လါစဲးပထ့ဘၢၣ် ၃ သီႇ ၂၀၂၀ နံၣ်ႇ နါ၀့ၤဖၠိစၣ်
မိၣ်ကီၢ်စဲၣ် သထူၣ်ကီၢ်ဆၣ်အပူၤ တၢ်တီၣ်ထီၣ်၀ဲပၣ်တံၣ် (signboard) အကတီၢ် ဘၣ်ဃးဒီးတၢ်ထီထီၣ်သဃဲၤ၀ဲ ကညီဒီးပအိၣ်ကလုာ်အနီၣ်တယၢ်တၢ်ဂ့ၢ်အံၤ သထူၣ်ကီၢ်ဆၣ် ကညီလံာ်လဲၢ်တၢ်ဆဲးတၢ်လၤကရူၢ်ဒီး ကီၢ်စဲၣ် ပအိၣ် လံာ်လဲၢ်တၢ်ဆဲးတၢ်လၤကရူၢ်တဖၣ် ဖဲလါစဲးပထ့ဘၢၣ် ၁ သီအနံၤန့ၣ် ဆှၢထီၣ်လံာ်ထီဒါဆူ ဒူသထူၣ်ကီၢ်ဆၣ် တၢ်ဃုထၢခီၣ်မံရှၢၣ်ကရူၢ်အဒ့ရူအအိၣ်အဂ့ၢ်န့ၣ် သ့ၣ်ညါဘၣ်လီၤႉ
၂၀၂၀ တၢ်ဃုထၢအဂီၢ် ထံရူၢ်ကီၢ်သဲးပၣ်တံၣ်တဖၣ် တီၣ်ထီၣ်၀ဲဒၣ်ပၣ်တံၣ် (signboard) တဖၣ် လၢဒူသ၀ီအပူၤန့ၣ်လီၤႉ ဖဲန့ၣ်ကလုာ်ထံရူၢ်ကီၢ်သဲး ဒံၣ်မိၣ်ကရဲၣ်တ့ၣ်ပၣ်တံၣ် (DNP) ဒီး ဃူဖိးကလုာ်ဒူၣ်ကလုာ် ဒံၣ်မိၣ်ခြ့ၣ်စံၣ်ပၣ်တံၣ် (UNDP) ခံဖုအံၤ မၤ၀ဲတၢ်တီၣ်ထီၣ်ပၣ်တံၣ် (signboard) ဖဲသထူၣ်ကီၢ်ဆၣ် ဒူသ၀ီတနီၤအခါန့ၣ် ထီထီၣ်၀ဲဒၣ်ကညီဒီကလုာ်အနီၣ်တယၢ်ဒီး ပအိၣ်ကလုာ်အနီၣ်တယၢ်အံၤ ထီၣ်ထီၣ်သဃဲၤ၀ဲဒၣ်ဒီးပၣ်တံၣ်အနီၢ်တယၢ်အံၤန့ၣ် တၢ်ထံၣ်ကမၣ်အိၣ်ထီၣ်သ့၀ဲအဃိ လံာ်လဲၢ်တၢ်ဆဲးတၢ်လၤ ကရူၢ်တဖၣ် ဘၣ်ထီဒါ၀ဲဒၣ်ဒ်အံၤလီၤအဂ့ၢ်န့ၣ် စံး၀ဲလီၤႉ
မိၣ်ကီၢ်စဲၣ် ပအိၣ်လံာ်လဲၢ်တၢ်ဆဲးတၢ်လၤကရူၢ် ၦၤပၢၤလီၢ်ဆ့ၣ်နီၤ ခိၤဖိဆီ စံး၀ဲ “ဒ်သုထံၣ်ဘၣ်အသိးလီၤ ဒူသ၀ီတနီၤန့ၣ် ဖဲအကျါပၣ်တံၣ်တခါန့ၣ် အ၀ဲသ့ၣ်ပၣ်တံၣ်အနီၣ်တယၢ်ထီန့ၢ်ဒံးပ၀ဲဒၣ် ပအိၣ်အနီၣ်တယၢ်ႇ ကညီအနီၣ်တယၢ်ဒံးလီၤႉ တၢ်အံၤပ၀ဲဒၣ်လ့ၤတက့ၤပတူၢ်လိာ်တသ့ဘၣ်ႉ ထီဒါ၀ဲဒၣ် ပဒီတကလုာ်ညါလီၤႉ ထီဒါ၀ဲခဲအံၤန့ၣ် ခီဖျိလၢကမျၢၢ်တဖၣ်ထံၣ်၀ဲဒၣ်အံၤ တတူၢ်လိာ်၀ဲဘၣ်အဃိ ဟဲတီၣ်ဖျါထီၣ်၀ဲလီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်လီၤႉ
