မုၢ်၀ါထီၣ်ဆီအိၣ်အိသီၣ်ႇ မံဖုးမံဖုးယပၢၢ်ထီၣ်
ဘံၣ်လီၤမဲာ်ချံထံၣ်တမှံႇ စီၤဘးအူကၠံအတၢ်သံ
အီၤႉႉတဆံခံသီလါခူးအံၤႇ မ့ၢ်၀ဲမၤထူရၤမုၢ်နံၤ
လါအီကၢးစ်မူခိၣ်ထံဖိႇ ဟဲစိာ်ဃုာ်တၢ်သးဘၣ်ဒိႉ
မီၣ်အဲးၦၤယီးကဒါဘီႇ ဆါအီၣ်ကွံာ်အၦၤကညီ
စ့ၣ်လွ့ၣ်သုးဟဲက၀ီၤခးႇ ကီၢ်ခိၣ်ဘၣ်လုၢ်ထီၣ်ကွံာ်သး
သ့ၣ်ညါလီၤသးလၢကသံႇ ဘၣ်ဆၣ်တအိၣ်ဒီးတၢ်ပျံၤ
တၢ်သဘျ့ကန့ၢ်အဂီၢ်ႇ ဟ့ၣ်လီၤနဲနသးနီၢ်ကီၢ်
မၤသံနၤတခူၣ်လီၤနၤႇ ကွံာ်လီၤဆူပီၣ်လဲၣ်ခၢၣ်သး
၀ါဃံနံၤ၀ဲၢ်ပျီၢ်ကဒီႇ လၢယနၢ်ပူၤသီၣ်စဲထီႉ
ဘံၣ်လီၤမဲာ်ယဆိမိၣ်စိႇ တၢ်ပၢၢ်ဆၢတၢ်လဲၤခီဖျိ
ထံၣ်မှံက့ၤတၢ်ကဲထီၣ်သးႇ ဘူးဖးလၢသးက့ၣ်ဖး
၀ါဃံခဲၣ်ၦၤထဲတဘျးႇ သၢလွံၢ်ယဲၢ်ဖုပလီၤဖး
နာ်အီၣ်၀ါဃံအတၢ်တဲႇ ဖှံလိာ်က့ၤသးကဒဲဒဲ
ဖှံလိာ်သးအခီၣ်တချဲႇ မၤနၢၤပျီဘၣ်လီၤကွံာ်၀ဲ
ကညီဖိတၢ်နံၤကမှံႇ ဆီတလဲဆူတၢ်မဲာ်ထံ
၀ါဃံနံၤ၀ဲၢ်ပျီၢ်ကဒီႇ လၢယနၢ်ပူၤသီၣ်စဲထီႉ
၀ါဃံကူၣ်ထီၣ်ဒီးတမံၤႇ လၢကမၤ၀ဲတၢ်လီၤနံၤ
ခ့ၣ်အဲၣ်ယူၣ်ၦၤနီၣ်ဂံၢ်(၁), ဘၣ်သုးကွံာ်ဆူတၢ်အချၢ
“ငပွ့”ၦၤနးတချုးသံႇ မၤထွဲ၀ါဃံတၢ်ကျဲၤလံ
မၤထူရၤပဒိၣ်မါရှၤႇ ၦၤကလုာ်ဂီၢ်သွံၣ်ဘၣ်ယွၤ
၀ါဃံနံၤ၀ဲၤကပျီၢ်ကဒီႇ လၢယနၢ်ပူၤသီၣ်စဲထီႉ
တၢ်အံၤမ့ၢ်လၢမနုၤဃိႇ “မ့ၢ်လၢပတဃူဖိးဃိ”
တမ့ၢ်၀ါဃံကျီးအဃိႇ “မ့ၢ်ပနးတချုးသံဃိ”
၀ါဃံစံးလၢအအဲၣ်ၦၤႇ ခိၣ်နၢ်ဧၢကွၢ်နာ်ကွၢ်နာ်
မှံၤၦၢ်ကိၢ်တၢ်လၢပဂီၢ်ႇ လၢလုၢ်လၢထါဟ့ၣ်ပလီၢ်
“ဖီပၢ်အဲၣ်နၤအဲၣ်ဖူလဲးႇ ဖီပၢ်ဒါဘၢဂုၢ်သီမဲ” စံး၀ဲ
၀ါဃံတမ့ၢ်အဲၣ်နၤယၤႇ “မ့ၢ်ဒၣ်တၢ်ပာ်မၤအသး”
လံၣ်အီၣ်ၦၤတမ့ၢ်တဘျီႇ နံၣ်နွံဆံတပယူာ်ဃီ
တၢ်အံၤမးနမ့ၢ်တထံၣ်ႇ ကမ့ၢ်ဒၣ်လၢနမဲာ်ဘံၣ်
တခွဲကနၣ်ထံၣ်ထံဆးႇ မ့ၢ်လၢနလူၤဘၣ်နသး
ယုၢ်လီၤနဲတခွဲကနၣ်လ နကကဲထီၣ်၀ါဃံဆၣ်
တၢ်ပီၢ်ယၢ်နမ့ၢ်စဲၤခံႇ စိၤသးနဘၣ်တူၢ်သံႉ
အီၤႉႉမုၢ်၀ါထီၣ်ဆီအိၣ်အိသီၣ်ႇ မံဖုးမံဖုးယပၢၢ်ထီၣ်
ဘံၣ်လီၤမဲာ်ချံထံၣ်တမှံႇ စီၤဘးအူကၠံအတၢ်သံ
ဃုာ်ဒီးခိၣ်နၢ်ဒီးသိၣ်ဒူႇ လၢဟ့ၣ်လီၤတ့ၢ်သးသမူ
သုတၢ်မၤဒီးသုတၢ်အဲၣ်ႇ သးပ့ၤနီၣ်ကသ့ဒ်လဲၣ်
လၢလီၢ်မံခိၣ်ချံးလီၤခီၣ်ႇ ဟ့ၣ်ထီၣ်ယဲနၤတၢ်ယူးယီၣ်ႉ
လၢႉႉတံနိ(သ၀ီတါ)
