ခီဖျိပယီၤသုးကဘီယူၤဟဲဆှၣ်တၢ်အဃိ ကီးတရံးလီၢ်က၀ီၤဖိတဖၣ်ဘၣ်ယိၣ်ဘၣ်ဘှီပျံၤတၢ်ဖုးတၢ်
လါစဲးပထ့ဘၢၣ် ၂၇ သီႇ ၂၀၂၁ နံၣ်ႇ ခ့ၣ်အဲးစံၣ် ဖဲအပူၤကွံာ်လါစဲးပထ့ဘၢၣ် ၂၅ သီအနံၤ ခီဖျိသုးမီၤစိရိၤအသုးကဘီယူၤဟဲဆှၣ်တၢ်လၢကညီကီၢ်စဲၣ် ကီးတရံးကီၢ်ဆၣ်ပူၤတလီၢ်လီၢ်အဃိ လီၢ်က၀ီၤဖိတဖၣ်ဘၣ်ယိၣ်ဘၣ်ဘှီပျံၤတၢ်ဖုးတၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ သုးမီၤစိရိၤအသုးကဘီယူၤဟဲဆှၣ်တၢ်အဖီခိၣ် ကီးတရံးကီၢ်ဆၣ် လီၢ်က၀ီၤဖိတဂၤစံး၀ဲလၢ“ဘၣ်ယိၣ်လၢကဟဲကွံာ်လီၤမ့ၣ်ပိၢ်ဒ်သိးဒီးတၢ်လီၢ်လၢအဂၤမီၤနီၤႉ ခဲအံၤမ့ၢ်စ့ၢ်ကီးတၢ်စူၤခါႇမ့ၢ်ဘၣ်စံၣ်ဒီးဖိဒံဖိသၣ်ဒုတညီဘၣ်ႉ မ့ၢ်၀ံၤလၢကအီၣ်ကအီအဂီၢ်စ့ၢ်ကီး တမ့ၢ်လၢကဘၣ်ဂီၢ်၀ဲဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ သုးမီၤစိရိၤဟံးန့ၢ်ကွံာ်တၢ်စိတၢ်ကမီၤ၀ံၤအလီၢ်ခံ သုးမီၤစိရိၤတကပၤဟဲဃုသ့ၣ်ညါဟဲဆှၣ်တၢ်ဒီး drone ႇကဘီယူၤအိၣ်၀ဲတလီၢ်လီၢ်အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ ဖဲအပူၤကွံာ်လါအီကူးသၢနွံတနွံအခါ လၢကီးတရံးကလံၤထံး ကမဲၤကိဒီးအီဖးဖိသ၀ီတကပၤန့ၣ် တၢ်ဒုးကဲထီၣ်လၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) သုးက့ ၆ သုးရ့ၣ်(၁၈)ဒီး သုးမီၤစိရိၤအသုး ပၢဆှၢရဲၣ်ကျဲၤသုး၀ဲၤလီၢ်ခိၣ်သ့ၣ်(စကခ–၁၃)တဖၣ်အဘၢၣ်စၢၤ၀ံၤအလီၢ်ခံ သုးမီၤစိရိၤအသုးကဘီယူၤဟဲဆှၣ်တၢ်တစှၤန့ၢ်ဒံးခံဘျီဘၣ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ ဖဲအပူၤကွံာ်လါအ့ဖြ့ၣ်အခါစ့ၢ်ကီး KNLA သုးက့(၅)ဟံးန့ၢ်ကွံာ်၀ဲသုးမီၤစိရိၤအသုးကလၢၤတနီၤ လၢအိၣ်ဖဲကီၢ်ဆၢလၢခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်ပူၤ၀ံၤအလီၢ်ခံ သုးမီၤစိရိၤအသုးအကဘီယူၤ ဟဲကွံ၁်လီၤမ့ၣ်ပိၢ်လၢခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်ဟီၣ်က၀ီၤအပူၤန့ၣ်လီၤႉ ခီဖျိသုးမီၤစိရိၤအသုးအကဘီယူၤ ဟဲကွံ၁်လီၤမ့ၣ်ပိၢ်အဃိ လီၢ်က၀ီၤကညီကမျၢၢ်ထံဖိကီၢ်ဖိလၢအကလးဘၣ်ဃ့ၢ်မှံဟးဖျိး၀ဲဒၣ်ဒီး တုၤလၢခဲအံၤတစုၦၤလၢတက့ၤဘၣ်လၢအဒူအသ၀ီဒံးဘၣ်အိၣ်ဒံး၀ဲဒၣ်န့ၣ်လီၤႉ ဒ်န့ၣ်အသိး တကီၢ်ခါခဲအံၤလၢခ့ၣ်အဲၣ်ယူၣ် သုးက့(၁)ဒီးသုးက့(၃)ဟီၣ်က၀ီၤတကပၤန့ၣ် သုးမီၤစိရိၤအသုးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်အဘၢၣ်စၢၤ တၢ်ခးလိာ်သးကဲထီၣ်ဒံး၀ဲအသိး လၢသုးက့(၁)ဟီၣ်က၀ီၤအပူၤ သုးမီၤစိရိၤအသုးတကပၤ ကိးမၢဆူၣ်၀ဲလီၢ်က၀ီၤပိာ်မုၣ်ပိာ်မၢၤတဖၣ်အိၣ်၀ဲ အဂ့ၢ်န့ၣ် လီၢ်က၀ီၤဖိတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ
ခီဖျိသူမှဲကျိထံဒိၣ်ထီၣ်အဃိ မၠၣ်၀တံၣ်၀့ၢ် က၀ီၤဒ့ဟံၣ်လၢအိၣ်တၢ်လီၢ်လီၤဖုၣ်အဖျၢၣ်(၁၀၀၀)ဘျဲၣ် ဘၣ်သုးလီၢ်သုးကျဲ