လၢန့ၣ်အမဲာ်ညါ ပကစၢ်အနီၣ်တယၢ်န့ၣ် ကဲထီၣ်တၢ်ထံၣ်ကမၣ်ဒီး မၤလီၤ၀ဲဒၣ်သူးသ့ၣ်လၤကပီၤအဃိ ဘၣ်ထီဒါ၀ဲဒၣ်အမဲာ်ညါ တၢ်ကဟ့ၣ်ပလီၢ်တြီ၀ဲ ပၣ်တံၣ် ၂ ပၣ်တံၣ်အံၤအဂီၢ် တီၣ်ဖျါထီၣ်လံာ်ထီဒါဆူ တၢ်ဃုထၢခီၣ်မံရှၢၣ်ကရူၢ်အဒ့ အအိၣ်ဒ်အံၤအဂ့ၢ်န့ၣ် ကညီဒီးပအိၣ်လံာ်လဲၢ်တၢ်ဆဲးတၢ်လၤကရူၢ် စံး၀ဲလီၤႉ
ပၣ်တံၣ်ဖိလၢအအိၣ်လီၢ်က၀ီၤပူၤတဖၣ် ဘၣ်ထွဲဒီးတၢ်တီၣ်ထီၣ် (signboard) တၢ်ဂ့ၢ်အံၤ တၢ်တလ့ၤတပျာ်မ့ၢ်အိၣ်ဘၣ်ဖုးန့ၣ် ဘၣ်က့ၤဃ့၀ံသးစူၤ၀ဲအသိးႇ တၢ်ကက့ၤဃိထံသမံသမိး၀ဲအဂ့ၢ်န့ၣ် ဃူဖိးကလုာ်ဒူၣ်ကလုာ်ဒံၣ်မိၣ်ခြ့ၣ်စံၣ်ပၣ်တံၣ် -UNDP လီၢ်ခၢၣ်သးပၢဆှၢတၢ် နဲၣ်ရွဲၣ်သဃဲၤ နီၢ်အိလၣ် စံးဘၣ်ခ့ၣ်အဲးစံၣ်လီၤႉ
“မုဂါအၦၤတဖၣ် တၢ်ကမူၤကမၣ်မ့ၢ်အိၣ်တခါခါန့ၣ် ၀ံသးစူၤလီၤႉ လၢသထူၣ်န့ၣ် ခၢၣ်စးလၢ ကနုာ်လီၤဃုထၢသးအိၣ်၀ဲ ၃ ဂၤလီၤႉ ၦၤသၢဂၤလၢာ်န့ၣ် ခဲအံၤအ၀ဲသ့ၣ်လဲၤဆူ၀့ၢ်တကူၣ်လီၤႉ ဖဲအ၀ဲသ့ၣ်လဲၤအလီၢ်ခံန့ၣ် တၢ်ဟဲကဲထီၣ်သးဒ်အံၤန့ၣ် ဘၣ်တဲလၢတတီတလိၤဘၣ်လီၤႉ တၢ်အံၤဘၣ်က့ၤဃု သ့ၣ်ညါက့ၤလီၤႉ သ၀ီလၢအတီၣ်ထီၣ်၀ဲဒၣ်ပပၣ်တံၣ် (signboard) အံၤန့ၣ် မ့ၢ်၀ဲကညီသ၀ီအဃိ ကဘၣ်မ့ၢ်၀ဲဒၣ်အ၀ဲသ့ၣ်တီၣ်ထီၣ်၀ဲကညီအနီၣ်တယၢ်လီၤႉ တၢ်ပညိၣ်လၢအဂၤတအိၣ်နီတမံၤဘၣ်န့ၣ် လီၤတံၢ်၀ဲလီၤႉ ပပၣ်တံၣ်ဒု သူ၀ဲဒၣ်ပအိၣ်အနီၣ်တယၢ်န့ၣ်တအိၣ်၀ဲဘၣ်” အဂ့ၢ်န့ၣ် နီၢ်အိလၣ်စံးဘၣ်ခ့ၣ်အဲးစံၣ်လီၤႉ
ဘၣ်ထဲဒွီး ထံရူၢ်ကီၢ်သဲးပၣ်တံၣ် ၂ဖုအံၤ သူ၀ဲဒၣ်ကညီကလုာ်အနီၣ်တယၢ်တၢ်ဂ့ၢ်အံၤန့ၣ် ဒ်သိးတၢ်ကဟ့ၣ်ပလီၢ်တြီ၀ဲကန့ၢ်အဂီၢ် ဒူသထူၣ်ကီၢ်ဆၣ် ကညီလံာ်လဲၢ်တၢ်ဆဲးတၢ်လၤကရူၢ်အံၤ ဆှၢဟ့ၣ်သဃဲၤ၀ဲလံာ်ဆူ -KNU ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)တၢ်ရ့လိာ်မုာ်လိာ်ရူအအိၣ်အဂ့ၢ်န့ၣ် သ့ၣ်ညါဘၣ်လီၤႉ
