တၢ်ၦ့ၤထီၣ်ဘၣ်ဆၣ် သဲးသၣ်အၦ့ၤတထီၣ်
လါဖ့ၤဘြူၤအါရံၤ ၂၁ သီႇ ၂၀၂၂ နံၣ်ႇ ခ့ၣ်အဲးစံၣ် ကညီကီၢ်စဲၣ်ပူၤတၢ်ဖိတၢ်လံၤအၦ့ၤထီၣ်၀ဲဘၣ်ဆၣ် ၦၤသူၣ်အီၣ်သဲးသၣ်တဖၣ်အဂီၢ်န့ၣ်သဲးသၣ်အၦ့ၤတထီၣ်၀ဲဘၣ်အိၣ်၀ဲဂၢၢ်တပၢၢ်လီၤအဂ့ၢ်န့ၣ် ၦၤမၤအီၣ်သဲးဖိတဖၣ်စံး၀ဲန့ၣ်လီၤႉ ကၠၤအ့စ့ၣ်ကၠံကီၢ်ဆၣ် ကၠဲးဒိလီၢ်က၀ီၤ ၦၤမၤသဲးဖိတဂၤစံး၀ဲ“သဲးသၣ်အၦ့ၤဒုအိၣ်ဒ်သိးအပူၤကွံာ်တနံၣ်န့ၣ်လီၤႉ တၢ်ဖိတၢ်လံၤလၢအဂၤအၦ့ၤထီၣ်နါက့မ့မ့ၢ်သဲးသၣ်အၦ့ၤန့ၣ်တထီၣ်ဘၣ်အိၣ်ဂၢၢ်တပၢၢ်လီၤႉ ခဲအံၤၦၤၦ့ၤ သဲးသၣ်ဖိတဖၣ်တဟးၦ့ၤသဲးသၣ်ဘၣ်ႉ အပူၤကွံာ်န့ၣ်ၦၤအိၣ်လၢတၢ်လီၢ်ယံၤတဖၣ်ဟဲၦ့ၤ၀ဲလီၤႉ လၢတၢ်စူၤခါအဆၢကတီၢ်နါက့ဟဲၦ့ၤ၀ဲအိၣ်လီၤႉ မ့မ့ၢ်သဲးဃ့န့ၣ်တနံၣ်အံၤၦၤဟဲၦ့ၤတအိၣ်ဘၣ်ႉ ဘၣ်အိၣ်ခိးလၢအၦ့ၤထီၣ်မးလီၤမီၤနီၤႉအၦ့ၤမ့တထီၣ်ဘၣ်ဒုကဘၣ်တူၢ်ဆှူဆါကွံာ်အီၤလီၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ တနံၣ်ညါအံၤသဲးသၣ်အၦ့ၤတဂ့ၤဘၣ်တကးဒံးအမဲာ်ညါခီဖျိတၢ်လီၢ်လၢသဲးသၣ်ဟးထီၣ်တနီၤအပူၤန့ၣ်တၢ်အိၣ်သးတဂၢၢ်တကျၢၤဒီးတၢ်ဒုးတၢ်အိၣ်သးအဃိ တၢ်ကီတၢ်ခဲအိၣ်လၢတၢ်ကစိာ်ဆှၢသဲးသၣ်အဂီၢ်ဒီး တၢ်ဆါတၢ်ၦ့ၤလီၤစှၤ၀ဲလၢလီၢ်က၀ီၤတဖၣ်အပူၤစ့ၢ်ကီးအဂ့ၢ်န့ၣ် ၦၤသူၣ်သဲးဖိတဖၣ်စံး၀ဲန့ၣ်လီၤႉ ၦၤသူၣ်သဲးဖိတဖၣ်အါဒၣ်တက့ၢ်န့ၣ်ပာ်ဃ့ဃာ်၀ဲအသဲးသၣ်တဖၣ်ဒီး ဖဲအၦ့ၤဂ့ၤတၢ်ကိၢ်ခါၦၤဟဲၦ့ၤအါအဆၢကတီၢ်န့ၣ်အ၀ဲသ့ၣ်ထုးထီၣ်ဆါ၀ဲအသဲးသၣ်တဖၣ်န့ၣ်လီၤႉ ဂံၢ်ခီၣ်ထံးတၢ်အီၣ်တၢ်အီအၦ့ၤထီၣ်အကတီၢ်မုၢ်လၢ်၀ဲလၢလီၢ်က၀ီၤပူၤသဲးသၣ်အၦ့ၤကထီၣ်စ့ၢ်ကီးအဂ့ၢ်န့ၣ် ၦၤမၤသဲးဖိတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ ဒိးသန့ၤထီၣ်သးလၢတၢ်လီၢ်အဖီခိၣ်ဒီးခီဖျိသဲးသၣ်အကလုာ်ဒီးအဒိၣ်အဆံးတဒ်သိးဘၣ်အဃိ သဲးသၣ်အံၤအၦ့ၤလီၤဆီလိာ်အသးအသိး တၢ်လီၢ်တနီၤနီၤန့ၣ်သဲးသၣ်ဟးထီၣ်ထဲအ၀ါတကလုာ်လီၤဒီး တၢ်လီၢ်တနီၤစ့ၢ်ကီးသဲးသၣ်အဃးဒီးအ၀ါအၦ့ၤလီၤဆီလိာ်အသးန့ၣ်လီၤႉ ကၠၤအ့စ့ၣ်ကၠံကီၢ်ဆၣ် ကၠဲးဒိလီၢ်က၀ီၤ သဲးသၣ်ဟးထီၣ်အါကတၢၢ်လၢအမ့ၢ်မဲးတီႇမံၣ်နါအၣ်ဒီးကၠီၣ်ထၣ်သ၀ီတကပၤန့ၣ် ကတီၢ်အံၤသဲး၀ါခိၣ်တပီၢ်န့ၣ်အၦ့ၤအိၣ်၀ဲ(၄၇၀၀)ကၠးႇအဃးတပီၢ်န့ၣ်အၦ့ၤအိၣ်၀ဲ(၄၂၀၀)ကၠးအမဲာ်ညါ မ့မ့ၢ်သဲးသၣ်လၢအဟးထီၣ်လၢကီးတရံးကီၢ်ဆၣ်ပူၤတဖၣ် သဲး၀ါခိၣ်တပီၢ်န့ၣ်အၦ့ၤအိၣ်၀ဲ(၅၅၀၀)ကၠးအဂ့ၢ်န့ၣ် ၦၤမၤအီၣ်သဲးဖိတဖၣ်စံး၀ဲန့ၣ်လီၤႉ ၦၤၦ့ၤဆါသဲးသၣ်တဂၤစံး၀ဲလၢ“ပ၀ဲဒၣ်ဒုပက့ၤဆါကဒါတၢ်လီၢ်ကိးတီၤဒဲးလီၤႉ အပူၤကွံာ်န့ၣ်ပလဲၤဆါလၢမၠၣ်၀တံၣ်တကပၤစ့ၢ်ကီးအိၣ်လီၤႉ လၢယိၤကီၢ်တကပၤနါက့ပဆှၢလီၤႉ လၢ၀့ၢ်ပူၤနါက့လဲၤဆါအိၣ်လီၤႉ ခဲအံၤခီဖျိတၢ်ဒုးတၢ်အိၣ်သးအဃိတၢ်လီၢ်တနီၤန့ၣ်လဲၤဆါတဘၣ်ဂီၢ်လၢၤဘၣ်ႉ သဲးအၦ့ၤတအိၣ်ဘၣ်အဃိဘၣ်ဆိကတီၢ်တၢ်ဟးၦ့ၤသဲးသၣ်တစိၢ်ဖိလီၤႉ ဘၣ်အိၣ်ခးကွၢ်တလါအံၤတၢ်အိၣ်သးတစဲးဒံးလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ လၢန့ၣ်အမဲာ်ညါလၢကညီကီၢ်စဲၣ်ဖၣ်အၣ်ကီၢ်ဆၣ်အပူၤစ့ၢ်ကီး တနံၣ်အံၤသဲးသၣ်စးထီၣ်ပၢၢ်ထီၣ်သီအကတီၢ် တပီၢ်န့ၣ်အၦ့ၤအိၣ်၀ဲ(၈၅၀၀)ကၠးညါဘၣ်ဆၣ် တကီၢ်ခါခဲအံၤအၦ့ၤအိၣ်တ့ၢ်က့ၤထဲ(၇၀၀၀)ခိၣ်ဃၢၤလီၤအဂ့ၢ်န့ၣ် သ့ၣ်ညါဘၣ်လၢကျးလၢအၦ့ၤဆါသဲးသၣ်တဖၣ်အအိၣ်န့ၣ်လီၤႉ
လီၢ်က၀ီၤဖိသံဘၣ်ဒိဘၣ်ထံးခီဖျိပယီၤသုးလၢအိၣ်ကီးတရံးအံၤခးလီၤကျိဖးဒိၣ်
လါဖ့ၤဘြူၤအါရံၤ ၁၈ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲတနံၤအံၤလါဖ့ၤဘြူၤအါရံၤ ၁၈ သီ ဂီၤခီအဆၢကတီၢ် ခီဖျိပယီၤသုးရ့ၣ်(ခလရ-၉၇)ကျိဖးဒိၣ်လူၢ်လၢအအိၣ်ဖဲကီးတရံး၀့ၢ်အံၤခးလီၤကျိဖးဒိၣ်ဆူကီးတရံးကလံၤထံးကမဲၢ်ကိသ၀ီပူၤအဃိ လီၢ်က၀ီၤပိာ်မုၣ်သံ၀ဲတဂၤဒီးပိာ်ခွါတဂၤဘၣ်ဒိဘၣ်ထံး၀ဲနးနးကလဲာ်အဂ့ၢ်န့ၣ် သ၀ီဖိတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ ဖဲမဟါလါဖ့ၤဘြူၤအါရံၤ ၁၇ သီ ဟါခီ ၇ နၣ်ရံၣ်တုၤလၢမုၢ်နၤခီ ၉ နၣ်ရံၣ်ဘျဲၣ်အဆၢကတီၢ် တၢ်ခးလိာ်သးကဲထီၣ်၀ဲလၢပယီၤသုးကျိၤဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်-KNLA(သုးက့ ၆) စုတီၤအဖီလာ်သုးရ့ၣ်(၂၇)သုးပာ်ဖှိၣ်တဖၣ်အဘၢစၢၤဒီး ဖဲန့ၣ်ခီဖျိပယီၤသုး(ခလရ-၉၇)သုးရ့ၣ်ကျိဖးဒိၣ်လူၢ်လၢအအိၣ်ဖဲကီးတရံး၀့ၢ်အံၤခးလီၤကျိဖးဒိၣ်ကအိၣ်လၢအထံၣ်(၃၀)ဃၣ်ဃၣ်ညါအဃိ ကမဲၢ်ကိသ၀ီဖိအဟံၣ်အဃီတနီၤဟးဂုာ်ဟးဂီၤ၀ဲဒၣ်န့ၣ်လီၤႉ လၢန့ၣ်အမဲာ်ညါဖဲတနံၤအံၤလါဖ့ၤဘြူၤအါရံၤ ၁၈ သီ ဂီၤခီအဆၢကတီၢ်စ့ၢ်ကီး ခီဖျိပယီၤသုး(ခလရ-၉၇)ကျိဖးဒိၣ်လူၢ်အံၤခးလီၤကဒီးကျိဖးဒိၣ်ဒီးခီဖျိကျိဖးဒိၣ်ချံလီၤတဲာ်ပိၢ်ဖးထီၣ်၀ဲလၢဟံၣ်ကရၢၢ်ပူၤအဃိ ကမဲၢ်ကိသ၀ီဖိစီၤကၠီၤဖီၣ်ဘၣ်ဒိဘၣ်ထံး၀ဲနးနးကလဲာ်ဒီးအမါနီၢ်ဖုၣ်တ့ၤ(၄၈)နံၣ်သံကွံာ်၀ဲအဂ့ၢ်န့ၣ် လီၢ်က၀ီၤသ၀ီဖိတဖၣ်စံး၀ဲန့ၣ်လီၤႉ “တၢ်ဒုးကဲထီၣ်လၢညါတဘျီန့ၣ်သ၀ီဖိတဖၣ်လဲၤစံၣ်အိၣ်၀ဲဒၣ်လၢသိစဲၤသိဆူၣ်သ၀ီတကပၤန့ၣ်လီၤႉ ဖဲစှၤသီအတီၢ်ပူၤအံၤဆိမိၣ်လၢတၢ်အိၣ်သးဂ့ၤထီၣ်လံဒီးဟဲက့ၤလၢသ၀ီပူၤမီၤနီၤႉ ဖဲမဟါမုၢ်နၤခီန့ၣ်ခးလီၤ၀ဲကျိဖးဒိၣ်လၢသ၀ီပူၤလီၤႉ ဖဲမနၤန့ၣ်တၢ်ဒုးကဲထီၣ်ႇတဂီၤညါအံၤစ့ၢ်ကီးခးကဒီး၀ဲလီၤႉ ဖဲဂီၤခီ ၈ နၣ်ရံၣ်ဘျဲၣ်အခါစ့ၢ်ကီး ကီးတရံးပယီၤသုးသုးရ့ၣ်(၉၇)ခးလီၤကျိဖးဒိၣ်အဃိ ကျိချံလီၤတဲာ်၀ဲဒၣ်လၢနီၢ်ဖုၣ်တ့ၤအဟံၣ်ကရၢၢ်ပူၤဒီးသံ၀ဲလီၤႉ မ့မ့ၢ်အ၀ၤခီန့ၣ်ဘၣ်ဒိဘၣ်ထံး၀ဲလီၤ”အဂ့ၢ်န့ၣ် ကမဲၢ်ကိၦၤဃ့ၢ်တၢ်ဒုးတဂၤစံး၀ဲန့ၣ်လီၤႉ စးထီၣ်ဖဲလါဖ့ၤဘြူၤအါရံၤ ၁၄ သီအနံၤန့ၣ် လၢကီးတရံးဟီၣ်က၀ီၤအပူၤ ခီဖျိပယီၤသုးႇသုးခိးကီၢ်ဆၢ(BGF)သုးပာ်ဖှိၣ်တဖၣ်နုာ်လီၤမၤအါထီၣ်အဂံၢ်ဘါလၢခ့ၣ်အဲၣ်ယူၣ်(သုးက့ ၆)ဟီၣ်က၀ီၤပူၤအဃိ အီးဖးဖးဒိၣ်ႇယ့ၤကၠီၤကၠံႇကမဲၢ်ကိသ၀ီတကပၤန့ၣ် တၢ်ဒုးကဲထီၣ်အိၣ်၀ဲကိးမုၢ်နံၤဒဲးဃၣ်ဃၣ်ညါအဂ့ၢ်န့ၣ် လီၢ်က၀ီၤတၢ်ကကစီၣ်စံး၀ဲအသိးသ့ၣ်ညါဘၣ်န့ၣ်လီၤႉ အပူၤကွံာ်လါယနူၤအါရံၤအတီၢ်ပူၤခီဖျိတၢ်ဒုးကဲထီၣ်အဃိ ဖဲၦၤဃ့ၢ်တၢ်ဒုးဖိတဖၣ် ကက့ၤအိၣ်လၢအဒူသ၀ီဟဲက့ၤအဆၢကတီၢ် ခီဖျိတၢ်ဒုးက့ၤကဲထီၣ်ကဒါအဃိ အီးဖးဖးဒိၣ်ႇ ကမဲၢ်ကိသ၀ီဖိ(၁၀၀၀)ဘျဲၣ်ဘၣ်ဃ့ၢ်မှံဟးဖျိးကဒီး၀ဲအသိး ခီဖျိကဘီယူၤဟဲခးလီၤတၢ်သ့၀ဲအဃိ သ၀ီဖိလၢအိၣ်ဘူးဖဲန့ၣ်သ့ၣ်တဖၣ်ဘၣ်ယိၣ်၀ဲလၢတၢ်ဒုးကကဲထီၣ်ကဒါအဂ့ၢ်န့ၣ် ၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ
ဖလူတၢ်ဒုး ပယီၤသုးသံတစှၤန့ၢ်(၁၀)ဂၤဘၣ်ဒီး(KNLA)မၤန့ၢ်ကျိဖးဒိၣ်ကျိဖိတနီၤ
လါဖ့ၤဘြူၤအါရံၤ ၁၇ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲမဟါလါဖ့ၤဘြူၤအါရံၤ ၁၆ သီအနံၤ လၢဖလူဟီၣ်က၀ီၤအပူၤ တၢ်ဒုးကဲထီၣ်လၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ဒီးပယီၤသုးႇသုးခိးကီၢ်ဆၢ(BGF)သုးပာ်ဖှိၣ်တဖၣ်အဘၢၣ်စၢၤအံၤန့ၣ် ပယီၤသုးတကပၤသံတစှၤန့ၢ်ဒံး(၁၀)ဂၤဘၣ်ဒီး တၢ်မၤန့ၢ်ပယီၤသုးကျိဖးဒိၣ်ကျိဖိတနီၤအဂ့ၢ်န့ၣ် သုးခိၣ်စိလၢအတီခိၣ်ရိၣ်မဲတၢ်ဒုးတဂၤစံးဘၣ်ခ့ၣ်အဲးစံၣ်န့ၣ်လီၤႉ (KNLA)သုးပာ်ဖှိၣ် သုးခိၣ်စိစီၤဒးဘီလၢအတီခိၣ်ရိၣ်မဲတၢ်ဒုးအံၤစံး၀ဲလၢ “အ၀ဲသ့ၣ်အၦၤသံခီဒုပတဲလီၤတံၢ်တသ့ဘၣ်ႉ တၢ်မၢၤခီပတယးကွၢ်ခီန့ၣ်ကအိၣ်လၢအဂၤ(၁၀)ဆူဖီခိၣ်လီၤမီၤနီၤႉ ပခးသံဖဲန့ၣ်ဘၣ်ဒိဘၣ်ထံးဒုအိၣ်ဖးအါစ့ၢ်လီၤႉအစိၣ်ခီဒုက့ၤတွံၢ်လီၤ၀ဲချုးတနီၤႇပတပထံၣ်ထွဲခဲလၢာ်ဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ တကးဒံးဘၣ်ထီၣ်မၤန့ၢ်က့ၤပယီၤသုးဒီး(BGF)သုးပာ်ဖှိၣ်အကျိဖးဒိၣ်လူၢ်ဃုာ်ဒီးဖလူဟီၣ်က၀ီၤအသိး မၤန့ၢ်ဃုာ်၀ဲဒီး(၆၀ မမ)ႇRPG ခံခိၣ်ႇကျိဖိခံခိၣ်ႇကျိချံဒီးကျိဖးဒိၣ်အချံသ့ၣ်တဖၣ်အဂ့ၢ်န့ၣ် (KNLA)သုးပာ်ဖှိၣ်တကပၤစံး၀ဲန့ၣ်လီၤႉ ခီဖျိဆၢကတီၢ်ဘၣ်လၢကမျၢၢ်တဖၣ်ကဘၣ်ဘိးက့ၤအဘုခ့လံအဃိ လီၢ်က၀ီၤၦၤဃ့ၢ်မှံဟးဖျိးတဖၣ် ကက့ၤဘိးအဘုခ့အဂီၢ်န့ၣ်ပယီၤသုးဒီး(BGF)သုးတဖၣ်လၢအအိၣ်ဖဲဖလူဟီၣ်က၀ီၤပူၤအံၤ တဟ့ၣ်မၤ၀ဲဘၣ်တြီတံၢ်ဃာ်၀ဲအဃိ (KNLA)သုးပာ်ဖှိၣ်ဘၣ်နုာ်လီၤမၤရှဲလဲ၀ဲဟီၣ်က၀ီၤအံၤလီၤအဂ့ၢ်န့ၣ် သုးခိၣ်စိ စီၤဒးဘီစံးအါထီၣ်၀ဲန့ၣ်လီၤႉ “တမ့ၢ်လၢယအဲၣ်ဒိးလဲၤခးတမ့ၢ်ဘၣ်ႉၦၤကမျၢၢ်ဖိမၤအီၣ်ဘုခ့ဖဲန့ၣ်အတဟ့ၣ်မၤ၀ဲဘၣ်တြီတံၢ်ဃာ်၀ဲဖဲန့ၣ်လီၤႉ ၦၤကမျၢၢ်ဟဲပာ်ဖျါ၀ဲယၤလၢမၤဘုခ့ဒီးက့ၤတန့ၢ်ဘၣ်အဃိယထီၣ်ခး၀ဲလီၤႉ(BGF)န့ၣ်ယတဲဃာ်အီၤလီၤတလိၣ်ခးယၤဘၣ်ႇက့ၤလီၤက့ၤခီပာ်အိၣ်တ့ၢ်က့ၤထဲပယီၤန့ၣ်ယကထီၣ်ခးထဲပယီၤလီၤႉအ၀ဲသ့ၣ်ခီဒုခးယၤဒီတနံၤတက့ၤလီၤဘၣ်အဃိယက့ၤခး၀ဲလီၤ”အဂ့ၢ်န့ၣ် သုးခိၣ်စိစီၤဒးဘီစံး၀ဲန့ၣ်လီၤႉ တၢ်ဒုးကဲထီၣ်ဘျီ၀ဲန့ၣ်အပူၤပယီၤသုးတကပၤသံဘၣ်ဒိဘၣ်ထံးအိၣ်၀ဲဘၣ်ဆၣ် မ့မ့ၢ်လၢအ၀ဲသ့ၣ်သုးပာ်ဖှိၣ်တကပၤတၢ်ဘၣ်ဒိဘၣ်ထံးအိၣ်၀ဲတစံးတက့ၢ်လီၤဒီးသံတအိၣ်၀ဲနီတဂၤဘၣ်အဂ့ၢ်န့ၣ် (KNLA)သုးပာ်ဖှိၣ်တကပၤစံး၀ဲန့ၣ်လီၤႉ ဖဲမဟါမုၢ်ဃ့ၢ်လီၤ ၃ နၣ်ရံၣ်ဃၣ်ဃၣ်အဆၢကတီၢ် ခီဖျိပယီၤသုးအကဘီယူၤဟဲကွံာ်လီၤမ့ၣ်ပိၢ်လၢတၢ်ဒုးကဲထီၣ်အလီၢ်န့ၣ်အဃိ လီၢ်က၀ီၤဖိတဂၤဘၣ်ဒိဘၣ်ထံး၀ဲအသိးသီခါဖၠၣ်ႇတၢ်ဘါယွၤသရိာ်ဒီးဟံၣ်ဃီတၢ်သူၣ်ထီၣ်တနီၤဟးဂီၤ၀ဲစ့ၢ်ကီးအဂ့ၢ်န့ၣ် သ၀ီၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ ခီဖျိတၢ်ဒုးကဲထီၣ်အဃိၦၤဃ့ၢ်မှံဟးဖျိးလၢအိၣ်သူမှဲကျိကၢၢ်နံၤတဖၣ်ဘၣ်လဲၤခီဃီၤ၀ဲဆူကီၢ်ကၠီၣ်တဲၣ်တကပၤဒီး တကီၢ်ခါခဲအံၤခီဖျိတၢ်စူၤတဘၣ်ဆၢဘၣ်ကတီၢ်ဘၣ်အဃိ တၢ်ခိၣ်ဒုးဒီးတၢ်အိၣ်တၢ်ဆိးလီၢ်ကျဲတၢ်ကီတၢ်ခဲအိၣ်၀ဲအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဖၣ်စံး၀ဲအသိး သ့ၣ်ညါဘၣ်န့ၣ်လီၤႉ
ခီဖျိမ့ၣ်အူတဟဲဘၣ်အဃိ သွဲၣ်လးအၦ့ၤထီၣ်
လါဖ့ၤဘြူၤအါရံၤ ၁၇ သီႇ ၂၀၂၂ နံၣ်ႇ ခ့ၣ်အဲးစံၣ် ကညီကီၢ်စဲၣ်အပူၤကိးမုၢ်နံၤဒဲးဃၣ်ဃၣ်ခီဖျိမ့ၣ်အူတဟဲဘၣ်အဃိ ထံဖိကီၢ်ဖိကမျၢၢ်သ့ၣ်တဖၣ်ၦ့ၤသူ၀ဲဒၣ်သွဲၣ်လးဟဲအါထီၣ်ဒီးသွဲၣ်လးအၦ့ၤစ့ၢ်ကီးထီၣ်၀ဲအဂ့ၢ်န့ၣ် သ့ၣ်ညါဘၣ်လၢၦၤၦ့ၤဆါသွဲၣ်လးဒီးၦၤသူသွဲၣ်လးဖိတဖၣ်အအိၣ်န့ၣ်လီၤႉ ၦၤၦ့ၤဆါသွဲၣ်လးလၢဖၣ်အၣ်၀့ၢ်ပူၤတဂၤစံး၀ဲလၢ“ခဲအံၤသွဲၣ်လးဟဲတမၢ်လၢၤဘၣ်ႉမ့ၣ်အူတဟဲဘၣ်အဃိလၢတၢ်ဖီအီၣ်တ့ၤအီၣ်အလီၢ်န့ၣ်တၢ်က့ၤသူက့ၤလၢသွဲၣ်လးလီၤႉလၢညါမ့ၣ်အူဟဲအခါန့ၣ်တဆါဘၣ်သွဲၣ်လးအါအါဘၣ်ႉခဲအံၤၦၤဟဲၦ့ၤသွဲၣ်လးအါမးလီၤႉမ့၀ံၤတၢ်ၦ့ၤထီၣ်ခဲလၢာ်အဃိသွဲၣ်လးနါက့အၦ့ၤထီၣ်စ့ၢ်မီၤနီၤႉ သွဲၣ်လးလၢအဟဲတုၤ လၢအသီတဖၣ်န့ၣ်အၦ့ၤထီၣ်ဖးဒိၣ်ညါႉမ့မ့ၢ်ပ၀ဲဒၣ်န့ၣ်ပဟံးန့ၢ်သွဲၣ်လးလၢကၠၤအ့စ့ၣ်ကၠံတကပၤလီၤႉခီဖျိကျဲတဂ့ၤဘၣ်အဃိသွဲၣ်လးဟဲတုၤတအါဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ဖဲမ့ၣ်အူတဟဲဘၣ်အဆၢကတီၢ်ၦၤလၢအကျိၣ်စ့တအိၣ်ဘၣ်တနီၤန့ၣ်လၢတၢ်ဖီအီၣ်တ့ၤအီၣ်အလီၢ်န့ၣ်က့ၤသူ၀ဲလၢမ့ၣ်အူစဲးဒီး(ကဲးစ်)အိၣ်၀ဲဘၣ်ဆၣ် ခီဖျိဂာ်သိအၦ့ၤဒီးကဲးစ်အၦ့ၤထီၣ်အဃိ ၦၤမုၢ်ဆ့ၣ်မုၢ်ဂီၤဖိတဖၣ်အါဒၣ်တက့ၢ်န့ၣ်သူက့ၤ၀ဲဒၣ်လၢသွဲၣ်လးသ့ၣ်တဖၣ်န့ၣ်လီၤႉ ကီးတရံးကီၢ်ဆၣ်လီၢ်က၀ီၤဖိလၢအကုၢ်အီၣ်သွဲၣ်လးတဂၤစံး၀ဲ“သွဲၣ်လးအၦ့ၤထီၣ်လၢ၀့ၢ်ပူၤတကးဘၣ် အၦ့ၤထီၣ်လၢပအိၣ်အံၤလံၤလံၤလံလီၤႉ ခဲအံၤဟးၦ့ၤသ့ၣ်သ့ၣ်တအိၣ်အါအါလၢၤဘၣ်အဃိအၦ့ၤထီၣ်၀ဲလီၤႉမ့၀ံၤလၢကစိာ်ဆှၢအဂီၢ်ကါသိလၢၤ၀ဲလီၤႉခဲအံၤခီဖျိသိၦ့ၤထီၣ်အဃိတၢ်လၢၤဘူၣ်လၢၤစ့ဟဲအါထီၣ်ဒီးအၦ့ၤထီၣ်၀ဲမီၤနီၤႉလၢပအိၣ်တၢ်လီၢ်န့ၣ်အပူၤကွံာ်န့ၣ်အထၢၣ်ဒိၣ်(၅၀၀၀)ကၠးန့ၣ်ခဲအံၤအၦ့ၤအိၣ်၀ဲ(၇၀၀၀)ကၠးလံ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ဖၣ်အၣ်၀့ၢ်ပူၤအပူၤကွံာ်သွဲၣ်လးတပီၢ်န့ၣ်အၦ့ၤအိၣ်၀ဲ(၄၀၀)ကၠးဒီးကတီၢ်အံၤတပီၢ်န့ၣ်အၦ့ၤအိၣ်၀ဲ(၅၀၀)ကၠးဘျဲၣ်(၆၀၀)ကၠးခိၣ်ဃၢၤလံတကးဘၣ်အမဲာ်ညါ မ့မ့ၢ်သွဲၣ်လးထၢၣ်န့ၣ်အပူၤကွံာ်အၦ့ၤအိၣ်၀ဲ(၄၅၀၀)ကၠးဒီး ကတီၢ်အံၤအၦ့ၤအိၣ်တုၤလၢ(၆၀၀၀)ကၠးအဖီခိၣ်လံအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဒ်န့ၣ်အသိးလၢကီၢ်ဆၣ်ကိးဘ့ၣ်ဒဲးဃၣ်ဃၣ်အပူၤသွဲၣ်လးအၦ့ၤထီၣ်၀ဲအသိး တၢ်လီၢ်တနီၤလၢၦၤဖံးအီၣ်မၤအီၣ်တၢ်ကုၢ်သွဲၣ်လးတၢ်ဖံးတၢ်မၤသ့ၣ်တဖၣ်အံၤ ခီဖျိတၢ်ဒုးကဲထီၣ်ဒီးဟီၣ်က၀ီၤတဂၢၢ်တကျၢၤဘၣ်အဃိလၢတၢ်ကၦ့ၤစိာ်ဆါသွဲၣ်လးအဂီၢ်တၢ်ကီတၢ်ခဲအိၣ်၀ဲအမဲာ်ညါ တကီၢ်ခါခဲအံၤသ့ၣ်လၢအတဂ့ၤလၢတၢ်သူ၀ဲသွဲၣ်လးအဂီၢ်အံၤစ့ၢ်ကီးလီၤစှၤ၀ဲဒီး ခီဖျိသ့ၣ်တဖၣ်အၦ့ၤထီၣ်အဃိ ၦၤကုၢ်သွဲၣ်လးဖိတဖၣ်စှၤလီၤ၀ဲအဂ့ၢ်န့ၣ်သ့ၣ်ညါဘၣ်န့ၣ်လီၤႉ
BGF မၤအါထီၣ်အသုး(၃၀၀)ဃၣ်ဃၣ်လၢ သုးက့ ၅ ဟီၣ်က၀ီၤပူၤ
