လါနိၣ်ဝ့ဘၢၣ် ၂၈သီ, ၂၀၂၅နံၣ်, ခ့ၣ်အဲးစံၣ်.
ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်-KNLA က့ၤဟ့ၣ်ကဒါက့ၤ တၢ်ဘၣ်ဘျုးဒံၣ်မိၣ်ကရ့ၣ်စံၣ်-DKBA အပှၤသုးဖိဒီးတၢ်ကစုကဝဲၤလၢ ဖီၣ်တ့ၢ်ဝဲသ့ၣ်တဖၣ်အဂ့ၢ် သ့ၣ်ညါဘၣ်လၢ DKBA ခိၣ်နၢ်ဒိၣ်ထီအအိၣ်န့ၣ်လီၤ.
ဖဲအပူၤကွံၥ်လါနိၣ်ဝ့ဘၢၣ် ၂၁သီအနံၤ တၢ်ဒုးကဲထီၣ်ဝဲလၢ KNLAဒီး သုးကရူၢ်အပှၤအဘၢၣ်စၢၤဖဲ အ့ကၠ့မၠဲၣ်ဒီးမ့လဲၣ်ပၤဟီၣ်ကဝီၤအဆၢကတီၢ်ခီဖျိ KDBA အပှၤလၢအိၣ်ဖဲသဝီကပၤလၢအိၣ်ခိးကၠါဖၠၣ်တၢ်ဖံးတၢ်မၤလီၢ်စှၤဂၤခးပိၢ်ကျိအဃိ KNLA တၢ်ပၢၢ်ဆၢသုးပၥ်ဖှိၣ်ဝၣ်နုၥ်ဖီၣ်အဝဲသ့ၣ်ဝံၤဟံးန့ၢ်ကွံၥ်ဝဲတၢ်စုကဝဲၤန့ၣ်လီၤ.
တၢ်န့ၣ်ဝံၤအလီၢ်ခံ ဖဲမဟါလါနိၣ်ဝ့၂၇သီအနံၤန့ၣ် DKBAသုးဖိအဂၤ(၁၀၀)ဘျဲသ့ၣ်တဖၣ် KNLA က့ၤဟ့ၣ်လီၤက့ၤဆူ DKBA လီၢ်ခၢၣ်သးအအိၣ်အသိး ဖဲတနံၤအံၤန့ၣ်တၢ်စုကဝဲၤလၢအအိၣ်တ့ၢ်သ့ၣ်တဖၣ်စ့ၢ်ကီးက့ၤဟ့ၣ်လီၤကဒါက့ၤဝဲဒၣ်လံအဂ့ၢ် DKBA ခိၣ်နၢ်ဒိၣ်ထီတဂၤ စံးဘၣ်ဝဲခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤ.
အဝဲစံးဝဲလၢ“ဖဲမဟါန့ၣ် ဟ့ၣ်လီၤက့ၤဝဲပှၤသုးဖိဒီးတနံၤအံၤတၢ်စုကဝဲၤသ့ၣ်တဖၣ်ဟ့ၣ်လီၤကဒါက့ၤဝဲဒီးပှၤလဲၤလီၤဟံးန့ၢ်လံန့ၣ်လီၤ.မ့မ့ၢ် ကျိချံန့ၣ် တဲဝဲလၢ သုးခိၣ်ဒးဘီခးလၢၥ်လံ,တလိၣ်ဘၣ်လၢၥ်ဒၣ်ဝဲခးဒုၣ်ဒါလီၤ.ပှၤသုးဖိသ့ၣ်တဖၣ်န့ၣ်အခဲအံၤပသမံသမိးက့ၤ,ပှၤလၢမ့ၢ်တအဲၣ်ဒိးကဲသုးလၢၤဘၣ်န့ၣ် ကပျဲအိၣ်က့ၤအဝဲသ့ၣ်ဒ်ကမျၢၢ်အသိးန့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
တၢ်ကဲထီၣ်သးအဆၢကတီၢ် DKBA သုးဖိလၢ KNLAဖီၣ်ဝဲန့ၣ် အိၣ်ဝဲ (၁၀၀)ဘျဲၣ်ဒီးတၢ်စုကဝဲၤဒိၣ်,ဆံး အကလုၥ်ကလုၥ်(၂၀၃)ခိၣ်ဒီးတနံၤအံၤန့ၣ် DKBA လဲၤလီၤဟံးန့ၢ်က့ၤကျိသ့ၣ်တဖၣ်လံန့ၣ်လီၤ.
KNLA ဖီၣ်ဃၥ် DKBA သုးဖိဒီးတၢ်စုကဝဲၤဝံၤအလီၢ်ခံ ဖလူ-ဂီၤလ့ၤ-စူးကလံ ကျဲန့ၣ် ပှၤဖီၣ်တၢ်စုကဝဲၤတဖုမးတဘၣ်လ့ၢ်လိၤဘၣ်အဂ့ၢ်, ဂ့ၢ်ဂီၢ်အူတၢ်လိၣ်မ့ၢ်အိၣ်မ့ၢ်လ့ၢ်လိၤန့ၣ် ကဘၣ်ဒုးသ့ၣ်ညါဆိအဝဲသ့ၣ်အဂ့ၢ် DKBA ထုးထီၣ်ပၥ်ဖျါဝဲလံၥ်တဘ့ၣ်ဖဲအပူၤကွံၥ်လါ နိၣ်ဝ့ဘၢၣ်(၂၆)သီအနံၤအိၣ်ဝဲဒၣ်စ့ၢ်ကီးန့ၣ်လီၤ.
