တကူၢ်သဝီတၢ်ဒုးကဲထီၣ်တအိၣ်သုးကီၣ်ကးကဘီယူၤဟဲတ့ၢ်လီၤမ့ၣ်ပိၢ်အဃိကမျၢၢ်ဘၣ်ဒိ(၄)ဂၤ
လါယနူၤအါရံၤ ၁၅ သီ, ၂၀၂၄ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢဘျံးဒဝဲၢ်ကီၢ်ရ့ၣ်,တနီသရံၣ်ကီၢ်ဆၣ်,တကူၢ်သဝီအပူၤဖဲလါယနူၤအါရံၤ(၁၃)သီအနံၤဂီၤခီ အဆၢကတီၢ်န့ၣ်ပယီၤသုးကီၣ်ကးအံၤတၢ်ဒုးတၢ်ယၤကဲထီၣ်သးတအိၣ်ဘၣ်ဘၣ်ဆၣ်ဟဲတ့ၢ်လီၤဝဲမ့ၣ်ပိၢ်ဒီးကဘီယူၤအဃိဘၣ်ဒိဝဲပှၤပိၥ်မုၣ်(၃)ဂၤဒီးပိၥ်ခွါတဂၤအဂ့ၢ်န့ၣ်လီၢ်ကဝီၤဖိလၢအိၣ်တၢ်မဲၥ်ညါတဖၣ်စံးဝဲန့ၣ်လီၤ. ပယီၤသုးကီၣ်ကးအံၤတၢ်ဒုးကဲထီၣ်အသးတအိၣ်ဘၣ်ဘၣ်ဆၣ်မ့ၢ်လၢဟဲတ့ၢ်လီၤမ့ၣ်ပိၢ်ဖဲတကူၢ်သဝီပူၤအဃိကမျၢၢ်လီၢ်ကဝီၤဖိ(၄)ဂၤဘၣ်ဒိဝဲဒၣ်ဒီးလၢအကျါပိၥ်မုၣ်တဂၤဘၣ်ဒိဝဲဒိၣ်ဒိၣ်မုၢ်မုၢ်,တၢ်လီၤဘၣ်ယိၣ်အိၣ်ဝဲအဂ့ၢ်န့ၣ်တနီသရံၣ်ကီၢ်ဆၣ်လီၢ်ကဝီၤဘၣ်မူဘၣ်ဒါပဒိၣ်စီၤထံဝါစံးဝဲဒ်အံၤန့ၣ်လီၤ. "ဖဲမဂီၤ(၅)နၣ်ရံၣ်(၅)မံးနံးန့ၣ်အဆိကတၢၢ်ပယီၤသုးကဘီယူၤ(Jet Fighter)တဘ့ၣ်ဟဲထီၣ်ဝဲခးလီၤတၢ်ဘၣ်ဒိၣ်ဝဲသဝီဖိပိၥ်မုၣ် တဂၤလီၤ. မၤက ဒီးဖဲ(၉)နၣ်ရံၣ်(၃၅)မံးနံးန့ၣ်ပယီၤသုးကဘီယူၤ(K-8)တဘ့ၣ်ဟဲတ့ၢ်လီၤဝဲမ့ၣ်ပိၢ်ဖဲသဝီအခၢၣ်သး,ဖဲတၢ်ဆါဟံၣ် ဒီးကျးဆါတၢ်အဘၢၣ်တၢ်လီၢ်အပူၤမီၤနီၤ. ပှၤဘၣ်ဒိ(၄)ဂၤအကျါန့ၣ်တဂၤန့ၣ်အတၢ်ဘၣ်ယိၣ်အိၣ်ဝဲလီၤ. တၢ်လီၢ်ဒူသဝီဖဲန့ၣ်န့ၣ်တၢ် ဒုးကဲထီၣ်တအိၣ်ဘၣ်, ပယီၤသုးန့ၣ်ဟဲတ့ၢ်လီၤမ့ၣ်ပိၢ်န့ၣ်တမ့ၢ်လၢတၢ်ဒုးကဲထီၣ်အဃိဘၣ်." အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ် ကစီၣ်န့ၣ်လီၤ. ဘၣ်ထွဲဒီးပယီၤသုးကီၣ်ကးအကဘီယူၤဟဲတ့ၢ်လီၤမ့ၣ်ပိၢ်လၢဒူသဝီသ့ၣ်တဖၣ်အပူၤအံၤခီဖျိဒူသဝီဝဲန့ၣ်သ့ၣ်တဖၣ်န့ၣ်သုးကီၣ်ကးအတၢ်ပၢတၢ်ပြးတအိၣ်လၢၤဘၣ်ဒီးမ့မ့ၢ်တခီမ့ၢ်တၢ်လီၢ်လၢတၢ်ပၢၢ်ဆၢသုးပၥ်ဖှိၣ်ဒိၣ်စိန့ၢ်ဝဲတၢ်လီၢ်သ့ၣ်တဖၣ်အဃိဟဲတ့ၢ်လီၤဝဲဒၣ်ဒ်အံၤလီၤအဂ့ၢ်န့ၣ်လီၢ်ကဝီၤအပှၤဘၣ်မူဘၣ်ဒါစံးဝဲန့ၣ်လီၤ. ဒ်န့ၣ်အသိးမ့ၢ်ဘၣ်ကွၢ်ဖဲအပူၤကွံၥ်စှၤသီအတီၢ်ပူၤန့ၣ်လၢဘျံးဒဝဲၢ်ကီၢ်ရ့ၣ်-ကစၢၢ်ဒိၣ်ကီၢ်ဆၣ်ဟီၣ်ကဝီၤ,သန့ချၢၣ်သဝီဒီးဘီၤပျီသဝီအပူၤ န့ၣ်တၢ်ဒုးတၢ်ယၤကဲထီၣ်သးတအိၣ်စ့ၢ်ကီးဘၣ်ဒီးပယီၤသုးကဘီယူၤဟဲတ့ၢ်လီၤမ့ၣ်ပိၢ်အဃိဘၣ်ဒိဝဲပှၤသဝီဖိ(၂)ဂၤအဂ့ၢ်န့ၣ်ကီၢ်ရ့ၣ်အပှၤဘၣ်မူဘၣ်ဒါစံးဝဲအသိးသ့ၣ်ညါဘၣ်န့ၣ်လီၤ.
ကလံၤထံးသုးဟီၣ်က၀ီၤ တလါအတီၢ်ပူၤ တၢ်ထီၣ်မၤန့ၢ်သုးကလၢၤ(၄)ဖျၢၣ် ဒီး ပယီၤသုးသံ(၁၅၁)ဂၤ
လါယနူၤအါရံၤ ၁၅ သီ, ၂၀၂၅ နံၣ်, ခ့ၣ်အဲးစံၣ် လၢဒီကလုၥ်ဃူဖိးပဒိၣ်(NUG) တၢ်ဒီသဒၢကိတိၥ်၀ဲၤကျိၤဖီလၥ်ကလံၤထံးသုးဟီၣ်က၀ီၤအပူၤန့ၣ် လါဒံၣ်စ့ဘၢၣ်တလါအတီၢ်ပူၤ တၢ်ထီၣ်မၤန့ၢ်၀ဲ ပယီၤသုးကလၢၤ(၄)ဖျၢၣ်ဒီး ပယီၤသုးတကပၤသံ၀ဲ(၁၅၁)ဂၤအဂ့ၢ်န့ၣ် ကလံၤထံးသုးဟီၣ်က၀ီၤထုးထီၣ်ပၥ် ဖျါ၀ဲဖဲမဟါလါယနူၤ အါရံၤ ၁၄ သီအနံၤန့ၣ်လီၤ. ဒ်ကလံၤထံးသုးဟီၣ်က၀ီၤလံၥ်တၢ်ပၥ်ဖျါပူၤပၥ်ဖျါအ၀ဲအသိးန့ၣ် လါဒံၣ်စ့ဘၢၣ် ၁ သီတုၤ ၃၁ သီ လၢတလါအတီၢ်ပူၤန့ၣ် တၢ်ပၢၢ်ဆၢသုးပၥ်ဖှိၣ်ကရူၢ်ထီၣ်မၤန့ၢ်ကွံၥ်၀ဲသုးကီၣ်ကးအသုးကလၢၤ(၄)ဖျၢၣ်လၢအမ့ၢ် ၀ီၢ်ရ့ၣ်ကီၢ်ဆၣ်ပူၤ ကိၤကၠဲၣ်(ကွမ်ကျိုက်) ပယီၤသုးကလၢၤ, တနီသရံၣ်ကီၢ်ခီ ယ့ၤဖၠူၤကီၢ်ဆၣ် ယ့ၤကၤတီၤ(ရေကန်တောင်) တၤ၀ၤတၢၣ်သုးကလၢၤ , (သုးက့ ၅) စွဲၣ်တီၣ်ကိသုးကလၢၤဒီးတီၤသိလိသုးကလၢၤသ့ၣ်တဖၣ်အံၤအဂ့ၢ်န့ၣ် သ့ၣ်ညါဘၣ်န့ၣ်လီၤ. လၢန့ၣ်အမဲၥ်ညါတလါအတီၢ်ပူၤ ခံခီခံကပၤတၢ်ဒုးကဲထီၣ်ပၥ်ဖှိၣ်အိၣ်၀ဲ(၆၂)ဘျီအဃိ ပယီၤသုးတကပၤသံ၀ဲဒၣ်(၁၅၁)ဂၤအမဲၥ်ညါ ဘၣ်ဒိ၀ဲ(၈၉)ဂၤဒီး ဒ်န့ၣ်အသိးပယီၤသုးဟဲက့ၤပၥ်လီၤစုက၀ဲၤ(၅)ဂၤလၢတၢ်ပၢၢ်ဆၢသုးပၥ်ဖှိၣ်အအိၣ်အဂ့ၢ်န့ၣ် ကလံၤထံးသုး ဟီၣ်က၀ီၤ လံၥ်တၢ်ပၥ်ဖျါပူၤအသိး သ့ၣ်ညါဘၣ်န့ၣ်လီၤ. ဒ်န့ၣ်အသိးလၢတၢ်ထီၣ်မၤန့ၢ်သုးကလၢၤ(၄)ဖျၢၣ်အံၤအခါန့ၣ် တၢ်မၤန့ၢ်ဃုၥ်၀ဲ(၁၂၀ မမ),(၈၁ မမ),(၆၀ မမ)အပျီဃုၥ်ဒီး ကျိဖိ,ကျိချံ ပှၥ်သၣ်လၢအဂၤသ့ၣ်တဖၣ်အါအါဂီၢ်ဂီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ. တကတီၢ်ဃီတၢ်ပၢၢ်ဆၢသုးပၥ်ဖှိၣ်ကရူၢ်လၢအထီၣ်မၤန့ၢ်ပယီၤသုးကလၢၤသ့ၣ်တဖၣ်အံၤန့ၣ် မ့ၢ်၀ဲ ကညီဒီကလုၥ်တၢ်ထူၣ်ဖျဲးသုး မုၢ်ဒိၣ်(KNLA),ကလံၤထံးသုးဟီၣ်က၀ီၤ(PDF)သုးရ့ၣ်အပှၤတဖၣ်,တၢ်ဒီသဒၢကမျၢၢ်ကရူၢ်(ပကဖ),(LDF),ကီၢ်ပယီၤကမျၢၢ်တၢ်ထူၣ်ဖျဲးသုးမုၢ်ဒိၣ်(BPLA), (ABSDF),(MSRF),(NMSP AD),(TPLF), သုးပၥ်ဖှိၣ်လၢအဂၤဃုၥ်ဒီးဒြိသုးပၥ်ဖှိၣ်သ့ၣ်တဖၣ် ပၥ်ဖှိၣ်မၤ...
