လါဖ့ၤဘြူၤအါရံၤ ၂ သီႇ ၂၀၂၁ နံၣ်ႇ စးအဲၣ်ဆူ
ကညီကီၢ်စဲၣ်အပူၤ ဘၣ်ထွဲဒီးတၢ်ဖီလာ်သုးတၢ်သဘံၣ်သဘုၣ်တၢ်ဂ့ၢ်တဖၣ်အံၤ ဒ်သိးတၢ်ကဘှါရှဲထိၣ်ဃူထိၣ်ဖိးအဂီၢ် ကညီဒီကလုာ်စၢဖှိၣ်ကရၢ -KNU အထဲးဂံၢ်ထဲးဘါအဖီခိၣ် တၢ်က့ၤခီၣ်ဆၢကဒါတအိၣ်နီတမံၤဘၣ်အဃိ အလီၢ်အိၣ်လၢ ထံဂုၤကီၢ်ဂၤကဟ့ၣ်သကိးတၢ်ဆီၣ်သနံးအဂီၢ်လိၣ်၀ဲဒၣ်လံအဂ့ၢ်န့ၣ် KNU စံး၀ဲန့ၣ်လီၤႉ
တကီၢ်ခါတၢ်သဘံၣ်သဘုၣ်တဖၣ်အဖီခိၣ် ဒ်သိးကဘှါရှဲ၀ဲအဂီၢ် KNU အံၤ ထဲးဂံၢ်ထဲးဘါလၢကထံၣ်လိာ်ထိၣ်ဃူထိၣ်ဖိးဒီးသုးမုၢ်ဒိၣ် ဘၣ်ဆၣ် ခီဖျိလၢတၢ်က့ၤခီၣ်ဆၢကဒါတအိၣ်နီတမံၤဘၣ်အဃိ တၢ်မုာ်တၢ်ခုၣ်တၢ်မၤအကျဲအံၤ ထံဂုၤကီၢ်ဂၤႇ တၢ်ကရၢကရိလၢအပၣ်ဃုာ်ဟ့ၣ်ဂံၢ်ဟ့ၣ်ဘါတူၢ်လိာ်၀ဲတဖၣ်အံၤ အလီၢ်အိၣ်လၢကဘၣ်နုာ်လီၤပၣ်ဃုာ်၀ဲလံအဂ့ၢ်န့ၣ် KNU ထံဂုၤကီၢ်ဂၤ၀ဲၤကျိၤ ၦၤပၢၤလီၢ်ဆ့ၣ်နီၤ ပဒိၣ်စီၤတီနံ စံးလီၤဆီၣ်တခူထီၣ်၀ဲဖဲ ကီၢ်ကၠီၣ်တဲၣ်=ကီၢ်ကပယီၤကီၢ်ဆၢ တၢ်မၤ၀ဲ(၇၂)၀ီတ၀ီ ကညီတၢ်ပၢၢ်ဆၢမုၢ်နံၤ တၢ်ရဲၣ်တၢ်ကျဲၤမူးအပူၤန့ၣ်လီၤႉ
“ပဆဲးလီၤ၀ဲလံာ်ဃံးဃာ်လၢထံဂုၤကီၢ်ဂၤထံကီၢ်အမဲာ်ညါအသိးန့ၣ် ပကလူၤပိာ်မၤထွဲ၀ဲဘၣ်ဆၣ်သနာ်က့ ဒ်အ၀ဲသ့ၣ်တဲ၀ဲအသိး(Home made peace process)အံၤ ၈ နံၣ် ၉ နံၣ် ပမ့ၢ်လဲၤဒၣ်ပ၀ဲ ကဒဲကဒဲန့ၣ် တကဲထီၣ်တၢ်နီတမံၤဘၣ်ႉ တၢ်အဃိန့ၣ် ထံဂုၤကီၢ်ဂၤဃုာ်ဒီးဘီမုၢ်စၢဖှိၣ်ကရၢအံၤ တကီၢ်ခါၦၤဃ့ၢ်မှံဟးဖျိးဖိတဖၣ်အဂီၢ် ဒ်သိးတၢ်ဖိတၢ်လံၤလၢတၢ်ကလဲၤမၤစၢၤ၀ဲတဖၣ်အံၤကတုၤ၀ဲအဂီၢ် အလီၢ်အိၣ်၀ဲလၢကဘၣ်နုာ်လီၤတဲ၀ဲလံ”အဂ့ၢ်န့ၣ် စံး၀ဲန့ၣ်လီၤႉ
ဒ်သိးတၢ်ကဘှါရှဲ၀ဲတကီၢ်ခါတၢ်ဖီလာ်တၢ်သဘံၣ်သဘုၣ်တဖၣ်အံၤအဂီၢ် KNU အံၤ ဖဲအပူၤကွံာ် လါဒံၣ်စ့ဘၢၣ်အခါန့ၣ် ဆှၢထီၣ်၀ဲလံာ်ဆူ သုးမုၢ်ဒိၣ် တၢ်ထိၣ်ဃူထိၣ်ဖိးခၢၣ်စးကရူၢ်အအိၣ် အိၣ်၀ဲခံဘျီလံဘၣ်ဆၣ် တုၤလၢခဲအံၤတစု က့ၤဒုးသ့ၣ်ညါကဒါတၢ်တအိၣ်နီမံၤဘၣ်အဂ့ၢ်န့ၣ် အ၀ဲဆဲးစံး၀ဲန့ၣ်လီၤႉ
တကီၢ်ခါ ခီဖျိလၢသုးတၢ်သဘံၣ်သဘုၣ်အဃိ လီၢ်က၀ီၤကမျၢၢ်လၢအကထိဘၣ်စံၣ်မှံဟးဖျိး၀ဲဒၣ်ဒီး တၢ်ဖိတၢ်လံၤလၢကီၢ်ပူၤကညီသးစၢ်ထၢ၀ဲတဖၣ်အံၤ လဲၤတုၤ၀ဲဒၣ်လၢ KNU တၢ်ရ့လိာ်မုာ်လိာ်၀ဲၤဒၢးလံဘၣ်ဆၣ် လၢကလဲၤဆှၢကဒါလၢၦၤစံၣ်မှံဟးဖျိးအအိၣ်အဂီၢ် ခံခီခံကပၤထိၣ်ဃူထိၣ်ဖိးတအိၣ်ဒံးဘၣ်အဂ့ၢ်န့ၣ် KNU စံး၀ဲန့ၣ်လီၤႉ
ဒ်န့ၣ်အသိး နံၣ်(၇၂)၀ီတ၀ီ ကညီတၢ်ပၢၢ်ဆၢမုၢ်နံၤအဂီၢ် KNU ၦၤပၢၤလီၢ်ဆ့ၣ်နီၤ သုးခိၣ်ကျၢၢ်စိ စီၤမူၤတူစ့ဖိ အလံာ်ဟ့ၣ်ယုၢ်ပူၤစ့ၢ်ကီးပာ်ဖျါ၀ဲလၢ ဒ်(NCA)တၢ်ပတုာ်တၢ်ခးအလံာ်ဃံးဃာ်အသိး ဒ်သိးတၢ်ပတုာ် တၢ်ခးကဂၢၢ်ကျၢၤအဂီၢ် ဖဲလၢသုးလၢအဘၣ်ထွဲတဖၣ်ထံၣ်လိာ်သးတသ့ဒံးဘၣ်အခါန့ၣ် ခီဖျိလၢခံခီခံကပၤသုးတၢ်အိၣ်ဆၢထၢၣ်ႇ တၢ်မၤအကျဲဒီးတၢ်ဖံးတၢ်မၤတဖၣ်အဃိ လၢ KNU အဟီၣ်က၀ီၤပူၤတနီၤန့ၣ် သုးတၢ်ဖ့ၣ်စၢဟဲကဲထီၣ်၀ဲဒၣ်ဒီး ကမျၢၢ်တဖၣ်ဘၣ်စံၣ်မှံဟးဖျိး၀ဲအဃိ ကဘၣ်ဘှါရှဲအီၤဒ်(NCA)အကျဲအသိးလိၣ်၀ဲဒီး ဒ်သိးတၢ်ဂ့ၢ်ကီသုတဟဲဒိၣ်ထီၣ်တဂ့ၤအဂီၢ်စ့ၢ်ကီးန့ၣ် ၦၤလၢအဘၣ်မူဘၣ်ဒါတဖၣ် အလီၢ်အိၣ်လၢကထံၣ်လိာ်ထိၣ်ဃူထိၣ်ဖိးဃုအစၢအဂ့ၢ်န့ၣ် ဆီတခူထီၣ်၀ဲန့ၣ်လီၤႉ
စးထီၣ်ဖဲအပူၤကွံာ် လါဒံၣ်စ့ဘၢၣ်ထီၣ်သီအခါန့ၣ် ကညီကီၢ်စဲၣ် ကလံၤစိးတကပၤ ဖၣ်ပူၣ်ဒီးလၢၢ်ဒိၣ်ဟီၣ်က၀ီၤတဖၣ်အပူၤ တၢ်ဖီလာ်သုးတၢ်သဘံၣ်သဘုၣ်ဟဲကဲဲထီၣ်၀ဲအဃိ လီၢ်က၀ီၤကမျၢၢ်ထံဖိကီၢ်ဖိလၢအကထိဘၣ်ဃ့ၢ်မှံဟးဖျိး၀ဲဒၣ်အသိး လီၢ်က၀ီၤကမျၢၢ် ၃ ဂၤစ့ၢ်ကီး ဘၣ်သံ၀ဲဒၣ်ဒီး ၂ ဂၤန့ၣ်ဘၣ်ဒိဘၣ်ထံး၀ဲနးနးကလဲာ်အိၣ်၀ဲဒၣ်န့ၣ်လီၤႉ
