လါဒံၣ်စ့ဘၢၣ် ၁၀ သီႇ ၂၀၁၉ နံၣ်ႇ စီၤရှါ
၂၀၂၀ နံၣ်အပူၤ တၢ်ကမၤ၀ဲ တၢ်ဃုထၢဖးဒိၣ်အံၤန့ၣ် တပာ်ဖှိၣ်ထီၣ်သးဒီးပၣ်တံၣ်နီတဖုဘၣ် ဒီး ကနုာ်လီၤ၀ဲတၢ်ဃုထၢအဂ့ၢ်န့ၣ်ကညီကလုာ်ဒံၣ်မိၣ်ကရဲၣ်တံၣ်ပၣ်တံၣ် KNDP ပၣ်တံၣ်ခိၣ်မါအီၣ်ပၠံၣ်စိ စံးလီၤ၀ဲဒၣ်န့ၣ်လီၤ
တကီၢ်ခါ KNDP အံၤန့ၣ်တၢ်ကစီၣ်ဟူထီၣ်သါလီၤလၢကပာ်ဖှိၣ်ထီၣ်သးဒီး ကီၢ်စၢဖှိၣ်သွံၣ်ဃူဖိး ဒီး တၢ်ဂုၤထီၣ်ပသီထီၣ်ပၣ်တံၣ် USDP အဖီခိၣ်န့ၣ်မါအီၣ်ပၠံၣ်စိစံးဘၣ်ခ့ၣ်အဲးစံၣ်ဖဲလါဒံၣ်စ့ဘၢၣ် ၉ သီအနံၤန့ၣ်လီၤႉ
အ၀ဲစံး၀ဲလၢ “ၦၤဟးတဲနါစိၤတၢ်ဖိတဲ၀ဲလၢ ပပာ်ဖှိၣ်ထီၣ်သးဒီး USDP လံန့ၣ်လီၤႉအနီၢ်ကီၢ်တခီန့ၣ် လ့ၤတက့ၤတမ့ၢ်ဘၣ်န့ၣ် ယအဲၣ်ဒိးတဲလီၤတံၢ်လီၤဆဲးလီၤႉ ဂံၢ်ခီၣ်ထံးပပၣ်တံၣ်သနူအပူၤန့ၣ်ကလုာ်ဒူၣ်ပၣ်တံၣ်သနူ လၢအဒ်သိးလိာ်အသးတဖၣ်န့ၣ် ကပာ်ဖှိၣ်ထီၣ်သးန့ၣ်ပၣ်၀ဲလီၤႉ ပမ့ၢ်တဲလၢအဖုၣ်န့ၣ် ၂၀၂၀ တၢ်ဃုထၢတ၀ံၤတစု ဒံးဘၣ်န့ၣ် ပတပာ်ဖှိၣ်ထီၣ်သးဒီးပၣ်တံၣ်အဂၤနီတဖုဘၣ်ႉ ၂၀၂၀ တၢ်ဃုထၢမ့ၢ်၀ံၤဘၣ်ဆၣ်ပကဆိကမိၣ်ဒံးလီၤႉ လၢပကပာ်ဖှိၣ်ထီၣ်သးန့ၣ်တမ့ၢ်ဘၣ်” အဂ့ၢ်န့ၣ်စံး၀ဲလီၤႉ
တကီၢ်ခါခဲအံၤ ၂၀၂၀ နံၣ် တၢ်ဃုထၢဖးဒိၣ်အံၤအဂီၢ် ကညီထံရူၢ်ကီၢ်သဲးပၣ်တံၣ် အိၣ်၀ဲ ၄ ပၣ်တံၣ် ဒီး တၢ်ဖးဟီၣ်က၀ီၤ တတီၤန့ၣ် ကညီပၣ်တံၣ်ခၢၣ်စးတဂၤ ကဘၣ်နုာ်လီၤတြပၢ၀ဲကန့ၢ်အဂီၢ် တၢ်ဂုာ်ကျဲးစၢးမၤ၀ဲအဂ့ၢ်န့ၣ်ကညီ ထရူၢ်ကီၢ်သဲးပၣ်တံၣ်ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ
အခဲအံၤန့ၣ်ကညီထံရူၢ်ကီၢ်သဲးပၣ်တံၣ် လၢအအိၣ်ဆီလီၤအသးဖဲကညီကီၢ်စဲၣ်အပူၤန့ၣ်မ့ၢ်၀ဲ KNDP ဒီး ဖျိၤ=စှီၤ ဒံၣ်မိၣ်ကရဲၣ်တံၣ်ပၣ်တံၣ် (PSDP)လၢအအိၣ်ဆီလီၤအသးဖဲ၀့ၢ်တကူၣ်န့ၣ် မ့ၢ်၀ဲ ကညီကမျၢၢ်ပၣ်တံၣ် (KPP) ဒီး ကညီကလုာ်ပၣ်တံၣ် (KNP) ခဲလၢာ် အိၣ်၀ဲ ၄ ပၣ်တံၣ်န့ၣ်လီၤႉ
