လါယနူၤအါရံၤ ၁၂ သီႇ ၂၀၂၁ နံၣ်ႇ စီၤထိလ့
ပဒိၣ်သုးမုၢ်ဒိၣ်အံၤ ကီၢ်ဆၣ်လၢအ၀ဲသ့ၣ်သုးဖိတဖၣ်ဟ့ၣ်တၢ်ဖးတဖၣ် ဒ်တၢ်သမံသမိးပာ်ဖျါထီၣ်တၢ်ဖးစရီအပူၤ တုၤလၢလါယနူၤအါရံၤ ၁၀ သီတစု ၁၃ ၀ီတ၀ီထုးထီၣ်ပာ်ဖျါ၀ဲအသိး ပၣ်ဃုာ်၀ဲဒၣ်ဒီးကညီကီၢ်စဲၣ်အပူၤ ကီၢ်ဆၣ် ၄ ဘ့ၣ်အစရီအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ကီၢ်ဆၣ် ၄ ဘ့ၣ်အံၤန့ၣ် ဖဲတၢ်ပာ်ဖျါထီၣ်ဃု၀ီတ၀ီအခါန့ၣ် ကညီကီၢ်စဲၣ် သၣ်တီၣ်ကၠံကီၢ်ဆၣ် စးထီၣ်ပၣ်ဃုာ်၀ဲဒၣ်ဒီးႇ ဖဲလါယနူၤအါရံၤ ၁၀ သီ တၢ်ပာ်ဖျါထီၣ် ၁၃ ၀ီတ၀ီအပူၤ ပၣ်ဃုာ်၀ဲဒၣ်ဒီး လူၢ်ပျဲၢ်ႇ ကီးတရံးႇ မၠၣ်၀တံၣ်ကီၢ်ဆၣ်စရီတဖၣ်န့ၣ်လီၤႉ
တၢ်သမံသမိးထံၣ်န့ၢ်၀ဲတၢ်ဖးစရီဒ်အံၤတဖၣ်အဖီခိၣ် ကဟံးထီၣ်ဖီၣ်ထီၣ်ဒ်တၢ်ဘျၢသဲစးအသိးအိၣ်၀ဲအဂ့ၢ်န့ၣ် သုးမုၢ်ဒိၣ်တၢ်ဘိးဘၣ်ရၤလီၤတၢ်ကစီၣ်ကရူၢ် သုးခိၣ်ကျၢၢ်ဖိ စီၣ်မ့အူ စံး၀ဲ ဖဲလါဒံၣ်စ့ဘၢၣ် ၃၀ သီ တၢ်မၤ၀ဲတၢ်ရှဲလဲတၢ်ကစီၣ်အမူးအပူၤန့ၣ်လီၤႉ
“ဒ်ဘျီၣ်ဒိၣ်တၢ်ဃုထၢ တၢ်ဘျၢသဲစးအဆၢဖိ ၆၈(က)ႇ တၢ်ဘျၢအကျိၤအကျဲ ၈၇ အသိးန့ၣ် ဘျီၣ်ဒိၣ်ခၢၣ်စးပတြီာ်လၢအနုာ်လီၤတပြၢဃုထၢသးတဂၤလၢ်လၢ်မ့ၢ်ဂ့ၤႇ မ့တမ့ၢ် ဟီၣ်က၀ီၤဖဲန့ၣ်အပူၤ ၦၤဟ့ၣ်တၢ်ဖးဖိတဂၤလၢ်လၢ်မ့ၢ်ဂ့ၤ ဂ့ၢ်လိာ်၀ဲသ့လီၤႉ တၢ်ဂ့ၢ်လိာ်ခဲအံၤတခီန့ၣ် မ့ၢ်၀ဲဒၣ်သုးမုၢ်ဒိၣ်သုးဖိတဖၣ် တီၣ်ထီၣ်လံာ်ဂ့ၢ်လိာ်ဒ်ၦၤဟ့ၣ်တၢ်ဖးဖိအသိးလီၤ” ဂ့ၢ်န့ၣ် စံး၀ဲန့ၣ်လီၤႉ
