လါဒံၣ်စ့ဘၢၣ် ၁ သီႇ ၂၀၂၂ နံၣ်ႇ ခ့ၣ်အဲးစံၣ်
လၢကညီကီၢ်စဲၣ် မၠၣ်၀တံၣ်၀့ၢ်ပူၤ စးထီၣ်ဖဲအပူၤကွံာ်လါစဲးပထ့ဘၢၣ်န့ၣ် တၢ်အိးထီၣ်ဂဲၤလိာ်ကွဲ(အၤ၀ၤဒ့)တၢ်တၤကျိၣ်တၤစ့လီၢ်ဟဲအါထီၣ်၀ဲဖျိဖျိဖျါဖျါဒိၣ်န့ၢ်အပူၤကွံာ်လၢညါအဂ့ၢ်န့ၣ် ကမျၢၢ်လၢအိၣ်၀့ၢ်ပူၤတဂၤစံး၀ဲန့ၣ်လီၤႉ
လၢမၠၣ်၀တံၣ်၀့ၢ်ချၢ သူမှဲကျိကၢၢ်နံၤဒီတကျိၤန့ၣ် (ကၣ်စံၣ်နိၣ်)တၢ်ဂဲၤလိာ်ကွဲတၢ်တၤကျိၣ်တၤစ့လီၢ်လၢ သုးခိးကီၢ်ဆၢ(BGF)ပၢ၀ဲအံၤအိၣ်၀ဲအါမးဒီးတကးဒံးဘၣ်လၢမၠၣ်၀တံၣ်(က၀ီၤဒ့ ၄)တီယၣ်သီခါဖၠၣ်လီၢ်ခံန့ၣ် အၤ၀ၤဒ့တၢ်ဂဲၤလိာ်ကွဲတၢ်တၤကျိၣ်တၤစ့လီၢ်ႇတၢ်ခးညၣ်တၢ်လိာ်ကွဲလီၢ်ႇတၢ်ဒိဖဲအလီၢ်သ့ၣ်တဖၣ်အိၣ်၀ဲအါကတၢၢ်ဒီးဟဲအါထီၣ်ဒိၣ်န့ၢ်အပူၤကွံာ်လၢညါဒံးအဂ့ၢ်န့ၣ် ကမျၢၢ်လၢအိၣ်၀့ၢ်ပူၤတဂၤစံး၀ဲဒ်အံၤန့ၣ်လီၤႉ
“အၤ၀ၤဒ့တၢ်ဂဲၤလိာ်ကွဲတၢ်တၤကျိၣ်တၤစ့လီၢ်အံၤအိၣ်တုၤလၢ (က၀ီၤဒ့ ၇) ခဲအံၤအိၣ်ဒံးႉ စးထီၣ်ဖဲလါစဲးပထ့ဘၢၣ်န့ၣ် တၢ်ဂဲၤလိာ်ကွဲတၢ်တၤကျိၣ်တၤစ့လီၢ်ဟဲအါထီၣ်ႉအအိၣ်အါဖဲလဲၣ်န့ၣ်အိၣ်အါလၢ (က၀ီၤဒ့ ၄) တီယၣ်သီခါဖၠၣ်လီၢ်ခံ တကပၤန့ၣ် အိၣ်အါလၢ(အၤကလိၤ)တၢ်လိာ်ကွဲႉ ဖဲန့ၣ်ၦၤလဲၤဂဲၤလိာ်ကွဲၦဲၤၦဲၤလီၤႉ မၠၣ်၀တံၣ်၀့ၢ်ပူၤအံၤတၢ်ဂဲၤလိာ်ကွဲ တၢ်တၤကျိၣ်တၤစ့အိၣ်ထီဘိလီၤႉ(အၤ၀ၤဒ့) တၢ်ဂဲၤလိာ်ကွဲအံၤတလီၤတူာ်နီတဘျီဘၣ်ႉလၢၦၤဆါကသံၣ်လီၢ်ကသီလီၢ်ႇညၣ်တၢ်တၤကျိၣ်တၤစ့လီၢ်နါက့အိၣ်ဒီဒူၣ်ညါ” အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