လါစဲးပထ့ဘၢၣ် ၂၇ သီႇ ၂၀၂၁ နံၣ်ႇ ခ့ၣ်အဲးစံၣ် ကညီကီၢ်စဲၣ် မၠၣ်၀တံၣ်၀့ၢ်ပူၤ ခီဖျိသူမှဲကျိထံဒိၣ်ထီၣ်အဃိ က၀ီၤဒ့ဟံၣ်လၢအအိၣ်တၢ်လီၢ်လီၤဖုၣ်လၢထံကျိကပၤအဖျၢၣ်(၁ႇ၀၀၀)ဘျဲၣ် ဘၣ်သုးလီၢ်သုးကျဲအဂ့ၢ်န့ၣ်သ့ၣ်ညါဘၣ်န့ၣ်လီၤႉ ဖဲမဟါလါစဲးပထ့ဘၢၣ် ၂၆ သီ ဟါခီအဆၢကတီၢ် သူမှဲကျိထံဟဲထီၣ်၀ဲဒၣ်ကွ့ၢ်ကွ့ၢ်ဒီး တုၤလၢမုၢ်နၤခီအဆၢကတီၢ် ထံအံၤထီၣ်တလၢကွံာ်၀ဲဒၣ်တုၤလၢတၢ်ဘၣ်ယိၣ်ထံနီၣ်ဂံၢ်(၃)ပ့ၣ်ဘျဲၣ်ညါန့ၣ်လီၤႉ ခီဖျိသူမှဲကျိထံဒိၣ်ထီၣ်အဃိ က၀ီၤဒ့တဖၣ်လၢအအိၣ်တၢ်လီၢ်လီၤဖုၣ်လၢထံကျိအကပိၤကပၤတဖၣ်လၢအမ့ၢ် ကၠီၣ်ဖၠၤတြဲၤႇသဲပိၤတြဲၤႇသယဲၣ်ပ့ၤတြဲၤႇသဖါပ့ၤတြဲၤႇခိၤစၤတြဲၤႇကၠီၣ်တါတြဲၤႇ၀ါတီတြဲၤတၢ်လီၢ်တဖၣ်ဒီး က၀ီၤဒ့လၢအိၣ်၀့ၢ်ပူၤတနီၤဟံၣ်ခိၣ်အဖျၢၣ်(၁ႇ၀၀၀)ဘျဲၣ်ဃၣ်ဃၣ် ဘၣ်သုးလီၢ်သုးကျဲန့ၣ်လီၤႉ ထံဖိကီၢ်ဖိကမျၢၢ်လၢအသဂၢၢ်ဘၣ်ဒီးထံဒိၣ်ထီၣ်တၢ်ကီတၢ်ခဲအံၤတဖၣ် တၢ်အိးထီၣ်န့ၢ်၀ဲတၢ်အိၣ်ကဒုတၢ်လီၢ်လၢအဘူးဖဲန့ၣ်တဖၣ်ဒီး တုၤလၢတဂီၤအံၤဂီၤခီအဆၢကတီၢ် ၦၤနီၣ်ဂံၢ်(၃ႇ၀၀၀)ဃၣ်ဃၣ်ဟဲတုၤအိၣ်၀ဲဒၣ်ဖဲတၢ်အိၣ်ကဒုအလီၢ်န့ၣ်လီၤႉ မၠၣ်၀တံၣ်၀့ၢ်အံၤ ဖဲအပူၤကွံာ်လါယူၤဒီးလါယူၤလံအခါစ့ၢ်ကီး ခီဖျိသူမှဲကျိအထံထီၣ် တလၢ၀ဲထံတၢ်ဘၣ်ယိၣ်နီၣ်ဂံၢ်(၉)ပ့ၣ်ဘျဲၣ်အဃိ ဟံၣ်ခိၣ်လၢအကထိဘၣ်သုးလီၢ်သုးကျဲ၀ဲဒၣ်န့ၣ်လီၤႉ ဒီးအခဲအံၤတဘျီ သၢဘျီတဘျီခီဖျိသူမှဲကျိထံဒိၣ်ထီၣ်အဃိ တုၤလၢတကီၢ်ခါမုၢ်ထူၣ်တစုဒ်ပဒိးန့ၢ်ဘၣ်တၢ်ကစီၣ်အသိး သူမှဲကျိထံအံၤလီၤက့ၤ၀ဲလံဒီးဘူးထီၣ်ကတုၤ၀ဲဒၣ်လၢထံတၢ်ဘၣ်ယိၣ်နီၣ်ဂံၢ်အဖီလာ်လံအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဖၣ်အၣ်၀့ၢ်ပူၤတၢ်ခးသံကွံာ်ၦၤလၢအမံၤဟူသၣ်ဖျါလၢအကဲန့ၢ်ပယီၤသုးတၢ်မဲာ်ချံတဂၤ
လါစဲးပထ့ဘၢၣ် ၈ သီႇ ၂၀၂၁ နံၣ်ႇ ခ့ၣ်အဲးစံၣ် ကညီကီၢ်စဲၣ် ဖၣ်အၣ်၀့ၢ်ပူၤ ဖဲမဟါ(လါစဲးပထ့ဘၢၣ် ၇)သီအနံၤ တၢ်ခးသံကွံာ်ၦၤလၢ အမံၤဟူသၣ်ဖျါလၢအဟ့ၣ်သုးမီၤစိရိၤအသုးတၢ်ကစီၣ်တဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ကိၣ်ကၠီၤစ့ၤ၀့(ကိး)တကီၤငကၠွဲလၢအအိၣ်ဖဲဖၣ်အၣ်၀့ၢ် နီၣ်ဂံၢ်(၄)က၀ီၤဒ့တဂၤအံၤ ဖဲမဟါဟါခီ ၆ နၣ်ရံၣ် အဆၢကတီၢ် ၦၤစိာ်စုက၀ဲၤဖိဟဲခးသံအီၤလၢအဟံၣ်မဲာ်ညါဒီး ကျိ ၂ ထံၣ်အဂ့ၢ်န့ၣ် ၦၤလၢအဘူးဒီးအီၤတဖၣ်စံး၀ဲန့ၣ်လီၤႉ “ဖဲမဟါ ၆ နၣ်ရံၣ်ဃၣ်ဃၣ်န့ၣ်တၢ်ဟဲခးသံအီၤလီၤႉ ဖဲတၢ်လဲၤဆှၢအီၤလၢတၢ်ဆါဟံၣ်အခါသံ၀ဲလီၤႉ တၢ်ခးသံအီၤဒီးကျိ ၂ ထံၣ်ႉ အ၀ဲန့ၣ်မ့ၢ်၀ဲၦၤတဂၤလၢအတဲတၢ်လိၤလိၤလီၤႉ မ့တဘၣ်ဘၣ်န့ၣ်တဲ၀ဲလၢတဘၣ်ဘၣ်အဃိ တၢ်ဆိကမိၣ်အီၤလၢအကဲတၢ်မဲာ်ချံလီၤႉ ပတဲအီၤလၢအိၣ်ဒီးတၢ်ပလီၢ်ထီဘိန့ၣ်ပဟ့ၣ်ပလီၢ်အီၤလီၤ” အဂ့ၢ်န့ၣ် ကိၣ်ကၠီၤစ့ၤ၀့ အသကိးတဂၤစံးဘၣ်ခ့ၣ်အဲးစံၣ်န့ၣ်လီၤႉ တၢ်ခးသံကိၣ်ကၠီၤစ့ၤ၀့(ကိး)တကီၤငကၠွဲကဲထီၣ်သးအဂ့ၢ်တၢ်တသ့ၣ်ညါ၀ဲဒံးဘၣ်ဆၣ် ခီဖျိအ၀ဲန့ၣ်အမံၤဟူသၣ်ဖျါလၢအကဲ၀ဲဒၣ်ပယီၤသုးတၢ်မဲာ်ချံအဃိ ကဘၣ်မ့ၢ်တၢ်ခးသံအီၤလီၤအဂ့ၢ်န့ၣ် ဖၣ်အၣ်၀့ၢ်ဖိတနီၤပဲာ်ထံနီၤဖးစံး၀ဲန့ၣ်လီၤႉ ကိၣ်ကၠီၤစ့ၤ၀့(ကိး)တကီၤငကၠွဲလၢအဘၣ်တၢ်ခးသံအီၤအံၤ ဖဲ ၂၀၂၀ နံၣ်တၢ်ဃုထၢအခါ နုာ်လီၤဒိးတပြၢသးဒ်ကညီကီၢ်စဲၣ် ပယီၤကလုာ်ဒူၣ်ဂ့ၢ်၀ီကိတိာ်အလီၢ်ဒ်နီၢ်တဂၤခၢၣ်စးအသိးဒီး ဆှူကွံာ်၀ဲတၢ်ဖးန့ၣ်လီၤႉ
KNLA ပၢဆှၢသုးဂ့ၢ်၀ီခိၣ်ကျၢၢ် သုးခိၣ်ကျၢၢ်ဂီၢ်ဂ့ၢ် စီၤပံလးစ့ၣ် စူးကွံာ်သး
