သ့ၣ်တဖၣ် န့ၣ်မ့ၢ်ဝဲ ဘီကၠိၣ်ထၣ်,နိးဃဲထၣ်,မိၣ်လိၣ်ပၢ်,မီလိၥ်ကျိ,နဲၤကး,မဲးကၠံၣ်ခံ,တရီပူၤ, လၢၢ်ကွဲဖိ, လၢၢ်ကွဲဒိၣ်,ပိၤကၠံၤ,မဲကလါ,တဃီၤခိၣ်ဒီးဝၣ်သိခိၣ်သဝီ ပှၤနီၣ်ဂံၢ်လၢအကလးဘၣ်ဃ့ၢ်ထီၣ်ဝဲတုၤလၢခဲအံၤန့ၣ်လီၤ. တကးဒံးဘၣ်လၢပယီၤသုးအတၢ်ဟဲထီၣ်ဟူးဂဲၤတလါဘျဲၣ်အတီၢ်အပူၤအံၤစ့ၢ်ကီး ခီဖျိအဝဲသ့ၣ်တၢ်ဟူးတၢ်ဂဲၤဒ်အမ့ၢ် ကျိဖးဒိၣ်, ဒြိ, ကဘီယူၤဒီး...
ကဘီယူၤလဲၤတ့ၢ်လီၤမ့ၣ်ပိၢ်လၢဝီၢ်ရ့ၣ် ယပၣ်တၢ်ဆီၣ်ထွဲပှၤလီၢ်အိၣ်ကမှံဒဲကဝီၤပူၤအဃိ ဟံၣ်ဟးဂီၤ(၄)ဖျၢၣ်
လါယူၤ ၁၈ သီ, ၂၀၂၆ နံၣ်, ခ့ၣ်အဲးစံၣ် လၢတလၢၤကီၢ်စဲၣ် ဝီၢ်ရ့ၣ်ဟီၣ်ကဝီၤ မိၣ်ကီၢ်သီပၣ်တံၣ်တၢ်ပၢဟီၣ်ကဝီၤအပူၤ ကမျၢၢ်ပှၤလီၢ် အိၣ်ကမှံဖိဒဲကဝီၤတၢ်လီၢ်တခါ လၢအဘၣ်တၢ်တ့ထီၣ်အီၤလၢယပၣ်ထံကီၢ်ပဒိၣ်စ့ပၥ်ကီၤအတၢ်ဆီၣ်ထွဲမၤစၢၤအံၤ ဖဲတဂီၤအံၤဂီၤခီဂီၤဂီၤအဆၢကတီၢ်န့ၣ် ပယီၤသုးကဘီယူၤလဲၤတ့ၢ်လီၤဝဲမ့ၣ်ပိၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ. ဖဲတနံၤအံၤလါယူၤ ၁၈ သီ ဂီၤခီဂီၤဂီၤ ၁း၀၀ ဃၣ်ဃၣ်အဆၢကတီၢ် ပှၤလီၢ်အိၣ်ကမှံဖိလီၢ်လၢအိၣ်ဖဲခၠီနခွၣ်သဝီအံၤ ကဘီယူၤပညိၣ်လဲၤတ့ၢ်လီၤဝဲမ့ၣ်ပိၢ်(၂)ဖျၢၣ်န့ၣ်လီၤ. လၢတၢ်လဲၤတ့ၢ်လီၤမ့ၣ်ပိၢ်ဘျီဝဲအံၤန့ၣ် တၢ်သံတၢ်ဘၣ်ဒိ ဘၣ်ထံးမ့ တအိၣ်ဘၣ် ဘၣ်ဆၣ်ဟံၣ်ခိၣ်အဖျၢၣ်(၇၀)ဘျဲၣ်အကျါ ဟံၣ်ဟးဂီၤဝဲ(၄)ဖျၢၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ. ဘၣ်ဃးတၢ်ဂ့ၢ်ကဲထီၣ်သးအံၤ တၢ်ပၢၢ်ဆၢကရူၢ်အပှၤလၢအိၣ်ဘူးဖဲန့ၣ်တဂၤစံးဝဲလၢ“အဟဲခးလီၤတၢ်တဘျီအံၤလၢ ယပၣ် ဟံၣ်(၇၅)ဖျၢၣ် ပှၤဘၣ်ကီဘၣ်ခဲဒဲကဝီၤတၢ်လီၢ်. တၢ်လီၢ်န့ၣ်အကဲဝဲတလၢၤတၢ်လီၢ်. ပနၢ်ဟူလၢဟံၣ်န့ၣ်ဟးဂီၤ(၄)ဖျၢၣ်. ”အဂ့ၢ် န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ဟီၣ်ကဝီၤဖဲန့ၣ်အပူၤ ဘၣ်ဃးသုးမီၤစိရိၤအကဘီယူၤတၢ်လီၤဘၣ်ယိၣ်အံၤလၢကမျၢၢ်အဂီၢ်တနံၤဘၣ်တနံၤတၢ်ဘၣ်ယိၣ်ဟဲ အိၣ်အါထီၣ်ထီၣ်ဝဲဒီးအပူၤကွံၥ်လါမ့ၤ ၂၇ သီအခါန့ၣ်စ့ၢ်ကီး ပယီၤသုးလဲၤတ့ၢ်လီၤမ့ၣ်ပိၢ်လၢ(ရေးဘီလူး)ဖီၣ်စုကဝဲၤကရူၢ် အသုးကလၢၤ တၢ်လီၢ်အဃိ ဖဲန့ၣ်သုးကရူၢ်အပှၤသံတစှၤန့ၢ်အဂၤ(၁၀)ကဲထီၣ်ဒံးဝဲအသိး အပူၤကွံၥ်လါယူၤ ၃ သီ လၢမိၣ်ကီၢ်သီပၣ်တံၣ် ဟီၣ်ကဝီၤအပူၤ ကဘီယူၤလဲၤတ့ၢ်လီၤမ့ၣ်ပိၢ်အဃိ ကမျၢၢ်သံကဒီးဝဲ(၁)ဂၤဒံးန့ၣ်လီၤ. သုးမီၤစိရိၤအံၤ ဒုးယၤတၢ်သဘံၣ်သဘုၣ်ကဲထီၣ်တအိၣ် ပညိၣ်လဲၤခးလီၤတၢ်တလီၢ်လီၢ်လၢ ကမျၢၢ်ဒူသဝီတကးဒံးဘၣ် လၢၤဃုၥ်ဒီးပှၤလီၢ်အိၣ်ကမှံဒဲကဝီၤလီၢ်အဃိ လီၢ်ကဝီၤကမျၢၢ်တဖၣ်အိၣ်ဒီးပျံၤတၢ်ဖုးတၢ်ဘၣ်ယိၣ်ဘၣ်ဘှီ တၢ် ဟဲအါထီၣ်...
