ပယီၤသုးဆီလီၤသုးကလၢၤလၢဒူသ၀ီပူၤတၢ်ဂ့ၢ်အံၤ တုၤလၢခဲအံၤတစုတၢ်ဘှါရှဲတအိၣ်ဘၣ်အဃိ လီၢ်က၀ီၤဖိတဖၣ် ထုးထီၣ်၀ဲတၢ်သံကွၢ်

လါစဲးပထ့ဘၢၣ် ၃၀ သီႇ ၂၀၂၀ နံၣ်ႇ စးအဲၣ်ဆူ

ဖဲအပူၤကွံာ် လါဖ့ၤဘြူၤအါရံၤ(၁၇)သီအနံၤလံၤလံၤ တုၤလၢခဲအံၤတစု လၢဒူသ၀ီအပူၤ ပယီၤသုးတဖၣ် ဆီလီၤ၀ဲသုးကလၢၤအိၣ်ဆိး၀ဲဒၣ်အဃိ လီၢ်က၀ီၤဖိတဖၣ်ဘၣ်ယိၣ်ဘၣ်ဘှီတၢ်အိၣ်၀ဲဒၣ်ဒီး တုၤလၢခဲအံၤတစု ၦၤဘၣ်မူဘၣ်ဒါတဖၣ် ဘှါရှဲ၀ဲဒၣ်တအိၣ်ဘၣ်အဃိ လီၢ်က၀ီၤဖိတဖၣ် ထုးထီၣ်၀ဲဒၣ်တၢ်သံကွၢ်အိၣ်၀ဲန့ၣ်လီၤႉ

ထံကီၢ်ဒီဘ့ၣ်တၢ်ပတုာ်တၢ်ခးလံာ်ဃံးဃာ် -NCA အပူၤ ၦၤလၢအပၣ်ဃုာ်ဆဲးလီၤစုမုၢ်ကျၢၢ် တၢ်ဘၣ်ဘျုးဒံၣ်မိၣ်ခြ့ၣ်စံၣ် ကညီသုးမုၢ်ဒိၣ်(DKBA)ကရူၢ် တၢ်ပၢဟီၣ်က၀ီၤတခါလၢအမ့ၢ် ဖလူဒိၣ်သ၀ီကရူၢ် ကၠီးခဲးသ၀ီဒီးသ၀ီအကပိၤကပၤ လူၤခိၣ်ထၣ် ဒီး ချၢၣ်ကျိတၢ်လီၢ်တဖၣ်န့ၣ် ပယီၤသုးကလၢၤနုာ်လီၤအိၣ်ဆိး၀ဲအဃိ လီၢ်က၀ီၤဖိတဖၣ် ဘၣ်ယိၣ်ဘၣ်ဘှီ၀ဲဒၣ်လၢတၢ်ဒုးကကဲထီၣ်ကဒါအဂ့ၢ်န့ၣ် စံး၀ဲလီၤႉ

လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤစံး၀ဲ “အခီၣ်ထံးန့ၣ် လီၢ်က၀ီၤဖိတဖၣ်ဆိမိၣ်၀ဲဒၣ်လၢ ပယီၤသုးအံၤ ကက့ၤဧါႇ ကက့ၤဧါန့ၣ် တုၤလၢအခဲအံၤတက့ၤဒံးဘၣ်ႉ ပယီၤသုးတဖၣ်ဟဲအါထီၣ်ဒိၣ်န့ၢ်ဒံးအလီၢ်လီၤႉ အ၀ဲသ့ၣ်ဟဲ၀ဲအခဲအံၤန့ၣ် လီၢ်က၀ီၤဖိတဖၣ်တအဲၣ်ဒိး၀ဲဘၣ်ႉ ပတဲဘၣ်ခိၣ်နၢ်ဖဲအံၤတဖၣ်ဘၣ်ဆၣ် ဘှါရှဲ၀ဲတအိၣ်နီတမံၤဘၣ်အဃိ လီၢ်က၀ီၤသ၀ီဖိတဖၣ်လဲၤတဲ၀ဲကဘူၣ်၀ဲလဲၣ်” အဂ့ၢ်န့ၣ် စံးဘၣ်ခ့ၣ်အဲးစံၣ်လီၤႉ

