ဒ်သိးတၢ်က့ၤအိးထီၣ်ကၠိကန့ၢ်အဂီၢ် ကူၣ်သ့ခိၣ်၀ဲၤဒၢးဟးထၢကၠိသရၣ်/သရၣ်မုၣ်လၢအက့ၤထီၣ်ကဒါကၠိအနီၣ်ဂံၢ်

လါအ့ဖြ့ၣ် ၂၇ သီႇ ၂၀၂၁ နံၣ်ႇ ခ့ၣ်အဲးစံၣ်

လါလၢကဟဲ လါယူၤလံအတီၢ်ပူၤ ခီဖျိသုးကီၣ်ကးရဲၣ်ကျဲၤ၀ဲလၢကက့ၤအိးထီၣ်ဂံၢ်ခီၣ်ထံးကၠိတဖၣ်အဃိ ကူၣ်သ့ခိၣ်၀ဲၤဒၢးလၢအဘၣ်ထွဲတဖၣ် ဟးလူၤထၢ၀ဲဒၣ် ကၠိသရၣ်/သရၣ်မုၣ်လၢအကသိၣ်လိတၢ်တဖၣ်အမံၤစရီအဂ့ၢ်န့ၣ် သ့ၣ်ညါဘၣ်လၢကၠိသရၣ်/သရၣ်မုၣ်အအိၣ်န့ၣ်လီၤႉ

ကီၢ်ဆၣ်ကူၣ်သ့ခိၣ်၀ဲၤဒၢးဟးထၢ၀ဲကၠိသရၣ်/သရၣ်မုၣ်လၢအပၣ်ဃုာ်လၢ (CDM)တၢ်ဟူးတၢ်ဂဲၤအပူၤတဖၣ်ဒီး ကၠိသရၣ်သရၣ်မုၣ်လၢအတပၣ်ဃုာ်တဖၣ်အနီၣ်ဂံၢ်စရီအမဲာ်ညါ ကၠိကရၢၢ်ပူၤဒ်သိးတၢ်ကတြီ Covid-19 တၢ်ဆါအဂီၢ်တၢ်အိၣ်ကတဲၤကတီၤတၢ်အိၣ်သးဒီး ဟးလူၤထၢ၀ဲ ဒၣ်ကၠိသရၣ်/သရၣ်မုၣ်တလဲၤထီၣ်၀ဲဒၣ်တၢ်သိလိအဂ့ၢ်အကျိၤတဖၣ်အဂ့ၢ်န့ၣ် သ့ၣ်ညါဘၣ်လၢဖၣ်အၣ်ကီၢ်ဆၣ် သရၣ်မုၣ်ကၠိခိၣ်အအိၣ်န့ၣ်လီၤႉ

ဖၣ်အၣ်ကီၢ်ဆၣ် သရၣ်မုၣ်ကၠိခိၣ်လၢတအဲၣ်ဒိးပာ်ဖျါအမံၤတဂၤ စံး၀ဲ “သရၣ်/သရၣ်မုၣ်လၢတထီၣ်၀ဲဒၣ် ကၠိသရၣ်/သရၣ်မုၣ်တၢ်သိၣ်လိန့ၣ်အနီၣ်ဂံၢ်အါမးလီၤႉ ခဲအံၤဟးလူၤထၢ၀ဲၦၤလၢအနုာ်လီၤဟူးဂဲၤလၢ (CDM) အပူၤတဖၣ်လီၤႉ ၀ံၤဘျီဘၣ်မနုၤအဃိတထီၣ်တၢ်သိၣ်လိဘၣ်လဲၣ်ႉဟဲသံကွၢ်၀ဲတၢ်သ့ၣ်တဖၣ်န့ၣ်လီၤႉ ပ၀ဲသ့ၣ်တဖၣ်ဒုလ့ၤတက့ၤတသိၣ်လိတၢ်လၢသုးမီၤစိရိၤသနူအဖီလာ်ဘၣ်န့ၣ် တဲဃာ်ရှဲရှဲလီၤႉ ပတထီၣ်ဟုၣ်ထီၣ်ဘျၣ်တၢ်မၤလိဘၣ်ႉ ကမျၢၢ်မ့ၢ်အဲၣ်ဒိး၀ဲတနံၤမးကက့ၤထီၣ်လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

