တကီၢ်ခါတၢ်ခးလိာ်သးကဲထီၣ်အဖီခိၣ် ကညီဖီၣ်စုက၀ဲၤကဒဲကဒဲကထံၣ်လိာ်တဲသကိးတၢ်
လါယူၤ ၁၄ သီႇ ၂၀၂၁ နံၣ်ႇ ခ့ၣ်အဲးစံၣ် ဘၣ်ထွဲဒီးတၢ်ဒုးကဲထီၣ်လၢကညီဖီၣ်စုက၀ဲၤကဒဲကဒဲအဘၢၣ်စၢၤတၢ်ဂ့ၢ်တဖၣ်အံၤ လၢကဟခဲမုၢ်ဆ့ၣ်(လါယူၤ ၁၅)သီအနံၤ ကညီဖီၣ်စုက၀ဲၤခိၣ်နၢ်ဒိၣ်ထီတဖၣ်ကမၤ၀ဲဒၣ်တၢ်ထံၣ်လိာ်တၢၣ်ပီၣ်တဲသကိးတခါဖဲ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)တၢ်ပၢဟီၣ်က၀ီၤတၢ်လီၢ်တတီၤအပူၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ တၢ်အိၣ်ဖှိၣ်အ၀ဲအံၤ တၢ်ရိၣ်ဖှိၣ်ဃူဖိးကညီဖီၣ်စုက၀ဲၤကမံးတံာ်တီခိၣ်ရိၣ်မဲ၀ဲဒီး ကွဲမုာ်၀ဲဒၣ်ကညီတၢ်ထူၣ်ဖျဲးသုးမုၢ်ဒိၣ် -KNLA˜ ကညီသုးခိးကီၢ်ဆၢ(BGF)ႇ တၢ်ဘၣ်ဘျုးဒံၣ်မိၣ်ခြ့ၣ်စံၣ် ကညီသုးမုၢ်ဒိၣ်(DKBA)ဒီး KNU/KNLA-PC သုးခိၣ်နၢ်ဒိၣ်ထီတဖၣ်အဂ့ၢ်န့ၣ် ကမံးတံာ်လံာ်ကွဲမုာ်အပူၤ ပာ်ဖျါ၀ဲန့ၣ်လီၤႉ ဘၣ်ထွဲဒီးတၢ်ဂ့ၢ်အံၤ ဃူဖိးကမံးတံာ်အနဲၣ်ရွဲၣ် ပဒိၣ်စီၤအီၣ်မီၢ်အ့ စံး၀ဲလၢ “ခဲအံၤပ၀ဲကညီဖီၣ်စုက၀ဲၤဒီးပ(KNLA)တဖၣ်အဘၢၣ်စၢၤ တၢ်ဘၣ်ဂံာ်ဂူာ်ဟဲအိၣ်ထီၣ်ဒီး တၢ်သံတၢ်ၦၢ်ဟဲအိၣ်ထီၣ်ဒ်အံၤအဖီခိၣ် ပမ့ၢ်တအိၣ်ဖှိၣ်တၢၣ်ပီၣ်တဲသကိးတခါခါဒီး အပတီၢ်မ့ၢ်ထီထီၣ်ခီဒုတဂ့ၤလၢပၦၤကညီဖိအဂီၢ်ဘၣ်မီၤနီၤႉ ခီဖျိလၢတၢ်ဘၣ်ဂံာ်ဂူာ်အိၣ်ထီၣ်လၢ (BGF)ဒီး KNLA သုးက့ ၅ႇသုးက့ ၁ႇသုးက့ ၃ ဒီး သုးက့ ၆ တၢ်ဂ့ၢ်အဖီခိၣ် အလီၢ်အိၣ်လၢပကဘၣ်ထံၣ်လိာ်သးဒီးတၢ်ဂ့ၢ်ကိၢ်ကိၢ်ဂီၤဂီၤလၢအဟဲကဲထီၣ်သးခဲအံၤန့ၣ် ပကဘၣ်ဘှၣ်ရှဲလီၤဒ်လဲၣ်န့ၣ်မ့ၢ်တၢ်ကိး၀ဲဒၣ်တၢ်အိၣ်ဖှိၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ဖီၣ်စုက၀ဲၤကရူၢ်ကရၢတၢ်အိၣ်ဖှိၣ်အံၤ KNLA တီခိၣ်ရိၣ်မဲ၀ဲဒီး ကွဲမုာ်၀ဲဒၣ် KNU/KNLA-PC တကပၤ သုးခိၣ်ကျၢၢ်ဒိၣ်စိ စီၤထီၣ်လ့ႇ သုးခိးကီၢ်ဆၢ(BGF) သုးခိၣ်ဒိၣ်စိ စီၤခၠ့ၣ်သူၤ...
တၢ်ဖီၣ်၀ဲပီၢ်ရီလၢအလူၤန့ၢ်၀ဲကီၢ်စဲၣ်ကိတိာ်ခိၣ်ကျၢၢ်ဒီးၦၤလၢတၢ်ဖီၣ်ဃာ်၀ဲတဖၣ်အတၢ်မူးတၢ်ရၢ်
လါယူၤ ၁၁ သီႇ ၂၀၂၁ နံၣ်ႇ ခ့ၣ်အဲးစံၣ် ဖဲမဟါ(လါယူၤ ၁၀)သီအနံၤ တၢ်ဖီၣ်၀ဲဖၣ်အၣ်ကီၢ်ဆၣ် ပီၢ်ရီ ၂ ဂၤလၢအလူၤန့ၢ်၀ဲကညီကီၢ်စဲၣ်ကိတိာ်ခိၣ်ကျၢၢ် နါခ့ၤထွ့မၠ့ၣ်ဃုာ်ဒီး ၦၤလၢသုးမီၤစိရိၤဖီၣ်ဒုးဃာ်၀ဲတဖၣ်အတၢ်မူးတၢ်ရၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ပီၢ်ရီ ၂ ဂၤအံၤ လူၤစၢၤ၀ဲဒၣ် ကညီကီၢ်စဲၣ်ကိတိာ်ခိၣ်ကျၢၢ်ဒီးကိတိာ်တဖၣ်အတၢ်မူးတၢ်ရၢ်ႇကညီသးစၢ် စီၤလ့ထဲၣ်တၢ်မူးႇဒီၣ်ကထၢၣ် ခၠိၤယူၣ်မိၤတၢ်မူး ဃုာ်ဒီးတနံၤအံၤ သးစၢ်(၃၆)ဂၤလၢ ကွီၢ်ဘျီၣ်ရူ စံၣ်ညီၣ်လီၤ၀ဲလၢကဘၣ်အိၣ်ဃိာ်ပူၤ ၂ နံၣ်အတၢ်မူးတၢ်ရၢ်သ့ၣ်တဖၣ်လီၤအဂ့ၢ်န့ၣ် သၣ်ညါဘၣ်န့ၣ်လီၤႉ ၦၤလၢအဘူးဒီးပီၢ်ရီလၢတအဲၣ်ဒိးပာ်ဖျါအမံၤတဂၤ စံး၀ဲ“ဖဲမဟါန့ၣ်ပနၢ်ဟူလၢတၢ်ဖီၣ်၀ဲပီၢ်ရီ ၂ ဂၤလၢမၠၣ်၀တံၣ် နီၣ်ဂံၣ်(၁)တြဲၤလီၤႉ တၢ်လိာ်ကွီၢ်အ၀ဲသ့ၣ်လၢထံရူၢ်ကီၢ်သဲး တၢ်ဘျၢသဲစးအဆၢဖိ(၅၀၅)လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ တၢ်ဖီၣ်၀ဲပီၢ်ရီ(၂)ဂၤအမဲာ်ညါ ဖီၣ်ဃုာ်၀ဲဒီးကသံၣ်သရၣ်မုၣ်တဂၤဒီးၦၤမၤတၢ်ဖိလၢအဂၤတဂၤဖဲမၠၣ်၀တံၣ် နီၣ်ဂံၢ်(၁)တြဲၤလီၤအဂ့ၢ်န့ၣ် အ၀ဲစံးအါထီၣ်၀ဲန့ၣ်လီၤႉ ပီၢ်ရီ(၂)ဂၤလၢတၢ်ဖီၣ်၀ဲအံၤ တၢ်ပာ်ထီၣ်၀ဲတၢ်မူးတၢ်ရၢ်အဆၢဖိ(၅၀၅)ဖဲမၠၣ်၀တံၣ်၀့ၢ် ပၢၤကီၢ်၀ဲၤလီၢ်ဒီး တနံၤအံၤ(လါယူၤ ၁၁)သီအနံၤ တၢ်ကထုးထီၣ်သမံသမိးအ၀ဲသ့ၣ်လၢကွီၢ်ဘျီၣ်ရူအဂ့ၢ်န့ၣ် သ့ၣ်ညါဘၣ်န့ၣ်လီၤႉ
မ့ၣ်ပိၢ်ပိၢ်ဖးထီၣ်လၢဖၣ်အၣ်၀့ၢ် တစှၤန့ၢ်ဒံး တၢ်လီၢ် ၇ တီၤ
လါယူၤ ၁၁ သီႇ ၂၀၂၁ နံၣ်ႇ ခ့ၣ်အဲးစံၣ် ဖဲတနံၤအံၤ(လါယူၤ ၁၁)သီ ဂီၤခီအဆၢကတီၢ် မ့ၣ်ပိၢ်ပိၢ်ဖးထီၣ်လၢကညီကီၢ်စဲၣ် ဖၣ်အၣ်၀့ၢ်ပူၤ တစှၤန့ၢ်ဒံးတၢ်လီၢ် ၇တီၤဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ “ဖဲတဂီၤအံၤ ဂီၤခီ ၅ နၣ်ရံၣ်ဃၣ်ဃၣ်န့ၣ် နၢ််ဟူလၢမ့ၣ်ပိၢ်ပိၢ်ဖးထီၣ်သီၣ်လီၤႉ နၢ်ဟူသီၣ်ဒီတ၀့ၢ်ညါလီၤႉ တစှၤန့ၢ်ဒံးတၢ်လီၢ် ၇ တီၤ နၢ်ဟူမ့ၣ်ပိၢ်ပိၢ်ဖးထီၣ်သီၣ်လီၤ”အဂ့ၢ်န့ၣ် ဖၣ်အၣ် လီၢ်က၀ီၤဖိတဂၤ စံး၀ဲန့ၣ်လီၤႉ ဖဲတနံၤအံၤဂီၤခီ လၢကွဲၢ်ကဘီလူၢ်ႇကၣ်ကီၤကျဲကပၤႇဖၣ်အၣ်=လူၢ်ပျဲၢ်ကျဲဖးဒ့ သိလ့ၣ်ပၢၤကီၢ်(မီၤတီၤပံၤကဲၤ)ရူကပၤႇနီၣ်ဂံၢ် ၈ က၀ီၤဒ့ကပၤႇနီၣ်ဂံၢ် ၇ ရူအကပၤႇကညန ရူအကပၤဒီး