တကီၢ်ခါတၢ်အိၣ်သးခဲအံၤ လူၤခိၣ်ထၣ်သ၀ီ သီခါဖၠၣ်ကရၢၢ်အပူၤ ပယီၤသုးအနီၣ်ဂံၢ်ကအိၣ်လၢ ၃၀ ဃၣ်ဃၣ် နုာ်လီၤအိၣ်ဆိး၀ဲဒၣ်ဒီး ဖဲချၢၣ်ကျိလီၢ်က၀ီၤအပူၤစ့ၢ်ကီး တ့ထီၣ်၀ဲသုးကလၢၤဂၢၢ်ဂၢၢ်ကျၢၤကျၢၤဒီး နုာ်လီၤအိၣ်ဆိးအိၣ်၀ဲအဂ့ၢ်န့ၣ် လီၢ်က၀ီၤဖိအံၤဆဲးစံး၀ဲန့ၣ်လီၤႉ

အပူၤကွံာ် စးထီၣ်ဖဲလါဖ့ၤဘြူၤအါရံၤ ၁၇ သီအနံၤန့ၣ် ကၠီးခဲးကရူၢ် လူၤခိၣ်ထၣ်သ၀ီပူၤ သုးကလၢၤလၢအနုာ်လီၤအိၣ်ဆိးတဖၣ်လၢအမ့ၢ် သုးရ့ၣ် ပၢဆှၢရဲၣ်ကျဲၤသုး၀ဲၤလီၢ်ခိၣ်သ့ၣ်(စကခ–၁၃)စုဒုၣ်တီၤအဖီလာ်ႇ သုုးခိၣ်ဒိၣ်ဖိ ကၠီၤသူၤရ့ၤ တီခိၣ်ရိၣ်မဲ၀ဲ ခီၣ်ချ့သုးရ့ၣ်(ခမရ–၄၃၂)သုးရ့ၣ်ဒီးႇ ချၢၣ်ကျိတၢ်လီၢ်တကပၤန့ၣ် (စကခ–၁၃)စုဒုၣ်တီၤအဖီလာ် သုးခိၣ်ဒိၣ်ဖိ စိမိနဲၤ တီခိၣ်ရိၣ်မဲ၀ဲ ခီၣ်ချ့သုးရ့ၣ်(ခမရ–၃၅၈)တဖၣ်အံၤ မ့ၢ်သုးရ့ၣ်တဖၣ်လၢနုာ်လီၤအိၣ်ဆိး၀ဲဒၣ်န့ၣ်လီၤႉ

၀ံၤဒီး တကီၢ်ခါခဲအံၤ သုးရ့ၣ်တဖၣ််ဆီတလဲ၀ဲအသးဒီး လူၤခိၣ်ထၣ်လီၢ်က၀ီၤတပၤ(ခမရ–၄၃၂)အခၢၣ်စး သုးခိၣ်ဒိၣ်ဖိ မၠိမ့ညိၣ် တီခိၣ်ရိၣ်မဲ၀ဲ(စကခ–၁၃)စုဒုၣ်တီၤအဖီလာ်(ခမရ–၅၅၉)သုးရ့ၣ်ဒီး လၢချၢၣ်ကျိတပၤန့ၣ် (ခမရ–၃၅၈)အခၢၣ်စးန့ၣ် သုးခိၣ်ဒိၣ်ဖိ စိပဲၤ တီခိၣ်ရိၣ်မဲ၀ဲ(ခမရ–၅၆၀)သုးရ့ၣ်တဖၣ် ဆီတလဲဟံးမူဒါစုာ်စုာ်ဒီး အနီၣ်ဂံၢ်အိၣ်၀ဲ(၆၀)ဃၣ်ဃၣ်အဂ့ၢ်န့ၣ် သ့ၣ်ညါဘၣ်လၢ ဟီၣ်က၀ီၤ ကညီတၢ်ထူၣ်ဖျဲးသုးမုၢ်ဒိၣ်(KNLA) ၦၤဘၣ်မူဘၣ်ဒါတဂၤအအိၣ်န့ၣ်လီၤႉ