တၢ်ထံၣ်လိၥ်သးဒီးမ့အီၣ်လဲၣ်န့ၣ်မ့ၢ်တၢ်သုးထီထီၣ်သုးကရူၢ်ဖိးသဲစးအပတီၢ်အဂ့ၢ်,(JFM)စံးဝဲ
လါယူၤ ၁၇သီ, ၂၀၂၆နံၣ်, ခ့ၣ်အဲးစံၣ်, တရူးကီၢ်ခိၣ်(ရှံၤကၠ့ၤဖ့ၤ)အတၢ်ခီၣ်ထံၣ်လိၥ်သးဒီးပှၤမၤကမၣ်ကွီၢ်မ့ၣ်သဲစးသုးကရူၢ်အခိၣ်မ့အီၣ်လဲၣ်အံၤမ့ၢ်ဝဲတၢ်သုးထီထီၣ်တဖိးသဲစးသုးကရူၢ်တဖၣ်အတၢ်ဖံးတၢ်မၤဆူအဖိးသဲစးပတီၢ်အဂ့ၢ်,(Justice For Myanmar JFM )ပၥ်ဖျါထီၣ်ဝဲဒၣ်ဖဲမဟါလါယူၤ(၁၆)သီအနံၤန့ၣ်လီၤ. သုးကရူၢ်အခိၣ်မ့အီၣ်လဲၣ်အံၤအပူၤကွံၥ်လါယူၤ(၁၆)သီအနံၤအပူၤထံၣ်လိၥ်တ့ၢ်ဝဲအသးဒီးတရူးကီၢ်ခိၣ်(ရှံၤကၠ့ၤဖ့ၤ)လၢပ့ၤကၠ့ဝ့ၢ်ဒီးတရူးကီၢ်ခိၣ်(ရှံၤကၠ့ၤဖ့ၤ)အတၢ်ခီၣ်ထံၣ်တူၢ်လိၥ်ခီၣ်ဆၢဝဲအီၤအဖီခိၣ်,ပှၤလၢတူၢ်လိၥ်ခီၣ်ဆၢအီၤတရူးကီၢ်ခိၣ်အံၤမ့ၢ်ဝဲပှၤလၢအသုးထီထီၣ်ဝဲသုးကရူၢ်လၢတၢ်ကပၥ်ပနီၣ်အီၤဆူထံဂုၤကီၢ်ဂၤပတီၢ်ဒီးမ့ၢ်ဝဲပှၤလၢအဟ့ၣ်ဂံၢ်ဟ့ၣ်ဘါဝဲတၢ်မၤကမၣ်ကွီၢ်မ့ၣ်သဲစးလီၤအဂ့ၢ်(JFM)ပဲၥ်ထံနီၤဖးပၥ်ဖျါဝဲဒၣ်န့ၣ်လီၤ. လၢန့ၣ်အမဲၥ်ညါ,သုးကရူၢ်အခိၣ်မ့အီၣ်လဲၤအတၢ်လဲၤထံၣ်လိၥ်သးဒီးတရူးဘျီဝဲအံၤဒိးန့ၢ်ဘၣ်ဝဲသုးစုကဝဲၤဒီးမုၢ်ကျိၤဝဲၤကွၥ်ဘၣ်ထွဲအတၢ်သးလီၤပလိၥ်သးလၢအသီတဖၣ်ဒီးဒိးန့ၢ်ဘၣ်စ့ၢ်ကီးဝဲတၢ်တၢၣ်ပီၣ်တဲသကိးခွဲးယၥ်တဖၣ်အဖီခိၣ်,တရူးပဒိၣ်ဒီးအခီပနံၣ်သ့ၣ်တဖၣ်အံၤဟံးန့ၢ်ဝဲတၢ်အဘျူးအဖှိၣ်လၢကီၢ်ပယီၤထံဖိကီၢ်ဖိကမျၢၢ်တဖၣ်အသးသမူဒီးသွံၣ်ထံတဆီအဂ့ၢ်,(JFM)စံးဝဲန့ၣ်လီၤ. လၢတၢ်န့ၣ်အဃိ,ကီၢ်ပယီၤပှၤမၤကမၣ်ကွီၢ်မ့ၣ်သုးကရူၢ်ဒီးတရူးပဒိၣ်,ခီပနံၣ်အပှၤမၤသကိးတၢ်တဖၣ်အတၢ်ပၣ်ဃုၥ်ပၣ်ဂီၢ်အဖီခိၣ်,(JFM)ထီဒါတြီဆၢဝဲဒၣ်အဂ့ၢ်ပၥ်ဖျါဝဲဒၣ်န့ၣ်လီၤ. တရူးထံကီၢ်အံၤမ့ၢ်ဝဲထံကီၢ်တဘ့ၣ်လၢလီၤဆီဒၣ်တၢ်ဟ့ၣ်ဝဲကီၢ်ပယီၤသုးကရူၢ်လၢတၢ်ဆါလီၤန့ၢ်စုကဝဲၤပီးလီသ့ၣ်တဖၣ်ဒီးမ့ၢ်စ့ၢ်ကီးဝဲထံကီၢ်တဘ့ၣ်လၢအပှ့ၤဝဲကီၢ်ပယီၤန့ဆၢၣ်ဂၥ်သဝံအမဲၥ်ညါအတၢ်ဝံစိၥ်တီဆှၢသိဃီၤဃၤ(pipelines)တၢ်ဖံးတၢ်မၤတဖၣ်အိၣ်ဝဲအဃိခံခီခံကပၤတၢ်ဘၣ်ဘျူးဘၣ်ဖှိၣ်အိၣ်ဝဲအါမံၤအဂ့ၢ်,(JFM)ပၥ်ဖျါဝဲဒၣ်န့ၣ်လီၤ. တကတီၢ်ဃီ,ပယီၤသုးကရူၢ်အတၢ်ထီၣ်ဒုးလၢကမျၢၢ်တဖၣ်အဖီခိၣ်အပူၤစုကဝဲၤပီးလီဒီးစဲးဖီကဟၣ်လၢသူဝဲသ့ၣ်တဖၣ်အံၤအါတက့ၢ်အိၣ်ဟဲဝဲဒၣ်လၢတရူးထံကီၢ်ဒီးလီၤဆီဒၣ်တၢ်တရူးခီပနံၣ်လၢအမ့ၢ်ဝဲ(Aviation Industry Corporation of China (AVIC))ဒီး(Sinotruk)အံၤဆီၣ်ထွဲဝဲသုးကရူၢ်လၢကဘီယူၤဒီးသိလ့ၣ်တဖၣ်အဂ့ၢ်,သ့ၣ်ညါဘၣ်ဒ်(JFM)ပၥ်ဖျါဝဲဒၣ်အသိးန့ၣ်လီၤ. ခီဖျိတရူးတၢ်ဆီၣ်ထွဲမၤစၢၤအဃိသုးကရူၢ်အံၤမၤဝဲတၢ်မၤလီၤတူၥ်ပှၤကူပှၤကညီ,မၤကမၣ်ကွီၢ်မ့ၣ်သဲစးဒီးတၢ်မၤအၢမၤသီလၢကီၢ်ပယီၤကမျၢၢ်သ့ၣ်တဖၣ်အဖီခိၣ်အိၣ်ဝဲအဃိကဘၣ်အိၣ်ဒီးတၢ်ဟံးမူဟံးဒါအဂ့ၢ်(JFM)ဃ့ထီၣ်ဝဲဒၣ်န့ၣ်လီၤ. ဒ်န့ၣ်အသိး,တရူးထံကီၢ်ပဒိၣ်တဖၣ်စ့ၢ်ကီးကဘၣ်ပၥ်ပတုၥ်ဝဲတၢ်ဆီၣ်ထွဲမၤစၢၤကီၢ်ပယီၤမီၤစိရိသုးကရူၢ်လၢမၤကမၣ်ကွီၢ်မ့ၣ်အံၤဖဲတကီၢ်ခါခဲအံၤအပူၤလီၤအဂ့ၢ်(JFM)ဃ့ထီၣ်စ့ၢ်ကီးဝဲဒၣ်န့ၣ်လီၤ.
