တၢ်ဒွဲၣ်အူအီၣ်(KNU/KNLA-PC)သုးရ့ၣ်ခိၣ်စီၤ၀့ကၠီၤအဟံၣ်
လါအီးကထိဘၢၣ် ၂၉ သီႇ ၂၀၂၂ နံၣ်ႇ ခ့ၣ်အဲးစံၣ် လၢကညီကီၣ်စဲၣ် ကီးတရံးကီၢ်ဆၣ်ကလံၤစိး ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၇)တၢ်ပၢဟီၣ်က၀ီၤအပူၤ ဖဲလါအီးကထိဘၢၣ် ၂၇ သီ ဟါခီအဆၢကတီၢ်န့ၣ် တၢ်လဲၤဒွဲၣ်အူအီၣ်၀ဲကညီတၢ်မုာ်တၢ်ခုၣ်ကီၣ်ကး KNU/KNLA-PC (၇၇၇)သုးရ့ၣ်ခိၣ်စီၤ၀့ကၠီၤ အဟံၣ်လၢ အိၣ်မံၣ်ဖးလဲၢ်သ၀ီပူၤအံၤအဂ့ၢ်န့ၣ်သ့ၣ်ညါဘၣ်န့ၣ်လီၤႉ ဖဲလါအီးကထိဘၢၣ် ၂၇ သီ ဟါခီ ၇ နၣ်ရံၣ်ဃၣ်ဃၣ်အဆၢကတီၢ်န့ၣ် ဖီၣ်စုက၀ဲၤကရူၢ်တဒူၣ်နုာ်လီၤခး၀ဲ စီၤ၀့ကၠီၤအဟံၣ်အဃိ စီၤကၠီၤ၀့အမါနီၢ်ဖီ၀ါ(၃၈)နံၣ်ဒီးအၦၤ(၄)ဂၤသံ၀ဲ အဂ့ၢ်န့ၣ်သ့ၣ်ညါဘၣ်န့ၣ်လီၤႉ ဘၣ်ဆၣ်မ့မ့ၢ်စီၤ၀့ကၠီၤဒီးအဖိမုၣ်နီၢ်လ့လ့၀ါ(၂)ဂၤအံၤခီန့ၣ်ဃ့ၢ်ပူၤဖျဲးထီၣ်၀ဲအဂ့ၢ်န့ၣ်လီၢ်က၀ီၤကမျၢၢ်စံး၀ဲန့ၣ်လီၤႉ လၢန့ၣ်အမဲာ်ညါဖီၣ်စုက၀ဲၤကရူၢ်အံၤဒွဲၣ်အူအီၣ်ကွံာ်၀ဲစီၤ၀့ကၠီၤအဟံၣ်အဃီဒီးက့ၤစိာ်ဃုာ်စ့ၢ်ကီး(Vigo)သိလ့ၣ်ခံခိၣ်လၢအိၣ်ဟံၣ်ကရၢၢ်ပူၤအံၤအဂ့ၢ်န့ၣ် မံၣ်ဖးလဲၢ်သ၀ီဖိတဂၤစံးဘၣ်ခ့ၣ်အဲးစံၣ်ဒ်အံၤန့ၣ်လီၤႉ အ၀ဲစံး၀ဲလၢ“အဟံၣ်န့ၣ်တယံၤဒီးယဟံၣ်ဘၣ်ႉပနၢ်ဟူကျိသီၣ်တပယူာ်ဃီလီၤမီၤနီၤႉမ့ၢ်ကရူၢ်ကရၢဖဲလဲၣ်တဒူၣ်ဟဲခး၀ဲလဲၣ်ဒုပတသ့ၣ်ညါဘၣ်ႉပလဲၤကွၢ်တဘူၣ်ဘၣ်ႉမုၢ်၀ါထီၣ်မးပသ့ၣ်ညါလၢအမါဒီးအၦၤသံမီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်ဖဲမဟါလါအီးကထိဘၢၣ် ၂၈ သီအနံၤန့ၣ်လီၤႉ ဖီၣ်စုက၀ဲၤကရူၢ်လဲၤခးသုးရ့ၣ်ခိၣ်စီၤ၀့ကၠီၤအဟံၣ်လၢတၢ်ဂ့ၢ်မနုၤအဃိလဲၣ်ခီန့ၣ်လီၢ်က၀ီၤသ၀ီဖိတဖၣ်တသ့ၣ်ညါ၀ဲဘၣ်အသိးဒ်သိးကသ့ၣ်ညါတၢ်ကဲထီၣ်သးအဂ့ၢ်အကျိၤလီၤတံၢ်လီၤဆဲးအဂီၢ်န့ၣ်ခ့ၣ်အဲးစံၣ်–ကညီတၢ်ကစီၣ် ဂုာ်ကျဲးစၢးကျိး(KNU/KNLA-PC)ၦၤဘၣ်မူဘၣ်ဒါတဖၣ်အဖၢမုၢ်န့ၣ်လီၤႉ
တၢ်ဆၢကတီၢ်ဘၣ်လၢဘၣ်ကူးဘုလံဘၣ်ဆၣ် ကမျၢၢ်ၦၤဃ့ၢ်တၢ်ဒုးဖိတဖၣ် တကူးဘၣ်ဘုဒံးဘၣ်
လါအီးကထိဘၢၣ် ၂၇ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢချၢၣ်လွံၢ်ထူၣ်ကီၢ်ရ့ၣ်(သုးက့ ၃)တၢ်ပၢဟီၣ်က၀ီၤ လၢၢ်ဒိၣ်ကီၢ်ဆၣ်ဒီးမိကီၢ်ဆၣ်အပူၤ ကတီၢ်ခဲအံၤတၢ်ဆၢကတီၢ်ဘၣ်လၢကဘၣ်ကူးဘုလံဘၣ်ဆၣ် လီၢ်က၀ီၤကမျၢၢ်တဖၣ်ခီဖျိဘၣ်ဃ့ၢ်တၢ်ဒုးအဃိတကူးဘၣ်ဘုဒံးဘၣ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤအလီၢ်ခံဟီၣ်က၀ီၤ(KNLA)ဒီးပယီၤသုးတဖၣ်အဘၢၣ်စၢၤတၢ်ဒုးက့ၤကဲထီၣ်ကဒါအဃိ လၢၢ်ဒိၣ်ဒီးမိကီၢ်ဆၣ်ပူၤလီၢ်က၀ီၤကမျၢၢ်တဖၣ်ခီဖျိဘၣ်ဃ့ၢ်တၢ်ဒုးအဃိအ၀ဲသ့ၣ်အဘုဟးဂီၤ၀ဲဒီး ကတီၢ်ခဲအံၤစ့ၢ်ကီးဘၣ်အခါလၢကဘၣ်ကူးက့ၤဘုလံဘၣ်ဆၣ်ခီဖျိတၢ်ဒုးကဲထီၣ်အဃိအ၀ဲသ့ၣ်တဖၣ်အါဒၣ်တက့ၢ်တက့ၤကူးဘၣ်အဘုဒံးဘၣ်ဒီးၦၤက့ၤကူးဘုအိၣ်ထဲစှၤဂၤဒံးလီၤအဂ့ၢ်န့ၣ်လီၢ်က၀ီၤဖိတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“လီၢ်က၀ီၤဖိတဖၣ်အါဒၣ်တက့ၢ်န့ၣ်ဘၣ်ဃ့ၢ်တၢ်ဒုးမီၤနီၤႉအ၀ဲသ့ၣ်က့ၤကူးဘုတဘူၣ်ဘၣ်ႉဘၣ်စံၣ်ဒီတစူၤလီၤႉဘၣ်စံၣ်ဒ်အံၤအဃိကျီၢ်ပနၢ်နုာ်လီၤအီၣ်အ၀ဲသ့ၣ်ဘုမီၤနီၤႉတနံၣ်အံၤတၢ်စူၤစှၤႇအဃိန့ၣ်ဘုဟးထီၣ်စှၤမီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ လၢန့ၣ်အမဲာ်ညါဘုလီၢ်လၢတၢ်တကူးဘၣ်ဒံး၀ဲသ့ၣ်တဖၣ်ခီဖျိကျီၢ်ပနၢ်နုာ်လီၤအီၣ်၀ဲအဃိဘုတဖၣ်ဟးဂီၤ၀ဲဒီး ဘုလီၢ်တနီၤခီဖျိအိၣ်ဘူးဒီးတၢ်ဒုးကဲထီၣ်လီၢ်အဃိတၢ်က့ၤကူး၀ဲတဘူၣ်လၢၤဘၣ်အိၣ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ ဘုလၢတၢ်ကူးအီၤ၀ံၤတဖၣ်စ့ၢ်ကီးန့ၣ်တၢ်ထၢနုာ်သံသိအီၤလၢထၢၣ်ပူၤဒီးဆါကွံာ်၀ဲဒ်န့ၣ်လီၤဒီး ခီဖျိတၢ်တသူၣ်ဘၣ်လၢၤပဲဘၣ်အဃိဘုဟးထီၣ်လီၤစှၤ၀ဲဒီးၦၤသူၣ်အီၣ်ဖျးအီၣ်ဘုပဲဖိသ့ၣ်တဖၣ်သဂၢၢ်ဘၣ်၀ဲတၢ်ကီတၢ်ခဲအဂ့ၢ်န့ၣ်လီၢ်က၀ီၤဖိတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ မိကီၢ်ဆၣ်(နၣ်သၤကွ့)လီၢ်က၀ီၤဖိတဂၤစ့ၢ်ကီးစံး၀ဲ“လၢညါခါန့ၣ်ၦၤကူးဘုဒီးစုဒ်မိၢ်လုၢ်ပၢ်လၢ်တၢ်လီၤစၢၤလီၤသွဲၣ်အိၣ်ပာ်အသိးလီၤႉဘၣ်ဆၣ်ခဲအံၤတၢ်လီၢ်လၢအယံၤတဖၣ်န့ၣ်ၦၤသူ၀ဲဒီးစဲးကူးဘု၀ံၤၦၤထၢနုာ်လီၤသံသိ၀ဲလၢထၢၣ်ပူၤဆါ၀ဲဒ်န့ၣ်လီၤႉလိ၀ဲလၢမုၢ်တဘူၣ်လၢၤဘၣ်ႉတၢ်လၢဘုန့ၣ်နကူးအီၤမ့၀ံၤန့ၣ်နကဘၣ်က့ၤဖှံလီၤပဲႉမ့မ့ၢ်တၢ်လီၢ်လၢအိၣ်ဘူးဒီးကျဲကပၤတဖၣ်ခီန့ၣ်ၦၤတကူးအီၤဘၣ်ႉၦၤတကူးဘၣ်ဘုအဃိတဖှံလီၤဘၣ်ပဲဘၣ်ႉတၢ်ကီတၢ်ခဲဒ်အံၤတဖၣ်အိၣ်တၢ်လီၢ်ကိးတီၤဒဲလီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ ဒ်န့ၣ်အသိးလၢခ့ၣ်အဲၣ်ယူၣ်(သုးက့ ၆)ဟီၣ်က၀ီၤ ကီၢ်ပယီၤကီၢ်ဆၢတၢ်လီၢ်တဖၣ်စ့ၢ်ကီး လီၢ်က၀ီၤဖိတဖၣ် ဟံးလိၢ်ဆိဃာ်၀ဲစ့လၢခီပနံၣ်အအိၣ်၀ံၤသူၣ်အီၣ်ဖျးအီၣ်၀ဲဘုခ့တဖၣ်န့ၣ်လီၤႉကတီၢ်ခဲအံၤခီဖျိတၢ်ဒုးကဲထီၣ်ဒံးဒီးပယီၤသုးဟးဒိးလီၤမ့ၣ်ပိၢ်လၢဘုခ့ကျီးပူၤအဃိအ၀ဲသ့ၣ်ဘၣ်ဆိကတီၢ်ကွံာ်အတၢ်ဖံးတၢ်မၤတဟ့ၣ်ဘၣ်အကမၢ်ဒံးဘၣ်အဂ့ၢ်န့ၣ် ၦၤမၤအီၣ်ဘုခ့ဖိတဖၣ်စံး၀ဲန့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤအလီၢ်ခံတၢ်ဒုးဆူၣ်ထီၣ်၀ဲလၢခ့ၣ်အဲၣ်ယူၣ်တၢ်ပၢဟီၣ်က၀ီၤတဖၣ်အပူၤဒီး ကမျၢၢ်ဘၣ်ဃ့ၢ်မှံဟးဖျိးအနီၣ်ဂံၢ်အိၣ်၀ဲ(၃)ကလီၢ်ဘျဲၣ်အဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါစရီအသိး သ့ၣ်ညါဘၣ်န့ၣ်လီၤႉ
ကျိဖးဒိၣ်လီၤတဲာ်ပိၢ်ဖးထီၣ်လၢကီးတရံး၀့ၢ်က၀ီၤဒ့ပူၤအဃိလီၢ်က၀ီၤပိာ်မုၣ်သံ(၁)ဂၤဒီးဘၣ်ဒိအဂၤ(၁၀)ဃၣ်ဃၣ်
လါအီးကထိဘၢၣ် ၂၇ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲတနံၤအံၤလါအီးကထိဘၢၣ် ၂၇ သီ မုၢ်ထူၣ် ၁၂ နၣ်ရံၣ်ဃၣ်ဃၣ်အဆၢကတီၢ်န့ၣ် ခီဖျိမ့ၣ်ပိၢ်လီၤတဲာ်ပိၢ်ဖးထီၣ်လၢကီးတရံး၀့ၢ်(ခန့မူၤ)က၀ီၤဒ့ပူၤအဃိလီၢ်က၀ီၤပိာ်မုၣ်သံ(၁)ဂၤဒီးဘၣ်ဒိအဂၤ(၁၀)ဃၣ်ဃၣ်အဂ့ၢ်န့ၣ် ကမျၢၢ်လၢအိၣ်က၀ီၤဒ့ပူၤတဖၣ်စံး၀ဲန့ၣ်လီၤႉ လၢကီးတရံး၀့ၢ် က၀ီၤဒ့(၇)ခန့မူၤက၀ီၤဒ့အပူၤန့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ဒီး ပယီၤသုးႇသုးခိးကီၢ်ဆၢ(BGF)သုးကျိၤတဖၣ်အဘၢၣ်စၢၤတၢ်ဒုးကဲထီၣ်အကတီၢ် ခီဖျိမ့ၣ်ပိၢ်လီၤတဲာ်ပိၢ်ဖးထီၣ်လၢ (တတါအူ)က၀ီၤဒ့ၦၤဟံၣ်ဖီခိၣ်အဃိပိာ်မုၣ်သံ၀ဲ(၁)ဂၤဒီးအ၀ၤအဖိဘၣ်ဒိဘၣ်ထံး၀ဲအသိးၦၤအိၣ်ဖဲဟံၣ်ခိၣ်ဟံၣ်ဃၢၤအဂၤ(၁၀)ဃၣ်ဃၣ်ဘၣ်ဒိစ့ၢ်ကီး၀ဲအဂ့ၢ်န့ၣ်ကမျၢၢ်လၢအိၣ်(တတါအူ)က၀ီၤဒ့ပူၤတဖၣ်စံးဘၣ်ခ့ၣ်အဲးစံၣ်န့ၣ်လီၤႉ “ကဘၣ်ဖဲမုၢ်ထူၣ် ၁၂ နၣ်ရံၣ်ဃၣ်ဃၣ်န့ၣ် တၢ်ဒုးကဲထီၣ်လၢကညီသုးဒီးပယီၤသုးႇ(BGF)တဖၣ်အဘၢၣ်စၢၤမီၤနီၤႉ ပယီၤသုး(၁၂)စုတီၤအဖီလာ်လဲၤ၀ၣ်ကျိဖးဒိၣ်လူၢ်ခးလီၤကျိဖးဒိၣ်လီၤတဲာ်လၢ(တတါအူ)က၀ီၤဒ့(အ့ၤစလၤပလံၣ်)တၢ်သူၣ်ထီၣ်လီၢ်ခံၦၤဟံၣ်ခိၣ်အဃိၦၤမုၢ်ၦၢ်သံ(၁)ဂၤႇအ၀ၤဒီးအဖိနါက့ဘၣ်ဒိစ့ၢ်ႉၦၤအိၣ်လၢဟံၣ်ခိၣ်ဟံၣ်ဃၢၤနါက့ဘၣ်ဒိကအိၣ်အဂၤ(၁၀)ညါႉခဲအံၤၦၤလဲၤဆှၢအ၀ဲသ့ၣ်လၢတၢ်ဆါဟံၣ်လံႉၦၤဖိသၣ်လၢအဘၣ်ဒိတဂၤန့ၣ်တၢ်အိၣ်သးဖးနးညါ”အဂ့ၢ်န့ၣ်တတါအူက၀ီၤဒ့ဖိတဂၤစံး၀ဲန့ၣ်လီၤႉ ဖဲအပူၤကွံာ်လါအီးကထိဘၢၣ် ၂၁ သီအနံၤန့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ႇ ကီၢ်သူလ့ၤသုးမုၢ်ဒိၣ်(KTLA)သုးပာ်ဖှိၣ်ဒီးပယီၤသုးအဘၢၣ်စၢၤတၢ်ဒုးကဲထီၣ်လၢကီးတရံး၀့ၢ်သုးမီၤစိရိၤအ၀ဲၤဒၢး အိၣ်ဆီလီၤသးတၢ်လီၢ်တဖၣ်ဒီး ခီဖျိပယီၤသုးခးလီၤကျိဖးဒိၣ်လီၤတဲာ်ပိၢ်ဖးထီၣ်လၢက၀ီၤဒ့တဖၣ်အပူၤအဃိ ကမျၢၢ်သံ(၃)ဂၤဒီးဘၣ်ဒိအဂၤ(၁၀)ဘျဲၣ်အကျါပၣ်ဃုာ်ဖိသၣ်(၃)ဂၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ ဒ်န့ၣ်အသိးဖဲလါအီးကထိဘၢၣ် ၂၅ သီအနံၤစ့ၢ်ကီးခီဖျိပယီၤသုးခးလီၤကျိဖးဒိၣ်အဃိ (ကၠီၣ်စယ့ၣ်ကိ)လီၢ်က၀ီၤကမျၢၢ်ဘၣ်ဒိ၀ဲ(၂)ဂၤဒံးအဂ့ၢ်န့ၣ်သ့ၣ်ညါဘၣ်န့ၣ်လီၤႉ လၢကီးတရံး၀့ၢ်ပူၤခီဖျိတၢ်ဒုးတၢ်ယၤဆူၣ်ထီၣ်ပယီၤသုးမၤအါထီၣ်အဂံၢ်ဘါဒီး(BGF)ႇပယီၤသုးပာ်ဖှိၣ်တဖၣ်မ့နုာ်လီၤဆူကီးတရံး၀့ၢ်ကလံၤထံးႇကလံၤစိးဒူသ၀ီတကပၤန့ၣ် တၢ်ဘၣ်သဂၢၢ်ခးလိာ်သးကဲထီၣ်ဒီး ကညီဒီကလုာ်တၢ်ထူၣ်ဖျဲးသုးမုၢ်ဒိၣ်–KNLA(သုးက့ ၆)ႇ(သုးက့ ၇)အၦၤသ့၀ဲအဃိ လီၢ်က၀ီၤသ၀ီဖိတဖၣ် ဟးစံၣ်ပလဲာ်ဆိပာ်အသးလၢတၢ်လီၢ်အဂၤလံအဂ့ၢ်န့ၣ်သ့ၣ်ညါဘၣ်န့ၣ်လီၤႉ
