လါယနူၤအါရံၤ ၂၅ သီႇ ၂၀၂၂ နံၣ်ႇ ခ့ၣ်အဲးစံၣ်
ခီဖျိအယီၤသုးမီၤစိရိၤအသုးနုာ်လီၤဟူးဂဲၤလၢကီးတရံး၀့ၢ်ကလံၤထံးသ၀ီတဖၣ်အပူၤအဃိ လီၢ်က၀ီၤဒူဖိသ၀ီဖိလၢအကထိဘၣ်ပာ်တ့ၢ်ကွံာ်တၢ်လုၢ်အီၣ်နီၢ်ခိသးသမူတၢ်ဖံးတၢ်မၤတဖၣ်ဒီး ဘၣ်ဟးစံၣ်ပလဲာ်သးအဂ့ၢ်န့ၣ် သ့ၣ်ညါဘၣ်န့ၣ်လီၤႉ
လီၢ်က၀ီၤဖိလၢအအိၣ်ဖဲကီးတရံးကလံၤထံးသ့ၣ်တဖၣ် ဆၢကတီၢ်ခဲအံၤတၢ်ဆၢကတီၢ်ဘၣ်လၢကဘၣ်ကူးက့ၤ၀ဲအဘုႇသဘ့ဟီၣ်လာ်(ပဲ),ဘုခ့ဒီးနံၣ်သိသ့ၣ်တဖၣ်လံဘၣ်ဆၣ် အ၀ဲသ့ၣ်ဘၣ်ပာ်တ့ၢ်ကွံာ်အတၢ်သူၣ်တၢ်ဖျးတဖၣ်ခဲလၢာ်တကးဒံးဘၣ် ဘၣ်တ့ၢ်ကွံာ်ဆၣ်ဖိကီၢ်ဖိလၢအဘုၣ်ဃာ်၀ဲလၢဟံၣ်သ့ၣ်တဖၣ်ဒီးဘၣ်ဟးစံၣ်ပလဲာ်သးအဂ့ၢ်န့ၣ် အီဖးဖးဒိၣ်ကရူၢ်လီၢ်က၀ီၤဖိတဂၤစံး၀ဲန့ၣ်လီၤႉ
အ၀ဲစံး၀ဲလၢ“ၦၤတနီၤန့ၣ်အဘုဘီထီၣ်လံႇဘၣ်ကူး၀ဲအဆၢကတီၢ်ဘၣ်လံ ကူးတချုးဒံးဘၣ်ႉ ၦၤလၢအသူၣ်ပဲတနီၤန့ၣ်စ့ၢ်ကီးတထဲးဘၣ်ဒံးပဲဒံးဘၣ်ႉ မ့၀ံၤကျီၢ်ႇမဲးတဲးလဲးသ့ၣ်တဖၣ်စ့ၢ်ကီး ဖဲအကစၢ်တအိၣ်ဘၣ်အခါဘၣ်ယိၣ်လၢကလီၤဒိဒီးတၢ်အီၣ်ဘၣ်ပျၢ်လီၤကွံာ်၀ဲခဲလၢာ်အဃိ အ၀ဲသ့ၣ်နုာ်လီၤလၢတၢ်သူၣ်တၢ်ဖျးကရၢၢ်ပူၤဒီးမၤဟးဂီၤ၀ဲတၢ်ခဲလၢာ်လီၤမီၤနီၤႉ လၢကက့ၤကွၢ်တၢ်သူၣ်တၢ်ဖျးကျီးအဂီၢ်စ့ၢ်ကီးဘၣ်ယိၣ်လၢတၢ်ကဖီၣ်ပီၣ်တၣ်အဃိ ၦၤက့ၤတဘူၣ်နီတဂၤဘၣ်ႉ တၢ်သ့ၣ်တဖၣ်န့ၣ်ဆှူကွံာ်ခဲလၢာ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ
စးထီၣ်ဖဲလါယနူၤအါရံၤ ၆ သီတုၤလၢအခဲအံၤန့ၣ် ခီဖျိပယီၤသုးမီၤစိရိၤအသုးဟဲနုာ်လီၤလၢကီးတရံးကလံၤထံးတကပၤအဃိ ကီးနွဲၢ်သ၀ီႇမီမးႇအီဖးဖးဒိၣ်ႇစဲၣ်ကၣ်၀ဲးႇအကၠူၣ်ႇယွၤတါရှ့ၤဒီးသိစဲၤသိဆူၣ်သ၀ီကရူၢ် သ၀ီပာ်ဖှိၣ်(၂၇)ဖျၢၣ် လီၢ်က၀ီၤဖိတကလးဘျဲၣ်ဘၣ်ဟးစံၣ်ပလဲာ်အသးဒီး တနီၤန့ၣ်လဲၤအိၣ်၀ဲလၢအဘူးတံၢ်အဟံၣ်လၢတၢ်လီၢ်အဂၤအိၣ်စ့ၢ်ကီး၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ပယီၤသုးမီၤစိရိၤအသုးလၢအနုာ်လီၤဟူးဂဲၤတလၢ၀ဲခ့ၣ်အဲၣ်ယူၣ်ဒူပျာ်ယာ်ကီၢ်ရ့ၣ်ဟီၣ်က၀ီၤတၢ်ပာ်ပနီၣ်အလီၢ်တဖၣ်အံၤ တကီၢ်ခါခဲအံၤအ၀ဲသ့ၣ်အိၣ်ဆီလီၤအသးဖဲကမဲၤကိသီခါဖၠၣ်ကရၢၢ်ပူၤဒီးအီဖးဖိသ၀ီပူၤၦၤဟံၣ်တဖၣ်ဒီး ဖီၣ်အီၣ်ဟုၣ်၀ဲဟံၣ်ကစၢ်အဆီႇထိၣ်ဒ့ၣ်တဖၣ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ
ပယီၤသုးမီၤစိရိၤအသုးတဖၣ်အံၤ လၢမုၢ်ဆါခီန့ၣ်တမၤ၀ဲသုးတၢ်ဟူးတၢ်ဂဲၤဘၣ်ဆၣ်သနါက့ ဟူးဂဲၤအါ၀ဲလၢမုၢ်နၤခီအဆၢကတီၢ်အဂ့ၢ်န့ၣ် လီၢ်က၀ီၤခ့ၣ်အဲၣ်ယူၣ် ကီးတရံးကီၢ်ဆၣ် ၦၤဘၣ်မူဘၣ်ဒါတဂၤစံး၀ဲဒ်အံၤန့ၣ်လီၤႉ
“ခဲအံၤအ၀ဲသ့ၣ်ဟဲထီၣ်တုၤလၢအီဖးဖးဒိၣ်လံႉ ဟဲနုာ်လီၤလၢမနုၤအဃိလဲၣ်န့ၣ်တသ့ၣ်ညါဘၣ်ႉ မ့၀ံၤလၢအံၤတကပၤမ့လဲၤခး၀ဲနါက့ အ၀ဲသ့ၣ်တက့ၤခးဆၢ၀ဲဘၣ်ႉ မ့မ့ၢ်လၢမုၢ်ဆါခီန့ၣ်အိၣ်၀ဲဂၢၢ်ဂၢၢ်လီၤႉ လၢမုၢ်နၤခီမးအ၀ဲသ့ၣ်ဟးထီၣ်ဟးလီၤဟူးဂဲၤ၀ဲလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ
ပယီၤသုးမီၤစိရိၤအၦၤအဂၤ(၁၀၀)ဘျဲၣ်လၢအဟဲနုာ်လီၤဟူးဂဲၤတလၢ၀ဲခ့ၣ်အဲၣ်ယူၣ်ဟီၣ်က၀ီၤတၢ်ပာ်ပနီၣ်အလီၢ်အံၤတဖၣ်မ့ၢ်၀ဲခီၣ်သုးရ့ၣ်(ခလရ-၂၃၀),(၂၃၁)ခီၣ်ချ့သုးရ့ၣ်(ခမရ-၅၄၅),(၅၄၆)ဒီးသုးတြိၤ(၂၂)စုဒုၣ်တီၤအဖီလာ်သုးရ့ၣ်တဖၣ်ဒီး အိၣ်ဆီလီၤအသးဖဲကမဲၤကိႇအီးဖးဖိဒီးအီးဖးဖးဒိၣ်သ၀ီအကပိၤကပၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