အထက(၃)ကၠိအကပၤတဖၣ် မ့ၣ်ပိၢ်ပိၢ်ဖးထီၣ်၀ဲဒၣ်တဖျၢၣ်စုာ်စုာ်ဒီး ဖဲန့ၣ်တၢ်ထံၣ်န့ၢ်ကဒီးမ့ၣ်ပိၢ်အသီတဖျၢၣ်လၢ အထက(၃)ကၠိကပၤလၢအတပိၢ်ဖးထီၣ်ဒံးဘၣ်အဂ့ၢ်န့ၣ် Hpan-an Update News Page အပူၤ ပာ်ဖျါဃာ်၀ဲန့ၣ်လီၤႉ မ့ၣ်ပိၢ်ပိၢ်ဖးထီၣ်ဘျီ၀ဲအံၤအပူၤ တသ့ၣ်ညါဘၣ်ဒံးတၢ်ဘၣ်ဒိဘၣ်ထံးတၢ်အိၣ်သးဘၣ်အဂ့ၢ်န့ၣ် ၦၤအိၣ်၀့ၢ်ပူၤတဖၣ်စံး၀ဲန့ၣ်လီၤႉ ဖဲမ့ၣ်ပိၢ်ပိၢ်ဖးထီၣ်၀ံၤအလီၢ်ခံ ဖၣ်အၣ်၀့ၢ်ကျဲနုာ်လီၤဟးထီၣ်ဒီး၀့ၢ်ပူၤက၀ီၤဒ့တၢ်လီၢ်တနီၤအပူၤ တၢ်သမံသမိး၀ဲသိၣ်လ့ၣ်အိၣ်၀ဲဒီး တၢ်မၤဃံးထီၣ်စ့ၢ်ကီး၀ဲဒၣ်တၢ်ဘံၣ်တၢ်ဘၢအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖၣ်အၣ်၀့ၢ်ဒီးမၠၣ်၀တံၣ်၀့ၢ်ဃုာ်ဒီး ကညီကီၢ်စဲၣ်အပူၤ ဖဲတလါအံၤ လါယူၤ ၇ သီ တုၤလၢတနံၤအံၤ ၁၁ သီန့ၣ် သုးမီၤစိရိၤအသုးသမံသမိး၀ဲဒၣ် ကမျၢၢ်ထံဖိကီၢ်ဖိလၢအဟးထီၣ်က့ၤလီၤအသိလ့ၣ်ႇသိလ့ၣ်ယီၢ်အလံာ်အလဲၢ်ႇ...
တၢ်ဖီၣ်န့ၢ်ကသံၣ်မူၤဘှီးအဖျၢၣ်ခံကထိဃၣ်ဃၣ်လၢမဲၢ်လးဘၣ်ကီဘၣ်ခဲဒဲက၀ီၤအပူၤ
လါယူၤ ၁၁ သီႇ ၂၀၂၁ နံၣ်ႇ ခ့ၣ်အဲးစံၣ် ကီၢ်ကၠီၣ်တဲၣ်=ကီၢ်ပယီၤကီၢ်ဆၢ တးခ်ကီၢ်ရ့ၣ်ႇ ထၣ်ဆီၤယါကီၢ်ဆၣ် မဲၢ်လးဘၣ်ကီဘၣ်ခဲဒဲက၀ီၤအပူၤ ဖဲမဟါ(လါယူၤ ၁၀)သီအနံၤ ကၠီၣ်တဲၣ်ၦၤဘၣ်မူဘၣ်ဒါတဖၣ် ဖီၣ်ချုးန့ၢ်၀ဲကသံၣ်မူၤဘှီးအဖျၢၣ်ခံကထိဃၣ်ဃၣ်အဂ့ၢ်န့ၣ် သ့ၣ်ညါဘၣ်လၢဒဲက၀ီၤၦၤဘၣ်မူဘၣ်ဒါအအိၣ်န့ၣ်လီၤႉ ကၠီၣ်တဲၣ်သုးႇပၢၤကီၢ်သုးဒီးဒဲက၀ီၤဘံၣ်ဘၢၦၤဘၣ်မူဘၣ်ဒါတဖၣ် ဖီၣ်ချုးန့ၢ်၀ဲက သံၣ်မူၤဘှီး(၁ႇ၉၉၀)ဖျၢၣ်လၢဒဲက၀ီပူၤသးစၢ်(၂)ဂၤအအိၣ်အဂ့ၢ်န့ၣ် ဒဲက၀ီၤခိၣ် စီၤအီနဲး စံးဘၣ်ခ့ၣ်အဲးစံၣ်=ကညီတၢ်ကစီၣ်၀ဲၤလီၢ်ခိၣ်သ့ၣ် ဒ်အံၤန့ၣ်လီၤႉ အ၀ဲစံး၀ဲလၢ“ၦၤချုးန့ၢ်၀ဲဒၣ်လၢသးစၢ် ၂ ဂၤအအိၣ်လီၤႉ သးစၢ်ခံဂၤန့ၣ်အိၣ်လၢ(Zone B)လီၤႉ ယဆိမိၣ်ဒု ၦၤန့ၢ်တၢ်ကစီၣ်အဃိဟဲဖီၣ်၀ဲလီၤႉ ဖဲအ၀ဲသ့ၣ်ဟ့ၣ်လီၤသးအခါဟးထီၣ်ဒီးတၢ်ဖီၣ်ချုးန့ၢ်အ၀ဲသ့ၣ်လီၤႉ တၢ်သမံသမိးအထၢၣ်ဒီးချုးန့ၢ်၀ဲလီၤ”အဂ့ၢ်န့ၣ် စံး၀ဲန့ၣ်လီၤႉ တကီၢ်ခါခီဖျိခိၣ်၀ံၣ်တၢ်ဆါအတီၢ်ပူၤအဃိ ကီၢ်ကၠီၣ်တဲၣ်ဒီတဘ့ၣ်အမဲာ်ညါ ကီၢ်ကၠီၣ်တဲၣ်= ကီၢ်ပယီၤကီၢ်ဆၢဒီတကျိၤ ဒီး ဘၣ်ကီဘၣ်ခဲဒဲက၀ီၤအပူၤ ကၠီၣ်တဲၣ်ၦၤဘၣ်မူဘၣ်ဒါတဖၣ် ကးတံၢ်ဃာ်၀ဲတၢ်နုာ်လီၤဟးထီၣ်အကတီၢ် တၢ်ဖီၣ်ချုးန့ၢ်၀ဲကသံၣ်မူၤဘှီးလၢဒဲက၀ီၤပူၤခဲအံၤဒီး ကသံၣ်မူၤဘှီးတဖၣ်အံၤကဘၣ်မ့ၢ်အအိၣ်ဟဲလၢၦၢ်ပူၤတကပၤလီၤအဂ့ၢ်န့ၣ် စီၤအီနဲး စံးအါထီၣ်၀ဲန့ၣ်လီၤႉ ကီၢ်ကၠီၣ်တဲၣ်=ကီၢ်ပယီၤကီၢ်ဆၢ ဘၣ်ကီဘၣ်ခဲဒဲက၀ီၤ ၉ ဘ့ၣ်အကျါ မဲၢ်လးဘၣ်ကီဘၣ်ခဲဒဲက၀ီၤအံၤ မ့ၢ်ဒဲက၀ီၤတဖျၢၣ်လၢၦၤဟဲအိၣ်ကဒု၀ဲဒၣ်အါအါဂီၢ်ဂီၢ်အသိး ကိးနံၣ်ဒဲးတၢ်ဖီၣ်ချုးန့ၢ်၀ဲကသံၣ်မူၤဘှီးတဖၣ်န့ၣ်လီၤႉ
