လါနိၣ်၀့ဘၢၣ် ၂၃ သီႇ ၂၀၁၉ နံၣ်ႇ စီၤရှါ
ခ့ၣ်အဲးစံၣ်–ကညီတၢ်ကစီၣ်၀ဲၤလီၢ်ခိၣ်သ့ၣ် တီခိၣ်ရိၣ်မဲ၀ဲဒီးမၤ၀ဲတၢ်တၢၣ်ပီၣ်တဲသကိးဘၣ်ဃးဒီး လီၢ်က၀ီၤတၢ်ဂုၤထီၣ်ပသီထီၣ်အတၢ်ဖံးတၢ်မၤတဖၣ်ဒီး လီၢ်က၀ီၤဖိအတၢ်ထံၣ်တခါဖဲ ကညီကီၢ်စဲၣ် ကီးတရံးကီၢ်ဆၣ် အီဖး ဖးဒိၣ်သ၀ီအပူၤ တီၤထီကၠိ(အဒ့)အံၤ ဖဲလါနိၣ်၀့ဘၢၣ် ၂၃ သီ အနံၤန့ၣ်လီၤႉ
ဒ်သိးဒီး လီၢ်က၀ီၤဖိတဖၣ်ကသ့ၣ်ညါဘၣ်၀ဲ လီၢ်က၀ီၤတၢ်ဂုၤထီၣ်ပသီထီၣ်အတၢ်ရဲၣ်တၢ်ကျဲၤအကလုာ်တဖၣ်အဂီၢ် အ၀ဲသ့ၣ်အတၢ်ထံၣ်တၢ်ပာ်သးတဖၣ်ဒီး တၢ်မိၣ်န့ၢ်သးလီတဖၣ်န့ၣ် ကပာ်ဖျါထီၣ်၀ဲပျီပျီရှဲရှဲဒီး တၢၣ်ပီၣ်တဲသကိးအီၤကသ့အဂီၢ် ပညိၣ်အီၤဒီးမၤ၀ဲတၢ်တၢၣ်ပီၣ်တဲသကိးလီၤ အဂ့ၢ်န့ၣ် ခ့ၣ်အဲၣ်စံၣ်အဲဒံထၢၣ် နါဖီဂ့ၤ စံး၀ဲဒၣ်လီၤႉ
အ၀ဲစံး၀ဲလၢ “တၢ်တၢၣ်ပီၣ်တဲသကိးတခါအံၤမ့ၢ်၀ံၤအလီၢ်ခံန့ၣ် ကီးတရံးကီၢ်ဆၣ် လီၢ်က၀ီၤဖိတဖၣ် ကသ့ၣ်ညါဘၣ်၀ဲတၢ်ဂုၤထီၣ်ပသီထီၣ်အဂ့ၢ်အကျိၤတဖၣ်ဒီး တဲတၢ်ကဘူၣ်ထီၣ်၀ဲန့ၣ် ပဆၢမုၢ်လၢ်၀ဲလီၤႉ မ့ၢ်အိၣ်ဒ်န့ၣ်မၣ် လီၢ်က၀ီၤဖိတဖၣ်ႇ ၦၤဘၣ်မူဘၣ်ဒါခိၣ်နၢ်တဖၣ်ႇ ဒီးတၢ်ကရၢကရိလၢအဂၤတဖၣ် လၢတၢ်ဂုၤထီၣ်ပသီထီၣ်အပူၤန့ၣ် ကပာ်ဖှိၣ်ထီၣ်သးဒီးကဖံးမၤသကိးတၢ်ႇ အဂံၢ်အဘါကဟဲဂ့ၤထီၣ်၀ဲဒၣ်န့ၣ်လီၤ” အဂ့ၢ်န့ၣ်စံး၀ဲဒၣ်လီၤႉ
လၢတၢ်တၢၣ်ပီၣ်တဲသကိးအပူၤန့ၣ် တၢ်ပဲာ်ထံနီၤဖးသကိး၀ဲဘၣ်ဃး လီၢ်က၀ီၤတၢ်ဂုၤထီၣ်ပသီအတၢ်ဖံးတၢ်မၤတဖၣ်ႇ လၢတၢ်ဂုၤထီၣ်ပသီထီၣ်တၢ်ဖံးတၢ်မၤအပူၤန့ၣ် တၢ်ကရၢကရိတဖၣ်တၢ်ပၣ်ဃုာ်မၤသကိးတၢ်ႇ ဘၣ်ထွဲဒီး လီၢ်က၀ီၤတၢ်တၤတၢ်အတၢ်အိၣ်သးတဖၣ်ႇ တၢ်ကဲဘျုးကဲဖှိၣ်တဖၣ်ႇ တၢ်အလိၣ်အဒိၣ်ကတၢၢ် တၢ်ဂုၤထီၣ်ပသီထီၣ်တၢ်ဖံးတၢ်မၤတဖၣ်ႇ တၢ်ကစီၣ်အသနၢၣ်ႇ တၢ်ဟ့ၣ်ကူၣ်ဟ့ၣ်ဖးတၢ်တဖၣ်ဒီး တၢ်သံကွၢ်စံးဆၢအသနၢၣ်တဖၣ် ဘၣ်တၢ်မၤ၀ဲဒၣ်န့ၣ်လီၤႉ
