လါဖ့ၤဘြူၤအါရံၤ ၂၆ သီႇ ၂၀၂၁ နံၣ်ႇ ခ့ၣ်အဲးစံၣ်
KNU-ကညီဒီကလုာ်စၢဖှိၣ်ကရၢႇတီအူကီၢ်ရ့ၣ်ဟီၣ်က၀ီၤအပူၤ သုးကီၣ်ကးလၢအဟံးဆူၣ်ကွံာ် တကီၢ်ခါထံကီၢ်တၢ်စိတၢ်ကမီၤတကးဒံးဘၣ် တၢ်ပၢတၢ်ပြးလၢ ကီၢ်စၢဖှိၣ်ဘျီၣ်ဒိၣ်ခၢၣ်စးကမံးတံာ် -CRPH ကပာ်လီၤပာ်ပနီၣ်၀ဲတဖၣ်အံၤစ့ၢ်ကီး တတူၢ်လိာ်၀ဲဘၣ်အဂ့ၢ်န့ၣ် ဖဲလါဖ့ၤဘြူၤအါရံၤ ၂၅ သီအနံၤန့ၣ် တီအူကီၢ်ရ့ၣ် ထုးထီၣ်ပာ်ဖျါ၀ဲလံာ်တၢ်ပာ်သးန့ၣ်လီၤႉ
ဖဲသုးဟံးဆူၣ်ကွံာ်တၢ်စိတၢ်ကမီၤ၀ံၤအလီၢ်ခံ ပၢဆှၢရဲၣ်ကျဲၤကီၣ်ကးအံၤ ပာ်ပနီၣ်လီၤ၀ဲတၢ်ပၢတၢ်ပြးဒီး ဟံးဆူၣ်ကွံာ်၀ဲတၢ်စိတၢ်ကမီၤအမဲာ်ညါ လၢအတကပၤစ့ၢ်ကီး ဒ်သိးကက့ၤမၤသမူထီၣ်က့ၤ ၂၀၀၈ တၢ်ဘျၢသဲစးခိၣ်သ့ၣ်အံၤအဂီၢ် လၢတၢ်ကမၤဖျါထီၣ်အမိၢ်လံၤမိၢ်ၦၢ်(CRPH-Committee Representing Pyidaungsu Hluttaw)တၢ်ပၢဆှၢတၢ်ရဲၣ်တၢ်ကျဲၤအံၤစ့ၢ်ကီး ကထီဒါ၀ဲအဂ့ၢ်န့ၣ် KNU တီအူကီၢ်ရ့ၣ်(သုးက့ ၂)သုးက့ခိၣ် သုးခိၣ်ကျၢၢ်ဖိ စီၤဒဲဖိ စံး၀ဲန့ၣ်လီၤႉ
“ပမၤ၀ဲဒၣ်တၢ်ပတုာ်တၢ်ခးန့ၢ်၀ဲ ၉ နံၣ်လံႉ တထံၣ်ဘၣ်တၢ်အမိၢ်လံၤမိၢ်ၦၢ်ဟဲဖျါထီၣ်နီတမံၤဘၣ်ႉ ခဲအံၤစ့ၢ်ကီး သုးပဒိၣ်အံၤဟံးန့ၢ်ကွံာ်တၢ်စိတၢ်ကမီၤဒီး ကဟဲပာ်လီၤ၀ဲပၢပြးလၢဒူသ၀ီလၢ KNU ပၢဆှၢ၀ဲတဖၣ်အပူၤန့ၣ် တအဲၣ်ဒိးဘၣ်ႉ CRPH စ့ၢ်ကီး လီၤဂာ်ဒ်သိးဒီးအဲၣ်ဒိးဒုးမူထီၣ်က့ၤ ၂၀၀၈ တၢ်ဘျၢသဲစးအဃိ တအဲၣ်ဒိးဘၣ်ႉ ပထံၣ်ဆိပၤစၢၤလၢတၢ်ပြၢတၢ်ပြးဒ်အံၤကဟဲ၀ဲဒီး သူၣ်ကိၢ်သးဂီၤအဃိဘၣ်ထုးထီၣ်ပာ်ဖျါ၀ဲလီၤ” အဂ့ၢ်န့ၣ် သုးခိၣ်ကျၢၢ်ဖိ စီၤဒဲဖိ စံး၀ဲန့ၣ်လီၤႉ