လီၢ်က၀ီၤဖိစံး၀ဲလၢ BGF ဟ့ၣ်တၢ်ဆီၣ်သနံးလၢကပျဲထီၣ်ဖိသၣ်ကၠိ
လါယူၤ ၁၀ သီႇ ၂၀၂၁ နံၣ်ႇ ခ့ၣ်အဲးစံၣ် ကညီကီၢ်စဲၣ်ႇ ဖၣ်အၣ်ကီၢ်ဆၣ် မံၤကၠံၣ်သ၀ီကရူၢ် ၀ဲပၠၣ်သ၀ီပူၤ သုးခိးကီၢ်ဆၢ BGF ကိးထံၣ်၀ဲဒၣ် လီၢ်က၀ီၤ သ၀ီဖိတဖၣ်ဒီး ဟ့ၣ်တၢ်ဆီၣ်သနံးမၢ၀ဲသ၀ီဖိတဖၣ်ပျဲထီၣ်အဖိကၠိအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအ အိၣ်န့ၣ်လီၤႉ ခီဖျိသရၣ်မုၣ်ကၠိခိၣ်ဒီးလီၢ်က၀ီၤသ၀ီဖိလၢအတူၢ်လိာ်၀ဲဒၣ်သုးမီၤစိရိၤတနီၤလဲၤတၢၣ်၀ဲအဃိ ဖဲအပူၤကွံာ်(လါယူၤ ၇)သီအနံၤ BGF သုးခိၣ်တ့ၤ၀့အံၤကိးထံၣ်၀ဲဒၣ်လီၢ်က၀ီၤသ၀ီဖိတဖၣ်ဒီးစံး၀ဲလၢ မ့ၢ်တပျဲထီၣ်ဖိသၣ်ကၠိ ဘၣ်န့ၣ်ကဟံးအရ့လီၤအဂ့ၢ်န့ၣ် လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ဖဲအံၤၦၤလၢအးကၠိဖိမံၤတဘူၣ်ဘၣ်အိၣ်လီၤႉ ခီဖျိၦၤတလဲၤအးကၠိဘၣ်အဃိ ကိး၀ဲတၢ်အိၣ်ဖှိၣ်လီၤႉ ကိး၀ဲဟံၣ်တဖျၢၣ်တဂၤဖဲမုၢ်တနံၤဒီးစံး၀ဲလၢ သုမ့ၢ်တအးကၠိဘၣ်န့ၣ် ကဟံးအရ့လၢသုဆဲးကျိးဒီး ၦၤပူထီၣ်လီထီၣ်တၢ်ဖိလီၤႉ ဖဲန့ၣ်တဘၣ်သးအးကၠိဘၣ်ဆၣ် ဘၣ်အး၀ဲလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ၀ဲပၠၣ်သ၀ီပူၤအံၤအိၣ်တုၤ၀ဲဒၣ်လၢတီၤထီကၠိအပတီၢ်ဒီး အပူၤကွံာ်ကၠိဖိမၤလိတၢ်အိၣ်၀ဲအဂၤ(၃၀၀)ဘျဲၣ်ဘၣ်ဆၣ် တကီၢ်ခါခဲအံၤ ခီဖျိၦၤလဲၤအးကၠိအိၣ်ထဲ(၁၀၀)ဘျဲၣ်လီၤအဃိ ဘၣ်တၢ်တဲပျံၤတဲဖုး၀ဲဒ်အံၤအသိး ကၠိခိၣ်ဃုာ်ဒီးကၠိသရၣ်/မုၣ်ခဲလၢာ်စ့ၢ်ကီး မ့ၢ်ၦၤလၢအအိၣ်လၢ(Non-CDM)အပူၤတဖၣ်အဂ့ၢ်န့ၣ် လီၢ်က၀ီၤဖိတဂၤဃီအ၀ဲန့ၣ် စံးအါထီၣ်၀ဲန့ၣ်လီၤႉ “ကၠိန့ၣ်ကၠိဖိအိၣ်၀ဲအဂၤ(၃၀၀)ဘျဲၣ်လီၤႉ အခီၣ်ထံးန့ၣ်ကၠိဖိတဖၣ်ထီၣ်ကၠိတဘူၣ်ဘၣ်ႉ ထီၣ်၀ဲတဘူၣ်ဘၣ်အဃိ လဲၤထီၣ်၀ဲထဲအဂၤ(၁၀၀)ဘျဲၣ်လီၤႉ တၢ်အံၤ အ၀ဲသ့ၣ်တဲလၢ တၢ်ကူၣ်ဘၣ်ကူၣ်သ့ဒီးထံရူၢ် ကီၢ်သဲးန့ၣ်တဒံးသိးဘၣ်ႇတဘၣ်တၢ်နီတမံၤဘၣ်ႉ တထီၣ်ဘၣ်ဒီးတန့ၢ်ဘၣ်ႇအါကိ၀ဲဒၣ်ကျိလီၤမီၤနီၤႉ ဖဲအံၤဒုၦၤတဘၣ်သးထီၣ်နီတဂၤဘၣ်” အဂ့ၢ်န့ၣ် လီၢ်က၀ီၤဖိတဂၤဃီအ၀ဲန့ၣ် စံးအါထီၣ်၀ဲန့ၣ်လီၤႉ လၢန့ၣ်အမဲာ်ညါ ဖဲအပူၤကွံာ်(လါယူၤ ၇)သီအနံၤ...
ကလူၤပိာ်မၤထွဲ၀ဲ ဒ်(NCA)အိၣ်ပာ်အသိးအဂ့ၢ် KNLA သုးရိၣ်မဲခိၣ်ကျၢၢ် ထုးထီၣ်ပာ်ဖျါ
လါယူၤ ၁၀ သီႇ ၂၀၂၁ နံၣ်ႇ ခ့ၣ်အဲးစံၣ် ဒ်ခ့ၣ်အဲၣ်ယူၣ်=ကညီဒီကလုာ်စၢဖှိၣ်ကရၢဆဲးလီၤတ့ၢ်ဃာ်ထံကီၢ်ဒီဘ့ၣ်တၢ်ပတုာ်တၢ်ခး လံာ်တၢ် ဆဲးပနီၣ်(NCA)အိၣ်ပာ်အသိး ကလူၤပိာ်မၤထွဲ၀ဲလီၤတံၢ်လီၤဆဲးလီၤအဂ့ၢ်န့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ် -KNLA သုးရိၣ်မဲခိၣ်ကျၢၢ် သုးခိၣ်ကျၢၢ်ဒိၣ်စိ စီၤကၠီၤနံၤ ထုးထီၣ်၀ဲလံာ်တၢ်ပာ်ဖျါတဘ့ၣ်ဖဲလါယူၤ(၉)သီအနံၤန့ၣ်လီၤႉ ကညီဒီကလုာ်တၢ်ထူၣ်ဖျဲးသုးမုၢ်ဒိၣ် -KNLA အံၤ အိၣ်၀ဲဒၣ်လၢ KNU ထံရူၢ်ကီၢ်သဲးအတၢ်တီခိၣ်ရိၣ်မဲ တၢ်ဟံးစုနဲၣ်ကျဲအဖီလာ်ဒီး ဖံးမၤ၀ဲတၢ်လၢဒံၣ်မိၣ်ခြ့ၣ်စံၣ်ႇတၢ်တုၤသိးထဲသိး ဒီး ကညီဒီကလုာ်ဂ့ၢ်၀ီအဂီၢ်ဒီး ဒ် KNU ကရၢခိၣ် သုးခိၣ်ကျၢၢ်ဒိၣ်စိ စီၤမူၤတူစ့ဖိ ထုးထီၣ်ပာ်ဖျါ၀ဲလံာ်တၢ်ပာ်သးဖဲ(လါမ့ၤ ၁၀)အနံၤအသိး ကလူၤပိာ်မၤထွဲ၀ဲလီၤအဂ့ၢ်န့ၣ် ပာ်ဖျါ၀ဲန့ၣ်လီၤႉ လၢန့ၣ်အမဲာ်ညါ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးဖိခဲလၢာ် ကလူၤပိာ်မၤထွဲ၀ဲတၢ်သိၣ် တၢ်သီတဖၣ်ဃူဃူဖိးဖိးလီၤတံၢ်လီၤဆဲးအဂီၢ်စ့ၢ်ကီး သုးခိၣ်ကျၢၢ်ဒိၣ်စိ စီၤကၠီၤနံၤ လံာ်တၢ်ပာ်ဖျါအပူၤ ဆီၣ်တခူထီၣ်၀ဲန့ၣ်လီၤႉ ဖဲအပူၤကွံာ်(လါမ့ၤ ၁၀)သီအနံၤ ကရၢခိၣ် သုးခိၣ်ကျၢၢ်ဒိၣ်စိ စီၤမူၤတူစ့ဖိ ထုးထီၣ်ပာ်ဖျါ၀ဲ လံာ်တၢ်ပာ်သး တဘ့ၣ်ဒီးဆီၣ်တခူထီၣ်၀ဲလၢ ကရူၢ်ကရၢလၢအဘၣ်ထွဲတဖၣ် ကလူၤပိာ်မၤထွဲ၀ဲလံာ်ဆဲးပနီၣ် NCA တၢ်သိၣ်တၢ်သီတဖၣ်လီၤတံၢ်လီၤဆဲးဒီး ကဟံးဃာ်ကျၢၤ၀ဲတၢ်မုာ်တၢ်ခုၣ်န့ၣ်လီၤႉ
တၢ်ခးလိာ်သးကဲထီၣ်လၢသၣ်တီၣ်ကၠံ ၁၃ မံးလာ် သုးမီၤစိရိၤအသုးသံ ၁ ဂၤ
လါယယူၤ ၉ သီ၊ ၂၀၂၁ နံၣ်၊ ခ့ၣ်အဲးစံၣ် ဖဲမဟါ(လါယူၤ ၈)သီ မုၢ်နၤခီအဆၢကတီၢ် သုးမီၤစိရိၤအသုးဒီး ဖီၣ်စုက၀ဲၤကရူၢ် လၢတၢ်တသ့ၣ်ညါအမံၤ တဒူၣ်အဘၢၣ်စၢၤ တၢ်ခးလိာ်သးကဲထီၣ်လၢကညီကီၢ်စဲၣ် သၣ်တီၣ်ကၠံ၀့ၢ် ၁၃ မံးလာ်ဒီး ဖဲန့ၣ်သုးမီၤစိရိၤ အသုး သံ၀ဲ ၁ ဂၤအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ သုးမီၤစိရိၤအသုးဒီးဖီၣ်စုက၀ဲၤကရူၢ်လၢတၢ်တသ့ၣ်ညါအမံၤတဒူၣ် ဖဲမဟါ(လါယူၤ ၈)သီ မုၢ်နၤခီ ၈ နၣ်ရံၣ် တခီဃၣ်ဃၣ်အဆၢကတီၢ် တၢ်ခးလိာ်သးကဲထီၣ်ဒီး ဖဲန့ၣ်သုးမီၤစိရိၤတကပၤ အသုးသံ၀ဲ ၁ ဂၤအဂ့ၢ်န့ၣ် လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ဖဲမဟါ ၈ နၣ်ရံၣ်တခီဘျဲၣ်န့ၣ် အ၀ဲသ့ၣ်ခးလိာ်သးလီၤႉ ခး၀ဲ ၁၅ မံးနံးတဘျီ အိၣ်ဘှံးလီၤႉ ခးအိၣ်ဘှံးခးအိၣ်ဘှံး၀ဲလီၤႇ ခးလိာ်သး၀ံၤ၀ဲဒၣ်ဖဲ ၉ နၣ်ရံၣ်လီၤႉ ၦၤတဲလၢသုးမီၤစိရိၤအသုးတကပၤသံ၀ဲ ၁ ဂၤလီၤႉ”အဂ့ၢ်န့ၣ် စံးဘၣ် ခ့ၣ်အဲးစံၣ်=ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါ အပူၤကွံာ်လၢညါလံၤလံၤ ခီဖျိလၢတၢ်ကစီၣ်ဟူထီၣ်သါလီၤလၢတၢ်ကဟဲခး၀ဲ သုးမီၤစိရိၤအသုးလၢအဆီလီၤသးဖဲ ၁၃ မံးလာ် ကျဲနုာ်လီၤတြဲၤအဃိ ...