၀ီၢ်ရ့ၣ်ကီၢ်ဆၣ်ပူၤ တၢ်ဒုးကဲထီၣ်ဒီး ပယီၤသုးပံးတံၢ်ဃၥ်တၢ်စိၥ်ထီၣ်စိၥ်လီၤကသံၣ်ကသီ,တၢ်အီၣ်တၢ်အီ
လါယနူၤအါရံၤ ၁၄ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူပျၥ်ယၥ်ကီၢ်ရ့ၣ်(သုးက့ ၆) ၀ီၢ်ရ့ၣ်ကီၢ်ဆၣ် ကၠိလီ(ကျုံးလောင်း)ဟီၣ်က၀ီၤအပူၤ စးထီၣ်ဖဲလါယနူၤအါရံၤ ၉ သီအနံၤန့ၣ် ပယီၤသုးကျိၤဟဲထီၣ်အဃိတၢ်ဒုးကဲထီၣ်အဖီခိၣ် ပယီၤသုးအံၤပံးဃၥ်၀ဲ တၢ်စိၥ်ထီၣ်စိၥ်လီၤတၢ်အီၣ်တၢ်အီဒီးကသံၣ်ကသီသ့ၣ်တဖၣ်အဂ့ၢ်န့ၣ် မိၣ်တၢ်ပၢၢ်ဆၢကရူၢ်(MSRF)ပှၤဘၣ်မူဘၣ်ဒါ စံး၀ဲန့ၣ်လီၤ. စးထီၣ်ဖဲအပူၤကွံၥ်လါယနူၤအါရံၤ ၉ သီအနံၤန့ၣ် လၢ၀ီၢ်ရ့ၣ်ကီၢ်ဆၣ် ကၠိလီဟီၣ်က၀ီၤပူၤ ဘၣ်ဃးတၢ်ဒုးတၢ်ကစီၣ်တၢ်အိၣ်သး အိၣ်ဒ်လဲၣ်အဂ့ၢ်န့ၣ် မိၣ်တၢ်ပၢၢ်ဆၢကရူၢ်(MSRF)ပှၤကတိၤတၢ်ပၢ နဲၤနကါ ပၥ်ဂၢၢ်ပၥ်ကျၢၤစံးဘၣ်ခ့ၣ်အဲးစံၣ်-ကညီတၢ်ကစီၣ် ဒ်အံၤန့ၣ်လီၤ. “မ့ၢ်လီၤစးထီၣ်ဖဲလါထီၣ်(၉)သီအံၤန့ၣ်တၢ်ဒုးကဲထီၣ်လၢခံခီခံကပၤအဘၢၣ်စၢၤတုၤလၢခဲအံၤလီၤ.ဖဲမဟါန့ၣ်တၢ်ဒုးကဲထီၣ် တဘျီဒံး. မ့မ့ၢ်တနံၤညါအံၤန့ၣ်ဘှ့ၣ်က့ၤတစဲး.ပယီၤသုးတကပၤန့ၣ်တၢ်သံတၢ်ဘၣ်ဒိဘၣ်ထံးကအိၣ်ဖးအါညါ. တနီၤန့ၣ်ပှၤတဲလၢ အသံကအိၣ်လၢအဂၤ(၅၀),(၆၀)ညါ.လၢကမၤလီၤတံၢ်အဂီၢ်န့ၣ်ပဃုသ့ၣ်ညါအဖၢမုၢ်လီၤ.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ် ကစီၣ်ဖဲတနံၤအံၤန့ၣ်လီၤ. တၢ်ဒုးကဲထီၣ်အဖီခိၣ် ပယီၤသုးရ့ၣ်လၢအိၣ်ဆီလီၤသးဖဲ၀ီၢ်ရ့ၣ်ဟီၣ်က၀ီၤပူၤအံၤတဖၣ် ခးလီၤ၀ဲကျိဖးဒိၣ်တပယူၥ်ဃီအဃိ ကၠိလီသ၀ီ,ကၠီၣ်မံၣ်ကၠီသ၀ီဃုၥ်ဒီးဒူသ၀ီလၢအိၣ်ဘူးဖဲန့ၣ်တဖၣ်ပှၤကမျၢၢ်လၢအကထိဃ့ၢ်ထီၣ်၀ဲဆူမိၣ်ကီၢ်သီပၣ်တံၣ်တၢ်ပၢ ဟီၣ်က၀ီၤဒီးတၢ်လီၢ်လၢအဂၤအိၣ်၀ဲအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤ. ဒ်န့ၣ်အသိးခီဖျိတၢ်ဒုးကဲထီၣ်အဃိ လၢယ့၀့ၢ်ပူၤဆူဒူသ၀ီအံၤတဆီ ပယီၤသုးပံးတံၢ်ဃၥ်၀ဲတၢ်စိၥ်ထီၣ်စိၥ်လီၤတၢ်အီၣ်တၢ်အီဒီး ကသံၣ်ကသီသ့ၣ်တဖၣ်အဃိ လီၢ်က၀ီၤကမျၢၢ်သ့ၣ်တဖၣ်ထံၣ်ဘၣ်၀ဲတၢ်ကီတၢ်ခဲအဂ့ၢ်န့ၣ် လီၢ်က၀ီၤပူၤကမျၢၢ်တဂၤ စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ. အ၀ဲစံး၀ဲလၢ“တၢ်ဒုးကဲထီၣ်အဃိပယီၤသုးတအဲၣ်ပှၤစိၥ်တၢ်အီၣ်တၢ်အီဒီးကသံၣ်ကသီဘၣ်န့ၣ်ကန့ၢ်လၢ(၅)သီလံ. ပှၤစိၥ်ထီၣ်စိၥ်လီၤကသံၣ်ကသီ,တၢ်အီၣ်တၢ်အီတန့ၢ်ဘၣ်ဘျီပှၤသ၀ီဖိဒု ထံၣ်ဘၣ်၀ဲတၢ်ကီတၢ်ခဲန့ၣ်”အဂ့ၢ်န့ၣ် စံး၀ဲန့ၣ်လီၤ. တကီၢ်ခါခဲအံၤခီဖျိခံခီခံကပၤတၢ်ဒုးကဲထီၣ်အဃိ ပှၤကမျၢၢ်အဂၤ(၄၀၀)ဘျဲၣ်လၢအဘၣ်ဃ့ၢ်တၢ်ဒုးအံၤတဖၣ်ဒ်သိးကဒိးန့ၢ်ဘၣ် တၢ်အီၣ်တၢ်အီဒီးကသံၣ်ကသီတၢ်ဆီၣ်ထွဲမၤစၢၤအဂီၢ်န့ၣ် တၢ်ထၢမၤနီၣ်စရီ၀ံၤ တၢ်ဟ့ၣ်လီၤမၤစၢၤဆီၣ်ထွဲစိဃၥ်၀ဲ ဟုသး,သိအီၣ်, ညၣ်ဒၢဃုၥ်ဒီးတၢ်အီၣ်တၢ်အီလၢအဂၤတဖၣ်အိၣ်၀ဲအဂ့ၢ်န့ၣ် Mon Relief and Development Center's...