လၢန့ၣ်အမဲာ်ညါမၠၣ်၀တံၣ်၀့ၢ်ပူၤပယီၤသုးထုးထီၣ်တၢ်ကလုၢ်လၢမုၢ်နၤခီဟးထီၣ်တၢ်ချၢတန့ၢ်ဘၣ်အိၣ်၀ဲဘၣ်ဆၣ် မ့မ့ၢ်လၢ(အၤ၀ၤဒ့)တၢ်ဂဲၤလိာ်ကွဲတၢ်တၤကျိၣ်တၤစ့လီၢ်န့ၣ်အိၣ်တုၤလၢမုၢ်၀ါတစုညါဒီးၦၤလဲၤဂဲၤလိာ်ကွဲမါမးအဂ့ၢ်န့ၣ်ကမျၢၢ်တဂၤဃီအ၀ဲန့ၣ်စံးအါထီၣ်၀ဲန့ၣ်လီၤႉ
ပယီၤသုးဒီး(BGF)ဟ့ၣ်အခွဲးပျဲမၤ၀ဲကၣ်စံၣ်နိၣ်တၢ်ဂဲၤလိာ်ကွဲတၢ်တၤကျိၣ်တၤစ့လီၢ်ႇအၤ၀ၤဒ့တၢ်ဂဲၤလိာ်ကွဲတၢ်တၤကျိၣ်တၤစ့လီၢ်ဒ်အံၤမ့ၢ်တၢ်ဃၣ်ကဒါသူၣ်ဘီၣ်သးစၢ်အသးဒ်သိးသးစၢ်တဖၣ်သုတသးအိၣ်လၢထံရူၢ်ကီၢ်သဲဲးတကပၤတဂ့ၤအဂီၢ်လီၤအဂ့ၢ်န့ၣ် ကမျၢၢ်လၢအိၣ်၀့ၢ်ပူၤတဂၤပဲာ်ထံနီၤဖးစံး၀ဲဒ်အံၤန့ၣ်လီၤႉ
“(BGF)မၤ၀ဲတၢ်ဂဲၤလိာ်ကွဲတၢ်တၤကျိၣ်တၤစ့အလီၢ်အံၤမၤ၀ဲဒ်သိးသူၣ်ဘီၣ်သးစၢ်တဖၣ်သုတသးအိၣ်လၢထံရူၢ်ကီၢ်သဲးတကပၤတဂ့ၤအဂီၢ်လီၤႉတလဲၤဘၣ်က့ၤဘၣ်ဘျ့ဘျ့ဆှီဆှီ၊တၢ်မုာ်တၢ်ပၠီၣ်တအိၣ်ဒ်သိးလၢညါခါလၢၤဘၣ်အဃိသူၣ်ဘီၣ်သးစၢ်ၦၤနီၣ်ဒိၣ်တဖၣ်လဲၤက့ၤ၀ဲလၢ(အၤ၀ၤဒ့)မီၤနီၤ”အဂ့ၢ်န့ၣ်အ၀ဲစံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
ဒ်န့ၣ်အသိးလၢကညီကီၢ်စဲၣ်ႇဖၣ်အၣ်၀့ၢ်ႇယွၤသ့ၣ်သ၀ီႇထိအဲၤသ၀ီတဖၣ်အပူၤစ့ၢ်ကီး တၢ်အိးထီၣ်မၤ၀ဲ(အၤ၀ၤဒ့)တၢ်ဂဲၤလိာ်ကွဲတၢ်တၤကျိၣ်တၤစ့လီၢ်အိၣ်၀ဲခဲအံၤခဲအံၤအဂ့ၢ်န့ၣ် လီၢ်က၀ီၤကမျၢၢ်တဖၣ်စံး၀ဲန့ၣ်လီၤႉ