ပယီၤသုးဖီၣ်ဃၥ်(သုးက့ ၅)ကမျၢၢ်ဃုၥ်ဒီးဖိဒံဖိသၣ်(၃၂)ဂၤ,တၢ်ဆၢကတီၢ်န့ၢ်(၂)နွံဘျဲၣ်လံဘၣ်ဆၣ်တပျၢ်လီၤဒံးဝဲ
လါယူၤ ၁၇ သီ, ၂၀၂၆ နံၣ်, ခ့ၣ်အဲးစံၣ် ပယီၤသုးကျိၤလၢအဟဲထီၣ်ဆူခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဟီၣ်ကဝီၤအပူၤအံၤတဖၣ် ဖဲအဝဲသ့ၣ်ဟဲထီၣ်လၢကျဲအခါ ဖီၣ်ဝဲဒၣ်ဘီကၠိၣ်ထၣ်သဝီဖိသူၣ်က့သးပှၢ်ဃုၥ်ဒီးဖိသၣ်လၢအသးနံၣ်တပှဲၤဒံးဘၣ်ခဲလၢၥ် (၃၂)ဂၤ ဒီး ဖီၣ်ဃၥ်ဝဲတၢ်ဆၢကတီၢ်အိၣ်(၂)နွံဘျဲၣ်လံဘၣ်ဆၣ်တုၤလၢခဲအံၤတပျၢ်လီၤဝဲဒံးဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ. လၢကလဲၤထီၣ်မၤအါထီၣ်အဂံၢ်ဘါဆူဖၣ်ပူၣ်အံၤအဂီၢ်ဖဲအပူၤကွံၥ်လါမ့ၤ ၃၀ သီအခါ ခီဖျိပယီၤသုးကျိၤဟဲထီၣ်အဃိ ဘီကၠိၣ်ထၣ်သဝီလၢအိၣ်ကမၤမိၢ်- ကတၢတံၥ်ကျဲဘၢၣ်စၢၤအံၤကမျၢၢ်တဖၣ်ဃ့ၢ်ထီၣ်ဝဲခဲလၢၥ်ဘၣ်ဆၣ် ပယီၤသုးအံၤဖီၣ်န့ၢ်ဝဲ သဝီဖိစှၤကိၥ်ဂၤန့ၣ်လီၤ. ဖဲန့ၣ်ဝံၤဘီကၠိၣ်ထၣ်သဝီဖိစှၤကိၥ်ဂၤလၢပယီၤသုးဖီၣ်ဝဲတဖၣ်အံၤ ပယီၤသုးမၢအဝဲသ့ၣ်က့ၤကိၥ်ကဒါက့ၤအသဝီဖိလၢ အဃ့ၢ်ထီၣ်တဖၣ်အံၤဒီး ဖဲသဝီဟဲက့ၤကဒါဝဲအခါန့ၣ်တၢ်ဖီၣ်တ့ၢ်ဃၥ်ဝဲပှၤသ့ၣ်တဖၣ်အံၤတဘျီဃီဒီး တုၤလၢခဲအံၤတၢ် တပျဲဟးထီၣ်ဝဲလၢတၢ်ချၢဘၣ် တၢ်ဖီၣ်ဃၥ်အီၤအဖၢမုၢ်အဂ့ၢ်န့ၣ် (သုးက့ ၅)ပှၤကတိၤတၢ်ပၢ ပဒိၣ်စီၤထိၣ်ရီဘ့ၤ စံးဝဲန့ၣ်လီၤ. “အခီၣ်ထံးန့ၣ်ပှၤသဝီဖိန့ၣ်အစံၣ်ထီၣ်ဘၣ်ဆၣ်ပယီၤသုးချုန့ၢ်ဝဲအိၣ်တဂၤခံဂၤ.မ့ဝံၤပျၢ်လီၤဝဲဒၣ်ပှၤသဝီဖိတဖၣ်အံၤမၢအတၢ်လဲၤ လူၤကိးက့ၤအသဝီဖိလၢအဂၤတဖၣ်န့ၣ်.ပှၤတဖၣ်န့ၣ်ပှၤလဲၤအီၤဘျီအဟဲက့ၤဝံၤပှၤကိးဃၥ်အီၤတပျဲဟးဝဲလၢၤဘၣ်.ခဲအံၤအိၣ် လၢသဝီပူၤလီၤ.ခဲလၢၥ်န့ၣ်(၃၂)ဂၤ ခဲအံၤအိၣ်ဝဲလၢဒုၣ်ဒါအစုပူၤလီၤ.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. သဝီဖိလၢပယီၤသုးဖီၣ်ဃၥ်ဝဲ(၃၂)ဂၤန့ၣ်မ့ၢ်ဝဲ ပိၥ်ခွါ(၁၈)ဂၤ,ပိၥ်မုၣ်(၁၄)ဂၤ ပၥ်ဖှိၣ်ခဲလၢၥ်(၃၂)ဂၤ ဒီးပှၤသ့ၣ်တဖၣ်အံၤ အကျါ ဖိသၣ်(၉-၁၇) နံၣ်အဘၢၣ်စၢၤန့ၣ်ပၣ်ဃုၥ်ဝဲ(၅)ဂၤအသိး ပှၤသးပှၢ်အနံၣ်(၆၀-၈၀)ဘၢၣ်စၢၤန့ၣ်ပၣ်ဝဲ(၇)ဂၤန့ၣ်လီၤ. လၢတၢ်န့ၣ် အဃိတကီၢ်ခါ ခဲအံၤ လီၢ်ကဝီၤခ့ၣ်အဲၣ်ယူၣ်ပှၤဘၣ်မူဘၣ်ဒါဃုၥ်ဒီးဟံၣ်ဖိဃီဖိလၢအဃ့ၢ်ဖျဲးထီၣ်သ့ၣ်တဖၣ် ဘၣ်ယိၣ် ဘၣ်ဘှီ, သူၣ်ကိၢ်သးဂီၤတၢ်လၢပှၤသ့ၣ်တဖၣ်အံၤအဂီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ. တကီၢ်ခါခဲအံၤပယီၤသုးကျိၤအဂၤ(၂၀၀၀)ဃၣ်ဃၣ်လၢအဟဲထီၣ်တဖၣ်အံၤလဲၤထီၣ်တုၤဝဲလၢကတၢတံၥ်တနီၤလံဘၣ်ဆၣ် တနီၤန့ၣ်တလဲၤထီၣ်ဆူညါ နီၤဖးလီၤအသးအိၣ်ဆီလီၤသးလၢဘီကၠိၣ်ထၣ်သဝီဃုၥ်ဒီးဒူသဝီတၢ်လီၢ်လၢအဂၤလၢအံၤ တဒူၣ်, လၢန့ၣ်တဒူၣ်အဂ့ၢ်န့ၣ် (သုးက့ ၅)ပှၤဘၣ်မူဘၣ်ဒါစံးဝဲန့ၣ်လီၤ. လၢန့ၣ်အမဲၥ်ညါပယီၤသုးလၢအအိၣ်တ့ၢ်လၢတၢ်လီၢ်ခံသ့ၣ်တဖၣ်အံၤဒီးဟီၣ်ကဝီၤတၢ်ပၢၢ်ဆၢသုးပၥ်ဖှိၣ်ကရူၢ်အဘၢၣ်စၢၤတၢ်ဒုးကဲထီၣ်ဝဲအိၣ် တလီၢ်လီၢ်ဒီး ဖဲန့ၣ်ပယီၤသုးကပၤစ့ၢ်ကီးတၢ်သံတၢ်ဘၣ်ဒိဘၣ်ထံးအိၣ်ဝဲအါမးအဂ့ၢ်န့ၣ်...