ဒ်တၢ်ထုးထီၣ်ပာ်ဖျါ၀ဲအသိး သၣ်တီၣ်ကၠံကီၢ်ဆၣ်အပူၤ ဒ်တၢ်ဃုထၢခီၣ်မံရှၢၣ်လၢအဘၣ်ထွဲ ထုးထီၣ်ပာ်ဖျါ၀ဲအသိးန့ၣ် ၦၤဟ့ၣ်တၢ်ဖးဖိအိၣ်၀ဲ ၆၂ႇ၂၈၉ ဂၤဒီး ဖဲတၢ်သမံသမိးအီၤ၀ံၤ ၦၤဟ့ၣ်တၢ်ဖးဖိအိၣ် ၆၁ႇ၀၆၅ ဂၤႇ တၢ်ဖးစရီကထြၢသးဒီးတၢ်ဖးစရီလၢအဂၤလီၤဆီလိာ်သးအိၣ်၀ဲ ၁၇ႇ၀၆၇ ဂၤအဂ့ၢ်န့ၣ် ပာ်ဖျါ၀ဲန့ၣ်လီၤႉ
ဖဲအပူၤကွံာ် ၂၀၂၀ တၢ်ဃုထၢအကတီၢ် သၣ်တီၣ်ကၠံကီၢ်ဆၣ်ဒီတဘ့ၣ်အပူၤ ကမျၢၢ်ဘျီၣ်ဒိၣ်တၢ်ဖးဟီၣ်က၀ီၤ တၢ်ဃုထၢအစၢအံၤ ကီၢ်ဆၢဖှိၣ်တၢ်ဃုထၢခီၣ်မံရှၢၣ်ထုးထီၣ်ပာ်ဖျါ၀ဲလၢ ၦၤဟ့ၣ်တၢ်ဖးဖိအိၣ် ၆၂ႇ၂၈၉ ဂၤဒီးႇ တၢ်ဖးလီၢ်တၢ်ဖးအိၣ် ၃၀ႇ၈၄၁ ဖျၢၣ်ႇ ၦၤဟ့ၣ်စိတၢ်ဖးအိၣ် ၁၀ႇ၀၇၇ ဖျၢၣ်ႇ ပာ်ဖှိၣ်ခဲလၢာ်အိၣ် ၄၀ႇ၉၁၈ ဖျၢၣ်ဒီး တၢ်ဖးလၢတၢ်သူ၀ဲတသ့ဒီးတၢ်ဖးလၢအလီၤမၢ် ပာ်ဖှိၣ်ခဲလၢာ်အိၣ်၀ဲ ၂ႇ၅၅၈ ဖျၢၣ်ဒီး တၢ်ဟ့ၣ်တၢ်ဖးအမျးကယၤန့ၣ်အိၣ် ၆၅ႉ၆၉ မျးကယၤအဂ့ၢ်န့ၣ် ပာ်ဖျါ၀ဲန့ၣ်လီၤႉ
ဒ်န့ၣ်အသိး လူၢ်ပျဲၢ်ကီၢ်ဆၣ် တၢ်ဖးစရီအပူၤ ဒ်တၢ်ဃုထၢခီၣ်မံရှၢၣ်ပာ်ဖျါ၀ဲအသိး ၦၤဟ့ၣ်တၢ်ဖးဖိအိၣ်၀ဲ ၂၃၉ႇ၆၂၀ ဂၤဒီးႇ မ့မ့ၢ်သုးမုၢ်ဒိၣ်သမံသမိး၀ဲအသိးအိၣ်၀ဲ ၂၃၁ႇ၅၀၇ ဂၤဒီး စရီကထြၢသးဒီးအနီၣ်ဂံၢ်လီၤဆီလိာ်သးအိၣ်၀ဲ ၇၄ႇ၀၆၆ ဂၤအဂ့ၢ်န့ၣ် သုးမုၢ်ဒိၣ်ထုးထီၣ်ပာ်ဖျါအပူၤ ပာ်ဖျါ၀ဲန့ၣ်လီၤႉ
