ကညီပိာ်မုၣ်ကရၢ မၤလၤမၤကပီၤ၀ဲသ၀ီသးၦၢ်မုၣ်လီၢ်လံၤတဖၣ်

လါမးရှး ၉ သီႇ ၂၀၂၁ နံၣ်ႇ ခ့ၣ်အဲးစံၣ်

KNU- ကညီဒီကလုာ်စၢဖှိၣ်ကရၢ ဖၣ်အၣ်ကီၢ်ရ့ၣ်ႇ တၢ်ကြဲၢ်ကီၢ်ဆၣ် ပံၣ်တခးသ၀ီအပူၤ ဖဲမဟါလါမးရှး ၈ သီအနံၤ လၢအလီၤဘၣ်၀ဲ ၁၁၀ ၀ီတ၀ီ ဟီၣ်ခိၣ်ဒီဘ့ၣ်ပိာ်မုၣ်မုၢ်နံၤတၢ်ရဲၣ်တၢ်ကျဲၤမူးအပူၤ KWO- ကညီပိာ်မုၣ်ကရၢ မၤလၤမၤကပီၤ၀ဲသ၀ီသးၦၢ်မုၣ်လီၢ်လံၤတဖၣ်န့ၣ်လီၤႉ

သ၀ီသးၦၢ်ပိာ်မုၣ်သ့ၣ်တဖၣ်အံၤ ဖဲလၢသုးတၢ်သဘံၣ်သဘုၣ်အိၣ်ထီၣ်အခါ မူဒါလၢပိာ်ခွါမၤ၀ဲတ ဘူၣ်ဘၣ်တဖၣ်န့ၣ် မ့ၢ်ၦၤသ့ၣ်တဖၣ်လၢမၤ၀ဲသ၀ီသးၦၢ်တၢ်မၤဒီးဒီသဒၢ၀ဲဒူသ၀ီတဖၣ်အဃိ ခီဖျိလၢကြၢးမၤလၤကပီၤအဃိ ပသ့ၣ်ညါဘၣ်ပနီၣ်အ၀ဲသ့ၣ်ဒီးမၤလၤကပီၤ၀ဲဒ်အံၤလီၤအဂ့ၢ်န့ၣ် ဖၣ်အၣ်ကီၢ်ရ့ၣ် KWO နဲၣ်ရွဲၣ် နီၢ်ရှံ၀ါ စံးဘၣ်ခ့ၣ်အဲးစံၣ်ဒ်အံၤန့ၣ်လီၤႉ

“သးၦၢ်မုၣ်တဖၣ်အံၤ ဟ့ၣ်လီၤသးလၢထံကီၢ်ဒီးကလုာ်အဂီၢ်လီၤႉ အ၀ဲသ့ၣ်န့ၣ်အိၣ်ဒီးသူၣ်ဒူသးဒူလီၤႉ လၢ တၢ်ကီတၢ်ခဲအပူၤ မၤ၀ဲမူဒါလၢလၢၦဲၤၦဲၤလီၤႉ တနီၤန့ၣ်တုၤလၢခဲအံၤတစုဆဲးမၤဒံး၀ဲသ၀ီသးၦၢ်မူဒါလီၤႉ အဘျုးအဖှိၣ်အိၣ်၀ဲဒၣ်လၢပ၀ဲသ့ၣ်တဖၣ်အဂီၢ်လီၤႉ ကြၢးကွၢ်လိလီၤႉ ဒူသ၀ီအဂီၢ်တကးဘၣ်ႇ ပပာ်ပနီၣ် အ၀ဲသ့ၣ်တဖၣ်လၢအမ့ၢ် ၦၤလၢအဟ့ၣ်လီၤအသးလၢထံကီၢ်ဒီးၦၤကလုာ်အဂီၢ်အဃိ ပမၤလၤကပီၤအ၀ဲသ့ၣ်လီၤ”အဂ့ၢ်န့ၣ် အ၀ဲစံး၀ဲန့ၣ်လီၤႉ