ခီဖျိပယီၤသုးအိၣ်ဆီလီၤသးလၢဒူသ၀ီဟံၣ်ပူၤအဃိ ဖလူလီၢ်က၀ီၤဖိတနီၤတက့ၤဘၣ်ဒံးဆူအဟံၣ်
လါယူၤ ၉ သီႇ ၂၀၂၁ နံၣ်ႇ ခ့ၣ်အဲးစံၣ် ခီဖျိတၢ်ဒုးကဲထီၣ်လၢ ကညီကီၢ်စဲၣ် မၠၣ်၀တံၣ်၀့ၢ် ဖလူဟီၣ်က၀ီၤတကပၤအဃိ ၦၤဃ့ၢ်တၢ်ဒုးလၢအလဲၤစံၣ်ထီၣ်လၢကၠီၣ်တဲၣ်ပူၤတဖၣ် ဖဲ(လါယူၤ ၅)သီအနံၤ ဟဲက့ၤကဒါလၢအလီၢ်အကျဲဘၣ်ဆၣ် ခီဖျိသုးမီၤစိရိၤအသုးဆီလီၤသးလၢဒူသ၀ီဟံၣ်တဖၣ်အပူၤအဃိ လီၢ်က၀ီၤဖိတနီၤတုၤလၢခဲအံၤတစု က့ၤထီၣ်လၢအဟံၣ်ပူၤအသ့ဒံးဘၣ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ သုးမီၤစိရိၤအသုးဆီလီၤသးလၢဖလူသ၀ီဖိအပူၤအိၣ်၀ဲအသိး ခီဖျိသုးမီၤစိရိၤ အသုးနုာ်လီၤအိၣ်၀ဲလၢလီၢ်က၀ီၤဖိတနီၤအဟံၣ်ပူၤအဃိ လီၢ်က၀ီၤသ၀ီဖိတနီၤက့ၤ ကဒါလၢအဟံၣ်တဘူၣ်လၢၤဘၣ်ဒီး လဲၤအိၣ်ကဒု၀ဲဒၣ်လၢလ့က့ၣ်ကီာ်၀့ၢ်သီအကပၤ ထံမဲး၀ါခံသ၀ီ ကၠိပူၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ၦၤသ၀ီဖိလၢအလဲၤစံၣ်အိၣ်လၢလ့က့ၣ်ကီာ်တဂၤ စံး၀ဲလၢ“ဖဲဟဲက့ၤလၢတၢ်၀ၢ်ခီတကပၤခါန့ၣ် က့ၤကွၢ်ဟံၣ်တဘျးဒံးလီၤႉ ဟံၣ်ဖီခိၣ်ႇဟံၣ်ဖီလာ်ႇဘံၣ်ဒိၣ်ပူၤ တၢ်ခွဲးခွး၀ဲခဲလၢာ်လီၤႉ ဟုသးလၢၦ့ၤဃာ်တထၢၣ်န့ၣ်က့ၤဃ့ကဒါမးတဟ့ၣ်လီၤ၀ဲဘၣ်ႇဘၣ်တဲနးတချုးလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်=ကညီတၢ်ကစီၣ်၀ဲၤလီၢ်ခိၣ်သ့ၣ်န့ၣ်လီၤႉ လၢန့ၣ်အမဲာ်ညါ ဟးဆီလီၤ၀ဲအသုးလၢလီၢ်က၀ီၤဖိအဟံၣ်တကးဘၣ်ႇ တၢ်ဖိတၢ်လံၤလၢအအိၣ်ဟံၣ်ပူၤတဖၣ် နုာ်လီၤခွံခွး၀ဲဒီးဟံ၀ဲအသိး သိလ့ၣ်ယီၢ်တနီၤလီၤမၢ်၀ဲစ့ၢ်ကီးအဂ့ၢ်န့ၣ် ၦၤစံၣ်တၢ်ဒုးဖိတဖၣ်စံး၀ဲန့ၣ်လီၤႉ ခီဖျိဖလူတၢ်ဒုးအဃိ ထံမဲး၀ါခံသ၀ီပူၤ ကၠိလၢအအိၣ်ဘူးဒီးလ့က့ၣ်ကီာ်၀့ၢ်သီဒီးဟံၣ်ဃီတနီၤ တက့ၤဘၣ်ဒံးလၢအ၀ဲသ့ၣ်အဟံၣ်ဒံးဘၣ်ဒီး တကီၢ်ခါခဲအံၤ ၦၤဃ့ၢ် မှံဟးဖျိးအနီၣ်ဂံၢ်အိၣ်ဒံး၀ဲ(၁၀၀)ဘျဲၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲအပူၤကွံာ်(လါယူၤ ၁ သီ ဒီး ၂ သီ)အနံၤန့ၣ် ခီဖျိသုးမီၤစိရိၤအသုးႇ BGF သုးပာ်ဖှိၣ်ကရူၢ်ဒီး သုးခိၣ်ကျၢၢ် စီၤကၠီၤသဲၣ် တီခိၣ်ရိၣ်မဲ(DKBA)ထုးဖးသးကရူၢ်ဃုာ်ဒီးသိၣ်မှံၤပာ်ဖှိၣ်ကရူၢ်တဖၣ် တၢ်ဒုးကဲထီၣ်အဃိ လီၢ်က၀ီၤသ၀ီဖိ(၇၀၀)ဘျဲၣ် ဘၣ်လဲၤစံၣ်ထီၣ်၀ဲလၢကၠီၣ်တဲၣ် မဲၢ်ခိးက့သ၀ီပူၤယံၤ၀ဲ...
