Home တၢ်ကစီၣ် တၢ်မုာ်တၢ်ခုၣ်တၢ်လဲၤကျဲအဂီၢ် (NCA) အံၤ အဂ့ၤကတၢၢ်လီၤအဂ့ၢ် ဒူပျာ်ယာ်ကီၢ်ရ့ၣ်ခိၣ်စံး၀ဲ

တၢ်မုာ်တၢ်ခုၣ်တၢ်လဲၤကျဲအဂီၢ် (NCA) အံၤ အဂ့ၤကတၢၢ်လီၤအဂ့ၢ် ဒူပျာ်ယာ်ကီၢ်ရ့ၣ်ခိၣ်စံး၀ဲ

450
0

နိၣ်၀့ဘၢၣ် ၂၉ သီ၊ ၂၀၁၈နံၣ်။ စီၤမၠၣ်အူသၣ်

တၢ်မုာ်တၢ်ခုၣ်တၢ်လဲၤကျဲအံၤအပူၤ ထံကီၢ်ဒီဘ့ၣ်တၢ်ပတုာ်တၢ်ခးအလံာ်ဃံးဃာ်(NCA)အံၤမ့ၢ်၀ဲကျဲအဂ့ၤကတၢၢ်တဘိ လၢကညီဒီကလုာ်အဂီၢ်လီၤအဂ့ၢ် ဒူပျာ်ယာ် ကီၢ်ရ့ၣ်ခိၣ်ပဒိၣ်စီၤရွ့ၣ်မီစံးလီၤ၀ဲဖဲ(ခ့ၣ်အဲၣ်ယူၣ်)ကညီဒီကလုာ်စၢဖှိၣ် ကရၢ ဒူပျာ်ယာ်ကီၢ်ရ့ၣ် ၀ီၢ်ရီကီၢ်ဆၣ် (၄)ဘျီတဘျီ တၢ်အိၣ်ဖှိၣ်ဖးဒိၣ် ဖဲနိၣ်၀့ဘၢၣ်၂၆သီအနံၤန့ၣ်လီၤႉ

“(NCA) တၢ်လဲၤကျဲအံၤမ့ၢ်၀ဲကျဲအဂ့ၤကတၢၢ်တဘိလၢကညီဒီကလုာ်အဂီၢ်န့ၣ်လီၤႉ (ခ့ၣ်အဲၣ်ယူၣ်)တီခိၣ်ရိၣ်မဲ၀ဲဒီး မၤ၀ဲတၢ် ထံၣ်လိာ်သးတဖၣ်အံၤန့ၣ် ကန့ၢ်တၢ်အစၢလီၤႉ တၢ်လၢတဒ်သိးတဖၣ်၊ တၢ်တဘၣ်ဘျီးဘၣ်ဒါ တဖၣ်အံၤလိၣ်လၢ တၢ်ကတဲသ ကိးအီၤလၢစီၤနီၢ်ခိၣ်န့ၣ်လီၤႉ လိၣ်လၢတၢ်ပာ်သးကထီတုၤဒိး န့ၢ်တၢ်အစၢန့ၣ်လီၤ”အဂ့ၢ် ပဒိၣ်ရွ့ၣ်မီစံးလီၤ၀ဲဖဲတၢ်အိၣ်ဖှိၣ်ဖးဒိၣ်တၢ်အိးထီၣ်မူးန့ၣ်လီၤႉ

လၢန့ၢ်အမဲာ်ညါ(၆၃)နံၣ်အတီၢ်အပူၤ ကလုာ်ဒူၣ်သ့ၣ်တဖၣ် တဒူၣ်ဒီးတဒူၣ်ပာ်ပနီၣ်လိာ်အသးလၢဒုၣ်ဒါဒီး ခးလိာ်အသးအဖီခိၣ် ဒိးန့ၢ်ဘၣ်တၢ်အစၢလၢကမျၢၢ်သ့ၣ်တဖၣ် သဂၢၢ်ဘၣ်တၢ်ကီတၢ်ခဲဒီး (ခ့ၣ်အဲၣ်ယူၣ်)ကညီဒီကလုာ်စၢဖှိၣ်ကရၢဆၢတဲာ်လီၤ၀ဲကျဲအံၤန့ၣ် ခဲလၢာ်ကြၢးလူၤပိာ်ထွဲန့ၣ်လီၤအဂ့ၢ်ပဒိၣ်စီၤရွ့ၣ်မီဆီၣ်တခူထီၣ်၀ဲန့ၣ်လီၤႉ

လါနိၣ်၀့ဘၢၣ် ၂၆ သီ တၢ်အိၣ်ဖှိၣ်ဖးဒိၣ်တၢ်ဃုထၢ တၢတသီအပူၤ ဟ့ၣ်တၢ်ယူးယီၣ်ဆူကညီနီၣ်တယၢ်ဒီး မၤထူရၤခိၣ်နၢ်သိၣ်ဒူတဖၣ်၊ ၦၤပၢၤလီၢ်ဆ့ၣ် ကတိၤအီးထီၣ်တၢ်၊ တၢ်ဖးဖျါထီၣ်ထီဘိကမံးတံာ်တၢ်ပာ်ဖျါသ့ၣ်တဖၣ်အဖီခိၣ် ခၢၣ်စးသ့ၣ်တဖၣ်တၢ်ပီၣ်တဲသကိးပာ်ဂၢၢ်ပာ်ကျၢၤက့ၤ၀ဲန့ၣ်လီၤႉ

ကညီဂ့ၢ်၀ီကမံတံး(KAC)နဲၣ်ရွဲၣ်စီၤကၠီၣ်စွၣ်စံး၀ဲလၢ“(NCA) တၢ်လဲၤကျဲအံၤလီၤကဒိးန့ၢ်၀ဲတၢ်မုာ်တၢ်ခုၣ်လီၤန့ၣ်ၦၤအါဂၤတူၢ်လိာ်၀ဲလီၤႉ တၢ်ဆှုၣ်တၢ်မဲလၢအိၣ်လၢအပူၤသ့ၣ်တဖၣ် တၢ်မ့ၢ်မၤဘၣ်အီၤ၀ံၤတခီဂ့ၤလီၤႉ မ့ၢ်လဲၤဒ်သိးကတီၢ်အံၤတၢ်လဲၤကျဲဒုတစိၤသးတန့ၢ်ဘၣ်ႉ ( NCA )အပူၤ တၢ်ဒုးလိၣ်ထီၣ်ဖးထီၣ်သ့ၣ်တဖၣ်ပၣ်ဃုာ်၊ လၢကမၤအဂီၢ်တဂၤဒီးတဂၤယီၣ်လိာ်အသး (အားနာ)ပၣ်ဃုာ်၀ဲလီၤႉ”အဂ့ၢ် စံးဘၣ် ခ့ၣ်အဲးစံၣ်န့ၣ်လီၤႉ

လၢတၢ်အိၣ်ဖှိၣ်ဖးဒိၣ်တၢ်ဃုထၢ၀ဲန့ၣ်အပူၤ (ခ့ၣ်အဲၣ်ယူၣ်) ကီၢ်ရ့ၣ်ပတီၢ်ၦၤဘၣ်မူဘၣ်ဒါတဖၣ်၊ ကီၢ်ဆၣ်ၦၤဘၣ်မူဘၣ်ဒါတဖၣ်၊ သ၀ီကရူၢ် ၄၀ဘျဲၣ် ပၢပြးခိၣ်တဖၣ်ဒီး လီၢ်က၀ီၤကမျၢၢ် ၄၀၀ဘျဲၣ် ဟဲထီၣ်၀ဲတၢ်အိၣ်ဖှိၣ်အံၤန့ၣ်လီၤႉ