လါမးရှး၂၇ သီႇ၂၀၁၉ နံၣ်ႇ ခ့ၣ်အဲးစံၣ်
အ့ၣ်ရၣ်၀တံၣ်ကီၢ်ခီဒိၣ်အပူၤႇ ကညီအလံာ်ထူလံၤလၢအမ့ၢ်၀ဲ“လံာ်ကွဲၢ်ကီၢ်”လၢအဘၣ်တၢ်ထုးဖျါထီၣ်က့ၤအီၤလၢ မၠဲၣ်ကၠံငူၣ်သီခါဖးဒိၣ်အံၤ လၢတၢ်ကဟဲသိၣ်လိအီၤအဖီခိၣ် ကီၢ်ခီဒိၣ်လံာ်လဲၢ်ဒီးတၢ်ဆဲးတၢ်လၤ ကမံးတံာ်သ့ၣ်တဖၣ် တပာ်မနီၣ်၀ဲဘၣ်အဂ့ၢ် အ့ၣ်ရၣ်၀တံၣ်ကီၢ်ခီဒိၣ် ကညီလံာ်လဲၢ်ဒီးတၢ်ဆဲးတၢ်လၤ အၦၤပၢၤလီၢ်ဆ့ၣ်နီၤ မါအဲၣ်ခလ့ စံး၀ဲဒၣ်န့ၣ်လီၤႉ
အ့ၣ်ရၣ်၀တံၣ်ကီၢ်ခီဒိၣ် ကညီလံာ်လဲၢ်ဒီးတၢ်ဆဲးတၢ်လၤ ကမံးတံာ်အၦၤပၢၤလီၢ်ဆ့ၣ်နီၤ မါအဲၤခလ့စံး၀ဲလၢ “ လံာ်ကွဲၢ်ကွီၢ်အံၤန့ၣ် မ့ၢ်၀ဲလံာ်လၢအရ့ဒိၣ်န့ၣ် ပတတူၢ်လိာ်ဘၣ်. ပ၀ဲဒၣ်ခီဒုပကပာ်ပနီၣ်ဒီးသူ၀ဲ ကညီၦိၢ်မုၢ်နုာ် အလံာ်ဒီး ကညီစှီၤအလံာ်သ့ၣ်တဖၣ်န့ၣ်လီၤႉ ၦၤလၢအသးအိၣ်မၤလိ ဒီးအဲၣ်ဒိးဃုသ့ၣ်ညါသ့ၣ်တဖၣ် ဒုမၤလိ၀ဲန့ၣ်လီၤႉ ဆိမိၣ်လၢတမ့ၢ်လၢအကဟဲဘၣ်ဒိ၀ဲပလံာ်လဲၢ်ဘၣ်ႉ”အဂ့ၢ် အ၀ဲတဲဘၣ်၀ဲ ခ့ၣ်အဲးစံၣ် န့ၣ်လီၤႉ
လံာ်ကွဲၢ်ကီၢ်၀ဲအံၤန့ၣ် ဘၣ်တၢ်နုာ်လီၤသိၣ်လိအီၤလၢ ပါတနီၤႇ မၠီမၠးႇ အ့ၤမဲကီၢ်ဆၣ်သ့ၣ်တဖၣ်ဒီး ၀ါခဲၣ်မးကီၢ်ဆၣ် သ့ၣ်တဖၣ်န့ၣ်လီၤႉ ဘၣ်ဃးဒီးတၢ်ဟးသိၣ်လိ၀ဲဒ်အံၤန့ၣ် လၢကညီၦၤတ၀ၢသ့ၣ်တဖၣ်အပူၤ တၢ်ပဲာ်ထံနီၤဖးသ့ၣ်တဖၣ်ဟဲအိၣ်ထီၣ်၀ဲအသိး ကီၢ်ဆၣ်လံာ်လဲၢ်ဒီးတၢ်ဆဲးတၢ်လၤႇ ကီၢ်ခီဒိၣ်လံာ်လဲၢ်ဒီးတၢ်ဆဲးတၢ်လၤသ့ၣ်တဖၣ် တတူၢ်လိာ်၀ဲဘၣ်အဂ့ၢ် ၦၤလၢအဟူးဂဲၤမၤတၢ်လၢကညီလံာ်လဲၢ်ဂ့ၢ်၀ီသ့ၣ်တဖၣ်စံး၀ဲဒၣ်န့ၣ်လီၤႉ
