လါယနူၤအါရံၤ ၂၇ သီ, ၂၀၂၆ နံၣ်, ခ့ၣ်အဲးစံၣ်
ဒူသထူၣ်ကီၢ်ရ့ၣ် (သုးက့ ၁)ဟီၣ်ကဝီၤပူၤ ဖဲမဟါလါယနူၤအါရံၤ ၂၆ သီ မုၢ်ဃ့ၢ်လီၤအဆၢကတီၢ်န့ၣ် တၢ်ဒုးကဲထီၣ်တအိၣ် ပယီၤသုးခးလီၤကျိဖးဒိၣ်အဃိ တၢ်ဒီဖံလံၤသံဝဲ ၂ ဂၤဒီးဘၣ်ဒိ ၁ ဂၤ အဂ့ၢ်န့ၣ် သဝီပှၤဘၣ်မူဘၣ်ဒါစံးဘၣ် ခ့ၣ်အဲးစံၣ်-ကညီတၢ် ကစီၣ်န့ၣ်လီၤ.
ကၠဲးထိၣ်ကီၢ်ဆၣ် အံလူၢ်ကရူၢ်အပူၤ ဖဲမဟါမုၢ်ဃ့ၢ်လီၤ ၁း၃၀ ဃၣ်ဃၣ်အဆၢကတီၢ် ပယီၤသုးလၢ အိၣ်ခီၣ်ချ့သုးရ့ၣ်(ခမရ-၃)အံၤ တဖၣ် ခးလီၤဝဲကျိဖးဒိၣ်(၂)ဖျၢၣ် တဖျၢၣ်န့ၣ်လီၤတဲၥ်ဝဲလၢ ဖုဝါသံၣ်သဝီဃၢၤ ဒီး တဖျၢၣ်န့ၣ်လီၤတဲၥ်ပိၢ်ဖးထီၣ်ဝဲလၢအံလူၢ်သဝီ ဖးဒိၣ် ဟံၣ်တဖျၢၣ်ဖီခိၣ်ဟံၣ်အူအီၣ်ခဲလၢၥ်အဃိ တၢ်ဒီဖံလံၤခံဂၤအံၤ သံဘၣ်ဟဲကဲထီၣ်ဝဲဒ်အံၤ အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဘၣ်ဃးတၢ်ဂ့ၢ်ကဲထီၣ်သးအံၤ အံလူၢ်ကရူၢ်ပှၤဘၣ်မူဘၣ်ဒါတဂၤစံးဝဲလၢ“အအိၣ်ခးတၢ်လၢ(ခမရ-၃)တကပၤ .ကျိဖးဒိၣ်န့ၣ်လီၤ တဲၥ်ဘၣ်ဝဲအံလူၢ်သဝီဖးဒိၣ်ပှၤဟံၣ်တဖျၢၣ်န့ၣ်ဘျီဟံၣ်န့ၣ်အူအီၣ်ခဲလၢၥ်လီၤ. ဘၣ်လၢပှၤဒီဖံလံၤ(၂)ဂၤန့ၣ်ဖီအီၣ်မ့ၤဆၢကတီၢ် အဃိ သံဝဲဖဲန့ၣ်ခံဂၤလၢၤန့ၣ်.အဘၣ်ဒိန့ၣ်(၁)ဂၤလီၤ.တၢ်တဂၤအံၤနါက့ဖံသးပှၢ် တဂၤန့ၣ်အဖိမုၣ်လီၤ. တၢ်ဘၣ်ယိၣ်တအိၣ်ဘၣ်. ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤန့ၣ်လီၤ.
တကးဒံးဘၣ်ကျိဖးဒိၣ်အံၤအဃိ တၢ်ဒီဖံလံၤ(၂)ဂၤအံၤအမဲၥ်ညါ ဘၣ်ဒိဝဲဖံသးပှၢ်အံၤအဖိမုၣ် နီၢ်သီၤတၤ(၂၇)နံၣ်အံၤအစု ဒီး ဒ်န့ၣ်အသိးမ့ၣ်အူအီၣ်ဟံၣ်ဘျီဝဲအံၤစ့ပၣ်ဃုၥ်ဝဲစ့ပယီၤ(၃၈)ကလီၢ်ကၠးအဂ့ၢ်န့ၣ် အံလူၢ်သဝီပှၤဘၣ်မူဘၣ်ဒါတဂၤဃီဝဲန့ၣ် စံးအါထီၣ်ဝဲန့ၣ်လီၤ.
ဒ်လီၢ်ကဝီၤပှၤဘၣ်မူဘၣ်ဒါအတၢ်မၤနီၣ်စရီပူၤစံးဝဲအသိးန့ၣ် တၢ်ဒီဖံလံၤလၢအသံ(၂)ဂၤန့ၣ်မ့ၢ်ဝဲ နီၢ်အ့ဝ့(၅၉)နံၣ်ဒီးအလံၤမုၣ် နီၢ်မိစွ့ၣ်စ့ၣ်(၃)နံၣ် မ့ၢ်ဒံးဝဲဖိသၣ်ဆံးတဂၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
အံလူၢ်ဖးဒိၣ်သဝီအံၤအိၣ်ဝဲလၢဝ့ၢ်တကူၣ်-မီၣ်လမၠဲၣ်ကျဲမုၢ်လါခိၣ်ဒီး သဝီအံၤအပူၤ ညီနုၢ်န့ၣ်ပယီၤသုးကျိၤနုၥ်လီၤဒီးခးလီၤကျိဖးဒိၣ် တၢ်သံတၢ်ဘၣ်ဒိဘၣ်ထံးတၢ်ဟးဂူၥ်ဟးဂီၤကဲထီၣ်အိၣ်တလီၢ်လီၢ်အဃိ ကမျၢၢ်လၢအိၣ်ဘူးဖဲန့ၣ်တဖၣ်ပျံၤတၢ် ဟးပလဲၥ်သးအိၣ်ဒီး ဖဲမဟါအနံၤခီဖျိကဲထီၣ်ကဒီးသးအဃိသဝီဖိတဖၣ်ပျံၤတၢ်ဃ့ၢ်ထီၣ်ကဒီးဝဲအိၣ်အဂ့ၢ်န့ၣ် သဝီအံၤပှၤဘၣ်မူဘၣ် ဒါစံးဝဲန့ၣ်လီၤ.
ဒ်န့ၣ်အသိးဖဲအပူၤကွံၥ်(၂၀၂၅)လါဒံၣ်စ့ဘၢၣ် ၂၄ သီအနံၤစ့ၢ်ကီး လၢအံလူၢ်သဝီဖးဒိၣ်အပူၤ ပယီၤသုး(ခမရ-၃)တဒူၣ်ဃီဝဲအံၤ ပညိၣ်ခးလီၤကျိဖးဒိၣ် လီၤတဲၥ်ပိၢ်ဖးထီၣ်လၢသဝီခါဖၠၣ်ကရၢၢ်ပူၤအဃိ ကမျၢၢ်သံ(၃)ဂၤဒီးဘၣ်ဒိဘၣ်ထံး(၂)ဂၤကဲထီၣ်တ့ၢ် ဒံးဝဲန့ၣ် လီၤ.
