ကညီပၣ်တံၣ် ၃ ဖု ကလဲၤထီၣ်၀ဲ တၢ်ဃုထၢခီၣ်မံရှၢၣ်အသီဒီးတၢ်ထံၣ်လိာ်ထံရူၢ်ကီၢ်သဲးတၢ်အိၣ်ဖှိၣ်

လါဖ့ၤဘြူၤအါရံၤ ၂၅ သီႇ ၂၀၂၁ နံၣ်ႇ ခ့ၣ်အဲးစံၣ်

ဖဲလါဖ့ၤဘြူၤအါရံၤ ၂၆ သီအနံၤ န့ၣ်ပၠံၣ်တီၣ်အပူၤ တၢ်ကမၤ၀ဲကီၢ်စၢဖှိၣ်တၢ်ဃုထၢခီၣ်မံရှၢၣ်အသီဒီး တၢ်ထံၣ်လိာ်ထိၣ်ဃူထံရူၢ်ကီၢ်သဲးတၢ်အိၣ်ဖှိၣ်အံၤ ကညီထံရူၢ်ကီၢ်သဲးပၣ်တံၣ် ၃ ပၣ်တံၣ် ကလဲၤထီၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ

တၢ်ထံၣ်လိာ်ထိၣ်ဃူတၢ်အိၣ်ဖှိၣ်ဘျီ၀ဲအံၤအပူၤ ကညီထံရူၢ်ကီၢ်သဲးပၣ်တံၣ်တဖၣ်လၢအမ့ၢ် ကညီကမျၢၢ်ပၣ်တံၣ် -KPP, ကညီဒီကလုာ်ဒံၣ်မိၣ်ကရဲၣ်တ့ၣ်ပၣ်တံၣ် KNDP, ဖျိၤ=စှီၤဒံၣ်မိၣ်ကရဲၣ်တ့ၣ်ပၣ်တံၣ် -PSDP တဖၣ်ကလဲၤထီၣ်၀ဲဒၣ်န့ၣ်လီၤႉ

KPP နဲၣ်ရွဲၣ်ခိၣ်ကျၢၢ်သဃဲၤ နၣ်ခ့ၤအ့အူ စံး၀ဲလၢ “တၢ်ဂ့ၢ်၀ဲအံၤလၢမဟါတၢ်အိၣ်ဖှိၣ်အပူၤန့ၣ် တၢ်နီၤဖးလီၤတၢ်ဖးဆၢတဲာ်၀ဲအခါ ဖဲန့ၣ်တၢ်ဖးလၢကြၢးလဲၤန့ၣ်အိၣ်၀ဲ ၂၈ ဖျၢၣ်ႇ တၢ်ဖးလၢတကြၢးလဲၤန့ၣ်အိၣ်၀ဲ ၇ ဖျၢၣ်လီၤအဃိ လၢကလဲၤအဂီၢ်ဆၢတဲာ်လီၤ၀ဲန့ၣ်လီၤႉ တၢ်ဂ့ၢ်တၢ်ကျိၤခီန့ၣ် မ့ၢ်အ၀ဲသ့ၣ်ကတဲမနုၤလဲၣ်န့ၣ် အဲၣ်ဒိးကနၣ်ပၠးလီၤႉ ၀ံၤဘျီဘၣ်ထွဲတၢ်ဖးတၢ်ဂ့ၢ်အံၤစ့ၢ်ကီး အဲၣ်ဒိးသ့ၣ်ညါလီၤတံၢ်လီၤဆဲးလီၤ”အဂ့ၢ်န့ၣ် စံး၀ဲန့ၣ်လီၤႉ

လၢကထံၣ်လိာ်ထိၣ်ဃူဒီးထံရူၢ်ကီၢ်သဲးပၣ်တံၣ်တဖၣ်တၢ်အိၣ်ဖှိၣ်အဂီၢ် ကီၢ်စၢဖှိၣ်တၢ်ဃုထၢခီၣ်မံရှၢၣ်အသီလၢ သုးကီၣ်ကးက့ၤဒုးအိၣ်ထီၣ်၀ဲအံၤ ဖဲလါဖ့ၤဘြူၤအါရံၤ ၂၂ သီအနံၤန့ၣ် ဆှၢဒုးသ့ၣ်ညါ၀ဲလံာ်ဆူ ထံရူၢ်ကီၢ်သဲးပၣ်တံၣ်တဖၣ်အအိၣ်န့ၣ်လီၤႉ

တကီၢ်ခါခဲအံၤ ကညီထံရူၢ်ကီၢ်သဲးပၣ်တံၣ်အိၣ်၀ဲ ၄ ပၣ်တံၣ်အကျါ ၃ ပၣ်တံၣ်န့ၣ်ကလဲၤထီၣ်၀ဲတၢ်အိၣ်ဖှိၣ်ဒီး မ့မ့ၢ်ကညီဒီကလုာ်ပၣ်တံၣ် -KNP အံၤ တလဲၤထီၣ်၀ဲတၢ်အိၣ်ဖှိၣ်ဘၣ်အဂ့ၢ်န့ၣ် KNP ပၣ်တံၣ် နဲၣ်ရွဲၣ်သဃဲၤ မါကၠီၤည့ စံး၀ဲဒ်အံၤန့ၣ်လီၤႉ

“လဲၤထီၣ်၀ဲတၢ်အိၣ်ဖှိၣ်တသ့ဘၣ်န့ၣ်က့ၤစံးဆၢကဒါလၢမဟါလံလီၤႉ ဖဲတၢ်ဃုထၢ၀ဲပၣ်တံၣ်ဖိတၢ်ပာ်သးအခါ ၦၤအါဒၣ်တက့ၢ်န့ၣ်ဟ့ၣ်ထီၣ်၀ဲအတၢ်ပာ်သးလၢတကြၢးလဲၤဘၣ်အဃိ ဆၢတဲာ်လီၤလၢတလဲၤထီၣ်ဘၣ်လီၤ”အဂ့ၢ်န့ၣ် အ၀ဲစံးဘၣ်ခ့ၣ်အဲးစံၣ်န့ၣ်လီၤႉ

ကညီထံရူၢ်ကီၢ်သဲးပၣ်တံၣ်တဖၣ်လၢအမ့ၢ် ကညီဒီကလုာ်ဒံၣ်မိၣ်ကရဲၣ်တ့ၣ်ပၣ်တံၣ် -KNDP ဒီး ဖျိၤ=စှီၤဒံၣ်မိၣ်ကရဲၣ်တ့ၣ်ပၣ်တံၣ် -PSDP လၢအအိၣ်သူၣ်လီၤအသးဖဲကညီကီၢ်စဲၣ်တဖၣ်အံၤ ကလဲၤထီၣ်၀ဲၣ်တၢ်ထံၣ်လိာ်ထိၣ်ဃူတၢ်အိၣ်ဖှိၣ်ဒီး ဘၣ်ထွဲဒီးကလဲၤထီၣ်တၢ်အိၣ်ဖှိၣ်အံၤ KNDP ၦၤပၢၤလီၢ်ဆ့ၣ်နီၤ မါအီၤပၠံၤစိ စံး၀ဲဒ်အံၤန့ၣ်လီၤႉ

အ၀ဲစံး၀ဲလၢ “ပ၀ဲသ့ၣ်တဖၣ်ဒုကလဲၤလီၤႉ ပလဲၤန့ၣ်လၢကလုာ်ဒူၣ်ပၣ်တံၣ်တဖၣ်အဂီၢ် မ့ၢ်တၢ်အိၣ်သးအိၣ်ဒ်လဲၣ်ႉ ကဘၣ်က့ၤဟ့ၣ်မနုၤလဲၣ်ႉ အ၀ဲသ့ၣ်ဟ့ၣ်ႇအ၀ဲသ့ၣ်တဲတၢ်သ့ၣ်တဖၣ်န့ၣ် မ့ၢ်ပက့ၤစိာ်သ့မနုၤလဲၣ်ႉ ဟံးမ့ၢ်သ့န့ၣ်ကဟံလီၤႉ ဟံးမ့ၢ်တသ့န့ၣ်တဟံဘၣ် အဃိန့ၣ်ဆၢတဲာ်လီၤ၀ဲလီၤ”အဂ့ၢ်န့ၣ် စံး၀ဲန့ၣ်လီၤႉ

ဒ်န့ၣ်အသိး ဖျိၤ=စှီၤဒံၣ်မိၣ်ကရဲၣ်တ့ၣ်ပၣ်တံၣ်အံၤစ့ၢ်ကီး လၢကလဲၤထီၣ်၀ဲတၢ်ထံၣ်လိာ်ထိၣ်ဃူတၢ်အိၣ်ဖှိၣ်အံၤန့ၣ် အဲၣ်ဒိးတအဲၣ်ဒိးအမဲာ်ညါန့ၣ် အဲၣ်ဒိးသ့ၣ်ညါလၢတၢ်ဃုထၢခီၣ်မံရှၢၣ်အံၤ မ့ၢ်ကတဲသကိးကမၤ၀ဲဒ်လဲၣ်အဃိ ကလဲၤထီၣ်၀ဲတၢ်အိၣ်ဖှိၣ်လီၤအဂ့ၢ်န့ၣ် နဲၣ်ရွဲၣ် စီၤကၠံၤလ့ စ့ၢ်ကီးစံး၀ဲန့ၣ်လီၤႉ

ဖဲလါဖ့ၤဘြူၤအါရံၤ ၂၆ သီအနံၤ န့ၣ်ပၠံၣ်တီၣ်အပူၤ တၢ်ကမၤ၀ဲတၢ်ဃုထၢခီၣ်မံရှၢၣ်ဒီးထံရူၢ်ကီၢ်သဲးပၣ်တံၣ်တဖၣ် တၢ်ထံၣ်လိာ်ထိၣ်ဃူတၢ်အိၣ်ဖှိၣ်အပူၤအံၤ KPP နဲၣ်ရွဲၣ်သဃဲၤ စီၤထြူဘျဲၣ်ႇ KNDP ၦၤပၢၤလီၢ်ဆ့ၣ်နီၤ=၂ (၁)စီၤမၠၣ်ထိၣ်၀့ႇ PSDP နဲၣ်ရွဲၣ် စီၤကၠံၤလ့တဖၣ် ကလဲၤထီၣ်၀ဲဒၣ်စုာ်စုာ်န့ၣ်လီၤႉ