လါအ့ဖြ့ၣ် ၈ သီ, ၂၀၂၆ နံၣ်ခ့ၣ်အဲးစံၣ်
ခ့ၣ်အဲယူၣ် ချၢၣ်လွံၢ်ထူၣ်ကီၢ်ရ့ၣ်(သုးက့ ၃)လၢၢ်ဒိၣ်ကီၢ်ဆၣ်ဟီၣ်ကဝီၤအပူၤ ခီဖျိလၢသုးမီၤစိရိၤအတၢ်မၤကမၣ်ပှၤဂ့ၢ်ဝီခွဲးယၥ်အံၤ အဃိ တလါအတီၢ်ပူၤ လီၢ်ကဝီၤကမျၢၢ်သံဘၣ်ဒိဘၣ်ထံးဝဲ(၆၀)ဂၤအဂ့ၢ်န့ၣ် သ့ၣ်ညါဘၣ်လၢကီၢ်ဆၣ်တၢ်မၤနီၣ်စရီအပူၤန့ၣ်လီၤ.
လၢၢ်ဒိၣ်ကီၢ်ဆၣ်အပူၤ စးထီၣ်လါမးရှး ၁ သီ တုၤ ၃၁ သီ လၢတလါအတီၢ်ပူၤ သုးမီၤစိရိၤသူဒြိ(၄၀)ဘျီ, (ကၠဲး)ကဘီယူၤ(၁)ဘျီ, ပၤရၤမီၤတၤကဘီယူၤ(၃)ဘျီဒီး လဲၤခးလီၤဝဲတၢ်ဒီး(y-12)ကဘီယူၤ(၂၃) ဘျီလၢလီၢ်ကဝီၤကမျၢၢ်အိၣ်ဆိးလီၢ်ကျဲအဂ့ၢ်န့ၣ် စံးဝဲန့ၣ်လီၤ.
ခီဖျိလၢတၢ်ဟူးတၢ်ဂဲၤသ့ၣ်တဖၣ်အံၤအဃိ လီၢ်ကဝီၤကမျၢၢ်သံဝဲ(၃၅)ဂၤ,ဘၣ်ဒိဘၣ်ထံးဝဲ(၂၅)ဒီး ပှၤသံဘၣ်ဒိဘၣ်ထံးသ့ၣ်တဖၣ် အံၤအကျါပၣ်ဃုၥ်ဝဲပိၥ်မုၣ်ပိၥ်မၢၤ,ဖိဒံဖိသၣ်လၢအသးနံၣ်တပှဲၤဒံးဘၣ်တဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
တကးဒံးဘၣ်လၢတၢ်ဟူးတၢ်ဂဲၤအဃိအံၤစ့ၢ်ကီး လီၢ်ကဝီၤကမျၢၢ်အဟံၣ်အဃီတၢ်သူၣ်ထီၣ်ဟးဂီၤဘၣ်ဒိဘၣ်ထံးဝဲ(၃၄)ဖျၢၣ် အဂ့ၢ်န့ၣ် ကီၢ်ဆၣ်တၢ်မၤနီၣ်စရီအပူၤပၥ်ဖျါဝဲန့ၣ်လီၤ.
လၢၢ်ဒိၣ်ကီၢ်ဆၣ်ပူၤ လၢကထီၣ်ဒိၣ်စိက့ၤဟီၣ်ကဝီၤတၢ်လီၢ်လၢကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ဒိၣ်စိဝဲန့ၢ်တဖၣ်အံၤ အဂီၢ်န့ၣ် ပယီၤသုးအံၤစးထီၣ်ဖဲအပူၤကွံၥ်လါမးရှး ၅ သီအခါန့ၣ် ပၥ်ဖှိၣ်ထီၣ်သးအနီၣ်ဂံၢ်အါအါဂီၢ်ဂီၢ် နုၥ်လီၤဟူးဂဲၤဝဲဒၣ်လၢ ယ့ၤတွ့ကိ(ရေတွင်းကုန်း)ကရူၢ် ဒူသဝီသ့ၣ်တဖၣ်အပူၤန့ၣ်လီၤ.
တကီၢ်ခါခဲအံၤတၢ်ဆၢကတီၢ်ထီၣ်ဘးလၢတလါလံဘၣ်ဆၣ်ပယီၤသုးလၢအနုၥ်လီၤဟူးဂဲၤလၢ(ရေတွင်းကုန်း)ကရူၢ်ပူၤ ယ့ၤတွ့ကိ သဝီပူၤတဖၣ်အံၤတဟးထီၣ်ဒံးဘၣ် မ့မ့ၢ်တခီဆဲးအိၣ်ဒံးဝဲလၢသဝီပူၤအဖၢမုၢ်အဃိ လီၢ်ကဝီၤကမျၢၢ်ပှၤနီၣ်ဂံၢ်လၢအကထိ လၢအ ဃ့ၢ်ထီၣ်တ့ၢ်ဃၥ်တဖၣ်အံၤက့ၤဟံၣ်က့ၤဃီတဘူၣ်ဒံးဘၣ်အဂ့ၢ်န့ၣ် ကီၢ်ဆၣ် ကီၢ်ဆၣ်တၢ်ရ့လိၥ်ဆဲးကျိးကမျၢၢ်ဒီး တၢ်ဘိးဘၣ်ရၤ လီၤတၢ်မၤကမံးတံၥ် အနဲၣ်ရွဲၣ် ပဒိၣ်စီၤဝါမုၢ် စံးဝဲန့ၣ်လီၤ.
အဝဲစံးဝဲလၢ“လီၤဆီဒၣ်တၢ်လၢအံၤတကပၤဒုခဲအံၤန့ၣ်ဒုၣ်ဒါဟူးဂဲၤအါလၢကျိဖးဒိၣ်,ဒြိဒီးကဘီယူၤန့ၣ်အါထီၣ်ဝဲလီၤ.မ့ဝံၤပယီၤသုးလၢနုၥ်လီၤအိၣ်(ရေးတွင်းကုန်း)သဝီပူၤတဖၣ်န့ၣ်တုၤလၢခဲအံၤတဟးထီၣ်ဒံးဘၣ်အိၣ်ဖဲန့ၣ်လီၤ.မ့မ့ၢ်ကမျၢၢ်လၢအဃ့ၢ်ထီၣ်တဖၣ်န့ၣ်ဒုခဲအံၤပရဲၣ်ပကျဲၤန့ၢ်အဝဲသ့ၣ်တၢ်အီၣ်တၢ်အီ,တၢ်ခိၣ်ဒုး,ကသံၣ်ကသီသ့ၣ်တဖၣ်မီၤ.အခဲအံၤအဝဲသ့ၣ်န့ၣ်အိၣ်လၢပတၢ်အံးထွဲကွၢ်ထွဲဖီလၥ်လီၤ.ဘၣ်မနုၤအဃိလဲၣ်ပှၤသ့ၣ်တဖၣ်အံၤဖဲအဝဲသ့ၣ်ဟးထီၣ်လၢအဒူသဝီအခါန့ၣ်စိၥ်တၢ်တချုးနီမံၤဘၣ်.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲမဟါအနံၤန့ၣ်လီၤ.
ဒ်န့ၣ်အသိးပယီၤသုးလၢအိၣ်(ရေတွင်းကုန်း)သဝီပူၤအံၤတဖၣ် ဟီၣ်ကဝီၤ(KNLA)သုးပၥ်ဖှိၣ်လဲၤခးစဲးပြဲးဝဲအိၣ်ကိးမုၢ်နံၤဒဲး ဃၣ်ဃၣ်အဂ့ၢ်န့ၣ် ပဒိၣ်စီၤဝါမုၢ် စံးဝဲဒၣ်န့ၣ်လီၤ.
ဒ်ချၢၣ်လွံၢ်ထူၣ်ကီၢ်ရ့ၣ်တၢ်မၤနီၣ်စရီပူၤအိၣ်ဝဲအသိးန့ၣ် အပူၤကွံၥ်လါဖ့ၤဘြူၤအါရံၤတလါအတီၢ်ပူၤခီဖျိလၢသုးမီၤစိရိၤကဘီယူၤ,ဒြိ ဒီးကဘီယူၤအံၤအဃိ ဆီထံး,မူဒီးလၢၢ်ဒိၣ်ကီၢ်ဆၣ်အပူၤ ကမျၢၢ်သံဘၣ်ဒိဘၣ်ထံးဝဲ(၁၅)ဂၤဒီး ဟံၣ်တၢ်သူၣ်ထီၣ်(၄၇)ဖျၢၣ်, ကၠိတၢ်သူၣ်ထီၣ်(၄)ဖျၢၣ်ဒီးတၢ်ဘါယွၤသရိၥ်တၢ်သူၣ်ထီၣ်(၃)ဖျၢၣ်ဟးဂီၤဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