လါဖ့ၤဘြူၤအါရံၤ ၁၇ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ(သုးက့ ၅)ဟီၣ်က၀ီၤအပူၤ ဒ်သိးတၢ်ဆှၢထီၣ်ပယီၤသုးတၢ်အီၣ်တၢ်အီဒီးကျိချံၦာ်သၣ်တၢ်ဖိတၢ်လံၤတဖၣ်ဆူသုးကလၢၤလၢအိၣ်တၢ်မဲာ်ညါတဖၣ်ကသ့အဂီၢ်န့ၣ် သုးခိးကီၢ်ဆၢ(BGF)မၤအါထီၣ်သုးဂံၢ်ဘါအဂၤ(၃၀၀)ဃၣ်ဃၣ်အဂ့ၢ်န့ၣ် ခ့ၣ်အဲၣ်ယူၣ်(သုးက့ ၅)ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ ခီဖျိတၢ်ကးတံၢ်ဃာ်အ၀ဲသ့ၣ်ကျိချံၦာ်သၣ်တၢ်အီၣ်တၢ်အီကျဲအဃိ ပယီၤသုးလၢအိၣ်တၢ်မဲာ်ညါတဖၣ်သံလီၤမၢ်ဟဲအါထီၣ်၀ဲဒီး ဒ်သိးကဆှၢထီၣ်တၢ်အီၣ်တၢ်အီဒီးကျိချံၦာ်သၣ်တဖၣ်ကသ့အဂီၢ် ပယီၤသုးတၢ်နဲၣ်လီၤအဖီခိၣ်(BGF)မၤၦဲၤထီၣ်သုးဂံၢ်ဘါအဂ့ၢ်န့ၣ် ခ့ၣ်အဲၣ်ယူၣ်(သုးက့ ၅)ဒုးယၤခိၣ် သုးခိၣ်ဒိၣ်စိ စီၤထူကဆှီစံး၀ဲဒ်အံၤန့ၣ်လီၤႉ “ပထံၣ်ဘၣ်လၢပယီၤသုးသံဘၣ်ဒိဘၣ်ထံးအိၣ်ကိးမုၢ်နံၤဒဲးအဃိန့ၣ်လၢကဆှၢကျိချံဒီးတၢ်အီၣ်တၢ်အီၣ်လၢဖၣ်ပူၣ်ကန့ၢ်အဂီၢ်န့ၣ်ကဘၣ်ဆှၢ၀ဲလၢအန့ၢ်လီၤမီၤနီၤႉဆှၢ၀ဲမ့တန့ၢ်ဘၣ်န့ၣ်အတၢ်ပၢတၢ်ပြးဒီးသုးလၢအအိၣ်သူၣ်လီၤသးတဖၣ်န့ၣ်ဒုတၢ်ကီတၢ်ခဲကအိၣ်လီၤမီၤနီၤႉ လၢတၢ်န့ၣ်အဃိန့ၣ်ကဘၣ်ဆှၢ၀ဲလၢအန့ၢ်လီၤႉ ခီဖျိလၢအဂံၢ်အဘါတအိၣ်ဘၣ်အဃိန့ၣ်ဃ့၀ဲဒၣ်လၢ(BGF)ကမၤစၢၤအီၤဒီးကမၤ၀ဲကျဲလၢအဖျိလၢအန့ၢ်အိၣ်ဒီးအတၢ်ရဲၣ်တၢ်ကျဲၤလီၤတံၢ်လီၤဆဲးလီၤ”အဂ့ၢ်န့ၣ် အ၀ဲစံးဘၣ်ခ့ၣ်အဲးစံၣ်န့ၣ်လီၤႉ အပူၤကွံာ်လၢ(သုးက့ ၅)ဟီၣ်က၀ီၤအပူၤန့ၣ်(BGF)သုးအိၣ်ဃာ်၀ဲအဂၤ(၉၀၀)ဃၣ်ဃၣ်ဒီး ကတီၢ်အံၤသုးဂံၢ်ဘါအဂၤ(၃၀၀)လၢအမၤၦဲၤအါထီၣ်ကဒီး၀ဲအံၤဟဲတုၤ၀ဲဒၣ်လၢယၤအီၤမၠ့ၤတၢ်လီၢ်လံဒီး ဒ်သိးအ၀ဲသ့ၣ်ဆှၢထီၣ်တၢ်အီၣ်တၢ်အီကျိချံၦာ်သၣ်ကသ့အဂီၢ်တပိာ်၀ဲကျဲလီၢ်လံၤလၢၤဘၣ်ဒီး မ့မ့ၢ်တခီဟဲစိာ်ဃုာ်၀ဲတၢ်ဘၢၣ်ကျဲစဲးဖီကဟၣ်တၢ်ဖိတၢ်လံၤလၢအသီလံအဂ့ၢ်န့ၣ် သုးခိၣ်ဒိၣ်စိ စီၤထူကဆှီစံးအါထီၣ်၀ဲဒၣ်န့ၣ်လီၤႉ ဒ်န့ၣ်အသိးပယီၤသုးမီၤစိရိၤအံၤဒ်သိးကမၤလီၤၦီၢ်ကွံာ်ခ့ၣ်အဲၣ်ယူၣ်(သုးက့ ၅)ဟီၣ်က၀ီၤအံၤအဂီၢ်န့ၣ် မၤအါထီၣ်၀ဲသုးဂံၢ်ဘါအါအါဂီၢ်ဂီၢ်ဒီး အပူၤကွံာ်လၢညါန့ၣ်သုးရ့ၣ်ခဲလၢာ်အိၣ်၀ဲ(၂၈)ရ့ၣ် ဘၣ်ဆၣ်ခဲအံၤသုးရ့ၣ်အါထီၣ်(၄)ရ့ၣ်ဒီးခဲလၢာ်အိၣ်၀ဲ(၃၂)ရ့ၣ် ၦၤနီၣ်ဂံၢ်ကအိၣ်၀ဲအဂၤ(၄၀၀၀)ဃၣ်ဃၣ်ညါအဂ့ၢ်န့ၣ် ခ့ၣ်အဲၣ်ယူၣ်တယးကွၢ်စံး၀ဲန့ၣ်လီၤႉ ကတီၢ်အံၤလၢခ့ၣ်အဲၣ်ယူၣ်(သုးက့ ၅)ဟီၣ်က၀ီၤအပူၤတၢ်ခးလိာ်သးကဲထီၣ်ကိးမုၢ်နံၤဒဲးဒီး ခီဖျိတၢ်ဒုးဆူၣ်ထီၣ်အဃိဖၣ်ပူၣ်၀့ၢ်လီၢ်က၀ီၤကမျၢၢ်တဖၣ်ဘၣ်လဲၤစံၣ်အိၣ်လၢ၀့ၢ်ပူၤအိၣ်၀ဲအသိး စးထီၣ်ဖဲအပူၤကွံာ်လါန့ၣ်ခီဖျိခ့ၣ်အဲၣ်ယူၣ်ထုးထီၣ်ဟ့ၣ်ပလီၢ်လံာ်အဃိ ပယီၤသုးမီၤစိရိၤစုတီၤအဖီလာ်ကမျၢၢ်ၦၤမၤတၢ်ဖိအဂၤ(၁၀၀)ဘျဲၣ်ဟးထီၣ်ကွံာ်၀ဲလၢဖၣ်ပူၣ်၀့ၢ်ပူၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲအပူၤကွံာ်တၢ်မၤကြုၢ်တုကီၢ်ဆၣ်မ့ၣ်အူဘူၣ်တၢ်ရဲၣ်တၢ်ကျဲၤအပူၤန့ၣ်သုးခိၣ်ဒိၣ်ဖိစီၤမိၣ်သိၤစံးလီၤ၀ဲလၢ (သုးက့ ၅)ဒီး(သုးက့ ၁)ဟီၣ်က၀ီၤအပူၤ(BGF)သုးသံဘၣ်ဒိဘၣ်ထံးဟဲအါထီၣ်ႇ တၢ်ဒုးဆူၣ်ထီၣ်အဖီခိၣ်အံၤတတူၢ်လိာ်၀ဲဘၣ်ဒီးတအဲၣ်ဒိးလၢတၢ်ဒုးကဆူၣ်ထီၣ်လၢကညီကီၢ်စဲၣ်အပူၤဘၣ်န့ၣ်လီၤႉ လၢန့ၣ်အမဲာ်ညါခီဖျိၦၤလၢအတုၤအိၣ်ထံဂုၤကီၢ်ဂၤသ့ၣ်တဖၣ်ဆီၣ်ထွဲမၤစၢၤ၀ဲကျိၣ်စ့တဖၣ်လၢကဒုးအိၣ်ထီၣ်တၢ်ဒုးတၢ်ယၤအံၤအဃိ ကညီကလုာ်သ့ၣ်တဖၣ်လီၤဘၣ်ဟ့ၣ်လီၤကွံာ်အသးသမူဒီး တၢ်မၤဒ်အံၤသ့ၣ်တဖၣ်လီၤဂာ်ဒ်သိးပတအဲၣ်လီၤက့ၤပၦၤကလုာ်ဘၣ်ဒီးကဒဲကဒဲအဘၢၣ်စၢၤပကဘၣ်တဲလၢတၢ်ဃူတၢ်ဖိးလီၤအဂ့ၢ်န့ၣ်် သုးခိၣ်ဒိၣ်ဖိစီၤမိၣ်သိၤ စံးအါထီၣ်၀ဲလၢကြုၢ်တုမ့ၣ်အူဘူၣ်တၢ်ရဲၣ်တၢ်ကျဲၤပူၤန့ၣ်လီၤႉ
(KNLA)သုးပာ်ဖှိၣ်ထီၣ်မၤန့ၢ်က့ၤဖလူဖိဟီၣ်က၀ီၤႇယီၤသုးမီၤစိရိၤဟဲကွံာ်လီၤကဒီးမ့ၣ်ပိၢ်
လါဖ့ၤဘြူၤအါရံၤ ၁၆ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲအပူၤကွံာ်တၢ်ဒုးအခါဖလူဖိသ၀ီကျိဖးဒိၣ်လူၢ်ဃုာ်ဒီးဖလူဟီၣ်က၀ီၤလၢကညီဒီကလုာ်စၢဖှိၣ်ကရၢတၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ဘၣ်ပာ်တ့ၢ်ကွံာ်၀ဲအံၤ ဖဲတနံၤအံၤလါဖ့ၤဘြူၤအါရံၤ ၁၆ သီ မုၢ်ထူၣ်အဆၢကတီၢ်န့ၣ်ထီၣ်မၤန့ၢ်ကဒါက့ၤ၀ဲလံအဂ့ၢ်န့ၣ် (KNLA)သုးပာ်ဖှိၣ်တကပၤစံး၀ဲန့ၣ်လီၤႉ စးထီၣ်ဖဲမဟါလါဖ့ၤဘြူၤအါရံၤ ၁၅ သီ ဂီၤခီအဆၢကတီၢ်န့ၣ် KNLA (သုးက့ ၆)သုးပာ်ဖှိၣ်တဖၣ်လဲၤက၀ီၤ၀ဲ ကယဲၢ်မ့ၢ်ပယီၤသုးအိၣ်ဆီလီၤသးတၢ်လီၢ်တဖၣ်ဒီးဖဲန့ၣ်တၢ်ခးလိာ်သးကဲထီၣ်၀ံၤအလီၢ်ခံဖဲတနံၤအံၤမုၢ်ထူၣ် ၁၂ နၣ်ရံၣ်ဃၣ်ဃၣ်အဆၢကတီၢ်(KNLA)သုးပာ်ဖှိၣ်တဖၣ်ထီၣ်မၤန့ၢ်က့ၤ၀ဲဖလူဖိသ၀ီခိၣ်ထိးပယီၤသုးဒီးသုးခိးကီၢ်ဆၢ(BGF)သုးပာ်ဖှိၣ်ကျိဖးဒိၣ်လူၢ်ဃုာ်ဒီးဖလူဖးဒိၣ်ႇဖလူဖိသ၀ီဟီၣ်က၀ီၤတဖၣ်လံအဂ့ၢ်န့ၣ် လီၢ်က၀ီၤတၢ်ကစီၣ်စံး၀ဲအသိးသ့ၣ်ညါဘၣ်န့ၣ်လီၤႉ သုးခိၣ်လၢအဟူးဂဲၤဖဲဟီၣ်က၀ီၤပူၤတဂၤစံး၀ဲ“မ့မ့ၢ်တၢ်လူၢ်၀ဲန့ၣ်က့ၤဆ့ၣ်နီၤန့ၢ်လၢမုၢ်ထူၣ်ခါလံၤလံၤလံမီၤနီၤႉ တၢ်လီၢ်၀ဲန့ၣ်မ့ၢ်တၢ်လီၢ်ဘၣ်အဃိနတုၤနအိၣ်ႇယတုၤယအိၣ်လီၤမီၤနီိၤႉ ခဲအံၤက့ၤဆ့ၣ်နီၤအိၣ်လံမီၤနီၤ” အဂ့ၢ်န့ၣ် ပာ်ဂၢၢ်ပာ်ကျၢၤစံးဘၣ်ခ့ၣ်အဲးစံၣ်န့ၣ်လီၤႉ တၢ်လီၢ်လၢတၢ်ဒုးကဲထီၣ်အလီၢ်သ့ၣ်တဖၣ်န့ၣ်ဖဲမုၢ်ဃ့ၢ်လီၤ ၃ နၣ်ရံၣ်ဃၣ်ဃၣ်အဆၢကတီၢ် ခီဖျိပယီၤသုးအကဘီယူၤ(၂)ဘ့ၣ်ဟဲကွံာ်လီၤမ့ၣ်ပိၢ်အဃိ လီၢ်က၀ီၤသ၀ီဖိတဂၤဘၣ်ဒိဘၣ်ထံး၀ဲအသိး သီခါဖၠၣ်ဒီးဟံၣ်ဃီတၢ်သူၣ်ထီၣ်တနီၤဟးဂီၤ၀ဲအဂ့ၢ်န့ၣ် ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ ခီဖျိတၢ်ဒုးကဲထီၣ်အဃိၦၤဃ့ၢ်မှံဟးဖျိးတဖၣ်လဲၤဃ့ၢ်ထီၣ်ခီဃီၤကဒီး၀ဲဆူကီၢ်ကၠီၣ်တဲၣ်တကပၤဒီး တကီၢ်ခါခဲအံၤခီဖျိတၢ်စူၤတဘၣ်ဆၢဘၣ်ကတီၢ်ဘၣ်အဃိ တၢ်ခိၣ်ဒုးဒီးတၢ်အိၣ်တၢ်ဆိးလီၢ်ကျဲတၢ်ကီတၢ်ခဲအိၣ်၀ဲအဂ့ၢ်န့ၣ် ၦၤလၢအမၤစၢၤၦၤဃ့ၢ်မှံဟးဖျိးတဖၣ်စံး၀ဲအသိး သ့ၣ်ညါဘၣ်န့ၣ်လီၤႉ
တၢ်ဒုးစးထီၣ်ကဲထီၣ်ကဒီးလၢလ့က့ၣ်ကိာ်ဟီၣ်က၀ီၤပူၤ
လါဖ့ၤဘြူၤအါရံၤ ၁၆ သီႇ ၂၀၂၂ နံၣ်ႇ ခ့ၣ်အဲးစံၣ် တၢ်ဒုးကဲထီၣ်လၢလ့က့ၣ်ကိာ်ဟီၣ်က၀ီၤၦဲၤထီၣ်ခံလါအတီၢ်ပူၤ ဖဲမဟါလါဖ့ၤဘြူၤအါရံၤ ၁၅ သီ ဂီၤခီအဆၢကတီၢ် တၢ်ဒုးစးထီၣ်ကဲထီၣ်ကဒီးလၢလ့က့ၣ်ကိာ်က၀ီၤဒ့ပူၤဒီးဖလူဖိသ၀ီႇဖလူဖးဒိၣ်သ၀ီတကပၤအဂ့ၢ်န့ၣ် လီၢ်က၀ီၤၦၤဃ့ၢ်မှံဟးဖျိးတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ “လၢမဟါန့ၣ်တၢ်ဒုးကဲထီၣ်လၢဖလူဖးဒိၣ်ႇဖလူဖိသ၀ီတကပၤႉ တနံၤညါအံၤဂီၤခီပနၢ်ဟူကျိသီၣ်ထီၣ်လၢလ့က့ၣ်ကိာ်တကပၤလီၤႉ ကျိဖးဒိၣ်လူၢ်ခးလီၤကျိဖးဒိၣ်တၢ်လီၢ်တဘျုးတီၤညါႇလၢဖလူဖယါကိတကပၤန့ၣ်နါက့နၢ်ဟူကျိသီၣ်စ့ၢ်လီၤႉ မ့ၢ်ကကဲထီၣ်ကဒီးသးဒ်ဒုလဲၣ်တသ့ၣ်ညါဘၣ်ႉ လၢလ့က့ၣ်ကိာ်တကပၤန့ၣ်ပယီၤသုးတဟးထီၣ်ဒံးဘၣ်အဃိ တၢ်ဒုးဆဲးကဲထီၣ်ကဒါလီၤ”အဂ့ၢ်န့ၣ် လ့က့ၣ်ကိာ်က၀ီၤဒ့(၃)ၦၤဃ့ၢ်မှံဟးဖျိးတဂၤစံး၀ဲန့ၣ်လီၤႉ ဖဲလါဖ့ၤဘြူၤအါရံၤ ၁၁ သီအနံၤ လၢလ့က့ၣ်ကိာ်ထံလီၤဆှူလီၢ်တကပၤန့ၣ် ပယီၤသုးနၢ်ဟူ၀ဲလၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်တဖၣ်အိၣ်အဃိ ပယီၤသုးဂံၢ်ဘါ(၁၀၀)ဃၣ်ဃၣ်ဟဲထီၣ်၀ဲဒီးသုးသိလ့ၣ်(၁၆)ခိၣ်လဲၤတလၢဟီၣ်က၀ီၤတၢ်ပာ်ပနီၣ်ဒီးသုးကျိၤနုာ်လီၤ၀ဲအဃိ တၢ်ခးလိာ်သးကဲထီ၀ဲခံဘျီဒံးအဂ့ၢ်န့ၣ် လီၢ်က၀ီၤတၢ်ကစီၣ်စံး၀ဲန့ၣ်လီၤႉ တၢ်ခးလိာ်သးကဲထီၣ်ဘျီ၀ဲန့ၣ်(KNLA)စုတီၤအဖီလာ်တၢ်သံတၢ်ဘၣ်ဒိဘၣ်ထံးတအိၣ်၀ဲဘၣ်ဘၣ်ဆၣ် မ့မ့ၢ်ပယီၤသုးတကပၤသံ၀ဲ(၁)ဂၤႇဘၣ်ဒိတစှၤန့ၢ်(၅)ဂၤဘၣ်န့ၣ်လီၤႉ ဒ်န့ၣ်အသိးခီဖျိပယီၤသုးကျိဖးဒိၣ်လူၢ်ခးလီၤစၢၤကျိဖးဒိၣ်တဖၣ်အဃိ ထံလီၤဆှူတၢ်အိၣ်ဘှံးလီၢ်တဖၣ်ဟးဂီၤ၀ဲအါမးအဂ့ၢ်န့ၣ် (KNLA)သုးပာ်ဖှိၣ်သုးခိၣ်တဂၤစံး၀ဲန့ၣ်လီၤႉ ဖဲလါဖ့ၤဘြူၤအါရံၤ ၁၄ သီဒီး ၁၅ သီအနံၤန့ၣ် လၢဖလူဟီၣ်က၀ီၤဒီးလ့က့ၣ်ကိာ်က၀ီၤဒ့တဖၣ်အပူၤ တၢ်ခးလိာ်သးဟဲက့ၤကဲထီၣ်ကဒီး၀ဲလၢ KNLA(သုးက့ ၆)သုးပာ်ဖှိၣ်ဒီးပယီၤသုးတဖၣ်အဘၢၣ်စၢၤအသိး ဖဲလါဖ့ၤဘြူၤအါ၇ံၤ ၁၃ သီ ဟါခီအဆၢကတီၢ် လၢကီးတရံးဟီၣ်က၀ီၤတကပၤ ပယီၤသုးႇသုးခိးကီၢ်ဆၢ(BGF)သုးပာ်ဖှိၣ်လၢအဟဲထီၣ်၀ဲဆူယ့ၤကၠီၤကၠံႇယ့ၤကၠီၤလ့သ၀ီတကပၤအံၤတဖၣ်တၢ်ခးလိာ်သးကဲထီၣ်၀ဲဒီး(KNLA)သုးရ့ၣ် ၂၇ သုးပာ်ဖှိၣ်တဖၣ်ဒံးအဂ့ၢ်န့ၣ် သ့ၣ်ညါဘၣ်န့ၣ်လီၤႉ တၢ်ခးလိာ်သးကဲထီၣ်ဘျီ၀ဲအံၤပယီၤသုးတကပၤသံ၀ဲ(၅)ဂၤဒီးဘၣ်ဒိ၀ဲ(၇)ဂၤအသိး (KNLA)သုးပာ်ဖှိၣ်တကပၤစ့ၢ်ကီးဘၣ်ဒိဘၣ်ထံးအိၣ်၀ဲတနီၤအဂ့ၢ်န့ၣ် လီၢ်က၀ီၤတၢ်ကစီၣ်တဖၣ်စံး၀ဲန့ၣ်လီၤႉ ခီဖျိတၢ်ဒုးကဲထီၣ်အဃိလ့က့ၣ်ကိာ်လီၢ်က၀ီၤၦၤဃ့ၢ်မှံဟးဖျိးဟံၣ်ဖိဃီဖိလၢအကယၤလဲၤဃ့ၢ်အိၣ်ကဒု၀ဲလၢဆိၣ်စံမၠဲၣ်ႇကၠီးခဲးႇကဆီ၀ါလ့တီၣ်ကိႇသ့ၣ်ဘီဘိဒီး၀ါတီတၢ်လီၢ်သ့ၣ်တဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ၦၤဃ့ၢ်မှံဟးဖျိးသ့ၣ်တဖၣ်အံၤဘၣ်ဒိးသန့ၤထီၣ်သးဒီးနီၤလီၤအီၣ်တၢ်အီၣ်တၢ်အီႇကသံၣ်ကသီလၢအဘၣ်တၢ်ဟဲမၤစၢၤ၀ဲလၢကီၢ်ကၠီၣ်တဲၣ်၀့ၢ်မဲၢ်ဆီးတကပၤဒီးတၢ်ဒုးမ့ကဲထီၣ်ကဒီးန့ၣ်အိၣ်ကတဲၤကတီၤထီၣ်သးလၢကစံၣ်ကဒီး၀ဲဒၣ်အဂ့ၢ်န့ၣ် ထံမဲး၀ါခံသ၀ီဖိလၢအဘၣ်ဃ့ၢ်မှံဟးဖျိးတဖၣ်စံး၀ဲန့ၣ်လီၤႉ
ကၠီၣ်တဲၣ်ပၢၤကီၢ်ဖီၣ်က့ၤကိး၀ဲမဲၢ်လးဘၣ်ကီဘၣ်ခဲဒဲက၀ီၤဖိ(၇)ဂၤ
လါဖ့ၤဘြူၤအါရံၤ ၁၆ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲလါဖ့ၤဘြူၤအါရံၤ ၁၄ သီ ဂီၤခီအဆၢကတီၢ် ကၠီၣ်တဲၣ်ၦၤဘၣ်မူဘၣ်ဒါဟဲနုာ်လီၤဖီၣ်၀ဲကီၢ်ကၠီၣ်တဲၣ်-ကီၢ်ပယီၤကီၢ်ဆၢမဲၢ်လးဘၣ်ကီဘၣ်ခဲဒဲက၀ီၤဖိ(၇)ဂၤအဂ့ၢ်န့ၣ် ၦၤအိၣ်ဒဲက၀ီၤပူၤတဖၣ်စံး၀ဲန့ၣ်လီၤႉ ဘၣ်ထွဲဒီးဖဲအပူၤကွံာ် ၂၀၂၁ နံၣ် လါဒံၣ်စ့ဘၢၣ် ၁၄ သီအနံၤ ၦၤဒဲက၀ီၤဖိလဲၤပာ်ဖျါထီၣ်သးတၢ်ဂ့ၢ်အံၤ ကၠီၣ်တဲၣ်ၦၤဘၣ်မူဘၣ်ဒါတဖၣ်စံးတ့ၢ်ဃာ်၀ဲလၢကဃုသ့ၣ်ညါဟံးန့ၢ်ဂ့ၢ်၀ီ၀ံၤအလီၢ်ခံ တၢ်ဟဲဖီၣ်က့ၤကိးၦၤဒဲက၀ီၤဖိ(၇)ဂၤဟဲကဲထီၣ်သးန့ၣ်လီၤႉ မဲၢ်လးဒဲက၀ီၤဖိလၢတအဲၣ်ဒိးပာ်ဖျါအမံၤတဂၤစံး၀ဲလၢ“နုာ်လီၤဖီၣ်၀ဲဒၣ်ကျးန့ၣ်(၂)ဖျၢၣ်ႇတဘျုၣ်(ကိယၤ)ကျး ၁ ဖျၢၣ်လီၤႉ မ့မ့ၢ်ကျးၦၤဆါတၢ်ဖိတၢ်လံၤန့ၣ်ဖီၣ်၀ဲကိးဂၤဒဲးလီၤႉ မ့မ့ၢ်လၢကိယၤစဲၢ်န့ၣ်ဖီၣ်၀ဲ(၂)ဂၤႉ ဟဲဖီၣ်၀ဲအံၤၦၤအါဂၤတယး၀ဲလၢကဘၣ်ဃးလိာ်သးဒီးအပူၤကွံာ်တၢ်လဲာ်ပာ်ဖျါထီၣ်သးလီၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ကၠီၣ်တဲၣ်ပၢၤကီၢ်ဟဲဖီၣ်ၦၤဒဲက၀ီၤဖိ(၇)ဂၤအံၤမ့ၢ်၀ဲဘၣ်ဆၣ် ဖီၣ်၀ဲလၢမနုၤတၢ်ဂ့ၢ်လဲၣ်န့ၣ်တသ့ၣ်ညါဒံး၀ဲဘၣ်အဂ့ၢ်န့ၣ် မဲၢ်လးဒဲက၀ီၤခိၣ် စီၤအီနဲး စံး၀ဲဒ်အံၤန့ၣ်လီၤႉ “တၢ်ဂ့ၢ်တခါန့ၣ်ပတသ့ၣ်ညါထွဲတၢ်နီတမံၤဘၣ်ႉ ပသ့ၣ်ညါလၢဂီၤခီ ၅ နၣ်ရံၣ်ဘျဲၣ်န့ၣ်ကိး၀ဲဒၣ်ဒူၣ်ဖိထၢဖိခံဒူၣ်ဒီး ဒဲက၀ီၤဘံၣ်ဘၢပၣ်တဂၤမီၤနီၤႉ ပနၢ်ဟူန့ၣ်(၇)ဂၤ ပတသ့ၣ်ညါတၢ်နီတမံၤဘၣ် ၦၤဟဲသံကွၢ်ၦၤမးပသ့ၣ်ညါလီၤႉ လၢမဟါတနံၤန့ၣ်ၦၤက့ၤကိးအ၀ဲသ့ၣ်လၢမဲၢ်တီၢ်ဒီးလၢဟါခီန့ၣ်လီၤဂာ်ဘၣ်ယၤလၢၦၤဆှၢထီၣ်က့ၤလၢမဲၢ်ဆီး လံဧါတဲတဘၣ်ဘၣ်ႉ အ၀ဲသ့ၣ်န့ၣ်မ့ၢ်ၦၤလၢအဆါတၢ်ကျးဖးဒိၣ်ဒီးဖီၣ်၀ဲလၢတၢ်ဂ့ၢ်မနုၤလဲၣ်ခီန့ၣ်တ သ့ၣ်ညါ၀ဲဘၣ်”အဂ့ၢ်န့ၣ် စီၤအီနဲးစံးဘၣ်ခ့ၣ်အဲးစံၣ်ဖဲမဟါလါဖ့ၤဘြူၤအါရံၤ ၁၅ သီအနံၤန့ၣ်လီၤႉ ၦၤလၢတၢ်ဖီၣ်၀ဲသ့ၣ်တဖၣ်အံၤအိၣ်၀ဲဒၣ်လၢမဲၢ်လးဒဲက၀ီၤ(Zone-C 3A)က၀ီၤဒ့ဒီး မ့ၢ်တၢ်ဖီၣ်အ၀ဲသ့ၣ်လၢတၢ်ဂ့ၢ်မနုၤအဃိလဲၣ်န့ၣ် ဒဲက၀ီၤၦၤဘၣ်မူဘၣ်ဒါလၢအဘၣ်ထွဲဒီးကညီဘၣ်ကီဘၣ်ခဲကမံးတံာ်(KRC)ၦၤဘၣ်မူဘၣ်ဒါသ့ၣ်တဖၣ်စ့ၢ်ကီးတသ့ၣ်ညါထွဲတၢ်ဂ့ၢ်ဘၣ်အဂ့ၢ်န့ၣ် KRC ၦၤပၢၤလီၢ်ဆ့ၣ်နီၤ စီၤရီဘၢၣ်ထွ့စံးဘၣ်ခ့ၣ်အဲးစံၣ်န့ၣ်လီၤႉ အ၀ဲစံး၀ဲလၢ“ၦၤလဲၤဖီၣ်တၢ်န့ၣ်ပတသ့ၣ်ညါလီၤတံၢ်လီၤဆဲးဘၣ်ႉၦၤလဲၤဖီၣ်အီၤလၢအဟံၣ်လီၤႉတုၤလၢခဲအံၤၦၤတတဲၦၤတၢ်နီတမံၤဒံးဘၣ်ႉမ့ၢ်မတၤတဂၤလဲၣ်န့ၣ်တသ့ၣ်ညါဒံးဘၣ်ႉပနၢ်ဟူလၢၦၤဖီၣ်၀ဲ(၇)ဂၤအကျါန့ၣ်ပၣ်ဃုာ်၀ဲပိာ်ခွါ(၃)ဂၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်ဖဲမဟါန့ၣ်လီၤႉ ဖဲအပူၤကွံာ် ၂၀၂၁ နံၣ် လါဒံၣ်စ့ဘၢၣ် ၁၄ သီ ဟါခီအဆၢကတီၢ်န့ၣ် တၢ်ကဲထီၣ်သးလၢမဲၢ်လးဘၣ်ကီဘၣ်ခဲဒဲက၀ီၤပူၤကၠီၣ်တဲၣ်ၦၤဘၣ်မူဘၣ်ဒါ(ပလး)တွံၢ်လီၤ၀ဲဒၣ်ၦၤဒဲက၀ီၤဖိခံဂၤလၢဆဲးကဲးလိၤဒီးတၢ်ဟံးန့ၢ်ကွံာ်အ၀ဲသ့ၣ်ဆဲးကဲးတၢ်ဂ့ၢ်အံၤအဖီခိၣ် ၦၤဒဲက၀ီၤဖိလၢအကထိလဲၤပာ်ဖျါထီၣ် တၢ်ဘၣ်သးလၢပလးဒီးအီးဆီးတၢ်သူၣ်ထီၣ်မဲာ်ညါကဲထီၣ်သးန့ၣ်လီၤႉ လၢတၢ်ပာ်ဖျါထီၣ်သးဘျီ၀ဲန့ၣ်အပူၤတၢ်အိၣ်သးကဲထီၣ်တုၤ၀ဲလၢတၢ်ပြဲး၀ဲတန့ၢ်လၢၤဘၣ်အဃိ...
