Home တၢ်ကစီၣ် ခီဖျိပယီၤသုးခးလီၤကျိဖးဒိၣ်ဆူသ၀ီပူၤအဃိ ၦၤဒီဖိပၢ်ခံဂၤဘၣ်ဒိဘၣ်ထံး

ခီဖျိပယီၤသုးခးလီၤကျိဖးဒိၣ်ဆူသ၀ီပူၤအဃိ ၦၤဒီဖိပၢ်ခံဂၤဘၣ်ဒိဘၣ်ထံး

732
0
Photo: KNPF

လါမးရှး ၂၇ သီႇ ၂၀၂၁ နံၣ်ႇ ခ့ၣ်အဲးစံၣ်

ကညီကီၢ်စဲၣ်ႇကီးတရံးကီၢ်ဆၣ်ႇအ့ရှါကျဲမုၢ်ကပၤ ဖဲမဟါလါမးရှး ၂၆ သီ မုၢ်နၤခီ ၉ နၣ်ရံၣ်အဆၢကတီၢ် ခီဖျိပယီၤသုးခးလီၤကျိဖးဒိၣ်ဆူကီၤနွဲၣ်သ၀ီပူၤအဃိ လီၢ်က၀ီၤသ၀ီဖိဒီဖိပၢ်ခံဂၤဘၣ်ဒိၣ်ဘၣ်ထံး၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ကီးတရံး=မၠၣ်၀တံၣ်အ့ရှါကျဲမုၢ်ကပၤဒီတကျိၤ ပယီၤသုးပၢဆှၢရဲၣ်ကျဲၤသုး၀ဲၢ်လီၢ်ခိၣ်သ့ၣ်=စကခ ၁၂ စုဒုၣ်တီၤအဖီလာ်သုးကရူၢ်တဖၣ် ခီဖျိခးလီၤကျိဖးဒိၣ် ၃ ဖျၢၣ်ဆူကီၤနွဲၣ်သ၀ီပူၤအဃိ စီၤ၀ါခိၣ် ၂၇ နံၣ် ဒီး အဖိခွါစီၤအဲၣ်စ့ ၅ နံၣ်အံၤ ဘၣ်ဒိ၀ဲဒီးကျိချံအက့အခီအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါတဖၣ် စံးဘၣ်ခ့ၣ်အဲးစံၣ်န့ၣ်လီၤႉ

“ခးလီၤ၀ဲကျိဖးဒိၣ်လၢသ၀ီပူၤ ၃ ဖျၢၣ်လီၤႉ ၃ ဖျၢၣ်အကျါပိၢ်ဖး၀ဲ ၂ ဖျၢၣ်လီၤႉ ကျိချံန့ၣ်ကဘၣ်မ့ၢ်၀ဲ(၆၀ မမ)လီၤႉ စီၤ၀ါခိၣ်န့ၣ်ဘၣ်ဒိ၀ဲအခီၣ်လ့ၢ်ခိၣ်လီၤႉ မ့မ့ၢ်အဖိခွါစီၤအဲၣ်စ့န့ၣ်ဘၣ်၀ဲအခီၣ်လ့ၢ်ခိၣ်အစ့ၣ်လီၤႉ အပါန့ၣ်ဘၣ်ဒိ၀ဲနးတစဲးလီၤႉ မ့မ့ၢ်ဖိသၣ်ခီန့ၣ်ကျိချံအိၣ်တ့ၢ်ဒံး၀ဲလီၤႉ ခဲအံၤတၢ်ဆှၢ အ၀ဲသ့ၣ်ဆူတီနီၢ်တၢ်ဆါဟံၣ်ႉ ကဘၣ်ဆဲးမၤဒ်လဲၣ်န့ၣ်ယတသ့ၣ်ညါဒံးဘၣ်”အဂ့ၢ်န့ၣ် စံး၀ဲန့ၣ်လီၤႉ

Photo: KNPF

တကီၢ်ခါခဲအံၤ ဖဲကီးတရံး=မၠၣ်၀တံၣ်အ့ရှါကျဲမုၢ်ခိၣ်ဒီတကျိၤန့ၣ် ပယီၤသုးတဖၣ်ဟံးန့ၢ်၀ဲလီၢ်ကျဲအမဲာ်ညါ ကီးတရံးကီၢ်ဆၣ်ကလံၤထံးဒူသ၀ီတနီၤအပူၤစ့ၢ်ကီး ဖဲစှၤသီအတီၢ်ပူၤအံၤခီဖျိပယီၤသုးမၤအါထီၣ်ဂံၢ်ဘါအဃိ လီၢ်က၀ီၤဖိတဖၣ်ဘၣ်ယိၣ်၀ဲလၢတၢ်ခးလိာ်သးကကဲထီၣ်န့ၣ်လီၤႉ လၢန့ၣ်မဲာ်ညါစးထီၣ် ဖဲလါမးရှး ၂၅ သီအနံၤ ကီးတရံး၀့ၢ်ပူၤ ခီဖျိနုာ်လီၤသမံးသမိး၀ဲဖးဖီမုၢ်စရီလၢက၀ီၤဒ့ပူၤအဃိ ၦၤအိၣ်လၢ၀့ၢ်ပူၤသ့ၣ်တဖၣ် တၢ်ဘၣ်ယိၣ်ဘၣ်ဘှီတၢ်ပျံၤတၢ်ဖုးဟဲအါထီၣ်၀ဲအဂ့ၢ်န့ၣ် ၦၤအိၣ်၀့ၢ်ပူၤတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ

ဖဲအပူၤကွံာ် လါဖ့ၤဘြူၤအါရံၤ ၂၆ သီအနံၤစ့ၢ်ကီး ဖဲကီးတရံး=ကၠဲၤဒိကျဲမုၢ် သ၀ီသီ သီခါဖၠၣ်အမဲာ်ညါစ့ၢ်ကီး ပယီၤသုးဒီးခ့ၣ်အဲၣ်ယူၣ် သုးက့ ၆ သုးကရူၢ်တဖၣ်အဘၢၣ်စၢၤတၢ်ခးလိာ်သးကဲထီၣ်ဒီး ဖဲန့ၣ် ပယီၤသုးတကပၤသံ၀ဲ ၃ ဂၤဒီး ဘၣ်ဒိဘၣ်ထံး၀ဲ ၄ ဂၤအဂ့ၢ်န့ၣ် ခ့ၣ်အဲၣ်ယူၣ် လီၢ်ခၢၣ်သးတၢ်ဘိးဘၣ်ရၤလီၤ၀ဲၤကျိၤ ထုးထီၣ်ဘိးဘၣ်ရၤလီၤ၀ဲတၢ်ကစီၣ်န့ၣ်လီၤႉ