လူၢ်ပျဲၢ်လီၢ်က၀ီၤဖိတနီၤဟးစံၣ်ပလဲာ်ဆိသးခီဖျိနၢ်ဟူလၢပယီၤသုးကဟဲခးတၢ်

လါယနူၤအါရံၤ ၆ သီႇ ၂၀၂၂ နံၣ်ႇ ခ့ၣ်အဲးစံၣ်

တၢ်ကစီၣ်ဟူထီၣ်လၢကညီနံၣ်ထီၣ်သီအတီၢ်ပူၤပယီၤသုးကနုာ်လီၤမၤဒုးယၤတၢ်ဟူးတၢ်ဂဲၤအဃိ လူၢ်ပျဲၢ်ကီၢ်ဆၣ် ရှါယွၤသ့ၣ်သ၀ီကပၤ သရ့ၤဖိကွံလီၢ်က၀ီၤသ၀ီဖိတနီၤဟးစံၣ်ပလဲာ်ဆိသးအဂ့ၢ်န့ၣ် သ့ၣ်ညါဘၣ်န့ၣ်လီၤႉ

တချုးလၢတနံၣ်အံၤလါယနူၤအါရံၤထီၣ် ၂ သီ ကညီနံၣ်ထီၣ်သီတုၤဒံးဘၣ်အခါန့ၣ် ခီဖျိလီၢ်က၀ီၤဖိတဖၣ်နၢ်ဟူ၀ဲတၢ်ကစီၣ်လၢပယီၤသုးကနုာ်လီၤမၤဒုးယၤတၢ်ဟူးတၢ်ဂဲၤအဃိ လီၢ်က၀ီၤဒူဖိသ၀ီဖိအကျါသူၣ်က့သးၦၢ်ႇပိာ်မုၣ်ပိာ်မၢၤဒီးဖိဒံဖိသၣ်သ့ၣ်တဖၣ် လဲၤစံၣ်ပလဲာ်ဆိသးလၢကီၢ်ဆၢတၢ်လီၢ်တဖၣ်ဒီး တုၤလၢခဲအံၤတစုဟဲက့ၤ၀ဲတဘူၣ်ဒံးဘၣ်အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါတဂၤစံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“အ၀ဲသ့ၣ်န့ၣ်အတၢ်လဲၤခီဖျိအိၣ်ဃာ်လၢဘၣ်စံၣ်ဘၣ်ဃ့ၢ်လံအဃိ မ့နၢ်ဟူတၢ်တမံၤမံၤန့ၣ် ဆိမိၣ်၀ဲလၢကစံၣ်ဆိလီၤမီၤနီၤႉ ခဲအံၤၦၤစံၣ်တဖၣ်အကျါန့ၣ် မ့ၢ်၀ဲဒၣ်ပိာ်မုၣ်ပိာ်မၢၤႇ သူၣ်က့သးၦၢ်ဒီးဖိဒံဖိသၣ်တဖၣ်လီၤမီၤနီၤႉ လၢသ၀ီပူၤန့ၣ်ၦၤတအိၣ်အါအါလၢၤဘၣ်ႉ အ၀ဲသ့ၣ်နၢ်ဟူ၀ဲလၢပယီၤသုးအံၤဖဲနံၣ်ထီၣ်သီန့ၣ်ကဟဲခးတၢ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

သ၀ီဖိသ့ၣ်တဖၣ်အံၤဟးစံၣ်ပလဲာ်သးအိၣ်တနွံဃၣ်ဃၣ်လံဘၣ်ဆၣ် တုၤလၢခဲအံၤတစုလီၢ်က၀ီၤဖဲန့ၣ်အပူၤတၢ်ကစီၣ်ဟူထီၣ်ဒံး၀ဲလၢပယီၤသုးကနုာ်လီၤ၀ဲအသိး နၢ်ဟူ၀ဲလၢကညီဒီကလုာ်စၢဖှိၣ်ကရၢတကပၤစ့ၢ်ကီးအိၣ်ကတီၤသးလၢကက့ၤခီၣ်ဆၢကဒါ၀ဲအဃိ အ၀ဲသ့ၣ်ဟဲက့ၤ၀ဲတဘူၣ်ဒံးဘၣ်အဂ့ၢ်န့ၣ် ၦၤဘၣ်မူဘၣ်ဒါတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ

ဟီၣ်က၀ီၤ၀ဲအံၤအိၣ်ဆီလီၤအသးလၢခ့ၣ်အဲၣ်ယူၣ် သုးက့(၇)ဟီၣ်က၀ီၤအပူၤဒီး ဖဲလါယနူၤအါရံၤ ၂ သီအနံၤစ့ၢ်ကီး တၢ်ကစီၣ်ဟူထီၣ်လၢပယီၤသုးနုာ်လီၤ၀ဲဒၣ်လၢရှါယွၤသ့ၣ်သ၀ီတကပၤအဃိ လီၢ်က၀ီၤဖိတဖၣ်တၢ်ဘၣ်ယိၣ်ဘၣ်ဘှီဟဲအါထီၣ်၀ဲဒၣ်န့ၣ်လီၤႉ

ဘၣ်ဆၣ်တကီၢ်ခါခဲအံၤဟီၣ်က၀ီၤ၀ဲအံၤအပူၤတနၢ်ဟူလၢတၢ်ဒုးကဲထီၣ်ဒီးပယီၤသုးမီၤစိရိၤဒံးဘၣ် ဘၣ်ဆၣ်သနါက့ မ့မ့ၢ်လၢဟီၣ်က၀ီၤအပူၤန့ၣ်တၢ်ကစီၣ်ဟူထီၣ်သါလီၤလၢတၢ်ကမၤ၀ဲဒုးယၤတၢ်ဟူးတၢ်ဂဲၤအိၣ်၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

သုးဟံးန့ၢ်တၢ်စိတၢ်ကမီၤ၀ံၤအလီၢ်ခံ လၢခ့ၣ်အဲၣ်ယူၣ်တၢ်ပၢဟီၣ်က၀ီၤတဖၣ်အပူၤ တၢ်ခးလိာ်သးကဲထီၣ်၀ဲဒီးသုးမီၤစိရိၤအၦၤတဖၣ်အိၣ်၀ဲဘၣ်ဆၣ် မ့မ့ၢ် KNU (သုးက့ ၇)ဟီၣ်က၀ီၤပူၤန့ၣ် တုၤလၢခဲအံၤတစုတၢ်ခးလိာ်သးတကဲထီၣ်ဒံး၀ဲဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