KNU တီအူကီၢ်ရ့ၣ်အံၤ ခ့ၣ်အဲၣ်ယူၣ်ပၢပြးလၢအအိၣ်တ့ၢ်ပာ်လၢကီၢ်ရ့ၣ်အပူၤတဖၣ်အံၤ ကြၢး၀ဲဘၣ်၀ဲဒၣ်ဒီးကလုာ်ဒူၣ်ထူလံၤဖိတဖၣ်အဂီၢ်အဃိ ကဆဲးလဲၤဒ် KNU ပၢပြးအသိးလီၤအဂ့ၢ်န့ၣ် သုးခိၣ်ကျၢၢ်ဖိ စီၤဒဲဖိ ဆဲးစံး၀ဲန့ၣ်လီၤႉ
ကီၢ်ဆၣ်ႇဒူသ၀ီၦၤပၢဆှၢတၢ်လၢအအိၣ်ပာ်လၢအပၣ်ဃုာ်ဒီး ပၢပြးခိၣ်နၢ်တၢ်တဖၣ်ဒီး ပၢပြး၀ဲၤကျိၤ ၦၤဘၣ်မူဘၣ်ဒါတဖၣ်အံၤ တတူၢ်လိာ်၀ဲသုးဟံးဆူၣ်ကွံာ်တၢ်စိတၢ်ကမီၤဘၣ်အဃိ ဘၣ်ထွဲဒီးပၢပြး တၢ်မၤတဖၣ်အံၤ တဘၣ်မၤဘၣ်ထွဲသးလၢၤဘၣ်အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
လၢန့ၣ်အမဲာ်ညါ တီအူကီၢ်ရ့ၣ်အံၤ ကအိၣ်ဆၢထၢၣ်၀ဲဒ် KNU (လီၢ်ခၢၣ်သး)ထုးထီၣ်ပာ်ဖျါ၀ဲတၢ်ပာ်သးတဖၣ်အသိးလီၤဒီး ကဆီၣ်ထွဲဟ့ၣ်ဂံၢ်ဟ့ၣ်ဘါ၀ဲကမျၢၢ်ထံဖိကီၢ်ဖိလၢအထီဒါသုးမီၤစိရိၤလၢအပာ်ဖျါထီၣ်သးတဖၣ်အဂ့ၢ်န့ၣ် ကီၢ်ရ့ၣ်လံာ်ဘိးဘၣ်ရၤလီၤအပူၤ ပၣ်ဃုာ်၀ဲန့ၣ်လီၤႉ
CRPH အံၤ ကမျၢၢ်ဘျီၣ်ဒိၣ်ဒီးဒီကလုာ်ဘျီၣ်ဒိၣ်ခၢၣ်စးတဖၣ်လၢအမၤနၢၤ ၂၀၂၀ တၢ်ဃုထၢတဖၣ်အံၤ ဒုးအိၣ်ထီၣ်၀ဲဒၣ်န့ၣ်လီၤႉ အ၀ဲသ့ၣ်ဆဲးကျိး၀ဲဒၣ်ဒီးကီၢ်ပူၤကီၢ်ချၢတၢ်ကရၢကရိတဖၣ်ဒီး ဒ်သိးဒံၣ်မိၣ်ခြ့ၣ်စံၣ်ပဒိၣ်ကက့ၤဒိးန့ၢ်ကဒါက့ၤတၢ်စိတၢ်ကမီၤအဂီၢ် ဂုာ်ကျဲးစၢးဟူးဂဲၤ၀ဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
