လါမးရှး ၂၂ သီႇ ၂၀၂၀ နံၣ်ႇ န့ၣ်နီၣ်
ကီၢ်ကၠီၣ်တဲၣ်–ကီၢ်ပယီၤကီၢ်ဆၢ ကညီကီၢ်စဲၣ် မၠၣ်၀တံၣ်၀့ၢ်အံၤ ဖဲလါမးရှး ၂၁ သီန့ၣ် တရူးအထံဖိကီၢ်ဖိလၢအသံတဂၤအံၤ တၢ်တထံၣ်န့ၢ်၀ဲ ကိၣ်ရိၣ်နၣ်တၢ်ဆါဃၢ် (Covid-19) တၢ်ဆါအက့ၢ်အဂီၤဘၣ်အဂ့ၢ်န့ၣ် မၠၣ်၀တံၣ်ကီၢ်ရ့ၣ် ထံဖိကီၢ်ဖိတၢ်ဆါဟံၣ် ဒီၣ်ကထၢၣ်ယၣ်နဲၣ်အူ ထုးထီၣ်ဘိးဘၣ်ရၤလီၤအဃိ သ့ၣ်ညါဘၣ်လီၤႉ
မၠၣ်၀တံၣ်၀့ၢ် နီၣ်ဂံၢ်(၂)က၀ီၤဒ့ႇ သူမှဲကျိကၢၢ်နံၤႇ သုးခိးကီၢ်ဆၢ =BGF သုးကရူၢ် တၢ်ပၢဟီၣ်က၀ီၤ သဲပိၣ်တၢ် ဘံၣ်တၢ်ဘၢြတဲၤ (Heng Sheng-1) ကၣ်စံၣ်နိၣ်တၢ်တၤကျိၣ်တၤစ့အကရၢၢ်အပူၤႇ တရူးအထံဖိကီၢ်ဖိလၢ အအိၣ်ဟဲလၢ ယီၣ်လ့ကီၢ်စဲၣ်ႇ စိကီၣ်၀့ၢ်လၢအမ့ၢ် ရှီၣ်ကဲ ၂၉ နံၣ်အံၤႇ ဖဲလါမးရှး ၂၁ သီ မုၢ်နၤခီအနၣ်ရံၣ် ၁၀း၅၂ မံးနံး အဆၢကတီၢ်န့ၣ် သံ၀ဲဒၣ်ကဲထီၣ်သးန့ၣ်လီၤႉ
ၦၤလၢအသံတဂၤအံၤ အပူၤကွံာ် ၂ သီန့ၣ် တၢ်ကိးအီၣ်အီၤအဃိ ဖဲလါမးရှး ၂၁ သီ မုၢ်နၤခီန့ၣ် တၢ်ကိးတၢ်ဆါအံၤဟဲနးထီၣ်၀ဲအဃိ ဘၣ်တၢ်ဆှၢအီၤဆူတၢ်ဆါဟံၣ်လၢအဘူးဒီးသဲပိၣ်ြတဲၤဒီး ဖဲမုၢ်နၤခီ ၈ နၣ်ရံၣ်တခီအဆၢကတီၢ်န့ၣ်လီၤဃံၢ်၀ဲဒၣ်ဒီးသးပ့ၤနီၣ်သးန့ၣ်လီၤႉ လၢတၢ်န့ၣ်အဃိ ဘၣ်တၢ်ဆှၢအီၤဆူ နီၣ်ဂံၢ်(၄)က၀ီၤဒ့ မၠ့ၣ်တၣ်မိၣ်တၢ်ဆါဟံၣ်၀ံၤအလီၢ်ခံ ဖဲန့ၣ်တဆီ ဖဲတၢ်ဆှၢအီၤဆူမၠၣ် ၀တံၣ်ကီၢ်ရ့ၣ်တၢ်ဆါဟံၣ်ဖးဒိၣ်အခါန့ၣ် သံ၀ဲဒၣ်လၢကျဲပူၤလီၤအဂ့ၢ်န့ၣ် မၠၣ်၀တံၣ်ကီၢ်ရ့ၣ် ထံဖိကီၢ်ဖိတၢ်ဆါဟံၣ် ထုးထီၣ်ဘိးဘၣ်ရၤလီၤ၀ဲန့ၣ်လီၤႉ
ဘၣ်ထွဲဒီးတရူးအထံဖိကီၢ်ဖိသံတၢ်ဂ့ၢ်န့ၣ် ဖဲလါမးရှး ၂၂ သီဂီၤခီအဆၢကတီၢ်န့ၣ် မၠၣ်၀တံၣ်ကီၢ်ရ့ၣ် ထံဖိကီၢ်ဖိတၢ်ဆါဟံၣ်ဖးဒိၣ် တၢ်ဟါဟံၣ်အခိၣ် ဒီၣ်ကထၢၣ်ယၣ်နဲၣ်အူႇ တၢ်ကွဲးတၢ်ကါကသံၣ်ကရၣ်ဒိၣ် ဒီၣ်ကထၢၣ် ညၣ်စိလၣ်ဃုာ်ဒီး ကသံၣ်သရၣ်တဖၣ် ကွဲးကါ၀ဲဒၣ်ၦၤလၢအသံ(ရှီၣ်ကဲ)အံၤန့ၣ်လီၤႉ
လၢတၢ်ကွဲးတၢ်ကါဒီးသမံသမိးအသိးန့ၣ် ၦၤလၢအသံတဂၤအံၤ အသူၣ်န့ၣ်ဒိၣ်တလၢ၀ဲဒီးအခိၣ်နူာ်လၢစုထွဲတပၤ အသလီဒီး အခိၣ်နူာ်အဘၢၣ်စၢၤန့ၣ် သွံၣ်ဒုးသးကအိၣ်လၢ ၂၀၀ စံၣ်စံၣ်ဒီး ၦၤအံၤသံခီဖျိလၢ သွံၣ်ထီၣ်ဒုးအံၤအဃိလီၤဒီး သံခီဖျိလၢ Covid -19 တၢ်ဆါဃၢ်အံၤတမ့ၢ်ဘၣ်အဂ့ၢ်န့ၣ် တၢ်ဆါဟံၣ်မူဒါခိၣ် ဒီကထၢၣ် ယၣ်နဲၣ်အူ စံး၀ဲန့ၣ်လီၤႉ
ကညီကီၢ်စဲၣ် မၠၣ်၀တံၣ်၀့ၢ်ပူၤ လၢတၢ်ဂ့ၢ်အကလုာ်ကလုာ် တရူးအထံဖိကီၢ်ဖိတဖၣ်နုာ်လီၤအိၣ်ဆိး၀ဲ ကအိၣ်လၢ ၁၀ႇ၀၀၀ ဂၤ ဃၣ်ဃၣ်ညါန့ၣ်လီၤႉ ဖဲအပူၤကွံာ် တချုးဒံးလၢမၠၣ်၀တံၣ်–မဲၢ်ဆီး နီၣ်ဂံၢ်(၁)တၢ်ရ့လိာ်မုာ်လိာ်တိၤ တၢ်တကးတံာ်အီၤဒံးဘၣ်န့ၣ်ႇ ကီၢ်ကၠီၣ်တဲၣ်တကပၤ ကးတံာ်ဃာ်၀ဲဒၣ်တရူးအထံဖိကီၢ်ဖိ (Arrival Visa) အဃိႇ ကီၢ်ကၠီၣ်တဲၣ်–ကီၢ်ပယီၤကီၢ်ဆၢ ၦၤထံဂုၤကီၢ်ဂၤဖိအတၢ်နုာ်လီၤဟးထီၣ်အလီၢ်တခါလၢအမ့ၢ် မၠၣ်၀တံၣ်–မဲၢ်ဆီး နီၣ်ဂံၢ်(၁) တၢ်ရ့လိာ်မုာ်လိာ်တိၤတဆီ လၢမၠၣ်၀တံၣ်၀့ၢ်ပူၤတရူး အထံဖိကီၢ်ဖိတဖၣ် နုာ်လီၤအိၣ်ဆိး၀ဲအိၣ်၀ဲဒၣ်အဃိ လီၢ်က၀ီၤဖိတဖၣ်ဘၣ်ယိၣ်ဘၣ်ဘှီ၀ဲဒၣ်လၢ ကိၣ်ရိၣ်နၣ်တၢ်ဆါအံၤ ကရၢ်လီၤအသးလီၤအဂ့ၢ် သ့ၣ်ညါဘၣ်လီၤႉ
