လါမ့ၤ ၂၅ သီႇ ၂၀၂၀ နံၣ်ႇ စီၤမၠၣ်အူသၣ်
ကညီကီၢ်စဲၣ် ကၠၤအ့စ့ၣ်ကၠံကီၢ်ဆၣ်အပူၤ ဖဲလါမ့ၤ ၂၀ သီအနံၤန့ၣ် KNU ကညီဒီကလုာ်စၢဖှိၣ်ကရၢႇ ကီၢ်ပယီၤပၢၤကီၢ်သုးကရူၢ်တဖၣ်ဒီး သုးခိးကီၢ်ဆၢ (BGF) ကရူၢ်တဖၣ် ပာ်ဖှိၣ်ထီၣ်သးဒီး ကျီဟးဂီၤဒီးဒွဲၣ်အူကွံာ်၀ဲ ဘဲထံထူၣ်(ဘိန်းစာပင်) ပာ်ဖှိၣ်ခဲလၢာ် ၂ႇ၀၀၀ ဘျဲၣ် ဖဲတီၣ်ဒံသ၀ီအပူၤအဂ့ၢ်န့ၣ် သ့ၣ်ညါဘၣ်လၢ ကရူၢ်ပာ်ဖှိၣ် တဖၣ်အအိၣ်န့ၣ်လီၤႉ
ကရူၢ်ပာ်ဖှိၣ်တဖၣ်လၢ အလဲၤကျီမၤရှဲလဲ၀ဲဘဲထံထူၣ်တဖၣ်အံၤ အသးနံၣ်အိၣ်၀ဲ(၂ နံၣ်)ဘျဲၣ်ဒီး မ့ၢ်တၢ်မုၢ်တၢ်ဘိလၢတၢ်သူၣ်စးအဒ့တဖၣ်ဒီးႇ လၢကရၢၢ် ၄ ဘ့ၣ်အပူၤ ဘၣ်တၢ်သူၣ်ကျဲၣ်ကျီဃုာ်၀ဲအဃိ ဒ်သိးကဟံးထီၣ်ဖီၣ်ထီၣ်ဒီးဟံးဂ့ၢ်၀ီကန့ၢ်အဂီၢ် တၢ်ကတီၣ်ဖျါထီၣ်၀ဲလၢတၢ်ဖီခိၣ်အဂ့ၢ်န့ၣ် KNU ၀ီၢ်ရီကီၢ်ဆၣ် ကညီဒီကလုာ်ပၢၤကီၢ်သုး -KNPF ၦၤဘၣ်မူဘၣ်ဒါ စံး၀ဲလီၤႉ
“ဘဲထံအလၣ်မ့ၢ်ဂ့ၤႇ အသံၣ်မူၤဘှီးတဖၣ်မ့ၢ်ဂ့ၤ လၢကလုာ်တၢ်ဘံၣ်တၢ်ဘၢအဂီၢ် ကီၢ်ဆၣ်အပူၤန့ၣ် တၢ်ထုးထီၣ်ဘိးဘၣ်ရၤလီၤဃာ်အိၣ်၀ဲဒၣ်န့ၣ်လီၤႉ တၢ်ဂ့ၢ်အ၀ဲအံၤ လၢခ့ၣ်အဲၣ်ယူၣ်တကရူၢ်အဂီၢ်န့ၣ် ကဃုသ့ၣ်ညါဒီးကနၢ်ပၢၢ်အီၤအဂီၢ်န့ၣ် တမ့ၢ်တၢ်ညီဘၣ်ႉ တၢ်ဟ့ၣ်ဒုးသ့ၣ်ညါၦၤဒီးဟီၣ်ခိၣ်ဂီၤနီၣ်ဂံၢ်အဖီခိၣ် တဂၤဒီးတဂၤလၢတၢ်သ့ၣ်ညါပာ်ပနီၣ်လိာ်သးအသိး ပပာ်ဖှိၣ်မၤသကိးတၢ်လီၤ” အဂ့ၢ်န့ၣ် KNU ၀ီၢ်ရီကီၢ်ဆၣ် ၦၤပၢၤလီၢ်ဆ့ၣ်နီၤ ပဒိၣ်စီၤမီၤရွ့ၣ် စံးဘၣ်ခ့ၣ်အဲးစံၣ်လီၤႉ