လီၢ်က၀ီၤတၢ်ဂုၤထီၣ်ပသီထီၣ်စံးတၢ်န့ၣ် ကျဲႇ တၢ်တ့ထီၣ်န့ၢ်တိၤႇ ဘၣ်ဃးနီၢ်ခိတၢ်ဂုၤထီၣ်ပသီထီၣ် တကးဘၣ်ႇ တၢ်ကူၣ်ဘၣ်ကူၣ်သ့ ဘၣ်ဃးနီၢ်သးတၢ်ဂုၤထီၣ်ပသီထီၣ်သ့ၣ်တဖၣ် ပၣ်ဃုာ်၀ဲန့ၣ်လီၤႉ ကီးတရံးကီၢ်ဆၣ်ပူၤ တၢ်လၢအလိၣ်ဆိကတၢၢ်န့ၣ် ဘၣ်ဃးဒီးလီၢ်က၀ီၤတၢ်ဂုၤထီၣ်ပသီထီၣ်တၢ်ဖံးတၢ်မၤတဖၣ်န့ၣ် ၦၤဒုးအိၣ်ထီၣ် ‘သွံၣ်’ ၦၤတ၀ၢတၢ်ဂုၤထီၣ်ပသီထီၣ်ကရူၢ်တဂၤ လၢအမ့ၢ် မါသ့စီၤအံၤ စံး၀ဲဒ်အံၤလီၤႉ
“ဒ်သိးဒီးလီၢ်က၀ီၤဖိတဖၣ် တၢ်ကူၣ်ဘၣ်ကူၣ်သ့ကလဲၤထီၣ်လဲၤထီအဂီၢ် ပကဘၣ်မၤန့ၢ်အ၀ဲသ့ၣ် နီၢ်ဂံၢ် ၁ န့ၣ် မ့ၢ်တၢ်ကူၣ်ဘၣ်ကူၣ်သ့လီၤႉ နီၣ်ဂံၢ် ၂ န့ၣ် ဒ်သိးဒီးတၢ်ဆါတၢ်ၦ့ၤမုၢ်ကျိၤ၀ဲၤကွာ်သနူကလဲၤထီၣ်လဲၤထီအဂီၢ် ပကဘၣ်မၤဖျါထီၣ်အမိၢ်လံၤမိၢ်ၦၢ်ႇ ပကဘၣ်ဒုးအိၣ်ထီၣ်န့ၢ်၀ဲ တၢ်ဖံးတၢ်မၤအကျိၤအကျဲႇ နီၣ်ဂံၢ် ၃ တခီန့ၣ် ပကဘၣ်ဟံးန့ၢ် လီၢ်က၀ီၤဖိတဖၣ်အတၢ်ဘၣ်သးဒီးတၢ်အၢၣ်လီၤတူၢ်လိာ်ႇ ပကဘၣ်ထိၣ်ဃူထိၣ်ဖိးခဲလၢာ်၀ံၤမး ကျဲႇ တိၤ ဃုာ်ဒီးတၢ်ဂုၤထီၣ်ပသီထီၣ်အဂၤတဖၣ်န့ၣ် ယအဲၣ်ဒိးတဲလၢ မ်သုကမၤဖျါထီၣ်အမိၢ်လံၤမိၢ်ၦၢ်န့ၣ်လီၤ” အဂ့ၢ်န့ၣ် စံး၀ဲဒၣ်လီၤႉ
တကီၢ်ခါဆၢကတီၢ်အံၤ ပဒိၣ် အခီပနံၣ်တဖၣ်န့ၣ် တနီၤန့ၣ် တ့ထီၣ် ကျဲႇ တိၤႇ လၢအမ့ၢ် လီၢ်က၀ီၤ တၢ်ဂုၤထီၣ်ပသီထီၣ်တဖၣ်န့ၣ် မၤဘၣ်ဒိ၀ဲလီၢ်က၀ီၤဖိတဖၣ်အတၢ်ခွဲးတၢ်ယာ်တဖၣ်အဃိႇ ကပာ်ကဲ၀ဲလီၢ်က၀ီၤဖိတဖၣ် အတၢ်ပာ်သူၣ်ပာ်သးတဖၣ်ႇ ဒီး တၢ်တၢၣ်ပီၣ်တဲသကိးအီၤမ့ၢ်၀ံၤမး ကြၢးလၢတၢ်က မၤအီၤအဂ့ၢ်န့ၣ် ကီးတရံး လီၢ်က၀ီၤဖိတဖၣ် စံး၀ဲလီၤႉ
လၢတၢ်တၢၣ်ပီၣ်တဲသကိးတနံၤအံၤ ကညီၦၤဖီၣ်စုက၀ဲၤကရူၢ် (၃)ဒူၣ် လၢအမ့ၢ် ကညီဒီကလုာ်စၢဖှိၣ်ကရၢ–KNU, ကညီတၢ်မုာ်တၢ်ခုၣ်ကီၣ်ကးကရၢ KNU/KNLA (PC), တၢ်ဘၣ်ဘျုးဒံၣ်မိၣ်ကရ့ၣ်စံၣ် ကညီသုးမုၢ်ဒိၣ်– DKBA ၦၤဘၣ်မူဘၣ်ဒါတဖၣ်ႇ ကညီထံရူၢ်ကီၢ်သဲးပၣ်တံၣ် ကရၢဖိတဖၣ်ႇ ကညီၦၤတ၀ၢတၢ်ဂုၤထီၣ်ပသီထီၣ် ကရၢဖိတဖၣ်ႇ ဒူသ၀ီကရူၢ် ၦၤပၢဆှၢတၢ်ကရၢဖိတဖၣ်ႇ ကညီလံာ် လဲၢ်ဒီးတၢ်ဆဲးတၢ်လၤ ကရၢဖိတဖၣ်ႇ ကီးတရံးဒီး ကၠၤအ့စ့ၣ်ကၠံ ကီၢ်ဆၣ်တဖၣ်အပူၤ လီၢ်က၀ီၤကမျၢၢ်ခဲလၢာ် အဂၤ ၅၀ ဘျဲၣ် ဟဲထီၣ်၀ဲဒၣ်န့ၣ်လီၤႉ