လါစဲးပထ့ဘၢၣ် ၈ သီႇ ၂၀၂၁ နံၣ်ႇ ခ့ၣ်အဲးစံၣ် ဖဲတနံၤအံၤ(လါစဲးပထ့ဘၢၣ် ၈)သီ ဂီၤခီ ၅ နံၣ်အဆၢကတီၢ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) ပၢဆှၢသုးဂ့ၢ်၀ီခိၣ်ကျၢၢ် သုးခိၣ််ကျၢၢ်ဂီၢ်ဂ့ၢ် စီၤပံလးစ့ၣ် စူးကွံာ်အသးဖဲကီၢ်ကၠီၣ်တဲၣ် မဲၢ်ဆီးတၢ်ဆါဟံၣ်အဂ့ၢ်န့ၣ် အဟံၣ်ဖိဃီဖိတဖၣ်စံး၀ဲန့ၣ်လီၤႉ “ယပါန့ၣ်အိၣ်ဃာ်ဒီးဆံၣ်ဆၢႇသွံၣ်ထီၣ်ႇသးတၢ်ဆါမီၤနီၤႉ အဂုၤအဂၤကပၣ်စ့ၢ်ဧါဒုပတသ့ၣ်ညါဘၣ်ႉ သံခဲအံၤန့ၣ်ဘၣ်တဲလၢသးၦၢ်တၢ်ဆါအဃိလီၤႉ ပတတဲလီၤတံၢ်ပသးတအိၣ်နီတမံၤဒံးဘၣ်မီၤနီၤႉ ပာ်လီၤဖဲအံၤ၀ံၤမးတၢ်ရဲၣ်တၢ်ကျဲၤကဟဲတပတီၢ်တပတီၢ်လီၤ”အဂ့ၢ်န့ၣ် အဖိမုၣ်ဒိၣ် နီၢ်ကရှံယၤ စံးဘၣ်ခ့ၣ်အဲးစံၣ်န့ၣ်လီၤႉ သုးခိၣ်ကျၢၢ်ဂီၢ်ဂ့ၢ် စီၤပံလးစ့ၣ်(၇၅)နံၣ်အံၤ ဖဲ(၁၉၆၄)နံၣ် လါမးရှး ၁၅ သီအနံၤ စးထီၣ်နုာ်လီၤ၀ဲလၢကညီတၢ်ပၢၢ်ဆၢအပူၤအဆိကတၢၢ်ဒ်သုးဖိတဂၤအသိးဒီး ဟံး၀ဲမူဒါဒ်သုးဖိအပတီၢ်ယံၤ၀ဲ(၈)နံၣ်၀ံၤအလီၢ်ခံ ဘၣ်တၢ်သုးထီၣ်န့ၢ်အလီၢ်လးဒ်သုးစကီၤတဂၤအသိးန့ၣ်လီၤႉ လၢန့ၣ်အမဲာ်ညါဘၣ်တၢ်သုးထီၣ်အလီၢ်လးဒ်ဆၣ်တဖီးႇဆၣ်ခံဖီးႇဆၣ်သၢဖီးဒီးဆူသုးခိၣ်ဒိၣ်ဖိႇသုးခိၣ်ဒိၣ်ဂီၢ်ဂ့ၢ်ႇသုးခိၣ်ဒိၣ်စိႇသုးခိၣ်ကျၢၢ်ဖိအပတီၢ်တဖၣ်န့ၣ်လီၤႉ ဖဲ(၂၀၀၄)နံၣ် ဘၣ်တၢ်သုးထီၣ်ကဒီးအလီၢ်လးဒ် သုးခိၣ်ကျၢၢ်ဂီၢ်ဂ့ၢ်အသိးတုၤလၢအစူးကွံာ်အသးသမူတစုန့ၣ်လီၤႉ သုးခိၣ်ကျၢၢ်ဂီၢ်ဂ့ၢ်စူးကွံာ်သးအဖီခိၣ် ကဲထီၣ်တၢ်သူၣ်အုးသးအုးဒီး တၢ်လီၤမၢ်ဖးဒိၣ်လၢကညီတၢ်ပၢၢ်ဆၢဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်အဂီၢ်အဂ့ၢ်န့ၣ် သုး၀ဲၤလီၢ်ခိၣ်သ့ၣ် (သ၀ခ)ကွဲးဖျါထီၣ်၀ဲလၢအ(social media)အပူၤန့ၣ်လီၤႉ သုးခိၣ်ကျၢၢ်ဂီၢ်ဂ့ၢ်စီၤပံလးစ့ၣ်အံၤ မ့ၢ်၀ဲဒၣ်ခ့ၣ်အဲၣ်ယူၣ်ကရၢခိၣ်လီၢ်လံၤလၢအမ့ၢ်စ့ၢ််ကီး KNLA သုးရိၣ်မဲခိၣ်ကျၢၢ်လီၢ်လံၤ သုးခိၣ်ကျၢၢ်စိ စီၤတၢ်မျၢ်ဘီအဖိခွါခံဂၤတဂၤအသိး မ့ၢ်စ့ၢ်ကီးခ့ၣ်အဲၣ်ယူၣ်–ကရၢခိၣ်(၂)လီၢ်လံၤ ပဒိၣ်နီၢ်စံၤဖိရၣ်စ့ၣ်အ၀ဲၢ်တဂၤန့ၣ်လီၤႉ သုးခိၣ်ကျၢၢ်ဂီၢ်ဂ့ၢ်စီၤပံလးစ့ၣ်အစိၣ်အံၤ တၢ်ကကုၢ်ထီၣ်၀ဲဖဲတနံၤအံၤ မဲၢ်ဆီး၀့ၢ် ထ့ၣ်စဘါတၢ်သွၣ်ခိၣ်၀ံၤ အဃံချါတဖၣ်တၢ်ကက့ၤစိာ်၀ဲဆူခ့ၣ်အဲၣ်ယူၣ်တၢ်ပၢဟီၣ်က၀ီၤအပူၤဒီး တၢ်ကမၤ၀ဲ တၢ်ပာ်လီၤအဃံချါတၢ်ရဲၣ်တၢ်ကျဲၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ သုးခိၣ်ကျၢၢ်ဂီၢ်ဂ့ၢ်စီၤပံလးစ့ၣ်စူးကွံာ်သးအကတီၢ်...
တၢ်မၤဃံးထီၣ်တၢ်သမံသမိးကျဲလၢကနုာ်လီၤဖၣ်အၣ်၀့ၢ်ပူၤတဖၣ်
လါစဲးပထ့ဘၢၣ် ၈ သီႇ ၂၀၂၁ နံၣ်ႇ ခ့ၣ်အဲးစံၣ် ကျဲနုာ်လီၤဟးထီၣ်လၢကညီကီၢ်စဲၣ်ဖၣ်အၣ်၀့ၢ်ပူၤတၢ်လီၢ်သ့ၣ်တဖၣ် စးထီၣ်ဖဲလါစဲးပထ့ဘၢၣ်ထီၣ်သီန့ၣ် ထံဖိကီၢ်ဖိကမျၢၢ်လၢအဟးထီၣ်က့ၤလီၤတဖၣ် တၢ်မၢအ၀ဲသ့ၣ်စံၣ်လီၤလၢသိလ့ၣ်ႇသိလ့ၣ်ယီၢ်အပူၤဒီးဃုကွၢ်သမံသမိး၀ဲတၢ်နးဒိၣ်န့ၢ်ဒံးအပူၤကွံာ်အဂ့ၢ်န့ၣ် ၦၤအိၣ်၀့ၢ်ပူၤတဖၣ်စံး၀ဲန့ၣ်လီၤႉ စးထီၣ်ဖဲလါစဲးပထ့ဘၢၣ် ၆ သီအနံၤန့ၣ် ဖၣ်အၣ်၀့ၢ်လၢခလီၣ်နိၣ် အိတပ့ၤကၠိတကပၤန့ၣ် တၢ်ဆီလီၤ၀ဲတၢ်သမံသမိးတြဲၤဒီး ကမျၢၢ်ထံဖိကီၢ်ဖိလၢအဟးထီၣ်က့ၤလီၤတဖၣ် တၢ်မၢအ၀ဲသ့ၣ်စံၣ်လီၤလၢသိလ့ၣ်ႇသိလ့ၣ်ယီၢ်အပူၤဒီး ဟံသမံသမိး၀ဲလံာ်လဲၢ်တဖၣ်အမဲာ်ညါ တကးဘၣ်သမံသမိးစ့ၢ်ကီးသိလ့ၣ်ဒီးသိလ့ၣ်ယီၢ်အဒၢပူၤတဖၣ်အဂ့ၢ်န့ၣ် လီၢ်က၀ီၤဖိလၢအသဂၢၢ်ဘၣ်တၢ်တဂၤစံး၀ဲန့ၣ်လီၤႉ အ၀ဲစံး၀ဲလၢ“တနံၤညါအံၤတၢ်ဂ့ၢ်အိၣ်လဲၤဘၣ်လၢန့ၣ်တထံၣ်ဒီးတၢ်သမံသမိးယၤလီၤႉ သံကွၢ်၀ဲလၢနအိၣ်ဖဲလဲၣ်ႇနကလဲၤဖဲလဲၣ်လီၤႉ မၢစံၣ်လီၤလၢဆဲးကဲးခိၣ်ဒီးအိးထီၣ်ဆဲးကဲးဒၢဒီးသမံသမိး၀ဲလီၤႉ သိလ့ၣ်နါက့သမံသမိး၀ဲဒ်န့ၣ်လီၤႉ ပထံၣ်ဘၣ်န့ၣ်သမံသမိးအါ၀ဲလၢသးစၢ်တဖၣ်လီၤႉ မ့ၢ်ကဘၣ်ဃးလိာ်အသးဒီးတနံၤအံၤတၢ်ဘိးဘၣ်ရၤလီၤ(D day)အဃိဧါဒုတသ့ၣ်ညါဘၣ်ႉ ဆၢကတီၢ်ခဲအံၤၦၤကညီလၢအိၣ်လၢဒူသ၀ီအပူၤတဖၣ် တၢ်အရ့မ့တဒိၣ်ဘၣ်န့ၣ် တဘၣ်ဟဲလၢ၀့ၢ်ပူၤဘၣ်န့ၣ်ဂ့ၤဒိၣ်ကတၢၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်ဖဲမဟါန့ၣ်လီၤႉ ဖၣ်အၣ်၀့ၢ်ကျဲနုာ်လီၤတဖၣ်လၢအမ့ၢ် အ့ၤဒူၣ်တိတြဲၤႇနီၤလိၤတိၤမဲာ်ညါႇခလီၣ်နိၣ်ႇတၢ်ကနုာ်လီၤဖၣ်အၣ် တၢ်ဘုၣ်ဆၣ်ဖိကီၢ်ဖိလီၢ်တြဲၤမဲာ်ညါႇနီၤပလ့–လၤကမၠ့ၤကျဲႇဃိၣ်လိာ်တိၤမဲာ်ညါႇ ထံဖိကျိတိတြဲၤတၢ်လီၢ်သ့ၣ်တဖၣ်န့ၣ် သုးမီၤစိရိၤအသုးသမံးသမိးတၢ်အိၣ်၀ဲတလီၢ်လီၢ်န့ၣ်လီၤႉ လၢန့ၣ်အမဲာ်ညါအပူၤကွံ၁်၀့ၢ်ပူၤတၢ်လီၢ်တနီၤန့ၣ် တၢ်သမံသမိး၀ဲထဲၦၤလၢတစိာ်လံာ်ဟးထီၣ်တၢ်ချၢဒီး တထီတၢ်ကးဘၢနါဒ့တဖၣ်လီၤဘၣ်ဆၣ် ဖဲစှၤသီအံၤၦၤလၢဟးထီၣ်တၢ်ချၢမ့တစိာ်ဃုာ်ဒီးလံာ်ဟးထီၣ်တၢ်ချၢဒီးမ့တကးဘၢနါဒ့ဘၣ်တဖၣ် တၢ်ဃ့အီၣ်လိးအ၀ဲသ့ၣ်အမဲာ်ညါ အိးထီၣ်ကွၢ်သမံသမိး၀ဲထံဖိကီၢ်ဖိလၢအဟးထီၣ်က့ၤလီၤအထၢၣ်တဖၣ်အိၣ်၀ဲအဂ့ၢ်န့ၣ် ၦၤလၢအသဂၢၢ်ဘၣ်တၢ်တဖၣ်စံး၀ဲန့ၣ်လီၤႉ ဖၣ်အၣ်၀့ၢ်အံၤတကးဘၣ်အမဲာ်ညါ ကီၢ်စဲၣ်ပူၤ၀့ၢ်အဂၤတဖၣ်စ့ၢ်ကီးတၢ်သမံးသမိးတၢ်ဒ်အံၤအိၣ်၀ဲဒီး လၢပဲၤကၠိၤ–နဘူကျဲဖးဒိၣ်စ့ၢ်ကီးန့ၣ် လီၢ်က၀ီၤသုးခိးကီၢ်ဆၢ-္ဘွၠ (၁၀၁၅)သုးရ့ၣ်တဖၣ် သမံသမိး၀ဲထံဖိကီၢ်ဖိကမျၢၢ်လၢအဟးထီၣ်က့ၤလီၤတဖၣ်အထၢၣ်ႇသိလ့ၣ်ႇအသိလ့ၣ်ယီၢ်တဖၣ်အိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ
တၢ်ဒုးကဲထီၣ်လၢ KNU သုးက့(၄)ဟီၣ်က၀ီၤ၀ံၤအလီၢ်ခံ သုးမီၤစိရိၤအသုးနုာ်လီၤဟံးန့ၢ်အလီၢ်အကျဲအါအါဂီၢ်ဂီၢ်
လါစဲးပထ့ဘၢၣ် ၇ သီႇ ၂၀၂၁ နံၣ်ႇ ခ့ၣ်အဲးစံၣ် ဖဲတနံၤအံၤ(လါစဲးပထ့ဘၢၣ် ၇)သီ ဂီၤခီအဆၢကတီၢ်တၢ်ခးလိာ်သးကဲထီၣ်လၢ ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဘျံးဒ၀ဲၢ်ကီၢ်ရ့ၣ် လၢၢ်မုၢ်လါကီၢ်ဆၣ် ပလီဟီၣ်က၀ီၤပူၤအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ သုးမီၤစိရိၤအသုးဒီး လီၢ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးက့ ၄ႇ ကညီဂၢၤသးကရၢ(KNDO)သုးရ့ၣ် ၇ တဖၣ်အဘၢၣ်စၢၤတၢ်ဘၣ်သဂၢၢ်ခးလိာ်သးကဲထီၣ်အဂ့ၢ်န့ၣ် လီၢ်က၀ီၤပိာ်မုၣ်လၢတအဲၣ်ဒိးပာ်ဖျါအမံၤတဂၤ စံးဘၣ်ခ့ၣ်အဲးစံၣ်န့ၣ်လီၤႉ အ၀ဲစံး၀ဲလၢ“တဂီၤညါအံၤတၢ်ခးလိာ်သးကဲထီၣ်ဖဲ(ပနၢ်မံၤ)သ၀ီကျဲခိၣ်ထိး ပနဲတီၤဒီးကၠီန့ၢၠတၢ်လီၢ်လီၤႉ ပယီၤသုးတဖၣ်အိၣ်ဒီဒူၣ်ညါ မ့မ့ၢ်ကညီသုးတကပၤအိၣ်စှၤလီၤႉ တုၤလၢခဲအံၤခးအဖၢမုၢ်လီၤႉ ခီဖျိတၢ်ခးလိာ်သးကဲထီၣ်အဃိသ၀ီဖိတနီၤစံၣ်လံႇတနီၤန့ၣ်အိၣ်ဒံးလၢသ၀ီပူၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ တၢ်ခးလိာ်သးကဲထီၣ်၀ံၤအလီၢ်ခံ ပယီၤသုးသိလ့ၣ်အခိၣ်(၃၀)ဃၣ်ဃၣ်လၢအတီၣ်၀ဲသုးဂံၢ်ဘါၦဲၤၦဲၤအံၤ လဲၤထီၣ်၀ဲဒၣ်လၢခ့ၣ်အဲၣ်ယူၣ်တၢ်ပၢဟီၣ်က၀ီၤ ထံခံတကပၤအသိး လၢပလီ၀့ၢ်တကပၤစ့ၢ်ကီး