ပယီၤသုးဖီၣ်မၤသံ (မိကီၢ်ဆၣ်)လီၢ်က၀ီၤပိာ်မုၣ်တဂၤ
လါအီးကထိဘၢၣ် ၂၇ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်(သုးက့ ၃)ဟီၣ်က၀ီၤ မိကီၢ်ဆၣ်အပူၤန့ၣ် ပယီၤသုးဖီၣ်မၤသံ၀ဲ(တခီးၦၢ်)သ၀ီဖိပိာ်မုၣ်တဂၤလၢတၢ်ဂ့ၢ်တအိၣ်နီတမံၤဘၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ ဖဲအပူၤကွံာ်လါစဲးပထ့ဘၢၣ် ၂၂ သီအနံၤန့ၣ် ပယီၤသုးလၢအနီၣ်ဂံၢ်ကအိၣ်အဂၤ(၇၀)ဃၣ်ဃၣ်အံၤ ဖဲအ၀ဲသ့ၣ်ဟဲတုၤလၢ(အ့လီစ့ၤ)သ၀ီဒီး(တခီးၦၢ်)သ၀ီအခါန့ၣ် တၢ်ခးလိာ်သးကဲထီၣ်၀ဲဒီး ဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)၀ံၤအလီၢ်ခံ ဖီၣ်မၤသံ၀ဲသ၀ီဖိပိာ်မုၣ်အံၤလီၤအဂ့ၢ်န့ၣ် လီၢ်က၀ီၤကညီဂံၢ်ခီၣ်ထံးၦၤဂ့ၢ်၀ီၦၤမၤတၢ်ဖိတဂၤစံး၀ဲန့ၣ်လီၤႉ အ၀ဲစံး၀ဲလၢ“ပယီၤသုးမၤတဲာ်ကွံာ်အနၢ်ကုႇဟံ၀ဲဒၣ်ၦၤပိာ်မုၣ်တဂၤန့ၣ်အနၢ်ဒံးမီၤနီၤႉမၤသံ၀ဲ၀ံၤဒီးတနံၤမးၦၤလဲၤထံၣ်က့ၤၦၤသံအစိၣ်မီၤနီၤႉသ၀ီတဖျၢၣ်န့ၣ်နါက့သ၀ီပူၤန့ၣ်ၦၤတအိၣ်နီတဂၤလၢၤဘၣ်ၦၤစံၣ်လၢၤလံႉအမၤသံတၢ်ပိာ်မုၣ်တဂၤန့ၣ်မၤသံ၀ဲလၢသ၀ီချၢဖဲလၢတၢ်ပိာ်မုၣ်တဂၤန့ၣ်အိၣ်လၢကျီးပူၤအခါမီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ လီၢ်က၀ီၤပိာ်မုၣ်လၢပယီၤသုးဖီၣ်မၤသံအီၤတဂၤအံၤအမံၤလၢနီၢ်ဒ့ၣ်ညါ အသးအိၣ်၀ဲ(၄၅)ဒီး ၦၤလၢအမၤသံတၢ်န့ၣ်မ့ၢ်၀ဲခီၣ်ချ့သုးရ့ၣ်(ခမရ–၅၉၉)လီၤအဂ့ၢ်န့ၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ထုးထီၣ်ပာ်ဖျါ၀ဲန့ၣ်လီၤႉ တၢ်တနံၤဃီ၀ဲန့ၣ်ပယီၤသုးမၤသံလီၢ်က၀ီၤပိာ်မုၣ်နီၢ်ဒ့ၣ်ညါတကးဒံးဘၣ်အမဲာ်ညါ ဒွဲၣ်အူအီၣ်စ့ၢ်ကီး၀ဲ(အီလီစ့ၤ)သ၀ီၦၤမၤအီၣ်ကျီးဖိအဒဲ(၂)ဖျၢၣ်ဒီးထံပိာ်ကျီးတကျီးအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ဖဲအပူၤကွံာ်လါအီးကထိဘၢၣ် ၂၀ သီအနံၤစ့ၢ်ကီး ပယီၤသုးလၢအဟဲနုာ်လီၤဆူမိကီၢ်ဆၣ်ပူၤတဖၣ် ဖီၣ်က့ၤကိး၀ဲ(မီကဲသၣ်ပၢၤခိၣ်)သ၀ီဖိအဂၤ(၃၀)လၢကဒီသဒၢအ၀ဲသ့ၣ်အဂီၢ်ဒီးသ၀ီဖိလၢအဖီၣ်က့ၤကိး၀ဲတဖၣ်အံၤပျၢ်လီၤက့ၤ၀ဲတနီၤလံဘၣ်ဆၣ် လၢအအိၣ်တ့ၢ်(၉)ဂၤန့ၣ်ဖီၣ်တ့ၢ်ဃာ်၀ဲအဖၢမုၢ်လီၤအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲ ဖဲလါအီးကထိဘၢၣ် ၂၁ သီအနံၤန့ၣ်လီၤႉ လီၢ်က၀ီၤသ၀ီဖိလၢအဂၤတဂၤစ့ၢ်ကီးစံး၀ဲ“ၦၤအိၣ်ဖဲအံၤတဖၣ်အါဒၣ်တက့ၢ်န့ၣ်ဃ့ၢ်တၢ်ဒုးမီၤနီၤႉဆၢကတီၢ်ခဲအံၤၦၤဃ့ၢ်တၢ်ဒုးဖိတနီၤန့ၣ်ဟဲက့ၤကူးက့ၤအဘုအဟုဒီးအိၣ်၀ဲလၢဒဲပူၤလီၤႉမတၤတဂၤမးက့ၤအိၣ်လၢသ၀ီပူၤတဘူၣ်ဘၣ်ႉခဲအံၤလၢသ၀ီပူၤန့ၣ်အိၣ်ဘှ့ၣ်ဘှီၣ်ႉလၢကျဲမုၢ်ခိၣ်နါက့ဆဲးကဲးႇသိလ့ၣ်အကလုၢ်တသီၣ်လၢၤဘၣ်”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ လၢခ့ၣ်အဲၣ်ယူၣ်(ချၢၣ်လွံၢ်ထူၣ်)ကီၢ်ရ့ၣ်အပူၤ စးထီၣ်လၢ(၂၀၂၂)လါမးရှးတုၤလၢလါအီးကထိဘၢၣ် (ယဲၢ်လါ)အတီၢ်ပူၤန့ၣ်ခီဖျိပယီၤသုးခးလီၤကျိဖးဒိၣ်ဒီးဖီၣ်မၤသံ၀ဲလီၢ်က၀ီၤဖိတဖၣ်အဃိကမျၢၢ်ဘၣ်သံ၀ဲ(၁၆)ဂၤဒီးဒူသ၀ီ(၁၂၅)ဖျၢၣ်လီၢ်က၀ီၤကမျၢၢ်အဂၤတကလီၢ်ဃၣ်ဃၣ်ဘၣ်ဃ့ၢ်မှံဟးဖျိး၀ဲအဂ့ၢ်န့ၣ် ခ့ၣ်အဲၣ်ယူၣ်(ချၢၣ်လွံၢ်ထူၣ်)ကီၢ်ရ့ၣ် ထုးထီၣ်ပာ်ဖျါ၀ဲဖဲအပူၤကွံာ်လါစဲးပထ့ဘၢၣ် ၁၇ သီအနံၤန့ၣ်လီၤႉ
KNLA ထီၣ်မၤန့ၢ် ကွံလၢၢ်တီပယီၤသုးကလၢၤႇတၢ်ဖီၣ်န့ၢ်ပယီၤသုး ၁၇ ဂၤဒီးမၤန့ၢ်ကျိအခိၣ်(၄၀)ဘျဲၣ်
လါအီးကထိဘၢၣ် ၂၆ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် နိၣ်တကီကီၢ်ဆၣ်အပူၤ ဖဲမဟါလါအီးကထိဘၢၣ် ၂၆ သီအနံၤန့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်–KNLA (သုးရ့ၣ် ၁၇) ဒီး (သုးရ့ၣ် ၁၈)သုးပာ်ဖှိၣ် ထီၣ်မၤန့ၢ်၀ဲ ကွံလၢၢ်တီပယီၤသုးကလၢၤဒီးဖဲန့ၣ်ဖီၣ်န့ၢ်သမူ၀ဲပယီၤသုး(၁၇)ဂၤႇမၤန့ၢ်ကျိအခိၣ်(၄၀)ဘျဲၣ်အဂ့ၢ်န့ၣ် KNLA စံး၀ဲန့ၣ်လီၤႉ စးထီၣ်ဖဲလါအီးကထိဘၢၣ် ၂၅ သီ မုၢ်နၤခီန့ၣ် တၢ်စးထီၣ်နုာ်လီၤခး၀ဲပယီၤသုးခီၣ်ချ့သုးရ့ၣ်(ခမရ–၅၆၁) ကွံလၢၢ်တီသုးကလၢၤအံၤဒီးဖဲလါအီးကထိဘၢၣ် ၂၆ သီ ဂီၤခီ ၈ နၣ်ရံၣ်ဃၣ်ဃၣ်အဆၢကတီၢ်န့ၣ် တၢ်မၤန့ၢ်၀ဲသုးကလၢၤအံၤအဂ့ၢ်န့ၣ် (KNLA)သုးခိၣ်တဂၤစံးဘၣ်ခ့ၣ်အဲးစံၣ်ဒ်အံၤန့ၣ်လီၤႉ “ၦၤစးထီၣ်နုာ်လီၤ၀ဲခးဖဲမဟါန့ၣ်မီၤနီၤႉဖဲတဂီၤညါအံၤပယီၤသုးတဖၣ်ပာ်လီၤစုက၀ဲၤဒိးဖီၣ်အသးဒီး မၤန့ၢ်၀ဲသုးကလၢၤအံၤလီၤႉပယီၤသုးသံ(၂)ဂၤႇတၢ်ဖီၣ်သမူန့ၢ်(၁၇)မီၤနီၤႉဒ်ပဒိးန့ၢ်ဘၣ်တၢ်ကစီၣ်အသိးန့ၣ်ၦၤမၤန့ၢ်ကျိအခိၣ်(၄၀)ဘျဲၣ်”အဂ့ၢ်န့ၣ်(KNLA)သုးခိၣ်တဂၤဃီ၀ဲန့ၣ်စံးဘၣ်ခ့ၣ်အဲးစံၣ်ဖဲမဟါလါအီးကထိဘၢၣ် ၂၆ သီအနံၤ န့ၣ်လီၤႉ တၢ်မၤန့ၢ် ကွံလၢၢ်တီပယီၤသုးကလၢၤ၀ံၤအလီၢ်ခံဖဲဂီၤခီ ၁၀ နၣ်ရံၣ်ဘျဲၣ်အခါန့ၣ် သုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်တစှၤန့ၢ်(၂)ဘျီလၢသုးကလၢၤအခိၣ်အဃၢၤအသိး လၢနိၣ်တကီကီၢ်ဆၣ်ကျဲနုာ်လီၤဟးထီၣ်တၢ်လီၢ်တဖၣ်စ့ၢ်ကီးပယီၤသုးမၤအါထီၣ်အဂံၢ်ဘါအဂ့ၢ်န့ၣ် လီၢ်က၀ီၤသ၀ီဖိိတဖၣ်စံး၀ဲန့ၣ်လီၤႉ ဖဲအပူၤကွံာ်လါအီးကထိဘၢၣ် ၁၆ သီအနံၤစ့ၢ်ကီး လၢခ့ၣ်အဲၣ်ယူၣ်(သုးက့ ၆)ဟီၣ်က၀ီၤအပူၤ ပယီၤသုးခီၣ်ချ့သုးရ့ၣ်(ခမရ–၃၅၈)လၢအဟဲထီၣ်ဆူနိၣ်တကီကီၢ်ဆၣ်ပူၤတဖၣ်အံၤ ခီဖျိကညီဒီကလုာ်တၢ်ထူၣ်ဖျဲးသုးမုၢ်ဒိၣ်-KNLA (သုးရ့ၣ် ၁၇)သုးပာ်ဖှိၣ်နုာ်လီၤခး၀ဲအဃိ တၢ်ဖီၣ်သမူန့ၢ်၀ဲပယီၤသုး(၁၆)ဂၤအကျါပၣ်ဃုာ်၀ဲသုးကျိၤခိၣ်စ့ၢ်ကီးန့ၣ်လီၤႉ
တၢ်ဒွဲၣ်အူအီၣ်သိလ့ၣ်ကဲထီၣ်သး၀ံၤအလီၢ်ခံပယီၤသုးခးလီၤကျိဖးဒိၣ်အဃိလီၢ်က၀ီၤသ၀ီဖိဘၣ်ဒိနးနးကလဲာ်တဂၤ
လါအီးကထိဘၢၣ် ၂၆ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲတနံၤအံၤလါအီးကထိဘၢၣ် ၂၆ သီမုၢ်ဃ့ၢ်လီၤအဆၢကတီၢ်န့ၣ် ပယီၤသုးလၢအအိၣ်ဟဲထီၣ်လၢကီးတရံး၀့ၢ် (စွ့ၤကၠဲၣ်မ့)ဃိၣ်ကျဲတဖၣ်အံၤ ခီဖျိအ၀ဲသ့ၣ်ခးတပျုာ်တပျီာ်ကျိဖးဒိၣ်လၢအ့ရှါကျဲကပိၤကပၤအဃိ (ကၠီၣ်စယ့ၣ်ကိ)သ၀ီဖိဘၣ်ဒိ၀ဲနးနးကလဲာ်တဂၤန့ၣ်လီၤႉ ကၠီၣ်စယ့ၣ်ကိ သ၀ီဖိလၢအအိၣ်(၁၅)နံၣ်ခိၣ်ဃၢၤအံၤဖဲအအိၣ်လၢသ၀ီပူၤအခါ ခီဖျိကျိဖးဒိၣ်လီၤတဲာ်အဃိ ဘၣ်၀ဲဒၣ်အချၢဃံနးနးကလဲာ်ဒီးဘၣ်တၢ်ဆှၢအီၤဆူကီးတရံးတၢ်ဆါဟံၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤၦၤဟ့ၣ်တၢ်ကစီၣ်ဖိအအိၣ်န့ၣ်လီၤႉ လီၢ်က၀ီၤသ၀ီဖိတဂၤစံး၀ဲ“ပယီၤသုးစးထီၣ်ခးလီၤကျိဖးဒိၣ်ကဘၣ်ဖဲမုၢ်ဃ့ၢ်လီၤ ၃ နၣ်ရံၣ်အခိၣ်အဃၢၤန့ၣ်မီၤနီၤႉ လီၤတဲာ်ပိၢ်ဖးထီၣ်လၢ(ကၠီၣ်စယ့ၣ်ကိ)သ၀ီပူၤအဃိဘၣ်၀ဲဒၣ်ဖိသၣ်မုၣ်ဖိတဂၤႉတၢ်ဘၣ်အီၤဖးနးညါႉအထးခိၣ်နါက့ထီၣ်၀ါဒီးသွံၣ်ဒီဒူၣ်ညါအဃိကသံၣ်သရၣ်လၢအိၣ်သ၀ီပူၤတဖၣ်အံၤမၤ၀ဲတဘူၣ်လၢၤဘၣ်ဒီးၦၤဆှၢအီၤလၢကီးတရံးတၢ်ဆါဟံၣ်လီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ ဖဲမဟါလါအီးကထိဘၢၣ် ၂၅ သီ မုၢ်ဃ့ၢ်လီၤ ၃ နၣ်ရံၣ်ဘျဲၣ်အဆၢကတီၢ် လၢကီးတရံး–မၠၣ်၀တံၣ်အ့ရှါကျဲ တလၢထီၣ်ကီၣ်နွဲတိၤဆၢခိၣ် ယွၤသ့ၣ်ကိသ၀ီကပၤ အ့ရှါကျဲမုၢ်ခိၣ်န့ၣ် တၢ်ဒွဲၣ်အူအီၣ်၀ဲသိလ့ၣ်တီၣ်ပနံာ်တၢ်ဖိတၢ်လံၤ(၂)ခိၣ်ကဲထီၣ်သး၀ံၤအလီၢ်ခံကအိၣ်အမံးနံး(၁၀)ဃၣ်ဃၣ်န့ၣ် ကီးတရံးပယီၤသုးခီၣ်သုးရ့ၣ်(ခလရ–၉၇)အံၤခးလီၤ၀ဲကျိဖးဒိၣ်တဖၣ်န့ၣ်လီၤႉ “တချုးတုၤကီၣ်နွဲသ၀ီဒံးဘၣ်န့ၣ်တၢ်ဒုးကဲထီၣ်ဖဲကျဲမုၢ်ဖးဒိၣ်ကပၤန့ၣ်မီၤနီၤႉပယီၤသုးခးလီၤကျိဖးဒိၣ်ႉပယီၤသုးလၢအိၣ်ကီးတရံး၀့ၢ်ပူၤအံၤခးလီၤ၀ဲႉခဲအံၤလၢအ့ရှါကျဲကပၤန့ၣ်ပထံၣ်(BGF)ပာ်လီၤတၢ်ဘံၣ်တၢ်ဘၢဒီဒူၣ်ညါႉသိလ့ၣ်လၢအိၣ်ဟဲလီၤလၢမၠၣ်၀တံၣ်တကပၤန့ၣ်ၦၤကးတံၢ်ဃာ်ကျဲလၢာ်လံ”အဂ့ၢ်န့ၣ်ၦၤနီသိလ့ၣ်ဖိလၢအိၣ်ဟဲလီၤလၢမၠၣ်၀တံၣ်၀့ၢ်တကပၤတဂၤစံးဘၣ်ခ့ၣ်အဲးစံၣ်ဖဲမဟါလါအီးကထိဘၢၣ် ၂၅ သီအနံၤန့ၣ်လီၤႉ ဘၣ်ဃးတၢ်ဒွဲၣ်အူအီၣ်သိလ့ၣ်တၢ်ဂ့ၢ်အံၤမ့ၢ်ကရူၢ်ကရၢဖဲလဲၣ်တကရူၢ်မၤ၀ဲလဲၣ်န့ၣ် လီၢ်က၀ီၤကမျၢၢ်တယးကွၢ်၀ဲတဘၣ်ဘၣ်အသိးဟီၣ်က၀ီၤကရူၢ်ကရၢတဖၣ်စ့ၢ်ကီးထုးထီၣ်ပာ်ဖျါ၀ဲတအိၣ်ဒံးဘၣ်န့ၣ်လီၤႉ တၢ်ဒွဲၣ်အူအီၣ်သိလ့ၣ်တီၣ်ပနံာ်တၢ်ဖိတၢ်လံၤကဲထီၣ်သး၀ံၤအလီၢ်ခံပယီၤသုးဟဲထီၣ်၀ဲဆူ(စွ့ၤကၠဲၣ်မ့)ဃိၣ်ကျဲအဂၤ(၁၀၀)ဃၣ်ဃၣ်ညါဒီးခးလီၤ၀ဲကျိဖးဒိၣ်ဆူသ၀ီပူၤအဃိကျိဖးဒိၣ်လီၤတဲာ်ပိၢ်ဖးထီၣ်လၢကီၣ်နွဲသ၀ီႇကၠီၣ်စယ့ၣ်ကိဒီးယွၤသ့ၣ်ကိသ၀ီခိၣ်သ၀ီဃၢၤဒူသ၀ီတဖၣ်အပူၤန့ၣ်လီၤႉ ဖဲအပူၤကွံာ်လါအီးကထိဘၢၣ် ၂၁ သီအနံၤန့ၣ် ဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA)သုးပာ်ဖှိၣ်နုာ်လီၤခး၀ဲကီးတရံး၀့ၢ်သုးမီၤစိရိၤအ၀ဲၤကျိၤဘၣ်ထွဲ၀ဲၤဒၢးအိၣ်တၢ်လီၢ်၀ံၤအလီၢ်ခံ ခီဖျိသုးမီၤစိရိၤအကဘီယူၤဟဲတ့ၢ်လီၤမ့ၣ်ပိၢ်လၢကီးတရံး၀့ၢ်က၀ီၤဒ့ဒီးဒူသ၀ီတဖၣ်အပူၤအဃိလီၢ်က၀ီၤကမျၢၢ်သံ(၃)ဂၤႇဘၣ်ဒိ၀ဲ(၁၆)ဂၤအဂ့ၢ်န့ၣ်သ့ၣ်ညါဘၣ်န့ၣ်လီၤႉ တၢ်တနံၤဃီ၀ဲန့ၣ်ခီဖျိကီးတရံးပယီၤသုး(ခလရ–၉၇)သုးရ့ၣ်အံၤခးလီၤကျိဖးဒိၣ်ဆူ မၠီၣ်ကၠၤအ့သ၀ီသီခါဖၠၣ်ကရၢၢ်ပူၤအဃိဘၣ်ဒိဘၣ်ထံး၀ဲသီခါ(၂)ပါဒီးလီၢ်က၀ီၤသ၀ီဖိ(၁)ဂၤအဂ့ၢ်န့ၣ် လီၢ်က၀ီၤၦၤဟ့ၣ်တၢ်ကစီၣ်ဖိတဖၣ်စံး၀ဲန့ၣ်လီၤႉ
သုးမီၤစိရိၤကဘီယူၤဟးဆှၣ်တၢ်လၢကညီကီၢ်စဲၣ်ပူၤဟဲအါထီၣ်
လါအီးကထိဘၢၣ် ၂၆ သီႇ ၂၀၂၂ နံၣ်ႇ ခ့ၣ်အဲးစံၣ် စှၤသီအတီၢ်ပူၤလၢကညီကီၢ်စဲၣ် ဖၣ်အၣ်ႇကီးတရံးဒီးမၠၣ်၀တံၣ်ကီၢ်ဆၣ်တဖၣ်အပူၤန့ၣ် ခီဖျိသုးမီၤစိရိၤကဘီယူၤဟးဆှၣ်တၢ်လၢမုၢ်နၤခီဟဲအါထီၣ်အဃိ ဘၣ်အိၣ်လၢတၢ်တၢ်ဘၣ်ယိၣ်ဘၣ်ဘှီတၢ်ပျံၤတၢ်ဖုးအပူၤအဂ့ၢ်န့ၣ်လီၢ်က၀ီၤကမျၢၢ်တဖၣ်စံး၀ဲန့ၣ်လီၤႉ ဖဲအပူၤကွံာ်လါအီးကထိဘၢၣ် ၂၁ သီအနံၤန့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ် နုာ်လီၤခးကီးတရံး၀့ၢ်ပူၤကဲထီၣ်သး၀ံၤအလီၢ်ခံ သုးမီၤစိရိၤက့ၤခီၣ်ဆၢခးလီၤကဒါက့ၤ၀ဲဒီးကဘီယူၤတဖၣ် န့ၣ်လီၤႉ ကတီၢ်ခဲအံၤခီဖျိသုးမီၤစိရိၤကဘီယူၤဟးဆှၣ်ထီၣ်ဆှၣ်လီၤတၢ်ဟဲအါထီၣ်အဃိ ကမျၢၢ်လၢအိၣ်ဖၣ်အၣ်၀့ၢ်ပူၤတဖၣ်ဘၣ််အိၣ်လၢတၢ်ဘၣ်ယိၣ်ဘၣ်ဘှီတၢ်ပျံၤတၢ်ဖုးပူၤအဂ့ၢ်န့ၣ် ကမျၢၢ်လၢအိၣ်၀့ၢ်ပူၤလၢတအဲၣ်ဒိးပာ်ဖျါအမံၤတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“”အပူၤကွံာ်လၢညါတဘျီတခီၣ်န့ၣ်ပထံၣ်ကဘီယူၤယူၤထီၣ်အိၣ်မီၤနီၤႉဖဲပနၢ်ဟူလၢတၢ်ဒုးကဲထီၣ်ဖဲကီးတရံး၀့ၢ်ပူၤဘျီန့ၣ်ပထံၣ်ကဘီယူၤယူၤကိးမုၢ်နံၤမုၢ်နၤဒဲးလီၤႉလၢဖၣ်အၣ်၀့ၢ်ပူၤနါက့တၢ်လီၢ်ကိးတီၤဒဲးလီၤႉအဃိန့ၣ်ပသးကိၢ်တၢ်စ့ၢ်မီၤနီၤႉမ့ၢ်ကဟဲတ့ၢ်လီၤမ့ၣ်ပိၢ်လၢဖၣ်အၣ်ဧါႉမ့၀ံၤၦၤအိၣ်လၢကီးတရံးပူၤတဖၣ်နါက့ပဘၣ်ယိၣ်တၢ်လၢအ၀ဲသ့ၣ်အဂီၢ်စ့ၢ်မီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ လၢန့ၣ်အမဲာ်ညါလၢကညီကီၢ်စဲၣ် မၠၣ်၀တံၣ်၀့ၢ်ပူၤစ့ၢ်ကီး ခီဖျိကဘီယူၤဟးဆှၣ်တၢ်အိၣ်ဒီး သုးတၢ်ဟူးတၢ်ဂဲၤဟဲအါထီၣ်အဃိဘၣ်အိၣ်လၢတၢ်ပျံၤတၢ်ဖုးပူၤစ့ၢ်ကီးအဂ့ၢ်န့ၣ်ကမျၢၢ်လၢအိၣ်၀့ၢ်ပူၤတဂၤ စံး၀ဲဒ်အံၤန့ၣ်လီၤႉ “ပထံၣ်ကဘီယူၤဟးဆှၣ်တၢ်တလီၢ်လီၢ်ဘၣ်ဆၣ်သနါက့ဖဲတၢ်ဒုးကဲထီၣ်လၢကီးတရံး၀့ၢ်ပူၤတနံၤန့ၣ်ကဘီယူၤဒီဒူၣ်ညါမီၤနီၤႉစှၤသီအတီၢ်ပူၤမၠၣ်၀တံၣ်၀့ၢ်ပူၤနါက့တၢ်ပိၢ်ဖးထီၣ်ႇမ့၀ံၤဖဲအပူၤကွံာ်တသီခံသီအခါန့ၣ်ပယီၤသုးကျိၤဟးဆှၣ်တၢ်လၢ၀့ၢ်ပူၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ ခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢကီးတရံး၀့ၢ်ပူၤသၢသီတပယူာ်ဃီအဃိလီၢ်က၀ီၤဒူသ၀ီကမျၢၢ်တဖၣ်ဘၣ်ဟးဃ့ၢ်ပလဲာ်သးအိၣ်၀ဲန့ၣ်လီၤႉကတီၢ်ခဲအံၤလီၢ်က၀ီၤကမျၢၢ်လၢအစံၣ်တဖၣ်စ့ၢ်ကီးသဂၢၢ်ဘၣ်၀ဲအီၣ်အီအိၣ်ဆိးလီၢ်ကျဲတၢ်ကီတၢ်ခဲတဖၣ်အဂ့ၢ်န့ၣ်သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ
သုးမီၤစိရိၤကဘီယူၤအတၢ်လဲၤတ့ၢ်လီၤမ့ၣ်ပိၢ်လၢ(ဖါကၣ်)လီၢ်က၀ီၤအံၤမ့ၢ်တၢ်မၤကမၣ်ထံဂုၤကီၢ်ဂၤကွီၢ်မ့ၣ်အဂ့ၢ်န့ၣ် KNU စံး၀ဲ