လံာ်ထူလံၤလၢအမ့ၢ်“လံာ်ကွဲၢ်ကီၢ်”အံၤ လၢကညီကီၢ်စဲၣ်၊ တလၢၤ(မိၣ်)ကီၢ်စဲၣ်ႇ ၀့ၢ်တကူၣ်ကီၢ်ခီဒိၣ်ဒီး အ့ၣ်ရၣ်၀တံၣ်ကီၢ်ဒိၣ်သ့ၣ်တဖၣ် တၢ်လီၢ်တနီၤဖဲတၢ်ကိၢ်ခါအဆၢကတီၢ် အိးထီၣ်၀ဲဒၣ်တၢ်သိၣ်လိဒီး သိၣ်လိ၀ဲစးထီၣ်လၢ တီၤဖိသၣ် ဒီးတုၤလၢ ၁၁ အပတီၢ်န့ၣ်လီၤႉ
ပါတနီၤကီၢ်ဆၣ် ကညီလံာ်လဲၢ်တၢ်ဆဲးတၢ်လၤ ၦၤပၢၤလီၢ်ဆ့ၣ်နီၤခံဂၤတဂၤ မါ၀့မီၣ်စံး၀ဲလၢ “ထဲပလံာ်အိၣ်ဒီးၦၤအံၤသ့ၣ်တဖၣ်ဒ်သိးသုတလီၤမၢ်အဂီၢ် ပဘၣ်ကတီၤအီၤဖးဃးဃ့လံႉ လံာ်လဲၢ်မ့ၢ်ဟဲအါထီၣ်သပျၢၤန့ၣ် လၢတၢ်ဘူၣ်တၢဘါမ့ၢ်ဂ့ၤႇ လၢလံာ်လဲၢ်မ့ၢ်ဂ့ၤႇ လၢအ၀ဲသ့ၣ်ကဒဲကဒဲအဘၢၣ်စၢၤမ့ၢ်ဂ့ၤတၢ်ဘံဘူကၠၢၤသၢဟဲအိၣ်ထီၣ်သ့န့ၣ်လီၤႉ လၢတၢ်န့ၣ်အဃိ တၢ်၀ဲအံၤန့ၣ်ပ၀ဲဒၣ်ဒုပတူၢ်လိာ်တသ့ဘၣ်ႉ”အဂ့ၢ် အ၀ဲပဲၤထံနီၤဖး၀ဲန့ၣ်လီၤႉ
လံာ်ကွဲၢ်ကီၢ်လၢအမ့ၢ်ကညီကလံာ်ခီၣ်ထံးအံၤ လၢကညီကီၢ်စဲၣ်အပူၤ ဖဲမၠဲၣ်ကၠံငူၣ်သီခါဖးဒိၣ်အိၣ်မူဒံး အကတီၢ်ဘၣ် တၢ်သိၣ်လိအီၤလၢ ကီၢ်ဆၣ်တဘျုးဘ့ၣ်ဒီး လီၤဆီဒၣ်တၢ် ကီၢ်ဆၣ်ဒ်အမ့ၢ် လူၢ်ပျဲၢ်ကီၢ်ဆၣ်ႇ မၠဲၣ်ကၠံၣ်ငူၣ် တၢ်လီၢ်န့ၣ် ဘၣ်တၢ်စူးကါအီၤအါကတၢၢ်ဘၣ်ဆၣ် ကီၣ်ဆၣ်လၢအအိၣ်တ့ၢ်သ့ၣ်တဖၣ်အပူၤ မ့ၢ်၀ဲလံာ်တခါတၢ်သူအီၤစှၤဒ်၀ဲန့ၣ်လီၤႉ