လူၢ်ပျဲၢ်ကီၢ်ဆၣ်ဒီတဘ့ၣ် ကမျၢၢ်ဘျီၣ်ဒိၣ်တၢ်ဖးဟီၣ်က၀ီၤပူၤ တၢ်ဃုထၢအစၢအံၤန့ၣ် ကီၢ်စၢဖှိၣ်တၢ်ဃုထၢခီၣ်မံရှၢၣ် ထုးထီၣ်ပာ်ဖျါ၀ဲအပူၤ ၦၤဟ့ၣ်တၢ်ဖးဖိအိၣ်၀ဲ ၂၃၉ႇ၆၂၀ ဂၤဒီး တၢ်ဖးလီၢ်တၢ်ဖးအိၣ်၀ဲ ၈၈ႇ၇၈၀ ဖျၢၣ်ႇ ၦၤဟ့ၣ်စိတၢ်ဖးအိၣ် ၃၀၅ႇ၄၅ ဖျၢၣ်ႇ တၢ်ဖးလၢသူတသ့ဒီး တၢ်ဖးလၢအလီၤမၢ်အိၣ် ၉ႇ၁၄၉ ဖျၢၣ်ဒီး ၦၤဟ့ၣ်တၢ်ဖးမျးကယၤအိၣ် ၄၉ႉ၈၀ မျးကယၤအဂ့ၢ်န့ၣ် ပာ်ဖျါ၀ဲန့ၣ်လီၤႉ
မၠၣ်၀တံၣ်ကီၢ်ဆၣ်ဒီတဘ့ၣ်အပူၤ ကမျၢၢ်ဘျီၣ်ဒိၣ်တၢ်ဖးဟီၣ်က၀ီၤ တၢ်ဃုထၢအစၢအံၤန့ၣ် ကီၢ်စၢဖှိၣ်တၢ်ဃုထၢခီၣ်မံရှၢၣ်ထုးထီၣ်ပာ်ဖျါ၀ဲလၢ ၦၤဟ့ၣ်တၢ်ဖးဖိအိၣ်၀ဲ ၁၇၂ႇ၀၂၅ ဂၤႇ တၢ်ဖးလီၢ်တၢ်ဖးအိၣ် ၆၄ႇ၃၃၃ ဂၤႇ ၦၤဟ့ၣ်စိတၢ်ဖးအိၣ် ၁၇ႇ၉၅၀ ဖျၢၣ်ႇ တၢ်ဖးလၢသူတသ့ဒီးတၢ်ဖးလီၤမၢ်အိၣ် ၃ႇ၆၀၅ ဖျၢၣ်ဒီး ၦၤဟ့ၣ်တၢ်ဖးမျးကယၤအိၣ်ထဲ ၄၇ႉ၈၃ မျးကယၤအဂ့ၢ်န့ၣ် ပာ်ဖျါ၀ဲန့ၣ်လီၤႉ
ဒ်န့ၣ်အသိး သုးမုၢ်ဒိၣ်ထုးထီၣ်ပာ်ဖျါ၀ဲအပူၤ ကီးတရံး၀့ၢ် ၦၤဟ့ၣ်တၢ်ဖးစရီအိၣ်၀ဲ ၂၀၅ႇ၃၅၆ ဂၤႇ တၢ်က့ၤသမံသမိးအိၣ်၀ဲ ၂၀၃ႇ၂၇၇ ဂၤႇ တၢ်ဖးလၢအကထြၢသးဒီးတၢ်ဖးစရီလၢအဂၤ ပာ်ဖှိၣ်ခဲလၢာ်အိၣ် ၅၇ႇ၀၆၃ ဂၤအဂ့ၢ်န့ၣ် ပာ်ဖျါ၀ဲန့ၣ်လီၤႉ
ကီးတရံးကီၢ်ဆၣ်ဒီတဘ့ၣ်အပူၤ ကမျၢၢ်ဘျီၣ်ဒိၣ်တၢ်ဖးဟီၣ်က၀ီၤအပူၤ တၢ်ဖးအစၢအံၤန့ၣ် တၢ်ဃုထၢခီၣ်မံရှၢၣ်ထုးထီၣ်ပာ်ဖျါ၀ဲလၢ ၦၤဟ့ၣ်တၢ်ဖးဖိအိၣ် ၂၀၅ႇ၃၅၆ ဂၤႇ တၢ်ဖးလီၢ်တၢ်ဖးအိၣ် ၇၅ႇ၄၅၁ ဖျၢၣ်ႇ ၦၤဟ့ၣ်စိတၢ်ဖးအိၣ် ၃၀ႇ၂၉၆ ဖျၢၣ်ႇ တၢ်ဖးလၢသူတသ့ဒီးတၢ်ဖးလၢလီၤမၢ်ပာ်ဖှိၣ်ခဲလၢာ်အိၣ် ၆ႇ၈၃၉ ဖျၢၣ်ဒီး ၦၤဟ့ၣ်တၢ်ဖးမျးကယၤပာ်ဖှိၣ်ခဲလၢာ်အိၣ်ထဲ ၅၁ႉ၄၉ မျးကယၤလီၤအဂ့ၢ်န့ၣ် ပာ်ဖျါ၀ဲန့ၣ်လီၤႉ