ပယီၤသုးသိလ့ၣ်အခိၣ်(၄၀)ဃၣ်ဃၣ်လၢအတီၣ်၀ဲသုးၦဲၤၦဲၤအံၤလဲၤထီၣ်က့ၤလီၤဟူးဂဲၤ၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲအသိး သ့ၣ်ညါဘၣ်န့ၣ်လီၤႉ ဘၣ်ထွဲဒီးတၢ်ခးလိာ်သးကဲထီၣ်တၢ််အိၣ်သးအံၤ ခ့ၣ်အဲၣ်ယူၣ် ဘျံးဒ၀ဲၢ်ကီၢ်ရ့ၣ် ၦၤကတိၤတၢ်ပၢ ပဒိၣ်စီၤဖျိးစိ၀့ စံး၀ဲလၢ“ဒုၣ်ဒါန့ၣ်အတၢ်ပညိၣ်အိၣ်လၢကထီၣ်ဃု၀ဲဒၣ်(PDF)လီၤႉ ထီၣ်ဃု၀ဲဒၣ်လဲၤဘၣ်တိလိာ်သးဖဲန့ၣ်ခဲလၢာ်ခဲစ့ဧါန့ၣ်ယတဲလီၤတံၢ်တဘၣ်ဘၣ်ႉ ယလူၤဆဲးကျိးလၢတၢ်ဖီလာ်တန့ၢ်ဘၣ်တၢ်ဖီလာ်န့ၣ်တဆဲးကျိးယၤဘၣ်ႉ တၢ်ခးလိာ်သးကဲထီၣ်ဒုလီၤတံၢ်လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်လီၤႉ သုးမီၤစိရိၤအသုးတဖၣ်မ့ၢ်ဆဲးဟဲနုာ်လီၤဒံးလၢခ့ၣ်အဲၣ်ယူၣ်အဟီၣ်က၀ီၤအပူၤန့ၣ် တၢ်ဒုးကဆူၣ်ထီၣ်သ့၀ဲအဂ့ၢ်န့ၣ် ပဒိၣ်စီၤဖျိးစိ၀့ စံးအါထီၣ်၀ဲန့ၣ်လီၤႉ
ခီဖျိပယီၤသုးတဖၣ်ဆီလီၤအါထီၣ်အသုးကွ့ၢ်ကွ့ၢ်အဃိ လီၢ်က၀ီၤဖိတနီၤဘၣ်ဟးစံၣ်အိၣ်ခူသူၣ်
လါစဲးပထ့ဘၢၣ် ၇ သီႇ ၂၀၂၁ နံၣ်ႇ ခ့ၣ်အဲးစံၣ် သုးမီၤစိရိၤအသုးလၢအဟဲနုာ်လီၤလၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် သုးက့့(၆)ဟီၣ်က၀ီၤအပူၤတဖၣ် ဖဲလါစဲးပထ့ဘၢၣ်(၅)သီအနံၤန့ၣ် နုာ်လီၤဟံးန့ၢ်အလီၢ်လၢပနွဲၢ်ကျါသ၀ီပူၤအဃိ လီၢ်က၀ီၤဖိတနီၤဘၣ်ယိၣ်ဘၣ်ဘှီပျံၤတၢ်ဖုးတၢ်ဒီးဟးစံၣ်အိၣ်ခူသူၣ်၀ဲဒၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤတၢ်ကစီၣ်အအိၣ်န့ၣ်လီၤႉ ဖဲအပူၤကွံာ်(လါစဲးပထ့ဘၢၣ် ၂)သီအနံၤန့ၣ် သုးမီၤစိရိၤအသုးတဖၣ်နုာ်လီၤအိၣ်လၢပဲတြီဒူသ၀ီကရူၢ် မံၣ်ကသိၤသ၀ီပူၤယံၤ၀ဲ(၄)သီ၀ံၤ ဖဲလါစဲးပထ့ဘၢၣ် ၅ သီအနံၤန့ၣ် ခီဖျိအ၀ဲသ့ၣ်ဟဲဆီလီၤ အသးလၢပနွဲၢ်ကျါသ၀ီပူၤအဃိ ပနွဲၢ်ကျါသ၀ီဃုာ်ဒီးသ၀ီလၢအအိၣ်ဘူးဖဲန့ၣ်သ့ၣ်တဖၣ်ဘၣ်ယိၣ်ဘၣ်ဘှီပျံၤတၢ်ဖုးတၢ်ဒီး ပာ်တ့ၢ်ကွံာ်အဟံၣ်အဃီဟးစံၣ်အိၣ်ခူသူၣ်၀ဲလၢတၢ်လီၢ်အဂၤအဂ့ၢ်န့ၣ် လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“အ၀ဲသ့ၣ်အိၣ်ဒံး၀ဲဖဲပနွဲၢ်ကျါသ၀ီဒံးလီၤႉ အ၀ဲသ့ၣ်မၤအါထီၣ်အၦၤတဘျီတစဲးတဘျီတစဲးလီၤမီၤနီၤႉ ၦၤတနီၤန့ၣ်ပျံၤတၢ်ဒီးစံၣ်အိၣ်ခူသူၣ်လီၤႉ သ၀ီလၢအဂၤတဖၣ်စ့ၢ်ကီးစံၣ်၀ဲလီၤႉ လီၤပၣ်သ၀ီဒီးကီးဆၢသ၀ီတဖၣ်စ့ၢ်ကီးဟးစံၣ်အိၣ်ခူသူၣ်မီၤနီၤႉ ဘၣ်ပျံၤစ့ၢ်ကီးလၢပယီၤသုးကဖီၣ်ပီၣ်တၣ်လီၤႉ ပယီၤသုးကအိၣ်အဂၤ(၅၀)ဘျဲၣ်ညါလီၤႉ မ့ၢ်သုးရ့ၣ်အိၣ်ထဲလဲၣ်ဒုတသ့ၣ်ညါဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်လီၤႉ တကီၢ်ခါခဲအံၤ ပသ့ၣ်ညါဘၣ်လၢသုးမီၤစိရိၤအသုးကျိၤတဖၣ် အ၀ဲသ့ၣ်တၢ်ရဲၣ်တၢ်ကျဲၤအိၣ်လၢကနုာ်လီၤဆီလီၤသးလၢပနွဲၢ်ကျါသ၀ီ တုၤလၢအကၠူၣ်သ၀ီဒီးခိၣ်ဒိၤသ၀ီညါအဂ့ၢ်န့ၣ် လီၢ်က၀ီၤဖိတဂၤဃီအ၀ဲန့ၣ်စံးအါထီၣ်၀ဲန့ၣ်လီၤႉ သုးမီၤစိရိၤအသုးလၢအနုာ်လီၤဟူးဂဲၤလၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးက့(၆)တၢ်ပၢဟီၣ်က၀ီၤအပူၤတဖၣ်အံၤ ကျဲလၢအ၀ဲသ့ၣ်နုာ်လီၤဟူးဂဲၤ၀ဲဒီတကျိၤလၢအမ့ၢ် ကီးသနီၣ်ႇကွ့ကလ့ႇကျ့းႇပဲတြီဒူဒီးပနွဲၢ်ကျါသ၀ီအပူၤတဖၣ် ပယီၤသုးတနီၤအိၣ်တ့ၢ်ဒံး၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ လၢန့ၣ်အမဲာ်ညါသုးမီၤစိရိၤအသုးဒီးသုးခိးကီၢ်ဆၢ(BGF)သုးပာ်ဖှိၣ်တဖၣ်အံၤ ဘှီဂ့ၤထီၣ်၀ဲဒၣ်ကီးသနီၣ်ဒီးကွ့ကလ့သ၀ီတိၤခံဘိအံၤဒီး တိၤအံၤမ့ၢ်၀ံၤန့ၣ်သုးသိလ့ၣ်တဖၣ်ကနုာ်လီၤ၀ဲဒီး ကနုာ်လီၤဟံးန့ၢ်ကွံာ်(KNLA)သုးက့ ၆ သုးရ့ၣ်(၁၈)ဟီၣ်က၀ီၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤတၢ်ကစီၣ်အအိၣ်န့ၣ်လီၤႉ