ခီဖျိသုးမီၤစိရိၤအသုးဟဲနုာ်လီၤလၢယၤဒိၤသ၀ီပူၤအါအါဂီၢ်ဂီၢ်အဃိ လီၢ်က၀ီၤဖိတဖၣ်ဘၣ်ယိၣ်တၢ်ဒီးဟးဃ့ၢ် အိၣ်ခူသူၣ်
လါယူၤ ၉ သီႇ ၂၀၂၁ နံၣ်ႇ ခ့ၣ်အဲးစံၣ် ကညီကီၢ်စဲၣ်ႇ သၣ်တီၣ်ကၠံကီၢ်ဆၣ်အပူၤ ဖဲလါယူၤ(၇)သီအနံၤ သုးမီၤစိရိၤအသုး ဟဲနုာ်လီၤလၢ ယၤဒိၤ သ၀ီတကပၤအါအါဂီၢ်ဂီၢ်အဃိ လီၢ်က၀ီၤသ၀ီဖိတဖၣ်ဘၣ်ယိၣ်ဘၣ်ဘှီတၢ်ဒီး တနီၤန့ၣ်ဟးဃ့ၢ်အိၣ်ခူသူၣ် အိၣ်၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ သုးမီၤစိရိၤအသုး သုးတြိၤ(၆၆)သုးတဖၣ် အိၣ်ပတုာ်၀ဲဒၣ်ဖဲခီၣ်ချ့သုး ရ့ၣ်(ခမရ=၆၀၃) လၢအအိၣ်ဆီလီၤသး ဖဲ တၤပူၤ (လ့ၣ်သိၤ)၀့ၢ်၀ံၤ ဖဲလါယူၤ ၇ သီအနံၤန့ၣ် ဆဲးဟဲထီၣ်၀ဲဒၣ် လၢသီၣ်ယ့ၤခၣ်=ယၤဒိၤတကပၤဒီးဆီလီၤ အသုး အိၣ်ဆိး၀ဲတုၤလၢခဲအံၤတစုအဂ့ၢ်န့ၣ် လီၢ်က၀ီၤဖိတဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ဖဲလါယူၤ ၆ သီန့ၣ် မံ၀ဲဒၣ်ဖဲ တၤပူၤ(လ့ၣ်သိၤ) ခမရ(၆၀၃)န့ၣ်တနၤလီၤႉ ဖဲ ၇ သီ ဂီၤခီ ၇ နၣ်ရံၣ်တခီအဆၢကတီၢ်န့ၣ် ဆဲးနီ၀ဲဒၣ်သိလ့ၣ်လၢယၤဒိၤတကပၤလီၤႉ ဖဲအ၀ဲသ့ၣ်ဟဲကျဲဒီတကျိၤန့ၣ် သ၀ီဖိတဖၣ်ပျံၤတၢ်လီၤႉ ခီဖျိလၢသုးဟဲထီၣ်အါအါဂီၢ်ဂီၢ်ဒ်အံၤတအိၣ်နီတဘျီဘၣ်အဃိမီၤနီၤႉ သ၀ီဖိတနီၤန့ၣ် တၢ်ဒုးမ့ၢ်ကဲထီၣ်ဘၣ်ဆၣ် ကဆဲးအိၣ်၀ဲဒၣ်ဖဲဟီၣ်က၀ီၤပူၤဃူဃူဖိးဖိးလီၤမီၤနီၤႉ သ၀ီဖိတနီၤစ့ၢ်ကီး ပာ်တ့ၢ်ကွံာ်အတၢ်ဖိတၢ်လံၤဒီး လဲၤစံၣ်အိၣ်လၢၦၢ်ပူၤစ့ၢ်ကီးအိၣ်၀ဲလီၤ”အဂ့ၢ်န့ၣ် စံး၀ဲန့ၣ်လီၤႉ လၢန့ၣ်အမဲာ်ညါ တၢ်ဟဲဆီလီၤသုးဒ်အံၤန့ၣ် ကဲထီၣ်၀ဲဒၣ်ဟီၣ်က၀ီၤတၢ်ဒိၣ်စိသ့၀ဲအဂ့ၢ်ႇ ၦၤအါဂၤ တတူၢ်လိာ်၀ဲသုးမီၤစိရိၤဘၣ်အသိး ပ၀ဲသ့ၣ်စ့ၢ်ကီးတတူၢ်လိာ်၀ဲဘၣ်အဂ့ၢ်န့ၣ်...
