ယနူၤအါရံၤ ၂၉ သီ၊ ၂၀၁၉နံၣ်၊ စီၤထိလ့။
ကီၢ်ပဒိၣ်ဂံၢ်ခီၣ်ထံးကၠိတဖၣ်အပူၤ ဒ်သိးသိၣ်လိ၀ဲလံာ်ကညီကလဲၤအသး တခါဃီအဂီၢ် တၢ်ကကွဲးပာ်လီၤ၀ဲ ကညီလံာ်ညိၣ်သိၣ်ဒိၣ်အံၤ တၢ်ကပာ်ဖှိၣ်မၤသကိးအီၤအဂ့ၢ်
တၢ်ကွဲးပာ်လီၤကညီလံာ်ညိၣ်သိၣ်ဒိၣ် ကမံးတံာ်ၦၤဘၣ်မူဘၣ်ဒါတဖၣ် စံးဘၣ် ခ့ၣ်အဲးစံၣ်ကညီတၢ်ကစီၣ်န့ၣ်လီၤႉ
ကီၢ်ဆၣ်ဒီးကီၢ်ခီဒိၣ်(၅)ဘ့ၣ်အပူၤ ကညီလံာ်လဲၢ်ဒီးတၢ်ဆဲးတၢ်လၤကမံးတံာ်ခၢၣ်စးတဖၣ်၊ ၦၤကူၣ်ဘၣ်ကူၣ်သ့လၢ တၢ်လီၢ်အါတီၤတဖၣ်ပၣ်ဃုာ်ဒီးဒုးအိၣ်ထီၣ်၀ဲကညီလံာ်ညိၣ်သိၣ်ဒိၣ်ကမံးတံာ်အံၤ ဖဲ၂၀၁၈နံၣ်၊ လါယူၤလံ၂၈သီအပူၤ ဒီးလၢတၢ်ကွဲးပာ်လီၤလံာ်ညိၣ်သိၣ်ဒိၣ်တၢ်မၤကတီၢ်အံၤကျိၣ်စ့တၢ်လိၣ်အိၣ်ထီၣ်၀ဲဒီးဒ်သိးကပာ်ဖှိၣ်ဟ့ၣ်တၢ်မၤစၢၤအဂီၢ်ကမံးတံာ်နဲၣ်ရွဲၣ်မါသါ၀့အူစံး၀ဲန့ၣ်လီၤႉ
“ၦိၢ်ဒီးစှီၤတတီၤအလံာ်ညိၣ်သိၣ်ဒိၣ်အဂီၢ်ကရူၢ်ခၢၣ်စးတဖၣ်ထံၣ်လိာ်အသးလၢ၀့ၢ်တကူၣ်တလါန့ၣ်သၢသီန့ၣ်လီၤႉ လၢတၢ်န့ၣ်အဂီၢ်တၢ်လဲၤတၢ်က့ၤ၊ တၢ်တူၢ်လိာ်၊ တၢ်ဟ့ၣ်၀ဲသရၣ်သရၣ်မုၣ်သ့ၣ်တဖၣ်တၢ်ဟ့ၣ်ကနၢၤတဖၣ် တၢ်ဘၣ်သူ အီၤႉဒီးဘၣ်ပာ်လီၤၦၤမၤတၢ်ဖိလၢကဒိ၀ဲကညီကျိာ်ခံခါလၢာ်အဂီၢ်၊ လၢလံာ်ညိၣ်သိၣ်ဒိၣ်အဂီၢ်ဘၣ်သူ၀ဲလံာ် ဒီးၦၤခဲၣ်တၢ်ဂီၤသ့ၣ်တဖၣ်အဂီၢ်တၢ်လၢာ်ဘူၣ်လၢာ်စ့ၤလီၤႉ လၢတၢ်န့ၣ်အဂီၢ် ဘၣ်ထုးထီၣ်သူအီၤန့ၣ်လီၤႉ အဃိအဲၣ်ဒိးတဲလၢၦၤကမၤစၢၤၦၤန့ၣ်လီၤ”အဂ့ၢ် မါသါ၀့အူ စံး၀ဲန့ၣ်လီၤႉ