ဘၣ်ထဲဒွီးကသံၣ်မူၤဘှီးတၢ်ဂ့ၢ်အံၤ ပမ့ၢ်အိၣ်၀ဲဒၣ်ဖှံဖှံန့ၣ် ကညီဖိတဖၣ်အတၢ်သကဲးပ၀းကဟးဂီၤ၀ဲဒၣ်ဒီး ကလုာ်စ့ၢ်ကီးကဟးဂီၤကလီၤတူာ်သ့၀ဲဒီးႇ ကလုာ်လၢအဂၤတဖၣ်အဖီလာ် အတီၤပတီၢ်ကဖုၣ်၀ဲအဃိ ကဘၣ်ဟးဆှဲအီၤလီၤတံၢ်လီၤဆဲးအဂ့ၢ်န့ၣ် ပဒိၣ်စီၤမီၤရွ့ၣ် ဆီၣ်တခူစံး၀ဲဒၣ်န့ၣ်လီၤႉ
တၢ်မၤဟးဂီၤကံွာ်၀ဲဘဲထံထူၣ် (၂၀၀၀ ဘဲျၣ်)အံၤ ခ့ၣ်အဲးစံၣ်ဆဲးကျိးသံကွၢ်၀ဲဒၣ်ဒီး ကၠၤအ့စ့ၣ်ကၠံကီၢ်ဆၣ် ကီၢ်ပယီၤပၢၤကီၢ်သုးၦၤဘၣ်မူဘၣ်ဒါတဖၣ် လၢလီတဲစိဘၣ်ဆၣ်တူၢ်လိာ်စံးဆၢ၀ဲတအိၣ်ဘၣ်န့ၣ်လီၤႉ
ကညီကီၢ်စဲၣ် ၦၤလၢထုးဖးသး (ြဖတ်)ကသံၣ်မူၤဘှီးတဖၣ် တၢ်က့ၤသူၣ်ထီၣ်ကဒါက့ၤတၢ်အိၣ်မူကရူၢ် ၦၤပၢၤလီၢ်ဆ့ၣ်နီၤ =၂ ကိၣ်မၠၣ်သူၣ် စံး၀ဲလၢ “ဘဲထံလၣ်အဂ့ၢ်အံၤ လၢလီၢ်က၀ီၤအပူၤ ပဟ့ၣ်၀ဲဒၣ်တၢ်သ့ၣ်ညါနၢ်ပၢၢ်လီၤႉ အ၀ဲန့ၣ် တလီၤဂာ်ဒီး WY ကသံၣ်မူၤဘှီးဘၣ်ႉ အီမ့ၢ်၀ံၤ မုၢ်နၤခီန့ၣ်မံတန့ၢ်ဘၣ်ႉ မ့ၢ်ယံၤထီၣ်ယံၤထီၣ်န့ၣ် နကသးစဲ(စွဲ)အီၤန့ၣ်လီၤႉ ဟဲကဲထီၣ်၀ဲလၢနမ့ၢ်တအီဘၣ်န့ၣ် နအိၣ်တမုာ်ဘၣ်လီၤႉ တၢ်သကဲးပ၀းတဖၣ်ကဟးဂီၤ၀ဲဒၣ်လီၤႉ ၦၤတဲ၀ဲလၢမ့ၢ်အီန့ၣ်တၢ်ဆါလီၤမၢ်အဃိ သူ၀ဲဒၣ်လီၤႉ လီၢ်က၀ီၤတဖၣ်စုာ်စုာ် ၦၤဘၣ်မူဘၣ်ဒါတဖၣ်ကဟ့ၣ်၀ဲဒၣ်တၢ်သ့ၣ်ညါနၢ်ပၢၢ်န့ၣ်လီၤ” အဂ့ၢ်န့ၣ် စံး၀ဲန့ၣ်လီၤႉ
ကီၢ်ပယီၤကလံၤထံးတပၤ တနီသရံၣ်ကီၢ်ခီဒိၣ်ႇ ကညီကီၢ်စဲၣ်ဒီး မိၣ်ကီၢ်စဲၣ်တဖၣ်အံၤ တၢ်သူၣ်၀ဲဒၣ် ဘဲထံထူၣ်(ဘိန်းစာပင်) အအါကတၢၢ်လီၤအဂ့ၢ်န့ၣ် သ့ၣ်ညါဘၣ်လၢ တၢ်ဟ့ၣ်ကသံၣ်မူၤဘှီးတၢ်သ့ၣ်ညါနၢ်ပၢၢ်အအိၣ်န့ၣ်လီၤႉ