ပယီၤသုးမီၤစိရိၤကမၤတၢ်မုာ်တၢ်ခုၣ်အံၤမ့ၢ်ဒ်သိးဒီးကမၤရှဲကွံာ်(PDF)အဂီၢ်လီၤအဂ့ၢ် KNU(သုးက့ ၅)သုးက့ခိၣ်စံး၀ဲ
လါဖ့ၤဘြူၤအါရံၤ ၁၅ သီႇ ၂၀၂၂ နံၣ်ႇ ခ့ၣ်အဲးစံၣ် ပယီၤသုးမီၤစိရိၤအတၢ်ကွဲမုာ်တၢ်တၢၣ်ပီၣ်တဲသကိးတၢ်မုာ်တၢ်ခုၣ်အတၢ်မုၢ်လၢ်န့ၣ်မ့ၢ်ဒ်သိးဒီးလၢကမၤလီၤၦီၢ်ကွံာ်တၢ်ဒီသဒၢကမျၢၢ်(PDF)အဂီၢ်လီၤအဂ့ၢ်န့ၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢစုတီၤအဖီလာ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးက့ ၅ သုးက့ခိၣ် သုးခိၣ်ကျၢၢ်ဖိစီၤမုၢ်ဟဲစံးဘၣ်မုၢ်တြီၢ်တၢ်ကစီၣ်ဖဲလါဖ့ၤဘြူၤအါရံၤ ၁၄ သီအနံၤန့ၣ်လီၤႉ “(PDF)တဖၣ်လၢပယီၤသုးအဂီၢ်န့ၣ်မ့ၢ်တၢ်ကီတၢ်ခဲဒိၣ်ကတၢၢ်န့ၣ်သ့ၣ်ညါလီၤအသးလီၤႉ အဃိန့ၣ်ကလုာ်ဒူၣ်ဖီၣ်စုက၀ဲၤတၢ်ကရၢကရိတဖၣ်မ့ပတုာ်တၢ်ခးဒီးအ၀ဲသ့ၣ်န့ၣ်ကမၤရှဲမၤလဲ၀ဲ(PDF)တဖၣ်န့ၣ်လီၤႉ တၢ်အံၤမ့ၢ်၀ဲဒၣ်အ၀ဲသ့ၣ်တၢ်ရဲၣ်တၢ်ကျဲၤတခါလီၤ”အဂ့ၢ်န့ၣ် သုးခိၣ်ကျၢၢ်ဖိ စီၤမူဟဲ စံး၀ဲဒၣ်န့ၣ်လီၤႉ တကီၢ်ခါခဲအံၤအတၢ်ကိးထီၣ်ကလုာ်ဒူၣ်လၢကပတုာ်တၢ်ခးန့ၣ် သ့ၣ်ညါဘၣ်လၢအတၢ်ကီတၢ်ခဲမ့အိၣ်မးကိးထီၣ်၀ဲလီၤဒီး အတၢ်ကီတၢ်ခဲမ့တအိၣ်ဘၣ်အတၢ်ရဲၣ်တၢ်ကျဲၤမ့တအိၣ်ဘၣ်န့ၣ်လ့ၤတက့ၤတကိးထီၣ်၀ဲဘၣ် ကမၤၦၤလၢအတဲာ်အဖျုန့ၣ်အတၢ်တိာ်ပာ်အိၣ်တပယူာ်ဃီလီၤအဂ့ၢ်န့ၣ် သုးခိၣ်ကျၢၢ်ဖိ စီၤမုၢ်ဟဲ စံးအါထီၣ်၀ဲန့ၣ်လီၤႉ တၢ်ဒီတဒၢကမျၢၢ်ကရူၢ်(ကညီကီၢ်စဲၣ်)ပႉကႉဖ အခိၣ််တဂၤလၢအမ့ၢ်စီၤဆၣ်ကပီၤစံး၀ဲလၢ “အဲၣ်ဒိးတဲလၢဒ်သိးအ၀ဲသ့ၣ်မၤလီၤၦီၢ််ကွံာ်တၢ်ပၢဆၢခဲလၢာ်ကညီအဂီၢ်န့ၣ် မၤ၀ဲလၢတၢ်ပညိၣ်အပူၤလီၤႉ သုးကီၣ်ကးအံၤလၢဒုးယၤဂ့ၢ်၀ီအသိးမ့ၢ်ဂ့ၤထံရူၢ်ကီၢ်သဲးဂ့ၢ်၀ီအသိးမ့ၢ်ဂ့ၤ ဘၣ်ထံး၀ဲကိးကပၤဒဲးအကတီၢ်အံၤ ကွဲမုာ်၀ဲတစိၤသးတၢ်မုာ်တၢ်ခုၣ်အံၤ လီၤဂာ်ဒ်သိးဒီးအ၀ဲသ့ၣ်န့ၣ်တၢ်အိၣ်သးတဂ့ၤလၢၤဘၣ်လီၤႉ ကီၢ်ပူၤမ့ၢ်ဂ့ၤႇထံဂုၤကီၢ်ဂၤမ့ၢ်ဂ့ၤသ့ၣ်ညါထီၣ်(စကစ)လံအဃိ ကမၤကဒါက့ၤ၀ဲလၢကျဲလီၢ်လံအသိးလီၤႉ တၢ်ကွဲမုာ်ဒ်အံၤစ့ၢ်ကီးပန့ၢ်ဘၣ်တၢ်မၤလိအဘျီတဖၣ်အဘျီလံ ဘၣ်တူၢ်စ့ၢ်ကီးအဘျီတဖၣ်အဘျီလံလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ကီၢ်ပယီၤကီၢ်စၢဖှိၣ်မုၢ်နံၤၦဲၤထီၣ်(၇၅)၀ီတ၀ီတၢ်ရဲၣ်တၢ်ကျဲၤလၢပယီၤသုးမီၤစိရိၤမၤ၀ဲအံၤန့ၣ် တၢ်ကရၢကရိလၢအဆဲးလီၤတၢ်ပတုာ်တၢ်ခး(NCA)တဖၣ်လၢအမ့ၢ် တၢ်က့ၤသူၣ်ထီၣ်ယိၤဒိၣ်ကီၢ်(RCSS)ႇမိၣ်ကီၢ်သီပၣ်တံၣ်(MNSP)ႇရခၢၣ်ကီၢ်တၢ်ထူၣ်ဖျဲးပၣ်တံၣ်(ALP)ႇလါဟူၣ်ဒံၣ်မိၣ်ကရဲၣ်တ့ၣ်ကရၢ(LDU)ႇတၢ်မုာ်တၢ်ခုၣ်ကီၣ်ကးကရၢ(KNU/KNLA-PC)ႇ ပအိၣ်ဒီကလုာ်တၢ်ထူၣ်ဖျဲးသုးကရၢစိ(PNLO)ဒီးကညီဒီကလုာ်စၢဖှိၣ်ကရၢ(KNU)ဒူပျာ်ယာ်ကီၢ်ရ့ၣ်ခိၣ်လီၢ်လံၤပဒိၣ်စီၤစွ့ၤမီလၢအအိၣ်ဘှံးလၢမူဒါပူၤသ့ၣ်တဖၣ်လဲၤထီၣ်၀ဲတၢ်ရဲၣ်တၢ်ကျဲၤအံၤအဂ့ၢ်န့ၣ် ကီၢ်ပူၤတၢ်ကစီၣ်သန့တနီၤပာ်ဖျါ၀ဲန့ၣ်လီၤႉ လၢန့ၣ်အမဲာ်ညါတၢ်ရဲၣ်တၢ်ကျဲၤအပူၤကရူၢ်ကရၢလၢအတဆဲးလီၤဘၣ်ဒံး(NCA)တဖၣ်လၢအမ့ၢ် ရခၢၣ်သုးမုၢ်ဒိၣ်(AA/ULA)ႇ၀းကီၢ်သွံၣ်ဃူဖိးသုးမုၢ်ဒိၣ်(UWSA)ႇယိၤဒိၣ်ကီၢ်တၢ်ဂုၤထီၣ်ပသီထီၣ်ပၣ်တံၣ်(SSPP/SSA)ဒီးမဲလါကရူၢ်(NDAA)အခၢၣ်စးတဖၣ်စုာ်စုာ်ဟဲထီၣ်၀ဲအဂ့ၢ်န့ၣ် သ့ၣ်ညါဘၣ်ဒ်တၢ်ကစီၣ်သန့တနီၤပာ်ဖျါ၀ဲအသိးန့ၣ်လီၤႉ ပယီၤသုးမီၤစိရိၤမၤကီၢ်ပယီၤကီၢ်စၢဖှိၣ်မုၢ်နံၤတၢ်တၢၣ်ပီၣ်တဲသကိးတၢ်မုာ််တၢ်ခုၣ်အံၤ မ့ၢ်ဒၣ်တၢ်အယီၤအဘျၣ်လီၤဒီး (ခ့ၣ်အဲၣ်ယူၣ်)ခိၣ်နၢ်တလဲၤထီၣ်၀ဲဘၣ်အံၤမ့ၢ်တၢ်ဆၢတဲာ်လၢအဂ့ၤ၀ဲလီၤအဂ့ၢ်န့ၣ် သုးခိၣ်ကျၢၢ်ဖိ စီမုၢ်ဟဲ ပဲာ်ထံနီၤဖး၀ဲဒ်အံၤန့ၣ်လီၤႉ အ၀ဲစံး၀ဲလၢ“တၢ်ကွဲမုာ်တၢ်တၢၣ်ပီၣ်တဲသကိးတၢ်မုာ်တၢ်ခုၣ်အံၤမ့ၢ်၀ဲဒၣ်ဒ်သိးသုးကီၣ်ကးကဒိးန့ၢ်ဘၣ်တၢ်ခွဲးတၢ်ယာ်အဂီၢ်လီၤႉ ဒုၣ်ဒါအတၢ်ကူၣ်တရံးအံၤပခိၣ်ပနၢ်တဖၣ်မ့တသ့ၣ်ညါဘၣ်န့ၣ်ကမၣ်၀ဲသ့လီၤႉ အ၀ဲသ့ၣ်တလဲၤထီၣ်၀ဲဘၣ်အံၤမ့ၢ်တၢ်လၢအဂ့ၤလၢကညီဖိအဂီၢ်လီၤ”အဂ့ၢ်န့ၣ်စံး၀ဲန့ၣ်လီၤႉ ကရူၢ်ကရၢလၢအလဲၤထီၣ်၀ဲကီၢ်ပယီၤကီၢ်စၢဖှိၣ်မုၢ်နံၤ(၇၅)၀ီတ၀ီဒီးတၢ်တၢၣ်ပီၣ်တဲသကိးတၢ်မုာ်တၢ်ခုၣ်တၢ်ရဲၣ်တၢ်ကျဲၤအံၤတဖၣ်ဖျါ၀ဲလၢအပဟ့ၣ်ဂံၢ်ဟ့ၣ်ဘါတူၢ်လိာ်၀ဲသုးမီၤစိရိၤလၢအဟံးဆူၣ်ကွံာ်တၢ်စိတၢ်ကမီၤလၢပဒိၣ်လၢကမျၢၢ်တီၣ်ထီၣ်၀ဲႇဆီၣ်တံၢ်မၤနၢၤမၤသံမၤ၀ီကမျၢၢ်ထံဖိကီၢ်ဖိဒီးမၤကမၣ်၀ဲၦၤဂ့ၢ်၀ီခွဲးယာ်အံၤအဃိ ကလုာ်ဒူၣ်ဖီၣ်စုက၀ဲၤတၢ်ကရၢကရိလၢအလဲၤထီၣ်တၢ်ရဲၣ်တၢ်ကျဲၤမူးအံၤအဖီခိၣ်န့ၣ် တၢ်ပဲာ်ထံနီၤဖးဟဲအိၣ်ထီၣ်၀ဲအကလုာ်ကလုာ်န့ၣ်လီၤႉ