KNU ထုးထီၣ်ပာ်ဖျါလၢကဒုးထီဒါသုးမီၤစရိၤသနူခဲလၢာ်အဖီခိၣ် ကညီသးစၢ်တူၢ်လိာ်သဂၢၢ်၀ဲ
လါစဲးပထ့ဘၢၣ် ၇ သီႇ ၂၀၂၁ နံၣ်ႇ ခ့ၣ်အဲးစံၣ် ဖဲအပူၤကွံာ်(လါစဲးပထ့ဘၢၣ် ၃)သီအနံၤ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ထုးထီၣ်ဘိးဘၣ်ရၤလီၤ၀ဲလၢကပာ်ဖှိၣ်မၤသကိးတၢ်ဒီးတၢ်ကရၢကရိတဖုလၢ်လၢ်လၢအထီဒါသုးဟံးန့ၢ်ဆူၣ်တၢ်စိတၢ်ကမီၤအံၤဒီးကဒုးထီဒါသုးမီၤစိရိၤသနူခဲလၢာ်အဖီခိၣ် ကညီသးစၢ်တဖၣ်တူၢ်လိာ်သဂၢၢ်၀ဲဒီးမၤ၀ဲ(Campaign Photo)တၢ်ဟူးတၢ်ဂဲၤတခါန့ၣ်လီၤႉ လၢခ့ၣ်အဲၣ်ယူၣ်အတၢ်တီခိၣ်ရိၣ်မဲဟံးစုနဲၣ်ကျဲအလီၢ်ခံန့ၣ် အဲၣ်ဒိးနဲၣ်ပၠးထီၣ်လၢထီဘိန့ၣ် ကညီသးစၢ်တဖၣ်အိၣ်၀ဲအမဲာ်ညါ တၢ်ကဒုးထီဒါကွံာ်သုးမီၤစိရိၤသနူခဲလၢာ်စ့ၢ်ကီးအံၤ ခီဖျိအိၣ်ဃာ်၀ဲလၢ(ခ့ၣ်အဲၣ်ယူၣ်)အကျဲသနူပူၤလံအဃိ ဒ်သိးထံဖိကီၢ်ဖိကမျၢၢ်တဖၣ်ကသ့ၣ်ညါဘၣ်၀ဲအဂီၢ် ဘၣ်တၢ်မၤ၀ဲ(Campaign Photo)အံၤလီၤအဂ့ၢ်န့ၣ် ကညီသးစၢ်လၢအတီခိၣ်ရိၣ်မဲတၢ်တဂၤ စံးဘၣ်ခ့ၣ်အဲးစံၣ်န့ၣ်လီၤႉ အ၀ဲစံး၀ဲလၢ“တၢ်ဒုးထီဒါမီၤစိရိၤသနူအံၤလၢ(KNU)အတၢ်မၤကျဲအပူၤန့ၣ်ပၣ်ဃုာ်၀ဲလံလီၤႉ (ခ့ၣ်အဲၣ်ယူၣ်)ထုးထီၣ်ဘိးဘၣ်ရၤလီၤ၀ဲလံာ်အံၤကမ့ၢ်ကျဲသနူလၢအအိၣ်တ့ၢ်ဃာ်လၢအပူၤကွံာ်တဖၣ်က့ၤဒုးနဲၣ်ဖျါထီၣ်ကဒါ၀ဲလီၤႉ ထံဖိကီၢ်ဖိကမျၢၢ်လၢအအိၣ်ကီၢ်ပူၤတဖၣ်စ့ၢ်ကီး တသ့ၣ်ညါ၀ဲခဲလၢာ်ဘၣ်ႉ ဆၢကတီၢ်ခဲအံၤ (ခ့ၣ်အဲၣ်ယူၣ်)ကျဲသနူအံၤလၢအ၀ဲသ့ၣ်အဂီၢ်န့ၣ်ကကဲထီၣ်တၢ်မုၢ်လၢ်ဒီးတၢ်ဂံၢ်တၢ်ဘါစ့ၢ်ကီးမီၤနီၤႉ လၢတၢ်န့ၣ်အဃိဒ်သိးဂံၢ်ဘါကဂ့ၤဒိၣ်န့ၢ်ဒံးခဲအံၤအဂီၢ် ပသဂၢၢ်တူၢ်လိာ်၀ဲလီၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ဖဲအပူၤကွံာ်(လါစဲးပထ့ဘၢၣ် ၃)သီအနံၤ လံာ်တၢ်ဘိးဘၣ်ရၤလီၤလၢ(ခ့ၣ်အဲၣ်ယူၣ်)ထုးထီၣ်ရၤလီၤ၀ဲအံၤပာ်ဖျါ၀ဲလၢ ကဆီၣ်ထွဲမၤစၢၤၦၤတဂၤလၢ်လၢ်လၢ အဃုထံၣ်န့ၢ်တၢ်အိၣ််ကဒုဒီးတၢ်ဒီသဒၢလၢပယီၤသုးမုၢ်အတၢ်မၤအၢမၤသီဒီးဆီၣ်တံၢ်မၤနၢၤတဖၣ်အဖီာ်လာ်ဒီး ကဆဲးဃုသ့ၣ်ညါမၤထွဲကျဲအဂၤလၢကဒုးနဲၣ်ဖျါထီၣ်ထံလီၢ်ကီၢ်ပူၤတၢ်ဒုးတၢ်ယၤအိၣ်ထီၣ်ဂံၢ်ခီၣ်ထံးအဂ့ၢ်ဒီး ဟဲစိာ်က့ၤတၢ်မုာ်တၢ်ခုၣ်အမ့ၢ်အတီဒီးတၢ်ဂၢၢ်တၢ်ကျၢၤလၢထံလီၢ်ကီၢ်ပူၤအဂ့ၢ်န့ၣ် ပာ်ဖျါ၀ဲန့ၣ်လီၤႉ ဘၣ်ထွဲဒီးသုးဟံးန့ၢ်ကွံာ်တၢ်စိတၢ်ကမီၤအံၤ (ခ့ၣ်အဲၣ်ယူၣ်)တတူၢ်လိာ်၀ဲဘၣ်ဒီး စးထီၣ်လၢသုးဟံးန့ၢ်ကွံာ်တၢ်စိတၢ်ကမီၤ၀ံၤမုၢ်ဆ့ၣ်ထီၣ်တသီ(လါဖ့ၤဘြူၤအါရံၤ ၂)သီအနံၤန့ၣ် ခ့ၣ်အဲၣ်ယူၣ်လီၢ်ခၢၣ်သးထုးထီၣ်ဘိးဘၣ်ရၤလီၤ၀ဲလံာ်တၢ်ပာ်သးတဘ့ၣ်အသိး တကီၢ်ခါခဲအံၤစ့ၢ်ကီး ခီဖျိသုးလၢဟံးန့ၢ်ဆူၣ်တၢ်စိတၢ်ကမီၤအတၢ်ဆီၣ်တံၢ်မၤနၢၤမၤဃၣ်အဃိ ၦၤလၢအဟးစံၣ်ပူၤဖျဲးသးသ့ၣ်တဖၣ် ခ့ၣ်အဲၣ်ယူၣ်ဟ့ၣ်အိၣ်ကဒု၀ဲလၢအ၀ဲသ့ၣ်တၢ်ပၢဟီၣ်က၀ီၤပူၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ပယီၤသုးသူပိာ်မုၣ်တဖၣ်ဒ်တၢ်ဒီသဒၢစုက၀ဲၤအသိးအဖီခိၣ် KWO ဒီး KHRG ပဲာ်အၢပဲာ်သီ