အ၀ဲစံး၀ဲလၢ “မ့ၢ်ဘၣ်တဲဒ် NCA အကျိၤအကျဲအသိးန့ၣ် မ့ၢ်ဒၣ်တၢ်လုၢ်သ့ၣ်ခါပတာ်တခါလီၤႉ လီၢ်က၀ီၤဖိိတ ဖၣ်အဂီၢ် ကဲထီၣ်၀ဲဒၣ်တၢ်ဘၣ်ယိၣ်ဘၣ်ဘှီအနီၢ်ကီၢ်လီၤႉ လၢပ၀ဲသ့ၣ်တကပၤန့ၣ် ပတီၣ်ဖျါထီၣ်၀ဲဒၣ်ဆူ သုးက့ (KNLA သုးက့ ၆)အအိၣ်လၢာ်လံလီၤႉ ဘၣ်ဆၣ် တၢ်ဖီခိၣ်တၢ်နဲၣ်လီၤတအိၣ်ဘၣ်အဃိ ပ၀ဲသ့ၣ်တဖၣ်စ့ၢ်ကီး ပမၤတသ့နီတမံၤဘၣ်အသိး မ့ၢ်ကဘှါရှဲ၀ဲလၢ NCA အကျဲခီဧါ မ့ၢ်ကမၤ၀ဲဒ်လဲၣ်န့ၣ် အိၣ်ခိးကွၢ်အဖၢမုၢ်လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်လီၤႉ

လၢန့ၣ်အမဲာ်ညါ ဟီၣ်က၀ီၤအ၀ဲအံၤ မ့ၢ်၀ဲဒၣ် KNLA ဒီး DKBA တၢ်ပၢဟီၣ်က၀ီၤတဖၣ်အသိး တကီၢ်ခါခဲအံၤ ပယီၤသုးတဖၣ် နုာ်လီၤဆီလီၤ၀ဲဒၣ်သုးကလၢၤအံၤစ့ၢ်ကီး မ့ၢ်လၢ DKBA တကပၤ ဟ့ၣ်၀ဲအခွဲးအဃိ လၢကဟံးထီၣ်ဖီၣ်ထီၣ်အီၤအဂီၢ်ကီခဲ၀ဲအဂ့ၢ် ၦၤဘၣ်မူဘၣ်ဒါလၢတအဲၣ်ဒိးပာ်ဖျါအမံၤတဂၤ ပဲာ်ထံနီၤဖး၀ဲန့ၣ်လီၤႉ

ဘၣ်ထွဲဒီးတၢ်ဂ့ၢ်အ၀ဲအံၤ DKBA သုးရိၣ်မဲခိၣ်ကျၢၢ်(၂) သုးခိၣ်ကျၢၢ်ဂီၢ်ဂ့ၢ် စီၤစတံ စံး၀ဲလၢ ပယီၤသုးတကပၤ နုာ်လီၤဆီလီၤ၀ဲဒၣ်သုးကလၢၤတၢ်ဂ့ၢ်အံၤ တၢၣ်ပီၣ်တဲသကိး၀ဲဒၣ်ဒီးအ၀ဲသ့ၣ်တအိၣ်ဘၣ်အသိးႇ မ့ၢ်အတၢ်ပညိၣ်အိၣ်မနုၤလၢနုၤလီၤဆီလီၤသုးကလၢၤလဲၣ်န့ၣ် တသ့ၣ်ညါဘၣ်အဂ့ၢ် စံး၀ဲန့ၣ်လီၤႉ