ကဘီယူၤတၢ်ဘၣ်ယိၣ်အဃိ ဃိၣ်သၢဖျၢၣ်လီၢ်ကဝီၤဖိတနီၤဃ့ၢ်ထီၣ်မံလၢကၠီၣ်တဲၣ်ပူၤ
လါယူၤ ၁၆သီ, ၂၀၂၆နံၣ်, ခ့ၣ်အဲးစံၣ်, ပနံၥ်တၢ်ကၤတၢ်လဲၤတရံးသးအါကီၢ်ကၠီၣ်တဲၣ်ကီၢ်ပယီၤကီၢ်ဆၢဃိၣ်သၢဖျၢၣ်ဝ့ၢ်အံၤသုးကရူၢ်တကပၤဂုၥ်ကျဲးစၢးဝဲလၢကပၢြပးက့ၤဝဲအိၣ်ထီၣ်ဝဲအဖီခိၣ်,လီၢ်ကဝီၤဖိတနီၤပျံၤဒီးဘၣ်ယိၣ်ဝဲကဘီယူၤတၢ်ထီၣ်ဒုးအဃိဃ့ၢ်ထီၣ်မံဝဲလၢကၠီၣ်တဲၣ်တကပၤအိၣ်ဝဲအဂ့ၢ်,သ့ၣ်ညါဘၣ်လၢဝ့ၢ်လီၢ်ကဝီၤဖိတဖၣ်အအိၣ်န့ၣ်လီၤ. သုးကရူၢ်အံၤအဲၣ်ဒိးပၢြပးက့ၤဝဲဃိၣ်သၢဖျၢၣ်ဝ့ၢ်အဃိ,လၢတၢ်ကဟ့ၣ်က့ၤဝဲအဂီၢ်တကီၢ်ခါခဲအံၤဃ့ထီၣ်ဝဲပှၤဟံးန့ၢ်ဝ့ၢ်တၢ်ဘံၣ်တၢ်ဘၢဒီးတၢ်ပၢတၢ်ြပး(ဒံၣ်မိၣ်ကရ့ၣ်စံၣ်တၢ်ဘၣ်ဘျူးကညီသုးမုၢ်ဒိၣ်)ဒံၣ်ခ့ၣ်ဘံၣ်အ့ၣ်ကရူၢ်ကရၢအိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ. ဒီးသုးကရူၢ်အံၤလၢကဟံးန့ၢ်ပၢြပးက့ၤဝဲဃိၣ်သၢဖျၢၣ်ဝ့ၢ်အဂီၢ်သူဝဲကျဲတတီတလိၤဒီးမၤဝဲတၢ်ထီၣ်ဒုးသ့ဝဲအဃိ,ကမျၢၢ်လီၢ်ကဝီၤဖိလၢပျံၤဒီးဘၣ်ယိၣ်ကဘီယူၤတၢ်ထီၣ်ဒုးတနီၤမုၢ်နၤခီအဆၢကတီၢ်ဃ့ၢ်ထီၣ်မံဝဲဒၣ်လၢကၠီၣ်တဲၣ်တကပၤအိၣ်ဝဲအဂ့ၢ်,ဝ့ၢ်လီၢ်ကဝီၤကမျၢၢ်တဂၤစံးဝဲဒ်အံၤန့ၣ်လီၤ. အဝဲစံးဝဲလၢ(ပှၤပျံၤကဘီယူၤအဃိတနီၤလဲၤမံလၢကၠီၣ်တဲတကပၤအိၣ်န့ၣ်လီၤ.သုးကရူၢ်အံၤကဒိးန့ၢ်ဘၣ်က့ၤဝ့ၢ်အဂီၢ်မၤတၢ်ဘူၣ်ခဲလၢၥ်အဃိတကဲထီၣ်အသးဘၣ်ပတဲတသ့ဘၣ်အဂ့ၢ်)စံးဝဲန့ၣ်လီၤ. တၢ်ကဟ့ၣ်လီၤက့ၤဝဲဃိၣ်သၢဖျၢၣ်ဝ့ၢ်တၢ်ပၢတၢ်ြပးအဂီၢ်,ပယီၤသုးကရူၢ်အံၤလဲၤထံၣ်လိၥ်တ့ၢ်ဝဲဒံၣ်မိၣ်ကရ့ၣ်စံၣ်တၢ်ဘၣ်ဘျူးကညီသုးမုၢ်ဒိၣ်(ဒံၣ်ခ့ၣ်ဘံၣ်အ့ၣ်)အိၣ်ဝဲအဂ့ၢ်,ဃိၣ်သၢဖျၢၣ်ဝ့ၢ်ပှၤလၢဘူးဒီးဒံၣ်ခ့ၣ်ဘံၣ်အ့ၣ်တဖၣ်စံးဝဲဒၣ်န့ၣ်လီၤ. ဘၣ်ဆၣ်,ဘၣ်ဃးဒီးသုးကရူၢ်အတၢ်ဃ့ထီၣ်ဝဲတၢ်ပၢြပးက့ၤဝ့ၢ်အံၤခ့ၣ်အဲၣ်စံၣ်ကညီတၢ်ကစီၣ်ကျဲးစၢးဆဲးကျိးသံကွၢ်ဝဲဝ့ၢ်တၢ်ပၢတၢ်ြပးပှၤဘၣ်မူဘၣ်ဒါ(ဒံၣ်ခ့ၣ်ဘံၣ်အ့ၣ်)သုးဟီၣ်ကဝီၤနီၢ်ဂံၢ်(၂)ဒုးယၤခိၣ်သုးခိၣ်ဒိၣ်စိစီၤအ့ၣ်ဝါဘၣ်ဆၣ်တဒိးန့ၢ်ဘၣ်တၢ်စံးဆၢဒံးန့ၣ်လီၤ. ဃိၣ်သၢဖျၢၣ်ဝ့ၢ်အံၤတကီၢ်ခါခဲအံၤ(DKBA)ဟံးန့ၢ်ဝဲတၢ်ပၢတၢ်ြပးအသိးလီၢ်ကဝီၤ(KNU)တဖၣ်စ့ၢ်ကီးပၣ်ဃုၥ်မၤသကိးတၢ်လၢတၢ်ပၢၤဃၥ်ဝ့ၢ်ဒီးဝ့ၢ်အံၤအိၣ်ဝဲဒၣ်လၢခ့ၣ်အဲၣ်ယူၣ်တၢ်ပၢဟီၣ်ကဝီၤအပူၤန့ၣ်လီၤ. ဒီးဘၣ်ဃးသုးကရူၢ်အတၢ်ဃ့ထီၣ်ဝဲတၢ်ပၢတၢ်ြပးအဖီခိၣ်,ခ့ၣ်အဲၣ်ယူၣ်လီၢ်ခၢၣ်သးတကပၤတသ့ၣ်ညါထွဲဝဲတၢ်ဂ့ၢ်တၢ်ကျိၤလီၤတံၢ်လီၤဆဲးဘၣ်အသိးတၢ်မ့ဃ့ဝဲဘၣ်ဆၣ်တမ့ၢ်ကန့ၢ်ဘၣ်အဂ့ၢ်,ခ့ၣ်အဲၣ်ယူၣ်ပှၤကတိၤတၢ်