Home တၢ်ကစီၣ် ပျဲလိၥ်ကျိမုၢ်နုၥ်(သုးက့ ၃)ဟီၣ်ကဝီၤ ဒုးယၤတၢ်ဖ့ၣ်စၢက့ၤဆူၣ်ထီၣ်ကဒါအဃိ ကၠိဘၣ်ပံးသးအဖျၢၣ်(၁၀)ဘျဲၣ်

ပျဲလိၥ်ကျိမုၢ်နုၥ်(သုးက့ ၃)ဟီၣ်ကဝီၤ ဒုးယၤတၢ်ဖ့ၣ်စၢက့ၤဆူၣ်ထီၣ်ကဒါအဃိ ကၠိဘၣ်ပံးသးအဖျၢၣ်(၁၀)ဘျဲၣ်

3
0

လါနိၣ်ဝ့ဘၢၣ် ၁၉ သီ, ၂၀၂၆ နံၣ်, ခ့ၣ်အဲးစံၣ်

လၢခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်(သုးက့ ၃)လၢၢ်ဒိၣ်ကီၢ်ဆၣ် ပျဲလိၥ်ကျိမုၢ်နုၥ်တကပၤန့ၣ် ခီဖျိလၢဒုးယၤတၢ်ဖ့ၣ်စၢက့ၤဆူၣ်ထီၣ်ကဒါဝဲအဃိ လီၢ်ကဝီၤပူၤကၠိအဖျၢၣ်(၁၀)ဘျဲၣ်ဘၣ်ပံးဃၥ်သးအဂ့ၢ်န့ၣ် သ့ၣ်ညါဘၣ်လၢ KECD ပှၤဘၣ်မူဘၣ်ဒါအအိၣ်န့ၣ်လီၤ.

လၢပျဲလိၥ်ကျိမုၢ်နုၥ် လၢၢ်ဒိၣ်ကီၢ်ဆၣ်ဟီၣ်ကဝီၤဒူသဝီအပူၤ ခီဖျိလၢပယီၤသုးဟဲထီၣ်ဟူးဂဲၤဒုးယၤတၢ်ဖ့ၣ်စၢက့ၤဆူၣ်ထီၣ်ကဒါလၢ ပယီၤသုးဒီးဟီၣ်ကဝီၤ(KNLA)တၢ်ပၢၢ်ဆၢသုးပၥ်ကရူၢ်အဘၢၣ်စၢၤအဃိ လၢလီၢ်ကဝီၤကမျၢၢ်ဃုၥ်ဒီးပှၤကၠိဖိတၢ်ဘံၣ်တၢ်ဘၢအဂီၢ် တၢ်ဘၣ်ပံးကွံၥ်ဝဲကၠိ ဘၣ်ဟဲအိၣ်ထီၣ်ဝဲဒ်အံၤန့ၣ်လီၤ.

ချၢၣ်လွံၢ်ထူၣ်ကီၢ်ရ့ၣ် ကညီကူၣ်သ့ဆဲးလၤဝဲၤကျိၤ(KECD)မူဒါခိၣ် စီၤလၣ်စ့ စံးဝဲလၢ “လၢပဟီၣ်ကဝီၤ ပျဲလိၥ်ကျိမုၢ်နုၥ် လၢၢ်ဒိၣ် ကီၢ်ဆၣ်တကပၤန့ၣ် ပကၠိခဲလၢၥ်အဖျၢၣ်(၁၀)ဘျဲၣ်န့ၣ် ပအိးထီၣ်တန့ၢ်လၢၤဘၣ် ခီဖျိလၢဒုးယၤဆူၣ်ထီၣ်,ဒုၣ်ဒါန့ၣ် ဟ့ၣ်တၢ်ဆီၣ် သနံး ဆူၣ်ထီၣ်အဃိလီၤ. ခဲအံၤလၢလၢၢ်ဒိၣ်ကီၢ်ဆၣ်တကပၤန့ၣ်ဘၣ်ကွၢ်ဆၢၣ်မဲၥ်ဝဲတၢ်ဂ့ၢ်ကီသ့ၣ်တဖၣ်အံၤအါဝဲလီၤ ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.

လၢန့ၣ်အမဲၥ်ညါခီဖျိဟီၣ်ကဝီၤပူၤဖဲန့ၣ်ဒုးယၤတၢ်ဟူးတၢ်ဂဲၤဆူၣ်ထီၣ်အဃိ ပှၤကၠိဖိဃုၥ်ဒီးကမျၢၢ်သ့ၣ်တဖၣ်ဘၣ်ဃ့ၢ်ထီၣ်ဝဲဆူ တၢ်ဘံၣ်တၢ်ဘၢလီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ.