ယိၤဒိၣ်ကလံၤထံးပှၤလီၢ်အိၣ်ကဒုဖိတဖၣ်လိၣ်ဘၣ်ဝဲဂ့ၢ်ဂီၢ်အူတၢ်အီၣ်မိၢ်ပှၢ်အဖၢမုၢ်အဂ့ၢ်(PYO))ထုးထီၣ်ပၥ်ဖျါဝဲ
လါယနူၤအါရံၤ ၁၃သီ, ၂၀၂၄နံၣ်, ခ့ၣ်အဲးစံၣ်, ခီဖျိသုးကီၣ်ကးဒီးအပှၤပၠ့ၣ်သူၣ်စ့ၣ်တဖၣ်အံၤပၢၤဃၥ်ဝဲထံဂုၤကီၢ်ဂၤတၢ်တိစၢၤမၤစၢၤလၢတၢ်ကစိၥ်ဆှၢဟ့ၣ်နီၤလီၤဝဲဆူကမျၢၢ်ပှၤဃ့ၢ်တၢ်ဒုးလီၢ်အိၣ်ကမှံဖိတဖၣ်အအိၣ်အဃိ,ယိၤဒိၣ်ကလံၤထံးပှၤဃ့ၢ်တၢ်ဒုးလီၢ်အိၣ်ကဒုဖိသ့ၣ်တဖၣ်အံၤလိၣ်ဘၣ်ဝဲဂ့ၢ်ဂီၢ်အူတၢ်တိစၢၤမၤစၢၤတၢ်အီၣ်မိၢ်ပှၢ်တဖၣ်တုၤလၢခဲအံၤအဂ့ၢ်,ပအိၣ်သးစၢ်ကရၢ Pa-O Youth Organization (PYO)ထုးထီၣ်ပၥ်ဖျါဝဲဒၣ်ဖဲတနံၤအံၤလါယနူၤအါရံၤ(၁၃)အနံၤန့ၣ်လီၤ. ယိၤဒိၣ်ကလံၤထံးလီၢ်အိၣ်ကဒုဖိတဖၣ်အဂီၢ်,ထံဂုၤကီၢ်ဂၤတၢ်ဒိသူၣ်ဒိသးတၢ်ဆီၣ်ထွဲမၤစၢၤတဖၣ်အံၤခီဖျိသုးကီၣ်ကးဒီးအပှၤပၠ့ၣ်သူၣ်စ့ၣ်တဖၣ်ဟံဝဲတၢ်ခိတၢ်သွဲလၢကျဲတီၤဒီးမၤကီမၤခဲဝဲတၢ်လၢကျဲအါဘိအဃိ,ကမျၢၢ်လီၢ်အိၣ်ကဒုဖိတဖၣ်အံၤတုၤလၢခဲအံၤလိၣ်ဘၣ်ဂ့ၢ်ဂီၢ်အူတၢ်အီၣ်မိၢ်ပှၢ်အဖၢမုၢ်အဂ့ၢ်,ပအိၣ်သးစၢ်ကရၢ(PYO)ပှၤပၢၤလီၢ်ဆ့ၣ်နီၤ(ခိၤအူ)စံးဝဲဒ်အံၤန့ၣ်လီၤ. အဝဲစံးဝဲလၢ“ကစိၥ်ခီဆှၢတၢ်တိစၢၤမၤစၢၤအဂီၢ်,ပှၤဘၣ်ဟ့ၣ်တၢ်အိၣ်ခိးတြဲၤတၢ်ခိတၢ်သွဲအါအသိး,ဒ်သိးကန့ၢ်တၢ်ပျဲလၢကစိၥ်ဆှၢတၢ်အဂီၢ်ဘၣ်ဟ့ၣ်စ့ၢ်ကီးတၢ်အလဲန့ၣ်လီၤ.ပှၤဘၣ်ဟးထီၣ်ဟးလီၤလဲၤတၢ်က့ၤတၢ်လၢအဝဲသ့ၣ်တၢ်ရဲၣ်တၢ်ကျဲၤန့ၣ်လီၤ,တၢ်တၢၣ်ပီၣ်တဲၣ်သကိးဒီးအပၠ့ၣ်သူၣ်စ့ၣ်တဖၣ်မ့တဘၣ်ဂီၢ်ဘၣ်ဒွါန့ၣ်,တဲဝဲလၢတၢ်တိစၢၤမၤစၢၤအံၤကဘၣ်ဟ့ၣ်လီၤမၤစၢၤဝဲအပှၤသုးဖိ(၁၅၀)ဂၤအဂီၢ်အိၣ်ဝဲန့ၣ်လီၤ”အဂ့ၢ်စံးဝဲဒၣ်န့ၣ်လီၤ. သုးကီၣ်ကးဒီးအပှၤပျိၥ်လဲအသး(ပၠ့ၤသူၣ်စ့ၣ်)တဖၣ်အံၤ,ပၢၤဃၥ်ဝဲထံဂုၤကီၢ်ဂၤတၢ်တိစၢၤမၤစၢၤ,ဟံဝဲတၢ်ခိတၢ်သွဲ(၁၅)မျးကယၤအိၣ်ဝဲဒၣ်အသိး,ဖဲ(၂၀၂၄)နံၣ်အပူၤသုးကီၣ်ကးအပၠ့ၣ်သူၣ်စ့ၣ်အခိၣ်ဒိၣ်တဂၤပၥ်ဖျါဝဲလၢအဟီၣ်ကဝီၤတၢ်လိၣ်ဘၣ်မ့ၢ်တၢ်အရ့ဒိၣ်ကတၢၢ်လၢတၢ်ကိးမံၤဒဲးဒီးဘၣ်ဃးတၢ်ဒိသူၣ်ဒိသးတိစၢၤမၤစၢၤဆူကမျၢၢ်အံၤန့ၣ်,တပၥ်ဝဲအရ့ဘၣ်အဂ့ၢ်,(PYO)လံၥ်ထုးထီၣ်ပၥ်ဖျါအပူၤပၥ်ဖျါဝဲန့ၣ်လီၤ. လၢတၢ်န့ၣ်အဃိ,ဘၣ်ဃးဒီးထံဂုၤကီၢ်ဂၤတၢ်ဟ့ၣ်တၢ်ဒိသူၣ်ဒိသးတၢ်တိစၢၤမၤစၢၤအံၤသုတတုၤလၢသုးကီၣ်ကးအစုပူၤတဂ့ၤအဂီၢ်တၢ်ကဆိကမိၣ်ထံဝံၤမး,ကစိၥ်ခီဖဲထံဆၢကီၢ်ဆၢအဂ့ၢ်, Shan Human Rights Foundation (SHRF)ပှၤကတိၤတၢ်ပၢ(ယိန်းလျန်ဟန်)စံးဝဲဒ်အံၤန့ၣ်လီၤ. အဝဲစံးဝဲလၢ“ဘၣ်ဃးတၢ်ဟ့ၣ်တၢ်တိစၢၤမၤစၢၤအံၤထံဂုၤကီၢ်ဂၤတကြၢးဖီၣ်လိၥ်စုမၤသကိးတၢ်ဒီးသုးကီၣ်ကးလၢၤဘၣ်.တကီၢ်ခါခဲအံၤကလုၥ်ဒူၣ်ဖီၣ်စုကဝဲၤတဖၣ်ပၢၤဃၥ်တၢ်လီၢ်န့ၢ်ဒီဒူၣ်လံအဃိန့ၣ်,ဘၣ်ဃးထံဆၢကီၢ်ဆၢတၢ်စိၥ်ခီန့ၣ်သုတလဲၤဟ့ၣ်ဆူသုးကီၣ်ကးအစုပူၤတဂ့ၤအဂီၢ်န့ၣ်ယအဲၣ်ဒိးဟ့ၣ်ကူၣ်လၢဆိကမိၣ်ထံအီၤ”အဂ့ၢ်စံးဝဲဒၣ်န့ၣ်လီၤ. ယိၤဒိၣ်ကလံၤထံးဟီၣ်ကဝီၤအပူၤအံၤ,(၂၀၂၄)နံၣ်အပူၤတၢ်ထီၣ်မၤန့ၢ်ဝဲဆံၣ်ဆဲၣ်ခီၣ်ချ့သုးရ့ၣ်(ခမရ)တၢ်လီၢ်တၢ်ကျဲအိၣ်ဝဲဘၣ်ဆၣ်,ခီဖျိသုးကီၣ်ကးကလံၤကျါတၢ်ထီၣ်ဒုးအဃိတၢ်ဘၣ်ဂုၤကဒါက့ၤလီၢ်ခံဒီးတၢ်ဘၣ်ဒိဘၣ်ထံးအိၣ်အါဝဲအဖီခိၣ်,သုးကီၣ်ကးမၤဝဲတၢ်ထၢန့ၢ်ဆူၣ်ပအိၣ်ကလုၥ်ဒူၣ်ပှၤသုးဖိတဖၣ်ဒီးမၤသံမၤဝီမၤလီၤမၢ်ကွံၥ်ဝဲအိၣ်ဝဲအဂ့ၢ်,(PYO)တၢ်ပၥ်ဖျါအပူၤပၥ်ဖျါဝဲဒၣ်န့ၣ်လီၤ. တကတီၢ်ဃီ,တနံၣ်အံၤ(၂၀၂၅)နံၣ်လါယနူၤအါရံၤအဆိကတၢၢ်တနွံတုၤလၢခံတနွံအပူၤ,ဆံဆံၣ်,ပ့ၤလီ,မီၣ်မဲၤဒီးဖဲၤခိၤကီၢ်ဆၣ်တဖၣ်အပူၤခီဖျိဟီၣ်ခိၣ်အမဲၥ်ဖံးခိၣ်တၢ်ဒုးဆူၣ်ဝဲလၢတၢ်ပၢၢ်ဆၢသုးပၥ်ဖှိၣ်ကရူၢ်ဒီးသုးကီၣ်ကးအဘၢၣ်စၢၤအိၣ်ဝဲဒီး,သုးကီၣ်ကးခးလီၤဝဲကျိဖးဒိၣ်,ဒွဲၣ်အူမၤဟးဂီၤကွံၥ်ဝဲကမျၢၢ်လီၢ်ကဝီၤဖိဟံၣ်ဃီ,ဒူသဝီတဖၣ်အိၣ်ဝဲအဖၢမုၢ်အဃိ,ကမျၢၢ်လီၢ်ကဝီၤဖိတဖၣ်သဂၢၢ်ဘၣ်ဝဲတၢ်အီၣ်တၢ်အီတၢ်ဂ့ၢ်ကီအါမံၤန့ၣ်လီၤ. တကးဒံးဘၣ်,ခီဖျိသုးကီၣ်ကးတဖၣ်အံၤအကဘီယူၤခးလီၤပီၣ်(၅၀၀)မ့ၣ်ပိၢ်တဖၣ်ဒီးကျိဖးဒိၣ်တဖၣ်သတူၢ်ကလၥ်ဆူကမျၢၢ်ဒူသဝီပူၤအဃိ,ကမျၢၢ်လီၢ်ကဝီၤဖိဒံဖိသၣ်သူၣ်ခ့သးပှၢ်ဃုၥ်ဒီးပိၥ်မုၣ်လၢအိၣ်ဒီးဟုးသးတဖၣ်ဘၣ်သံဘၣ်ဝီဝဲဒီဖုဒီဂီၢ်ဒီးဘၣ်တၢ်မၤလီၤမၢ်ကွံၥ်ဝဲအဝဲသ့ၣ်တဖၣ်အိၣ်ဝဲအါမးအဂ့ၢ်(PYO)အတၢ်ပၥ်ဖျါအပူၤန့ၣ်လီၤ. ဒ်န့ၣ်အသိး,ယိၤဒိၣ်ကလံၤထံးဟီၣ်ကဝီၤတဖၣ်အပူၤတကီၢ်ခါခဲအံၤသုးကီၣ်ကးပၢၤဃၥ်တၢ်လီၢ်တဖၣ်အပူၤ,ကးတံၥ်ကွံၥ်ဝဲလီၢ်အိၣ်ကဒုဖိတဖၣ်အတၢ်လဲၤတၢ်က့ၤတၢ်ဖံးအီၣ်မၤအီၣ်အကျိၤအကျဲအဖီခိၣ်,ကမျၢၢ်လီၢ်ကဝီၤဖိတဖၣ်တနီၤတက့ၤအိၣ်ဆိးဖံးမၤအီၣ်အီဘၣ်ဒံးဝဲလၢအနီၢ်ကစၢ်ဟံၣ်ဃီတၢ်လီၢ်တၢ်ကျဲအပူၤဒံးဘၣ်ဒီးတနီၤဟံၣ်ဃီဟးဂီၤကွံၥ်ဝဲဒီးဘၣ်ဃ့ၢ်အိၣ်ကဒုဝဲအသးလၢပှၢ်ပူၤအသိး,သုးကီၣ်ကးအံၤမၤပျံၤမၤဖုးဟ့ၣ်တၢ်ဆီၣ်သနံးလၢကမျၢၢ်တဖၣ်ကဘၣ်က့ၤအိၣ်ဆိးလၢအတၢ်လီၢ်တၢ်ကျဲပူၤအဖီခိၣ်ကမျၢၢ်တဖၣ်ဘၣ်ဒိဘၣ်ထံးသံဝဲခီဖျိဟီၣ်လၥ်မ့ၣ်ပိၢ်အိၣ်ဝဲအဂ့ၢ်,(PYO)အတၢ်ပၥ်ဖျါအပူၤ,ပၥ်ဖျါဝဲဒၣ်န့ၣ်လီၤ.
ကၠဲးထိၣ်ကီၢ်ဆၣ် သုးကီၣ်ကးအမျိၥ်သုးကျိဖးဒိၣ်အဃိ ကမျၢၢ်ဟံၣ်အူအီၣ်ပၣ်ဃုၥ်၀ဲစ့(၆၅)ကလီၢ်
လါယနူၤအါရံၤ ၁၃ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်အပူၤ ခီဖျိသုးကီၣ်ကးအမျိၥ်သုးခးလီၤကျိဖးဒိၣ်အဃိ ကမျၢၢ်ဟံၣ် တၢ်သူၣ်ထီၣ်အူအီၣ်အကျါ စ့ပယီၤ(၆၅)ကလီၢ်ပၣ်ဃုၥ်၀ဲလၢမ့ၣ်အူကျါအဂ့ၢ်န့ၣ် သ့ၣ်ညါဘၣ်လၢကီၢ်ရ့ၣ်ပှၤဘၣ်မူ ဘၣ်ဒါ အအိၣ်န့ၣ်လီၤ. ကၠဲးထိၣ်ကီၢ်ဆၣ်ပူၤ ဖဲအပူၤကွံၥ်လါယနူၤအါရံၤ ၁၀ သီ မုၢ်ဃ့ၢ်လီၤ ၁း၂၀ မံးနံးဘျဲၣ်အဆၢကတီၢ် တၢ်ဒုးကဲထီၣ်တအိၣ် သုးကီၣ်ကး(၄၄)အမျိၥ်သုး ခးလီၤကျိဖးဒိၣ်လီၤတဲၥ်ပိၢ်ထီၣ်၀ဲလၢ တကွံပူၤကရူၢ် တကွံပူၤသ၀ီ ထံညၣ်အိတကပၤအဃိ အူအီၤစိ အဟံၣ်အူအီၣ်ကွံၥ်၀ဲဒီတဖျၢၣ်ဒီးဖဲန့ၣ်အစ့အကလီၢ်(၆၀)ဘျဲၣ်အမဲညါ မ့ၣ်အူအီၣ်ပၣ်ဃုၥ်၀ဲ အထူ(၇)ဘှဲအဂ့ၢ်န့ၣ် ကီၢ်ရ့ၣ်တၢ်မၤနီၣ် အပူၤပၥ်ဖျါ၀ဲန့ၣ်လီၤ. ပှၤကမျၢၢ်ဟံၣ်တၢ်သူၣ်ထီၣ်ဃုၥ်ဒီးထူစ့အူအီၣ်တကးဒံးဘၣ်အမဲၥ်ညါ အူအီၤစိအံၤလၢကတ့ထီၣ်အဟံၣ်လၢအသီအဂီၢ် သ့ၣ်လၢအပှ့ၤဃၥ်ပၥ်ဃၥ်၀ဲလၢဟံၣ်ဖီလၥ်အံၤတဖၣ်စ့ၢ်ကီးအူအီၣ်ပၣ်ဃုၥ်၀ဲခဲလၢၥ်အဂ့ၢ်န့ၣ် ပှၤလၢအအိၣ်ဘူးဖဲတၢ်ကဲထီၣ်သးအံၤ အခိၣ်အဃၢၤတဂၤ စံး၀ဲဒၣ်ဒ်အံၤန့ၣ်လီၤ. အ၀ဲစံး၀ဲလၢ“ထူလၢမ့ၣ်အီၣ်၀ဲန့ၣ်အကဲ၀ဲဒၣ်အကိၣ်လိၣ်လီၤ.အဟံၣ်န့ၣ်အလီၢ်လံၤလၢအကတ့ထီၣ်ဟံၣ်အဂီၢ်အပှ့ၤဃၥ်သ့ၣ်. ပၥ်ဃၥ်၀ဲလၢဟံၣ်ဖီလၥ်ဘျီမ့ၣ်အူအီၣ်ပၣ်ဃုၥ်၀ဲခဲလၢၥ်န့ၣ်.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. တကတီၢ်ဃီတၢ်တနံၤဃီ၀ဲန့ၣ် ပယီၤသုးခးလီၤကျိဖးဒိၣ်(၅)ဖျၢၣ်လီၤတဲၥ်ပိၢ်ဖးထီၣ်၀ဲလၢတကွံပူၤသ၀ီ ထံညၣ်အိ(၂)ဖျၢၣ်, လၢကရၣ်၀့ဆ့ၣ် ထးခီန့ၣ်(၂)ဖျၢၣ် ဟံၣ်ဟးဂီၤတဖျၢၣ်ဒီး လၢအအိၣ်တ့ၢ်တဖျၢၣ်န့ၣ် တပိၢ်ဖးထီၣ်ဒံး၀ဲဘၣ်အဂ့ၢ်န့ၣ် ကီၢ်ဆၣ်ပှၤဘၣ်မူဘၣ်ဒါစံး၀ဲအသိး သ့ၣ်ညါဘၣ် န့ၣ်လီၤ. ဒ်န့ၣ်အသိးဘံလ့ကီၢ်ဆၣ်အပူၤ ဖဲအပူၤကွံၥ်လါယနူၤအါရံၤ ၃ သီအနံၤန့ၣ် တၢ်ဒုးကဲထီၣ်တအိၣ်နးကၠံပယီၤသုးကလၢၤခးလီၤ ကျိဖးဒိၣ်အဃိ ဘၣ်သံ၀ဲနးကၠံက၀ီၤဒ့ဖိ အူသါထိ(၅၅)နံၣ်အံၤဒီးအဖိဒိၣ်မုၣ်...
