လါအ့ြဖ့ၣ် ၂၈သီႇ ၂၀၂၀နံၣ်ႇ ခ့ၣ်အဲးစံၣ်
ဒ်သိးဒီးသ့ၣ်မုၢ်၀ၣ်ဘိခိၣ်ဃၢၤန့ဆၢၣ်တဖၣ် အစၢၤသုတလီၤတူာ်တဂ့ၤအဂီၢ်ဒီး ဒ်သိး ကပူၤဖျဲးဒီးတၢ်မၤဟးဂီၤအကလုာ်ကလုာ်အဂီၢ် ဖဲလါအ့ြဖ့ၣ် ၂၅ သီအနံၤန့ၣ် လီၢ်က၀ီၤဒူဖိသ၀ီဖိႇ ကီၢ်ရ့ၣ်သ့ၣ်ၦၢ်ၦၤဘၣ်မူဘၣ်ဒါဒီး ကီၢ်ဆၣ်သ့ၣ်ၦၢ်ၦၤဘၣ်မူဘၣ်ဒါတဖၣ် ပာ်ဖှိၣ်ထီၣ်သးဒီးမၤ၀ဲတၢ်ကတီၤသကိးက့ၤ သ့ၣ်ဖးဒိၣ်တထူၣ်လၢအမ့ၢ် ကၠီၤက့ၣ်ထူၣ်လၢအသးနံၣ်အိၣ်၀ဲ အနံၣ် ၂၀၀ ဘျဲၣ်တထူၣ် လၢအအိၣ်ဖဲပံၣ်တခးသ၀ီ ႇ တၢ်ြကဲၢ်ကီၢ်ဆၣ်ႇဖၣ်အၣ်ကီၢ်ရ့ၣ်အံၤန့ၣ်လီၤႉ
တၢ်ြကဲၢ်ကီၢ်ဆၣ် သ့ၣ်ၦၢ်၀ဲၤကျိၤၦၤမၤတၢ်ဖိ စီၤအဲၣ်ခုၣ်မူ စံး၀ဲ“တနံၤညါအံၤဒ်သိးဒီး ပသ့ၣ်ဖးဒိၣ် တခိၣ်အံၤကဖျါလါ ဟ့အဂီၢ် ပပာ်ဖှိၣ်ထီၣ်ပသးဒီးဒူဖိသ၀ီဖိ ဒီး သ့ၣ်ၦၢ်ၦၤဘၣ်မူဘၣ်ဒါႇ ကီၢ်ဆၣ်ၦၤဘၣ်မူဘၣ်ဒါတဖၣ် ပပာ်ဖှိၣ် ထီၣ်သးဒီးကတီၤက့ၤသ့ၣ်ၦၢ်လီၤႉ သ့ၣ်တခိၣ်အံၤအသးနံၣ်အိၣ်၀ဲ အနံၣ် ၂၀၀ ဘျဲၣ်လံနီၤႉ သ့ၣ်တခိၣ်အံၤ ၦၤကိး၀ဲလၢကၠီၤက့ၣ်လၢၢ်လီၤႉ ဒ်သိးဒီးထံသုတအီၣ်ပသ့ၣ်တခိၣ်အံၤတဂ့ၤအဂီၢ် ပပာ်ဖှိၣ်ထီၣ်သး လၢကီၢ်ရ့ၣ်ၦၤဘၣ်မူဘၣ်ဒါဒီး ကမျၢၢ်ဒူဖိသ၀ီဖိတဖၣ်န့ၣ်လီၤႉ ဒ်သိးထံသုတအီၣ်သ့ၣ်တခိၣ်အံၤန့ၣ် ပလူ၀ဲဒီးဂာ်လၢၢ်ကမူၣ် ဒီးကဘျၢၣ်ထီၣ်အါထီၣ်ဟီၣ်ခိၣ် ဒ်သိးဒီးကြတီဆၢသ့ၣ်တခိၣ်အံၤအဂီၢ်လီၤႉ ပမ့ၢ်ဘၣ်ကွၢ်ကဒါက့ၤတၢ်ဆၢကတီၢ်တၢ်အိၣ်သးခဲအံၤန့ၣ် သ့ၣ်ၦၢ်တဖၣ်လီၤမုၢ်လီၤပျီ၀ဲအါမးလီၤႉ ဘၣ်ဃးဒီးထံဒိၣ်မ့ၢ်ဂ့ၤႇ ဟီၣ်ခိၣ်လာ်မ့ၢ်ဂ့ၤန့ၣ် မၤဘၣ်ဒိ၀ဲပၦၤကမျၢၢ်ဒီး အဃိန့ၣ်ပကတီၤက့ၤ စံာ်ႇ ကျီး ဃုာ်ဒီးသ့ၣ်တခိၣ်အံၤလီၤ” အဂ့ၢ်န့ၣ် စံး၀ဲလီၤႉ
