လါယနူၤအါရံၤ ၂၃ သီ၊ ၂၀၁၉နံၣ်။ ခ့ၣ်အဲးစံၣ်
(ခ့ၣ်အဲၣ်ယူၣ်)ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ် တၢ်ပၢ ဟီၣ်က၀ီၤ တၢ်လီၢ်တနီၤအပူၤ တနံၣ်အံၤ၂၀၁၉နံၣ်လါယနူၤအါရံၤအပူၤ(KNLA)သုးမုၢ်ဒိၣ်ဒီးကီၢ်ပယီၤသုးမုၢ်ဒိၣ်တဖၣ်အဘၢၣ်စၢၤတၢ်ခးလိာ်သးက့ၤကဲထီၣ်(၂)ဘျီအဂ့ၢ်(KNLA)သုးက့(၅)ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ
တၢ်ခးလိာ်အသးန့ၣ် ဖဲလါယနူၤအါရံၤ(၅)သီ တဘျီဒီး ဖဲ(၁၃)သီန့ၣ် တဘျီခီဖျိတၢ်ခီပတာ်၀ဲတၢ်ပာ်ပနီၣ်လီၢ်အဃိ တၢ်ခးလိာ်သးကဲထီၣ်အဂ့ၢ်(ခ့ၣ်အဲၣ်ယူၣ်)သုးက့(၅) သုးဂ့ၢ်၀ီခိၣ် သုးခိၣ်ဒိၣ်ဖိ စီၤကျၢၤဒိၣ်စံးဘၣ် ခ့ၣ်အဲးစံၣ်ကညီတၢ်ကစီၣ်န့ၣ်လီၤႉ
“ပတၢ်အိၣ်ဆၢထၢၣ်တခီဒ်(ခ့ၣ်အဲၣ်ယူၣ်)ပာ်ပနီၣ်ဃာ်တၢ်လီၢ်အသိးပအဲၣ်ဒိးလဲၤႉ ၂၀၁၉တၢ်ဖ့ၣ်ဆၢကဲထီၣ်သးအံၤမ့ၢ်၀ဲ တၢ်တလူၤ ပိာ်ထွဲ၀ဲတၢ်ပာ်ပနီၣ်လီၢ်အဃိကဲထီၣ်သးလီၤႉ တလါတီၢ်ပူၤကဲထီၣ်၀ဲ(၂)ဘျီန့ၣ်လီၤႉ လၢအ၀ဲသ့ၣ်တကပၤခီဖျိဟဲခီ ပတာ်တၢ်ပာ်ပနီၣ်လီၢ်အဖီခိၣ်ဘၣ်မ့ၣ်ပိၢ်အါထီၣ်အဃိ တၢ်ဖ့ၣ်ဆၢတဖၣ်တၢ်ဘၣ်ဂံာ်ဂူာ်တဖၣ်ဟဲအါထီၣ်” အဂ့ၢ်သုးခိၣ်ဒိၣ်ဖိ စီၤကျၢၤဒိၣ်စံး၀ဲလီၤႉ
တလါအံၤအပူၤ တၢ်ခးလိာ်သးလၢကဲထီၣ်တဖၣ် ဖဲ(ခ့ၣ်အဲၣ်ယူၣ်)ဖၣ်ပူၣ်၊ လူၤသီကီၢ်ဆၣ်အပူၤလၢၢ်မုၢ်ပျီ၊ စီၤမုၢ်ပျီအဘၢၣ်စၢၤလၢၢ် ဒိၣ်ထံးတၢ်လီၢ်အပူၤန့ၣ်လီၤႉ ကတီၢ်အံၤတၢ်ဖ့ၣ်ဆၢလၢကဲထီၣ်သးလၢခံခီခံကပၤအံၤ လၢကီၢ်ပယီၤသုးတကပၤ တၢ်ဘၣ်ဒိဘၣ်ထံးစရီတၢ်တသ့ၣ်ညါဒံးဘၣ်အဂ့ၢ်(KNLA )သုးက့(၅)စံး၀ဲန့ၣ်လီၤႉဘၣ်ထဲဒွီး (ခ့ၣ်အဲၣ်ယူၣ်)မုၢ်တြီၢ်ကီၢ်ရ့ၣ်ဟီၣ်က၀ီၤပူၤ (KNLA)ဒီး ပယီၤသုးတကပၤတၢ်ဖ့ၣ်ဆၢလၢကဲထီၣ်သးအံၤအဖီခိၣ် ဆဲးကျိးသံကွၢ်၀ဲ(တပခ) ကလံၤစိးသုး၀ဲၤလီၢ်ခိၣ်သ့ၣ်ဘၣ်ဆၣ်တဒိးန့ၢ်တၢ်စံးဆၢနီတမံၤဘၣ်ႉ
ဖဲအပူၤကွံာ် ၂၀၁၈ နံၣ် လါမးရှးကတီၢ် ကီၢ်ပယီၤသုးတကပၤလဲၤနုာ်လီၤ၀ဲလၢလၢၢ်မုၢ်ပျီကရူၢ်ချိချီခံအပူၤ ဒီးတ့၀ဲကျဲဒီးခံခီခံကပၤတၢ်ဖ့ၣ်ဆၢကဲထီၣ်၀ဲဒီးတကပၤဒီးတကပၤတၢ်ဘၣ်လိာ်ဖိးဒ့တအိၣ်ဘၣ်အဖီခိၣ် တၢ်ခးလိာ်အသးတဖၣ် ဟဲအိၣ်ထီၣ် တလီၢ်လီၢ်န့ၣ်လီၤႉ