KNU ဖၣ်အၣ်ကီၢ်ရ့ၣ် လူၢ်ပျဲၢ်ႇတၢ်ကြဲၢ်ႇထံလိၤႇနဘူဒီး ဒူယီၢ်ကီၢ်ဆၣ် ကီၢ်ဆၣ် ၅ ဘ့ၣ် ၦၤအသးနံၣ် ၅၀ ဘဲၣ် တုၤလၢ ၈၀ ဘျဲၣ်န့ၣ် သ၀ီသးၦၢ်မုၣ်လီၢ်လံၤအိၣ်၀ဲ ၅၄ ဂၤဒီး ခီဖျိလၢသူၣ်က့သးၦၢ်အဃိ ဟဲထီၣ်၀ဲဒၣ်တၢ်ရဲၣ်တၢ်ကျဲၤထဲ ၄၈ ဂၤန့ၣ်လီၤႉ

သ၀ီသးၦၢ်မုၣ်လီၢ်လံၤ သးနံၣ် ၇၀ ဘျဲၣ် နါမူၤ စံး၀ဲလၢ“ဖဲတဲာ်လွံၢ်တဲာ်အကတီၢ် အခါန့ၣ် မတၤတဂၤမးကဲသ၀ီသးၦၢ်တဘူၣ်ဘၣ်ႉ တၢ်ဒုးကဲထီၣ်လၢ သ၀ီပူၤခဲအံၤခဲအံၤႇ လဲၤလၢန့ၣ်ဒၢးတဲလၢ သုးမ့ၢ်ၦၤလၢသုးကျါႇ ပယီၤသုးတဖၣ်မ့ၢ်ဟဲလၢသ၀ီပူၤစ့ၢ်ကီးတဲ၀ဲလၢသုမ့ၢ်ၦၤပူထီၣ်လီထီၣ်တၢ်ဒီး မၤနၢၤအီၣ်ဃီၣ်ၦၤအဃိ ၦၤပျံၤတၢ်လီၤႉ သ၀ီသးၦၢ်မ့ၢ်တအိၣ်ဘၣ်န့ၣ် သ၀ီတဖၣ်လီၤဘၣ်တၢ်ကီတၢ်ခဲအဃိ ပ၀ဲသ့ၣ်တဖၣ်ဘၣ်ကဲသ၀ီသးၦၢ်လီၤႉ သ၀ီသးၦၢ်တၢ်မၤအံၤပိာ်မုၣ်တဖၣ်ဘၣ်မၤ၀ဲနၤတဘျီယၤတဘျီလီၤႉ တနီၤန့ၣ်တအိၣ်လၢၤဘၣ်ႉ ခဲအံၤန့ၣ်တဘၣ်နီတမံၤလၢၤဘၣ် ပိာ်ခွါတဖၣ်စ့ၢ်ကီးမၤက့ၤသ၀ီသးၦၢ်ဘူၣ်လံ” အဂ့ၢ်န့ၣ် စံး၀ဲန့ၣ်လီၤႉ

တၢ်ရဲၣ်တၢ်ကျဲၤလၢဘျီ၀ဲအံၤအပူၤန့ၣ် သ၀ီသးၦၢ်ပိာ်မုၣ်တဖၣ်ဃုာ်ဒီးတၢ်ဘူၣ်တၢ်ဘါခိၣ်နၢ်တဖၣ်ႇ KNU တၢ်ကြဲၢ်ကီၢ်ဆၣ် ၦၤဘၣ်မူဘၣ်ဒါတဖၣ်ႇသးစၢ်ခၢၣ်စးတဖၣ်ဒီးဒူသ၀ီကမျၢၢ်ပာ်ဖှိၣ်ခဲလၢာ် ၈၀၀ ဘျဲၣ် ဟဲထီၣ်၀ဲတၢ်ရဲၣ်တၢ်ကျဲၤအံၤန့ၣ်လီၤႉ