လါယယူၤ ၉ သီ၊ ၂၀၂၁ နံၣ်၊ ခ့ၣ်အဲးစံၣ်
ဖဲမဟါ(လါယူၤ ၈)သီ မုၢ်နၤခီအဆၢကတီၢ် သုးမီၤစိရိၤအသုးဒီး ဖီၣ်စုက၀ဲၤကရူၢ် လၢတၢ်တသ့ၣ်ညါအမံၤ တဒူၣ်အဘၢၣ်စၢၤ တၢ်ခးလိာ်သးကဲထီၣ်လၢကညီကီၢ်စဲၣ် သၣ်တီၣ်ကၠံ၀့ၢ် ၁၃ မံးလာ်ဒီး ဖဲန့ၣ်သုးမီၤစိရိၤ အသုး သံ၀ဲ ၁ ဂၤအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ
သုးမီၤစိရိၤအသုးဒီးဖီၣ်စုက၀ဲၤကရူၢ်လၢတၢ်တသ့ၣ်ညါအမံၤတဒူၣ် ဖဲမဟါ(လါယူၤ ၈)သီ မုၢ်နၤခီ ၈ နၣ်ရံၣ် တခီဃၣ်ဃၣ်အဆၢကတီၢ် တၢ်ခးလိာ်သးကဲထီၣ်ဒီး ဖဲန့ၣ်သုးမီၤစိရိၤတကပၤ အသုးသံ၀ဲ ၁ ဂၤအဂ့ၢ်န့ၣ် လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤ စံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“ဖဲမဟါ ၈ နၣ်ရံၣ်တခီဘျဲၣ်န့ၣ် အ၀ဲသ့ၣ်ခးလိာ်သးလီၤႉ ခး၀ဲ ၁၅ မံးနံးတဘျီ အိၣ်ဘှံးလီၤႉ ခးအိၣ်ဘှံးခးအိၣ်ဘှံး၀ဲလီၤႇ ခးလိာ်သး၀ံၤ၀ဲဒၣ်ဖဲ ၉ နၣ်ရံၣ်လီၤႉ ၦၤတဲလၢသုးမီၤစိရိၤအသုးတကပၤသံ၀ဲ ၁ ဂၤလီၤႉ”အဂ့ၢ်န့ၣ် စံးဘၣ် ခ့ၣ်အဲးစံၣ်=ကညီတၢ်ကစီၣ်န့ၣ်လီၤႉ
လၢန့ၣ်အမဲာ်ညါ အပူၤကွံာ်လၢညါလံၤလံၤ ခီဖျိလၢတၢ်ကစီၣ်ဟူထီၣ်သါလီၤလၢတၢ်ကဟဲခး၀ဲ သုးမီၤစိရိၤအသုးလၢအဆီလီၤသးဖဲ ၁၃ မံးလာ် ကျဲနုာ်လီၤတြဲၤအဃိ လီၢ်က၀ီၤဖိတနီၤသုးဃာ်အလီၢ်အကျဲအိၣ်၀ဲဘၣ်ဆၣ် တၢ်ဒုးဟဲကဲထီၣ်၀ဲဒၣ်ဖဲမဟါမုၢ်နၤခီလီၤအဂ့ၢ်န့ၣ် အ၀ဲစံးအါထီၣ်၀ဲန့ၣ်လီၤႉ
တကီၢ်ခါခဲအံၤ သုးမီၤစိရိၤအသုးဟးဆှၣ်တၢ်လၢဒူသ၀ီအပူၤဒီး သၣ်တီၣ်၀့ၢ် ၁၃ မံးလာ်အံၤ မ့ၢ်၀ဲဒၣ် ခ့ၣ်အဲၣ်ယူၣ်=ကညီဒီကလုာ်စၢဖှိၣ်ကရၢ တီအူကီၢ်ရ့ၣ်(သုးက့ ၂)တၢ်ပၢဟီၣ်က၀ီၤစ့ၢ်ကီးန့ၣ်လီၤႉ
