လါဒံၣ်စ့ဘၢၣ် ၃၀ သီႇ ၂၀၂၁ နံၣ်ႇ ခ့ၣ်အဲးစံၣ်
ဖဲတနံၤအံၤဂီၤခီ ၇ နၣ်ရံၣ်ဃၣ်ဃၣ်အဆၢကတီၢ် သုးမီၤစိရိၤအသုးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)တဖၣ်အဘၢၣ်စၢၤ တၢ်ဒုးကဲထီၣ်၀ဲဖဲကီးနွဲၢ်သ၀ီကရူၢ် အၤကလီၤဒီးယွၤသ့ၣ်ကိသ၀ီအဘၢၣ်စၢၤဒီး ဖဲန့ၣ်ခီဖျိပယီၤသုးတကပၤသူ၀ဲဒၣ်ကျိဖးဒိၣ်အါအါဂီၢ်ဂီၢ်အဃိ လီၢ်က၀ီၤဖိလၢအအိၣ်ဘူးဖဲန့ၣ်အဂၤ(၁၀၀၀)ဘျဲၣ် ဘၣ်ဃ့ၢ်ထီၣ်ဟးပလဲာ်သးအဂ့ၢ်န့ၣ် လီၢ်က၀ီၤဖိိတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ
လီၢ်က၀ီၤသ၀ီဖိတဂၤစံး၀ဲလၢ“တၢ်ဒုးတၢ်အိၣ်သးအံၤဆူၣ်ထီၣ်ဒိၣ်မးအဃိ ကီးနွဲၢ်ကရူၢ်ပူၤ သ၀ီ(၆)ဖျၢၣ်ဘၣ်ဃ့ၢ်ထီၣ်ဟးပလဲာ်အသးမီၤနီၤႉ ၦၤဃ့ၢ်ထီၣ်အနီၣ်ဂံၢ်နီၣ်ဒွးန့ၣ်အိၣ်၀ဲ(၁၇၉၇)ဂၤႇ ဟံၣ်ခိၣ်န့ၣ်အိၣ်၀ဲ(၃၅၆)ဖျၢၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ
ပယီၤသုး(ခလရ-၂၀၁)ဒီး(ခလရ-၃၁၀)သုးရ့ၣ်လၢအနီၣ်ဂံၢ်ကအိၣ်၀ဲအဂၤ(၁၀၀)ဘျဲၣ်အံၤ ဖဲနုာ်လီၤ၀ဲလၢခ့ၣ်အဲၣ်ယူၣ်တၢ်ပၢဟီၣ်က၀ီၤဒူပျာ်ယာ်ကီၢ်ရ့ၣ်(သုးက့ ၆) ကီးတရံးကီၢ်ဆၣ် အ့ရှါကျဲမုၢ်ခိၣ်မနွဲၤကိသ၀ီကပၤအဆၢကတီၢ် ခီဖျိဟဲထီၣ်တလၢ၀ဲအၤကလီၤခၠီတၢ်ပာ်ပနီၣ်အလီၢ်အဃိ တၢ်ဘၣ်သဂၢၢ်ခးလိာ်သးကဲထီၣ်၀ဲဒီးဟီၣ်က၀ီၤ(KNLA)သုးရ့ၣ်(၁၈)ဒီးသုးရ့ၣ်(၂၇)သုးပာ်ဖှိၣ်တဖၣ်အဂ့ၢ်န့ၣ် သ့ၣ်ညါဘၣ်လၢ(KNLA)ၦၤဘၣ်မူဘၣ်ဒါအအိၣ်န့ၣ်လီၤႉ
“အ၀ဲသ့ၣ်ဟးဆှၣ်တၢ်လၢအ့ရှါကျဲမုၢ်ခိၣ်န့ၣ်အိၣ် ၂ သီလံႇ တနံၤအံၤဟဲထီၣ်၀ဲလၢမနွဲၤကိသ၀ီတကပၤအဃိ တၢ်ခးလိာ်သးကဲထီၣ်၀ဲဒီးပၦၤသုးဖိမီၤနီၤႉ အ၀ဲသ့ၣ်ခးဆၢၦၤလၢကျိဖးဒိၣ်တဖၣ်အိၣ်လီၤႉ လၢပ၀ဲတကပၤဒုတၢ်ဘၣ်ဒိဘၣ်ထံးတအိၣ်ဘၣ်ႉ မ့မ့ၢ်အ၀ဲသ့ၣ်တကပၤန့ၣ်တၢ်ဘၣ်ဒိဘၣ်ထံးအိၣ်လီၤႉ အၦၤလၢအဘၣ်ဒိဘၣ်ထံးတဖၣ်ဟဲတီၣ်၀ဲဒီးသိလ့ၣ်ႇလီၤတံၢ်လီၤဆဲးခီဒုတသ့ၣ်ညါဒံးဘၣ်”အဂ့ၢ်န့ၣ် KNLA ၦၤဘၣ်မူဘၣ်ဒါတဂၤပာ်ဂၢၢ်ပာ်ကျၢၤစံးဘၣ်ခ့ၣ်အဲးစံၣ်န့ၣ်လီၤႉ
လၢအပူၤကွံာ်တၢ်ဒုးကဲထီၣ်အခါစ့ၢ်ကီး ခီဖျိပယီၤသုးမီၤစိရိၤအသုးခးလီၤကျိဖးဒိၣ်အဃိ လီၢ်က၀ီၤဖိအဟံၣ်အဃီတနီၤဟးဂီၤ၀ဲအိၣ်ဘၣ်ဆၣ် မ့မ့ၢ်တၢ်ဒုးကဲထီၣ်ဘျီ၀ဲအံၤအပူၤ တၢ်ဟးဂုၤဟးဂီၤတၢ်အိၣ်သးခီန့ၣ်တသ့ၣ်ညါဒံးဘၣ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ
လၢန့ၣ်အမဲာ်ညါခီဖျိပယီၤသုးအံၤခးလီၤစ့ၢ်ကီးကျိဖးဒိၣ်လၢဟီၣ်က၀ီၤ(KNLA)အၦၤအိၣ်တၢ်လီၢ်သ၀ီတကပၤအဃိ လီၢ်က၀ီၤဖိလၢအကထိလၢအဃ့ၢ်ထီၣ်ဖဲအပူၤကွံာ်လါဒံၣ်စ့ဘၢၣ် ၁၉ သီအနံၤတဖၣ်စ့ၢ်ကီး တုၤလၢခဲအံၤက့ၤလၢအဟံၣ်အဃီတဘူၣ်ဒံး၀ဲဘၣ်ဒီး တကးဒံးဘၣ်ခီဖျိတနံၤအံၤတၢ်ဒုးကဲထီၣ်ကဒီးအဃိဘၣ်ဃ့ၢ်ထီၣ်ကဒီး၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ
