လါဖ့ၤဘြူၤအါရံၤ ၅သီ, ၂၀၂၅နံၣ်, ခ့ၣ်အဲးစံၣ်,
ကီၢ်ကၠီၣ်တဲၣ်ကညီကီၢ်စဲၣ်ကီၢ်ဆၢ,တၢ်လီၢ်(၃)တီၤအပူၤ,တနံၤအံၤလါဖ့ၤဘြူၤအါရံၤ(၅)သီဂီၤခီ(၉)နၣ်ရံၣ်အဆၢကတီၢ်,ကၠီၣ်တဲၣ်ပဒိၣ်တကပၤပတုၥ်ကွံၥ်ဝဲတၢ်ဆါလီၤလီမ့ၣ်အူလံအဂ့ၢ်,ကီၢ်ဆၢပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
ကၠီၣ်တဲၣ်ပတုၥ်ကွံၥ်ဝဲတၢ်ဆါလီၤလီမ့အူလၢကညီကီၢ်စဲၣ်ကီၢ်ဆၢတၢ်လီၢ်(၃)တီၤအံၤမ့ၢ်ဝဲဖဲကီၢ်ဆၢ,ရၤမတံတိၤနီၢ်ဂံၢ်(၂),ရၤမတံသူမွဲကျိနံၤ(shwe myint thaung yinn industry & manufacturing company limited)ဒီးဃိၣ်သၢဖျၢၣ်ဝ့ၢ်တၢ်လီၢ်တဖၣ်အပူၤအဂ့ၢ်,သ့ၣ်ညါဘၣ်န့ၣ်လီၤ.
ဘၣ်ဃးဒီးကၠီၣ်တဲၣ်ပဒိၣ်တဖၣ်ကပတုၥ်ကွံၥ်ဝဲတၢ်ဆါလီလီၤမ့ၣ်အူလၢထံဆၢကီၢ်ဆၢတၢ်လီၢ်တဖၣ်အပူၤအံၤန့ၣ်,မ့မ့ၢ်လၢဃိၣ်သၢဖျၢၣ်ဝ့ၢ်တကပၤတခီဟဲခီဖျိသးလၢကၠီၣ်တဲၣ်တဖၣ်ဒိးန့ၢ်ဘၣ်ဝဲတၢ်ကစီၣ်လၢတရူးထံဖိကီၢ်ဖိတဖၣ်နုၥ်လီၤအိၣ်ဆိးဝဲဒၣ်အါအဖီခိၣ်အဃိအဂ့ၢ်,(DKBA)တီနီၢ်မုၢ်နုၥ်သုးဟီၣ်ကဝီၤအနီၢ်ဂံၢ်(၂)ဒုးယၤခိၣ်,သုးခိၣ်ဒိၣ်စိစီၤ(AONE)စံးဘၣ်ခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤ.
အဝဲစံးဝဲလၢ“တၢ်ဂ့ၢ်တၢ်ကျိၤန့ၣ်ကဲထီၣ်သးလၢပှၤရၤလီၤတၢ်ကစီၣ်လၢတရူးလၢအိၣ်ရၤမတံ,ရွ့ၣ်ကိၣ်ကိၤသ့ၣ်တဖၣ်န့ၣ်ဟဲက့ၤလၢအံၤအဃိန့ၣ်လီၤ.သထ့တနီၤနီၤန့ၣ်အဲၣ်ဒိးမၤဘၢဝဲတၢ်ကစီၣ်,ဝံၤအဲၣ်ဒိးမၤဟူထီၣ်သါလီၤက့ၤဝဲလၢပအိၣ်အံၤတကပၤအဃိန့ၣ်,ယမၢကၠီၣ်တဲၣ်ပှၤဘၣ်မူဘၣ်ဒါတဖၣ်လၢကဟဲကွၢ်သမံသမိးထံဆၢကီၢ်ဆၢလၢပအိၣ်တကပၤန့ၣ်လီၤ.အဝဲသ့ၣ်ဟဲကွၢ်ဝဲန့ၣ်တထံၣ်ဝဲတၢ်အိၣ်သးလီၤတိၢ်လီၤဘၣ်အိၣ်ဒၣ်ကၣ်စံၣ်နိၣ်တၢ်လီၢ်ဆံးဆံးဖိ(၃)ဖျၢၣ်,(၄)ဖျၢၣ်ဒီးပှၤမၤကၣ်စံၣ်နိၣ်တနီၤလီၤ.ဒိၣ်ဒိၣ်မုၢ်မုၢ်ဒ်သိးလၢရၤမတံသ့ၣ်တဖၣ်န့ၣ်တအိၣ်ဘၣ်,ဘၣ်ဆၣ်သနါက့တဲဝဲဒၣ်လၢဒ်သိးတၢ်နဲၣ်လီၤလၢထးအိၣ်ဝဲအသိးတခီန့ၣ်ကဘၣ်ပံးဝဲလီၤ,တပံးဝဲဘၣ်တန့ၢ်ဘၣ်န့ၣ်လီၤ.သနါက့ပံးဝဲန့ၣ်တတဲဝဲလၢလီၤတိၢ်လီၤဆီဘၣ်,တဲဝဲလၢတရူးဖဲအိၣ်ဖဲအံၤတဖၣ်အံၤမၤကၣ်စံၣ်နိၣ်က့ၤကွံၥ်မ့လၢၥ်တဘျီန့ၣ်ကရဲၣ်ကျဲၤဆိဝဲ,ကက့ၤအိးထီၣ်ဆိက့ၤဝဲဒၣ်န့ၣ်လီၤ”အဂ့ၢ်စံးဝဲဒၣ်န့ၣ်လီၤ