KNLA သုးရိၣ်မဲခိၣ်ကျၢၢ်(၂)မၤတၢ်ထံၣ်လိၥ်သးဒီးဘျံးဒဝဲၢ်ကမျၢၢ် ခံဘျီတဘျီ
လါယနူၤအါရံၤ ၁၃သီ, ၂၀၂၅နံၣ်, ခ့ၣ်အဲးစံၣ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် KNLA သုးရိၣ်မဲခိၣ်ကျၢၢ်ခံ မၤတၢ်ထံၣ်လိၥ်သးဒီး သုးက့(၄),ဘျံးဒဝဲၢ်ကီၢ်ရ့ၣ်ကမျၢၢ်ခံဘျီတဘျီအဂ့ၢ်သ့ၣ်ညါဘၣ်လၢ KNLAသုးက့(၄)အပှၤဘၣ်မူဘၣ်ဒါအအိၣ်န့ၣ်လီၤ. ၂၀၂၅နံၣ်အတီၢ်ပူၤဒ်သိးထံဖိကီၢ်ဖိကမျၢၢ်သ့ၣ်တဖၣ် ကစီၣ်မဲၥ်စီၣ်နါဘၣ်ဃးတၢ်ဒုးတၢ်ယၤကသ့အဂီၢ်ဖဲ ၂၀၂၅နံၣ် လါယနူၤအါရံၤထီၣ်သီအဆၢကတီၢ်န့ၣ် KNLA သုးရိၣ်မဲခိၣ်ကျၢၢ်ခံ သုးခိၣ်ကျၢၢ်စိ စီၤဘီကၠီၣ်ဟဲ မၤဝဲတၢ်ထံၣ်လိၥ်သးဒီး လၢၢ်ဒိၣ်စိကီၢ်ဆၣ်ဒီးကစၢၢ်ဒိၣ်ကီၢ်ဆၣ်ပူၤ ထံဖိကီၢ်ဖိကမျၢၢ်ဃုၥ်ဒီးသုးက့,ကီၢ်ရ့ၣ်,ကီၣ်ဆၣ်တဘ့ၣ်စုၥ်စုၥ်ခိၣ်နၢ်သ့ၣ်တဖၣ်အအိၣ်အဂ့ၢ် KNLAကစၢၢ်ဒိၣ် ဘီၣ်သိၣ်သုးကျိၤအသုးကျိၤခိၣ် သုးခိၣ်ဘၣ်အူစံးဘၣ်ဝဲခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ. အဝဲစံးဝဲလၢ“မ့ၢ်လီၤ. အဝဲဟဲလၢအပူၤကွံၥ်တဘျီန့ၣ်ဟဲဝဲလၢ KNDO သုးရ့ၣ်(၇), KNLA သုးရ့ၣ်(၁၁)ဒီးသုးရ့ၣ်(၂၀၃)ဟီၣ်ကဝီၤသ့ၣ်တဖၣ်န့ၣ်လီၤ.အခဲအံၤတဘျီန့ၣ်ဟဲလီၤဝဲဒၣ် လၢသုးရ့ၣ်(၁၀)ဒီးသုးရ့ၣ်(၁၂)ဟီၣ်ကဝီၤသ့ၣ်တဖၣ်န့ၣ်လီၤ.အဝဲဟဲလီၤန့ၣ်ထံၣ်လိၥ်သးဒီးကီၢ်ရ့ၣ်,သုးက့ပှၤဘၣ်မူဘၣ်ဒါဃုၥ်ဒီးထံဖိကီၢ်ဖိကမျၢၢ်ခဲလၢၥ်န့ၣ်လီၤ.၂၀၂၅နံၣ်အတီၢ်ပူၤ ပဝဲ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ အဒုးယၤတၢ်ဟူးတၢ်ဂဲၤမ့ၢ်အါထီၣ်ဒီးဒ်သိးကမျၢၢ်တဖၣ်အသ့ဆီၣ်မဲၥ်ဆီၣ်နါဘၣ်ဃးဒုးတၢ်အိၣ်သးအဂီၢ်န့ၣ် ပဖုဘီဟဲလီၤဝဲဒၣ်န့ၣ်လီၤ.”အဂ့ၢ်စံးဝဲဒၣ်န့ၣ်လီၤ. လၢန့ၣ်အမဲၥ်ညါ ဖဲသုးခိၣ်ကျၢၢ်စိဘီကၠီၣ်ဟဲလဲၤဆူ ဘျံးဒဝဲၢ်ကီၢ်ရ့ၣ်ခံဘျီတဘျီအံၤအဆၢကတီၢ်န့ၣ် တၢ်ကွဲမုၥ်ဝဲ KTLA အိၣ်ဘၣ်ဆၣ် ပှၤတီခိၣ်ရိၣ်မဲ KTLA ဖဲသုးက့(၄)လၢအမ့ၢ် သုးခိၣ်အဲၣ်ခွံ(ကိး)ကီၤလၤဖိဒီးအပှၤတဖၣ်တဟဲဘၣ်ဆၣ်သနၥ်က့ KTLA ဆၣ်ကပီၤသုးရ့ၣ်လၢအဘၣ်တၢ်တီခိၣ်ရိၣ်မဲလၢသုးခိၣ်န့စံၤဒီးအပှၤတဖၣ်ဟဲဟံးစၢၤဝဲတၢ်ဘံၣ်တၢ်ဘၢအိၣ်အဂ့ၢ်သုးခိၣ်ဘၣ်အူတဲအါထီၣ်ဝဲဒ်အံၤစ့ၢ်ကီးန့ၣ်လီၤ. အဝဲစံးဝဲလၢ“KTLAလၢအထံၣ်လိၥ်သးဒီးဖုဘီန့ၣ်အိၣ်တနီၤန့ၣ်လီၤ.ပှၤလၢဖီၣ်စုမၤသကိးတၢ်ဒီးပှၤတဖၣ်န့ၣ်ဟဲလီၤ.မ့မ့ၢ်ကီၤလၤဖိသ့ၣ်,ပါမွ့သ့ၣ်တဖၣ်န့ၣ်တဟဲဘၣ်.ပဖုဘီဟဲလီၤန့ၣ်အဝဲသ့ၣ် သ့ၣ်ညါဝဲကဆီဒီအသိးပခိၣ်နၢ်ဘၣ်မူဘၣ်ဒါကိးအဝဲသ့ၣ်စ့ၢ်ကီးလီၤ.အဝဲသ့ၣ်တဟဲဘျီမၤတဘၣ်ဘၣ်.KTLA သုးခိၣ်န့စံၤန့ၣ် ဟံးစၢၤဝဲတၢ်ဘံၣ်တၢ်ဘၢဖဲဖုဘီဟဲလီၤဒီတကတီၢ်န့ၣ်လီၤ.”အဂ့ၢ်စံးဝဲဒၣ်န့ၣ်လီၤ. ဒ်န့ၣ်အသိး လၢခံဘျီတဘျီ KNLA သုးရိၣ်မဲခိၣ်ကျၢၢ်ခံမၤတၢ်ထံၣ်လိၥ်သးဒီးKNLAသုးရ့ၣ်(၁၀),သုးရ့ၣ်(၁၂)ဟီၣ်ကဝီၤပူၤထံဖိကီၢ်ဖိကမျၢၢ်ဘျီဝဲအံၤန့ၣ် ဘျံးဒဝဲၢ်ကီၢ်ရ့ၣ်ခိၣ် ပဒိၣ်စီၤဖျိးစိဝ့, သုးက့(၄)သုးက့ခိၣ် သုးခိၣ်ကျၢၢ်ဖိ ဖိလ့ဃုၥ်ဒီးကီၢ်ဆၣ်ဒၣ်ဝဲစုၥ်စုခိၣ်နၢ်ပှၤဘၣ်မူဘၣ်ဒါသ့ၣ်တဖၣ်ပၣ်ဃုၥ်ပၣ်ဂီၢ်ဝဲဒၣ်အဂ့ၢ်သ့ၣ်ညါဘၣ်လၢလီၢ်ကဝီၤပှၤဘၣ်မူဘၣ်ဒါအအိၣ်န့ၣ်လီၤ.
