Home တၢ်ကစီၣ် ကီၢ်စဲၣ်ဒီတခါပူၤ ကၠၤအ့စ့ၣ်ကၠံမ့ၢ်ၦၤဖျိထီၣ်တၢ်ဒိးစဲးအနီၣ်ဂံၢ်အါကတၢၢ်

ကီၢ်စဲၣ်ဒီတခါပူၤ ကၠၤအ့စ့ၣ်ကၠံမ့ၢ်ၦၤဖျိထီၣ်တၢ်ဒိးစဲးအနီၣ်ဂံၢ်အါကတၢၢ်

816
0

လါအီကူာ် ၁၀ သီႇ ၂၀၂၀ နံၣ်ႇ စီၤမၠၣ်အူသၣ်

ကညီကီၢ်စဲၣ်အပူၤ ၂၀၁၉–၂၀၂၀ တၢ်သိၣ်လိနံၣ်အဂီၢ် ကၠၤအ့စ့ၣ်ကၠံကီၢ်ဆၣ်အံၤ ၦၤဖျိထီၣ်ပ ဒိၣ်တၢ်ဒိးစဲးအနီၣ်ဂံၢ်အါကတၢၢ်ဒီး လၢကီၢ်စဲၣ် ကၠိလၢအဖျိအါကတၢၢ်စ့ၢ်ကီး မ့ၢ်၀ဲဒၣ်ကၠၤအ့စ့ၣ်ကၠံကီၢ်ဆၣ်လီၤအဂ့ၢ်န့ၣ် သ့ၣ်ညါဘၣ်လၢ ကီၢ်စဲၣ်တၢ်ကူၣ်ဘၣ်ကူၣ်သ့၀ဲၤကျိၤ ၦၤဘၣ်မူဘၣ်ဒါအအိၣ်န့ၣ်လီၤႉ

လၢကီၢ်စဲၣ်ပူၤ ပဒိၣ်တၢ်ဒိးစဲး တၢ်သမံသမိးလံာ်၀ဲၤကျိၤတၢ်လီၢ် ၅၀ ခါန့ၣ် ၦၤကၠိဖိနုာ်လီၤဒိးစဲးခဲလၢာ်အိၣ်၀ဲ ၂၀ႇ၆၅၂ ဂၤ ဒီး ဖဲန့ၣ်ၦၤမၤနၢၤတၢ်ခဲလၢာ် ၅ႇ ၈၈၆ ဂၤ အကျါ ကၠၤအ့စ့ၣ်ကၠံကီၢ်ဆၣ်အံၤ ၦၤမၤနၢၤတၢ်အမျး ကယၤအအါကတၢၢ်ဒီး လၢကီၢ်စဲၣ်တပၤန့ၣ် ၦၤဖျိထီၣ်ပဒိၣ်တၢ်ဒိးစဲးဟဲအါထီၣ်ဒိၣ်န့ၢ်ဒံးအပူၤကွံာ်နံၣ်အဂ့ၢ်န့ၣ် ကီၢ်စဲၣ်တၢ်ကူၣ်ဘၣ်ကူၣ်သ့ခိၣ် သရၣ် အူငွ့ၣ်စိ စံးဘၣ်ခ့ၣ်အဲးစံၣ်လီၤႉ

“ၦၤဖျိထီၣ်လၢကီၢ်စဲၣ် အဂ့ၤဒိၣ်ကတၢၢ်န့ၣ် မ့ၢ်၀ဲဒၣ်ကၠၤအ့စ့ၣ်ကၠံကီၢ်ဆၣ် အႉထႉက ကၠၣ်ခၣ်ခၠီလီၤႉ ကၠၤအ့စ့ၣ် ကၠံကီၢ်ဆၣ် လၢကီၢ်စဲၣ်အပူၤန့ၣ် ၦၤဖျိထီၣ်အနီၣ်ဂံၢ်အါကတၢၢ်လီၤႉ နီၣ်ဂံၢ်(၂)န့ၣ် ဖၣ်အၣ်ႇ နီၣ်ဂံၢ်(၃)န့ၣ် လဲဘွဲကီၢ် ဆၣ်န့ၣ်လီၤႉ ဒ်သိးၦၤဖျိထီၣ်ကအါထီၣ်အဂီၢ် လၢနံၣ်စးထီၣ်လံၤလံၤန့ၣ် တၢ်ပာ်လီၤဃာ်၀ဲတၢ်တိာ်ကျဲၤဒီး တၢ်တၢၣ်ပီၣ် တဲသကိး၀ဲဒၣ် လံာ်မိၢ်ၦၢ်တဖၣ်လီၤ” အဂ့ၢ်န့ၣ် ကီၢ်စဲၣ် တၢ်ကူၣ်ဘၣ်ကူၣ်သ့ခိၣ် အူငွ့ၣ်စိ စံး၀ဲ ဖဲလါအီကူာ် ၁၀ သီအနံၤန့ၣ်လီၤႉ

ကညီကီၢ်စဲၣ်အပူၤ ကၠိလၢအဖျိထီၣ်ပဒိၣ်တၢ်ဒိးစဲးအအါကတၢၢ်န့ၣ်မ့ၢ်၀ဲ ကၠၤအ့စ့ၣ်ကၠံကီၢ်ဆၣ် ကၠၣ်ခၣ်ခၠီ အႉထႉက ၆၉ႉ၇၅ မျးကယၤႇ ကၠၤအ့စ့ၣ်ကၠံ၀့ၢ် အႉထႉက(နီၤဖး) ၆၄ မျးကယၤႇ ကၠၤအ့စ့ၣ်ကၠံ၀့ၢ် အႉထႉက ၆၃ႉ၃၂ မျးကယၤ အဂ့ၢ်န့ၣ် သ့ၣ်ညါဘၣ်လၢကီၢ်စဲၣ် တၢ်ကူၣ်ဘၣ်ကူၣ်သ့၀ဲၤကျိၤအအိၣ်န့ၣ်လီၤႉ

ဖဲအပူၤကွံာ် ၂၀၁၈–၂၀၁၉ တၢ်သိၣ်လိနံၣ်န့ၣ် ကညီကီၢ်စဲၣ်အံၤ ကၠိလၢအဖျိထီၣ်ပဒိၣ်တၢ်ဒိးစဲးနီၣ်ဂံၢ် အအါကတၢၢ်န့ၣ် မ့ၢ်၀ဲဒၣ်လဲဘွဲကီၢ်ဆၣ် ရှွ့ၣ်ကိ တီၤထီကၠိ န့ၣ်လီၤႉ မ့မ့ၢ်လၢတနံၣ်ညါအံၤ ကီၢ်ပယီၤဒီဘ့ၣ်အပူၤန့ၣ် မ့ၢ်၀ဲဒၣ် မါတလ့ကီၢ်ခီဒိၣ် ၃၇ႉ၅၁ မျးကယၤ ၦၤဖျိထီၣ်၀ဲပဒိၣ်တၢ်ဒိးစဲးအအါကတၢၢ်ဒီး ယိၤဒိၣ်ကီၢ်စဲၣ်(မုၢ်ထီၣ်)န့ၣ် ၂၀ႉ၂၉ မျးကယၤ ၦၤဖျိထီၣ်ပဒိၣ်တၢ်ဒိးစဲးအနီၣ်ဂံၢ်စှၤကတၢၢ်လီၤအဂ့ၢ်န့ၣ် တၢ်ကူၣ်ဘၣ်ကူၣ်သ့၀ဲၤကျိၤ ထုးထီၣ်ဘိးဘၣ်ရၤလီၤအသိး သ့ၣ်ညါဘၣ်လီၤႉ