ဒ်န့ၣ်အသိးတကီၢ်ခါခဲအံၤ ကဘီတူၢ်သုးကလၢၤလၢအိၣ်ချၢၣ်လွံၢ်ထူၣ်ကီၢ်ရ့ၣ်(သုးက့ ၃)ဒီး မုၢ်တြီၢ်ကီၢ်ရ့ၣ်(သုးက့ ၅)ဟီၣ်ကဝီၤ အဆၢအံၤစ့ၢ်ကီး ပယီၤသုးဟဲက့ၤထီၣ်မၤန့ၢ်ကဒါဝဲဝံၤလီၢ်ခံ လီၢ်ကဝီၤကမျၢၢ်တဖၣ်တၢ်ကီတၢ်ခဲအိၣ်ထီၣ်ဝဲ လၢတၢ်ဘံၣ်တၢ်ဘၢ ဒီးတၢ်ဟးထီၣ်က့ၤလီၤတကပၤအဂ့ၢ်န့ၣ် စီၤလၣ်စ့ စံးအါထီၣ်ဝဲန့ၣ်လီၤ.

တကးဒံးဘၣ်ဟီၣ်ကဝီၤဖဲန့ၣ်အပူၤဃုၥ်ဒီးပျဲလိၥ်ကျိမုၢ်နုၥ် လၢၢ်ဒိၣ်ကီၢ်ဆၣ်ဟီၣ်ကဝီၤလၢဒုးယၤတၢ်ဖ့ၣ်စၢကဲထီၣ်ခဲအံၤ န့ၣ်စ့ၢ်ကီး တကပၤန့ၣ်စ့ၢ်ကီး ကဘီယူၤဟးထီၣ်က့ၤလီၤဟးဆှၣ်တၢ်ဟဲအါထီၣ်ဝဲအဃိ လီၢ်ကဝီၤကမျၢၢ်တဖၣ်ဘၣ်ဟးထီၣ်က့ၤလီၤ လၢတၢ်ပလီၢ်ပဒီပူၤအဂ့ၢ်န့ၣ် သ့ၣ်ညါဘၣ်န့ၣ်လီၤ.

လၢၢ်ဒိၣ်ကီၢ်ဆၣ်အမဲၥ်ညါ ဖဲအပူၤကွံၥ်တလါအံၤလါနိၣ်ဝ့ဘၢၣ်ထီၣ်သီအခါန့ၣ်စ့ၢ်ကီး လၢဆီထံးကီၢ်ဆၣ်အပူၤ ခီဖျိပယီၤသုးကျိၤ နုၥ်လီၤဟူးဂဲၤအါအါဂီၢ်ဂီၢ်ဒီး တၢ်ဒုးတၢ်ယၤကဲထီၣ်,ကဘီယူၤစ့ၢ်ကီးလဲၤခးလီၤတၢ်အဃိ ဒူသဝီ(၁၅)ဖျၢၣ် ကမျၢၢ်ပှၤနီၣ်ဂံၢ် (၃၀၀၀)ဘျဲၣ် ဘၣ်ဃ့ၢ်ထီၣ်တုၤလၢခဲအံၤန့ၣ်လီၤ.

တနံၣ်အံၤတၢ်မၤလိနံၣ်အဂီၢ် ခီဖျိလၢဒုးယၤတၢ်သဘံၣ်သဘုၣ်အဃိ ခ့ၣ်အဲၣ်ယူၣ် ချၢၣ်လွံၢ်ထူၣ်ကီၢ်ရ့ၣ်ဒီး ဒူသထူၣ်ကီၢ်ရ့ၣ်, မုၢ်တြီၢ်ကီၢ်ရ့ၣ်, ဘျံးဒဝဲၢ်ကီၢ်ရ့ၣ်ဟီၣ်ကဝီၤပူၤ ကၠိတနီၤစးထီၣ်လၢတၢ်သိၣ်လိ နံၣ်စးထီၣ် တုၤလၢခဲအံၤလ့ၤတက့ၤ တၢ်အိးထီၣ် ဝဲတဘူၣ်ဒံးဘၣ်အိၣ်ဝဲဒီး တနီၤန့ၣ်လၢတၢ်ပျံၤတၢ်ဖုးအပူၤထီၣ်တခီခီ, ကနၣ်တၢ်အိၣ်သးတခီဘၣ်လဲၤတရံးအသးဒ်န့ၣ်လီၤ.