ပယီၤသုးမီၤစိရိၤ ပဒိၣ် ထံကီၢ်တၢ်ပၢတၢ်ပြးကီၣ်ကးကရၢဖိအကျါ ပၣ်ဃုာ်၀ဲဒီးပဒိၣ်မါည့မီၣ်

လါဖ့ၤဘြူၤအါရံၤ ၃ သီႇ ၂၀၂၁ နံၣ်ႇ ခ့ၣ်အဲးစံၣ်

ဖဲမဟါ(လါယနူၤအါရံၤ ၂)သီအနံၤ ဒ်ကီၢ်ပယီၤကီၢ်စၢဖှိၣ် သုးမုၢ်ဒိၣ်တၢ်ဒီသဒၢ၀ဲၤလီၢ်ခိၣ်သ့ၣ်ရူ ထုးထီၣ်ပာ်ဖျါ၀ဲအသိးန့ၣ် ပယီၤသုးမီၤစိရိၤပဒိၣ် ဒုးအိၣ်ထီၣ်ထံကီၢ်တၢ်ပၢတၢ်ပြးကီၣ်ကးကရၢဖိအကျါ ပၣ်ဃုာ်၀ဲဒၣ်ဒီး ခ့ၣ်အဲၣ်ယူၣ် ခိၣ်နၢ်လီၢ်လံၤ ပဒိၣ်မါည့မီၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဘၣ်ထွဲဒီးတၢ်ဘိးဘၣ်ရၤလီၤတၢ်ဟ့ၣ်တၢ်ကလုၢ်အံၤ လၢကပာ်ဂၢၢ်ပာ်ကျၢၤအီၤအဂီၢ် ခ့ၣ်အဲးစံၣ်ဆဲးကျိးသံကွၢ်၀ဲပဒိၣ်မါည့မီၣ်ဒီးအ၀ဲစံး၀ဲလၢ“ဘၣ်ထွဲဒီးတၢ်ကစီၣ်န့ၣ်တအဲၣ်ဒိးတဲတၢ်နီတမံၤဘၣ်” အဂ့ၢ်န့ၣ် က့ၤစံးဆၢကဒါ၀ဲန့ၣ်လီၤႉ

ဒ်တၢ်သူၣ်ထီၣ်တၢ်ဘျၢသဲစးခိၣ်သ့ၣ် အဆၢဒိၣ်(၄၁၉)အသိး တၢ်ဒုးအိၣ်ထီၣ်၀ဲပၢဆှၢရဲၣ်ကျဲၤပၢပြးကီၣ်ကး ၁၁ ဂၤ န့ၣ်မ့ၢ်၀ဲဒၣ် ၦၤပၢၤလီၢ်ဆ့ၣ်နီၤ သုးခိၣ်ကျၢၢ် စိရိၤ မ့အီၤလဲၤႇ ၦၢပၢၤလီၢ်ဆ့ၣ်နီၤ(၂) သုးခိၣ်ဒိၣ်စိ စိ၀့ႇ နဲၣ်ရွဲၣ် သုးခိၣ်ကျၢၢ်စိ အီၤလ့ဒွ့ ဒီး နဲၣ်ရွဲၣ်သဃဲၤ သုးခိၣ်ကျၢၢ်စိ ယဲ၀့အူ တဖၣ်ပၣ်ဃုာ်၀ဲန့ၣ်လီၤႉ

လၢန့ၣ်အမဲာ်ညါ ကရၢဖိ ၇ ဂၤန့ၣ်မ့ၢ်၀ဲဒၣ် သုးခိၣ်ကျၢၢ်ဒိၣ်စိ မၠၣ်ထိအူႇ သုးခိၣ်ကျၢၢ်ဒိၣ်စိ တ့ၤအီၤဆါႇ သုးခိၣ်ကျၢၢ်ဒိၣ်စိ မီၤမီၤကၠီၤႇ သုးခိၣ်ကျၢၢ်စိ မိမၠ့ၣ်ထိႇ ပဒိၣ်မါည့မီၤႇ အူသ့ညိၣ် ဒီး အူခ့ၤမီၤစွ့ၤတဖၣ်ပၣ်ဃုာ်၀ဲအဂ့ၢ်န့ၣ် လံာ်တၢ်ဘိးဘၣ်ရၤလီၤတၢ်ကလုၢ်အပူၤအသိး သ့ၣ်ညါဘၣ်န့ၣ်လီၤႉ

ပဒိၣ်မါည့မီၤလၢအပၣ်ဃုာ်လၢထံကီၢ်တၢ်ပၢတၢ်ပြးကီၣ်ကးကရၢဖိအကျါအံၤ ဖဲအပူၤကွံာ်န့ၣ်ဟးထီၣ်၀ဲဒၣ်လၢ KNU-ကညီဒီကလုာ်စၢဖှိၣ်ကရၢ ပၢဆှၢတၢ်ကမံးတံာ်အပူၤဒီး ဖဲအပူၤကွံာ် ၂၀၂၀ တၢ်ဃုထၢဖးဒိၣ်အခါစ့ၢ်ကီး နုာ်လီၤဒိးဃုထၢအသးလၢ ကညီကမျၢၢ်ပၣ်တံၣ်-KPP အခၢၣ်စး ဒ်ကမျၢၢ်ဘျီၣ်ဒိၣ်ခၢၣ်စးတဂၤအသိးဖဲပါတနီၣ်ကီၢ်ဆၣ်အပူၤန့ၣ်လီၤႉ