သုးရ့ၣ်(၁၁)ခိးခးပယီၤသုးကျိၤလၢဟဲထီၣ်တဖၣ်,ပယီၤသုးသံဘၣ်ဒိအိၣ်ဝဲဒီးတၢ်မၤန့ၢ်ဃုၥ်ဝဲသုးတၢ်ပီးတၢ်လီတနီၤ
လါယနူၤအါရံၤ ၁၃ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကီၢ်သူလ့ၤတၢ်ပၢဘျံးဒဝဲၢ်ကီၢ်ရ့ၣ်,တနီသရံၣ်ကီၢ်ဆၣ်ဟီၣ်ကဝီၤအပူၤဖဲလါယနူၤအါရံၤ(၉)သီအနံၤဒီးအသီ(၁၀)အနံၤ န့ၣ်ပယီၤသုးကီၣ်ကးလၢဟဲထီၣ်ဆူမိဒီၢ်သ့ၣ်တဖၣ်တၢ်ဒုးကဲထီၣ်ဝဲဒၣ်ဒီးကညီဒီကလုၥ်တၢ်ထူၣ်ဖျဲးသုးမုၢ်ဒိၣ်သုးရ့ၣ်(၁၁)တဖၣ်ဖဲ(သံခိ)သဝီအပူၤ,ပယီၤသုးကီၣ်ကးတကပၤသံဘၣ်ဒိဘၣ်ထံးအိၣ်ဝဲအါဒီးတၢ်မၤန့ၢ်ဝဲသုးတၢ်ပီးတၢ်လီတနီၤအဂ့ၢ်န့ၣ်လီၢ်ကဝီၤပှၤဘၣ်မူဘၣ်ဒါစံးဝဲန့ၣ်လီၤ. ပယီၤသုးကီၣ်ကးလၢဟဲထီၣ်ဆူမိဒီၢ်တဖၣ်အံၤမ့ၢ်လၢ(KNLA)သုးရ့ၣ်(၁၁),တၢ်ပၢၢ်ဆၢသုးပၥ်ဖှိၣ်ခိးခးအဝဲသ့ၣ်လၢကျဲဘၢၣ်စၢၤအဃိပယီၤသုးကီၣ်ကးတကပၤသံဘၣ်ဒိဘၣ်ထံးဝဲအါအသိးတၢ်မၤန့ၢ်ဃုၥ်ဝဲဒၣ်ပယီၤသုးအပှၤတၢ်စုကဝဲၤ,ကျိချံပှၥ်သ့ၣ်တဖၣ်တနီၤအဂ့ၢ်န့ၣ်တနီသရံၣ်ကီၢ်ဆၣ်ပှၤဘၣ်မူဘၣ်ဒါပဒိၣ်စီၤထံဝါစံးဝဲဒ်အံၤန့ၣ်လီၤ. "ပယီၤသုးလၢအဟဲထီၣ်တဖၣ်န့ၣ်သုးရ့ၣ်(၁၁)သုးပၥ်ဖှိၣ်ခိးခးဝဲအဃိပယီၤသုးအပှၤဘၣ်ဒိဝဲအါအါဂီၢ်ဂီၢ်ဒီးဘၣ်သံဝဲအိၣ်လီၤ. ပယီၤ အပှၤလၢအသံတနီၤန့ၣ်ခူၣ်လီၤဘၢဝဲဒၣ်ဖဲတၢ်ဒုးပျီပူၤအိၣ်ဝဲလီၤ. ဒီးက့ၤစိၥ်လီၤဝဲအပှၤသ့ၣ်တဖၣ်အိၣ်စ့ၢ်ကီးလီၤ. မ့ၢ်လၢပယီၤသုး အပှၤသံ,ဘၣ်ဒိအါအဃိတၢ်ဖိတၢ်လံၤတနီၤက့ၤစိၥ်ဝဲတန့ၢ်ဘၣ်မီၤနီၤ. အပှၤလၢအသံတဂၤစ့ၢ်ကီးက့ၤစိၥ်ဝဲန့ၢ်ဘၣ်အဃိတၢ်မၤန့ၢ်ဝဲ ကျိတခိၣ်ဃုၥ်ဒီးတၢ်ဖိတၢ်လံၤလၢအဂၤဒ်အမ့ၢ်ကျိချံပှၥ်သၣ်မ့ၢ်ဂ့ၤ,ကျိဆၣ်ဒၢမ့ၢ်ဂ့ၤတၢ်မၤန့ၢ်ဝဲဒၣ်ဒ်တၢ်ပၥ်ဖျါထီၣ်ဝဲအသိးန့ၣ်လီၤ." အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. လၢန့ၣ်အမဲၥ်ညါပယီၤသုးကီၣ်ကးသ့ၣ်တဖၣ်အံၤခီဖျိတၢ်ခိးခးအဝဲသ့ၣ်လၢကျဲဘၢၣ်စၢၤအဃိဘၣ်သံဝဲကအိၣ်လၢအဂၤ(၁၀)အဂ့ၢ်န့ၣ်ကွဲၤကလုၢ်တၢ်ကစီၣ်ပၥ်ဖျါဝဲဒၣ်အသိးဖဲလါယနူၤအါရံၤအသီ(၁၀)အနံၤန့ၣ်တၢ်ဒုးကဲထီၣ်ကဒီးဝဲစးထီၣ်လၢဂီၤခီအနၣ်ရံၣ်(၁၀)တုၤဟါခီ(၅)နၣ်ရံၣ်အိၣ်ဝဲဘၣ်ဆၣ်မ့မ့ၢ်လၢပယီၤသုးတၢ်ဘၣ်ဒိဘၣ်ထံးတခီတၢ်တသ့ၣ်ဘၣ်ညါအီၤဒံးဘၣ်န့ၣ်လီၤ. ဒ်န့ၣ်အသိးပယီၤသုးကီၣ်ကးအံၤတကီၢ်ခါအခဲအံၤန့ၣ်အိၣ်ဒံးဝဲဒၣ်ဖဲ(သံခိ)သဝီအပူၤတၢ်သူၣ်ထီၣ်တဖၣ်အဖီလၥ်ဒီးကတီၢ်အံၤအပှၤသ့ၣ်တဖၣ်အနီၣ်ဂံၢ်ကအိၣ်ဝဲအဂၤ(၈၀)ဒီး(၉၀)အဘၢၣ်စၢၤဒီးခီဖျိလီၢ်ကဝီၤတၢ်ပၢၢ်ဆၢသုးသ့ၣ်တဖၣ်လဲၤတ့ၢ်လီၤဝဲဒြိမ့ၣ်ပိၢ်အဃိပယီၤသုးအပှၤသ့ၣ်တဖၣ်သံဘၣ်ဒိဘၣ်ထံးအိၣ်ဝဲဒီးအပှၤလၢဘၣ်ဒိဘၣ်ထံးသ့ၣ်တဖၣ်စ့ၢ်ကီးက့ၤဆှၢလီၤကဒါက့ၤဝဲဒၣ်ဆူဘျံးဝ့ၢ်အိၣ်ဝဲအဂ့ၢ်န့ၣ်ပဒိၣ်စီၤထံဝါစံးဝဲအသိးသ့ၣ်ညါဘၣ်န့ၣ်လီၤ. ပယီၤသုးကျိၤလၢဟဲထီၣ်ဆူ(မိဒီၢ်)ဒီးတၢ်ခိးခးဝဲအံၤန့ၣ်မ့ၢ်ပယီၤသုးကျိၤပၥ်ဖှိၣ်သ့ၣ်တဖၣ်န့ၣ်လီၤ. သုးကျိၤအဝဲအံၤန့ၣ်စးထီၣ်လၢအ ပူၤကွံၥ်လါဒံၣ်စဲဘၢၣ်(၁၈)သီအနံၤအခါလံၤလံၤန့ၣ်ဟူးဂဲၤမၤဝဲတၢ်ထီၣ်ဒုးလၢကဟဲထီၣ်တိစၢၤမၤစၢၤဝဲ(အီၤတခိး)အဒုးယၤကျိၤလၢအိၣ်(မိဒီၢ်)ကျဲၤမုၢ်အံၤအဂီၢ်အဂ့ၢ်န့ၣ်ပှၤဘၣ်မူဘၣ်ဒါလၢအိၣ်တၢ်မဲၥ်ညါစံးဝဲအသိးသ့ၣ်ညါဘၣ်န့ၣ်လီၤ. လၢတၢ်န့ၣ်အဃိပယီၤသုးကျိၤလၢအဟဲထီၣ်သ့ၣ်တဖၣ်ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်,တၢ်ပၢၢ်ဆၢသုးပၥ်ဖှိၣ်တြီဆၢခိးခးဝဲလၢကျဲဘၢၣ်စၢၤ,ခိးထုးဝဲပယီၤသုးသိလ့ၣ်ဒီးမ့ၣ်ပိၢ်,ဟူးဂဲၤလဲၤတ့ၢ်လီၤဝဲဒြိမ့ၣ်ပိၢ်,ဒုးယၤတၢ်ဟူးတၢ်ဂဲၤဒ်န့ၣ်သ့ၣ်တဖၣ်မၤဝဲအိၣ်ဝဲခဲအံၤခဲအံၤဒီးပယီၤသုးအံၤလၢကလဲၤတုၤလၢကီၢ်ဆၢ(မိဒီၢ်)ကျဲအဂီၢ်တၢ်ဒ့ၣ်စၢၤအိၣ်တ့ၢ်ဒံးဝဲအမံးလၥ်(၂၀)ဘျဲၣ်အဂ့ၢ်န့ၣ်ပဒိၣ်စီၤထံဝါစံးအါထီၣ်ဝဲဒၣ်န့ၣ်လီၤ.