ကၠိမ့ၢ်က့ၤထီၣ်ကဒါဘၣ်ဆၣ် ကၠိဖိသ့ၣ်ခဲလၢာ်တက့ၤထီၣ်ကဒါကၠိဘၣ်အသိး ကၠိဖိမိၢ်ပၢ်တဖၣ်စ့ၢ်ကီး တဒုးထီၣ်အဖိလၢသုးမီၤစိရိၤတၢ်ပၢအဖီလာ်ဘၣ်အိၣ်၀ဲစ့ၢ်ကီးအဂ့ၢ်န့ၣ် သရၣ်မုၣ်တဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ

လၢန့ၣ်အမဲာ်ညါ ကၠိသရၣ်/သရၣ်မုၣ်လၢအဟူးဂဲၤပၣ်ဃုာ်လၢ (CDM)ပူၤလၢအစံၣ်အိၣ်ခူသူၣ်တဖၣ်ဒီး ကၠိဖိသ့ၣ်တဖၣ်ကဟဲက့ၤကဒါအဂီၢ် တၢ်တဲသကိး၀ဲလၢတၢ်အိၣ်ဖှိၣ်ပူၤအိၣ်၀ဲအသိး တၢ်မ့ၢ်မၤပျံၤမၤဖုးလၢကဘၣ်ဟဲနုုာ်လီၤပၣ်ဃုာ်လၢ(CDM)ပူၤန့ၣ် လဲၤတီၣ်ထီၣ်တၢ်ဂ့ၢ်တၢ်ကျိၤန့ၢ်ဒီး တၢ်ကဟံးန့ၢ်အရ့တုၤလီၤတီၤလီၤအဂ့ၢ်န့ၣ် ဖဲလါအ့ဖြ့ၣ် ၂၄ သီအနံၤ ကညီကီၢ်စဲၣ် သုးကီၣ်ကီၣ်ကးခိၣ်စံးတ့ၢ်ဃာ်၀ဲန့ၣ်လီၤႉ

ကၠိသရၣ်မုၣ်လၢအနုာ်လီၤလၢ (CDM)တၢ်ဟူးတၢ်ဂဲၤပူၤလၢအဘၣ်ဃ့ၢ်အိၣ်ခူသူၣ်တဂၤ စံး၀ဲ“သုးမီၤစိရိၤအံၤခီဖျိအသးတလီၤဂာ်ၦၤကညီလၢၤဘၣ်အဃိ မၤသံ၀ဲဒၣ်ကမျၢၢ်ထံဖိကီၢ်ဖိလီၤႉ ဟးဖီၣ်၀ဲဒၣ်တၢ်လီၤႉ ခဲအံၤကၠိကက့ၤအိးထီၣ်ကဒါလီၤအဃိ တဲ၀ဲလၢတဟံးကၠိ သရၣ်/သရၣ်မုၣ်လၢအစံၣ်အိၣ်ခူသူၣ်တဖၣ်အရ့ဘၣ်ႇက့ၤကိးကဒါ၀ဲ မ့ၢ်တဲ၀ဲဒ်လဲၣ်ဒ်လဲၣ်ဂ့ၤ ပ၀ဲသ့ၣ်တဖၣ်တနာ်အီၣ်အ၀ဲသ့ၣ်နီတဘျီဘၣ်ႉ ပတလိၣ်ဘၣ်အ၀ဲသ့ၣ်ပၢတၢ်ဘၣ်အဃိ ပနုာ်လီၤလၢ(CDM)အပူၤ အ၀ဲသ့ၣ်မ့ၢ်ဆဲးပၢဒံးန့ၣ်တက့ၤမၤတၢ်လၢၤဘၣ်” အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

တကီၢ်ခါကညီကီၢ်စဲၣ်အပူၤ ခီဖျိတၢ်နုာ်လီၤဟူးဂဲၤလၢ(CDM)ပူၤအဃိ သုးကီၣ်ကးဖီၣ်ချုး၀ဲကၠိသရၣ်မုၣ်အိၣ်၀ဲတစှၤန့ၢ်ဒံး ၄ ဂၤဘၣ်အမဲာ်ညါ ကၠိသရၣ်/သရၣ်မုၣ်လၢအဘၣ်စံၣ်အိၣ်ခူသူၣ်အိၣ်၀ဲလၢအကယၤညါအဂ့ၢ်န့ၣ် သ့ၣ်ညါဘၣ်န့ၣ်လီၤႉ