လါစဲးပထ့ဘၢၣ် ၆ သီႇ ၂၀၂၁ နံၣ်ႇ ခ့ၣ်အဲးစံၣ် ဖဲစုက၀ဲၤတၢ်သဘံၣ်သဘုၣ်ဟဲဆူၣ်ထီၣ်လၢထံကီၢ်ဒီတဘ့ၣ်ပူၤအကတီၢ် ပယီၤသုးအံၤသူ၀ဲပိာ်မုၣ်ပိာ်မၢၤတဖၣ်ဒ်တၢ်ဒီသဒၢစုက၀ဲၤအသိးအဖီခိၣ် ပဲာ်အၢပဲာ်သီ၀ဲအဂ့ၢ်န့ၣ် ကညီပိာ်မုၣ်ကရၢ(KWO)ဒီး ကညီဂ့ၢ်၀ီခွဲးယာ်ကရူၢ်(KHRG) ထုးထီၣ်ဘိးဘၣ်ရၤလီၤလံာ်တၢ်ပာ်သးတဘ့ၣ်ဖဲအပူၤကွံာ််(လါစဲးပထ့ဘၢၣ် ၃)သီအနံၤနံၣ်လီၤႉ တကီၢ်ခါခဲအံၤသုးတၢ်သဘံၣ်သဘုၣ်ဟဲဆူၣ်ထီၣ်လၢကညီကီၢ်စဲၣ်ဃုာ်ဒီးတၢ်လီၢ်လၢအဂၤတဖၣ်အပူၤ သုးကီၣ်ကးအံၤဖီၣ်က့ၤကိးဆူၣ်၀ဲပိာ်မုၣ်တဖၣ်ဒီးကိးသူ၀ဲဒ်တၢ်ဒီသဒၢစုက၀ဲၤတခါအဖီခိၣ် ပဲာ်အၢပဲာ်သီ၀ဲတဲာ်တဲာ်ဖျုဖျုဒီးၦၤလၢအမၤကမၣ်တၢ်သ့ၣ်တဖၣ်တၢ်တဘၣ်ဟ့ၣ်ဖျဲးအတၢ်ကမၣ်ဘၣ်အဂီၢ် ဘၣ်တၢ်ထုးထီၣ်ပာ်ဖျါ၀ဲလံာ်တၢ်ပာ်သးလီၤအဂ့ၢ်န့ၣ်(KWO)နဲၣ်ရွဲၣ်ခိၣ်ကျၢၢ် နီၢ်ကညီဖီ စံး၀ဲန့ၣ်လီၤႉ အ၀ဲစံး၀ဲလၢ“ပယီၤသုးသ့ၣ်တဖၣ်ဆၢကတီၢ်ခဲအံၤဟူးဂဲၤအါထီၣ်ကဒါက့ၤလၢကလုာ်ဒူၣ်ဟီၣ်က၀ီၤပူၤလီၤႉ ဒီးအ၀ဲသ့ၣ်က့ၤသူ၀ဲဒၣ်တၢ်သ့ၣ်တဖၣ်အံၤမီၤနီၤ ဒီးတၢ်တဟံးဂ့ၢ်၀ီဘၣ်ႉ အဃိန့ၣ် ပအဲၣ်ဒိးပာ်ဖျါထီၣ်၀ဲလၢဆၢကတီၢ်ခဲအံၤ လီၤဆီဒၣ်တၢ်ပယီၤသုးလၢအဟံးန့ၢ်ဆူၣ်တၢ်စိတၢ်ကမီၤတဖၣ်အံၤမၤ၀ဲလၢအပူၤကွံာ်ဒီးခဲအံၤန့ၣ် ပက့ၤထံၣ်ဘၣ်လၢမၤ၀ဲဒၣ်ဟဲအါထီၣ်ကဒါက့ၤလီၤႉ အဃိန့ၣ်ကြၢးလၢထံဂုၤကီၢ်ဂၤသ့ၣ်တဖၣ်န့ၣ် နုာ်လီၤဒီးဟံးန့ၢ်ဂ့ၢ်၀ီလၢပယီၤသုးတဖုအံၤအတၢ်မၤအၢမၤသီအဖီခိၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ လၢန့ၣ်အမဲာ်ညါဖဲလါအီကူး ၁၉ သီ ပယီၤခီၣ်ချ့သုးရ့ၣ်(ခလရ–၃၄၁)အံၤ ဖီၣ်က့ၤကိး၀ဲဒၣ်မုၢ်တြီၢ်ကီၢ်ရ့ၣ် ဘုသိၣ်ကီၢ်ဆၣ် ခီပူၤသ၀ီကရူၢ် လီၢ်က၀ီၤပိာ်မုၣ်(၃)ဂၤဒီးထူတံၢ်ယီၢ်တံၢ်အ၀ဲသ့ၣ်ဒီးသံကွၢ်၀ဲတၢ်အါမးအမဲာ်ညါ မၢအတၢ်ယိးန့ၢ်အ၀ဲသ့ၣ်တၢ်ဖိတၢ်လံၤဒီးသူအ၀ဲသ့ၣ်ဒ်တၢ်ဒီသဒၢစုက၀ဲၤတခါအသိးအဂ့ၢ်န့ၣ် ပာ်ဖျါ၀ဲန့ၣ်လီၤႉ လၢန့ၣ်အမဲာ်ညါဖဲတၢ်ခးလိာ်သးကဲထီၣ်လၢခ့ၣ်အဲၣ်ယူၣ် သုးက့(၆)ဟီၣ်က၀ီၤ ဒူပျာ်ယာ်ကီၢ်ရ့ၣ် ကီးတရံးကီၢ်ဆၣ် ပဲ-တီဒူသ၀ီကရူၢ်ပူၤ၀ံၤအလီၢ်ခံ ပယီၤသုးကီၣ်ကးဖီၣ်က့ၤကိး၀ဲလီၢ်က၀ီၤ ပိာ်မုၣ်(၃၀)နံၣ်တဂၤဒီး သူ၀ဲဒ်တၢ်ဒီသဒၢစုက၀ဲၤတခါအသိး မၢအတၢ်ဟးလၢတၢ်မဲာ်ညါဖဲအ၀ဲသ့ၣ်လဲၤဆူခ့ၣ်အဲၣ်ယူၣ်ဟီၣ်က၀ီၤအဆၢကတီၢ်အဂ့ၢ်န့ၣ် လံာ်တၢ်ပာ်ဖျါအပူၤဆဲးပာ်ဖျါ၀ဲန့ၣ်လီၤႉ ကိးသူ၀ဲဒၣ်ကမျၢၢ်တဖၣ်ဒ်တၢ်ဒီသဒၢစုက၀ဲၤတခါလၢတၢ်ဒုးအပူၤအံၤ ဟီၣ်ခိၣ်ဘီမုၢ်ၦၤဂ့ၢ်၀ီအတၢ်အိၣ်ဘီၣ်အိၣ်ညီတၢ်သိၣ်တၢ်သီ(IHL)အံၤတြီဃာ်၀ဲဒီး တကီၢ်ခါသုးမီၤစိရိၤအတၢ်ဖံးတၢ်မၤတၢ်ဟူးတၢ်ဂဲၤတဖၣ်အံၤမၤကမၣ်၀ဲတၢ်သိၣ်တၢ်သီအဂ့ၢ်န့ၣ် ကညီဂ့ၢ်၀ီခွဲးယာ်ကရူၢ်(KHRG)စံး၀ဲန့ၣ်လီၤႉ “ပမ့ကွၢ်ကဒါတၢ်အိၣ်သးခဲအံၤန့ၣ်သုးအံၤဖီၣ်၀ဲဒၣ်ပိာ်မုၣ်ဒီးသံကွၢ်သံဒိး၀ဲတၢ်ကစီၣ်ႇတကးဒံးဘၣ်မၢတၢ်စိာ်န့ၢ်အ၀ဲသ့ၣ် တၢ်ဖိတၢ်လံၤဒီးမၢပိာ်မုၣ်သ့ၣ်တဖၣ်လဲၤလၢအမဲာ်ညါလီၤႉ ပမ့ကွၢ်ကဒါက့ၤန့ၣ်တၢ်တခါအံၤန့ၣ်ကဲ၀ဲဒၣ်တၢ်မၤကမၣ်ၦၤဂ့ၢ်၀ီခွဲးယာ်လီၤႉ ပယီၤသုးအံၤမၤကမၣ်၀ဲဒၣ်(IHL)တဲာ်တဲာ်လီၤမီၤနီၤႉ တၢ်တခါအံၤကဲထီၣ်၀ဲဒၣ် တၢ်လီၤဘၣ်ယိၣ်အါလၢပိာ်မုၣ်တဖၣ်အဂီၢ်မီၤနီၤ”အဂ့ၢ်န့ၣ် KHRG ၦၤနဲၣ်တၢ်...