ကြုၢ်တုကညီလုၢ်လၢ်မ့ၣ်အူဘူၣ်ပူၤတၢ်ပာ်လီၤတၢ်တၤကျိၣ်တၤစ့လီၢ်အါမးႇ တၢ်ပဲာ်ထံနီၤဖးဟဲအိၣ်ထီၣ်လၢလီၢ်က၀ီၤဖိတဖၣ်အဘၢၣ်စၢၤ
လါဖ့ၤဘြူၤအါရံၤ ၁၄ သီႇ ၂၀၂၂ နံၣ်ႇ ခ့ၣ်အဲးစံၣ် ကြုၢ်တုကီၢ်ဆၣ်ပူၤ မ့ၣ်အူဘူၣ်(မီးပံုပွဲ)လၢဘၣ်တၢ်မၤလၤကပီၤ၀ဲကိးမုၢ်နံၣ်ဒဲးအံၤ မ့ၢ်၀ဲဘူၣ်တခါလၢအဘၣ်တၢ်ပာ်ဖှိၣ်၀ဲလၢကညီလုၢ်လၢ်ႇတၢ်ဆဲးတၢ်လၤဒီးတၢ်ဘူၣ်တၢ်ဘါအံၤဘၣ်ဆၣ် တနံၣ်အံၤလၢအလီၤဘၣ်၀ဲ(၁၉၆)၀ီတ၀ီ ကြုၢ်တုမ့ၣ်အူဘူၣ်အံၤအပူၤ တၢ်ပာ်လီၤစ့ၢ်ကီး၀ဲဒီးတၢ်ဂဲၤလိာ်ကွဲတၢ်တၤကျိၣ်တၤစ့လီၢ်အကလုာ်ကလုာ်အဃိ တၢ်ပဲာ်ထံနီၤဖးဟဲအိၣ်ထီၣ်၀ဲလၢလီၢ်က၀ီၤကမျၢၢ်တဖၣ်အဘၢၣ်စၢၤန့ၣ်လီၤႉ ကြုၢ်တုမ့ၣ်အူဘူၣ်တၢ်ရဲၣ်တၢ်ကျဲၤအံၤဘၣ်တၢ်စးထီၣ်အိးထီၣ်၀ဲဖဲလါဖ့ၤဘြူၤအါရံၤ ၈ သီတုၤလၢလါဖ့ၤဘြူၤအါရံၤ ၁၅ သီလၢတနွံအတီၢ်ပူၤဘၣ်ဆၣ် တချုးလၢတၢ်အိးထီၣ်မူးတုၤဒံးဘၣ်အခါ ဖဲအပူၤကွံာ်လါယနူၤအါရံၤ ၁၉ သီအနံၤန့ၣ် သုးခိးကီၢ်ဆၢ(BGF)သုးဟီၣ်က၀ီၤ(၄)ခိၣ် သုးခိၣ်ဒိၣ်ဖိစိၤမိၣ်သိၤတီခိၣ်ရိၣ်မဲအိးထီၣ်စိ၀ဲတၢ်ဂဲၤကလံၣ်ကၠၤႇတၢ်သူၣ်၀ံၣ်သးဆၢႇ တၢ်ဂဲၤလိာ်ကွဲတၢ်တၤကျိၣ်တၤစ့လီၢ်အကလုာ်ကလုုာ်အဂ့ၢ်န့ၣ် လီၢ်က၀ီၤဖိိတဖၣ်စံး၀ဲန့ၣ်လီၤႉ “ခဲအံၤမၤ၀ဲဒၣ်လုၢ်လၢ်မ့ၣ်အူဘူၣ်ဘၣ်ဆၣ် လီၤဂာ်၀ဲဒၣ်လၢတၢ်မၤအီၣ်မုၢ်ကျိၤ၀ဲၤကွာ်လီၤႉ အိးထီၣ်၀ဲဒၣ်တၢ်ဂဲၤလိာ်ကွဲတၢ်တၤကျိၣ်တၤစ့ဒီး(game)လီၢ်အဃိ လံၣ်အီၣ်ဟံန့ၢ်၀ဲလီၢ်က၀ီၤကမျၢၢ်သ့ၣ်တဖၣ်အစ့လီၤႉ တကွၢ်တၢ်လၢကမျၢၢ်တဖၣ်အဂီၢ်ဘၣ်ႉ လၢတၢ်န့ၣ်အဃိအ၀ဲသ့ၣ်မၤ၀ဲဘူၣ်အံၤယတလဲၤဘၣ်ႉ ခီဖျိမ့ၢ်၀ဲဒၣ်ကညီလုၢ်လၢ်ဘူၣ်ဒီးကဘၣ်လဲၤဘူၣ်ထီၣ်ဘါထီၣ်အီၤအဃိ ပကလဲၤ၀ဲဒၣ်လၢတၢ်ဘူၣ်ထီၣ်ဘါထီၣ်မ့ၣ်အူဘူၣ်တၢ်တနံၤန့ၣ်လီၤမီၤနီၤ”အဂ့ၢ်န့ၣ် လီၢ်က၀ီၤဖိတဂၤစံး၀ဲန့ၣ်လီၤႉ ၦၤအါဒၣ်တက့ၢ်န့ၣ်ဖဲလဲၤလၢဘူၣ်အခါခီဖျိတသူ၀ဲတၢ်ကးဘၢနါဒ့ဘၣ်အဃိ ဘၣ်ယိၣ်လၢတၢ်ဆါဃၢ်ကဘၣ်ကူဘၣ်ဂာ်ဒီး မ့ၢ်ကရၤလီၤအသးအခါဖဲလဲၣ်အမဲာ်ညါ မ့ၢ်မ့ၣ်ပိၢ်ကပိၢ်ဖးထီၣ်ဒီးတၢ်ဒုးကကဲထီၣ်အခါဖဲလဲၣ်န့ၣ်တသ့ၣ်ညါဘၣ်အဃိ တၢ်ဘၣ်ယိၣ်ဘၣ်ဘှီအိၣ်၀ဲဒၣ်အဂ့ၢ်န့ၣ် လီၢ်က၀ီၤဖိတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ လၢကညီကီၢ်စဲၣ် ကီးတရံးကီၢ်ဆၣ် ကြုၢ်တုကညီလုၢ်လၢ်မ့ၣ်အူဘူၣ်တၢ်ရဲၣ်တၢ်ကျဲၤအပူၤ တၢ်တပာ်လီၤ၀ဲကညီလုၢ်လၢ်တၢ်ဆဲးတၢ်လၤတၢ်ကွၢ်ကီအလီၢ်တဖၣ်ဘၣ်ဒီး မ့မ့ၢ်တခီတၢ်ပာ်ထီၣ်၀ဲထဲကညီသုးခိးကီၢ်ဆၢ(BGF)သုးဟီၣ်က၀ီၤ(၄)အခိၣ် သုးခိၣ်ခိၣ်ဖိ စီၤမိၣ်သိၤအတၢ်ဂီၤဒီး ပယီၤသုးမီၤစိရိၤအတၢ်ဂီၤ(ဗွီနိုင်း)တဖၣ်လီၤအဃိ မၤ၀ဲဒၣ်ဘူၣ်အံၤလၢကပာ်ဖျါထီၣ်အ၀ဲသ့ၣ်တၢ်စိတၢ်ကမီၤကတုၤထီၣ်ထီၣ်ဘးအဂီၢ်လီၤအဂ့ၢ်န့ၣ် လီၢ်က၀ီၤဖိတဖၣ်ပဲာ်ထံနီၤဖး၀ဲဒၣ်န့ၣ်လီၤႉ ကြုၢ်တုခၠီဖၠါသ၀ီဖိတဂၤစ့ၢ်ကီးစံး၀ဲလၢ“တကီၢ်အံၤကြၢးလၢတၢ်ကဘၣ်မၤထဲကြုၢ်တုကီၢ်ဆၣ်လုၢ်လၢ်မ့ၣ်အူဘူၣ်လီၤႉဘၣ်မနုၤအဃိလဲၣ်န့ၣ်တၢ်လီၢ်ဖဲအံၤတၢ်ဒုးက့ၤကဲထီၣ်ႇၦၤဘၣ်ဃ့ၢ်မှံဟးဖျိးႇဘၣ်ပာ်တ့ၢ်ကွံာ်ဟံၣ်ဃီလီၤႉ ခီဖျိတၢ်ဆါဃၢ်အါထီၣ်လၢအသီတမံၤလံအဃိ တချုးလၢတၢ်ဆါကဲထီၣ်ဒံးဘၣ်န့ၣ်ပကဘၣ်တြီဆၢစိအီၤလီၤႉ တၢ်သ့ၣ်တဖၣ်အံၤအ၀ဲသ့ၣ််ကွၢ်ကပာ်ကွံာ်၀ဲဒီးမၤအီၣ်မၤအီ၀ဲမုၢ်ကျိၤ၀ဲၤကွာ်လၢဘူၣ်ပူၤလီၤအဃိ မ့ယံၤထီၣ်န့ၣ်ၦၤလၢအမၤအီၣ်မုၢ်ကျိၤ၀ဲၤကွာ်လၢကညီလုၢ်လၢ်ဘူၣ်အံၤတဖၣ် ဘၣ်ယိၣ်လၢကလုၢ်ဘၢဒိၣ်စိတၢ်လီၤ”အဂ့ၢ်န့ၣ် စံး၀ဲန့ၣ်လီၤႉ ကညီလုၢ်လၢ်မ့ၣ်အူဘူၣ်အံၤ မ့ၢ်၀ဲဒၣ်တၢ်ဘူၣ်တၢ်ဘါတခါလၢအဘၣ်တၢ်ပာ်ဖှိၣ်ထီၣ်၀ဲလၢ ကညီလုၢ်လၢ်ႇတၢ်ဆဲးတၢ်လၤဒီးမိၢ်ပၢ်ဖံဖုလၢညါအတၢ်ဆူၣ်အီၣ်နာ်အီၣ်ဒီးတၢ်ဘူၣ်တၢ်ဘါအသိး မ့တုၤဃီၤဖဲထ့ကူာ်လါၦဲၤန့ၣ်တၢ်ဘူၣ်ထီၣ်ဘါထီၣ်၀ဲမ့ၣ်အူအံၤဒီး တလးကူၣ်သူၣ်က့သးၦၢ်ႇလီၢ်က၀ီၤသီဘူၣ်သီခါတဖၣ်တီခိၣ်ရိၣ်မဲမၤဘူၣ်မၤဘါ၀ဲကိးမုၢ်နံၣ်ဒဲးန့ၣ်လီၤႉ ဘၣ်ဆၣ်ခီဖျိဟီၣ်က၀ီၤပူၤတၢ်ဒုးကဲထီၣ်ဒီးခိ၀ံၣ်ဃၢ်အသီအိၤမံၤခြိၤရၤလီၤသးအါထီၣ်အဃိ ၦၤဟဲဘူၣ်ဟဲဘါထီၣ်တအါဒ်သိးလၢညါအပူၤကွံာ်ဘၣ်ဒီး တုၤလၢတနံၤအံၤၦၤဟဲဘူၣ်ထီၣ်ဘါထီၣ်အိၣ်၀ဲစှၤဒံးလီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