လါယူၤလံ, ၂၇သီ, ၂၀၂၆နံၣ် ခ့ၣ်အဲးစံၣ်
တၢ်တီခိၣ်ရိၣ်မဲမၤဖျါထီၣ် ဖဲၣ်ဒၢၣ်ရၢၣ် ဒံၣ်မိၣ်ကရ့ၣ်စံၣ် ကီၢ်စၢဖှိၣ်ကီၢ်ကး (SCEF) အံၤ ဖဲလါယူၤလံအတီၢ်ပူၤ မၤဝဲတၢ်ထံၣ်လိၥ်တၢၣ်ပိၣ်သကိးဒီး ကီၢ်ပူၤကလုၥ်ဒူၣ်တၢ်တၢ်ပၢၢ်ဆၢဖီၣ်စုကဝဲၤကရူၢ်ကရၢ, ဒံၣ်မိၣ်ကရ့ၣ်စံၣ်ကရူၢ်ကရၢ, ဖဲၣ်ဒၢၣ်ရၢၣ်ယူၣ်နံးကရူၢ်ဃုၥ်ဒီး သိၣ်မှံတၢ်ပၢၢ်ဆၢသုးကရူၢ်တဖၣ်အဂ့ၢ် သ့ၣ်ညါဘၣ် ဒ် (SCEF) ထုးထီၣ်ပၥ်ဖျါဝဲဒၣ်အသိးန့ၣ်လီၤ.
တၢ်အိၣ်ဖှိၣ်ဝဲအံၤန့ၣ် ဘၣ်တၢ်တီခိၣ်ရိၣ်မဲမၤအီၤလၢ (SCEF)လၢ(Online) ပူၤတဆီဒီး စးထီၣ်မၤဝဲဒၣ်ဖဲ အပူၤကွံၥ်လါယူၤလံ(၁၇)အနံၤတုၤ(၂၃)သီအနံၤန့ၣ်လီၤ.
ဒီးတၢ်ဖှိၣ်အပူၤန့ၣ်(SCEF)မၤဝဲၢ်တၢ်ထံၢ်လိၥ်သးဒီး ကရူၢ်ကရၢလၢအမ့ၢ် (စကဲ), (မကွ့), (မါတလ့) ဖဲၣ်ဒၢၣ်ရၢၣ်ယူၣ်နံးပဒိၣ်တဖၣ်ဒီး ဘျီၣ်ဒိၣ်ပှၤဘၣ်မူဘၣ်ဒါတဖၣ်, (နွ့ၣ်အူ) တၢ်ပၢၢ်ဆၢသိၣ်မှံသုးမုၢ်ဒိၣ် (SRA), မိၣ်ကီၢ်သီပၣ်တံၣ် (ဒုးထီဒါသုးကရူၢ်)-(NMSP)-AD, မိၣ်ကီၢ်စဲၣ်ဖဲၣ်ဒၢၣ်ရၢၣ်ကီၣ်ကး (MSFC), မိၣ်ကီၢ်စဲၣ်တၢ်တၢၣ်ပီၣ်ကီၣ်ကး (MSCC), မိၣ်ကီၢ်စဲၣ်ဘျီၣ်ဒိၣ်ခၢၣ်စးကမံးတံၥ် (CRMH), ပအိၣ်ဒီကလုၥ်တၢ်ထူၣ်ဖျဲးတၢ်ကရၢ,ပအိၣ်ဒီကလုၥ်တၢ်ထူၣ်ဖျဲးသုးမုၢ်ဒိၣ် (PNLO/PNLA), ပအိၣ်ဒီကလုၥ်ဖဲၣ်ဒၢၣ်ရၢၣ်ကီၣ်ကး (PNFC) ဃုၥ်ဒီးရခၢၣ်ကီၢ်ဒီကလုၥ်စၢဖှိၣ်ကရၢ,ရခၢၣ်သုးမုၢ်ဒိၣ် (ULA/AA) အသုးရိၣ်မဲခိၣ်ကျၢၢ် ထိမၠၣ်နဲၣ် သ့ၣ်တဖၣ်ဟဲထီၣ်ဝဲဒၣ်အဂ့ၢ်န့ၣ်သ့ၣ်ညါဘၣ်ဒ် (SCEF) ထုးထီၣ်ပၥ်ဖျါဝဲဒၣ်န့ၣ်လီၤ.
ဒ်န့ၣ်အသိး လၢတၢ်ထံၣ်လိၥ်အိၣ်ဖှိၣ်ပူၤအံၤ တဲသကိးဝဲဘၣ်ဃး တကီၢ်ခါခဲအံၤကီၢ်ပယီၤထံရူၢ်ကီၢ်သဲးဂ့ၢ်ဝီတၢ်အိၣ်သး, ခါဆူညါထံရူၢ်ကီၢ်သဲးတၢ်လိၣ်ဘၣ်အကျဲလၢတၢ်ကမၤအီၤတဖၣ်, တၢ်ပၢၢ်ဆၢသုးကရူၢ်အဘၢၣ်စၢၤ တၢ်ကပၥ်ဖှိၣ်မၤသကိးတၢ်အဂ့ၢ်, လၢတၢ်ကသူၣ်ထီၣ် ဖဲၣ်ဒၢၣ်ရၢၣ် ဒံၣ်မိၣ်ကရ့ၣ်စံၣ်ကီၢ်စၢဖှိၣ်ကီၣ်ကးအဂီၢ် တၢ်မၤရဲၣ်ကျဲၤခိၣ်သ့ၣ်ဒီး ခါဆူညါတၢ်ဖံးတၢ်မၤအကျိၤအကျဲသ့ၣ်တဖၣ်အဂ့ၢ် (SCEF) ထုးထီၣ်ပၥ်ဖျါစ့ၢ်ကီဒီးဝဲဒၣ်န့ၣ်လီၤ.
လၢန့ၣ်အမဲၥ်ညါ လၢတၢ်ထံၣ်လိၥ်သးဒီး ရခၢၣ်သုးမုၢ်ဒိၣ် (ULA/AA) အသုးရိၣ်မဲခိၣ်ကျၢၢ် ထိမၠၣ်နဲၤအခါန့ၣ် တဲသကိးဝဲဘၣ်ဃး တၢ်ကသူၣ်ထီၣ်က့ၤတၢ်ဖံးတၢ်မၤသ့ၣ်တဖၣ်အမဲၥ်ညါ ရခၢၣ်ဟီၣ်ကဝီၤပူၤ တကီၢ်ခါခဲအံၤ ဘၣ်ကွၢ်ဆၢၣ်မဲၥ်ဒီး ထံဒိၣ်တၢ်အိၣ်သးဒီး ဒ်သိးပှၤဘၣ်ကီဘၣ်ခဲတဖၣ် ကဒိးန့ၢ်ဘၣ် ပှၤဂ့ၢ်ဝီတၢ်ဆီၣ်ထွဲမၤစၢၤအဂီၢ်တဲသကိးဝဲဒၣ်န့ၣ်လီၤ.
ဒ်န့ၣ်အသိး လၢတၢ်အိၣ်ဖှိၣ်ကိးဘျီဒဲးအပူၤ (SCEF) ခိၣ်နၢ်တဖၣ် ပၥ်ဖျါထီၣ်ဝဲဒၣ်ဘၣ်ဃး တၢ်ဒုးအိၣ်ထီၣ် ကီၣ်ကးတၢ်ပညိၣ်, တၢ်ဘျၢသနူဒီး တကီၢ်ခါခဲအံၤတၢ်မၤအကျိၤအကျဲဃုၥ်ဒီး ခါဆူညါတၢ်ဖံးတၢ်မၤအကျိၤအကျဲသ့ၣ်တဖၣ်အဂ့ၢ် သ့ၣ်ညါဘၣ်န့ၣ်လီၤ.