ပၢပဒိၣ်စီၤကျၢၤစ့စံးဝဲန့ၣ်လီၤ. (၂၀၂၁)နံၣ်သုးဟံးန့ၢ်တၢ်ကစိကမီၤအလီၢ်ခံ,သုးတၢ်ပၢတၢ်ြပးဟးဂီၤကွံၥ်ဝဲအဃိဃိၣ်သၢဖျၢၣ်ဝ့ၢ်ပူၤဘၣ်ဃးသုးကရူၢ်စုတီၤဖီလၥ်ဝဲၤကျိၤဝဲၤဒ့တၢ်ဖံးတၢ်မၤတဖၣ်အံၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်()ဒီးတၢ်ပၢၢ်ဆၢသုးပၥ်ဖှိၣ်ကရူၢ်ကရၢတဖၣ်ထီၣ်ဒုးမၤန့ၢ်ကွံၥ်ဝဲဒၣ်န့ၣ်လီၤ. သုးကရူၢ်တၢ်ပၢတၢ်ြပးတၢ်ဖံးတၢ်မၤတဖၣ်ဟးဂီၤကွံၥ်ဝဲဒၣ်ဘၣ်ဆၣ်,ဝ့ၢ်ဃၢၤနကါတီၤသုးကလၢၤအံၤပယီၤသုးဆဲးအိၣ်ဆိးဒံးဝဲဒီးသုးကလၢၤအပူၤပယီၤသုးကရူၢ်ကရၢသ့ၣ်တဖၣ်အံၤခီဖျိနုၥ်လီၤဝဲလၢဝ့ၢ်ပူၤဖျိဖျိဖျါဖျါတဘူၣ်ဘၣ်အဃိဖဲနုၥ်လီၤလၢဝ့ၢ်ပူၤအဆၢကတီၢ်ပျိၥ်လဲအသးဒ်မုၢ်ဆ့ၣ်မုၢ်ဂီၤအိၣ်ဝဲအသိး,ဟံးန့ၢ်ဝဲ(DKBA)ကရူၢ်ကရၢတၢ်ကူတၢ်သိးဒီးဟးထီၣ်ဟးလီၤဝဲအိၣ်ဝဲအဂ့ၢ်,ဃိၣ်သၢဖျၢၣ်ဝ့ၢ်လီၢ်ကဝီၤဖိတဖၣ်စံးဝဲန့ၣ်လီၤ.
ဒီၣ်အီၤဆါစူၣ်ကၠံၤ(၈၁)နံၣ်နံၤအိၣ်ဖျဲၣ်ဆၢက့ၤအပူၤ,ထံကီၢ်ဒီတဘ့ၣ်ပတီၢ်တၢ်ကမၤဝဲ(ဖီတၤဆှုၣ်)တၢ်ဟူးတၢ်ဂဲၤအဂီၢ်တၢ်ဆီၣ်တခူဝဲ
လါယူၤ ၁၅သီ, ၂၀၂၆နံၣ်, ခ့ၣ်အဲၣ်စံၣ်, ကီၢ်ပယီၤထံကီၢ်ပှၤဟ့ၣ်ကူၣ်ဟ့ၣ်ဖးတၢ်ဒီၣ်အီၣ်ဆါစူၣ်ကၠံၤ(၈၁)နံၣ်ပှဲၤထီၣ်နံၤအိၣ်ဖျဲၣ်ဆၢက့ၤလၢကလီၤဘၣ်ဝဲဖဲလါလၢကဟဲလါယူၤလံ(၁၉)သီအနံၤအပူၤ,ထံကီၢ်ဒီတဘ့ၣ်ပတီၢ်တၢ်ကမၤဝဲကမျၢၢ်တၢ်ပၥ်ဖျါထီၣ်(ဖီတၤဆှုၣ်)တၢ်ဟူးတၢ်ဂဲၤအဂ့ၢ်,( People Movement Platform Myanmar)ဆီၣ်တခူထီၣ်ဝဲဒၣ်န့ၣ်လီၤ. တၢ်ဆီၣ်တခူအံၤတၢ်ထုးထီၣ်ရၤလီၤဝဲဒၣ်ဖဲလါယူၤ(၁၂)သီအနံၤအပူၤဒီးအိၣ်ဝဲဒီးတၢ်ကိးသတြီတၢ်ဂ့ၢ်ခိၣ်တီလၢအမ့ၢ် (ကဆဲးဂဲၤလိၥ်ဒုးသကိးတၢ်ဒီးမိၢ်စုၣ်)အသိး,ကမၤဝဲဒ်ထံကီၢ်ဒီတဘ့ၣ်ကမျၢၢ်တဖၣ်နုၥ်လီၤပၣ်ဃုၥ်ပၣ်ဂီၢ်ဝဲသ့အသိးအဂ့ၢ်,ပၥ်ဖျါဝဲဒၣ်န့ၣ်လီၤ. တၢ်ဟူးတၢ်ဂဲၤအံၤတၢ်နုၥ်လီၤပၣ်ဃုၥ်ပၣ်ဂီၢ်ဝဲဒ်လီၢ်ကဝီၤကိးတီၤဒဲးတၢ်ဘံၣ်တၢ်ဘၢတၢ်အိၣ်သးအသိးသ့ဝဲဒီးတၢ်သူဝဲဖီတၤဆှုၣ်တဖၣ်(မ့တမ့ၢ်)ဖီလၢအဂၤတဖၣ်လၢတၢ်ပၥ်ထီၣ်လၢဃိၣ်ခိၣ်,တၢ်ဒံးအီၤ,တၢ်ဟ့ၣ်ခီဟ့ၣ်နီၤအီၤ,တၢ်ပၥ်ထီၣ်တၢ်ဂီၤလၢစိၤရှၢၣ်မံးဒံးယၢၣ်အပူၤဒီးလၢဟီၣ်ခိၣ်အမဲၥ်ဖံးခိၣ်တၢ်ဟူးတၢ်ဂဲၤအပူၤတၢ်ဖီၣ်ဃၥ်ဒီးပၥ်ဖျါထီၣ်သးသ့ဝဲအဂ့ၢ်,သ့ၣ်ညါဘၣ်န့ၣ်လီၤ. လၢတၢ်မၤဝဲတၢ်ဟူးတၢ်ဂဲၤအံၤတဆီတၢ်ကပျၢ်လီၤက့ၤဝဲကမျၢၢ်ခိၣ်နၢ်ဒီၣ်အီၣ်ဆါစူၣ်ကၠံၤဃုၥ်ဒီးထံရုၢ်ကီၢ်သဲးပှၤဃိၥ်ဖိခဲလၢၥ်လၢတၢ်မၤတံၥ်တၥ်တအိၣ်ဘၣ်ဒီး,တၢ်ကထုးကွံၥ်ဝဲတၢ်ထၢန့ၢ်ဆူၣ်သုးတၢ်ဘျၢသဲးစးအမဲၥ်ညါကီၢ်ပယီၤကီၢ်ခိၣ်ကမ့ၢ်ဝဲအူဝ့မၠ့ၣ်ဒီးပှၤဟ့ၣ်ကူၣ်ဟ့ၣ်ဖးတၢ်ကဘၣ်မ့ၢ်ဝဲဒီၣ်အီၣ်ဆါစူၣ်ကၠံၣ်အဂီၢ်မ့ၢ်တၢ်ပၥ်ဖျါထီၣ်ဝဲကမျၢၢ်ကလုၢ်အဂ့ၢ်(People