တၢ်ထီၣ်ဟံးန့ၢ်သုးကလၢၤတၢ်ဒုးအပူၤ ပယီၤသုးသံ ၁၀ ဂၤ တၢ်ဖီၣ်ချုးန့ၢ် ၈ ဂၤအဂ့ၢ် KNU စံး၀ဲ

လါမးရှး ၂၇ သီႇ ၂၀၂၁ နံၣ်ႇ ခ့ၣ်အဲးစံၣ်

ဖဲတနံၤအံၤဂီၤခီအဆၢကတီၢ် တၢ်ထီၣ်ဒုးဟံးန့ၢ်ကွံာ်၀ဲသံမုၢ်ထၣ်ပယီၤသုးကလၢၤလၢအအိၣ်ဆီလီၤအသးဖဲမုၢ်တြီၢ်ကီၢ်ရ့ၣ်ႇဃိၣ်လိာ်ကျိကၢၢ်နံၤဒီး ဖဲန့ၣ်ပယီၤသုးသံ ၁၀ ဂၤကျါပၣ်ဃုာ်၀ဲဒီးသုးရ့ၣ်ခိၣ်(၂) တဂၤဒီး တၢ်ဖီၣ်ချုးသမူ၀ဲ ၈ ဂၤအဂ့ၢ်န့ၣ် ခ့ၣ်အဲၣ်ယူၣ်=ကညီဒီကလုာ်စၢဖှိၣ်ကရၢ သုးက့ ၅ တကပၤစံး၀ဲန့ၣ်လီၤႉ

ဖဲတနံၤအံၤ ဂီၤခီ ၆ နၣ်ရံၣ် တုၤလၢ ၇ နၣ်ရံၣ်အဆၢကတီၢ် ခ့ၣ်အဲၣ်ယူၣ် သုးက့ ၅ သုးတဖၣ် လဲၤထီၣ်ဒုးဟံးန့ၢ်ကွံာ်၀ဲ ကလံၤထံးကီၢ်ခီသုး၀ဲၤလီၢ်ခိၣ်သ့ၣ်=တပခ စုဒုၣ်တီၤအဖီလာ် ခီၣ်ချ့သုးရ့ၣ်=ခမရ ၃၄၉ သံမုၢ်ထၣ်သုးကလၢၤအဂ့ၢ်န့ၣ် ခ့ၣ်အဲၣ်ယူၣ် သုးက့ ၅ ၦၤကတိၤတၢ်ပၢ ပဒိၣ်မါမါ စံးဘၣ်ခ့ၣ်အဲးစံၣ်န့ၣ်လီၤႉ

အ၀ဲစံး၀ဲလၢ “သုုးမီၤစိရိၤကလီၤၦီၢ်ကွံ၁်အဂီၢ်ဒ်ကမျၢၢ်ဃ့ထီၣ်၀ဲအဖီခိၣ် မ့ၢ်မုၢ်နံၤတနံၤဃီဒီးတနံၤအံၤ လါမးရှး ၂၇ သီ လၢအမ့ၢ်ပယီၤသုးမုၢ်ဒိၣ်မုၢ်နံၤဒီး ပ၀ဲသုးက့ ၅ အံၤ မ့ၢ်တၢ်မၤဖျါထီၣ်အမိၢ်လံၤမိၢ်ၦၢ်လီၤႉ ပယီၤသုးလၢအသံတဖၣ်အကျါပၣ်ဃုုာ်၀ဲဒီး သုးရ့ၣ်ခိၣ်(၂)တဂၤလီၤႉ

လၢတၢ်ဖီၣ်ချုးသမူ၀ဲအကျါ ပၣ်ဃုာ်၀ဲဒီးဆၣ်တဖီးတဂၤလီၤႉ တနီၤန့ၣ်ဃ့ၢ်ပူၤဖျဲးထီၣ်အသးလီၤႉ မၤန့ၢ်၀ဲစုက၀ဲၤဒီး တၢ်ဖိတၢ်လံၤလၢအဂၤတနီၤစ့ၢ်ကီးလီၤ” အဂ့ၢ်န့ၣ် စံး၀ဲန့ၣ်လီၤႉ

ဘၣ်ထွဲဒီးတၢ်ထီၣ်ဟံးန့ၢ်ကွံာ်ပယီၤသုးကလၢၤတၢ်ဂ့ၢ်အံၤ ဒ်ခ့ၣ်အဲၣ်ယူၣ်ထုးထီၣ်ဘိးဘၣ်ရၤလီၤတၢ်မၤနီၣ်တၢ်ဂီၤတဖၣ်အသိး ပထံၣ်ဘၣ်လၢ ပယီၤသုးလၢအသံကွံာ်တဖၣ်ဒီးတၢ်ဖီၣ်ချုးသမူ၀ဲတဖၣ်အသိး တၢ်မၤန့ၢ်ဃုာ်၀ဲဒီးကျိချံၦာ်သၣ်ဒီးစဲးတၢ်ဖိတၢ်လံၤလၢအဂၤတဖၣ်အါအါဂီၢ်ဂီၢ်န့ၣ်လီၤႉ

လၢတၢ်ထီၣ်ဒုးဟံးန့ၢ်ကွံာ်ပယီၤသုးကလၢၤအံၤအပူၤ ခ့ၣ်အဲၣ်ယူၣ် သုးက့ ၅ တကပၤ စူာ်ကွံာ်အသး ၁ ဂၤႇ ဘၣ်ဒိ၀ဲ ၁ ဂၤဒီး တကီၢ်ခါသံမုၢ်ထၣ်သုးကလၢၤအံၤစ့ၢ်ကီး ခ့ၣ်အဲၣ်ယူၣ် သုးက့ ၅ ဟံးန့ၢ်ကွံာ်၀ဲလံအဂ့ၢ်န့ၣ် စံး၀ဲန့ၣ်လီၤႉ