တၢ်ဆဲးကျိးသံကွၢ်ဒီး ဒူးပျာ်ယာ်ကီၢ်ရ့ၣ်နဲၣ်ရွဲၣ် ပဒိၣ်စီၤလ့ၣ်စတၣ်
တၢ်ဆဲးကျိးသံကွၢ်ဒီး ဒူးပျာ်ယာ်ကီၢ်ရ့ၣ်နဲၣ်ရွဲၣ် ပဒိၣ်စီၤလ့ၣ်စတၣ် “ဒ်ပခိၣ်ပနၢ်လီကီ၀ဲအသိး ထံရူၢ်ကီၢ်သဲးအတၢ်ဂ့ၢ်ကီန့ၣ်တၢ်ကတဲသကိးဒၣ်၀ဲလၢစီၤနီၢ်ခိၣ်မုာ်မုာ်ခုၣ်ခုၣ်ဒီး မ်သုတခးလိာ်သးတဂ့ၤ ဘၣ်ဆၣ်ဒီးဒုၣ်ဒါခီဒုအတၢ်ကူၣ်တရံးအဖီခိၣ်ဒီးကတဲန့ၣ် ထုးန့ၣ်တၢ်ဆၢကတီၢ်ဒီး တတဲထံဂ့ၢ်ကီၢ်ဂ့ၢ်ဘၣ်ဒီး မ့ဟူးထီၣ်ဂဲၤထီၣ်လၢဟီၣ်ခိၣ်မဲာ်ဖံးခိၣ်လၢသုးဒုး ယၤဂ့ၢ်၀ီတၢ်ဖံးတၢ်မၤတခီဒုန့ၣ် ပဟီၣ်က၀ီၤပူၤန့ၣ်ကဟဲဖျါထီၣ်၀ဲလၢအတၢ်မိၣ်န့ၢ်သးလီအသိးန့ၣ် တၢ်ဒုးတၢ်ယၤန့ၣ်ကဲထီၣ်သ့၀ဲလီၤႉ” လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ်(သုးက့ -၆)ဟီၣ်က၀ီၤအပူၤ တကီၢ်ခါ တၢ်ဒုးတၢ်ယၤတၢ်ဘၣ်ဂံာ်ဂူာ်အိၣ်ထီၣ်တၢ်အိၣ်သးႇ သုးမီၤစိၤရိၤအသုးတၢ်ဟူးတၢ်ဂဲၤတဖၣ်ဒီး ကညီဒီကလုာ်စၢဖှိၣ်ကရၢ(ခ့ၣ်အဲၣ်ယူၣ်)တၢ်အိၣ်ဆၢထၢၣ်သ့ၣ်တဖၣ်န့ၣ် ပဆဲးကျိးသံကွၢ်သံဒိး၀ဲ ကီၢ်ရ့ၣ်နဲၣ်ရွဲၣ် ပဒိၣ်စီၤလ့ၣ်စတၣ်ဒ်အံၤန့ၣ်လီၤႉ တၢ်သံကွၢ်–တကီၢ်ခါခဲအံၤလၢသုးက့(၆)ဟီၣ်က၀ီၤအပူၤ ဘၣ်ထွဲဒီးတၢ်ဘၣ်ဂံာ်ဂူာ်အိၣ်ထီၣ်အံၤအဖီခိၣ် တၢ်ဘှါရှဲအီၤအကျိၤအကျဲဒ်လဲၣ်ႉ စံးဆၢ–ဘၣ်ဃးဒီးတၢ်ဒုးကဲထီၣ်ခီန့ၣ် ပၦၤခီန့ၣ်တၢ်ပာ်သးလၢဒုၣ်ဒါန့ၣ်ဟူးတဂ့ၤလဲၤတဂ့ၤက့ၤတဂ့ၤန့ၣ် ဘၣ်ဆၣ်မ့လဲၤမ့က့ၤခီန့ၣ်ပၦၤအိၣ်တၢ်လီၢ်ခီန့ၣ်မ့ဘၣ်သဂၢၢ်ခီဒုဒၢးပတြီတသ့ဘၣ်ဒီးတၢ်ဒုးကဲထီၣ်သ့လီၤႉ အဃိန့ၣ်ဖဲလါစဲးပထ့ဘၢၣ် ၁သီအနံၤန့ၣ်တၢ်ဒုးကဲထီၣ်တဘျီ နါက့တၢ်အိၣ်သးခီဒုန့ၣ်ဒ်လဲၣ်န့ၣ်တဲတဘၣ်ဘၣ်ႉ အ၀ဲသ့ၣ်န့ၣ်ဖဲဘၣ်သးလဲၤန့ၣ်လဲၤလီၤဘၣ်သးက့ၤန့ၣ်က့ၤလီၤႉ အဂၤတခါန့ၣ်သုးရ့ၣ်(၁၇)ဟီၣ်က၀ီၤခီန့ၣ် ဒ်သိးဒီးကၠၤအ့စ့ၣ်ကၠံဒီးကၠဲးဒိအဘၢၣ်စၢၤန့ၣ် တကုၢ်ခံကျဲဖးဒ့န့ၣ် ပယီၤသုး(ခလရ–၃၂)အိၣ်၀ဲဒၣ်ဖဲတကုၢ်ခံကျဲဖးဒ့န့ၣ် ကဲထီၣ်တၢ်တံာ်တာ်တၢ်နိးတၢ်ဘျးလၢသ၀ီဖိကမျၢၢ်အဂီၢ်အိၣ်၀ဲလီၤန့ၣ်ၦၤပာ်ဖျါထီၣ်၀ဲလီၤႉ ဘၣ်ဆၣ်ခဲအံၤ ပပာ်ဖျါထီၣ်လၢခိၣ်နၢ်အအိၣ်အဖၢမုၢ်လီၤမီၤနီၤႉ သုတကဲထီၣ်တၢ်တံာ်တာ်လၢဒူဖိသ၀ီဖိအဂီၢ်တဂ့ၤဒီး ပယီၤသုးန့ၣ်သုတအိၣ်ဖဲန့ၣ်တဂ့ၤန့ၣ် က့ၤအိၣ်ဒၣ်၀ဲလၢ၀့ၢ်ပူၤန့ၣ်ဂ့ၤဒိၣ်တက့ၢ်လီၤန့ၣ်ဒူဖိသ၀ီဖိပာ်ဖျါထီၣ်၀ဲလီၤႉ ဘၣ်မနုၤအဃိလဲၣ်န့ၣ် ပယီၤသုးဟဲအိၣ်ဖဲသ၀ီဖိအဒဲသ့ၣ်တဖၣ်န့ၣ် အဆီလီၤမၢ်၀ဲအဘ့ၣ်(၄၀)ဆူဖီလာ်တအိၣ်ဘၣ်မီၤနီၤ တၢ်ကဲထီၣ်သးဒ်န့ၣ် အ၀ဲသ့ၣ်အဲၣ်ဒိး၀ဲလၢပယီၤသုးန့ၣ် ဟူးဂဲၤတဂ့ၤန့ၣ် သ၀ီဖိန့ၣ်ပာ်ဖျါထီၣ်၀ဲလီၤႉ သနါက့သ၀ီဖိန့ၣ်မ့မ့ၢ်လၢဟဲပာ်ဖျါလၢၦၤခီန့ၣ်ဘူၣ်လံ လၢပယီၤသုးခီလဲၤတဲ၀ဲတဘူၣ်ဘၣ်အိၣ်တခါ အ၀ဲန့ၣ်တၢ်ကီတၢ်ခဲတခါလီၤႉ အဂၤတခါန့ၣ် ကျ့းနါက့ဒ်န့ၣ်လီၤ ႉ အ၀ဲန့ၣ်ၦၤသ၀ီဖိဟီၣ်ခိၣ်လီၢ်လီၤအ၀ဲသ့ၣ်လဲၤဆီလီၤ၀ဲသုးတၢ်လီၢ်န့ၣ် အ၀ဲသ့ၣ်သုးက့ၤအလီၢ်ခံန့ၣ် ပ၀ဲဒၣ်ခ့ၣ်အဲၣ်ယူၣ်သုးန့ၣ် လဲၤသ့မၤဟးဂီၤကွံာ်ဒ်သိးဒူဖိသ၀ီဖိကက့ၤအိၣ်ဘၣ်ဒၣ်၀ဲမုာ်မုာ်ခုၣ်ခုၣ်မၤအီၣ်ဒၣ်၀ဲကသ့လဲၤအိၣ်၀ဲဒၣ်ဒ်န့ၣ်...