လါမ့ၤ ၂၆ သီ, ၂၀၂၆ နံၣ်, ခ့ၣ်အဲးစံၣ်
လၢဒူပျၥ်ယၥ်ကီၢ်ရ့ၣ်(သုးက့ ၆)ရၤမတံကီၢ်ဆၣ် တီနီၢ်မုၢ်ထီၣ် ဆိၣ်စံမၠဲၣ်ဟီၣ်ကဝီၤ တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ် (DKBA) အသုးဝဲၤလီၢ်ခိၣ်သ့ၣ်တၢ်လီၢ်န့ၣ် (DKBA)တီခိၣ်ရိၣ်မဲမၤကဒီးဝဲ (၂)ဝီတဝီ တၢ်ပျၢ်လီၤက့ၤခိၣ်နၢ်ကံၢ်စီတၢ်မၤလိမူး တၢ်ရဲၣ် တၢ်ကျဲၤအံၤဖဲတနံၤအံၤလါမ့ၤ ၂၆ သီ ဂီၤခီအဆၢကတီၢ်န့ၣ်လီၤ.
တၢ်ပျၢ်လီၤက့ၤခိၣ်နၢ်ကံၢ်စီတၢ်မၤလိဘျီဝဲအံၤန့ၣ် ပှၤဖျိထီၣ်ဝဲခဲလၢၥ်(၁၂၆)ဂၤဒီး တၢ်ရဲၣ်တၢ်ကျဲၤဘျီဝဲအံၤအပူၤစ့ၢ်ကီး (DKBA) သုးရိၣ်မဲခိၣ်ကျၢၢ် သုးခိၣ်ကျၢၢ်ဒိၣ်စိ စီၤစွ့ၤဝၣ် အမဲၥ်ညါ သုးခိၣ်စီၤဆါအီၤ, သုးခိၣ်စီၤဖါဘျဲၣ်,သုးခိၣ်စီၤစ့ၤဝ့ ဃုၥ်ဒီးခိၣ်နၢ်လၢ အဂၤ တဖၣ်ဟဲထီၣ်ဝဲဒၣ်န့ၣ်လီၤ.
ဘၣ်ဃးတၢ်မၤဝဲတၢ်ပျၢ်လီၤက့ၤခိၣ်နၢ်ကံၢ်စီတၢ်မၤလိဘျီဝဲအံၤန့ၣ် (DKBA)သုးရိၣ်မဲခိၣ်ကျၢၢ် သုးခိၣ်ကျၢၢ်ဒိၣ်စိ စီၤစွ့ၤဝၣ် စံးဝဲလၢ “စးထီၣ်(၂၀၂၆)ယစးထီၣ်ယဟံထီၣ်မူဒါန့ၣ်ယအဲၣ်ဒိးလၢသုးဖိသံၣ်ဖိခဲလၢၥ်အကံၢ်အစီကအိၣ်လၢတၢ်ဟးထီၣ်ဟးလီၤလၢဒူဖိသဝီ ဖိအကျါမ့ၢ်ဂ့ၤ,သုတကဲထီၣ်တၢ်ဘၣ်ဂံၥ်ဂူၥ်ဒီးကမျၢၢ်တဂ့ၤအဂီၢ်န့ၣ်ပအိးထီၣ်ဝဲတၢ်မၤလိလၢလီၢ်ခၢၣ်သးအံၤလီၤ.မ့မ့ၢ်လၢညါတဝီ ဒီးအခဲအံၤန့ၣ်အက့ၤလီၤန့ၣ်အါဒၣ်တက့ၢ်ယကွၢ်လၢအိၣ်တၢ်ဃံးဃံးဃီၣ်ဃီၣ်,အလဲၤတၢ်က့ၤတၢ်အိၣ်ဒီးတၢ်သိၣ်တၢ်သီဖီလၥ်န့ၣ် အကိညၢ်ထီၣ်ဖးဒိၣ်ညါမီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ခိၣ်နၢ်ကံၢ်စီတၢ်မၤလိလၢ(DKBA)လီၢ်ခၢၣ်သးဟ့ၣ်ဝဲဒၣ်(၂)ဝီတဝီခဲအံၤန့ၣ် တၢ်ဆၢကတီၢ်တံၥ်တၥ်ဝဲ(၃)နွံဒီး ဒ်န့ၣ်အသိးလၢ ကဟဲအံၤစ့ၢ်ကီးတၢ်ရဲၣ်တၢ် ကျဲၤအိၣ်လၢတၢ်ကဆဲးဟ့ၣ်ဝဲတၢ်မၤလိအံၤဒီးလၢကဟဲတၢ်မၤလိအံၤအဂီၢ်န့ၣ်တၢ်တိၥ်ပၥ်ဝဲလၢ ကမၤဝဲဆၢကတီၢ်လၢ (၄၅)သီအတီၢ်ပူၤအဂ့ၢ်န့ၣ် သုးခိၣ်ကျၢၢ်ဒိၣ်စိ စီၤစွ့ၤဝၣ် စံးအါထီၣ်ဝဲန့ၣ်လီၤ.
တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်-DKBA ကရူၢ်အံၤ အပူၤကွံၥ်ဘၣ်ဃးခိၣ်နၢ်ကံၢ်စီတၢ်မၤလိအံၤန့ၣ်တၢ်မၤဝဲတအိၣ်ဝဲ ဘၣ် ဘၣ်ဆၣ်စးထီၣ်ဖဲသုးခိၣ်စီၤစွ့ၤဝၣ် ဟံထီၣ်ဖီၣ်ထီၣ်က့ၤမူဒါလီၢ်လၤလၢသုးရိၣ်မဲခိၣ်ကျၢၢ်လီၢ်ဝံၤလီၢ်ခံန့ၣ် ဒ်သိးကရူၢ်ကရၢပူၤ တၢ်လဲၤထီၣ်လဲၤထီဒီးအကံၢ်အစီကလၢပှဲၤအါထီၣ်အဂီၢ် ဘၣ်တၢ်မၤဝဲတၢ်မၤလိအံၤဟဲအိၣ်ထီၣ်ဝဲန့ၣ်လီၤ.
ခိၣ်နၢ်ကံၢ်စီတၢ်မၤလိလၢတၢ်ဟ့ၣ်ဝဲအံၤန့ၣ် လၢသုးဖိသံၣ်ဖိဒီးတၢ်ကရၢကရိပူၤအဂီၢ် ကဲထီၣ်တၢ်တိစၢၤမၤစၢၤအဃိ ပထံၣ်လၢ တၢ်မၤလိအံၤဂ့ၤဝဲဒီးကဲဘျုးကဲဖှိၣ်ဝဲအဂ့ၢ်န့ၣ် ဆိၣ်စံမၠဲၣ်ကရူၢ်ခိၣ် မါဝ့လဲၤ စံးဝဲန့ၣ်လီၤ.
“တၢ်မၤဝဲတၢ်မၤလိတခါအံၤယထံၣ်လၢအဖးဂ့ၤညါမီၤ.ဘၣ်စံးဘျုးစံးဖှိၣ်ဘၣ်ဖုစွ့ၤဝၣ်ဖးဒိၣ်ညါ.ခါဆူမဲၥ်ညါအဝဲသ့ၣ်မ့မၤဝဲတၢ်မၤဝဲတၢ်မၤတခါအံၤတပတီၢ်ဘၣ်တပတီၢ်န့ၣ်ကဂ့ၤလၢအဝဲသ့ၣ်အဂီၢ်ဖးအါညါလီၤ.တၢ်လီၢ်တၢ်ကျဲဒီးအဂ့ၤဒိၣ်ထီၣ်,ဘၣ်ဃးလၢထံရူၢ်ကီၢ်သဲးတကပၤစ့ၢ်ကီးအဝဲသ့ၣ်ကသ့ၣ်ညါနၢ်ပၢၢ်အါထီၣ်ဒီဒူၣ်ညါမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဒ်န့ၣ်အသိးဘၣ်ဃးခိၣ်နၢ်ကံၢ်စီတၢ်မၤလိအံၤန့ၣ်ဖဲအပူၤကွံၥ်လါဖ့ၤဘြူၤအါရံၤအခါ အဆိကတၢၢ်တဘျီ (DKBA)မၤဒံးဝဲ (၁)တဝီ တၢ်ပျၢ်လီၤက့ၤခိၣ်နၢ်ကံၢ်စီတၢ်မၤလိအံၤဒံးဒီး အခါဖဲန့ၣ်ပှၤဖျိထီၣ်ဝဲအဂၤ(၉၀)ဒံးန့ၣ်လီၤ.
သုးဂ့ၢ်ဝီတကပၤကံၢ်စီအမဲၥ်ညါလၢတၢ်ကရၢကရိအပူၤဒီးကမျၢၢ်အဂီၢ်ဒ်သိးကကဲထီၣ်တၢ်တိစၢၤမၤစၢၤအဂီၢ် (DKBA) အိးထီၣ်ဝဲ(မဲဒံး)ကသံၣ်တၢ်မၤလိအံၤလၢသုးဖိသံၣ်ဖိအဂီၢ်ဒီး ဖဲအပူၤကွံၥ်လါမးရှး ၂၀ သီအနံၤန့ၣ်တၢ်မၤဝဲတၢ်ဟ့ၣ်လီၤက့ၤ လံၥ်အုၣ်သးတၢ်ရဲၣ်တၢ်ကျဲၤအံၤဖဲဆိၣ်စံမၠဲၣ်အံၤဒံးန့ၣ်လီၤ.