ဘံလ့ကီၢ်ဆၣ် မဲးပြ့ခံပယီၤသုးကလၢၤခးလီၤကျိဖးဒိၣ် ကမျၢၢ်ဘၣ်ဒိတဂၤ,ဟံၣ်ဟးဂီၤ(၆)ဖျၢၣ်
လါယနူၤအါရံၤ ၁၃ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁) ဘံလ့ကီၢ်ဆၣ်အပူၤ ဖဲမဟါမုၢ်နၤခီအဆၢကတီၢ် မဲးပြ့ခံပယီၤသုးကလၢၤခးလီၤကျိဖးဒိၣ် အဃိ ကျိဖးဒိၣ်အက့အခီဘၣ်၀ဲအံစူၢ်ခံကမျၢၢ်တဂၤတဘၣ်ယိၣ်တအိၣ်ဒီး ဟံၣ်တၢ်သူၣ်ထီၣ်ဟးဂီၤ၀ဲဒၣ်(၆)ဖျၢၣ်အဂ့ၢ်န့ၣ် သ့ၣ်ညါဘၣ်လၢသုးက့ပှၤဘၣ်မူဘၣ်ဒါအအိၣ်န့ၣ်လီၤ. ဖဲမဟါလါယနူၤအါရံၤ ၁၂ သီ မုၢ်နၤခီ ၁၀ နၣ်ရံၣ်ဃၣ်ဃၣ်အဆၢကတီၢ်န့ၣ် မဲးပြ့ခံပယီၤသုးခီၣ်ချ့သုးရ့ၣ်(ခမရ-၄၀၅)သုးရ့ၣ်အံၤ ခးလီၤကျိဖး ဒိၣ်(၃)ဖျၢၣ်ဆူအံစူၢ်ခံကရူၢ်ပူၤအဃိ အံစူၢ်ခံသ၀ီဖိဘၣ်ဒိဒီးပှၤကမျၢၢ်ဟံၣ်တၢ်သူၣ်ထီၣ် ဘၣ်ဟးဂီၤကဲထီၣ်၀ဲဒၣ်ဒ်အံၤ လီၤအဂ့ၢ်န့ၣ် (သုးက့ ၁) သုးက့ခိၣ် သုးခိၣ်ကျၢၢ်ဖိ စီၤစိမၠ့ၣ်ထွ့ စံး၀ဲန့ၣ်လီၤ. အ၀ဲစံး၀ဲလၢ“ဖဲမနၤ အနၣ်ရံၣ်(၁၀)န့ၣ်ပယီၤသုးလၢမဲးပြ့ခံန့ၣ်ခးလီၤကျိဖးဒိၣ်လၢအံစူၣ်ခံသ၀ီပူၤ. ပှၤသ၀ီဖိဘၣ်ဒိတဂၤန့ၣ် ကျိဖးဒိၣ်အက့အခီဘၣ်တပျၥ်တစဲးဖိလီၤ.ဟံၣ်ဟးဂီၤ၀ဲဒၣ်(၆)ဖျၢၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီ တၢ်ကစီၣ်ဖဲတဂီၤ အံၤန့ၣ်လီၤ. ဒ်န့ၣ်အသိးဖဲအပူၤကွံၥ်လါယနူၤအါရံၤ ၅ သီ ဟါခီ ၄ နၣ်ရံၣ်ဒီး ၅ နၣ်ရံၣ်အဆၢကတီၢ်န့ၣ်စ့ၢ်ကီး မဲးပြ့ခံပယီၤသုးတဒူၣ်ဃီ၀ဲအံၤ ခးလီၤ၀ဲကျိဖးဒိၣ်(၉)ဖျၢၣ် လီၤတဲၥ်ပိၢ်ဖးထီၣ်၀ဲလၢအံစူၢ်ခံသ၀ီပူၤအဃိ ဘၣ်သံ၀ဲဒၣ်ပှၤကမျၢၢ်ပနၢ်(၃)ဒု,ကျီၢ်(၁)ဒုဒီး မဲးတဲးလဲး(၂)ဒုကဲထီၣ်တ့ၢ်အသးဒံးအဂ့ၢ်န့ၣ် သ့ၣ်ညါဘၣ်လၢကီၢ်ရ့ၣ်တၢ်မၤနီၣ်စရီအပူၤန့ၣ်လီၤ. မဲးပြ့ခံသုးကလၢၤအံၤစးထီၣ်ဖဲလါယနူၤအါရံၣ်ထီၣ် ၁ သီအနံၤန့ၣ် ဟီၣ်က၀ီၤကညီဒီကလုၥ်ဂၢၤသးကရၢ(KNDO) သုးရ့ၣ်(၂) သုးပၥ်ဖှိၣ် လဲၤခးစဲးပြဲး၀ဲဒီးတၢ်ဒုးစ့ၢ်ကီးကဲထီၣ်အဃိ ဖဲန့ၣ်ပယီၤသုးကဘီယူၤဟဲခးလီၤတၢ်အမဲၥ်ညါ ပယီၤသုးလၢအိၣ်...
မဲးပြ့ခံသုးကလၢၤခိၣ်ဃၢၤကမျၢၢ်လၢဃ့ၢ်ထီၣ်တဖၣ်လိၣ်ဘၣ်တၢ်ဆီၣ်ထွဲမၤစၢၤအဂ့ၢ် ပှၤဘၣ်မူဘၣ်ဒါစံး၀ဲ
လါယနူၤအါရံၤ ၁၂ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ် (သုးက့ ၁)ဘံလ့ကီၢ်ဆၣ်အပူၤ ခီဖျိဒုးယၤတၢ်ဘၣ်ဂံၥ်ဂူၥ်အိၣ်ထီၣ်အဃိ ပှၤကမျၢၢ်လၢအိၣ်မဲးပြ့ခံပယီၤသုးကလၢၤအခိၣ်အဃၢၤလၢအဃ့ၢ်ထီၣ်တဖၣ်အံၤလိၣ်ဘၣ်၀ဲတၢ်ဆီၣ်ထွဲမၤစၢၤဃုၥ်ဒီးအိၣ်ဆိးလီၢ်ကျဲအဂ့ၢ်န့ၣ် ကီၢ်ရ့ၣ်ပှၤဘၣ်မူဘၣ်ဒါဒီးလီၢ်က၀ီၤပှၤဘၣ်မူဘၣ်ဒါစံး၀ဲအသိး သ့ၣ်ညါဘၣ်န့ၣ်လီၤ. စးထီၣ်ဖဲလါယနူၤအါရံၤထီၣ်သီသီအံၤန့ၣ် ဟီၣ်က၀ီၤကညီဒီကလုၥ်ဂၢၤသးကရၢ(KNDO)သုးပၥ်ဖှိၣ် လဲၤခးစဲးပြဲး၀ဲမဲးပြ့ခံ ပယီၤသုးကလၢၤအံၤဒီး ဖဲန့ၣ်ခီဖျိပယီၤသုးကဘီယူၤဟဲက့ၤခးလီၤကဒါတၢ်လၢသုးကလၢၤအခိၣ်အဃၢၤအဃိ ဒူသ၀ီတစှၤန့ၢ် (၅)ဖျၢၣ်လၢအိဘူးဖဲန့ၣ်တဖၣ်ဘၣ်ဃ့ၢ်ထီၣ်၀ဲဒီး လၢပှၤသ့ၣ်တဖၣ်အံၤအဂီၢ်လိၣ်ဘၣ်၀ဲဒၣ်ဂံၢ်ခီၣ်ထံးတၢ်အီၣ်တၢ်အီ, တၢ်ကူတၢ်သိး ဒီးတၢ်အိၣ်တၢ်ဆိးလီၢ်ကျဲ အဂ့ၢ်န့ၣ် သ့ၣ်ညါဘၣ်န့ၣ်လီၤ. ဘၣ်ဃးတၢ်ဂ့ၢ်အံၤန့ၣ် ဒူသထူၣ်ကီၢ်ရ့ၣ် နဲၣ်ရွဲၣ် ပှၤကတိၤတၢ်ပၢ ပဒိၣ်စီၤအ့နဲၤ စံး၀ဲလၢ“ပှၤသ့ၣ်တဖၣ်အံၤဒိးန့ၢ်တၢ်ဆီၣ်ထွဲတအိၣ် နီမံၤဒံးဘၣ်..ဘၣ်မနုၤလဲၣ်အ၀ဲသ့ၣ်ဟးအိၣ်လၢပှၤဟံၣ်ပှၤဃီအဃိတၢ်ဆီၣ်ထွဲမၤစၢၤလိၣ်အနီၢ်ကီၢ်လီၤ.