Movement Platform Myanmar)စံးဝဲန့ၣ်လီၤ. (People Movement Platform Myanmar)အံၤတၢ်ဒုးအိၣ်ထီၣ်ဝဲလၢ(CRPH Support Group) ကရံၣ်နံၣ်တၢ်ဟ့ၣ်ကူၣ်ဟ့ၣ်ဖးကီၣ်ကး(KSCC)(NUG Support Team Japan၊ Yangon Revolution Force (YRF) တၢ်ပၥ်ဖှိၣ်တၢၣ်ပီၣ်ကမံးတံၥ်(GSCB)ဃုၥ်ဒီးတၢ်ဒီသဒၢကရူၢ်ဒီးကီၢ်ပူၤကီၢ်ချၢဂံၢ်ခီၣ်ထံးတၢ်ပၢၢ်ဆၢသုးကရူၢ်ကရၢပၥ်ဖှိၣ်(၁၈)ဖုအဂ့ၢ်,သ့ၣ်ညါဘၣ်န့ၣ်လီၤ. ဒီၣ်အီၣ်ဆါစူၣ်ကၠံၣ်အံၤ(၂၀၂၁)နံၣ်တၢ်ဟံးန့ၢ်ဆူၣ်ထံကီၢ်တၢ်စိကမီၤအလီၢ်ခံဘၣ်တၢ်ဖီၣ်ဒုးဃၥ်ဝဲအီၤဒီးတုၤလၢခဲအံၤတအိၣ်ဖျါထီၣ်ဒံးဝဲလၢကမျၢၢ်အမဲၥ်ညါဒံးဘၣ်န့ၣ်လီၤ.ဒ်န့ၣ်အသိး,အနံၤအိၣ်ဖျဲၣ်မုၢ်နံၤမုၢ်သီတဖၣ်အပူၤကီၢ်ပူၤကီၢ်ချၢကမျၢၢ်ဒံၣ်မိၣ်ကရ့ၣ်စံၣ်ဂံၢ်ဘါတဖၣ်မၤန့ၢ်ဝဲတၢ်သ့ၣ်နီၣ်အတၢ်ဟူးတၢ်ဂဲၤအိၣ်ဝဲကိးနံၣ်ဒဲးအဂ့ၢ်,သ့ၣ်ညါဘၣ်န့ၣ်လီၤ.
ကၠီၣ်တဲၣ်ဖီၣ်ချုးန့ၢ်ဝဲ KTLA-ကီၢ်သူလ့ၤ ID ကး(၁၂၀၀)ဘျဲၣ်လၢကံၣ်မဲကဘီယူၤသန့
လါယူၤ ၁၆ သီ, ၂၀၂၆ နံၣ်, ခ့ၣ်အဲးစံၣ် လၢကီၢ်ကၠီၣ်တဲၣ် ကံၣ်မဲဝ့ၢ် ကဘီယူၤသန့တၢ်လီၢ်န့ၣ် ကီၢ်သူလ့ၤခိၣ်ဂီၤ(ID)ကး အဘ့ၣ်(၁၂၀၀) ဘျဲၣ် လၢအဘၣ် တၢ်ဟဲက့ၤစိၥ် အီၤလၢ အမဲရကၤထံကီၢ်တဆီအံၤ ဃုၥ်ဒီးလံၥ်လံၢ်လၢအတဖိးသဲစးတဖၣ်တၢ်ဖီၣ်န့ၢ်ဝဲအဂ့ၢ်န့ၣ် ကၠီၣ်တဲၣ်ခိသွဲဝဲၤကျိၤ ထုးထီၣ်ပၥ်ဖျါဝဲန့ၣ် လီၤ. ဖဲအပူၤကွံၥ်လါယူၤ ၁၃ သီအနံၤန့ၣ် လၢကံၣ်မဲကဘီယူၤသန့ ခိသွဲဝဲၤကျိၤတၢ်သမံသမိးလီၢ်န့ၣ် ထၢၣ်လၢတၢ်ဟဲက့ၤစိၥ်ဝဲလၢ အမဲရကၤထံကီၢ်(USA)လၢကဘီယူၤအံၤတဆီတဖၣ် တၢ်ကွၢ်ဝဲလီၤဆီဒီးဖဲတၢ်သမံသမိးဝဲအခါ ဘၣ်တၢ်ထံၣ်န့ၢ်ဝဲ(ကး)ဒ်အံၤလီၤ အဂ့ၢ်န့ၣ် ကၠီၣ်တဲၣ်ခိသွဲဝဲၤကျိၤ လံၥ်တၢ်ပၥ်ဖျါအပူၤ သ့ၣ်ညါဘၣ်န့ၣ်လီၤ. ဒ်လံၥ်တၢ်ပၥ်ဖျါပူၤအိၣ်ဝဲအသိးန့ၣ် လၢထၢၣ်ဖးဒိၣ်(၂)ဖျၢၣ်အပူၤတၢ်သမံသမိးထံၣ်န့ၢ်ဝဲ ခိၣ်ဂီၤကးပၥ်ဖှိၣ်ခဲလၢၥ်(၁၂၂၅)ဘ့ၣ် လၢအဘၣ်တၢ်ကွဲးဃၥ်ဝဲလၢကီၢ်သူလ့ၤသုးမုၢ်ဒိၣ်(Kawthoolei National ID Card)အံၤဒီး တၢ်ဂီၤကးသ့ၣ်တဖၣ်အံၤလီၤလၢ ဝဲလၢစ့ယိၤ န့ၣ်(၆၀,၀၀၀)ဘျဲၣ်အဂ့ၢ်န့ၣ် စံးဝဲန့ၣ်လီၤ. ကီၢ်သူလ့ၤခိၣ်ဂီၤ(ID Card)ကးလၢတၢ်ဖီၣ်န့ၢ်ဝဲခဲအံၤသ့ၣ်တဖၣ်န့ၣ် ဘၣ်တၢ်ထုးထီၣ်အီၤလၢအမဲရကၤထံကီၢ်အံၤတဆီဒီး အတၢ်ဂုၥ်ကျဲးစၢးဆှၢနုၥ်ဝဲဆူကီၢ်ကၠီၣ်တဲၣ်ပူၤလၢအတဖိးသဲစးဘၣ်အံၤ ခီပတၥ်ဝဲခိသွဲတၢ်မၤအကျိၤအကျဲအဂ့ၢ်န့ၣ် လံၥ်တၢ်ပၥ်ဖျါ အပူၤ ပၥ်ဖျါဝဲန့ၣ်လီၤ. အပူၤကွံၥ်ဒ်တၢ်ပၥ်ဖျါထီၣ်ဝဲလၢ(social media)ပူၤအသိးန့ၣ် ကီၢ်သူလ့ၤသုးမုၢ်ဒိၣ်(KTLA) ခိၣ်ဂီၤ(ID)ကးအံၤ နဟးထီၣ်က့ၤ လီၤလၢ ကီၢ်ကၠီၣ်တဲၣ်ပူၤန့ၢ်ဝဲဒီး ဒ်န့ၣ်အသိးဘၣ်ဃးဒီးတၢ်ဂီၤအံၤ ကီၢ်ပူၤကီၢ်ချၢထံဆၢကီၢ်ဆၢပှၤလၢအဘၣ်ထွဲဒီး(KTLA)အံၤ တဖၣ် ဟးမၤန့ၢ်ဝဲဒၣ်ပှၤလၢအအဲၣ်ဒိးမၤတဖၣ်အိၣ်ဝဲအါမးအဂ့ၢ်န့ၣ် သ့ၣ်ညါဘၣ်န့ၣ်လီၤ. တကးဒံးဘၣ်လၢန့ၣ်အမဲၥ်ညါလၢထံဆၢကီၢ်ဆၢ...
ကၠီၣ်တဲၣ်စီၤပၤအဖိမုၣ်ဒိၣ်(Bajrakitiyabha Narendiradebyavati)စူးကွံၥ်သးအဖီခိၣ် KNU ထုးထီၣ်ဝဲတၢ်သးအုးအလံၥ် ဟ့ၣ်ယုၢ်
လါယူၤ ၁၅ သီ, ၂၀၂၆ နံၣ်, ခ့ၣ်အဲးစံၣ် ကၠီၣ်တဲၣ်အစီၤပၤ(Maha Vajiralongkorn) အဖိမုၣ်ဒိၣ် (Bajrakitiyabha Narendiradebyavati) အတၢ်စူၥ်ကွံၥ်သးအံၤ အဖီခိၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ လီၢ်ခၢၣ်သး ထုးထီၣ်ပၥ်ဖျါဝဲတၢ်သးအုးအလံၥ်ဟ့ၣ်ယုၢ်တဘ့ၣ်ဖဲမဟါလါယူၤ ၁၄ သီ လၢမုၢ်နံၤမုၢ်သီအိၣ်ဃၥ်ဝဲ ၁၂ သီအံၤန့ၣ်လီၤ. ဒ်တၢ်သးအုးအလံၥ်တၢ်ပၥ်ဖျါပူၤအိၣ်ဝဲအသိးန့ၣ် လၢကၠီၣ်တဲၣ်အစီၤပၤအဖိမုၣ်ဒိၣ်စူၥ်ကွံၥ်သးအဖီခိၣ်အံၤ (ခ့ၣ်အဲၣ်ယူၣ်)တူၢ်ဘၣ် သးအုးဃုၥ်ဝဲဒီး စီၤပၤ,အဟံၣ်ဖိဃီဖိ,ကၠီၣ်တဲၣ်ပဒိၣ်ဃုၥ်ဒီးကၠီၣ်တဲၣ်ထံဖိကီၢ်ဖိအဂ့ၢ်န့ၣ် ပၥ်ဖျါဝဲန့ၣ်လီၤ. တကးဒံးဘၣ်ကၠီၣ်တဲၣ်စီၤပၤအဖိမုၣ်(Bajrakitiyabha Narendiradebyavati)အံၤ လၢအတၢ်အိၣ်မူဒီတကတီၢ်အပူၤ ဟူးဂဲၤ ဝဲဒၣ်လၢ သဲစးဂ့ၢ်ဝီ, မီၢ်သီမီလါဂ့ၢ်ဝီ အမဲၥ်ညါဘၣ်ဃးလၢတၢ်မၤလိၣ်ထီၣ်ဖးထီၣ်တၢ်တုၤသိးထဲသိး ဒီး ထံဂုၤကီၢ်ဂၤပှၤဂ့ၢ်ဝီ တၢ်တိ စၢၤမၤစၢၤတဖၣ်ဒီး လၢတၢ်ဘၣ်ဘျုးကမျၢၢ်ထံဖိကီၢ်ဖိတၢ်ဖံးတၢ်မၤတဖၣ်အဂီၢ်န့ၣ် မ့ၢ်ပှၤတဂၤလၢအဟ့ၣ်လီၤဝဲအသးနီၢ်နီၢ် အဂ့ၢ် န့ၣ် ခ့ၣ်အဲၣ်ယူၣ် စံးဝဲန့ၣ်လီၤ. လၢတၢ်န့ၣ်အဃိစီၤပၤအဖိမုၣ်ဒိၣ်အတၢ်ဟ့ၣ်သါလၢအမၤဘျုးမၤဖှိၣ်တၢ်လၢကမျၢၢ်ထံဖိကီၢ်ဖိအဂီၢ်အံၤဃုၥ်ဒီးတၢ်ဖံးတၢ်မၤလၢအမၤတ့ၢ်ဝဲတဖၣ်အံၤ ပကသ့ၣ်နီၣ်အီၤလၢပသးကံၢ်ပူၤထီဘိဒီး ကကဲထီၣ်ဝဲတၢ်ဂံၢ်တၢ်ဘါ,တၢ်လီၤကွၢ်လိဒိဂ့ၤတဲၥ်ဘၣ်လၢ စၢၤသွဲၣ်သီ လၢခံတဖၣ်အဂီၢ်အဂ့ၢ်န့ၣ် ခ့ၣ်အဲၣ်ယူၣ် အတၢ်သးအုးလံၥ်ဟ့ၣ်ယုၢ်အပူၤ ပၥ်ဖျါဝဲန့ၣ်လီၤ. (Bajrakitiyabha Narendiradebyavati)လၢအသးနံၣ်အိၣ်ဝဲ (၄၇)နံၣ်အံၤ မ့ၢ်ဝဲကီၢ်ကၠီၣ်တဲၣ် နီၣ်ဂံၢ်(၁၀) စီၤပၤ အဖိမုၣ်အဒိၣ်...