ကၠီၤက့ၣ်ထူၣ်လၢဘၣ်တၢ်ကတီၤက့ၤ၀ဲအံၤ ၀း၀းတရံးန့ၣ်အိၣ်၀ဲ ၁၂ ပျၢ်ဒီး လၢအပူၤကွံာ် ၦၤမၤသ့ၣ်မုၢ်ကျိၤ၀ဲၤကွာ်ဖိတဖၣ် ဟဲကွၢ်စူၣ်၀ဲသ့ၣ်တထူၣ်အံၤတလီၢ်လီၢ်လၢ ကဟဲကူာ်၀ဲအဂီၢ်န့ၣ််လီၤႉ လၢတၢ်န့ၣ်အဃိ ဒ်သိးဒီးကပူၤဖျဲးဒီးၦၤမၤသ့ၣ်မုၢ်ကျိၤ၀ဲၤကွာ်တဖၣ်အစုပူၤအဂီၢ်ဒီး ထံသုတအီၣ်၀ဲတဂ့ၤအဂီၢ် လီၢ်က၀ီၤဒူဖိသ၀ီဖိတဖၣ်ဒီး ၦၤဘၣ်မူဘၣ်ဒါတဖၣ် ၦၤနီၣ်ဂံၢ်ခဲလၢာ် အဂၤ ၁၀၀ ဃၣ်ဃၣ် ဟဲပာ်ဖှိၣ်ကတီၤသကိးသ့ၣ်အံၤန့ၣ်လီၤႉ
တၢ်မ့ၢ်တကတီၤ၀ဲသ့ၣ်လၢအနံၣ်ယံာ်တဖၣ်အံၤဘၣ်န့ၣ် ဖိလံၤစၢၤသွဲၣ်သီလၢခံတစိၤတဖၣ် တမ့ၢ် လၢကထံၣ်ဘၣ်၀ဲလၢၤဘၣ်ဒီး သ့ၣ်ၦၢ်မ့ၢ်တၢ်အရ့ဒိၣ်ဒ်လဲၣ်ဒီး အတၢ်ကဲဘျုးအိၣ်ထဲလဲၣ်န့ၣ် ၦၤသ၀ီဖိလၢဟဲပာ်ဖှိၣ်မၤသကိးတၢ်ဂၤ စံး၀ဲဒ်အံၤလီၤႉ
သ၀ီဖိ နီၢ်ဖီစ့ဟဲ စံး၀ဲ “လၢတနံၤညါအံၤ ခီဖျိလၢတၢ်ပာ်ဖှိာ်မၤသကိးကတီၤ၀ဲသ့ၣ်ၦၢ်ဒ်အံၤန့ၣ် ယသးခုဒိၣ်မးဒီး ထံၣ်ဘၣ်လၢဒူသ၀ီဖိသ့ၣ်တဖၣ် ပာ်ဖှိၣ်မၤသကိးတၢ်လီၤႉ သ့ၣ်လၢအဒိၣ်ဒ်အံၤ သ့ၣ်လၢအဂ့ၤဒ်အံၤ သ့ၣ်လၢ အသးနံၣ်အိၣ်၀ဲလၢအကယၤတဖၣ်န့ၣ် လၢမုၢ်မဆါတနံၤအံၤ ပတထံၣ်ြကီလၢၤဘၣ်ႉ အဃိန့ၣ်ယသးခုလၢ တၢ်ကတဲၤကတီၤက့ၤသ့ၣ်လၢ မုၢ်မဆါတနံၤအံၤန့ၣ်လီၤႉ လၢပစိၤမးပမ့ၢ်တထံၣ်ဘၣ်၀ဲန့ၣ် လီၤလၢဖိစိၤလံၤစိၤန့ၣ် တမ့ၢ်လၢကထံၣ်ဘၣ်လၢာ်၀ဲဘၣ်ႉ ခဲအံၤခီဖျိလၢတၢ်ကတဲၤကတီၤဒ်အံၤအဃိန့ၣ် လီၤလၢပဖိပလံၤတစိၤဘၣ်တစိၤန့ၣ် ကထံၣ်ဒီးကသ့ၣ်ညါဘၣ်၀ဲလၢ သ့ၣ်အံၤမ့ၢ်တၢ်အရ့ဒိၣ်ထဲလဲၣ်လၢပ၀ဲဒူဖိသ၀ီဖိအဂီၢ်ဒီး ပ၀ဲကညီဖိတဖၣ်အဂီၢ်လီၤ ” အဂ့ၢ်န့ၣ် စံးဘၣ်ခ့ၣ်အဲးစံၣ်လီၤႉ
ဘၣ်ဃးဒီးတၢ်ကတီၤက့ၤခိၣ်ဃၢၤန့ဆၢၣ်ဒီး သ့ၣ်ၦၢ်၀ၣ်ၦၢ်တဖၣ်အံၤန့ၣ် တမ့ၢ်လၢတၢ်မၤ၀ဲဒၣ်ထဲတၢ်ြကဲၢ်ကီၢ်ဆၣ် ဖၣ်အၣ်ကီၢ်ရ့ၣ်တဘ့ၣ်ဧိၤအပူၤဘၣ်ဒီး မ့မ့ၢ်တခီတၢ်မၤ၀ဲဒၣ်တၢ်လီိၢ်အါတီၤလၢကညီကီၢ်စဲၣ်အပူၤန့ၣ်လီၤႉ