လါအီးကထိဘၢၣ် ၂၆ သီႇ ၂၀၂၂ နံၣ်ႇ ခ့ၣ်အဲးစံၣ် လၢကခၠ့ၣ်ကီၢ်စဲၣ် ဖါကၣ်ကီၢ်ဆၣ်အပူၤ သုးမီၤစိရိၤကဘီယူၤအတၢ်လဲၤတ့ၢ်လီၤမ့ၣ်ပိၢ်လၢ တၢ်မၤတၢ်သူၣ်၀ံၣ်သးဆၢမူးသးဖှံအလီၢ်အံၤ ခီဖျိပညိၣ်မၤ၀ဲတၢ်ထီၣ်ဒုးလၢကမျၢၢ်ထံဖိကီၢ်ဖိအဖီခိၣ်အဃိ မ့ၢ်တၢ်လုၢ်သ့ၣ်ခါပတာ်၀ဲထံဂုၤကီၢ်ဂၤအကွီၢ်မ့ၣ်အဂ့ၢ်န့ၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ထုးထီၣ်ပာ်ဖျါ၀ဲဖဲမဟါလါအီးကထိဘၢၣ် ၂၅ သီအနံၤန့ၣ်လီၤႉ လၢကခၠ့ၣ်ကီၢ်စဲၣ် ဖါကၣ်ကီၢ်ဆၣ် အနၣ်ပၤတၢ်လီၢ်န့ၣ် လၢတၢ်ကမၤလၤကပီၤတၢ်ဒုးအိၣ်ထီၣ် ကခၠ့ၣ်တၢ်သဘျ့(KIO)တၢ်ကရၢကရိၦဲၤထီၣ် ၆၂ ၀ီတ၀ီအဂီၢ် ဖဲလါအီးကထိဘၢၣ် ၂၃ သီ ဟါခီ ၈ နၣ်ရံၣ်တခီဃၣ်ဃၣ်အဆၢကတီၢ် သုးမီၤစိရိၤအဒုးသုးကဘီယူၤ(၃)ဘ့ၣ်ဟဲတ့ၢ်လီၤမ့ၣ်ပိၢ်လၢ တၢ်မၤတၢ်သူၣ်၀ံၣ်သးဆၢမူးသးဖှံအလီၢ်န့ၣ်လီၤႉ ခီဖျိသုးမီၤစိရိၤကဘီယူၤလဲၤတ့ၢ်လီၤမ့ၣ်ပိၢ်အဃိကခၠ့ၣ်ၦၤသး၀ံၣ်တၢ်ဖိဃုာ်ဒီးကမျၢၢ်အဂၤ(၈၀)ဘျဲၣ်သံ၀ဲဒီး ဘၣ်ဒိဘၣ်ထံး၀ဲအဂၤ(၁၀၀)ဘျဲၣ်အဂ့ၢ်န့ၣ် လီၢ်က၀ီၤဂံၢ်ခီၣ်ထံးတၢ်ကစီၣ်ထုးထီၣ်ပာ်ဖျါ၀ဲအသိး သ့ၣ်ညါဘၣန့ၣ်လီၤႉ ဒုးသုးကဘီယူၤလၢတၢ်တြီတ့ၢ်ဃာ်၀ဲလၢတၢ်တဘၣ်သူအီၤလၢထံလီၢ်ကီၢ်ပူၤတၢ်ဒုးတၢ်ယၤအပူၤဘၣ်အိၣ်၀ဲဘၣ်ဆၣ်မ့မ့ၢ်တခီသုးမီၤစိရိၤအံၤတနီၤဖး၀ဲၦၤပၢၢ်ဆၢတၢ်ကရူၢ်ကရၢဒီးကမျၢၢ်ထံဖိကီၢ်ဖိတဖၣ်ဘၣ်ဒီးပညိၣ်လဲၤတ့ၢ်လီၤ၀ဲမ့ၣ်ပိၢ်ဒ်အံၤမ့ၢ်တၢ်လုၢ်သ့ၣ်ခါပတာ်မၤကမၣ်၀ဲဒုးယၤကွီၢ်မ့ၣ်(War Crime)လီၤအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤ စံး၀ဲန့ၣ်လီၤႉ လၢတၢ်န့ၣ်အဃိသုးမီၤစိရိၤအံၤအမူအဒါအိၣ်၀ဲလၢအတၢ်မၤကမၣ်ဒုးယၤကွီၢ်မ့ၣ်အဖီခိၣ်အံၤဒီးဒ်သိးကမျၢၢ်ထံဖိကီၢ်ဖိလၢအသံဘၣ်ဒိဘၣ်ထံးလၢအတၢ်ကမၣ်တအိၣ်နီတမံၤဘၣ်သ့ၣ်တဖၣ်အံၤကဒိးန့ၢ်န့ၣ်ဘၣ်တၢ်ထဲသိးတုၤသိးအဂီၢ်ဃ့ထီၣ်၀ဲအသိးထံဂုၤကီၢ်ဂၤပဒိၣ်ဒီးထံဂုၤကီၢ်ဂၤဘၣ်ထွဲသဲစးတၢ်သိၣ်တၢ်သီအတၢ်လဲၤတရံးသးအကျိၤအကျဲတဖၣ်စ့ၢ်ကီးဘၣ်ဃး(International Humanitarian)ဟီၣ်ခိၣ်ဒီဘ့ၣ်ၦၤဂ့ၢ်၀ီ တၢ်ဆီၣ်ထွဲမၤစၢၤသနူအံၤကဘၣ်ဟံးဂ့ၢ်၀ီ၀ဲ ၦၤမၤကမၣ်တၢ်ဖိဒီးၦၤလၢအအိၣ်ခိးနဲၣ်လီၤတၢ်ကလုၢ်တဖၣ်တဲာ်တဲာ်ဖျုဖျုအဂ့ၢ်န့ၣ်ခ့ၣ်အဲၣ်ယူၣ်ဃ့ထီၣ်၀ဲန့ၣ်လီၤႉ သုးမီၤစိရိၤပညိၣ်မၤ၀ဲတၢ်ထီၣ်ဒုးလၢကမျၢၢ်ထံဖိကီၢ်ဖိအဖီခိၣ်အံၤမၤ၀ဲဒ်သိးအ၀ဲသ့ၣ်တၢ်စိတၢ်ကမီၤကအိၣ်ဂၢၢ်ဆိးကျၢၤအဂီၢ်လီၤအဃိတၢ်သူၣ်ဆါသးဆါသးဘၣ်အၢသုးမီၤစိရိၤကဟဲအါထီၣ်၀ဲဒီးသုးမီၤစိရိၤလၢအက့ၤမၤသံမၤ၀ီလီၤက့ၤအထံဖိကီၢ်ဖိကမျၢၢ်အံၤကလုာ်ဒူၣ်ကမျၢၢ်ထံဖိကီၢ်ဖိခဲလၢာ်ကပာ်ဖှိၣ်ထီဒါသကိးသုးမီၤစိရိၤအံၤအဂ့ၢ်န့ၣ်ခ့ၣ်အဲၣ်ယူၣ်စံး၀ဲန့ၣ်လီၤႉ ဒ်န့ၣ်အသိးသုးမီၤစိရိၤအတၢ်ဖံးတၢ်မၤဒ်အံၤသ့ၣ်တဖၣ်မ့ၢ်တၢ်မၤဆီၣ်ခံ၀ဲလၢတၢ်ဒုးတၢ်ယၤကဆူၣ်ထီၣ်လၢထံလီၢ်ကီၢ်ပူၤအဂီၢ်လီၤအသိးလၢတၢ်န့ၣ်အဃိကလုာ်ဒူၣ်ကမျၢၢ်ထံဖိကီၢ်ဖိခဲလၢာ်ကပာ်ဖှိၣ်ထီဒါသကိးသုးမီၤစိရိၤအတၢ်ဖံးတၢ်မၤလၢအလီၤသးဘၣ်အၢ၀ဲအံၤဒီးဒ်သိးသုးမီၤစိရိၤအဂံၢ်ကထီၣ်တဲာ်ကွံာ်အဂီၢ်န့ၣ်ကနုာ်လီၤပၢၢ်ဆၢသကိးဃူဃူအဂ့ၢ်န့ၣ် ခ့ၣ်အဲၣ်ယူၣ်ဆီၣ်တခူထီၣ်၀ဲန့ၣ်လီၤႉ ဒ်ခ့ၣ်အဲၣ်ယူၣ်လံာ်တၢ်ပာ်ဖျါပူၤအသိးန့ၣ်တၢ်ဒုးအိၣ်ထီၣ်ကခၠ့ၣ်တၢ်သဘျ့တၢ်ကရၢကရိၦဲၤထီၣ်(၆၂)၀ီတ၀ီမုၢ်နံၤအံၤအပူၤ သူၣ်အုးသးအုးဃုာ်ဒီးကခၠ့ၣ်ကမျၢၢ်ထံဖိကီၢ်ဖိခဲလၢာ်ဒီး ဒ်တၢ်သ့အိၣ်ဒီးၦၤအသိးကတြီဆၢဒီသဒၢကမျၢၢ် ထံဖိကီၢ်ဖိလၢအစုက၀ဲၤတၢ်ကမၣ်တအိၣ်ဘၣ်တဖၣ်အံၤဒီး ဒ်သိးကလုာ်ဒိၣ်စိသနူဒီးသုးမီၤစိရိၤသနူကကတၢၢ်ကွံာ် အဂီၢ်န့ၣ်ကပာ်ဖှိၣ်နုာ်လီၤပၢၢ်ဆၢသကိးတၢ်ဃုာ်ဒီးတၢ်ပၢၢ်ဆၢကရူၢ်ကရၢတဖၣ်ခဲလၢာ်အဂ့ၢ်န့ၣ်ပာ်ဖျါ၀ဲန့ၣ်လီၤႉ ခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢ(KIO)နံၣ်ဆဲးဆၢတၢ်သူၣ်၀ံၣ်သးဆၢမူးသးဖှံအလီၢ်အဃိ ကမျၢၢ်ဘၣ်သံ၀ဲအါအါဂီၢ်ဂီၢ်တၢ်ဂ့ၢ်အဖီခိၣ်အံၤဒီကလုာ်ဃူဖိးၦၤဟ့ၣ်ကူၣ်တၢ်ကီၣ်ကး(NUCC)ႇဒီကလုာ်ဃူဖိး(NUG)ပဒိၣ်ဃုာ်ဒီးကလုာ်ဒူၣ်ဖီၣ်စုက၀ဲၤကရူၢ်ကရၢဒီးတၢ်ကရၢကရိလၢအဟူးဂဲၤမၤတၢ်လၢၦၤဂ့ၢ်၀ီခွဲးယာ်တဖၣ်စ့ၢ်ကီး ထီဒါ၀ဲတဲာ်တဲာ်ဖျုဖျုအဂ့ၢ်န့ၣ်ထုးထီၣ်ဘိးဘၣ်ရၤလီၤ၀ဲစုာ်စုာ်န့ၣ်လီၤႉ လၢန့ၣ်အမဲာ်ညါဘၣ်ဃးသုးမီၤစိရိၤကဘီယူၤလဲၤခးလီၤတၢ်အဖီခိၣ်အံၤဘီမုၢ်စၢဖှိၣ်ကရၢလၢအိၣ်ဆီလီၤသးကီၢ်ပယီၤပူၤဃုာ်ဒီးကီၢ်အီးစထြ့လယါႇခဲနဒၣ်ႇကီၢ်ပယီၤဘၣ်ထွဲယူရပၤကီၢ်စၢဖှိၣ်မီၢ်သီ၀ဲၤဒၢးဒီးယူရပၤကီၢ်စၢဖှိၣ်ကရၢဖိအထံကီၢ်မီၢ်သီ၀ဲၤဒၢးတဖၣ်လၢအမ့ၢ် ခၠဲၣ်ကီၢ်ခိၣ်ထံကီၢ်ႇဒ့မၣ်ႇဖ့ၣ်လဲၣ်ႇပၠ့ၤသ့ၣ်ႇကၠၢၣ်မနံၣ်ႇအံၣ်တလံၣ်ႇ နဲၣ်သလဲၣ်ႇစပ့ၤဒီး ဆွံၣ်ဒ့ၣ်ထံကီၢ်တဖၣ်တကးဒံးဘၣ်အမဲာ်ညါနီၣ်၀့ႇဆွံၣ်စလဲၣ်ႇယူၣ်ခ့ၣ်ဒီးအမဲရံၣ်ကၣ်ထံကီၢ်အမီၢ်သီဘၣ်ထွဲကီၢ်ပယီၤတဖၣ်ႇမီၢ်သီ၀ဲၤဒၢးမူဒါခိၣ်တစိၢ်တလီၢ်တဖၣ်ဒီးမီၢ်သီ၀ဲၤဒၢးၦၤခိၣ်ဒိၣ်နၢ်လဲၢ်တဖၣ်စ့ၢ်ကီးထုးထီၣ်သဃဲၤ၀ဲလံာ်တၢ်ပာ်ဖျါန့ၣ်လီၤႉ
သုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်(၃)သီတပယူာ်ဃီအဃိကီးတရံးလီၢ်က၀ီၤဖိလၢအဘၣ်စံၣ်တဖၣ်ထံၣ်ဘၣ်အီၣ်အီအိၣ်ဆိးလီၢ်ကျဲတၢ်ကီတၢ်ခဲ
လါအီးကထိဘၢၣ် ၂၅ သီႇ ၂၀၂၂ နံၣ်ႇ ခ့ၣ်အဲးစံၣ် ခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်(၃)သီတပယူာ်ဃီအဃိကီးတရံး၀့ၢ်ခိၣ်၀့ၢ်ဃၢၤဒူသ၀ီလီၢ်က၀ီၤဖိလၢအဘၣ်စံၣ်မံကိးမုၢ်နၤဒဲးသ့ၣ်တဖၣ်အံၤထံၣ်ဘၣ်၀ဲအီၣ်အီအိၣ်ဆိးလီၢ်ကျဲတၢ်ကီတၢ်ခဲအဂ့ၢ်န့ၣ်သ့ၣ်ညါဘၣ်လၢလီၢ်က၀ီၤဖိတဖၣ်အအိၣ်န့ၣ်လီၤႉ ဖဲအပူၤကွံာ်လါအီးကထိဘၢၣ် ၂၁ သီအနံၤန့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ် နုာ်လီၤခး၀ဲကီးတရံး၀့ၢ်သုးမီၤစိရိၤအ၀ဲၤကျိၤဘၣ်ထွဲ၀ဲၤဒၢးတၢ်လီၢ်တဖၣ်ကဲထီၣ်သး၀ံၤအလီၢ်ခံခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်ကိးမုၢ်နၤဒဲးအဃိလီၢ်က၀ီၤသ၀ီဖိတဖၣ်ဘၣ်လဲၤစံၣ်မံ၀ဲသီခါဖၠၣ်ကရၢၢ်ပူၤဒီးတၢ်လီၢ်အဂၤအဃိတၢ်ကီတၢ်ခဲအိၣ်ထီၣ်လၢအီၣ်အီအိၣ်ဆိးလီၢ်ကျဲအဂ့ၢ်န့ၣ်လဲၤကွဲၤလီၢ်က၀ီၤဖိတဂၤစံး၀ဲဒ်အံၤန့ၣ်လီၤႉ “ကဘီယူၤဟဲခးလီၤတၢ်ဒီးတနၤညါအံၤအိၣ်သၢနၤလံအဃိၦၤသ၀ီဖိတဖၣ်မံလၢသ၀ီပူၤတဘူၣ်လၢၤဘၣ်ႉ ခဲအံၤပယီၤသုးဒီး(BGF)ကနုာ်လီၤမၤရှဲလဲဟီၣ်က၀ီၤႉတၢ်ကစီၣ်ဟူထီၣ်လၢကနုာ်လီၤသမံသမိးတၢ်လၢသ၀ီပူၤမ့ၢ်(PDF)သုးအိၣ်ဧါတအိၣ်ဧါအဃိၦၤအိၣ်တဘူၣ်လၢၤဘၣ်ႉကညီကရူၢ်လဲၤခးလီၤအ၀ဲသ့ၣ်ဒီးကဘီယူၤဒြိႇပယီၤသုးခီဟဲက့ၤခးလီၤတၢ်ဒီးကဘီယူၤအဃိသ၀ီဖိတဖၣ်စံၣ်လၢာ်လံႉသ၀ီဖိတဖၣ်ခဲအံၤလဲၤစံၣ်အိၣ်၀ဲလၢသီခါဖၠၣ်ဖီလာ်ဒ်န့ၣ်လီၤႉသ၀ီလၢအိၣ်ကီးတရံး၀့ၢ်ခိၣ်၀့ၢ်ဃၢၤ၀း၀းတရံးန့ၣ်တၢ်အိၣ်သးတဂ့ၤဘၣ်အဃိသ၀ီဖိဟးစံၣ်ပလဲာ်သးလၢၤလံ”အဂ့ၢ်န့ၣ်စံးဘၣ်ခ့ၣ်အဲးစံၣ်ဖဲမဟါန့ၣ်လီၤႉ ဖဲအပူၤကွံာ်လါအီးကထိဘၢၣ် ၁၉ သီအနံၤ လၢမၠၣ်၀တံၣ်–ကီးတရံးအ့ရှါကျဲသီန့ၣ် တၢ်ဒုးကဲထီၣ်၀ဲလၢပယီၤသုးဒီး(KNLA)သုးပာ်ဖှိၣ်အဘၢၣ်စၢၤအဃိ ဖဲ ၂၁ သီအနံၤန့ၣ် တၢ်ပၢၢ်ဆၢသုးပာ်ဖှိၣ်နုာ်လီၤခး ၀ဲကီးတရံး၀့ၢ်သုးမီၤစိရိၤအ၀ဲၤဒၢးတၢ်လီၢ်ဒီးသုးခိးကီၢ်ဆၢ(BGF)ႇပယီၤသုးတြဲၤလၢအိၣ်ခိးထၢအီၣ်စ့ဖဲခွံတၢၣ်–တီၤကၠၤအ့ႇမၠီၣ်ကၠၤအ့ကျဲဒီတကျိၤအံၤတဖၣ်န့ၣ်လီၤႉ (KNLA)သုးပာ်ဖှိၣ်နုာ်လီၤခးကီးတရံး၀့ၢ်ပူၤအခါန့ၣ်ပယီၤသုးဒီး(BGF)သံဘၣ်ဒိဘၣ်ထံး၀ဲအါမးအသိး မၤန့ၢ်၀ဲကျိချံၦာ်သၣ်ဒီးမၤဟးဂီၤကွံာ်၀ဲတြဲၤလၢအအိၣ်ခိးဃ့အီၣ်ကမျၢၢ်စ့တဖၣ်အဂ့ၢ်န့ၣ်တၢ်ပၢၢ်ဆၢကရူၢ်ထုးထီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ “လဲၤလၢကြုၢ်တုတကပၤန့ၣ်ဒီး(BGF)တြဲၤဃ့အီၣ်စ့ႉမ့လဲၤလၢကၠၤအ့တကပၤခီဒီးပယီၤသုးႇ(BGF)တြဲၤဃ့စ့အဃိကျဲလၢအိၣ်လီၢ်က၀ီၤပူၤဖဲအံၤတဖၣ်န့ၣ်သ၀ီဖိဘၣ်ဟ့ၣ်တြဲၤအဘူးအလဲအါမးလီၤႉတြဲၤလၢအိၣ်ခိးသမံသမိးတၢ်န့ၣ်ကအိၣ်အဖျၢၣ်(၂၀)ညါအဃိၦၤတူၢ်တန့ၢ်လၢၤဘၣ်ႉကညီသုးနုာ်လီၤခး၀ဲအခါန့ၣ်ပယီၤသုးဒီး(BGF)သံဒီဒူၣ်ညါႉၦၤသံစိၣ်နၢအုၣ်နၢပိးလၢရီဘၢၣ်ကျီးကျဲကပၤန့ၣ်ဒီဒူၣ်ညါႉအၦၤသံစိၣ်တဖၣ်န့ၣ်အ၀ဲသ့ၣ်တဟဲထၢ၀ဲဘၣ်ႉခဲအံၤအ၀ဲသ့ၣ်တြဲၤတအိၣ်တ့ၢ်အါအါလၢၤဘၣ်”အဂ့ၢ်န့ၣ်လီၢ်က၀ီၤဖိတဂၤစံးဘၣ်ခ့ၣ်အဲးစံၣ်န့ၣ်လီၤႉ ကီးတရံးဟီၣ်က၀ီၤအပူၤ(KNLA)သုးပာ်ဖှိၣ်ကရူၢ်နုာ်လီၤမၤ၀ဲဒုးယၤတၢ်ဟူးတၢ်ဂဲၤအါထီၣ်အဃိ ပယီၤသုးႇသုးခိးကီၢ်ဆၢ(BGF)သုးပာ်ဖှိၣ်တဖၣ်ဟးဆှၢတၢ်လၢကီးတရံး၀့ၢ်ပူၤ၀့ၢ်ချၢတၢ်လီၢ်တဖၣ်ဒီး လၢမုၢ်နၤခီစ့ၢ်ကီးခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်အဃိကီးတရံးလီၢ်က၀ီၤသ၀ီဖိတဖၣ်ဘၣ်ဟးစံၣ်အိၣ်ခူသူၣ်၀ဲန့ၣ်လီၤႉ လၢန့ၣ်အမဲာ်ညါတၢ်ဒုးမ့ဆဲးဆူၣ်ထီၣ်ကွ့ၢ်ကွ့ၢ်န့ၣ်ၦၤဃ့ၢ်မှံးဟးဖျိးအနီၣ်ဂံၢ်ကအါထီၣ်၀ဲဒီး တၢ်ကီတၢ်ခဲကဟဲအိၣ်ထီၣ်၀ဲလၢတၢ်အီၣ်တၢ်အီတၢ်အိၣ်တၢ်ဆိးလီၢ်ကျဲတကပၤစ့ၢ်ကီးအဂ့ၢ်န့ၣ် ၦၤလၢမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ
တၢ်ဒုးကဲထီၣ်လၢကီးတရံး၀့ၢ်ပူၤအဃိကမျၢၢ်တဖၣ်ပျံၤတၢ်ဖုးတၢ်ႇတၢ်ကးတံၢ်ကွံာ်ကၠိတဖၣ်
လါအီးကထိဘၢၣ် ၂၅ သီႇ ၂၀၂၂ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ကီးတရံး၀့ၢ်ပူၤ ခီဖျိပယီၤသုးဒီးတၢ်ပၢၢ်ဆၢသုးပာ်ဖှိၣ်တဖၣ်အဘၢၣ်စၢၤ တၢ်ဒုးကဲထီၣ်အဃိ လီၢ်က၀ီၤကမျၢၢ်ထံဖိကီၢ်ဖိတဖၣ်ပျံၤတၢ်ဖုးတၢ်ဒီးကတီၢ်ခဲအံၤတၢ်ကးတံၢ်ကွံာ်၀ဲ ကၠိသ့ၣ်တဖၣ်လံအဂ့ၢ်န့ၣ် လီၢ်က၀ီၤဖိစံးဘၣ်ခ့ၣ်အဲးစံၣ်န့ၣ်လီၤႉ ဖဲအပူၤကွံာ်လါအီးကထိဘၢၣ် ၂၁ သီ ဂီၤခီ ၇ နၣ်ရံၣ်ဘျဲၣ်အဆၢကတီၢ်န့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ႇကီၢ်သူလ့ၤသုးမုၢ်ဒိၣ်(KTLA)သုးပာ်ဖှိၣ်နုာ်လီၤခး၀ဲကီးတရံး၀့ၢ်က၀ီၤဒ့(၇)လၢသုးမီၤစိရိၤအ၀ဲၤဒၢးဒီး၀ဲၤကျိၤဘၣ်ထွဲ၀ဲၤဒၢးအိၣ်ဆီလီၤသးတၢ်လီၢ်တဖၣ်ဒီးတၢ်ဒုးစးထီၣ်ကဲထီၣ်၀ဲန့ၣ်လီၤႉ တၢ်ဒုးကဲထီၣ်၀ံၤအလီၢ်ခံခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢ(KNLA)ဒီး(KTLA)သုးပာ်ဖှိၣ်ဟူးဂဲၤအိၣ်အလီၢ်တဖၣ်ဒီးလီၢ်က၀ီၤကညီဒူသ၀ီပူၤအဃိလီၢ်က၀ီၤကမျၢၢ်သံဘၣ်ဒိဘၣ်ထံးအိၣ်ဒီးမ့ၣ်အူအီၣ်ဟးဂီၤ၀ဲတၢ်ဘူၣ်တၢ်ဘါတၢ်သူၣ်ထီၣ်ဃုာ်ဒီးဟံၣ်ဃီႇကျီးကရၢၢ်တဖၣ်အိၣ်၀ဲန့ၣ်လီၤႉ ခီဖျိတၢ်ကဲထီၣ်သးဒ်အံၤအဃိကီးတရံးလီၢ်က၀ီၤကမျၢၢ်သ့ၣ်တဖၣ်ဘၣ်ယိၣ်ဘၣ်ဘှီပျံၤတၢ်ဖုးတၢ်ဒီး အ၀ဲသ့ၣ်တပျဲလဲၤထီၣ်အဒံၣ်အဖိကၠိလၢၤဘၣ်အဂ့ၢ်န့ၣ် ကီးတရံးကီၢ်ဆၣ် နဘူသ၀ီ လီၢ်က၀ီၤကၠိဖိမိၢ်ပၢ်တဂၤ စံးဘၣ်ခ့ၣ်အဲးစံၣ်ဒ်အံၤန့ၣ်လီၤႉ “တၢ်ဒုးကဲထီၣ်အဃိကၠိဖိမိၢ်ပၢ်တဖၣ်ကပျဲလဲၤထီၣ်အဒံၣ်အဖိကၠိဒ်လဲၣ်ႉကဘီယူၤစ့ၢ်ကီးဟဲခးလီၤတၢ်ႇခးလီၤလၢသ၀ီပူၤႉခဲအံၤနဘူကၠိနါက့တၢ်ကးတံၢ်အီၤလံႉကၠိလၢအိၣ်ကီးတရံးကီၢ်ဆၣ်ပူၤတဖၣ်အါဒၣ်တက့ၢ်န့ၣ်တၢ်ကးတံၢ်ကွံာ်အီၤလံမီၤနီၤ”အဂ့ၢ်န့ၣ်အ၀ဲစံး၀ဲန့ၣ်လီၤႉ တၢ်ဒုးကဲထီၣ်အဃိကီးတရံးကီၢ်ဆၣ်အပူၤလီၢ်က၀ီၤကၠိဖိမိၢ်ပၢ်တဖၣ်ခီဖျိအ၀ဲသ့ၣ်သူၣ်ကိၢ်သးဂီၤတၢ်လၢအဒံၣ်အဖိဂီၢ်အဃိကၠိဖိမိၢ်ပၢ်ႇကၠိကမံးတံာ်ဒီးကၠိသရၣ်၊မုၣ်တဖၣ်မၤ၀ဲတၢ်အိၣ်ဖှိၣ်ဒီးဘၣ်တၢ်ကးတံၢ်ကွံာ်ကၠိဒ်အံၤလီၤအဂ့ၢ်န့ၣ်ကၠိသရၣ်တဂၤစံး၀ဲန့ၣ်လီၤႉ ကၠိသရၣ်တဂၤစံး၀ဲလၢ“ၦၤလၢအိၣ်သ၀ီဖဲအံၤတဖၣ်န့ၣ်အ၀ဲသ့ၣ်ပျံၤတၢ်မီၤနီၤႉတနီၤန့ၣ်စံၣ်လၢၤလံႉၦၤလၢအအိၣ်တ့ၢ်တဖၣ်နါက့အိၣ်ခိးကွၢ်၀ဲတၢ်အိၣ်သးမီၤနီၤႉအ၀ဲသ့ၣ်ကဒုးထီၣ်အဖိကၠိအဂီၢ်န့ၣ်သူၣ်ကိၢ်သးဂီၤ၀ဲအဃိတၢ်ကးတံၢ်ကွံာ်ကၠိဒ်အံၤလီၤ”အဂ့ၢ်န့ၣ်စံး၀ဲန့ၣ်လီၤႉ ခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢကီးတရံးကီၢ်ဆၣ် ကီမူၣ်ႇပၠါပ့ၤႇခန့မူၤက၀ီၤဒ့ဒီး ကညီဒူသ၀ီတဖၣ်အပူၤအဃိတၢ်သံတၢ်ဘၣ်ဒိဘၣ်ထံးဒီးဟံၣ်ဃီႇကျီးကရၢၢ်တၢ်ဖံးအီၣ်မၤအီၣ်လီၢ်ဟးဂူူာ်ဟးဂီၤအနီၣ်ဂံၢ်နီၣ်ဒွးခီန့ၣ်ခ့ၣ်အဲးစံၣ်–ကညီတၢ်ကစီၣ်၀ဲၤလီၢ်ခိၣ်သ့ၣ်ပာ်ဂၢၢ်ပာ်ကျၢၤ၀ဲတန့ၢ်ဒံးဘၣ်န့ၣ်လီၤႉ