လါယူၤလံ၁၅သီႇ ၂၀၁၉နံၣ်ႇ စီၤရှါ
ကလုာ်ဒူၣ်ဖီၣ်စုက၀ဲၤကရူၢ် တၢ်ပၢဟီၣ်က၀ီၤပူၤတဖၣ်ဒီး တၢ်သဘံၣ်သဘုၣ်ကဲထီၣ်တၢ်လီၢ်သ့ၣ်တဖၣ်အပူၤ လၢတၢ်ကမၤ၀ဲ(၂၀၂၀)နံၣ်တၢ်ဃုထၢတုၤလၢအန့ၢ်အဂ့ၢ် ကညီကလုာ်ဒံၣ်မိၣ်ကရဲးတ့ၣ်ပာ်တံၣ်(KNDP)ဆီၣ်သခူထီၣ်၀ဲ ကီၢ်စၢဖှိၣ်တၢ်ဃုထၢခီမရှၢၣ်န့ၣ်လီၤ.
ဖဲလါယူၤလံ၁၃သီတုၤ၁၄အနံၤ လၢ၀့ၢ်ဖၣ်အၣ်(Breeze Hotel)အပူၤ ကညီကလုာ်ဒံၣ်မိၣ်ကရဲးတ့ၣ်ပၣ်တံၣ်မၤ၀ဲ လီၢ်ခၢၣ်သးထီဘိကမံတံး ခံဘျီတဘျီအ၀ံၤ ထုးထီၣ်၀ဲလံာ်တၢ်ပာ်ဖျါန့ၣ်လီၤ.
(KNDP)ၦၤပၢလီၢ်ဆ့ၣ်နီၤ မါအီၣ်ပၠံၣ်စိတဲ၀ဲ“ကလုာ်ဒူၣ်ဖီၣ်စုက၀ဲၤတၢ်လီၢ်တဖၣ်အပူၤန့ၣ် လၢ၂၀၁၅နံၣ်အပူၤ တၢ်တမၤန့ၣ်အ၀ဲသ့ၣ်တၢ်ဃုထၢဘၣ်အဃိ ကညီကလုာ်တဖၣ်တဟ့ၣ်ဘၣ်ကညီကလုာ်ပၣ်တံၣ်တၢ်ဖးဘၣ်ႉဘၣ်ဃၣ်၀ဲတၢ်ဟ့ၣ်တၢ်ဖးခွဲးယာ်ႇ လၢတၢ်န့ၣ်အဃိအဃိ၂၀၂၀နံၣ်န့ၣ် အိးထီၣ်ဘၣ်တၢ်ဖးအလီၢ်တုၤလၢန့ၢ်၊ ဒီးမၤန့ၢ်တၢ်ဃုထၢ အဂ့ၢ်န့ၣ်အဲၣ်ဒိးဃ့ထီၣ်”အဂ့ၢ် တဲဘၣ်ခ့ၣ်အဲၣ်စံၣ်လီၤ.
ကညီကီၢ်စဲၣ်အပူၤ ကလုာ်ဒူၣ်ဖီၣ်စုက၀ဲၤကရူၢ်တၢ်ပၢဟီၣ်က၀ီၤတနီၤဒ်အမ့ၢ် ကၠးအ့ဆ့ကၠံကီၢ်ဆၣ်အပူၤ သ၀ီအဖျၢၣ်(၄၀)ဃၣ်ဃၣ်ႇ ကီၤတရံးကီၢ်ဆၣ်အ ပူၤသ၀ီအဖျၢၣ် ၂၀ဘျဲၣ်ႇ လူၤပျဲၢ်ကီၢ်ဆၣ်အပူၤသ၀ီ ၁၀ဘျဲၣ်အံၤ လၢ၂၀၁၅နံၣ် ဒံၣ်မိၣ်ကရ့ၣ်စံၣ်ပၣ်တံၣ်တဖၣ် တမၤဘၣ်တၢ်ဃုထၢဘၣ်အဂ့ၢ် (KNDP) ကီၢ်ဆၣ်ထီဘိကမံးတံာ် ၦၤဘၣ်မူဘၣ်ဒါတဲ၀ဲန့ၣ်လီၤ.