သုးခိၣ်ကျၢၢ်ဂီၢ်ဂ့ၢ်စီၤစတံ စံး၀ဲလၢ “ကီးတရံးကီၢ်ဆၣ်(KNU ကီးတရံး)တကပၤ အ၀ဲသ့ၣ်အၦၤတဖၣ်န့ၣ် ဟဲတဲ၀ဲဒၣ်ၦၤတဘျီလီၤႉ ယက့ၤတဲကဒါလၢ မၤဒ်သုကီၢ်ဆၣ်အတၢ်နဲၣ်လီၤအသိးန့ၣ်ႉ လၢယၤတကပၤခီဒု ယတသ့ၣ်ညါတၢ်နီတမံၤဘၣ်ႉ အ၀ဲသ့ၣ်ဟဲ၀ဲအံၤစ့ၢ်ကီး တၢၣ်ပီၣ်တဲသကိးဒီးၦၤတအိၣ်နီတမံၤဘၣ်ႉ မ့ၢ်အတၢ်ပညိၣ်အိၣ်ဒ်လဲၣ်ခီန့ၣ် ယတသ့ၣ်ညါဘၣ်လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်လီၤႉ

ဖဲအပူၤကွံာ် တၢ်လီၢ်ဖဲန့ၣ်သ့ၣ်တဖၣ်န့ၣ် ပယီၤသုးဆီလီၤသုးကလၢၤဒီးနုာ်လီၤအိၣ်ဆိး၀ဲဒ်အံၤတအိၣ်၀ဲဘၣ်အသိးႇ ဟဲဆီလီၤသုးကလၢၤဒီးအိၣ်ဆိး၀ဲလီၤလီၤဆီဆီခဲအံၤအဖီခိၣ် လီၢ်က၀ီၤကမျၢၢ်တဖၣ်ဘၣ်ယိၣ်ဘၣ်ဘှီ၀ဲဒၣ်လၢ တၢ်ဒုးတဖၣ်ကက့ၤကဲထီၣ်ကဒါန့ၣ်လီၤႉ ခီဖျိလၢပယီၤသုးအံၤ ဟဲနုာ်လီၤအိၣ်ဆိးဆီလီၤ၀ဲဒၣ်သုးကလၢၤယံၤယံၤထၢထၢအဃိ သ၀ီဖိတဖၣ်တူၢ်ဘၣ်၀ဲဒၣ်လၢ တၢ်ဖံးတၢ်မၤဒီးတၢ်ဂ့ၢ်တၢ်ကျိၤတၢ်လဲၤတၢ်က့ၤလၢအဂၤတဖၣ် တၢ်သဘျ့တအိၣ်၀ဲဘၣ်အဂ့ၢ်န့ၣ် စံးဘၣ်ခ့ၣ်အဲးစံၣ်ဖဲအပူၤကွံာ်န့ၣ်လီၤႉ

ပဒိၣ်ႇသုးမုၢ်ဒိၣ် ဒီး ကလုာ်ဒူၣ်ဖီၣ်စုက၀ဲၤအဒူၣ်(၁၀)အဘၢၣ်စၢၤ တၢ်ဆဲးလီၤ၀ဲဒၣ်တၢ်ပတုာ်တၢ်ခးအိၣ်၀ဲဘၣ်ဆၣ် ဘၣ်ထဲဒွီး တၢ်ပာ်လီၤ၀ဲဒၣ်သုးအလီၢ်အကျဲဒီး လီၢ်က၀ီၤတၢ်ပာ်ပနီၣ်တဖၣ်အံၤ တုၤလၢခဲအံၤ တၢ်တၢၣ်ပီၣ်ထိၣ်ဃူထိၣ်ဖိးတအိၣ်၀ဲဘၣ်အဃိ တၢ်ခးလိာ်သးတဖၣ်ႇ တၢ်ပာ်ထီၣ်တၢ်ကမၣ်တဖၣ်အိၣ်၀ဲဒီး လၢတၢ်ကခိးကွၢ်တၢ်ပတုာ်တၢ်ခးအဂီၢ် တၢ်ဒုးအိၣ်ထီၣ်၀ဲ JMC အတၢ်ဖံးတၢ်မၤအိၣ်၀ဲဘၣ်ဆၣ် လၢတၢ်မၤအကျိၤအကျဲတဖၣ်အဖီခိၣ် တၢ်ပဲာ်ထံနီၤဖးတဖၣ်အိၣ်၀ဲအါမးန့ၣ်လီၤႉ