လူၢ်ပျဲၢ်(အႉထႉက)ကၠိအံၤ ကၠိဖိမိၢ်ပၢ်တဖၣ်ဘၣ်ဟံးန့ၢ်တၢ်ဘံၣ်တၢ်ဘၢလၢအဖိထီၣ်ကၠိအဂီၢ်
လါယူၤ ၇ သီႇ ၂၀၂၁ နံၣ်ႇ ခ့ၣ်အဲးစံၣ် ကညီကီၢ်စဲၣ် လူၢ်ပျဲၢ်၀့ၢ် ဂံၢ်ခီၣ်ထံးတီၤထီကၠိတဖၣ်လၢတၢ်စးထီၣ်အိးထီၣ်အီၤ ဖဲလါယူၤထီၣ် ၁ သီအနံၤအံၤ ကၠိဖိမိၢ်ပၢ်တဖၣ်ဘၣ်ဟံးန့ၢ်၀ဲတၢ်ဘံၣ်တၢ်ဘၢလၢအဖိကထီၣ်ကၠိအဂီၢ်အဂ့ၢ်န့ၣ် ၦၤအိၣ်၀့ၢ်ပူၤတဖၣ် စံး၀ဲန့ၣ်လီၤႉ လူၢ်ပျဲၢ်(အႉထႉက)ကၠိအံၤ ၦၤဟဲထီၣ်ကၠိအိၣ်ဒၣ်ထဲကၠိဖိလၢအအိၣ်လၢသုးတ၀ၢအပူၤတဖၣ်ဒီး ကၠိဖိလၢအိၣ်လူၢ် ပျဲၢ်၀့ၢ်ပူၤတဖၣ်န့ၣ်လီၤႉ ကၠိတၢ်ဘံၣ်တၢ်ဘၢအဂီၢ် ပၢၤကီၢ်သုးတဖၣ်ဟံးန့ၢ်တၢ်ဘံၣ်တၢ်ဘၢအမဲာ်ညါ ကၠိဖိမိၢ်ပၢ်တဖၣ်စ့ၢ်ကီး အိၣ်ခိး၀ဲဒၣ်တၢ်ဘံၣ်တၢ်ဘၢလၢအကလဲးအဂ့ၢ်န့ၣ် ၦၤအိၣ်၀့ၢ်ပူၤတဖၣ်စံး၀ဲအသိး သ့ၣ်ညါဘၣ်န့ၣ်လီၤႉ ၦၤအိၣ်၀့ၢ်ပူၤလၢတအဲၣ်ဒိးပာ်ဖျါအမံၤတဂၤစံး၀ဲ “ၦၤလဲၤထီၣ်ကၠိဒုအိၣ်လီၤႉ ကၠိစးထီၣ်ထီၣ်တၢတသီတနံၤန့ၣ် ပၢၤကီၢ်သုးတဖၣ်ဟဲဟံးန့ၢ်၀ဲတၢ်ဘံၣ်တၢ်ဘၢလီၤႉ ဖဲစှၤသီအတီၢ်ပူၤအံၤ ကၠိဖိမိၢ်ပၢ် ၃ ဂၤ တုၤလၢ ၅ ဂၤ ဆ့ၣ်နီၤ၀ဲဒၣ်လၢကၠိမဲာ်ညါဒီး ဟံးန့ၢ်၀ဲတၢ်ဘံၣ်တၢ်ဘၢလၢအကလဲးအိၣ်၀ဲလီၤႉ ဖိသၣ်လၢအိၣ်လၢသ၀ီပူၤတဖၣ်ဒု ပတထံၣ်လၢအဟဲထီၣ်ကၠိဘၣ်”အဂ့ၢ်န့ၣ် အ၀ဲစံး၀ဲန့ၣ်လီၤႉ လူၢ်ပျဲၢ်(အႉထႉက)ကၠိအံၤ တၢ်စးထီၣ်တူၢ်လိာ်ကၠိဖိအမံၤစးထီၣ်လၢ(လါမ့ၤ ၂၄ သီ)တုၤလၢ(လါမ့ၤ ၃၁ သီ)အနံၤဒီး အပူၤကွံာ်နံၣ်ၦၤဟဲအးကၠိဖိအမံၤအိၣ်၀ဲ(၇၈၀)ဃၣ်ဃၣ်ညါဘၣ်ဆၣ် တနံၣ်အံၤကၠိဖိအိၣ် ဒၣ်ထဲ(၁၁၅)ဂၤလီၤအဂ့ၢ်န့ၣ် ကူၣ်သ့ၦၤမၤတၢ်ဖိလၢတအဲၣ်ဒိးပာ်ဖျါအမံၤတဂၤစံး၀ဲန့ၣ်လီၤႉ လၢန့ၣ်အမဲာ်ညါ(အႉထႉက)လူၢ်ပျဲၢ်ကၠိအံၤ ကူၣ်သ့ၦၤမၤတၢ်ဖိသရၣ်/သရၣ်မုၣ်အိၣ််၀ဲ(၃၀)အကျါ ၁၄ ဂၤန့ၣ်နုာ်လီၤ၀ဲဒၣ်လၢ(CDM)အပူၤဒီး အိၣ်တ့ၢ် ၁၆ ဂၤန့ၣ်အိၣ်ဒံး၀ဲဒၣ်လၢ(Non-CDM)အပူၤန့ၣ်လီၤႉ ဒ်န့ၣ်အသိးလူၢ်ပျဲၢ်(အႉထႉက)ကၠိ တကးဘၣ်အမဲာ်ညါ လူၢ်ပျဲၢ်(အႉထႉက)အဒ့ ဒီး...