ခဲအံၤစ့ၢ်ကီးတၢ်ဂိၢ်ဆါမး, မ့၀ံၤလၢအီၣ်အီအိၣ်ဆိးသ့ၣ်မတၤလိၣ်ခဲလၢၥ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲ တနံၤအံၤန့ၣ်လီၤ. ဒ်လီၢ်က၀ီၤပှၤဘၣ်မူဘၣ်ဒါစံး၀ဲအသိးန့ၣ် မဲးပြ့ခံသုးကလၢၤခိၣ်ဃၢၤဒူသ၀ီလၢအဃ့ၢ်ထီၣ်သ့ၣ်တဖၣ်န့ၣ်မ့ၢ်၀ဲ မဲးပြ့ခံသ၀ီ, ကစၢၢ်ဖိ, အံစူၢ်ခံ,စံကိ,ညၣ်ဆှူၣ်ထၣ်,ပဒၣ်တီၢ်သ၀ီ,ဘီပီၢ်ထၣ်သ၀ီဖိကမျၢၢ်သ့ၣ်တဖၣ်ဒီးဒ်န့ၣ်အသိးကမျၢၢ်သ့ၣ်တဖၣ်အံၤဘံလ့ကီၢ်ဆၣ်ပူၤ ဒူသ၀ီအမဲၥ်ညါ တနီၤန့ၣ်လဲၤလီၤစံၣ်အိၣ်၀ဲဒၣ်လၢကၠဲးထိၣ်ကီၢ်ဆၣ်ဒီး ချၢၣ်လွံၢ်ထူၣ်ကီၢ်ရ့ၣ်(သုးက့ ၃) ဆီထံးကီၢ်ဆၣ်ပူၤ အိၣ်၀ဲဒၣ်တနီၤအဂ့ၢ်န့ၣ် သ့ၣ်ညါဘၣ်န့ၣ်လီၤ. တကီၢ်ခါခဲအံၤပှၤကမျၢၢ်လၢအလဲ၄ဃ့ၢ်အိၣ်ကၠဲးထိၣ်ကီၢ်ဆၣ်ပူၤတဖၣ်အနီၢ်ဂံၢ်ကအိၣ်၀ဲ(၂၂၀)ဘျဲၣ်ဒီး လၢပှၤသ့ၣ်တဖၣ်အံၤအဂီၢ် လိၣ်ဘၣ်၀ဲတၢ်ဆီၣ်ထွဲမၤစၢၤအသိး ခဲအံၤဘၣ်စ့ၢ်ကီးလၢတၢ်ဂိၢ်ဆါတၢ်ချံၣ်ဒိၣ်မးအဃိ လၢအ၀ဲသ့ၣ်အဂီၢ်တၢ်သ့အိၣ်အသိး ကီၢ်ဆၣ်ပှၤဘၣ်မူဘၣ်ဒါကဟ့ၣ်မၤစၢၤစိဃၥ်၀ဲတၢ်ကူတၢ်ကၤအဂ့ၢ်န့ၣ် ကၠဲးထိၣ်ကီၢ်ဆၣ် ပှၤဘၣ်မူဘၣ်ဒါတဂၤ စံးဘၣ်ခ့ၣ်အဲးစံၣ်-ကညီတၢ်ကစီၣ် ဒ်အံၤန့ၣ် လီၤ. အ၀ဲစံး၀ဲလၢ“ပှၤလၢအဟဲစံၣ်လၢပဟီၣ်က၀ီၤပူၤတဖၣ်ဒုအိၣ်၀ဲဒၣ်လၢသီခါဖၠၣ်ပူၤတနီၤ.တနီၤန့ၣ်သ့ၣ်ညါပှၤဖဲန့ၣ်အိၣ်တနီၤလီၤ. တကးဒံးဘၣ်နးကၠံသ၀ီဒီးစွ့ၣ်လီအ့သ၀ီဖိနါက့ဟဲစံၣ်အိၣ်လၢပအိၣ်စ့ၢ်ကီးအိၣ်လီၤ.ဘၣ်ဆၣ်အိၣ်ပူၤဒံပူၤဂၤလီၤ.ပှၤဟဲစံၣ်အိၣ်ဖဲအံၤသ့ၣ်တဖၣ်အံၤခီဖျိအိၣ်ဘူးဒီပှၤအဃိခဲအံၤပကလဲၤဟ့ၣ်မၤစၢၤအ၀ဲသ့ၣ်ဆ့ကူဆ့ကၤ.ခဲအံၤတၢ်ဂိၢ်တၢ်ချံၣ်ဒိၣ်မးအ၀ဲသ့န့ၣ်ကူကၤ တပၣ်နီမံၤဘၣ်.တၢ်အီၣ်တၢ်အီစ့ၢ်ကီးတဘၣ်ဂီၢ်ဖိးဒ့ဘၣ်အဖီခိၣ် လၢတၢ်သ့အိၣ်ဒီးပှၤအသိးပကဆီၣ်တခူထီၣ်စၢၤတစဲးတမွဲးမီၤနီၤ. တနံၤညါအံၤဟဲအါထီၣ်တဘျုးဂၤဒံး” အဂ့ၢ်န့ၣ်...
KNU ကီၢ်ဆၣ်စံၣ်ညီၣ်ကွီၢ်အဖိခွါလၢတၢ်မၤသံပၥ်ခူသူၣ်အီၤအံၤမ့ၢ်၀ဲ(KTLA)အတၢ်မၤလီၤအဂ့ၢ် ဘျံးဒ၀ဲၢ်ကီၢ်ရ့ၣ်ပှၤဘၣ်မူဘၣ်ဒါစံး၀ဲ
လါယနူၤအါရံၤ ၁၂ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဘျံးဒ၀ဲၢ်ကီၢ်ရ့ၣ်(သုးက့ ၄)ဟီၣ်က၀ီၤအပူၤ ကီၢ်ဆၣ်စံၣ်ညီၣ်ကွီၢ်အဖိခွါအသံစိၣ်လၢ တၢ်က့ၤထံၣ်၀ဲဖဲအပူၤကွံၥ်လါယနူၤအါရံၤ ၁၀ သီ လၢကစၢၢ်ဒိၣ်ကီၢ်ဆၣ် မုၢ်ထီၣ်ဟီၣ်က၀ီၤပူၤအံၤ မ့ၢ်၀ဲကီၢ်သူလ့ၤသုးမုၢ်ဒိၣ် (KTLA)မၤသံ၀ဲလီၤ အဂ့ၢ်န့ၣ် ကီၢ်ရ့ၣ်နဲၣ်ရွဲၣ် ပဒိၣ်စီၤအဲၣ်နၤ စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. စီၤကညီဒိၣ်စိလၢအဘၣ်တၢ်မၤသံအီၤအံၤ အသးနံၣ်အိၣ်၀ဲ(၂၈)နံၣ် မ့ၢ်၀ဲခ့ၣ်အဲၣ်ယူၣ် (သုးက့ ၄) လၢၢ်ဒိၣ်စိကီၢ်ဆၣ် စံၣ်ညီၣ်ကွီၢ် စီၤကဲဒိၣ် အဖိခွါဒီး ဖဲအပူၤကွံၥ်လါဒံၣ်စ့ဘၢၣ် ၂၀ သီအနံၤန့ၣ် လၢကမၤအဖိနံၤအိၣ်ဖျဲၣ်ဆၢက့ၤအံၤအဂီၢ်ဖဲအ၀ဲလဲၤ ပှ့ၤတၢ်လၢကျဲအခါ လီၤမၢ်၀ဲလၢကျဲပူၤဒီး တၢ်ဆၢကတီၢ်တံၥ်တၥ်အသီ(၂၀)မး တၢ်က့ၤထံၣ်အီၤဖဲ၀းကူၣ်သ၀ီ ထံကမျၢပူၤအဂ့ၢ်န့ၣ် သ့ၣ်ညါဘၣ်န့ၣ်လီၤ. စီၤကညီဒိၣ်စိအံၤ ညီနုၢ်န့ၣ်မ့ၢ်ပှၤတဂၤလၢအဟးထီၣ်လ့ၢ်လိၤ၀ဲဖဲမုၢ်ထီၣ်ဟီၣ်က၀ီၤပူၤအံၤလၢဆဲးကၢးဒီး တၢ်လီၢ်လၢတၢ်က့ၤထံၣ်၀ဲ အသံစိၣ်အံၤစ့ၢ်ကီး အိၣ်ဘူး၀ဲဒီးကီၢ်သူလ့ၤသုးမုၢ်ဒိၣ်(KTLA) ဆၣ်ကဆီသုးတြိၤ သုးရ့ၣ်(၃)တၢ်သမံသမိးတြဲၤ အဂ့ၢ်န့ၣ် ခ့ၣ်အဲၣ်ယူၣ် စံး၀ဲန့ၣ်လီၤ. ဘၣ်ဃးတၢ်ဂ့ၢ်အံၤန့ၣ် ဘျံးဒ၀ဲၢ်ကီၢ်ရ့ၣ် နဲၣ်ရွဲၣ် ပဒိၣ်စီၤအဲၣ်နၤ စံး၀ဲလၢ“ဖဲလါယနူၤအါရံၤ ၁၀ အနံၤန့ၣ် လၢ၀းကူၣ်သ၀ီန့ၣ် တၢ်ထံၣ်န့ၢ်က့ၤအစိၣ်န့ၣ် တၢ်ကွံၥ်လီၤအီၤလၢထံပူၤလီၢ်လံၤအပူၤမီၤနီၤ.ပှၤလၢအမၤသံတၢ်န့ၣ်မ့ၢ်ဒၣ်(KTLA)အပှၤလီၤမီၤ. တၢ်လီၢ်ဖဲန့ၣ်အိၣ်ဒၣ်(KTLA)လီၤ.(PDF)မ့အိၣ်နါက့တမ့ၢ်လၢအကမၤသံ၀ဲဘၣ်.အ၀ဲန့ၣ်အဒုၣ်အဒါတအိၣ်ဒီးပှၤဂၤနီတဂၤဘၣ်.ဖဲန့ၣ်နါက့ပယီၤသုးတအိၣ်စ့ၢ်ဘၣ်.အဃိန့ၣ်ပှၤလၢအဟူးဂဲၤဖဲန့ၣ်မ့ၢ်ဒၣ်(KTLA)လီၤ.နါက့နမ့တဲန့ၣ်တမ့ၢ်အအၢၣ်လီၤအတၢ်ကမၣ်ဘၣ်.တၢ်မ့ၢ်တၢ်တီန့ၣ်မုၢ်တနံၤကဖျါထီၣ်၀ဲလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတဂီၤအံၤန့ၣ်လီၤ. လၢန့ၣ်အမဲၥ်ညါစီၤကညီဒိၣ်စိအံၤ အပူၤကွံၥ်မ့ၢ်တ့ၢ်၀ဲဒၣ်ခ့ၣ်အဲၣ်ယူၣ်(သုးက့...