ခိရံယါကလံၤထံးကီၢ်ခိၣ်လီၢ်လံၤ(Yoon Suk Yeol)ဘၣ်တၢ်ဒၢလီၤလၢဃိၥ်ပူၤအနံၣ်(၃၀)
လါယူၤ ၁၅သီ, ၂၀၂၆နံၣ်, ခ့ၣ်အဲးစံၣ်, ခိရံယါကလံၤထံးထံကီၢ်,အပူၤကွံၥ်(၂၀၂၄)နံၣ်လါဒံၣ်စဲဘၢၣ်အပူၤကီၢ်ခိၣ်လီၢ်လံၤ(Yoon Suk Yeol)လၢဂုၥ်ကျဲးစၢးဟံးန့ၢ်ဆူၣ်ဝဲထံကီၢ်တၢ်စိကမီၤဒီးဘိးဘၣ်ရၤလီၤဝဲသုးတၢ်ပၢတၢ်ပြး(Martial Law)တဂၤအံၤကွီၣ်ဘျီၣ်ဆၢတဲၥ်ဝဲလၢတၢ်ကဒၢနုၥ်ဝဲအီၤလၢဃိၣ်ပူၤအနံၣ်(၃၀)အဂ့ၢ်,သ့ၣ်ညါဘၣ်န့ၣ်လီၤ. ကွီၣ်ဘျီၣ်ဟ့ၣ်လီၤတၢ်ကလုၢ်ဘျီဝဲအံၤခီဖျိအဝဲဂုၥ်ကျဲးစၢးဒုးအိၣ်ထီၣ်ဒီးထုးထီၣ်ရၤလီၤဝဲသုးတၢ်ပၢတၢ်ပြးဒီးပျၢ်လီၤဝဲသုးဂ့ၢ်ဝီဒြိလၢကလဲၤယူၤဃီၤဆူကလံၤစိးခိရံယါဘၣ်ထွဲတၢ်ဂ့ၢ်တၢ်ကျိၤတဖၣ်အဃိတၢ်ဟ့ၣ်လီၤဝဲတၢ်ကမၣ်အဂ့ၢ်,သ့ၣ်ညါဘၣ်န့ၣ်လီၤ. လၢန့ၣ်အမဲၥ်ညါ,ဒ်သိးဒြိသ့ၣ်တဖၣ်အံၤကယူၤဝ့ၤဝီၤသ့အဂီၢ်တၢၣ်ပီၣ်တဲသကိးပၥ်တ့ၢ်ဝဲတၢ်ဒီး(ကလံၤစိး)ခိရံယါပဒိၣ်တဖၣ်အိၣ်ဝဲအဂ့ၢ်,(Reuters)တၢ်ကစီၣ်သန့ပၥ်ဖျါဝဲဒၣ်န့ၣ်လီၤ. အ့ရှၢၣ်ထံကီၢ်အပူၤ,မုၢ်ကျိၤဝဲၤကွၥ်တၢ်လဲၤထီၣ်လဲၤထီအဂံၢ်ဘါဂ့ၤဝဲနီၢ်ဂံၢ်လွံၢ်ကလံၤထံးခိရံယါထံကီၢ်အံၤ,ဒ်သိးထံရုၢ်ကီၢ်သဲးတၢ်ဃံးတၢ်စ့ၤကအိၣ်ထီၣ်အဂီၢ်ကီၢ်ခိၣ်လီၢ်လံၤပညိၣ်ဝဲဃုၥ်ဒီးတၢ်မူးတၢ်ရၢ်လၢအဂၤတဖၣ်အဃိ,တၢ်ဟံးန့ၢ်ဝဲဒၣ်အီၤအရ့အိၣ်ဝဲန့ၣ်လီၤ. မံးစထၢၣ်ယိၣ်ဆိၣ်ယိၤအံၤမ့ၢ်ဝဲကလံၤထံးခိရံယါထံကီၢ်အကီၢ်ခိၣ်(၁၃)ဂၤတဂၤန့ၣ်လီၤ. ဒီးဖဲ(၂၀၂၂)နံၣ်လါမးရှးအပူၤဟံးန့ၢ်ဝဲမူဒါအလီၢ်ခံသူကဘျံးကဘျၣ်ဝဲထံကီၢ်တၢ်စိကမီၤအဃိ(၂၀၂၅)နံၣ်လါအ့ဖြ့ၣ်အပူၤတၢ်ထုးထီၣ်ကွံၥ်ဝဲအီၤလၢလီၢ်လၤအဂ့ၢ်,သ့ၣ်ညါဘၣ်န့ၣ်လီၤ. လၢတၢ်ဂုၥ်ကျဲးစၢးဘိးဘၣ်ရၤလီၤဝဲသုးဂ့ၢ်ဝီတၢ်ပၢတၢ်ပြးဒီးတၢ်ပျၢ်လီၤဝဲဒြိတၢ်ဂ့ၢ်ခံမံၤအံၤအဃိ,တၢ်ဘၣ်ထွဲတအိၣ်ဝဲနီတမံၤဘၣ်အဂ့ၢ်ကီၢ်ခိၣ်လီၢ်လံၤအပီၢ်ရီကတိၤပၥ်ဖျါဝဲဒၣ်န့ၣ်လီၤ. တၢ်ဂုၥ်ကျဲးစၢးဟံးန့ၢ်ဆူၣ်ထံကီၢ်တၢ်စိကမီၤအဖီခိၣ်,ကီၢ်ခိၣ်လီၢ်လံၤယိၣ်အံၤအပူၤကွံၥ်(ဆိလ်)ကွီၣ်ဘျီၣ်ဆၢတဲၥ်ဝဲဒၣ်လၢကဘၣ်လီၤဝဲလၢဃိၣ်ပူၤတစိၤသးအိၣ်ဝဲန့ၣ်လီၤ. ဒ်န့ၣ်အသိး,တကီၢ်ခါခဲအံၤကီၢ်ခိၣ်လီၢ်လံၤယိၣ်လၢတၢ်ဖီၣ်ဃၥ်ဝဲအံၤအပူၤကွံၥ်မုၢ်ယဲၢ်နံၤအပူၤဂံၢ်ခီၣ်ထံးကွီၣ်ဘျီၣ်အတၢ်ဆၢတဲၥ်အဖီခိၣ်,ဃ့ထီၣ်ဝဲတၢ်သးကညီၤလံၥ်ပတံသ့ဘၣ်ဆၣ်ခီဖျိသူကဘျံးကဘျၣ်ဝဲတၢ်ဟ့ၣ်လီၤဝဲတၢ်ကလုၢ်လၢသုးမုၢ်ဒိၣ်အဖီခိၣ်အဃိခဲအံၤဘၣ်တၢ်ဒၢနုၥ်အါထီၣ်အီၤလၢဃိၣ်ပူၤ(၃၀)နံၣ်အဂ့ၢ်,သ့ၣ်ညါဘၣ်န့ၣ်လီၤ.