လၢန့ၣ်အမဲာ်ညါ(KNDP)တၢ်အိၣ်ဖှိၣ်၀ံၤ လံာ်တၢ်ပာ်ဖျါအပူၤ တမ့ၢ်ထဲတၢ်လီၢ်လၢတၢ်သဘံၣ်သဘုၣ်အိၣ်ဘၣ်ဒီး ကီၢ်ပဒိၣ်၀ဲၤကျိၤအပူၤ သ၀ီလၢအမံၤတအိၣ် တၢ်လီၢ်တဖၣ်အပူၤ တၢ်ကမၤန့ၢ်တၢ်ဃုထၢႇ ထံကီၢ်ခိၣ်ဂီၤတအိၣ်ဘၣ်အဃိ တဒိးန့ၢ်ဘၣ်တၢ်ဟ့ၣ်တၢ်ဖးတၢ်ခွဲးတၢ်ယာ်ဘၣ်တၢ်ဂ့ၢ် တဖၣ်အံၤ တၢ်ကဘှါရှဲအီၤအဆိချ့ကန့ၢ်အဂီၢ် ဆီၣ်သခူထီၣ်၀ဲၦၤဘၣ်မူဘၣ်ဒါတဖၣ်အဂ့ၢ်ပၣ်ဃုာ်န့ၣ်လီၤ.
(KNDP)ထီဘိကမံတံးတၢ်အိၣ်ဖှိၣ်လၢတၢ်မၤအီၤခံသီကတီၢ်အံၤ ပၣ်တံၣ်ခၢၣ်စးတဖၣ်အမဲာ်ညါ ခ့ၣ်အဲၣ်ယူၣ် ကညီဒီကလုာ်စၢဖှိၣ်ကရၢ ကရၢခိၣ်စီၤမူတူစ့ဖိႇ နဲၣ်ရွဲၣ်သဃဲၤ၂ ပဒိၣ်စီၤလးထိႇ လီၢ်ခၢၣ်သးထီဘိကမံးတံာ် ပဒိၣ်မါည့မီၣ် ဃုာ်ဒီးခ့ၣ်အဲၣ်ယူၣ် ၦၤဘၣ်မူဘၣ်ဒါတဖၣ် ဒီးဂံၢ်ခီၣ်ထံးကမျၢၢ်တၢ်ကရၢကရိခၢၣ်စးခဲလၢာ် ၦၤကညီနီၣ်ဂံၢ်၁၀၀ဃၣ်ဃၣ်ဟဲထီၣ်၀ဲန့ၣ်လီၤ.
ပဒိၣ်မါည့မီၣ်လၢ ခ့ၣ်အဲၣ်ယူၣ်တကပၤတဲ၀ဲ“ကညီဒီတကလုာ်အဂီၢ် တၢ်မၤအီၤလၢဂံၢ်ဘါကလုာ်ကလုာ် လၢတဂၤလၢသနၢၣ်ကတီၢ် ခ့ၣ်အဲၣ်ယူၣ်သနာ်က့ ဟဲပၣ်ဃုာ်မၤသကိးအသိး ဟဲထီၣ်၀ဲ(KNDP)တၢ်အိၣ်ဖှိၣ်အံၤန့ၣ်လီၤ”အဂ့ၢ် တဲဘၣ်ခ့ၣ်အဲၣ်စံၣ်န့ၣ်လီၤ.
(KNDP)ပၣ်တံၣ်လၢဘၣ်တၢ်ပာ်ဖှိၣ်အီၤလၢ ကညီကီၢ်စဲၣ်အပူၤပၣ်တံၣ်သၢဖုအံၤန့ၣ် ဒိးန့ၢ်တၢ်ပျဲလၢကီၢ်ပဒိၣ်အအိၣ်ဖဲ ၂၀၁၈နံၣ်ႇ လါဖြ့ၣ်ဘြူၤအါရံၤ၂၂သီ အနံၤန့ၣ်လီၤ.
