ဖၣ်အၣ်ကီၢ်ဆၣ်အပူၤ မ့ၣ်အူအီၣ်တၢ်အဃိ ဖိသၣ်သံ၀ဲ ၂ ဂၤ

လါဖ့ၤဘြူၤအါရံၤ ၁၈ သီႇ ၂၀၂၁ နံၣ်ႇ စီၤရှါ

ကညီကီၢ်စဲၣ်ႇဖၣ်အၣ်ကီၢ်ဆၣ်ႇကၤခယဲသ၀ီကရူၢ် ကၠိကၠံသ၀ီလၢပအိၣ်ကလုာ်ဒူၣ်အိၣ်ဆိး၀ဲတဖၣ်အံၤ ဖဲလါဖ့ၤဘြူၤအါရံၤ ၁၆ သီ မုၢ်နၤခီ ၁၁ နၣ်ရံၣ်အဆၢကတီၢ် ခီဖျိလၢမ့ၣ်အူအီၣ်ဟံၣ်အဃိ ဖိသၣ်သံ၀ဲ ၂ ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဟံၣ်လၢမ့ၣ်အူအီၣ်၀ဲအံၤဟံၣ်ဖိဃီဖိခဲလၢာ်အိၣ်၀ဲ ၄ ဂၤ န့ၣ်လီၤႉ ဖိသၣ်လၢအသံ ၂ ဂၤအံၤ အသးနံၣ်အိၣ်၀ဲ ၅ နံၣ်တဂၤႇ၂ နံၣ်တဂၤဒီးမ့ၢ်ဒၣ်ထဲပိာ်မုၣ်ဖိလီၤအဂ့ၢ်န့ၣ် ကၤခယဲသ၀ီကရူၢ်ႇ ၦၤပၢဆှၢတၢ်ခိၣ် အူကၠီၤအ့ စံးဘၣ်ခ့ၣ်အဲးစံၣ် ဖဲလါဖ့ၤဘြူၤအါရံၤ ၁၇ သီအနံၤန့ၣ်လီၤႉ

“ဖီအီၣ်မ့ၤ၀ံၤ မုၢ်ဃ့ၢ်လီၤ ၃ နၣ်ရံၣ်အဆၢကတီၢ်န့ၣ် ၦၤတဲလၢမၤပံာ်မ့ၣ်အူလီၤႉ ခဲအံၤလၢ ကဃုတၢ်ကဲထီၣ်သးအခီၣ်ထံးခီၣ်ဘိန့ၣ် မ့ၢ်မတဂၤဒွဲၣ်အူလဲၣ်န့ၣ်တသ့ၣ်ညါနီတမံၤဘၣ်ႉ သုသ့ၣ်ညါ ကတၢၢ်လီၤၦၤလၢအအိၣ်ဒူသ၀ီပူၤတဖၣ် မံ၀ဲဆိဆိလီၤအဃိ မ့ၣ်အူအီၣ်တၢ်၀ံၤမးသ့ၣ်ညါက့ၤလၢခံလီၤ”အဂ့ၢ်န့ၣ် စံး၀ဲန့ၣ်လီၤႉ

ဖံသးၦၢ် ၅၂ နံၣ် ဒီၤသါလၢမ့ၣ်အူအီၣ်အီၤတဂၤအံၤ ဘၣ်တၢ်ကူဆါယါဘျါအီၤလၢဒူသ၀ီတၢ်ဆါဟံၣ်ဒီး အလံၤပိာ်ခွါ ၆ နံၣ်တဂၤအံၤ ဘၣ်တၢ်ကူဆါယါဘျါအီၤလၢတီၣ်ကလ့သုးတၢ်ဆါဟံၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဖိသၣ်ဖိခံဂၤလၢအသံလၢမ့ၣ်အူအီၣ်အီၤအဃိအံၤ အမိဒီးအပါန့ၣ်မ့ၢ်ၦၤတဖၣ်လၢအလဲၤဖံးမၤ တၢ်လၢကီၢ်ကၠီၣ်တဲၣ်အဂ့ၢ်န့ၣ် သ့ၣ်ညါဘၣ်လၢ အူကၠီၤအ့အအိၣ်န့ၣ်လီၤႉ

တၢ်ကဲထီၣ်သး၀ံၤအလီၢ်ခံ ဖဲလါဖ့ၤဘြူၤအါရံၤ ၁၇ သီအနံၤ ဟီၣ်က၀ီၤပၢၤကီၢ်ၦၤဘၣ်မူဘၣ်ဒါ တဖၣ်ႇဒူသ၀ီသးၦၢ်လၢအဘၣ်ထွဲတဖၣ် လဲၤဃိထံသမံသမိးတၢ်လၢမ့ၣ်အူအီၣ်ကဲထီၣ်သးအလီၢ်ဘၣ်ဆၣ် ဘၣ်ထွဲမ့ၣ်အူအီၣ်ကဲထီၣ်သးအဂ့ၢ်အကျိၤန့ၣ် ကဆဲးသမံသမိး၀ဲအဂ့ၢ်န့ၣ် ဒူသ၀ီၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ

ဘၣ်ထွဲဒီးမ့ၣ်အူအီၣ်တၢ်အံၤ တၢ်ကစီၣ်ရၤလီၤအသးလၢ facebook အပူၤဒီးစံး၀ဲလၢ ၦၤအိၣ်၀ဲတဒူၣ်ဟဲဒွဲၣ်၀ဲမ့ၣ်အူအိၣ်၀ဲဘၣ်ဆၣ် ခ့ၣ်အဲးစံၣ်ပာ်ဂၢၢ်ပာ်ကျၢၤအီၤလီၤလီၤဆီဆီတအိၣ်ဒံးဘၣ်န့ၣ်လီၤႉ

ကၠိကၠံသ၀ီလၢဟံၣ်ခိၣ်အိၣ်၀ဲအဖျၢၣ် ၂၀၀ ဘျဲၣ်အံၤ အိၣ်သူၣ်လီၤအသးလၢဖၣ်အၣ်၀့ၢ်မုၢ်ထီၣ်တကပၤဒီး အိၣ်၀ဲဒၣ်လၢသၤမညၣ်သ၀ီအကပိၤကပၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