ကီးတရံးအပူၤ ခ့ၣ်အဲၣ်ယူၣ်ဒီးပယီၤသုးတၢ်ခးလိာ်သးကဲထီၣ်

လါဖ့ၤဘြူၤအါရံၤ ၂၆ သီႇ ၂၀၂၁ နံၣ်ႇ ခ့ၣ်အဲးစံၣ်

ကညီကီၢ်စဲၣ်ႇ ကီးတရံးကီၢ်ဆၣ် ကလံၤထံးတကပၤ သ၀ီသီသ၀ီအပူၤ ဖဲတဂီၤအံၤ ဂီၤခီ ၁၁ နၣ်ရံၣ်ဘျဲၣ်အဆၢကတီၢ် ခ့ၣ်အဲၣ်ယူၣ် သုးက့ ၆ ဒီး ကီၢ်ပယီၤသုးမုၢ်ဒိၣ်တဖၣ်အဘၢၣ်စၢၤ တၢ်ခးလိာ်သးကဲထီၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ပယီၤသုးလၢကဟဲထီၣ်ဟံးန့ၢ်တၢ်ဘံၣ်တၢ်ဘၢဖဲအီးဖးဖးဒိၣ်သ၀ီလၢအအိၣ်တယံၤတ ဘူးဒီးကီးတရံး၀့ၢ်အံၤကအတီၢ် ခ့ၣ်အဲၣ်ယူၣ် သုးက့ ၆ သုးကရူၢ်အံၤ တြီ၀ဲဒီးခး၀ဲလီၤအဂ့ၢ်န့ၣ် ခ့ၣ်အဲၣ်ယူၣ် သုးက့ ၆ သုးခိၣ်တဂၤ စံးဘၣ်ခ့ၣ်အဲးစံၣ်ဒ်အံၤန့ၣ်လီၤႉ

“ပယီၤသုးအံၤ ဃ့အခွဲးလၢကဟဲဟံတၢ်ဘံၣ်တၢ်ဘၢဖဲအီးဖးကၠံသ၀ီလီၤႉ ဃ့၀ဲအခွဲးဘျီ ပၦၤသုးဖိလၢ အိၣ်တၢ်မဲာ်ညါတဖၣ်န့ၣ် လၢတၢ်ဖီခိၣ်န့ၣ်တတဲတၢ်နီတမံၤဘၣ်ႉ လၢကဟဲန့ၣ်တတဲ၀ဲဘၣ်ႉ အ၀ဲသ့ၣ်ဟဲ၀ဲဒၣ် လၢအကစၢ်သးလီၤႉ ဖဲ ၁၁ နၣ်ရံၣ်ဘျဲၣ်အဆၢကတီၢ်န့ၣ် ပယီၤသုးအံၤဟဲထီၣ်၀ဲဒီးသိလ့ၣ် ၃ ခိၣ်လီၤႉ ဖဲန့ၣ်ခး၀ဲ လီၤႉ တၢ်ခးလိာ်သးကဲထီၣ်၀ဲဒၣ်လၢ(ဘက) သီခါဖၠၣ်အမဲာ်ညါလီၤႉ တၢ်ဘၣ်ဒိဘၣ်ထံးခီန့ၣ်တသ့ၣ်ညါဘၣ်” အဂ့ၢ်န့ၣ် စံး၀ဲန့ၣ်လီၤႉ

တကီၢ်ခါဆၢကတီၢ်ခဲအံၤ ပယီၤသုးမုၢ်ဒိၣ်ဒီးသုးသိလ့ၣ်သၢခိၣ်အံၤန့ၣ် တုၤလၢခဲအံၤတစုအိၣ်ဒံး၀ဲဒၣ် လၢတၢ်ခးလိာ်သးကဲထီၣ်အလီၢ်ဒီး ဒူသ၀ီဖိတဖၣ်စ့ၢ်ကီးအိၣ်၀ဲဒၣ်လၢအကစၢ်အဟံၣ်ဒီး ဃ့ၢ်ပူၤဖျဲးသးတအိၣ်ဒံး၀ဲဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဒ်လီၢ်က၀ီၤသ၀ီဖိတဖၣ်စံး၀ဲအသိးန့ၣ် ပယီၤသုးတကပၤတၢ်ဘၣ်ဒိဘၣ်ထံးအိၣ်၀ဲဒၣ်ဘၣ်ဆၣ် ခ့ၣ်အဲးစံၣ် ကပာ်ဂၢၢ်ပာ်ကျၢၤ၀ဲလီၤလီၤဆီဆီတအိၣ်ဒံး၀ဲဘၣ်န့ၣ်လီၤႉ