ကတီၢ်အံၤလၢတၢ်ကွဲးပာ်လီၤကညီလံာ်ညိၣ်သိၣ်ဒိၣ်အဂီၢ် ကညီဖိလၢတအဲၣ်ဒိးပာ်ဖျါအမံၤတဂၤ ဟ့ၣ်မၤစၢၤ၀ဲအက လီၢ်(၃၀)ကၠး ဒီးလၢတၢ်ကွဲးပာ်လီၤလံာ်ညိၣ်သိၣ်ဒိၣ်တုၤအ၀ံၤန့ၣ် တၢ်တယးအီၤလၢကလီၤလၢ ၀ဲစ့ခဲလၢာ်အကလီၢ်(၂၀၀)ဃၣ်ဃၣ်အဂ့ၢ် မါသါ၀့အူတဲအါထီၣ်၀ဲလီၤႉ
လၢတၢ်ကွဲးပာ်လီၤ၀ဲကညီလံာ်ညိၣ်သိၣ်ဒိၣ်အံၤမ့မ့ၢ်လၢစှီၤကျိာ်တတီၤအဂီၢ်န့ၣ် ၀ံၤလံ၀ဲသၢပူခံပူလံဒီး မ့မ့ၢ်လၢၦိၢ်ကညီကျိာ်န့ၣ်၀ံၤလံ၀ဲခဲလၢာ်ဒီးအိၣ်တ့ၢ်ဒၣ်ထဲၦၤခဲၣ်တၢ်ဂီၤသ့ၣ်တဖၣ်ကဘၣ်ခဲၣ်၀ံၤ၀ဲတၢ်ဂီၤန့ၣ်လီၤႉ
ကညီလံာ်ညိၣ်သိၣ်ဒိၣ်တၢ်လိၣ်ထီၣ်ဖးထီၣ်ကမံးတံာ်ၦၤပၢၤလီၢ်ဆ့ၣ်နီၤန့ၣ် မ့ၢ်၀ဲစီၤကၠူပလံၤစၤလၣ်၊ ၦၤပၢၤလီၢ် ဆ့ၣ်နီၤ(၂)န့ၣ် တၢ်ပာ်လီၤအီၤလၢ ကီၢ်ခီဒိၣ်ဒီးကီၢ်ဆၣ်(၅)ဘ့ၣ်အပူၤ ကညီလံာ်လဲၢ်ဒီး တၢ်ဆဲးတၢ်လၤၦၤဘၣ်မူဘၣ် ဒါတဖၣ်ဒီးကမံးတံာ်အနဲၣ်ရွဲၣ်မ့ၢ်၀ဲမါသါ၀့အူန့ၣ်လီၤႉ
ဒ်န့ၣ်အသိးလၢတၢ်ကွဲးပာ်လီၤ၀ဲစှီၤကညီလံာ်ညိၣ်သိၣ်ဒိၣ်ကရူၢ်ခိၣ်မ့ၢ်၀ဲစီၤလ့ခဲၣ်(ပသံၣ်တၢ်ကူၣ်ဘၣ်ကူၣ်သ့ခီလ့ၣ်ကၠိခိၣ်လၢဟံးတၢ်အိၣ်ဘှံး)ဒီကထၢၣ်စီၤကၠံၣ်စိပကိဖၠၣ်စိမိၤၦၤကူၣ်ဘၣ်ကူၣ်သ့လၢဟံးတၢ်အိၣ်ဘှံးဒီးကညီၦၤကူၣ်ဘၣ်ကူၣ်သ့တဖၣ် (၁၀)ဂၤပၣ်ဃုာ်၀ဲန့ၣ်လီၤႉ
ကီၢ်ပဒိၣ်တီၤဖုၣ်ကၠိသ့ၣ်တဖၣ်အပူၤ တၢ်သိၣ်လိ၀ဲကညီလံာ်ဘၣ်ဆၣ်တဒ်သိးလိာ်အသးခဲလၢာ်ဘၣ်အဃိ ဒ်ခ့ခါတၢ်ဆၢကတီၢ်တၢ်အိၣ်သးအသိး တၢ်က့ၤကွဲးပာ်လီၤအီၤဒီး ကညီလံာ်လဲၢ် တၢ်ဆဲးတၢ်လၤလၢ ကီၢ်ခီဒိၣ်ဒီးကီၢ်ဆၣ်တဖၣ်တူၢ်လိာ်အၢၣ်လီၤ၀ဲဒီးဒုးအိၣ်ထီၣ်၀ဲအဂ့ၢ်ဒီး ကထုးထီၣ်ရၤလီၤ၀ဲလၢ ကီၢ်ဒီဘ့ၣ်တၢ်ကူၣ်ဘၣ်ကူၣ်သ့၀ဲၤကျိၤအိၣ်အဂ့ၢ်ကမံးတံာ်ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ
