လါယနူၤအါရံၤ ၆ သီႇ ၂၀၂၁ နံၣ်ႇ စးအဲၣ်ဆူ
KNU-ညီဒီကလုာ်စၢဖှိၣ်ကရၢ တၢ်ပၢဟီၣ်က၀ီၤလၢအမ့ၢ် မုၢ်ြတီၢ်(ဖၣ်ပူၣ်)ကီၢ်ရ့ၣ်ႇ ဒွဲၣ်လိကီၢ်ဆၣ် ဒူသ၀ီကရူၢ် ၄ ဘ့ၣ်အပူၤလီၢ်က၀ီၤဖိတဖၣ် ဖဲတနံၤအံၤ(လါယနူၤအါရံၤ ၆ သီ)အနံၤန့ၣ် မၤ၀ဲဒၣ်တၢ်ပာ်ဖျါထီၣ်တၢ်ဘၣ်သးအဂ့ၢ်န့ၣ် သ့ၣ်ညါဘၣ်န့ၣ်လီၤႉ
တကီၢ်ခါ ပဒိၣ်ဒီး ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)တဖၣ်အဘၢၣ်စၢၤ ခီဖျိလၢသုးတၢ်ဖ့ၣ်ဆၢတဖၣ်အဃိသဂၢၢ်ဘၣ်၀ဲဒီး ပယီၤသုးမၤ၀ဲသုးတၢ်ဟူးတၢ်ဂဲၤတဖၣ်ႇ ဘၢၣ်၀ဲဒၣ်ကျဲတဖၣ်အမဲာ်ညါ ခးလီၤ၀ဲကျိလၢတၢ်ဂ့ၢ်တအိၣ်နီတမံၤဘၣ်အဖီခိၣ်အဃိ ဘၣ်ပာ်ဖျါထီၣ်၀ဲတၢ်ဘၣ်သးဒ်အံၤလီၤအဂ့ၢ်န့ၣ် လီၢ်က၀ီၤဂံၢ်ခီၣ်ထံးတၢ်ကစီၣ်တဖၣ်စံး၀ဲန့ၣ်လီၤႉ
ဒွဲၣ်လိကီၢ်ဆၣ်အပူၤ မဲၤ၀့ၤႇမဲၤသူၤႇလ့ခီၣ်ထံး ဒီး နါကိၢ်ခံ ဒူသ၀ီကရူၢ်လွံၢ်ကရူၢ်အံၤ လီၢ်က၀ီၤသ၀ီဖိ ပာ်ဖှိၣ်ခဲလၢာ်(၁ႇ၀၀၀)ဘျဲၣ် ပာ်ဖျါထီၣ်တၢ်ဘၣ်သးဒီးဃ့ထီၣ်၀ဲလၢ တတူၢ်လိာ်တၢ်ဘၢၣ်သိလ့ၣ်ကျဲဘၣ်အဂ့ၢ်ႇ ဆိကတီၢ်ကွံာ် သုးမုၢ်ဒိၣ်မၤၦဲၤသုးဂံၢ်ဘါအဂ့ၢ်ႇ ထုးကွံာ်ပယီၤသုးကလၢၤတဖၣ်ႇ တဘၣ်ဃုသ့ၣ်ညါတၢ်လၢလီၢ်က၀ီၤဒူသ၀ီတဖၣ်အဖီခိၣ်ဘၣ်အဂ့ၢ်ဒီး ကအိၣ်ဘၣ်၀ဲလၢအသဘျ့အဂီၢ် ကိးသြထီပာ်ဖျါထီၣ်တၢ်ဘၣ်သးအဂ့ၢ်န့ၣ် KNU တၢ်ဘိးဘၣ်ရၤလီၤ၀ဲၤကျိၤတၢ်ကစီၣ်အပူၤ ပာ်ဖျါ၀ဲန့ၣ်လီၤႉ
လၢန့ၣ်အမဲာ်ညါ တကီၢ်ခါ လီၢ်က၀ီၤဖိတဖၣ်သဂၢၢ်ဘၣ်ဒီးတၢ်ကီတၢ်ခဲတၢ်ဂ့ၢ်တဖၣ်အံၤအဖီခိၣ် KNU ဒီး သုးမုၢ်ဒိၣ်ႇပဒိၣ်လၢအဘၣ်ထွဲတဖၣ်အံၤ ကဘှါရှဲ၀ဲဒ်ထံရူၢ်ကီၢ်သဲးတၢ်မၤကျဲအသိးအမဲာ်ညါ KNU အံၤကတီၣ်ထီၣ်ဃ့ထီၣ်၀ဲဒၣ်ဆူ ဘီမုၢ်စၢဖှိၣ်ကရၢဃုာ်ဒီးထံဂုၤကီၢ်ဂၤလၢအထံၣ်ထွဲပၣ်ဃုာ်၀ဲလၢ တၢ်ပတုာ်တၢ်ခးအပူၤတဖၣ်အအိၣ်ဒီး ကဟ့ၣ်တၢ်ဆီၣ်သနံးဆူပဒိၣ်ဒီးသုးမုၢ်ဒိၣ်အဖီခိၣ်အဂီၢ် လီၢ်က၀ီၤဖိတဖၣ်ကိးသတြီဃ့ထီၣ်၀ဲလီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဒ်န့ၣ်အသိး ဖဲအပူၤကွံာ် လါဒံၣ်စ့ဘၢၣ် ၃၀ သီအနံၤစ့ၢ်ကီး ပဒိၣ်သုးနုာ်လီၤဘၢၣ်ကျဲအံၤအဖီခိၣ် တမိၣ်န့ၢ်သးလီၤ၀ဲဘၣ်အဂ့ၢ်ဒီး ဒ်သိးပယီၤသုးကလၢၤတဖၣ်ကထုးကွံာ်သးအဂီၢ် မုၢ်ြတီၢ်(ဖၣ်ပူၣ်)ကီၢ်ရ့ၣ်ႇ လူၤသီကီၢ်ဆၣ် လီၢ်က၀ီၤကမျၢၢ်တကလးဘျဲၣ် နီၤဖးလိာ်အသးဒီးပာ်ဖျါထီၣ်တၢ်ဘၣ်သးလၢတၢ်လီၢ် ၃ တီၤဒံးန့ၣ်လီၤႉ
စးထီၣ်ဖဲအပူၤကွံာ် လါဒံၣ်စ့ဘၢၣ် ၁ သီအနံၤန့ၣ် ဖၣ်ပူၣ်ဟီၣ်က၀ီၤအပူၤ သုးမုၢ်ဒိၣ်ဒီး KNU သုးက့(၅) သုးကရူၢ်တဖၣ်အဘၢၣ်စၢၤ တၢ်ခးလိာ်သးကဲထီၣ်၀ဲဒၣ်အဆၢတတဲာ်ဘၣ်အဃိ လီၢ်က၀ီၤဖိလၢအကထိဘၣ်စံၣ်မှံဟးဖျိးအိၣ်၀ဲဒၣ်န့ၣ်လီၤႉ ဒ်န့ၣ်အသိး KNU သုးက့(၁)ဒီး သုးက့(၃)တဖၣ်စ့ၢ်ကီး ခီဖျိလၢသုးမုၢ်ဒိၣ်ဒီးသုးခိးကီၢ်ဆၢ(BGF)တဖၣ် နုာ်လီၤဟူးဂဲၤ၀ဲအဃိ ခံခီခံကပၤသုးတၢ်ဖ့ၣ်ဆၢတဖၣ်ဟဲအိၣ်ထီၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ
တကီၢ်ခါတၢ်ကဲထီၣ်သးလၢ KNU ဒီး သုးမုၢ်ဒိၣ်တဖၣ်အဘၢၣ်စၢၤ သုးတၢ်ဖ့ၣ်စၢအံၤ ခီဖျိလၢတၢ်မၤဖျါထီၣ်တၢ်မုာ်တၢ်ခုၣ် တၢ်ပတုာ်တၢ်ခး(NCA)လံာ်ဃံးဃာ်တဖၣ်အဂံၢ်စၢ်၀ဲအဂ့ၢ်န့ၣ် ၦၤဃုသ့ၣ်ညါထံရူၢ်ကီၢ်သဲးဖိတဖၣ် ပဲာ်ထံနီၤဖး၀ဲန့ၣ်လီၤႉ
မုၢ်ြတီၢ်ဟီၣ်က၀ီၤအပူၤ တၢ်ထီဒါမၤ၀ဲတၢ်ပာ်ဖျါထီၣ်တၢ်ဘၣ်သးလၢပယီၤသုးမုၢ်ဒိၣ်တဖၣ်အဖီခိၣ်အံၤ စးထီၣ်ဖဲအပူၤကွံာ် ၂၀၂၀ အတီၢ်ပူၤဃုာ်ဒီးတကီၢ်ခါတၢ်ပာ်ဖျါထီၣ်သးခဲအံၤ အိၣ်၀ဲသၢဘျီလံန့ၣ်လီၤႉ