လၢန့ၣ်အမဲၥ်ညါ,ဃိၣ်သၢဖျၢၣ်ဝ့ၢ်အံၤခီဖျိမုၢ်ကျိၤဝဲၤကွၥ်တၢ်ထုးထီၣ်စဲးဖီဟၣ်တၢ်မၤလီၢ်ဒိၣ်ဒိၣ်မုၢ်မုၢ်တအိၣ်ဝဲဘၣ်အဃိလီမ့ၣ်အူပတုၥ်ကွံၥ်သးဒ်အံၤအဖီခိၣ်,တၢ်ဒိဘၣ်ဒိၣ်ဒိၣ်မုၢ်မုၢ်တအိၣ်ဝဲဘၣ်ဘၣ်ဆၣ်,ဘၣ်ဒိဝဲကမျၢၢ်လီၢ်ကဝီၤဖိတနီၤအမုၢ်ကျိၤဝဲၤကွၥ်တၢ်လုၢ်အီၣ်သးသမူတၢ်ဖံးတၢ်မၤတဖၣ်အိၣ်ဝဲအဂ့ၢ်,သုးခိၣ်ဒိၣ်စိစီၤ(AONE)စံးအါထီၣ်ဝဲဒၣ်န့ၣ်လီၤ.
တၢ်ကပတုၥ်ကွံၥ်ဝဲတၢ်ဆါလီၤလီမ့ၣ်ဆူ,ကီၢ်ပယီၤပူၤထံဆၢကီၢ်ဆၢတၢ်လီၢ်တဖၣ်အပူၤအံၤန့ၣ်ကၠီၣ်တဲၣ်ပဒိၣ်ခိၣ်နၢ်တဖၣ်ဆၢတဲၥ်ဘိးဘၣ်ရၤလီၤတ့ၢ်ဝဲဖဲအပူၤကွံၥ်လါဖ့ၤဘြူၤအါရံၤ(၄)သီအနံၤလၢတၢ်မၤဝဲ( National Security Council meeting)အပူၤအဂ့ၢ်,ကၠီၣ်တဲၣ်တၢ်ကစီၣ်သန့(BangkokPost)ပၥ်ဖျါဝဲဒၣ်န့ၣ်လီၤ.
ဒီးတၢ်ပတုၥ်ကွံၥ်ဝဲတၢ်ဆါလီၤလီမ့ၣ်အူဆူကီၢ်ပယီၤထံဆၢကီၢ်ဆၢအံၤန့ၣ်မ့ၢ်ဒ်သိး,ကတြီဆၢဒီသဒၢမၤဃံးထီၣ်ဝဲ,ထံဆၢကီၢ်ဆၢတၢ်မၤကၤပှၤကူပှၤကညီ,တၢ်လံၣ်အီၣ်လီအီၣ်(call center )တၢ်ဖံးတၢ်မၤလၢတဖိးသဲးစးဘၣ်,တဖၣ်အဂ့ၢ်ကၠီၣ်တဲၣ်တၢ်ကစီၣ်သန့တဖၣ်ပၥ်ဖျါဝဲဒၣ်န့ၣ်လီၤ.
ဒ်န့ၣ်အသိး,တၢ်ဘိးဘၣ်ရၤလီၤဝဲလၢတၢ်ကပတုၥ်ကွံၥ်တၢ်ဆါလီၤလီမ့ၣ်အူဆူထံဆၢကီၢ်ဆၢတၢ်လီၢ်တဖၣ်အပူၤဝံၤအလီၢ်ခံဖဲမဟါလါဖ့ၤဘြူၤအါရံၤ(၄)သီ,ဟါခီ(၇)နၣ်ရံၣ်အဆၢကတီၢ်,(ဘံၣ်ကၠံၣ်အဲၣ်)ခိၣ်နၢ်ခၢၣ်စးလၢအဟံဝဲမ့ၣ်အူဆူကၠီၣ်တဲၣ်ပူၤလၢအဘၣ်ထွဲဒီး(shwe myint thaung yinn industry)တဖၣ်,အတၢ်လီၢ်တၢ်ကျဲအပူၤမ့ၣ်အူပတုၥ်ကွံၥ်ဝဲအသးအိၣ်ဝဲအဂ့ၢ်,(RFA)ပၥ်ဖျါအိၣ်ဝဲဒၣ်စ့ၢ်ကီးအဂ့ၢ်သ့ၣ်ညါဘၣ်န့ၣ်လီၤ.
