ပယီၤသုးဒွဲၣ်အူကမျၢၢ်အဟံၣ်တဖျၢၣ်အဂ့ၢ် ခ့ၣ်အဲၣ်ယူၣ်စံး၀ဲ

လါယနူၤအါရံၤ ၂၆ သီႇ ၂၀၂၁ နံၣ်ႇ ခ့ၣ်အဲးစံၣ်

မုၢ်တြီၢ်ကီၢ်ရ့ၣ်ႇ ဒွဲၣ်လိကီၢ်ဆၣ် မဲၤ၀့ၤသ၀ီပူၤ ဖဲလါယနူၤအါရံၤ ၂၄ သီအနံၤ ဟါခီ ၆ နၣ်ရံၣ်အဆၢကတီၢ်န့ၣ် ကီၢ်ပယီၤသုးမုၢ်ဒိၣ် ဒွဲၣ်အူ၀ဲကမျၢၢ်အဟံၣ်တဖျၢၣ်အဂ့ၢ်န့ၣ် ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ် ၦၤကတိၤတၢ်ပၢ ပဒိၣ်မါမါ ပာ်ဂၢၢ်ပာ်ကျၢၤစံးဘၣ်ခ့ၣ်အဲးစံၣ်န့ၣ်လီၤႉ

အ၀ဲစံး၀ဲလၢ “ဒ်တၢ်ဖီလာ်ဟ့ၣ်တၢ်ကစီၣ်အသိးန့ၣ် ကီၢ်ပယီၤသုးမုၢ်ဒိၣ်ဒွဲၣ်၀ဲန့ၣ်မ့ၢ်တၢ်ကစီၣ်လၢအလီၤတံၢ်လီၤႉ ဒွဲၣ်အူ၀ဲတၢ်ဂ့ၢ်တၢ်ကျိၤတခီန့ၣ်တသ့ၣ်ညါဘၣ်ႉ လၢသ၀ီပူၤန့ၣ် ခမရ=၃၃၉ သုးရ့ၣ်အိၣ်၀ဲလီၤႉ လၢသ၀ီပူၤသီခါစ့ၢ်ကီးဖီၣ်၀ဲအိၣ်စ့ၢ်ကီးလီၤ” အဂ့ၢ်န့ၣ် ပဒိၣ်မါမါ စံး၀ဲန့ၣ်လီၤႉ

တၢ်ဆၢကတီၢ်လၢတၢ်ကမၤဖျါထီၣ်တၢ်မုာ်တၢ်ခုၣ်အတီၢ်ပူၤအံၤ ကီၢ်ပယီၤသုးမုၢ်ဒိၣ်တကပၤ တၢ်ဖံးတၢ်မၤလၢအပညိၣ်၀ဲဒၣ်သ၀ီဖိတဖၣ်အံၤ မ့ၢ်တၢ်ဟူးတၢ်ဂဲၤလၢအတကြၢး၀ဲဘၣ်လီၤအဂ့ၢ်န့ၣ် ပဒိၣ်မါမါ ဆဲးစံး၀ဲန့ၣ်လီၤႉ

စးထီၣ်ဖဲတလါညါအံၤထီၣ်သီအဆၢကတီၢ်န့ၣ် ခီဖျိလၢ ခ့ၣ်အဲၣ်ယူၣ် သုးက့(၅) ဒီး ကီၢ်ပယီၤသုးမုၢ်ဒိၣ်တဖၣ်အဘၢၣ်စၢၤ သုးတၢ်ဖ့ၣ်ဆၢဟဲအိၣ်ထီၣ်အဃိ မဲၤ၀့ၤသ၀ီဖိတဖၣ်အါဒၣ်တက့ၢ်န့ၣ် ဘၣ်ဃ့ၢ်မှံဟးဖျိး၀ဲဒၣ်ဒီး လၢသ၀ီအပူၤန့ၣ်အိၣ်တ့ၢ်က့ၤထဲ သီခါဒီးအတကၢ်တနီၤလီၤအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

ဘၣ်ထွဲဒီးတၢ်ဂ့ၢ်ကဲထီၣ်သးအံၤ ခ့ၣ်အဲးစံၣ်ဆဲးကျိးသံကွၢ်၀ဲဒီး သုးမုၢ်ဒိၣ်ၦၤဘၣ်မူဘၣ်ဒါလၢအဘၣ်ထွဲတဖၣ်တန့ၢ်၀ဲဘၣ်အသိး လၢသုးမုၢ်ဒိၣ်တၢ်ဘိးဘၣ်ရၤလီၤတၢ်ကစီၣ်လၢအမ့ၢ်အတီကရူၢ် (social media site)အပူၤစ့ၢ်ကီး ထုးထီၣ်ပာ်ဖျါ၀ဲတအိၣ်နီတမံၤဒံးဘၣ်လီၤႉ